1. Átiriñein san lebegi wabagari lun Heowá?

 SAMINA humá aba lan ledewehan aban humada aban kuáduru hun le binaduhali ani wéiriti lebegi íbini buin liña lan lau dáseiti abouhali ani féridihali lídangiñe likolorun, gebegimémegili saragu míñunu dólarü. Ma wéiribei yebe línsiñe hun ani hóunigiruñein hamuga buidu? Ítarameme, rúhali Heowá aban idewesei le wéiriti lebegi woun: ibagari. Gayaraati wariñagun gebegi lan wabagari lun Heowá lugundun óunaha lumuti lisaani lun lounwen wawagu (Huan 3:​16).

2. Según le lariñagubei 2 Korintuna 7:1, ka lagurabubei Heowá wámagiñe?

² Ladüga lídanñein Heowá “lubuñe ibagari” (Sal. 36:9). Ligiaméme katei uágubei layanuha apostolu Pábulu dan le lariñagunbei: “Ladüga lídangiñeti Bungiu awanhein lubéi, gabagari wagía, éibuga wagía lidan ubóu le” (Adü. 17:​25, 28). Ligíati gayara lubéi wariñagun aban lan idewesei lúmagiñeti Bungiu ibagari. Ru lumuti le wemegeirubei woun lau ínsiñeni lun gabagari wamá (Adü. 14:​15-​17). Gama lumoun madügünbei Heowá milaguru lun lakipuruniwa lau ibagari. Lubaragiñe lira, agurabati Heowá lun wadügüni sun wayaraati lun wóunigiruni wátuadi, wabagari luma wamadagua luma (aliiha huméi 2 Korintuna 7:1). Ka uagu lunti lubéi wóunigiruni wátuadi, wabagari ani ida luba gayara lan wadügüni?

3. Ka resun wámabei lun wabusenrun buidu lan wátuadi?

³ Aban resun le uágubei wabusenra lun buidu lan wátuadi ladüga busén wamá wíchuguni le buídutimabei wámagiñegua lun Heowá (Mar. 12:​30). Kei busén wabéi wederegeragun woungua sunsuinagubei lun Bungiu “keisi adagaragüdüni wínwanti, sánduti ani le auti lagundaara Bungiu”, ligía madügün wabéi katei le subudi wamuti gayaraabei lan ladügün dañu lun wátuadi (Rom. 12:1). Inarüni íbini lan wóunigiragun woungua saragu, lachülürüba dan lun wasandirun. Lau sun lira adüga wamuti sun wayaraati lun buidu  lan wátuadi lun warufuduni lun Wáguchi le siélubei hínsiñe lan ibagari le líchugubei woun.

4. Ka meha labusenrubei urúei Dawidi ladügün?

⁴ Wéiriti meha lebegi ibagari le líchugubei Bungiu lun urúei Dawidi. Ligía labürühanbei: “Nabureme ka san agañeirunibei lau nounwen, lau nanügǘn abunúa? Malawahan lubadibu le hilaalibei; madimurehan ligíame luagu búaragun” (Sal. 30:9). Másiñati abürüha lani dimurei burí le fiu dan lubaragiñe lounwen. Lau sun lira, busenti meha lawinwandun lun lasigirun alawahei Heowá. Chóuruti sun lan wagía busentiwa wadügüni ligiaméme.

5. Lau sun derebuguhadiwa lan o sandi wamá, ka gayaraabei wadügüni?

⁵ Anhein derebuguhadiwa lubéi o sándiñadiwa lan, háfuga siñá wadügüni le meha wayaraabei adüga lidan meha dan le sügühalibei ani gayaraati ladügün katei le lun wuriba lan wasandiragun woungua luma lun wírudun. Gama lumoun úati mini lan le lunti lan máfaagun wamá lun wóunigiruni wátuadi. Ka uagu? Ladüga íbini derebuguhadiwa lan ani sandi wagía gayaraagili walawahani Heowá, ítara kei ladügüni urúei Dawidi. Ma lanarime darangilaü le wasandirubei dan le wasubudiruni hínsiñe wamá lun Wabungiute ani gebegi wamá lun íbini chará wamá! (Mat. 10:​29-​31). Bereseti wau saragu darí lun füramase lan woun ánhawa lan ounwe láguyuguagüdübadiwa lan (Hob. 14:​14, 15). Ligíati, sun wínwangidiwa lan, buídubei wadüga ánhawa áfaagua saragu lun wóunigiruni dandu wabagari kei wátuadi.

