1. ¿Sãwũã akʉbʉ Jeowabara dayirã bebʉra?

 KRĨCHARA bʉ neũdukʼawuaba deta bʉaʼa bari diabʉrʉta, mamina maʉ̃ dera yi pinturara biabʉ ẽ akʉza kue zarrabʉ zobeabʉ baera, mawũãsidu maʉ̃ dera mejãcha balebʉ, maʉ̃ kʼarea bʉa maʉ̃ dera mejãcha kãgabʉ. Maʉ̃ kĩrãkʼa Jeowaba dayirã nekʼãrẽ biata diasi, dayi bebʉta. Jeowaita audre yibia dayi bebʉra, maʉ̃ kʼarea diasi iyi warra Jesuta dayirãbari beimarẽã (Juan 3:16).

2. 2 Corintios 7:1ne jarabʉdera, ¿kʼãrẽta omarẽã kãgabʉ Jeowabara?

² Jeowadeba zebʉ dayirã bebʉra (Sal. 36:9). Apostol Pablobara kʼawuabasi naʉ̃ta, maʉ̃ kʼarea jarasi: «Iyideba zokʼaipanʉa, pirabea akʉza panʉa» (Hech. 17:25, 28). Jeowaba nekʼãrẽ biata diasi dayirãʼa, dayi bebʉta adewara dayirã nekʼãrẽ jõma diabʉ dayi zokʼai bʼaita (Hech. 14:15-17). Mamina naʉ̃bara jarakĩrãbʉ ẽ Jeowabara dayi bebʉra nekʼãrẽ neida berabaribi ẽã erbʉta. Awuarabʉrʉ Jeowabara dayirãʼa jarabʉ dayi bebʉra bia akʉmarẽã mawũã bia panaita, adewara iya zokʼabʉta audre opanamarẽã (akʉra 2 Corintios 7:1). ¿Kʼãrẽa bia akʉdaibara dayirã bebʉra akʉza sãwũã oseapanʉ maʉ̃ra?

3. ¿Kʼãrẽa bia akʉdaibara dayi bebʉra?

³ Dayirã bebʉra bia akʉdaibara Jeowaba zokʼabʉ odaita (Mar. 12:30). Maʉ̃ kʼarea dayirãbara Jeowaʼa diakĩrãpanʉ dayirã kakuara sakripisio kĩrãkʼa akʉza neneẽãbʉta ũdubikĩrãpʉ. Maʉ̃ba dayi bebʉ ãrĩbiseabʉta oamapanʉ (Rom. 12:1). Dayirãbara nekʼãrẽ obeda ẽ dayi wua kayabi  ẽ baita, mamina nekʼãrẽ jõma oseabʉ dayi bebʉ bia akʉita, mawũã odara Jeowa ũdubidayi dayi bebʉra kãgabʉta.

4. ¿Kʼãrẽta krĩchabasi Davidbara?

⁴ Nokʼo Davidba jara ũrĩbisi iyara kʼãrẽa kãgabasita bebʉra Jeowaba nebia diadara, iya bʉsi: «¿Mʉ̃ta beira akʉza zobeade joudara kʼãrẽ nebiata ũdui? ¿Egorora bʉ ʉ̃rʉ ibia bedʼeaika? ¿Bʉ ʉ̃rʉ wãrĩnu jaraika?» (Sal. 30:9). Davidba naʉ̃ bedʼea bʉsidera iyira beibodobasibaibara, mawũãsidu krĩchabasi zokʼai bʼaita akʉza zroga bʼaita, mawũã Jeowa ʉ̃rʉ ibia bedʼeaita. Dayirã jõmaʉ̃ta abarika bakĩrãpanʉ.

5. Dayirã kayapanʉmina akʉza zõnabasimina, ¿kʼãrẽta oseapanʉ?

⁵ Kayaba akʉza zõnababa daya nãã obada kĩrãkʼa obe ẽ, maʉ̃ kʼarea dayirãra krĩcha zroma oseabʉ akʉza sopʉa baseabʉ. Maʉ̃ba nekʼãrẽ jõma oibara dayirã zroga bʼaita, dayirã mejãcha kayabʉmina akʉza zõnabasimina Jeowa ʉ̃rʉ ibia bedʼeaseapʉ Davidba oda kĩrãkʼa. Dayirã mawũã berabaribʉmina kʼãrẽ yibia kʼawuaita Jeowaba bia akʉbʉta dayirãba obʉra (Mat. 10:29-31). Jeowaba kãga baera dayirã beibʉrʉdera jẽda piradrʉbiyi (Job 14:14, 15). Maʉ̃ kʼarea dayirãra nekʼãrẽ jõma odaibara dayi bebʉ bia akʉita akʉza zroga erbʼaita.

