1. Lelaa Yéhôva a ntehe niñ yés?

 HÉGDA le mut a nti we soso ndap. Pén i nkahal séhi mu, i gwé yak mapondo i nyôl. Ndi i nhee diye ngandak. Ibabé pééna, w’a ti nye mayéga inyu i ndap i, u yoñ ki ngéda i tééda yo. Yéhôva a bi éba le niñ yés i yé nseñ ngandak i ngéda a bi neebe le Man wé a wo inyu yés.​—Yôhanes 3:16.

2. Kaat 2 Korintô 7:1 i ñéba le kii Yéhôva a nsômbôl le di boñ?

² Yéhôva nyen a nti niñ. (Tjémbi 36:9) Ñôma Paul a bi unda i jam li i ngéda a kal le: “Ni njel yé nyen di gwé niñ, di nyiñgha, di héga ki.” (Minson mi baôma 17:25, 28) Jon di kôli kal le niñ yés i yé likébla li Yéhôva. A nti bés i ni i i mbéda bés. (Minson mi baôma 14:15-17) Ndi Yéhôva a mboñ bé manyaga inyu boñ le di wo bañ. A nsômbôl le di boñ kii yosôna di nla inyu ba mbôô, ni inyu bana maada malam ni nye. (Añ 2 Korintô 7:1.) Lelaa di nla tibil tééda niñ yés? Kii i nla hôla bés i boñ i jam li?

3. Inyuki di nlama yoñ ngéda ni nyuu yés?

³ Di nlama yoñ ngéda ni nyuu yés inyu boñ le di gwélél Yéhôva ni ngui yés yosôna. (Markô 12:30)  Di gwé ngôñ i ti ‘manyuu més kiki sesema i yômi, i pubhaga, i lémlak Nyambe.” Inyu hala nyen di nkeñgle mam momasôna ma ma nla boñ le di kwo kon. (Rôma 12:1) Ndi to di nyoñ yihe lelaa, d’a kwo ndik kon. To hala, di mboñ kii yosôna di nla inyu ba mbôô, inyule di nsômbôl ti Yéhôva mayéga inyu likébla lini le niñ.

4. Kiñe David a bééna ngôñ i boñ kii?

⁴ Kiñe David a bi unda le a nti Yéhôva mayéga inyu likébla lini li niñ, i ngéda a kal le: “Nyemb yem i ga hôla kii? Nseñ ni le kii ibale me nsôs i soñ? Baa nluñ nték u ga bégés we? Baa nluñ nték u ga añal maliga moñ?” (Tjémbi 30:9) I nene le Kiñe David a bi tila bibañga bini a bak bebee ni nyemb. Ndi a bééna ngôñ le a kônde niñ inyu boñ le a laa bégés Yéhôva. Ibabé nkaa, yak bés, i mahoñol ma mon di gwé.

5. To di ñun, to di nkon, kii di yé le di boñ?

⁵ Kon tole biuni bi nla sôña bés i boñ mam di bé boñ behee. Hala a nla boñ le di kahal kônha ngoo. Ndi hala a tômbôs bañ bés, di waa bañ to yoñ ngéda ni nyuu yés. Inyuki? Inyule to di ñun lelaa, to di nkon lelaa, di nla bégés Yéhôva kiki Kiñe David. I ngéda di ntehe le Yéhôva a ngwés bés to i ngéda di ñun tole di nkon, hala a nlédés bés. (Matéô 10:29-31) To ibale di nwo, a gwé ngôñ i tugul bés. (Hiôb 14:14, 15) Inyu hala nyen i ngéda di yii i niñ, di nlama boñ kii yosôna di nla inyu tééda niñ yés.

6. Kii Yéhôva a niiga bés inyu jam li je ni nyôba?

⁶ Bibel i ta bé kaat i dokta tole kaat i nlamb, ndi i nyeelene bés mahoñol ma Yéhôva inyu jam li je ni mbôô wés. Kiki hihéga, Yéhôva a nkal le di “kee haa ni mam mabe” inyule ma nla boñ le di kwo kon. (Ñañal 11:10) Yéhôva a ñoo mbina je ni ngandak nyôba inyule bi nla boñ le di kwo kon, di wo. (Bingéngén 23:20) Yéhôva a nsômbôl le di bana hôtnyuu inyu jam li je ni nyôba.​—1 Korintô 6:12; 9:25.

