1. Jehova be an niin jati cogo di?

 MIIRI k’a filɛ ko i teri dɔ ye boon dɔ di i ma. A pɛntiri kɔrɔla dɔɔni ani o boon be sooro. Nka o bɛɛ n’a ta, a be miliyɔn caaman bɔ. Siga t’a la ko o boon bena diya i ye ani i bena a ladon koɲuman. O cogo kelen na, Jehova ye nilifɛnba dɔ di an ma, o min ye niin ye. Tiɲɛn na, Jehova y’a yira ko a b’an niin jati fɛɛn nafamanba ye, a kɛtɔ k’a Dencɛ di ka kɛ kunmabɔsara ye an kosɔn.—Zan 3:16.

2. Ka kɛɲɛ ni 2 Korɛntikaw 7:1 ye, Jehova be mun lo ɲini an fɛ?

² Jehova lo ye niin Dibaga ye (Zab. 36:10). Ciden Pol tun lanin b’o la ani a y’a fɔ ko: “An tonin be nii na, ka sii sɔrɔ, ka kɛwaliw kɛ Ala barika la.” (Kɛw. 17:25, 28). O la, a bɛnnin lo an k’a fɔ ko niin ye Ala ka nilifɛn lo ye. An mako be min na walisa ka to niin na, a y’o di an ma sabu a b’an kanu (Kɛw. 14:15-17). Nka sisan, Jehova tɛ kabakow kɛ walisa k’an niin latanga. A b’a ɲini an fɛ an k’an seko bɛɛ kɛ k’an janto an ka kɛnɛyako n’an ka Alako la (2 Korɛntikaw 7:1 kalan). Mun na an ka ɲi k’an ka kɛnɛyako n’an niin latanga ani an be se k’o kɛ cogo di?

3. Kuun minw kama an ka ɲi k’an jija ka to kɛnɛya la, u dɔ ye juman ye?

³ Kuun minw kama an ka ɲi k’an jija ka to kɛnɛya la, u dɔ ye ko o b’a to an b’an seko fisaman kɛ Jehova ka baara la (Mariki 12:30). An b’a fɛ k’an “yɛrɛ kɛ saraka ɲanaman ye, min saniyanin lo, n’a ka di Ala ye.” O kama, koo minw be se k’an ka kɛnɛyako nagasi, an b’an yɛrɛ tanga u ma (Ɔrɔm. 12:1). Tiɲɛn lo ko hali n’an b’an seko bɛɛ kɛ, o t’an bali ka bana. Nka an b’an seko kɛ ka to kɛnɛya la sabu an b’a fɛ k’a yira an sankolola Faa la ko a ye niin min di an ma, an b’o jati fɛɛn nafamanba ye.

4. Masacɛ Dawuda tun b’a fɛ ka mun lo kɛ?

⁴ Niin ye Ala ka nilifɛn ye. Masacɛ Dawuda y’a ɲɛfɔ fɛɛn min kama a b’o jati fɛɛn nafamanba ye. A y’a sɛbɛ ko: “Ne ka sa ka don kaburu kɔnɔ, o be mun ɲa? Buguri be se k’i tanu wa? Buguri be se k’i ka ɲumanya ko fɔ wa?” (Zab. 30:10). A be komi Dawuda y’o kumaw sɛbɛ a ka ɲɛnamaya laban fan fɛ. Nka, a tun cɛsirinin lo k’a seko bɛɛ kɛ ka to niin na wagatijan kɔnɔ walisa ka to ka Jehova tando. Siga t’a la, an kelen kelen bɛɛ b’o lo fɛ fana.

5. An mana kɔrɔ wala ka bana cogo o cogo, an be se ka mun lo kɛ?

⁵ An tun be deli ka koo minw kɛ, bana ni kɔrɔya be se k’an bali k’u caaman kɛ. O be se k’an dusu tiɲɛ ani k’a to an be dimi. Nka o bɛɛ n’a ta, an ka ɲi k’an seko bɛɛ kɛ k’an ka kɛnɛyako latanga. Mun na do? Sabu an mana kɔrɔ wala ka bana cogo o cogo, an bele be se ka Jehova tando i ko masacɛ Dawuda y’a kɛ cogo min na. Hali n’an ye mɔgɔ dafabaliw ye, an koo ka gwɛlɛ Ala ma. N’an miirila o la, o b’an dusu diya yɛrɛ le! (Mat. 10:29-31). Hali n’an sara, a kɔrɔtɔnin lo k’an lakunu (Zɔbu 14:14, 15). K’an to niin na, an b’a fɛ k’an seko bɛɛ kɛ k’an ka kɛnɛyako n’an niin latanga.

