1. ?Laef blong yumi i sas olsem wanem long Jehova?

 TRAEM tingbaot se wan fren i givim wan olfala penting long yu we i sas tumas. Penting ya, kala blong hem i lus lelebet, i gat sam mak mo krak long hem. Nating se i olsem, praes blong penting ya i plante milian vatu. I sua se bambae yu glad long penting ya mo yu protektem gud. Long sem fasin, Jehova i givim wan sas presen long yumi, hemia laef. Mo Jehova i soemaot se hem i tinghae long laef blong yumi, taem hem i givim Boe blong hem olsem wan ransom blong sevem yumi.—Jon 3:16.

2. Folem 2 Korin 7:1, ?Jehova i wantem se yumi mekem wanem?

² Jehova i Stamba blong laef. (Sam 36:9) Aposol Pol i bilivim samting ya, mo hem i talem se: “Hem nomo i mekem se yumi gat laef, yumi stap, mo yumi muvmuv.” (Wok 17:25, 28) Taswe, yumi save talem se laef i wan presen we God i givim. Hem i givim ol samting we yumi nidim blong yumi save stap laef. (Wok 14:15-17) Tede, Jehova i no mekem merikel blong protektem laef blong yumi. Be hem i wantem se yumi lukaot gud long helt blong yumi mo yumi gohed blong wosipim hem. (Ridim 2 Korin 7:1.) ?Taswe from wanem yumi mas lukaot gud long helt mo protektem laef blong yumi? ?Mo olsem wanem blong mekem olsem?

3. ?From wanem yumi mas traehad blong stap helti?

³ Wan risen from wanem yumi mas traehad blong stap helti, hemia blong yumi save gohed blong mekem bes blong yumi long wok blong Jehova. (Mak 12:30) Yumi wantem givim ‘bodi blong yumi i go long God olsem wan sakrefaes we i laef mo i tabu, mo we God i glad long hem.’ Taswe yumi no wantem mekem ol samting we i save mekem yumi sik. (Rom 12:1) I tru, nomata wanem samting yumi mekem, be yumi no save blokem yumi fulwan blong yumi no sik. Be yumi mekem bes blong yumi blong stap helti, from yumi wantem soemaot long Papa blong yumi long heven, se yumi tinghae long laef ya we hem i givim long yumi.

4. ?King Deved i wantem mekem wanem?

⁴ King Deved i eksplenem from wanem hem i tinghae long presen ya laef, taem hem i se: “?Wanem gudfala samting i save kamaot sipos mi ded, taem mi godaon long hol? ?Bambae das i presem yu? ?Bambae hem i talemaot we oltaem yu stap holem promes blong yu?” (Sam 30:9) Maet Deved i raetem ol tok ya long taem we klosap hem i ded. Be hem i wantem tumas blong stap laef, blong hem i save gohed blong presem Jehova. I sua se yumi evriwan i gat sem tingting olsem.

5. ?Nomata se yumi sik o yumi olfala, yumi save mekem wanem?

⁵ Sipos yumi sik o yumi kam olfala, maet yumi no moa save mekem ol samting we yumi stap mekem bifo. Hemia i save mekem yumi harem nogud mo yumi no glad. Nating se i olsem, yumi mas traehad blong lukaot gud long helt blong yumi. ?From wanem? From nomata se yumi sik o yumi kam olfala, yumi save gohed yet blong presem Jehova, olsem King Deved. !I naes tumas blong luksave se Jehova i tinghae long yumi, nomata se yumi sik o yumi olfala! (Mat. 10:29-31) Nating sipos yumi ded, be bambae hem i mekem yumi laef bakegen. (Job 14:14, 15) Naoia we yumi stap laef, yumi wantem mekem bes blong yumi blong lukaot gud long helt mo protektem laef blong yumi.

6. ?Jehova i wantem se yumi mekem wanem taem yumi mekem desisen long saed blong kakae mo dring?

⁶ Nating se Baebol i no wan buk we i givim advaes long saed blong helt, be yet hem i tokbaot tingting blong Jehova long saed blong helt. Eksampol, hem i talem se yumi mas “rutumaot ol nogud samting we oli save spolem bodi” blong yumi. (Pri. 11:10) Baebol i talem se yumi no mas kakae tumas mo dring alkol bitim mak, from we hemia i save spolem helt blong yumi mo kilim yumi ded. (Prov. 23:20) Jehova i wantem se yumi bos long tingting blong yumi, taem yumi mekem desisen long saed blong kakae mo dring.—1 Kor. 6:12; 9:25.