7. Lelaa maéba ma yé i kaat Bingéngén 2:11 ma nla hôla bés?

⁷ Inyu yoñ makidik ma ma ñunda le di nti Yéhôva mayéga inyu likébla li niñ, di nlama hek pék. (Tjémbi 119:99, 100; Añ Bingéngén 2:11.) Kiki hihéga, di nlama bé je to kii. Ibale di ngwés ngim bijek, ndi di yik le bi nla boñ bés béba di je bañ gwo. Di ñunda ki le di nhek pék i ngéda di nañal loñge, di boñok sport hiki ngéda, di bak mabupi.

8. Lelaa Bibel i ñunda bés le di nlama yoñ yihe?

⁸ Mbén Yéhôva a bi ti Lôk Israel i bé unda le ba nlama keñgle mam ma ma nla boñ bo béba, i ngéda ba yé i ndap tole i bôlô. (Manyodi 21:28, 29; Ndiimba Mbén 22:8) I ngéda mut a bé a nol mut numpe ngi kôôba, ba bé kogse nye bañga  likogsege. (Ndiimba Mbén 19:4, 5) Yak i ngéda bôt ba bé ba nol man a yii i libum, ba bé ba kogse bo. (Manyodi 21:22, 23) Bibel i ñunda le Yéhôva a gwé ngôñ le di yoñ yihe.

9. Kii di nlama boñ inyu boñ le di babaa bañ? (Béñge yak bititii.)

⁹ Inyu unda le di nti Yéhôva mayéga inyu likébla lini le niñ, di nlama yoñ yihe i ngéda di yé i ndap tole i bôlô. Kiki hihéga, i ngéda di ngwélél gwom kiki bo ngwende ni nkwade tole bee, di nlama bii gwo i homa boñge ba nla bé pam. Di nlama yoñ yihe i ngéda di nkoda hié, di ntéé malép i juu, tole i ngéda di ngwélél bikei, di yék bañ gwo, di kee. Di nlama bé luk matôa i ngéda di nyo bee bi bi ntééñga bés, i ngéda di nyo maok tole i ngéda hilo hi gwé bés, di gwélél bañ ki to téléfôn i ngéda di nluk matôa.

10. Kii di nlama boñ ilole bikuu bi nkwo ni i ngéda bikuu bi nkwo?

¹⁰ Ngim mangéda di ta bé le di keñgle bikuu, kiki bo mbuk mbebi, makon ni gwét. Ndi di nla boñ le jam libe li kwél bañ bés i ngéda di nôgôl mbén i ngomin i i nkal le di nyodi ha homa di yé, ni mambén mape. (Rôma 13:1, 5-7) Inyu boñ le di nok bañ ndutu, di nlama noñ bikila ba nti bés mu libôga jés. Kiki hihéga, di nla tééda malép, ngim bijek bi bi ñôbi bé, ni gwom bipe.

11. Kii di nlama boñ i ngéda kon u yé mu mbégdé?

¹¹ Ibale ngim kon i yé mu mbégdé kii di nlama boñ? Di nlama noñ bikila bi ngomin kiki bo i jôwa moo, i yén haa ni bôt bape, i haba mask ni i yén bésbotama i ndap. I ngéda di nôgôl bikila bi, di ñunda le di nti Yéhôva mayéga inyu likébla lini le niñ.

12. Lelaa kaat Bingéngén 14:15 i nla hôla bés inyu mam bôt ba mpot i ngéda bikuu bi nkwo?

¹² I ngéda bikuu bi nkwo, mawanda més ni bôt ba libôk ba nla pot mam ma téé bé, di nla yak nok i mam ma i radiô tole i télé. Iloole di emble “hiki jam” ba nkal bés, di nlama emble bidokta ni lôk ngomin. (Añ Bingéngén 14:15.) Juu li bakena ntôñ ni Bétel ba mbôk ndugi ba kwel ni bôt ba nyi kii yosôna i yé tagbe, ilole ba nti bés biniigana inyu makoda ni likalô. (Lôk Héber 13:17) I ngéda di nôgôl bo, hala a mboñ le bikuu bi kwél bañ bés to lôk kéé yés. Hala a nla boñ yak le bôt ba kahal gwés Mbôgi Yéhôva mu libôga jés.​—1 Pétrô 2:12.