6. Dumuni ni minni koo la, Jehova b’a fɛ an ka mun lo kɛ?

⁶ Bibulu kuun tɛ k’a ɲɛfɔ an ye an ka ɲi k’an ka kɛnɛyako latanga cogo minw na wala an ka ɲi ka min dumu. Nka a be Jehova ka miiriya fɔ an ye o koow la. Misali la, a b’an jija ko an ‘kana koo kɛ min bena kɛ an ma tɔɔrɔ ye,’ o kɔrɔ, min bena an ka kɛnɛyako nagasi (Waaj. 11:10). Bibulu b’a fɔ ko an man ɲi ka kɛ nugubatɔw wala dɔrɔtɔw ye. O koow be se k’an ka kɛnɛyako nagasi wala k’an faga yɛrɛ (Talenw 23:20). An ka ɲi k’a latigɛ an bena min dumu, ka fɛɛn min min ani an bena u hakɛ min ta. N’an b’o latigɛra, Jehova b’a ɲini an fɛ an ka kɛ ni yɛrɛminɛli ye.—1 Kor. 6:12; 9:25.

7. Ladili min be sɔrɔ Talenw 2:11 kɔnɔ, o b’an dɛmɛ cogo di ka desizɔn ɲumanw ta an ka kɛnɛyako la?

⁷ An b’a yira ko an be Jehova waleɲuman lɔn kosɔbɛ niin kosɔn, an kɛtɔ ka baara kɛ n’an ka faamuyali hakili ye walisa ka desizɔnw ta (Zab. 119:99, 100; Talenw 2:11 kalan). Misali la, an ka ɲi ka desizɔn ɲumanw ta ka ɲɛsin an ka dumuni koo ma. Ni dumuni dɔ ka di an ye nka an b’a lɔn ko o b’a to an be bana, hakilitigiya bena a to an tɛna o dumu. An b’a yira ko an ye hakilitigi ye, n’an be  sinɔgɔ koɲuman, k’an farikolo ɲɛnagwɛ tuma o tuma ani ka to k’an yɛrɛ n’an sigiyɔrɔ saniya.

8. Ala ka miiriya ye min ye yɛrɛ latangali koo la, Bibulu be mun lo fɔ an ye o koo la?

⁸ Jehova tun ye sariya min di Israɛldenw ma, o tun b’a yira u be se k’u yɛrɛ tanga cogo min na kasaraw ma u ka soo ani baarakɛyɔrɔ la (Ɛkiz. 21:28, 29; Deter. 22:8). Hali ni dɔ tun ma tugu ka mɔgɔ faga, o nɔfɛkow tun ka jugu (Deter. 19:4, 5). Hali deen min ma wolo fɔlɔ, ni mɔgɔ dɔ tun ye koo jugu kɛ a la k’a sɔrɔ a m’a lawuli a kama, sariya tun b’a fɔ k’o tigi ka ɲi ka ɲangi (Ɛkiz. 21:22, 23). Bibulu b’a yira ka gwɛ ko Jehova b’a fɛ an k’an seko bɛɛ kɛ walisa k’an yɛrɛ tanga kasaraw ma.

9. An be se ka mun ni mun lo kɛ walisa k’an yɛrɛ tanga kasara ma? (Jaaw lajɛ fana.)

⁹ An b’a yira ko an be Ala waleɲuman lɔn an niin kosɔn, n’an be banba walisa an ka soo ani an ka baarakɛyɔrɔ ka kɛ yɔrɔ latanganinw ye. Misali la, an tɛna  fɛɛn daa diimanw, pɔsɔni wala furaw fili yɔrɔ dɔ la min bena kɛ farati ye tɔɔw ma. N’o fɛɛnw maranin be an fɛ, an b’an janto fana an deenw kana maga u la. An ka ɲi ka kɔrɔsili kɛ n’an be baara kɛra ni tasuma, jii gwannin ani kuran minanw ye. An man ɲi k’o fɛɛnw to yen k’an kɔɔ don. N’an ye fura dɔ ta wala ka dɔrɔ min ani o b’a to an hakili siginin tɛ wala n’an ma sinɔgɔ ka ɲɛ, an tɛ sɔn ka mobili boli. An fana tɛ an ka telefɔni digi digi wala k’a filɛ n’an be mobili bolila.