6. ¿Kʼãrẽta omarẽã jararabʉ Jeowabara yiko koi ʉ̃rʉ akʉza nekʼãrẽ doi ʉ̃rʉra?

⁶ Daizeze Bedʼeadera jara ẽ mina kʼãrẽ koibara ʉ̃rʉ akʉza kʼãrẽ doibara ʉ̃rʉ dayi zroga bʼaita, jarabʉ Daizeze Jeowaba kʼãrẽta krĩchabʉta maʉ̃ ʉ̃rʉ. Bari jaraita, dayirãʼa ũrãgʼa diabʉ nekʼãrẽta oda ẽ marẽã dayi kakua ãrĩbibʉta (Ecl. 11:10). Akʉza jarabʉ aukʼara neko ẽ marẽã adewara aukʼara itua do ẽ marẽã (Prov. 23:20). Jeowabara kãgabʉ dayirã kakuara bia zokʼadamarẽã, kʼawuabʉde sainʉ nekoseabʉta akʉza sainʉ nekʼãrẽ doseabʉta (1 Cor. 6:12; 9:25).

7. Proverbios 2:11ba jarabʉdebara, ¿sãwũã kʼarebabʉ krĩcha bia jidaita dayi zroga bʼai ʉ̃rʉ?

⁷ Dayi bebʉ akʉira bia krĩchaibara dayirãba nekʼãrẽ kobʉ ʉ̃rʉ (Sal. 119:99, 100; akʉra Proverbios 2:11). Bari jaraita, dayirãba ũdubibʉ bia krĩchabʉta, yiko dayirã kayabibʉta wua ko ẽãne, adewara dayi bebʉ kãgabʉta ũdubipanʉ bia kʼãĩpanʉne, ejersisio opanʉne, dayirã kakua neneẽã erbʉde akʉza dayirã deta jaigʉa erbʉ ẽãne.

8. ¿Sãwũã ũdubibʉ Daizeze Bedʼeabara Jeowabara kãgabʉta dayirã jʉra kʼawuapanamarẽã neida berabari ẽ baita?

⁸ Jeowaba diasi leyta israelitara, maʉ̃ne jarabasi kʼãrẽne jʉra kʼawuabaibarata deda neida berabari ẽ baita akʉza trajode (Éx. 21:28, 29; Deut. 22:8). Ẽbẽra abaʉba krĩña bea ẽ basibʉrʉ awuruta, maʉ̃ra kʼawua odaibarabasi leyba jarabʉde (Deut. 19:4, 5). Adewara leybara jarabasi ẽbẽra abaʉba ẽbẽra wẽrã biogobʉta po kʼãrãpe yi wũãwũãta beara, mawũã ẽ bʉrʉ krĩña bea ẽ basibʉsida beibarabasita (Éx. 21:22, 23). Daizeze Bedʼeabara jarabʉ dayirãra jʉra kʼawua panamarẽã mawũã neida berabari ẽ baita.

9. ¿Kʼãrẽne jʉra kʼawuabaibara asidenta ẽ baita? (Akʉra potorata).

⁹ Ũdubipanʉ dayirã bebʉ mejãcha kãgabʉta, deda jʉra kʼawuabʉde akʉza  trajode. Bari jaraita, dayirãba balbʉeibʉrʉ benenenota, remedio zeri ẽãta, mawũã ẽ bʉrʉ nekʼãrẽ dayi zuseabʉta, ara jĩga balbʉeibara wuabemarata neida berabari ẽ marẽã akʉza maʉ̃ta wũãwũãraba jiradada ẽãinʉ balbʉeibara. Adewara dayirãra jʉra kʼawuapanaibara tʉbʉ obʉrʉde, bania jʉ̃wʉrʉabʉrʉde akʉza zokʼabʉrʉde nekʼãrẽ dayi yara ãrĩseabʉta. Dayirãba motota mawũã ẽ bʉrʉ karruta manejanʉmʉnera, itua dope manejanʉmabe ẽ baibara, remedio dayi kʼãĩbibarita do ẽ baibara, aukʼara bʉde manejana ẽ baibara akʉza selular akʉbʉeda manejanʉma ẽ baibara.

