1. Һәјатымыз Јеһова үчүн нә дәрәҹәдә дәјәрлидир?

 ТӘСӘВВҮР един ки, достунуз сизә көһнә, амма чох дәјәрли бир шәкил һәдијјә едиб. Бу, әсл сәнәт әсәридир! Шәклин бәзи јерләриндә рәнҝләр солуб, ләкәләр вә чатлар әмәлә ҝәлиб. Бүтүн бу гүсурлара бахмајараг, шәклин милјонларла доллар гијмәти вар. Тәбии ки, сиз бу һәдијјәјә ҝөрә миннәтдар олаҹагсыныз вә ону горујаҹагсыныз. Ејнилә Јеһова да бизә чох дәјәрли бир һәдијјә вериб. Бу бизим һәјатымыздыр. Јеһова һәјатымызын Онун үчүн нә гәдәр дәјәрли олдуғуну Оғлуну бизим уғрумузда гурбан вермәклә ҝөстәрди (Јәһ. 3:16).

2. 2 Коринфлиләрә 7:1 ајәсинә әсасән, Јеһова биздән нә ҝөзләјир?

² Јеһова һәјат Мәнбәјидир (Зәб. 36:9). Һәвари Булус буну нөвбәти сөзләрлә ифадә етмишди: «Биз Онун сајәсиндә јашајырыг, һәрәкәт едирик вә мөвҹудуг» (Һәв. 17:25, 28). Әминликлә дејә биләрик ки, һәјатымыз Јеһовадан бир әнамдыр. О бизи јашамаг үчүн лазым олан һәр бир шејлә тәмин едиб (Һәв. 14:15—17). Бунунла белә, О, һәјатымызы мөҹүзәви шәкилдә горумур. Әксинә, О биздән ҝөзләјир ки, физики вә руһани сағламлығымызы горумаг үчүн әлимиздән ҝәләни едәк. (2 Коринфлиләрә 7:1 ајәсини охујун.) Нәјә ҝөрә һәјатымызы, сағламлығымызы горумалыјыг вә буну неҹә едә биләрик?

3. Сағламлығымызы горумағымызын сәбәбләриндән бири нәдир?

³ Нәјә ҝөрә сағламлығымызын гејдинә галмалыјыг? Сәбәбләрдән бири одур ки, биз Јеһоваја хидмәтдә әлимиздән  ҝәләнин ән јахшысыны етмәк истәјирик (Марк 12:30). Истәјирик ки, бәдәнимизи «дири, мүгәддәс вә мәгбул гурбан кими Аллаһа тәгдим [едәк]» (Ром. 12:1). Она ҝөрә дә сағламлығымыза хәтәр јетирәҹәк шејләрдән узаг ҝәзирик. Бу о демәк дејил ки, биз һеч вахт хәстәләнмәјәҹәјик, амма јенә дә, биз сағламлығымызы горумаг үчүн әлимиздән ҝәләни едирик. Чүнки бунунла сәмави Атамызын вердији һәјат әнамыны гијмәтләндирдијимизи ҝөстәририк.

4. Давуд падшаһ нә етмәјә гәтијјәтли иди?

⁴ Давуд падшаһ Јеһованын вердији һәјат әнамыны нәјә ҝөрә бу гәдәр гијмәтләндирдијини белә изаһ етмишди: «Өлсәм, гәбрә дүшсәм, нә фајдасы? Торпаг Сәни мәдһ едәрми? Сәдагәтиндән данышармы?» (Зәб. 30:9). Ола билсин, Давуд бу сөзләри һәјатынын сонуна јахын гәләмә алмышды. Амма о, Јеһованы мәдһ етмәк үчүн әлиндән ҝәләни едирди ки, сағламлығыны горусун вә јашасын. Шүбһәсиз, биз дә буну истәјирик.

5. Гоҹа вә ја хәстә олмағымыздан асылы олмајараг, нә етмәлијик?

⁵ Ола билсин, хәстәлик вә гоҹалыг уҹбатындан биз әввәлләр ҝөрдүјүмүз ишләри артыг ҝөрә билмирик. Буна ҝөрә дә кәдәрләнирик. Бунунла белә, һеч вахт тәслим олмамалыјыг вә сағламлығымыза бармагарасы бахмамалыјыг. Чүнки нә гәдәр гоҹа, нә гәдәр хәстә олсаг да, Давуд падшаһ кими, Јеһоваја һәмдләр сөјләјә биләрик. Гејри-камил олсаг да, Јеһованын бизә дәјәр вердијини билмәк бизә тәсәлли верир (Мәт. 10:29—31). Һәтта өлсәк дә, О бизи дирилдәҹәк (Әјј. 14:14, 15). Буна ҝөрә дә сағ икән сағламлығымызы вә һәјатымызы горумаг үчүн әлимиздән ҝәләни етмәлијик.   