6. Danme le weigin o watun, ka lagurabubei Heowá wámagiñe?

⁶ Mama aban líburu lánina agaranihani Bíbülia mama giñe aban líburu lánina átürüni, gama lumoun ariñaga tumuti woun ka lan lisaminanbei Heowá luagu burí katei le. Kei hénpulu ru tumuti Bíbülia eweridihani le woun: “Dísegüdabei idiheri lídangiñe bisaminan, fuibei súfuri buáriua” (Apur. 11:​10). Lidan katei le íchugubalin wabagari lidan denchaü anihein bacharuaü luma aliluaü ani wéridi tumutiwa Bíbülia luéi (Ari. 23:​20). Ligíati danme le weigin o watun agurabati Heowá lun wárügüdagun woungua (1 Ko. 6:​12; 9:​25).

7. Ida luba wadügüni le lariñagubei Ariñawagúni 2:​11 dan le wanúadirun kaba lan wadüga lun buidu lan wátuadi?

⁷ Anhein busén wabéi warufuduni teinki wamani Bungiu luagu ibagari le líchugubei woun, lunti wayusuruni iarani le wawagubei lun wasaminarun dan le wanúadirun kaba lan wadüga (Sal. 119:​99, 100; aliiha huméi Ariñawagúni 2:​11). Kei hénpulu, dan le wanúadirun kaba lan weiga, mégeitiwa lichú aau. Anhein hínsiñe lubéi somu éigini woun ani subudi wamuti ladügüba lan dañu woun o wuribabei lan lun wátuadi le lunbei wadügüni lun meigin wamani. Lun wóunigiruni wátuadi mosu warumugun buidu, lunti giñe wadügün ehersísiu súnwandan, mosu giñe haruma lan dandu wágubu kei waban.

8. Según le tariñagubei Bíbülia, wéiriti san lisudinin wóunigiruni wabagari lun Heowá?

⁸ Ruti Heowá lúrudu houn ísüraelina lun ua lan danaguaü dandu hábiñe kei lidan hawadigimari (Afu. 21:​28, 29; 2 Lur. 22:8). Anhein meha áfara aban gürigia amu gürigia hilagubei mabusenrunga gayaraati meha lichugún duru luagu (2 Lur. 19:​4, 5). Ariñagati meha lúrudu gadurun lan aban gürigia lau sun mama lan labusenrun anhein adüga damichi lun aban irahü mágurahoungili (Afu. 21:​22, 23). Furanguti tariñaguni Bíbülia busén lan Heowá lun duari wamá luéi wadügün lun lasuseredun somu danaguaü.

9. Ka katei wadügübei lun masuseredun lan somu danaguaü? (Ariha humóun giñe iyawaü).

⁹ Arufuda wamuti seremei wamani Bungiu luagu líchuguni ibagari le woun dan le wadügüni sun wayaraati lun wóunigiragun woungua luéi  danaguaü dandu wábiñe kei lidan wawadigimari. Kéiburi, areida wamuti sun katei le hamanati hawéi irahüñü luma katei burí le péisiniti o árani. Ani anhein mosu lubéi wáguruni katei burí le lunti wachagaruni lidoun aban fulasu le ñein lubéi madügünbei lan damichi lun ni aban gürigia. Góunigiguatiwa woungua luéi watu, luéi tulu le laubei elekütrisida luma giñe luéi katei süti ani mígirun wamuti katei burí le chagagu. Mabugaheitiwa giñe karü dan le watun árani le íchugubei lidabu agu o dan le watun binu luma dan le marumugun wamá buidu, mayanuhantiwa giñe luéigiñe gágamuru dan le wabugahaña lan karü.

