1. Uga nge kap Jahwe ergana kegeluhenta?

 BAYANGKEN lit sekalak temanndu si mereken kam lukisen si enggo metua kel, tapi meherga kel. Piga-piga bagin bas lukisen e enggo meluak, lit sitik melketna, janah warnana pe enggo berubah. Tapi amin pe bage, erga lukisen e miliaren. Pasti ergaindu kel lukisen e janah sikap kel banndu. Bage ka pe, enggo bereken Jahwe kita hadiah si meherga, eme kegeluhen. Meherga kel kegeluhenta man Jahwe, buktina nggit Ia mereken AnakNa guna nebus kita.​—Joh. 3:16.

2. Bali bagi si ikataken bas 2 Korinti 7:1, kai si arapken Jahwe arah kita?

² Jahwe eme Sumber kegeluhen. (Ms. 36:9) Bagenda nina Rasul Paulus, “Perban Ia kap maka kita nggeluh, muit, janah lit.” (Perb. 17:25, 28) Jadi banci sikataken maka kegeluhenta enda eme pemere arah Jahwe. Alu perkeleng iberekenNa keperlunta gelah kita banci tetap nggeluh. (Perb. 14:15-17) Tapi gundari, labo iban Jahwe mukjizat gelah banci kita terus nggeluh. IarapkenNa kita guna ngelakoken kerina si banci silakoken gelah banci tetap sehat ras sisembah Ia. (Baca 2 Korinti 7:1.) Engkai maka arus sijaga kesehaten ras kegeluhenta, janah uga carata ngelakokenca?

3. Kai salah sada alasen perlu sijaga kesehatenta?

³ Salah sada alasen engkai maka siusahaken kel gelah tetap sehat eme perban silayani ateta Jahwe alu cara si mehulina. (Mrk. 12:30) Ateta sibereken ‘dagingta jadi korban si nggeluh, badia, janah ngena ate Dibata,’ emaka la silakoken kai si banci erban kita sakit. (Rom. 12:1) Memang la soal kai pe si enggo silakoken, tetap denga nge kita banci sakit. Tapi, adi silakoken asa bancina gelah tetap sehat, e ncidahken pengerganta man Bapakta si i surga nandangi kegeluhen si iberekenNa.

4. Kai tekad Raja Daud?

⁴ Ijelasken Raja Daud engkai maka iergaina kegeluhen si ibereken Dibata sanga itulisna enda: “Kai kin gunana adi mate aku, adi nusur aku ku lubang kuburen? Banci kin abu muji-muji Kam ras nceritaken kesetianNdu?” (Ms. 30:9) Banci jadi tulis Daud kata-kata enda sanga ia nandangi mate. Tapi, ertekad kel ia gelah banci tetap nggeluh ras sehat asa bancina gelah banci ia terus muji Jahwe. Pasti kita pe seri tekadta.

5. Kai si banci silakoken amin pe sakit kita ntah pe enggo metua?

⁵ Adi sakit kita ntah pe enggo metua, banci jadi lanai mbue si banci silakoken. E banci erban sedih siakap, janah kecewa kita. Tapi, ula sempat kita nyerah janah lanai sijaga kesehatenta. Engkai? Perban la soal kita enggo metua ntah pe sakit, banci denga kita muji Jahwe bagi si ilakoken Raja Daud. Pasti terapuli kel kita meteh maka meherga kita iakap Dibata, amin pe kita sakit ntah pe enggo metua. (Mat. 10:29-31) Amin pe kita mate, merhat kel Jahwe mpekeke kita. (Jop 14:14, 15) Emaka, sanga kita nggeluh denga, siusahaken kel njaga kesehaten bage pe kegeluhenta.

6. Uga nge perukuren Jahwe kerna kebiasanta bas man ras minem?

⁶ Pustaka labo buku kerna njaga kesehaten, tapi isina ncidahken perukuren Jahwe kerna si e. Misalna, ipersingeti Jahwe kita guna ‘mpedauh kai si ncedai’ dagingta. (Peng. 11:10) Ikataken Pustaka maka ula kita mbuesa man ntah pe mbuesa minem inemen si lit alkoholna. Si e banci erban kita sakit ras erban kita mate. (Kua. 23:20) Iarapken Jahwe gelah banci sikendaliken dirita sanga erban keputusen kerna kai si man panganen ras si man inemen, ras uga buena sipan ras siinem.​—1 Kor. 6:12; 9:25.

