1. Ka nyipiewekë kö la mele së koi Iehova?

 PANE mekune jë ka hape, tro la sinee i epun a hamë epun la ketre tablo ka tru thupene catr. Ngacama qatre catre hë lai tablo, nge pëhë han, ngo ka tru palahi la thupen. Matre tro epuni lai a nyipiewekën, me thupëne ej hnyawa. Ketre tune mina fe, hnei Iehova hna hamë së la ketre ahnahna ka sisitria, ene la mel. Eje hi, ka tru koi Iehova la mele së ke, hnei Nyidrëti hna upe la Nekö hnimina i Nyidrë troa meci pi së.—Ioane 3:16.

2. Thenge la 2 Korinito 7:1, nemene la hnei Iehova hna ajan tro sa kuca?

² Iehova la Qeqene mel. (Sal. 36:9) Ka xecie hnyawa lai koi Paulo aposetolo. Öni angeic: “Easë a mel me enij hnei nyidrë.” (Itre hu. 17:25, 28) Celë hi matre easa qaja ka hape, ahnahna qaathei Akötresie la mel. Ketre, hnei Nyidrë hna hamëne la ka nyipiewekë kowe la mele së. (Itre hu. 14:15-17) Tha Iehova kö a kuca la itre iamamanyikeu matre thupëne la mele së. Ngo aja i Nyidrëti pe tro sa isa thupëne la mele së, me catre nyihlue i Nyidrë. (E jë la 2 Korinito 7:1.) Pine nemene matre ka nyipiewekë tro sa thupëne la mele së, nge nemene la aqane tro sa kuca?

3. Nemene la ketre kepine matre easa isine troa thupëne la mele së?

³ Ame la ketre kepin matre nyipiewekë troa thupëne la mele së, ke tro lai a xatua së troa nyihlue i Iehova hnyawa.  (Mar. 12:30) Hnene laka, easa ajan “troa tro fë la itre ngönetrei [së] kösë huuje ka mel, nge ka hmitrötr, nge hna kapa hnei nyidrë,” matre easa neëne la itre ewekë ka troa apoizinëne la ngönetrei së. (Rom. 12:1) Ngazo pe, kuca ju hë së la hne së hna atrein, ngo tro palahi sa wezipo. Ame la easa thupëne la mele së, ke easë hi lai a amamane kowe la Keme së ka hape, easa metrötrëne la ahnahna, ene la mel.

4. Nemene la aja i Dravita?

⁴ Ka tru koi Dravita la mel. Pine nemen? Öni angeic: “Nemene la thangane la madrang’ e tro ni a uti hnaop’ eë? Hape u, tro la tepadro a atrunyi [nyipë]? hape u, tro ej’ a amamane la nyipici [nyipë]?” (Sal. 30:9) Ma hnei Dravita jë hna cinyanyine la itre trengewekë celë, qëmekene tro nyidrëti a mec. Ngacama qatre hë nyidrë, ngo hnei nyidrëti hna isine troa thupëne hnyawan la mele i nyidrë, matre tro nyidrëti a nyihlue i Iehova aqean. Celë fe hi aja i easë isa la cas.

5. Ngacama easa wezipo me utipië trootro, ngo nemene la nyine tro sa kuca?

⁵ Maine jë, easa wezipo me utipië trootro, matre tha ijiji easë hë troa huliwa tun ekö. Celë hi matre hace me hleuhleu la mele së. Ngo ame pe, tha tro kö sa kucakuca me wangahmalohmaloëne la mele së. Pine nemen? Pine laka, qatre ju hë së, me wezipo, ngo tui Dravita, ijiji së palahi troa atrunyi Iehova. Madrine catre së troa atre ka hape, Akötresie a wangatrunyi së ngacama tha ka pexeje kö së! (Mat. 10:29-31) E traqa ju së a mec, ke Iehova kö a lapa treqene la ijin troa amele së hmaca. (Iobu 14:14, 15) Haawe, kuca asë jë la hne së hna atreine matre troa thupëne hnyawane la mele së.

6. Nemene la aja i Iehova göne la aqane tro sa xen me ij?

⁶ Ngacama tha Tusi Hmitrötr kö a qaja la aqane troa nyinyine la itre meci së, maine aqane tro sa xen, ngo ej a amamane la mekuna i Akötresie göne la itre ewekë cili. Ej a upi së troa ‘iananyi me ngazo la ngönetei së,’ ene la itre ewekë ka troa adrone la ngönetrei së. (Ate cai. 11:10) Tusi Hmitrötr a wathebo së troa xeni atrun, me iji atrun la kahaitr, ke kola angazone la ngönetrei së. (Ite edomë 23:20) Nemene la aja i Iehova koi së? Aja i Nyidrë tro sa tuluthe la aqane troa xen me ij.—1 Kor. 6:12; 9:25.