7. ?Olsem wanem advaes ya long Ol Proveb 2:11 i halpem yumi blong mekem gudfala desisen long saed blong helt?

⁷ Yumi save mekem ol desisen we i soemaot se yumi tinghae long presen ya laef we God i givim, taem yumi tingting gud. (Sam 119:99, 100; ridim Ol Proveb 2:11.) Eksampol, bambae yumi tingting gud long samting we yumi wantem kakae. Sipos yumi wantem kakae wan samting we yumi save se bambae yumi sik from, fasin blong tingting gud bambae i blokem yumi blong no kakae samting ya. Mo tu, yumi waes sipos yumi traehad blong slip gud, mekem eksasaes oltaem, mo kipim bodi mo haos blong yumi i stap klin oltaem.

8. ?Olsem wanem Baebol i soemaot tingting blong God long saed blong sefti?

⁸ Loa we Jehova i givim long ol man Isrel i talem samting we oli mas mekem blong protektem olgeta, blong oli no kasem ol rabis aksiden long haos o long ples blong wok. (Eks. 21:28, 29; Dut. 22:8) Sipos wan man i mestem nao i kilim wan narafala man i ded, hem i save kasem wan strong panis. (Dut. 19:4, 5) Loa i talem se sipos ol man oli faet, nao oli mestem oli kilim wan woman we i gat bel mo bebi blong hem i ded long bel, man ya i mas kasem panis. (Eks. 21:22, 23) Baebol i soemaot klia se Jehova i wantem se yumi blokem aksiden.

9. ?Yumi mas mekem wanem blong blokem aksiden? (Yu luk pija.)

⁹ Yumi soemaot se yumi tinghae long presen ya laef, taem yumi traehad blong mekem se evri samting long haos mo long wok i stap sef. Eksampol, sipos yumi wantem sakemaot ol samting we oli sap, ol kemikol we oli posen, o meresin, bambae yumi no putum long wan ples we ol pikinini oli save tajem o i  save givim kil long narafala. Mo tu, taem yumi laetem faea, boelem hot wota, mo yusum ol elektrik tul, bambae yumi lukaot gud se yumi no lego oli on i stap nao yumi goaot. Yumi no mas draev sipos yumi dring wan meresin, alkol, o yumi no slip gud, mo yumi no mas yusum telefon taem yumi stap draev.

10. ?Yumi save mekem wanem bifo, mo long taem we i gat wan trabol i kamaot?

¹⁰ Samtaem, yumi no naf blong blokem wan situesen we i denja blong i no hapen. Olsem ol naturol disasta, ol sik, mo ol faet. Be sipos ol samting ya oli hapen, yumi save stap sef mo ronwe long denja sipos yumi obei long ol haeman blong gavman taem oli givim oda blong yumi aot long wan eria, o blong mekem sam nara samting. (Rom 13:1, 5-7) Sam long ol trabol ya, yumi save rere from bifo we oli hapen, taswe yumi mas folem ol daereksen we ol haeman oli givim long yumi. Eksampol, maet yumi save rerem sam wota mo kakae we oli no save kam nogud, mo sam meresin we yumi nidim.

11. Taem i gat wan sik i stap goraon, ?yumi mas rere blong mekem wanem?

¹¹ ?Yumi save mekem wanem sipos i gat wan sik i stap goraon long ples blong yumi? Yumi mas obei long ol rul we i stap, olsem wasem han oltaem, mekem sosol distensing, werem mask, mo kwarantin. Taem yumi mekem olsem, yumi soemaot se yumi rili tinghae long presen ya laef we God i givim.

12. ?Olsem wanem rul ya long Ol Proveb 14:15 i halpem yumi blong tingting gud long infomesen we yumi kasem taem wan trabol i kamaot?

¹² Taem i gat wan emejensi, samtaem yumi harem ol giaman nius long ol fren, ol neba, mo iven long sosol media. Bitim we yumi bilivim “evri toktok” we yumi harem, i gud yumi lesin long ol stret infomesen we i kam long gavman mo long ol dokta. (Ridim Ol Proveb 14:15.) Hed Kampani mo ol branj ofis oli traehad blong kasem ol stret infomesen, bifo we oli givim ol daereksen long saed blong ol miting mo wok blong prij. (Hib. 13:17) Sipos yumi folem ol daereksen ya, yumi stap protektem yumi wan mo ol narafala. Mo tu, hemia i save pulum ol man long komuniti blong oli gat gudfala tingting long ol Witnes blong Jehova.—1 Pita 2:12.

