1. Ni bata oku Yehova ari kureba amagara gitu?

 REKA tugire ngu munywani wawe yakuha ekiconco c’enju. Konka netura kandi ahamwe erangi ekarugaho. N’obu eyo nju eyine ebyo bizibu, negura za miliyoni za dola. Mazima nobasa kwereka ku nosima kandi ogirinda. Ni co kimwe, Yehova akatuha ekiconco c’omuhendo c’amagara. Yehova akereka ku ari kureba amagara nk’ag’omuhendo ari kutuha Omwana weye ngu abe ekitambo.​—Yoh 3:16.

2. Nk’oku kiri kugambwa omu 2 Bakorinto 7:1, ni enki eki Yehova ari kwenda ngu tukore?

² Yehova ni we oburugo bw’amagara gitu. (Zab 36:9) Entumwa Pawulo akereka ku na we yabire ari kukikiriza ari kugira ngu: ‘Ahakuba omuri we tuba abahurire, tugenda, kandi tugumaho.’ (Byak 17:25, 28) Obwe rero tushemerire kureba amagara gitu nk’ekiconco eki Ruhanga yatuhire. Ahakuba ayine rukundo ekatuha byona ebi tuceniire kugira ngu tugumizemu kubaho. (Byak 14:15-17) Konka Yehova tari kurinda amagara gitu omu buryo bw’ec’okutangaza. Ahobwe nayenda ngu tukore cona eki turi kubasa kugira ngu turinde amagara gitu omu by’omwika n’omu by’omubiri. (Shoma omu 2 Bakorinto 7:1.) Ahabw’enki tushemerire kurinda amagara gitu kandi shi ni bata oku turi kubasa kukikora?

3. Ni eha nshonga emwe eri kutuma twarinda amagara gitu?

³ Niturinda amagara gitu kugira ngu tubone oku turakorere Yehova omu bwijwire. (Mar 12:30) Nitwenda kuhayo  “emibiri yotu nk’ekitambo ekiri kwera, ekihurira kandi ekiri kusimwa Ruhanga,” ni yo nshonga turi kukora cona eki turi kubasa kugira ngu twerinde ekintu cona ekiri kubasa kuta amagara gitu omu kabi. (Rom 12:1) Konka ekiri kushasha, ni oku hatine eki turi kubasa kukora kugira ngu tubeho tutarwire. Konka nitukora cona eki turi kubasa ahakuba nitwenda kwereka ku nitusima Ruhanga ahabw’ekiconco c’amagara eki yatuhire.

4. Ni enki eki Omugabe Dawudi yabire ari kwenda?

⁴ Omugabe Dawudi akashoborora enshonga eyabire netuma yayereka ku nasima ahabw’ekiconco c’amagara eki Ruhanga yatuhire ari kuhandika ati: ‘Ku ndishuma omu kina, eshagama yange eryangasira ki? Omucucu guryakuhimbisa, ninga gumanyise amazima gawe?’ (Zab 30:9) Dawudi nabasa kuba yahandikire ebyo bigambo obu yabire ari hihi kufa. Konka akaba ari kwenda ngu agumeho ayine amagara marungi kugira ngu ahimbise Yehova. Hatariho okubanganisa, twena ni co eki turi kwenda.

5. Ni enki eki turi kubasa kukora n’obu twakuba tukuzire ninga shi turwire?

⁵ Oburwire n’emyaka ya za bukuru nibibasa kutuma tutakora byingi nk’oku twabire nitubikora. Kandi eco nikibasa kutuma twashoberwa kandi tushasha. Konka titushemerire kuhwa amani ngu turebe amagara gitu nk’agatine mugasho. Ahabw’enki? Ni ahabw’okuba emyaka yona eyi twakuba twine ninga shi twine oburwire, na bwe nitubasa kuhimbisa Yehova nk’oku Omugabe Dawudi yakikozire. Mazima nikitukora aha mutima kumanya ku Ruhanga witu ari kutureba nk’ab’omuhendo n’obu twakuba tutahikirire! (Mat 10:29-31) N’obu twakufa, nayija kutuzora. (Yob 14:14, 15) Obwe rero, twine enshonga eri kutuma twakora cona eki turi kubasa ngu turinde amagara gitu tucagine.

6. Ni enki eki Yehova ari kutwenza aha bikwatirine n’okurya n’okunywa?

⁶ N’obu Bibuli etari ekitabo c’eby’amagara, ebirimu nibyereka oku ari kugareba. Ecokureberaho: Natushaba “kutanisa omubiri gwitu n’ebibi” kugira ngu bitashisha amagara gitu. (Mub 11:10) Bibuli netugambira kwerinda kurya ebyokurya byingi n’okunywa amagara gitu kandi ebyo bintu nibishisha amagara. (Emi 23:20) Yehova nayenda ngu twereke omucwe g’okwekwata twaba turi kusharamu ebi turarye n’ebi turanywe n’oku biri kwingana.​—1 Kor 6:12; 9:25.