6. Јејиб-ичмәк мәсәләләриндә Јеһова биздән нә ҝөзләјир?

⁶ Мүгәддәс Китаб сағламлыға гуллуг вә ја дүзҝүн гидаланма һаггында китаб олмаса да, орада Јеһованын бу мәсәләләрә даир нөгтеји-нәзәри әкс олунуб. Мәсәлән, орада Јеһова мәсләһәт ҝөрүр ки, бәдәнимизә зәрәр јетирәҹәк шејләри өзүмүздән узаглашдыраг (Ваиз 11:10). Мүгәддәс Китаб бизә һәм гарынгулулугдан, һәм дә сәрхошлугдан узаг дурмағы бујурур, чүнки бу ҹүр шејләр сағламлығымыза зәрәр јетирә вә һәтта өлүмүмүзә сәбәб ола биләр (Мәс. 23:20). Јеһова истәјир ки, биз нә вә нә гәдәр јејиб-ичәҹәјимизә гәрар верәркән өзүмүзә һаким олмағы баҹараг (1 Кор. 6:12; 9:25).

7. Мәсәлләр 2:11 ајәсиндәки мәсләһәт бизә сағламлығымызла бағлы дүзҝүн гәрар вермәјә неҹә көмәк едир?

⁷ Дүшүнүлмүш, дүзҝүн гәрарлар вермәклә биз Јеһованын вердији һәјат әнамыны гијмәтләндирдијимизи ҝөстәририк (Зәб. 119:99, 100; Мәсәлләр 2:11 ајәсини охујун). Мәсәлән, нә једијимизә фикир вермәлијик. Ола билсин, һансыса јемәји хошлајырыг, амма о, сағламлығымыза пис тәсир едир. Бу заман биз һикмәтли давранараг һәмин јемәкдән имтина едәҹәјик. Һәмчинин кифајәт гәдәр јатмагла, мүтәмади идман етмәклә, ҝиҝијенамызын гејдинә галмагла вә евимизи тәмиз сахламагла да сағламдүшүнҹәли олдуғумузу ҝөстәрәҹәјик.

8. Тәһлүкәсизлијимизин Јеһова үчүн өнәмли олдуғу Мүгәддәс Китабдан неҹә ҝөрүнүр?

⁸ Јеһова Исраил халгыны евдә вә ишдә јарана биләҹәк тәһлүкәли вәзијјәтләрдән горумаг үчүн мүәјјән ҝөстәришләр  вермишди (Чых. 21:28, 29; Ган. 22:8). Кимисә билмәдән өлдүрән инсан бунун аҹы нәтиҹәләрини бичирди (Ган. 19:4, 5). Һәлә доғулмамыш ушаға билмәдән хәтәр јетирән шәхс Гануна әсасән, ҹәзаландырылмалы иди (Чых. 21:22, 23). Мүгәддәс Јазылардан ајдын ҝөрүнүр ки, Јеһова бизим тәһлүкәсизлик гајдаларына риајәт етмәјимизи истәјир.

9. Тәһлүкәдән гачмаг үчүн нә етмәлијик? (Һәмчинин шәкилләрә бахын.)

⁹ Јеһованын вердији һәјат әнамына дәјәр вердијимизи евдә вә ишдә тәһлүкәсизлик гајдаларына риајәт етмәклә ҝөстәрмиш олуруг. Мәсәлән, биз ити әшјалары, зәһәрли кимјәви маддәләри вә дәрманлары тәһлүкәсиз шәкилдә атырыг вә ушагларын әли чатан јерләрдә сахламырыг. Алов, гајнар маје вә електрик ҹиһазлары илә ишләјәркән еһтијаты әлдән вермирик, онлары нәзарәтсиз гојмуруг. Диггәти вә чевиклији азалдан дәрман васитәләриндән, спиртли ичкиләрдән истифадә едәркән, еләҹә дә јухусуз оларкән автомобили идарә етмәмәлијик. Һәмчинин биз бир әлимиздә телефонла машыны идарә етмәмәлијик.

10. Фәлакәтдән әввәл вә фәлакәт заманы нә едә биләрик?