10. Gwɛrɛgwɛrɛko minw b’an niin bila farati la, an be se ka mun lo kɛ ka kɔn u ɲɛ ani n’u be kɛra?

¹⁰ Gwɛrɛgwɛrɛko minw b’an niin bila farati la, tuma dɔw la an tɛ se k’u bali. U dɔw ye balawokow, fɔɲɔbanaw ani marifakɛlɛw ye. N’o koow ɲɔgɔn kɛra, an be banba walisa an latanganin ka to ani an b’an seko kɛ ka kisi faratiw ma. O la, faamanw be cikan minw di ko an ka bɔ farati yɔrɔw la ani u be cikan wɛrɛ minw di, an ka ɲi k’u labato (Ɔrɔm. 13:1, 5-7). An be se k’an yɛrɛ tanga gwɛrɛgwɛrɛko dɔw ma. O la, faamanw mana cikan o cikan di walisa an labɛnnin ka to, an k’o labato. Misali la, n’a sɔrɔ a ka ɲi an ka jii, dumunifɛn minw tɛ tiɲɛ ani furaw ni furakɛli minan jɔnjɔn dɔw bila an bolo kɔrɔ.

11. Ni fɔɲɔbana dɔ be jɛnsɛnna an ka mara la, an ka ɲi ka mun lo kɛ?

¹¹ Ni fɔɲɔbana dɔ be jɛnsɛnna an ka mara la, an ka ɲi ka mun lo kɛ? Faamanw be cikan minw di, an ka ɲi k’u labato. U be se k’a fɔ ko an ka to k’an tɛgɛw ko, ka furancɛ to an ni ɲɔgɔn cɛ, ka masiki don ani n’o bana tagamasiɲɛ b’an na, an k’an mabɔ tɔɔw la. N’an b’o cikanw labato, an b’a yira ko an be niin jati nilifɛn nafamanba ye.

12. Ni gwɛrɛgwɛrɛko dɔ kɛra, Talenw 14:15 b’an dɛmɛ ka la kunnafoni jumanw lo la?

¹² Gwɛrɛgwɛrɛkow mana kɛ, tuma dɔw la an teriw, an sigiɲɔgɔnw, telewisɔn n’a ɲɔgɔnnaw be kunnafoni dɔw jɛnsɛn minw tɛ tiɲɛn ye. Sanni an ka “la fɔta bɛɛ la,” a ka ɲi an ka la kunnafoni ɲumanw lo la, faamanw ni dɔgɔtɔrɔw be minw di (Talenw 14:15 kalan). Koow Ɲɛnabɔla Jɛnkulu ani tɔnbolow b’u seko bɛɛ kɛ ka kunnafoni sɔbɛw sɔrɔ. O kɔ le, u be cikanw di kafo ka lajɛnw ani waajuli baara koo la (Eburuw 13:17). N’an b’o cikanw labato, an b’an yɛrɛ ani tɔɔw tanga faratiw ma. O b’a to fana mɔgɔw be kɛ ni miiriya ɲuman ye Jehova Seerew koo la.—1 Piyɛri 2:12.

13. Ka ɲɛsin joli koo ma, an b’a yira cogo di ko an be niin jati nilifɛn nafamanba ye?

¹³ Mɔgɔ caaman b’a lɔn ko Jehova Seerew be joli jati fɛɛn senuman ye. An be Jehova ka sariya labato joli koo la, an kɛtɔ ka ban u ka joli don an na hali n’an niin be farati la (Kɛw. 15:28, 29). O kɔrɔ tɛ ko an b’a fɛ ka sa le. Nka, an b’a yira ko an be niin jati nilifɛn nafamanba ye. O la, an be dɛmɛ ɲini dɔgɔtɔrɔw fɛ minw be sɔn k’an furakɛ ka ɲɛ ani u tɛ joli don an na.

14. An be se ka mun lo kɛ walisa an mako kana kɛ furakɛliko gwɛlɛw na?

¹⁴ N’an b’an janto an ka kɛnɛyako la an kɛtɔ ka tugu barokun nin ka ladiliw kɔ, n’a sɔrɔ an mako tɛna kɛ operasɔn wala furakɛliko gwɛlɛ wɛrɛ la. N’i ka kɛnɛyakow ka ɲi, hali n’u y’i opere, i bena i yɛrɛ sɔrɔ joona. N’an b’an jija  walisa an ka soo n’an ka baarakɛyɔrɔ ka kɛ yɔrɔ latanganinw ye, an bena an yɛrɛ tanga faratiw ma ani n’a sɔrɔ an mako tɛna kɛ operasɔn na. O kelen lo fana n’an be sira sariyaw labato koɲuman.