13. Inyu jam li matjél, lelaa di nla unda le niñ i yé nseñ?

¹³ Bôt ba nyi le Mbôgi Yéhôva i yoñ bé matjél. I ngéda di ntjél yoñ matjél, to ibale kon u nai, di ñéba le di nôgôl mbén i Yéhôva. (Minson mi baôma 15:28, 29) Ndi hala a ngwés bé kal le di nsômbôl wo. Di ngwés niñ. Inyu hala nyen di nyéñ dokta li li nla tibil bés ibabé i ha bés matjél.

14. Kii di nla boñ inyu boñ le kon u gwel bañ bés ni ngui?

¹⁴ Ibale di nôgôl maéba ba nti bés munu yigil ini, hala a nla boñ le kon u gwel bañ bés ni ngui. Ibale di ntibil tééda nyuu yés, di ga hoo témbna to ibale ba nkan bés. Ibale di nhéya gwom bi nla babaa bés i ndap tole i bôlô, di yoñok yihe i ngéda di nluk matôa, hala a nla boñ le ba niñi bañ bés i dokta.

15. (a) Inyuki di nlama bana lipep li li ñunda makidik més inyu jam li matjél? (Béñge titii.) (b) Lelaa di nla yoñ makidik malam inyu jam li matjél?

¹⁵ Kiki di nyi le niñ i yé nseñ, jon di nyônôs lipep li li ñunda makidik més inyu jam li matjél, di hiômnaga jo. b Mu lipep li, di ñunda mahoñol més inyu jam li matjél ni matibla mape. Baa u nyônôs lipep li masañ mana? Ibale u nyônhak bé,  u nimis bañ ngéda. I ngéda dokta a nyi mahoñol més, hala a ga boñ le di lôôs bañ ngéda yañga i ngéda ba nsômbôl tibil bés. Hala a nla boñ ki le dokta a ti bañ bés bee bi bi nla boñ bés béba. c

16. Ibale u nyi bé lelaa u nla yônôs lipep li li ñunda makidik moñ inyu jam li matjél, kii u nla boñ?

¹⁶ Hiki wada wés a nla babaa tole a nla kwo kon. (Ñañal 9:11) Inyu hala nyen di nlama yônôs lipep li li ñunda makidik més inyu jam li matjél. Ibale u nyi bé lelaa u nla yônôs lipep li, bat mimañ mahôla. Ba ga unda we lelaa u nla yônôs jo, ndi ba ga yôñôl bé we makidik. Wemede nyen u nlama yoñ makidik. (Galatia 6:4, 5) Ba ga éba we kii u nlama boñ inyu yônôs jo loñge.

17. Lelaa di nla unda le di nai bé ni litehge jés li mam inyu jam li matibla?

¹⁷ Ngandak makidik di nyoñ inyu jam li matibla i umne i Bañga i Djob.  (Minson mi baôma 24:16; 1 Timôtéô 3:9) I ngéda di nyoñ makidik, tole di nsômbôl kwélél mu ni bôt bape, di nlama noñ maéba ma yé munu i kaat Filipi 4:5 i i nkal le: “I lem nan ini le ni nai bé ni litehge linan li mam i yiba ni bôt bobasôna.” Hala a nkobla le di lôôha bañ tôñ inyu mbôô wés, di tinde bañ to bôt bape i yoñ makidik di nyoñ. To ibale lôk kéé yés i nyoñ bé minlélém mi makidik ni bés, di gwés bo, di tinak bo lipém.​—Rôma 14:10-12.

18. Lelaa di nla ti Yéhôva mayéga inyu likébla lini le niñ?

¹⁸ I ngéda di ntibil tééda niñ yés, di gwéélak Yéhôva ni ngui yés yosôna, wee di yé ti nye mayéga inyu niñ a bi ti bés. (Masoola 4:11) Ndi di nginda konok, yak bikuu bi nkwél bés. Di nyi le hala bé nyen Yéhôva a bé sômbôl le di niñ. Ndék ngéda, di ga niñ i boga ni boga, di ga nok ha bé njôghe, di ga wo ha bé. (Masoola 21:4) Ndi nwaa le di mbol nyoo, di yé maséé i niñ ni i gwélél Tata wés nu gwéha le Yéhôva!