1. Fa Yehofa e si a libi fu u?

 KOW taki wan mati fii gii wan dii asekedeei. A sama di meke en sabi du a wooko ya bun, neen meke ná pikin moin a moin. A omen kololu a abi. Den sowtu asekedeei ya a omen dunsu dala den e seli den. Efu wan mati fii gii so wan sani, i be o teke en fu bigi. I be o seeka en bun tu fu aa poli. A letiso a de anga a libi di Yehofa gi u. Di Yehofa meke Yesesi kon dede gi u, a soi taki a libi fu u pelensipali gi en moo iniiwan taa sani.​—Yoh. 3:16.

2. Enke fa 2 Korentesama 7:1 e soi, da san Yehofa wani u du?

² A Yehofa na a sama di gi u libi (Ps. 36:9). Apostel Pawlesi be e biibi a sani ya, neen meke a be taki: ‘Neen meke u de a libi, neen meke u poi waka, neen meke u de a goontapu’ (Toli 17:25, 28). A sani ya e soi u taki a libi a wan kado di Yehofa gi u. Ai gi u san wi abi fanowdu fu tan a libi tu (Toli 14:15-17). Ma Yehofa nai du wonduu fu meke u tan a libi. A wani u solugu useefi fu wi abi wan bun gusontu. (Leisi 2 Korentesama 7:1.) U mu meke moiti fu abi wan bun gusontu. U mu meke moiti fu wa kisi mankei tu. Faw sa du den sani ya?

3. Saide u mu meke moiti fu abi wan bun gusontu?

³ Saide we meke moiti fu abi wan bun gusontu? A fu di u wani du ala san u man fu dini Yehofa (Malik 12:30). U wani du ala san u poi ‘fu gi en u sikin enke wan ofaandi di e libi, di santa, di bun gi en’. Neen meke wa mu du sani di o meke u siki (Rom. 12:1). A omen sani u sa du fu a gusontu fu u á go anga baka. Te we du den sani ya, we soi Yehofa taki we teke a libi di a gi u fu bigi. Ma winsi fa we meke moiti fu abi wan bun gusontu, toku we siki son yuu.

4. San David be wani du?

⁴ Kownu David be taki saide ai teke a libi di Yehofa gi en fu bigi. A be taki: ‘Sowtu wini a abi efu mi dede, efu mi saka go aini geebi olo? Doti o poi gafa i? Aw poi taigi sama taki ye taki a tuu ala yuu?’ (Ps. 30:9). Kande a di David be de fu dede a sikiifi den wowtu ya. David be wani gafa Yehofa ala yuu, neen meke aa be wani dede. Leti enke David useefi á wani dede, ma u wani gafa Yehofa ala yuu.

5. Winsi u siki efuso u kon gaandi, toku san u sa du?

⁵ Efii siki, efuso i kon gaandi, a omen sani i nai poi du moo. A sani ya sa meke ye booko yu ede. A sa meke ye tyali tu. Efu a so ye fii, ya mu gi abaa. I mu tan meke moiti fu abi wan bun gusontu. Saide? Bika winsi i siki efuso i kon gaandi, toku leti enke David i poi gafa Yehofa ete. A sabi di u sabi taki u pelensipali gi Yehofa e toosutu u, winsi u siki efuso gaandi (Mat. 10:29-31). Winsi u dede seefi, aw weki u baka (Yopu 14:14, 15). Solanga u de a libi, u mu du ala san u poi fu abi wan bun gusontu.

6. San Yehofa wani u du te we nyan efuso diingi?

⁶ Winsi fa Beibel a ná wan buku di e soi san sama mu du fu abi wan bun gusontu efuso di e soi san u mu nyan, toku ai soi u fa Yehofa e si den sani ya. Beibel e soi taki Yehofa wani u ‘wai pasi gi ogii di sa miti u’ (Peleik. 11:10). Beibel e soi u tu taki wa mu nyan ipi tumisi. Wa mu diingi sopi pasa peesi, bika den sani ya sa meke u siki, den sa tyai dede gi u (Odo 23:20). Yehofa wani u dwengi useefi te we luku san wo nyan efuso diingi, aa wani u diingi efuso nyan pasa peesi.​—1 Kor. 6:12; 9:25.