13. ?Yumi soemaot olsem wanem se yumi tinghae long presen ya laef, taem yumi mas mekem desisen long saed blong blad?

¹³ Plante man oli save gud se ol Witnes blong Jehova oli bilif se blad i tabu. Yumi obei long loa ya blong Jehova long saed blong blad taem yumi no akseptem blong tekem blad transfusen, nating se laef blong yumi i stap long denja. (Wok 15:28, 29) Be hemia i no min se yumi wantem ded. Defren olgeta, yumi tinghae long presen ya laef we God i givim. Taswe yumi traehad blong faenem ol spesel dokta we oli glad blong tritim yumi we oli no yusum blad transfusen.

14. ?Olsem wanem yumi save blokem ol rabis sik mo aksiden?

¹⁴ Yumi save blokem ol rabis sik mo aksiden, sipos yumi folem gud ol samting we yumi bin tokbaot long stadi ya. Taem yumi traehad blong stap helti, bambae yumi kam gud kwiktaem sipos yumi gotru long wan operesen. Mo tu, sipos yumi lukaot gud se haos mo ples blong yumi i stap sef mo yumi obei long ol loa blong trafik, yumi save blokem ol rabis aksiden we i nidim bigfala operesen.

15. (1) ?From wanem i impoten we yumi holem kad blong blad wetem yumi? (Yu luk pija.) (2) Folem video, ?olsem wanem yumi save mekem desisen long saed blong blad?

 ¹⁵ Yumi soemaot se yumi tinghae long laef, taem yumi fulumap kad blong blad, hemia durable power of attorney, b mo holem oltaem wetem yumi. Long kad ya, yumi talemaot tingting blong yumi long saed blong blad transfusen mo ol narafala tritmen. ?Olsem wanem? ?Yu yu gat kad ya wetem yu? Sipos yu nidim blong fulumap wan o fulumap niuwan we yumi yusum naoia, i gud yu mekem kwiktaem. Kad ya i eksplenem finis tingting blong yu, mo bambae i halpem yu blong kasem tritmen kwiktaem. Mo tu, kad ya bambae i givhan blong ol dokta oli no yusum ol tritmen o meresin we oli save spolem yu. c

16. ?Yumi save mekem wanem sipos yumi no sua gud olsem wanem blong fulumap kad blong blad?

¹⁶ Nomata se yumi yangfala o yumi helti, yumi evriwan i save kasem aksiden o sik enitaem. (Pri. 9:11) Taswe i moa waes we yumi fulumap kad ya blong blad. Sipos yu no save olsem wanem blong fulumap  kad ya, yu save askem long ol elda long kongregesen blong yu blong oli givhan long yu. Ol elda oli save gud olsem wanem blong fulumap kad ya, be oli no save mekem ol desisen long bihaf blong yu. Hemia i responsabiliti blong yu wan. (Gal. 6:4, 5) Nating se i olsem, oli save eksplenem ol defren tritmen we yu save jusum, mo halpem yu blong raetemdaon ol tingting blong yu.

17. ?Yumi soemaot olsem wanem se yumi gat stret tingting long saed blong helt?

¹⁷ Evri desisen we yumi mekem long saed blong helt mo tritmen blong yumi, oli folemgud ol samting we yumi lanem long Baebol. (Wok 24:16; 1 Tim. 3:9) Taem yumi mekem ol desisen mo yumi tokbaot wetem ol narafala, yumi mas tingbaot tok we i stap long Filipae 4:5: “Yufala i mas soemaot long olgeta man se yufala i no stap mekem i strong tumas long ol narafala.” Sipos yumi gat stret tingting, bambae yumi no wari bitim mak long helt blong yumi, o traem fosem ol narafala blong oli gat sem tingting olsem yumi. Yumi lavem mo respektem ol brata mo sista blong yumi, nating sipos oli mekem desisen we i defren long yumi.—Rom 14:10-12.

18. ?Yumi soemaot olsem wanem se yumi tinghae long presen ya laef?

¹⁸ Yumi soemaot long Jehova we hem i Stamba blong laef, se yumi tinghae long laef taem yumi lukaot gud long laef, mo yumi mekem bes blong yumi blong presem hem. (Rev. 4:11) Tede, yumi stap kasem ol defren sik mo trabol. Be hemia i no laef ya we Krieta blong yumi i wantem se yumi gat. Taswe i no longtaem bambae hem i givim laef we i no save finis long yumi, we yumi no moa harem nogud mo ded. (Rev. 21:4) Be go kasem taem ya, yumi glad se yumi stap laef mo yumi save mekem wok blong Papa blong yumi long heven, Jehova.