7. Uga persinget si lit bas Kuan-kuanen 2:11 nampati kita erban keputusen si mehuli kerna kesehatenta?

⁷ Banci sicidahken maka ngata bujur kita man kegeluhen si ibereken Dibata alu nggunaken kengasupen rukurta bas erban keputusen kerna kesehatenta. (Ms. 119:99, 100; baca Kuan-kuanen 2:11.) Contohna, tuhu-tuhu siukuri kai si ateta sipan. Amin pe merhat kita sada pangan tapi siteh e banci erban kita sakit, la sipan pangan e. Sicidahken ka kengasupen rukurta adi siatur perpedemta, ratur kita olahraga, janah sijaga dirita ras rumahta tetap bersih.

8. Uga perukuren Jahwe kerna kai pe si lit hubungenna ras keselamatenta?

⁸ Ibere Jahwe undang-undang man kalak Israel si banci nampati kalak e mpedauh bahaya bas rumah bage pe ingan erdahin. (Kel. 21:28, 29; Ul. 22:8) Adi lit kalak si la sengaja munuh kalak si deban, serius kel hukumenna. (Ul. 19:4, 5) Adi lit kalak si la sengaja ncilakai bayi si lenga lahir, ia arus ihukum. (Kel. 21:22, 23) Arah Pustaka teridah alu jelas maka ate Jahwe siperdiateken keselamatenta.

9. Kai buktina siutamaken keselamaten? (Nen ka gambar.)

⁹ Sibuktiken maka siergai kegeluhen si enggo ibereken Dibata alu njaga rumahta ras inganta erdahin tetap aman. Contohna, sisimpan barang-barang si ntelap, bahan kimia si lit racunna, bage pe tambar gelah ula dat anak-anak. Sanga siambekken barang-barang si bage, silakoken alu cara si aman. Hati-hati  ka kita sanga mpegara api, nanggerken lau, ntah pe sanga nggunaken alat-alat si banci berbahaya, janah la sitading-tadingken. La kita nggit maba motor adi sangana kita la fokus, misalna perban mbaru denga sipan tambar, minem inemen si lit alkoholna, ntah pe sangana kurang perpedemta. La sitagangi HP-ta sanga maba kendaran, gelah banci kita fokus.

10. Kai si banci silakoken sope ras sanga terjadi situasi si bahaya?

¹⁰ Mon-mon, la banci sielakken situasi si berbahaya, misalna bagi bencana alam, wabah penakit, kerusuhen, ras perang. Sanga terjadi si bage, mbelin kemungkinenna banci kita selamat adi sipatuhi petunjuk guna nadingken sada daerah bage pe petunjuk-petunjuk si deban arah pemerentah. (Rom. 13:1, 5-7) Piga-piga situasi darurat banci siteh sope terjadi, emaka perlu siikutken petunjuk arah pemerentah guna ersikap ngadapisa. Contohna, banci sisimpan lau inemen, pangan si ndekah tahan, bage pe perlengkapen P3K.

11. Sanga lit penakit si menular, kai si arus silakoken?

¹¹ Kai si arus silakoken adi lit penakit si menular bas daerahta? Arus kita patuh man petunjuk si ibereken pemerentah. Misalna cuci tan, jaga jarak, make masker, ras karantina. Adi silakoken e, sibuktiken maka siergai kel kegeluhen si ibereken Dibata.

12. Uga prinsip bas Kuan-kuanen 14:15 banci nampati kita sanga lit bencana?

¹² Sanga lit situasi darurat, banci saja sibegi informasi si la tuhu arah teman-temanta, tetanggata, ntah pe arah berita. La kita tek man “kerina ranan.” Tapi, perlu sibegiken informasi si terteki arah pemerentah ras ahli-ahli medis. (Baca Kuan-kuanen 14:15.) Badan Pinpinen ras kantor-kantor cabang erusaha kel guna mastiken informasi si benar sope lenga mereken petunjuk kerna perpulungen ras dahin erberita. (Heb. 13:17) Alu ngikutken petunjuk e, silindungi banta ras kalak si deban. Selain si e, perbahanenta e banci erban merim gelar Saksi-Saksi Jahwe bas daerahta.​—1 Pet. 2:12.