7. Fa Odo 2:11 sa yeepi i fu teke bosoloiti di bun gi a gusontu fii?

⁷ Ye soi taki ye teke a libi di Yehofa gii fu bigi, te ye denki bun fosi i teke wan bosoloiti (Ps. 119:99, 100; leisi Odo 2:11). We luku bun san wo nyan. Kow u taki i lobi wan nyanyan, ma tei nyan mi en ye siki. I be o nyan mi en ete? Nono, bika ya wani siki. Ye du sani anga koni tu, te ye siibi sai, te ye sport, te ye kiin i sikin anga yu osu.

8. Fa Beibel e soi u taki Yehofa á wani u du sani di o meke u kisi mankei?

⁸ Den weiti di Yehofa be gi den Islayelisama, be e yeepi den fu den á kisi mankei te den be de a osu efuso te den be e wooko (Ek. 21:28, 29; Deit. 22:8). Efu wan sama be kii wan taawan a wan ongooku fasi, toku a be o fii den takuu  bakapisi fu a sani di pasa (Deit. 19:4, 5). A weiti be e soi tu taki efu wan sama be gi wan beibi mankei aini en mma bee, da den be mu sitaafu en (Ek. 21:22, 23). Enke fa Beibel e soi, da Yehofa á wani u du sani di o meke u kisi mankei.

9. Sai sa du fi ya kisi mankei? (Luku a fowtow.)

⁹ Te u de a osu efuso te u de a wooko u mu luku bun fu wa du sani di o meke u kisi mankei. Efu we du a sani ya, da we soi taki we teke a libi di Yehofa gi u fu bigi. Kow taki yo towe saapu sani, i mu towe den faawe fu sama á kisi mankei. Efu yo towe deesi efuso sani di sa kii sama, i mu konikoni tu. Efu yu abi den sani ya a osu, i mu kibii den gi pikinnengee. Efii leti faya, efi ye kuku wataa, efuso ye wooko anga wan masini, ya mu fika den sani ya letileti da i waka gwe. Efi ye diingi deesi di e meke a taanga gii fu lei wagi, ya mu lei wagi. Efii diingi sopi efuso i weli tumisi ya  mu lei wagi tu. Boiti dati, ya mu meke sani enke telefon efuso taa sani puu i pakisei te ye lei wagi.

10. San u sa du fosi wan gaan ogii pasa a wan peesi? San u sa du na a ten di wan gaan ogii e pasa a wan peesi?

¹⁰ A ná ala yuu we poi lon gi son sani di sa miti u. Pakisei sani enke gaan ogii di e pasa a son peesi, siki, anga feti. Son yuu te den sowtu sani ya e pasa, u sa meke moiti fu kibii useefi fu sani á pasa anga u. Fai sa du a sani ya? Wan fu den sani di i sa du, a fu aliki lanti. Kande den o taigi u taki wa mu komoto a osu. Kande den o taki u mu komoto a pe we tan go a wan taa peesi. A bun fu aliki den te den e taigi u den sani ya (Rom. 13:1, 5-7). Son yuu son sani gwenti pasa aini son kondee, neen meke lanti e taigi den sama fu seeka a fesi. Kande u sa poti wataa anga nyanyan sani di nai poli gaw aini wan tasi. U sa poti deesi di wo abi fanowdu aini tu.

11. Sai mu de kabakaba fu du efu wan siki booko na a pisi pe ye tan?

¹¹ Sai mu du efu wan siki booko na a pisi pe ye tan? I mu aliki den sani di lanti taki. Kande den o taigi i taki i mu wasi yu ana. Kande den o taigi i taki ya mu go koosube a sama tumisi. Kande den o taigi i tu fu wei sani fu tapu i nosu, efuso fu tan a osu. Efu we du den sani ya, we soi taki we teke a libi di Gadu gi u fu bigi.

12. Enke fa Odo 14:15 e soi, da san o yeepi u fu sabi sowtu nyunsu u mu biibi te wan gaan ogii pasa a wan peesi?

¹² Te wan gaan ogii pasa a wan peesi a omen nyunsu e paati a internet. A omen nyunsu we yee fu mati anga taa sama di u sabi tu. Ma gaanse fu den nyunsu ya a lei. Beibel e soi u taki wa mu biibi ‘ala sani’ di we yee. Ma u mu luku san lanti anga dataa e taki fosi u biibi wan sani. (Leisi Odo 14:15.) U sa biibi den sani di den baala di e tii a wooko anga den beikantoo e taigi u, bika den e ondoosuku sani finifini fosi den taigi u fa wo holi komakandaa anga fa wo du a peleikiwooko (Heb. 13:17). Efu we wooko anga den sani di den baala e taigi u, da wo kibii useefi anga taawan te wan gaan ogii pasa a wan peesi. Boiti dati, wo yeepi taa sama fu denki bun fu Yehofa Kotoigi.​—1 Peit. 2:12.