10. Drʉade neida berabari nãã akʉza berabaribʉde, ¿kʼãrẽta odaibara zʉbʉriada ẽ baita?

¹⁰ Edaʉde dayirãbara obeda ẽ, dayirãta neida berabari ẽ marẽã. Bari jaraita, drʉade neida berabaribʉrʉde, kaya zroma zebʉrʉde akʉza yõta zebʉrʉde. Mawũãbʉrʉdera dayirãra jʉra kʼawuapanaibara bia panaita akʉza bei ẽ baita.  Bari jaraita, ũrĩnaibara nokʼoraba zokʼabʉta, ãya jaradara dayibʉmaeba wãmarẽã maʉ̃ra ũrĩbara akʉza nekʼãrẽ jõma nokʼoraba jarabʉrʉta ũrĩbara (Rom. 13:1, 5-7). Drʉade neida berabari nãã dayirãbara nekʼãrẽ okʼawuapanaibara, mawũã kʼawuadaita sãwũã ẽdrʉita, adewara ũrĩnaibara nokʼoraba jarabʉta. Bari jaraita, erbaibara baniata, yiko mesera ãrĩ ẽãta akʉza remediorata.

11. ¿Kʼãrẽta odaibara dayibʉmae kaya zromata wua wãbʉrʉ?

¹¹ ¿Kʼãrẽta odaibara dayibʉmae kaya zromata wua wãbʉrʉ? Ũrĩnaibara nokʼoraba zokʼabʉta. Bari jaraita, juwa sʉgʉibara, tapaboka jʉ̃ĩbara wuabemaraneba jĩga baibara, adewara kuarentena oibara. Dayirãba jõma ũrĩpanʉbʉrʉ dayirã zokʼabʉta, ũdubidayi dayi bebʉra kãgata.

12. Proverbios 14:15de jarabʉdebara, ¿kʼãrẽ ũrãgʼa biata diabʉ akʉza kʼaira bedʼeata ũrĩnaibara neida berabaribʉrʉdera?

¹² Drʉade neida berabaribʉrʉdera dayi neũdukʼawuaba, dayi de kʼawabʉba, mawũã ẽ bʉrʉ notisiade sewa nebʉrata jaraseapʉ maʉ̃ ʉ̃rʉ, maʉ̃raba jarapanʉ jõma ũrĩkaude, dayirãbara ũrĩnaibara nokʼoraba zokʼabʉta (akʉra Proverbios 14:15). Zõrãrã Burubiaba akʉza sukursalʼraba, dayirã kongregasione ãba yi jʉre bʼai ʉ̃rʉ jarai naweda, mawũã ẽ bʉrʉ Daizeze Bedʼea sãwũã jaradia wãi ʉ̃rʉ jarai naweda, nãã ãya biʼia kʼawuabʉ dayirãʼa sewa nebʉra jara ẽ baita (Heb. 13:17). Dayirãba opanʉbʉrʉ ãya zokʼabʉde dayita bia wãñi akʉza kʼarebayi wuabemarasida bia wãmarẽã adewara kʼarebayi wuabema ẽbẽraba bia krĩchadamarẽã Daizeze pʉwʉrʉ ʉ̃rʉ (1 Ped. 2:12).

13. ¿Sãwũã ũdubipanʉ wawiabʉta ley wa ʉ̃rʉ zokʼabʉra?

¹³ Jõmaʉ̃ba ũdukʼaʉde Jeowa ʉ̃rʉ Kʼawuabipanʉrãbara wara kẽgʉdera eda bʉeda ẽãta, ãyitara wara bebʉ baera. Jeowa ʉ̃rʉ Kʼawuabipanʉrãbara bia ũrĩpanʉ ley wa ʉ̃rʉ zokʼabʉra, ãyi neida berabari kʼãrãpe wa nesidabʉmina (Hech. 15:28, 29). Mamina maʉ̃bara jarakĩrãbʉ ẽ beikĩrãbʉta, awuarabʉrʉ ũdubipanʉ kãgabʉta dayi bebʉra, adewara jʉrʉpanʉ mediko dayirã bia akʉdamarẽã wa kẽgʉde eda bʉeda ẽãta.

14. ¿Kʼãrẽta odaibara dayirã operabida ẽ baita?

¹⁴ Dayirãba nãã jarada kĩrãkʼa odara, mawũãra mejãcha kayada ẽ bayi akʉza medikoma wãita nesida ẽ bayi. Dayirã kakuata neneẽã erpanʉbʉrʉ operada tẽã mesera beyi akʉza operapanʉne awuantadayi. Dayi deda, trajode akʉza moto manejapanʉne jʉra kʼawuapanʉbʉrʉ asidentada ẽ bayi, maʉ̃ba nesida ẽ bayi dayirã operadaita.