7. Kola xatua së tune kaa hnene la hna qaja ngöne Ite Edomë 2:11 göne la aqane troa thupëne la mele së?

⁷ Easa amamane koi Iehova ka hape, easa nyipiewekëne la mel ngöne la easa axecië mekune hnyawa. (Sal. 119:99, 100; e jë la Ite Edomë 2:11.) Loi e tro sa iëne hnyawa la hne së hna troa xen. Maine pi tro catre sa xen la ketre xen, nge atre hi së ka hape, tro së lai a wezipo, ngaa the xeni hmaca kö lai xeni cili. Ketre, nyipiewekë tro sa meköle hnyawa, me kuci spor, me aporopëne la ngönetrei me hnalapa së.

8. Thenge la Tusi Hmitrötr, nemene la mekuna i Iehova göne la mele së?

⁸ Ame ngöne la Wathebo i Iehova, hnei Nyidrëti hna hamën la itre hna amekötin  kowe la nöje Isaraela, matre thupëne la mele i angatr ngöne la itre hnalapa me itre hnë huliwa. (Eso. 21:28, 29; Deu. 22:8) Maine tro la ketre atre Isaraela a humuth la trejin me angeic, nge tha hna thë kö, ke tro kö angeic a xeni pun la huliwa i angeic. (Deu. 19:4, 5) Ketre, önine la Wathebo, troa nyithupene kowe la atr ka humuth la nekönatr e kuhu hni, ngacama tha hnei angeice kö hna thë. (Eso. 21:22, 23) Tusi Hmitrötr a amamane hnyawa ka hape, aja i Iehova tro sa thupën la aqane tro sa tro.

9. Nemene la nyine tro sa kuca matre troa neëne la itre aksida? (Goeëne ju fe la itre iatr.)

⁹ Easa amamane koi Akötresie ka hape easa nyipiewekëne la mel, la easa neëne la itre aksida ngöne la hnalapa së me hnë huliwa. Nyipiewekë tro sa juetrën la itre hele ka idrei, me itre poizin, me itre drösinöe, matre tha tro kö la itre nekönatr a ketr. Nge loi e tro fe sa thupën la aqane tro sa trij itre ej. Ketre, loi e tro sa hmek la easa amele eë, maine ngöne la easa huliwan la sas me kura. Tha tro kö sa xomi loto e easa pi meköl, maine  thupene la hne së hna xomi drösinöe, maine iji kahaitr. Ketre, tha tro kö sa goeë mobilis ngöne la easa xomi loto.

10. Nemene la nyine tro sa kuca qëmekene me thupene la ketre hulö?

¹⁰ Ame ngöne la kola traqa la itre hulö, me itre mec ka ixötrekeu, me itre isi, ke thatre kö së la nyine troa kuca matre thupëne la mele së. Ame pe, nyipiewekë tro sa dreng la itre hna amekötin hnei mus, tune la troa fek maine couvre-feu, me itre xaa hna amekötine ju kö. (Rom. 13:1, 5-7) Ijije hi tro sa canga hnëkë kowe la itre ewekë cili, matre troa thupëne la mele së. Celë hi matre, nyipiewekë tro sa trongëne hnyawan la itre hna amekötin hnei mus. Loi e tro mina fe sa hnëkë tim, me xen me itre pasema me drösinöe.

11. Nemene la nyine tro sa kuca e traqa ju la mec ka ixötrekeu ngöne la nöje i easë?

¹¹ Nemene la nyine tro sa kuca e traqa ju la mec ka ixötrekeu ngöne la nöje i easë? Nyipiewekë tro sa trongëne la hna amekötin hnei mus, ene la troa wasi wanakoim lapa, me lapa iananyi, me ami mask, me umë së e traqa ju së wezipo. Ame la easa trongëne hnyawan la itre hna amekötine cili, ke easë hi lai a amamane ka hape, easa wangatrune la mel.

12. Kola xatua së tune kaa hnene la tusi Ite Edomë 14:15 göne la itre ithuemacany ngöne la kola traqa la mec ka ixötrekeu?

¹² Ame ngöne la itre ijine cili, tru catr la itre ithuemacany ka tria hna iqajakeun hnene la itre fami së me itre ka lapa ezi së, me qaathene fe la itre nuvel. The ‘kapa menune kö la nöjei trengewekë asë,’ ngo drenge ju pe la itre ithuemacanyi qaathene la itre mus me itre droketre. (E jë la Ite Edomë 14:15.) Qëmekene troa amekötine la aqane trongene la itre icasikeu memine la huliwa ne cainöj, hnene la Lapa Ne Xomi Meköt hna pane ithele hnyawa. (Heb. 13:17) Ame la easa idrengethenge, easë hi lai a thupëne la mele së memine la mele ne la itre xan. Aqane tro fe hi së lai a ukune la itre xan troa qaja aloine la hmi së.—1 Pet. 2:12.