7. Ni bata oku obuhabuzi bw’omu Migani 2:11 buri kutukwasa kukora ensharamu ndingi aha bikwatirine n’amagara gitu?

⁷ Nitubasa kukora ensharamu eziri kwereka ku nitusima ahabw’ekiconco c’amagara eki Ruhanga yatuhire turi kukoresa obushoborozi bwitu bw’okutecereza. (Zab 119:99, 100; shoma omu Migani 2:11.) Ecokureberaho: Nitwereka obwenge omu bi turi kurya. Haba hine ebyokurya ebi turi kukunda konka turi kumanya ku biri kubasa kuturwaza, obwenge nitwerinde kubirya. Nambwenu nitwereka ku twine obwenge turi kukwata obwire oburi kumara bw’okuhungira, turi kumanyiza omubiri burijo, turi kugira entebekanisa ndungi y’okweboneza, kandi turi kuboneza amaka gitu.

8. Bibuli neyereka eta oku Ruh anga ari kureba ebikwatirine n’okwerinda?

⁸ Omu biragiro ebi Yehova yabire ahire ihanga rya Isirayeli hakaba harimu obuhabuzi obwabire buri kubarinda kukora  butandu baba bari omu maka gabo n’aha murimo. (Kur 21:28, 29; Bir 22:8) Omuntu ku yabire nayita omuntu atakigenderire na bwo akaba nahikwaho n’engaruka. (Bir 19:4, 5) Nambwenu ebiragiro bikaba nibigamba ngu omuntu owabire nayita omwana otakazirwe akaba ashemerire kuhanwa. (Kur 21:22, 23) Ebyahandikirwe nibyereka ge ku Yehova ari kwenda ngu tugume twerinde bucari kare.

9. Ni biha bintu ebi turi kubasa kukora bucari kare kugira ngu twerinde butandu? (Nambwenu reba ebishushani.)

⁹ Nitwereka ku nitusima ahabw’ekiconco c’amagara eki Ruhanga yatuhire turi kutaho oburyo bw’okwerinda omu ka n’aha murimo. Ecokureberaho: Nitubika ebyoma by’obwogi n’emibazi y’obutwa kandi tubita ahantu ahu abana batari kubasa kuhika. Nambwenu nitwerinda twaba turi kukoresa ebintu ebiri kwaka, ebiri kosya, n’ebindi bikoreso ebiri kukoresa amashanyarazi turi kubita ahantu ahesherekire. Nambwenu nitwerinda kuvuga twaba tutari kubasa kutecereza ge ahabw’emibazi n’amarwa ninga shi twaremirwe kuhungira kandi titurije kwikiriza ngu ebyoma bya karimagezi bituhuze twaba tuvugire.

10. Ni enki eki turi kubasa kukora mbere y’ekihikirizi ninga shi kiri kubaho?

¹⁰ Hine obu tutari kubasa kwerinda ebintu ebiri kubasa kuta amagara gitu omu kabi. Omuri ebyo harimu ebihikirizi, endwara n’entaro. Konka, ebyo bihikirizi ku biri kubaho, nitwerinda kuta amagara gitu omu kabi turi koborobera ebiragiro ebikwatirine n’amashaha g’okutahiramu, okuhunga n’ebindi ebiri kuba bitirweho by’okuturinda. (Rom 13:1, 5-7) Hine obu turi kubasa kumanya kare ebihikirizi bitakabireho, obwe rero, nikirungi twayorobera ebiragiro byona ebi abategeki bari kutuha ebiri kutukwasa kwerinda ebyo bihikirizi bitakabireho. Ecokureberaho: Nitubasa kubika amizi n’ebyokurya ebitari kujunda kandi tubika otundi tukoreso tw’okweyambisa.

11. Ni enki eki tushemerire kuba twetegwire kukora twahikwaho n’endwara y’ecorezo?

¹¹ Ni enki eki turi kubasa kukora omu kacweka aku tutwiremu hateramu endwara y’ecorezo? Nituba tushemerire korobera ebiragiro bya juba, nk’ebiri kukwata aha kunaba engaro, kutahikana n’abandi, kujwara akafukamunwa n’okuguma omu ka. Ku turateho amani tukorobera ebyo biragiro, nituba turi kwereka ku nitusima Ruhanga owatuhire ekiconco c’amagara.

12. Ni bata oku omusinge g’omu Migani 14:15 guri kutukwasa kutorana amakuru agahikire habaho ekihikirizi?

¹² Ku hari kubaho ebihikirizi, nitubasa kuhurira amakuru gagwire aha banywani, abatahi nangwa n’aha mbuga z’okuganiriraho. Omu mwanya g’‘okwikiririza eryo’ buri kigambo cona eki twahurira, nikiba kiri kirungi twahurikiza amakuru agahikire agu abategeki n’ab’eby’amagara bari kutuha. (Shoma omu Migani 14:15.) Ab’omu Kakiko k’Abarisa n’ab’omuri za ofisi zitu nibataho amani kugira ngu babanze batunga amakuru agahikire mbere y’okutuha obuhabuzi bw’oku turakore enterane n’omurimo g’okuburira. (Heb 13:17) Ku turi kukorera hamwe, nitwerinda akabi kandi tukarinda n’abandi. Nambwenu nikituma ekibina kitu cagambwa geo mu kacweka aku tutwiremu.​—1 Pet 2:12.