10. Ka lunbei wadügüni lubaragiñe luma lidan somu sügǘ sódiniti le gayaraabei líchuguni wabagari lidoun denchaü?

¹⁰ Lau sun lira mama súnwandan gayara lan wóunigiragun woungua luéi sügǘ le gayaraabei líchuguni wabagari lidoun denchaü, kéiburi liñawan dan, laburuchagun sandi galugurahati lúmati anarimeni. Gama lumoun dan le lasuseredun aban katei ítarati gayaraati wóunigiruni wabagari lau gaganbadi wamá lun eweridihani le híchugubei gumadimatiña, kei burí lun máfuridun  wamá wábiñegiñe o dan le híchugun gumadimatiña gumadi lun wáfuridun wábiñe ladüga somu liñawan dan luma amu burí adundehani le híchugubei woun (Rom. 13:​1, 5-7). Luéigiñe le aban oubaü, anihein sügǘ sódiniti le gayaraabei lasuseredun ani gayaraati aranseñu wamá lubá, dan le wasigiruni adundehani le híchugubei gumadimatiña. Kei hénpulu, buídubei wareidun duna luma éigini le magadeirati luma lun ñein lan árani létima ayusurúbei wama lun furumiñeguarügü katei.

11. Ánheinti aburuchagua sandi galugurahati, ka lunbei wadügüni?

¹¹ Ánheinti aburuchagua aban sandi galugurahati lidan fulasu le ñein lubéi wawinwanda? Ka lunbei wadügüni? Lunti gaganbadi wamá lun adundehani le híchugubei gumadimatiña, kéiburi wachibuni wáhabu buidu, díseñu wagía hawéi amu gürigia, wayusurun lidáü ígiri luma iyumaü luma lun werederun wábiñe dan le sandi wamá. Anhein wadüga sun katei le lidan lubudubu, warufuduba gebegi lan ibagari le líchugubei Bungiu woun.

12. Ida liña líderaguniwa le lariñagubei Ariñawagúni 14:​15 lun góunigi wamani ariñahani le ichugúbei woun lidan somu katei le sódiniti?

¹² Dan le lasuseredun somu sügǘ sódiniti, gayaraati lachülürün ariñahani mama inarüniti woun hámagiñe wamadagu, hámagiñe gürigia ha wasubudiragun íbini tuéigiñe bigibigitu luma tuéigiñe radiu. Lubaragiñe wafiñerun lun sun le waganbubei, buídubei wadüga ánhawa etenira lun ariñahani le ñǘbuinbei hámagiñe gumadimatiña luma hámagiñe surusiagu (aliiha huméi Ariñawagúni 14:​15). Lanwoun lira, lunti wasigiruni adundehani le líchugubei Musu Úaraguati luma ariñahani le tíchugubei sukursáli luagu adamuridaguni luma luagu apurichihani, ladüga adüga hamuti sun hayaraati lun hayusurun ariñahani le inarüniti ani le afiñerúati luagu lun gayara lan hanúadiruni kaba lan adundehani híchiga woun (Ebü. 13:​17). Lau wídehan hama, wóunigirubei wátuadi luma hátuadi ha híbiri gürigia, ani gayaraati ladügün katei le lun ladimurehóun buidu hawagu gefentiña luagu Heowá (1 Fe. 2:​12).

13. Ida liña warufuduni gebegi lan ibagari woun dan le gaganbadi wamá lun lilurudun Bungiu luáguti hitaü?

¹³ Wagía gefentiña luagu Heowá subudiwatiwa kei gürigia ha inebeti hitaü houn. Kei gaganbadi wamá lun lilurudun Heowá luagu katei le, máhatiwa lun hitaü íbini dan le wasandirun sódini (Adü. 15:​28, 29). Mama ladüga maha wamá lun hitaü busén wamá wóunwegun. Hínsiñeti ibagari le líchugubei Bungiu woun. Ligíati wáluahanbei surusiagu buítiña ha aransetiña lun hagaranihan woun mayusurunga hitaü.

14. Ka lunbei wadügüni lun wóunigiragun woungua luéi wemegeirun somu agaranihani hanarimeti?

¹⁴ Gayaraati memegeirúnbadiwa lan lagaranihóun woun anhein wasigira adundehani le uágubei layanuhóua lidan aturiahani le. Gama lumoun ánheinti mégeiwa lubéi lun wibugún? Lidan kesi le, anhein hechu wabéi óunigirei wátuadi, furesetimabei wareidagun. Luéigiñe le aban oubaü, ánhawa áfaagua lun wagidaruni peliguru wábiñegiñe luma lídangiñe wawadigimari, luma lun wasigiruni lúrudu lánina abugahani, hénrengubei lasuseredun somu danaguaü woun le gayaraabei ladügün lun wanügǘn lau lóufudagun háspitalirugun o lun wibugún

15. a) Ka uagu súdini lubéi wanügünu dugumedu DPA lánina hitaü súnwandan to ñein lubéi wariñagei le wanúadirubei ani tótima iseriboun? (Ariha humóun giñe iyawaü). b) Según bidéu le warihibei, ida luba gayara lan wáluahan ariñahani buiti lun buidu lan wanúadirun lidan luáguti layusurún hitaü?