13. Uga carata patuh man undang-undang Dibata kerna dareh ras mbuktiken maka siergai kegeluhen?

¹³ Enterem kalak enggo tehna maka Saksi-Saksi Jahwe ngergai dareh. Perban patuh kita man undang-undang Jahwe, la kita nggit ngaloken transfusi dareh, amin pe bas situasi darurat. (Perb. 15:28, 29) Tapi, enda labo ertina merhat kita mate. Siergai kel kegeluhen si bereken Dibata. Emaka, sidarami dokter si nggit nampati kita nikapken perawaten si mehuli si la nggunaken transfusi dareh.

14. Uga carana gelah adi banci la kita perlu operasi besar?

¹⁴ Adi sijaga kesehatenta alu ngikutken petunjuk si ibahas bas artikel enda, banci saja la perlu kita operasi besar ntah pe ndatken perawaten medis si serius. Amin pe kita arus ioperasi, reh sitikna resikona, janah reh terna kita malem kenca ioperasi. Selain si e, adi sijaga rumahta ras inganta erdahin tetap aman janah siikuti kerina peraturen lalu  lintas, mbelin kemungkinenna la kita kena kecelakan si serius, si banci erban kita arus ioperasi.

15. (a) Engkai maka penting lalap sibaba kartu DPA si terbaru? (Nen ka gambar.) (b) Bagi si ijelasken bas video, uga carata erban keputusen kerna perawaten si merluken dareh?

¹⁵ Perban siergai kegeluhen, siisi Surat Kuasa Khusus Perawatan Kesehatan (kartu DPA) janah lalap sibaba. Bas surat e, situlisken maka la kita ngaloken transfusi dareh, ras sijelasken pilihenta kerna piga-piga perawaten kesehaten. Enggo nge isindu kartu DPA, janah lit nge isina si perlu iganti? Adi lenga isindu ntah pe lenga gantindu isina, ula kam tertaren-taren. Adi enggo situlisken sura-surata alu jelas, banci meter sidat perawaten kesehaten si iperluken. Selain si e, petugas medis pe la kari salah paham janah la berena perawaten ntah pe tambar si banci mbahayaken kita. b

16. Kai si banci silakoken adi ragu kita kerna uga cara ngisi kartu DPA?

¹⁶ Amin pe kita nguda denga ntah pe sehat denga, kerina kita banci kecelakan ntah pe sakit. (Peng. 9:11) Emaka, perlu  siisi kartu DPA. Adi ragu kam uga cara ngisi kartu e, sungkunlah pertua-pertua bas runggunndu. Usahaken kalak e kel ngangkai uga cara ngisi kartu e, emaka banci sampatina kam. Tapi, labo kalak e si erban keputusen man bandu. Kam me si ertanggung jawap. (Gal. 6:4, 5) Si banci ilakoken kalak e eme njelasken pilihen si lit ras uga carana nulisken sura-surandu.

17. Uga carata mbuktiken maka masuk akal kita sanga erban pilihen kerna kesehaten?

¹⁷ Lit mbue pilihen kerna kesehaten ras perawaten kesehaten si perlu siban erpalasken pusuh peratenta si enggo ilatih Pustaka. (Perb. 24:16; 1 Tim. 3:9) Sanga siban keputusen ras sibahas e ras kalak si deban, siikutken ateta prinsip bas Pilipi 4:5. I je ikataken, “Buktikenlah perukuren kena masuk akal man kerina kalak.” Adi masuk akal kita, la kita kuatirsa kerna kesehatenta. Labo ka sipaksaken pendapatta man kalak si deban. Sikelengi ras siergai turang seninata amin pe keputusen si ibanna beda ras kita.​—Rom. 14:10-12.

18. Uga carana mbuktiken maka siergai kegeluhen si ibereken Dibata?

¹⁸ Sibuktiken pengatan bujurta man Jahwe, Sumber kegeluhen, alu njaga kegeluhenta janah sibereken si mehulina man baNa. (Ket. 4:11) Memang gundari arus denga siadapi penakit ras erbage-bage situasi si bahaya. Tapi, labo bage sura-sura Penciptata man banta. Kentisik nari iberekenNa kita kegeluhen si rasa lalap, janah lanai pagi kita sakit ras mate. (Ket. 21:4) Janahta nimai janji e, teruslah siergai kegeluhenta janah silayani Jahwe, Bapakta si i surga!