13. Fa we soi taki we teke a libi di Gadu gi u fu bigi te dataa wani gi u buulu?

¹³ Yehofa Kotoigi e si buulu enke wan santa sani. Gaanse sama sabi taki u nai teke buulu. Yehofa taki wa mu teke buulu, neen meke winsi wo dede seefi u nai teke en (Toli 15:28, 29). Ma a sani ya á wani taki u wani dede, bika u lobi a libi di Gadu gi u. We meke moiti fu fende den moo bun dataa di sa yeepi u sondee buulu.

14. San o yeepi i fi ya kisi gaan mankei?

¹⁴ Efi ye du den sani di u luku aini a artikel ya, a sani ya sa yeepi i fi ya kisi gaan mankei. Efi ye nyan bun, efi ye sport, den sani ya sa yeepi i fu abi wan bun gusontu. Da tei kisi wan mankei, aw yeepi i fu betee moo gaw. Boiti dati, tei de a osu efuso te ye wooko, i mu luku bun fi ya kisi mankei. Te ye lei  boto i mu konikoni fi ya sungu. Efu a wagi ye lei, i mu wooko anga den weiti di lanti poti.

15. (a) Saide a pelensipali fu seeka i buulu kaita? (Luku a fowtow.) (b) Enke fa a felon e soi, da san o yeepi i fu du sani anga koni te a abi fu du anga buulu?

¹⁵ Fu di we lesipeki a libi di Gadu gi u, meke we seeka u buulu kaita. Winsi pe we go, we tyai en. We sikiifi na a kaita ya sowtu dataa yeepi u wani te a abi fu du anga buulu. We sikiifi tu sowtu taa dataa yeepi u wani. A buulu kaita fii de seekaseeka? Efii si taki i mu seeka i buulu kaita, seeka en nownow. Tei sikiifi a fesi sowtu dataa yeepi i wani fosi wan sani miti i, a sani ya sa yeepi i fu fende yeepi moo gaw. Efu wan deesi nai kai anga i buulu, i mu sikiifi en na a buulu kaita tu. A sani ya o yeepi den dataa fu den á gii deesi di sa du ogii anga i. b

16. Sai sa du efi ya sabi fai mu seeka a buulu kaita?

¹⁶ Ala u sa kisi mankei wan leisi. U sa siki tu (Peleik. 9:11). Neen meke a wan koni sani fu seeka i buulu kaita. Efi ya  sabi fai mu seeka en, i sa akisi den owluman aini i kemeente fu yeepi i. Den owluman sa yeepi i fu seeka a buulu kaita, ma den naw teke bosoloiti gii, bika dati ai eigi faantiwowtu (Gal. 6:4, 5). Den sa yeepi i fu fusutan san sikiifi na a buulu kaita. Den sa yeepi i tu fu sikiifi sowtu dataa yeepi i wani.

17. Faw sa soi taki we fiti useefi a taawan te a abi fu du anga dataa yeepi?

¹⁷ Te u mu teke bosoloiti di abi fu du anga a gusontu fu u efuso te we luku sowtu dataa yeepi wo teke, we wooko anga den sani di u leli aini Beibel (Toli 24:16; 1 Tim. 3:9). Te we taki anga taawan fu wan bosoloiti di u teke, u mu holi a sani di sikiifi a Filipisama 4:5 a pakisei: ‘Meke ala sama si taki we fiti useefi a taawan.’ Te we fiti useefi a taawan, da u naw dwengi den fu si sani enke u. U naw booko wi ede anga a gusontu fu u tumisi tu. We soi taki u lobi den baala anga sisa fu u te we lesipeki den bosoloiti di iniiwan fu den e teke, winsi wi anga den á teke aseefi bosoloiti.​—Rom. 14:10-12.

18. Faw sa soi taki we teke a libi di Yehofa gi u fu bigi?

¹⁸ We soi taki we teke a libi di Yehofa gi u fu bigi te we meke moiti fu abi wan bun gusontu, anga te we meke moiti fu wa kisi mankei (Openb. 4:11). Nownow we siki. Gaan ogii e miti u tu. Ma a ná a libi ya Yehofa be wani gi u. Dyonson aw gi u teego libi. U naw dede moo (Openb. 21:4). Ma nownow kaba we piisii taki u de a libi. We piisii tu fu dini u dda Yehofa.