15. (1) ¿Kʼãrẽa yibia karta zake DPA jõma daucha erbaita akʉza yiwidita erbaita? (Akʉra potota). (2) Bideode jarabʉdera, ¿kʼãrẽta oibara bia krĩchaita tratamiento wadebema ʉ̃rʉ bia jidaita?

¹⁵ Jeowaba dayi bebʉ diadata mejãcha kãgapanʉ baera, biradaibara karta wa kẽgʉde bʉebi ẽã abarita, adewara dayirã wãsimae edeibara maʉ̃ra. b Naʉ̃ karta zakeba ũdubiyi medikoʼa sãwũã zokʼamarẽã kãgabʉta wara akʉza kʼãrẽ tratamientota omarẽã kãgabʉta. ¿Jõma daucha erbʉka naʉ̃ karta zake DPAʼra? Neẽbʉrʉ mesera birara, mawũã ẽ bʉrʉ nããbemata erbʉbʉrʉ yiwidita  widira. Maʉ̃ karta zaketa daucha erbʉ ẽ bʉrʉ medikorabara kʼawua ẽ bayi sãwũã akʉdaita. Mamina jõma daucha erbʉbʉrʉ kʼarebayi medikoraba kʼawuadamarẽã dayirãba kʼãrẽ tratamientota oda ẽ marẽã kãgabʉta. c

16. ¿Kʼãrẽta odaibara dayirãba birabeda ẽ bʉrʉ karta zake DPAʼta?

¹⁶ Dayirã zõrãrãbaya mawũã ẽ bʉrʉ warrarabaya, jõmaʉ̃ta kayaseabʉ akʉza asidentaseabʉ (Ecl. 9:11). Maʉ̃ kʼarea dayirãbara jõma biraibara naʉ̃ karta zake DPAʼra, kʼawua ẽ bʉrʉ sãwũã biraita, kʼareba widira zõrãrã kongregasionebema abaʉʼa, ãyara kʼarebayi maʉ̃ karta biraita mamina ãya kʼawua jarada ẽ bayi bʉa kʼãrẽ tratamiento jidaita, maʉ̃ra bʉabʉrʉ kʼawua krĩcha kʼãrãpe jidaibara baera (Gál. 6:4, 5). Ãya kʼarebadayi bʉa bia ũrĩmarẽã kʼãrẽ tratamiento oita jidaseabʉta akʉza maʉ̃ta karta zakede bʉmarẽã.

17. ¿Dayirã zroga bʼai ʉ̃rʉ bedʼeabʉrʉdera, kʼãrẽ ʉ̃rʉ jʉra kʼawuapanaibara?

¹⁷ Daizeze Bedʼeabara dayirã jaradiabʉ bebʉra sãwũã akʉibarata akʉza wata,  maʉ̃neba dayirãbara kʼawua jidabʉ kʼãrẽ tratamiento oita (Hech. 24:16; 1 Tim. 3:9). Dayirãba kʼawua jidabʉrʉde kʼãrẽ tratamiento oita akʉza maʉ̃ ʉ̃rʉ wuabema bedʼeabʉrʉdera kĩrãbedadrʉ Filipenses 4:5ba jarabʉta: «Jõmaʉ̃ba kʼawuapanaibara marabara, maya krĩchabʉta oẽãta». Dayirãra jʉra kʼawuapanaibara aukʼara krĩcha ẽ baita dayi sãwũã zroga bʼai ʉ̃rʉ, adewara wuabema ẽbẽrarãsida dayi kĩrãkʼa krĩchabida ẽ baibara. Dayirã mebẽrã kãga ũdubidaibara akʉza wawia ũdubidaibara ãyira dayirã kĩrãkʼa krĩchada ẽ mina (Rom. 14:10-12).

18. ¿Sãwũã Jeowa biga diabʉta ũdubipanʉ bebʉ diada kʼarea?

¹⁸ Jeowaʼa biga diabʉta ũdubipanʉ bebʉ diada kʼarea, dayi bebʉ bia akʉbʉde akʉza iya zokʼabʉ opanʉne adewara dayirãba oseabʉta jõma obʉde Jeowa kʼarea (Apoc. 4:11). Idi dayirãra zʉbʉriapanʉ, mamina Jeowabara kãga ẽ mawũã panamarẽãra, aranʉ Jeowaba dayirã ewari jõmaʉ̃nẽ babiyi akʉza wuara pʉa neẽbayi (Apoc. 21:4). Jeowaba naʉ̃ nebia weyeda dayirãta zokʼai panʉbʉrʉ, bigabayi dayirãba odaita Jeowaba zokʼabʉta.