13. Ni bata oku turi kubasa kwereka ku nitukwata ge ekiconco c’amagara eki Ruhanga yatuhire omu bikwatirine n’eshagama?

¹³ Abahamya ba Yehova nibamanywa nk’abantu abari kureba eshama nk’eri kwera. Nitworobera ekiragiro ca Yehova ekikwatirine n’eshagama turi kwanga kugiterwa n’obu twakuba turembire munonga. (Byak 15:28, 29) Konka, eco tikiri kumanyisa ku nituba turi kwenda kufa. Ekiri kutana n’eco, nitukwata ge ekiconco c’amagara eki Ruhanga yatuhire. Niturondesa abadokita abari kubasa kutufaho batakoresize eshagama.

14. Ni bata oku turi kubasa kwerinda bucari kare ebizibu by’oburwire obugumire?

¹⁴ Nitubasa kwerinda oburwire obugumire bucari kare, turi kukuratiza ebitecerezo ebi twagambaho tucatandika. Twaba twine amagara marungi titurije kutunga ebizibu twaba turi kubagwa ninga shi bwanyima yaho. Nambwenu nitubasa kwerinda oburwire oburimu kubagwa turi korobera ebiragiro omu ka n’aha murimo kandi namunonga tworobera ebiragiro by’omu muhanda.

15. (a) Ahabw’enki tushemerire kuguma turi kugendana kadi y’okutaterwa eshagama eri aha murembe? (Nambwenu reba ekishushani.) (b) Nk’oku biri kugambwa omuri vidiyo, ni bata oku turi kubasa kukora ensharamu aha bujanjabi oburimu okukoresa eshagama?

¹⁵ Ahakuba turi kwereka ku nitusima ahabw’ekiconco c’amagara, tushemerire kwijuza kadi y’okutaterwa eshagama kandi  tuguma turi kugigendana. b Omuri eyo kadi nituba tuhandikiremu ecetengo kitu aha bikwatirine n’okuterwa eshagama n’obundi bujanjabi. Mbehi kadi yawe y’okutaterwa eshagama eri aha murembe? Waba ori kwenda kwijuza ensya, otayeziringa. Twahandika ebyetengo byitu bucari kare, nikija kutuma abadokita batacerererwa omu kututambira. Nambwenu nikituma abadokita bamanya oburyo bw’okututambira obutari kubasa kutukora kubi. c

16. Ni enki eki turi kubasa kukora twaba tutari kumanya kwijuza kadi y’okutaterwa eshagama?

¹⁶ N’obu twakuba tucari bato ninga shi twine amagara marungi, twena nitubasa kuhikwaho na butandu ninga shi turwara. (Mub 9:11) Ni yo nshonga kiri kuba kiri ec’obwenge kwijuza kadi y’okutaterwa eshagama. Waba otari kumanya oku ori kubasa kuyijuza, reba abazehe b’ekibina cawe bakukwase. Nibagezaho kumanya kwijuza eyo kadi konka tibarije kukukorera ensharamu. Ogo ni omurimo gwawe. (Gal 6:4, 5) Bo nibija kukukwasa kushoborocerwa ensharamu zona rero oyeshariremu ebi orahandike omuri kadi.

17. Ni bata oku turi kubasa kwereka ku turi kuringaniza aha bikwatirine n’amagara gitu?

¹⁷ Obwire obwingi, ensharamu nyingi ezi turi kukora aha bikwatirine n’amagara gitu n’bujanjabi nituzikora turi kugendera aha muntuwomunda witu owamanyizibwe na Bibuli. (Byak 24:16; 1 Tim 3:9) Twaba turi kukora ensharamu kandi turi kuzigambira abandi, nikiba kirungi twata omu bikorwa omusinge oguri omu Bafilipi 4:5 ahari kugira ngu: ‘Okuringaniza kwanyu kumanywe abantu bona.’ Twaba turi kuringaniza, titurije kwemereza omutima munonga ahabw’amagara gitu ninga shi ngu tugeme abandi kwemera emitecerereze yitu. Nitukunda benetata na banyanyazi kandi tubaha ekitinisa n’obu bakukora ensharamu eziri kutana n’ezitu.​—Rom 14:10-12.

18. Ni bata oku turi kubasa kwereka ku nitusima Yehova ahabw’ekiconco c’amagara eki yatuhire?

¹⁸ Nitwereka ku nitusima Yehova ahakuba ari we burugo bw’amagara turi kurinda amagara gitu kandi turi kumuha ebirungi kukira ebindi. (Kush 4:11) Konka omuri obu bwire, nitubugana oburwire kandi tuhikwaho ebihikirizi. Konka ago ti go magara agu Omuhangi witu yabire ari kutwendeza. Juba aha nayija kutuha amagara agatahwaho agarije kuba gatarimu obusaasi n’orufu. (Kush 21:4) Konka obwo bwire butakahikire, nitwesima ahakuba turiho kandi turi kukorera Tata witu w’omu iguru ori kutukunda, ari we Yehova!