¹⁰ Бәзән һәјатымыз үчүн тәһлүкә јарадан һадисәләрин гаршысыны ала билмирик, хүсусилә дә тәбии фәлакәтләрин, епидемијаларын вә шиддәтли мүнагишәләрин. Фәлакәт баш верән заман комендант саатларына, евакуасија ҝөстәришләринә вә фөвгәладә вәзијјәтлә бағлы гојулан мәһдудијјәтләрә әмәл етмәклә риски азалда, тәһлүкәсизлијимизи горуја биләрик (Ром. 13:1, 5—7). Бәзи фәлакәтләрин баш верәҹәјини әввәлҹәдән билмәк олур. Белә һалларда һөкумәтин вердији ҝөстәришләрә риајәт етмәк һикмәтли һәрәкәт оларды. Јахшы оларды ки, еһтијатда су, тез хараб олмајан гида сахлајаг, илк тибби јардым чантасы һазырлајаг.

11. Јолухуҹу хәстәлик јајылан заман нә етмәлијик?

¹¹ Бәс јашадығымыз әразидә јолухуҹу хәстәлик јајылан заман нә етмәлијик? Дөвләтин вердији тәһлүкәсизлик гајдаларына әмәл етмәлијик. Мәсәлән, әлләримизи јумалыјыг, физики мәсафә сахламалыјыг, маска тахмалыјыг вә карантин гајдаларына риајәт етмәлијик. Бу гајдалара әмәл етмәклә Аллаһын вердији һәјат әнамыны гијмәтләндирдијимизи ҝөстәририк.

12. Мәсәлләр 14:15 ајәсиндәки принсип фәлакәт заманы ешитдијимиз хәбәрләрлә бағлы сечиҹи олмаға неҹә көмәк едә биләр?

¹² Фөвгәладә вәзијјәт заманы биз достларымыздан, гоншуларымыздан, күтләви информасија васитәләриндән дәгиг олмајан мәлуматлар ешидирик. Одур ки, ешитдијимиз «һәр сөзә» инанмаг әвәзинә, һөкумәтин вә сәһијјә ишчиләринин вердији мәлуматы ән дүзҝүн шәкилдә чатдыран етибарлы мәнбәләрә гулаг асмалыјыг. (Мәсәлләр 14:15 ајәсини охујун.) Рәһбәрлик Шурасы вә филиаллар јығынҹаг ҝөрүшләри, тәблиғ иши илә бағлы ҝөстәриш вермәздән әввәл дәгиг мәлумат алмаг үчүн әлләриндән ҝәләни едирләр (Ибр. 13:17). Онларын вердији ҝөстәришләрә әмәл етмәклә һәм өзүмүзү, һәм дә башгаларыны тәһлүкәдән горуја биләрик. Үстәлик, бу ҹүр давранышымыз инсанларда Јеһованын Шаһидләри һагда мүсбәт фикир јарадаҹаг (1 Бут. 2:12).

13. Ганла бағлы мәсәләләрдә һәјат әнамыны гијмәтләндирдијимизи неҹә ҝөстәририк?

¹³ Јеһованын Шаһидләри ганын мүгәддәслијинә һөрмәт етмәләри илә танынырлар. Биз һәтта тәҹили тибби јардым заманы ганкөчүрмәдән имтина етмәклә Јеһованын ганла бағлы ганунуна табе олуруг (Һәв. 15:28, 29). Амма бу о демәк дејил ки, биз өлмәк истәјирик, әксинә, биз Аллаһын вердији һәјат әнамыны гијмәтләндиририк. Ганкөчүрмә илә бағлы олмајан мүалиҹә үсуллары тәгдим едән һәкимләрин көмәјинә үз тутуруг.

14. Ҹидди мүалиҹәјә еһтијаҹымызын олмамасы үчүн нә едә биләрик?

¹⁴ Бу мәгаләнин әввәлиндә гејд олунан тәһлүкәсизликлә бағлы төвсијәләрә әмәл етсәк, ҹидди мүалиҹәјә бир о гәдәр еһтијаҹымыз олмајаҹаг. Сағлам олсаг, һәтта әмәлијјат кечирмәли олсаг белә тез сағалаҹағыг. Биз һәмчинин евдә вә ишдә тәһлүкәсизлик тәдбирләринә, еләҹә дә јол һәрәкәти гајдаларына риајәт етсәк, ҝөзләнилмәз тәҹили әмәлијјатлара еһтијаҹ олмајаҹаг.

15. а) «Тибби мүдахиләјә даир билдириш вә етибарнамә» сәнәдини һәмишә јанымызда сахламаг нәјә ҝөрә ваҹибдир? (Һәмчинин шәклә бахын.) б) Видеода ҝөстәрилдији кими, ганла бағлы гәрар верәркән һарадан мәлумат тапа биләрик?