15. a) Mun na a kɔrɔtanin lo an ka kɛ n’an ka jolisɛbɛ ye min dafanin lo koɲuman? (Jaa lajɛ fana.) b) Ka kɛɲɛ ni videwo nin ye, an be se ka desizɔn ɲuman ta cogo di joli koo la?

¹⁵ Komi an be niin jati fɛɛn nafamanba ye, an b’an ka jolisɛbɛ (DPA) dafa ani an b’a to an kun tuma bɛɛ. O sɛbɛ kɔnɔ, an b’a yira an ka fɛtaw ye minw ye jolidon ani furakɛcogo wɛrɛw koo la. Kunnafoni minw b’i ka jolisɛbɛ kan, yala u bele bɛnnin lo wa? N’i ka ɲi k’o sɛbɛ dafa wala k’a lakuraya, kana o koo bila ka suma. N’an y’an ka fɛtaw sɛbɛ ka gwɛ, o bena a to an be furakɛli sɔrɔ joona joona sabu an mako tɛna kɛ a la ka ɲɛfɔli caaman kɛ dɔgɔtɔrɔw ye. O bena an latanga fana furaw ani furakɛcogow ma minw be se ka kɛ farati ye an ma. b

16. N’an t’a lɔn an bena an ka jolisɛbɛ dafa cogo min na, an be se ka mun lo kɛ?

¹⁶ Hali n’an ye kanbele wala sunguru ye wala an ka kɛnɛ cogo o cogo, kasara be  se k’an bɛɛ sɔrɔ wala an be se ka bana (Waaj. 9:11). O kama, hakilitigiya koo lo an k’an ka jolisɛbɛ dafa. N’i t’a lɔn o sɛbɛ be dafa cogo min na, dɛmɛ ɲini i ka kafo diinan mɔgɔkɔrɔw fɛ. U bena a ɲɛfɔ i ye o sɛbɛ be dafa cogo min na. Nka u tɛna desizɔnw ta i nɔɔ na furakɛli koo la sabu o ye ele yɛrɛ ka kunkanbaara lo ye (Gal. 6:4, 5). I be se ka koo minw latigɛ u bena i dɛmɛ k’o faamu ani k’i dɛmɛ i k’i ka fɛtaw sɛbɛ jolisɛbɛ kan.

17. Ka ɲɛsin kɛnɛyako ma, an b’a yira cogo di ko an be koow kɛ ka dama kɛɲɛ?

¹⁷ An dusukun min kolola ka kɛɲɛ ni Bibulu ye, o lo b’an lasun ka desizɔnw ta ka ɲɛsin an ka kɛnɛyako ani furakɛcogow ma (Kɛw. 24:16; 1 Tim. 3:9). N’an be desizɔnw tara ani n’an be baro kɛra ni tɔɔw ye ka ɲɛsin o koow ma, a ka ɲi an ka Filipikaw 4:5 ka sariyakolo sira tagama. A fɔra yen ko: “Aw ka kɛ mɔgɔsabalininw ye tuma bɛɛ.” N’an ye mɔgɔ sabalininw ye, o kɔrɔ n’an be koow kɛ ka dama kɛɲɛ, an tɛna hami kojugu an ka kɛnɛya koo la. An fana tɛna tɔɔw waajibiya u ka sɔn an ka miiriya ma furakɛli koo la. An b’an balimaw kanu ani an be u bonya hali n’u ka desizɔnw be dan na an taw la.—Ɔrɔm. 14:10-12.

18. An b’a yira cogo di ko an be Ala waleɲuman lɔn an niin kosɔn?

¹⁸ An b’a yira ko an be niin Dibaga Jehova waleɲuman lɔn, an kɛtɔ k’an seko fisaman kɛ a ka baara la ani k’an niin latanga (Yir. 4:11). Sisan, an be bana ani balawokow be cun an kan. Nka, an Danbaga tun t’a fɛ an ka ɲɛnamaya kɛ o cogo lo la. Yanni dɔɔni, a bena ɲɛnamaya banbali di an ma. Tɔɔrɔ ani saya tɛna kɛ yen (Yir. 21:4). Yanni o cɛ, ninsɔndiya lo an fɛ ka kɛ niin na ani k’an sankolola Faa Jehova bato, ale min b’an kanu kosɔbɛ!