13. Ame la easa axecië mekun göi madra, nemene la aqane tro sa amamane ka hape, easa wangatrune la mel?

¹³ Atre hi la itre atr ka hape, tha ka xomi madra kö la itre Temoë Iehova. Ngacama ka tro hë sa mec, ngo easa trongëne la wathebo i Iehova ka hape, pëkö troa xomi madra. (Itre hu. 15:28, 29) Tha kolo kö lai a hape, easa pi mec. Easë pe a wangatrune la mel. Celë hi matre, easa thel la itre droketre ka troa nyinyine la meci së, ngo tha ka hamë madra kö.

14. Nemene la nyine tro sa kuca matre tha tro kö a hace la aqane inyië e traqa ju xöji së?

¹⁴ Maine tro sa thupëne hnyawan la ngönetrei së, me trongën la itre eamo e caha, ke tha tro kö sa traqa kowe la itre aqane inyië ka hace. E ka egöcatre së, canga tro hi sa mejë hmaca thupene la hna xöji së. Ame pe, loi e tro sa amë hnyawan la itre ewekë ngöne la hnalapa së me ngöne la hna huliwa matre tha tro kö sa eatr. Ketre, loi e tro mina fe sa thupëne la aqane nyiape së me loto.

15. (a) Pine nemene matre nyipiewekë tro sa xometrongëne la carte DPA i easë ka hnyipixe? (Wange ju fe la iatr.) (b) Thenge la video, nemene la aqane tro sa axecië mekune hnyawa göi madra?

 ¹⁵ Hnene laka, easa wangatrune la mel matre easa nyialiene la carte DPA (ene lo pepa hna hape, Instructions médicales/Désignation d’une personne de confiance). Nge loi e tro sa xometrongëne lai carte cili. Ame ngöne lai pepa cili, hne së hna qaja la aja i easë göne la troa xomi madra me itre xaa aqane inyië. Ka he eu hë la carte DPA i epun? Maine ka hekö hë la carte i epun, canga nyialiene jë la ketre carte. Matre e traqa ju nyape sai së a tro pital, ke ka nyimenyime hi, tro hi sa hamëne la carte cili kowe la itre droketre. Ame cili, tha tro kö angatr a hamëne menune la itre drösinöe me itre aqane inyië ka troa hetre ethan kowe la ngönetrei së. b

16. Nemene la nyine tro sa kuca e thatre kö së nyialiene la carte DPA?

¹⁶ Kola traqa koi së asë la itre aksida me itre sine mec, ngacama ka jeune ju hë së me egöcatr. (Ate cai. 9:11) Celë hi matre, nyipiewekë tro sa nyialiene la  carte DPA. Maine thatre kö epun la aqane troa nyialien, sipo ixatua jë kowe la itre qatre thup ne la ekalesia i epun. Atre hnyawa hi angatr la aqane troa nyialiene la carte DPA. Ngo tha hnëqa i angatre kö troa qaja koi epun la nyine troa kuca. Isa qanyi së kö axecië mekun. (Gal. 6:4, 5) Ngo tro angatre pe a qejepengöne koi së la itre aqane inyië, me xatua së troa cinyanyine la itre aja së.

17. Nemene la aqane tro sa tulu ewekë e hetre sine meci së?

¹⁷ Easa axecië mekun göi aqane troa inyië thenge la mekuthetheu së hna inin hnei Tusi Hmitrötr. (Itre hu. 24:16; 1 Tim. 3:9) Ame la easa qaja koi itre xan la mekun hne së hna axeciën, loi e tro sa trongëne la hna qaja ngöne Filipi 4:5, kola hape: “Loi e mama cile kowe la nöjei atr ka hape, itre ka atreine tulu ewekë nyipunie.” Ame la trejin ka atreine tulu ewekë, ke tha angeice kö a mekun atrune palaha la itre sine meci angeic, maine uku itre xan troa axecië mekun tui angeic. Easa hnim me metrötrëne la itre trejin, ngacama isa aqane axecië mekune së kö me angatr.—Rom. 14:10-12.

18. Tune kaa la aqane tro sa amamane la hni ne ole së kowe la mel hnei Iehova hna hamë së?

¹⁸ Easa amamane la hni ne ole së koi Iehova, Atre Xup la mel, ngöne la easa thupëne hnyawane la mele së, me catre nyihlue i Nyidrë. (Hna ama. 4:11) Ame enehila, hetrenyi palahi la itre sine mec, me itre hulö me itre xaa akötr. Ngo tha celë kö la mel hnei Nyidrëti hna ajan koi së. Easenyi hë matre tro sa kapa qaathei Iehova la mele ka pë pun, nge pëhë akötr me mec. (Hna ama. 21:4) Ngo ame enehila, nyipiewekë tro sa thupëne la mel me nyihlue i Iehova, Keme së!