¹⁵ Һәјат әнамыны гијмәтләндирдијимиз үчүн биз «Тибби мүдахиләјә даир билдириш  вә етибарнамә» b сәнәдини долдуруруг вә ону һәмишә јанымызда сахлајырыг. Бу сәнәддә ганкөчүрмә вә диҝәр мүалиҹә үсуллары илә бағлы мөвгејимизи гејд едирик. Бәс сизин «Тибби мүдахиләјә даир билдириш вә етибарнамә» сәнәдиниздәки мәлуматлары јениләмәјә еһтијаҹ вар? Әҝәр сиз бу сәнәди долдурмалы вә јахуд јениләмәлисинизсә, буну ҝеҹикдирмәјин. Мөвгејимизи ајдын шәкилдә јазсаг, һәкимләр тәҹили тибби мүдахилә заманы вахт итирмәдән бизә көмәк едә биләҹәкләр. Бундан әлавә, тибб ишчиләри һансы мүалиҹә үсулунун вә дәрманларын бизим үчүн тәһлүкәли олдуғуну биләҹәк вә ондан истифадә етмәјәҹәк c.

16. «Тибби мүдахиләјә даир билдириш вә етибарнамә» сәнәдини неҹә долдураҹағынызы билмирсинизсә, нә едә биләрсиниз?

¹⁶ Нә гәдәр ҝәнҹ, сағлам олмағымыздан асылы олмајараг, гәзалар, хәстәликләр гачынылмаздыр (Ваиз 9:11). Она ҝөрә дә «Тибби мүдахиләјә даир билдириш вә етибарнамә» сәнәдини долдурмаг ағыллы һәрәкәт оларды. Әҝәр бу сәнәди неҹә долдураҹағынызы  дәгиг билмирсинизсә, ағсаггалларыныздан көмәк истәјин. Онлар сизә бу сәнәди неҹә долдурмалы олдуғунузу изаһ едәҹәкләр, амма һансы мүалиҹә үсулуну сечәҹәјинизи сиз өзүнүз гәрарлашдырмалысыныз. Бу сизин мәсулијјәтиниздир (Гал. 6:4, 5). Бунунла белә, гардашлар сизә көмәк едәҹәк ки, тибби проседурлары баша дүшәсиниз вә сечиминизи јазылы шәкилдә, ајдын ифадә едә биләсиниз.

17. Сағламлыг мәсәләләриндә дәрракәли олдуғумузу неҹә ҝөстәрә биләрик?

¹⁷ Сағламлыгла, мүалиҹәләрлә бағлы гәрарларын чохуну Мүгәддәс Китабла тәрбијә олунмуш виҹданымыз әсасында веририк (Һәв. 24:16; 1 Тим. 3:9). Гәрар верәркән, буну башгалары илә мүзакирә едәркән јахшы оларды ки, Филиппилиләрә 4:5 ајәсиндәки принсипи тәтбиг едәк. Ајәдә јазылыб: «Гој һамы сизи дәрракәли адам кими танысын». Дәрракәли олсаг, сағламлығымыза ҝөрә һәддән артыг нараһат олмајаҹағыг вә башгаларыны мәҹбур етмәјәҹәјик ки, һансыса тибби проседурларла бағлы бизимлә ејни фикирдә олсунлар. Баҹы-гардашларымызын вердији гәрарлар бизимкиндән фәргли олса да, биз онлары севирик, гәрарларына һөрмәт едирик (Ром. 14:10—12).

18. Һәјат әнамына ҝөрә миннәтдар олдуғумузу неҹә ҝөстәрә биләрик?

¹⁸ Биз һәјат мәнбәји олан Јеһоваја миннәтдар олдуғумузу Онун үчүн әлимиздән ҝәләнин ән јахшысыны етмәклә вә һәјатымызы горумагла ҝөстәририк (Вәһј 4:11). Дүздүр, инди хәстәликләр, фәлакәтләр гачынылмаздыр. Амма унутмамалыјыг ки, Јараданымызын бизимлә бағлы нијјәти бу дејилди. Тезликлә, О бизә ағры-аҹынын, өлүмүн олмадығы әбәди һәјат бәхш едәҹәк (Вәһј 21:4). Бу вахт әрзиндә исә сағламлығымызын гејдинә галыб, сәмави Атамыз Јеһоваја хидмәт етмәк неҹә дә хошдур!