¹⁵ Ábaya igaburi lun warufuduni gebegi lan ibagari woun lau wabuinchagüdünu dugumedu DPA (tárüheta to arufudubalin maha wamá lun hitaü) b luma lun wanügünu wámagua  súnwandan. Huutu DPA to lun tariñaguni le wanúadirubei lidan katei luáguti hitaü luma amu burí agaranihani. Anuhein san tárüheta to huma sétiñu súnwandan? Anhein lunti lubéi habuinchagüdün aban iseri madarasaha humá. Anhein wabürüda furangu ida lan wabusenrun lun lagaranihóun woun, meferidirun wabéi wadaani afuranguagüdei houn surusiagu ka lan wanúadirubei, ani ítara, gayaraabei hetenirun woun lau lóufudagun. Lanwoun lira, wídehaba lun michugún lan árani wawagu le mabusenrun wabéi o le gayaraabei ladügün wuribani woun. c

16. Ka gayaraabei hadügüni anhein siñá lubéi habuinchagüdünu dugumedu DPA?

¹⁶ Íbini niburein wamá o buidu lan wátuadi sun wagía gayaraati wasufurirun somu danaguaü o gayaraati wasandirun sódini (Apur. 9:​11). Súnwandan buídubei lan wadüga anhoun wanüga dugumedu DPA. Ánheinti ibidiñe lubéi hun ida luba lan habuinchagüdünu? Madiherida humá. Gayaraabei híderagunün wéiyaaña lidan afiñeni ha lídanbaña damuriguaü le ñein lubéi hadamuridagua ladüga subudi hamutün buidu. Inarüni mariñagun habéi lan hun kaba lan hanúadira, ladüga huguya lunbei hanúadiruni le habusenrubei (Gal. 6:​4, 5). Le gayaraabei hadügüni híderagunün lun gunfuranda humani ámuñegueinarügü  katei le gayaraabei hanúadiruni lúmati lun habürüdüni le hanúadirubei.

17. Ida luba gayara lan warufudun gunfuranda wamaniña amu lidan katei luáguti átuadi?

¹⁷ Saragu lídangiñe katei le wanúadirubei wadügün luáguti átuadi úarati luma le wafurendeirubei tídangiñe Bíbülia (Adü. 24:​16; 1 Tim. 3:9). Ligíati, dan le wanúadirun kaba lan wadüga luma lun wayanuhan luagu hama amu, buídubei wadüga anhein waritagua le lariñagubei Filipuna 4:5: “Subudiwa humá kei gürigia areidatiña”. Gayaraati warufuduni areida wamá dan le madiheridun wamá saragu luagu wátuadi ni lun wadügüdarun hawagu amu lun hasaminarun kei wagía. Hínsiñetiña ani inebetiña wábirigu woun íbini manúadirun hamani le wanúadirubei (Rom. 14:​10-​12).

18. Ida luba warufudun weiri lan weteingiruni Heowá luagu idewesei lánina ibagari le líchugubei woun?

¹⁸ Kei buga wariñaguni, Heowá lubuñabei ibagari. Gayaraati warufuduni weiri lan weteingiruni dan le wóunigiruni ibagari le líchugubei woun luma lau wíchuguni le buídutimabei wámagiñegua lun (Aruf. 4:​11). Guentó mosu wagagibudagun luma sandi luma burí turobuli, gama lumoun mama yebe anihán ibagari le labusenrubei Heowá woun. Ligíati seremei lun Heowá yarafa madise wawinwanduba lidan aban iseri ubóu le ñeinba lubéi ua lan asufuriruni ni óunweni (Aruf. 21:4). Lídanti sun awanha lan agurabahei dan le lunbei liabin gebegilá ibagari le líchugubei Heowá woun ani yusu waméi ibagari le lun weseriwidun lun le íchugubalin woun, Wáguchi Heowá le siélubei le hínsiñehabubei.