1. Ebɛnadze na ɔkyerɛ dɛ hɛn nkwa som bo paa ma Jehovah?

 FA NO dɛ wo nyɛnko bi akyɛ wo dan. Naaso dan no ho ayɛ dadaw na onwin so. Ɔwɔ mu dɛ ɔhaw wɔ dan no ho dze, naaso ɔyɛ dan a no bo yɛ dzen paa. Ekyingye biara nnyi ho dɛ, ebɛkyerɛ ho enyisɔ na abɔ ho ban so. Jehovah so ama hɛn akyɛdze bi a ɔsom bo paa. Dɛm akyɛdze no nye nkwa. Nokwasɛm nye dɛ, Jehovah ada no edzi dɛ hɛn nkwa som bo ma no paa, dɛm ntsi na ɔmaa ne Ba no bowui maa hɛn no.​—John 3:16.

2. Dɛ mbrɛ 2 Corinthfo 7:1 ma yehu no, ebɛnadze na Jehovah hwɛ kwan dɛ yɛbɛyɛ?

² Hɛn nkwa fi Jehovah. (Ndw. 36:9) Nna ɔsomafo Paul so gye dɛm asɛm yi dzi, ntsi ɔkaa dɛ: “No mu na yɛtse ase, na yɛkeka hɛnho, na yɛwɔ hɔ.” (Andw. 17:25, 28) Dɛm ntsi yebotum aka ma afata paa dɛ, hɛn nkwa yɛ akyɛdze a ofi Nyankopɔn hɔ. Jehovah fi ɔdɔ mu ma hɛn ndzɛmba a yehia ama yeetum akɔ do atsena nkwa mu. (Andw. 14:15-17) Naaso seseiara dze, ɔmmfa anwanwa kwan do mmbɔ hɛn nkwa ho ban. Mbom ɔhwɛ kwan dɛ yɛbɛyɛ dza yebotum biara mbrɛ ɔbɛyɛ a yebenya apɔwmudzen papa na yaakɔ do asom no. (Kenkan 2 Corinthfo 7:1.) Ebɛnadze ntsi na ɔsɛ dɛ yɛbɔ hɛn apɔwmudzen na hɛn nkwa ho ban, na yebesi dɛn ayɛ dɛm?

3. Siantsir a yɛbɔ hɛn apɔwmudzen ho ban no, no mu kor nye dɛn?

³ Siantsir a yɛbɔ hɛn apɔwmudzen ho ban no, no mu kor nye dɛ, yɛpɛ dɛ yɛyɛ dza yebotum biara som Jehovah. (Mark  12:30) Yɛpɛ dɛ yɛdze hɛn nyimpadua ma dɛ ‘afɔrbɔdze a ɔtse ase a ɔyɛ krɔnkrɔn na ɔsɔ Nyankopɔn n’enyi,’ ne dɛm ntsi yɛnnyɛ ndzɛmba a obotum ama yaayar. (Rom. 12:1) Ɔmmfa ho dza yɛbɛyɛ biara no, yerunntum nnka dɛ yɛrennyar da. Naaso, yɛyɛ dza yebotum biara mbrɛ ɔbɛyɛ a yebenya apɔwmudzen papa, osiandɛ yɛpɛ dɛ yɛma hɛn sor Egya no hu dɛ hɛn enyi sɔ nkwa a ɔdze akyɛ hɛn no.

4. Nna ebɛnadze na Ɔhen David pɛ dɛ ɔyɛ?

⁴ Ɔhen David kyerɛɛ siantsir a nna n’enyi sɔ nkwa a Nyankopɔn dze akyɛ no no. Ɔkaa dɛ: “Mfaso bɛn na ɔwɔ mo ho, aber a mokɔ adakamona no mu? Aso huntuma beyi ayɛw? Aso ɔbɛka wo nokwar akyerɛ?” (Ndw. 30:9) Obotum aba dɛ, aka kakra ma David ewu no na ɔkyerɛɛw dɛm asɛm yi. Naaso, nna oesi no bo dɛ ɔbɛyɛ n’afamu dze ama oeenya apɔwmudzen papa na ɔaakɔ do atsena ase mbrɛ ɔbɛyɛ a obotum eyi Jehovah ayɛw. Ɔda edzi pefee dɛ, dɛmara na hɛn nyina so yɛpɛ dɛ yɛyɛ.

5. Sɛ yɛyar anaa yɛayɛ mpanyimfo dɛ dɛn ara mpo a, ebɛnadze na yebotum ayɛ?

⁵ Osian yarba na mpanyinyɛ ntsi, ndzɛmba a nna nkan no yetum yɛ no, no mu pii wɔ hɔ a, yerunntum nnyɛ bio. Iyi botum ama yaayɛ basaa na hɛn werɛ ahow. Naaso ɔnnsɛ dɛ yɛma hɛn abaw mu bu, mbom ɔsɛ dɛ yɛma hɛn apɔwmudzen ho hia hɛn. Ebɛnadze ntsi a? Osiandɛ sɛ yɛyar anaa yɛayɛ mpanyimfo dɛ dɛn ara mpo a, yebotum eyi Jehovah ayɛw dɛ mbrɛ Ɔhen David yɛe no. Yenyim dɛ sɛ yɛyar anaa yɛayɛ mpanyimfo mpo a, yɛda ho ara som bo ma Nyankopɔn, na iyi ma hɛn akoma tɔ hɛn yamu paa! (Matt. 10:29-31) Sɛ yewu mpo a, ɔwɔ ɔpɛ dɛ ɔbɛsan dze hɛn aba nkwa mu. (Job 14:14, 15) Aber a yɛtse ase yi, ɔsɛ dɛ yɛyɛ dza yebotum biara dze bɔ hɛn apɔwmudzen nye hɛn nkwa ho ban.

6. Ɔdze fa no edzidzi na ɔnom ho no, ebɛnadze na Jehovah hwɛ kwan dɛ yɛbɛyɛ?

⁶ Bible no nnyɛ apɔwmudzen ho nwoma anaa nwoma a ɔkyerɛ dza ɔsɛ dɛ yedzi nye dza ɔnnsɛ dɛ yedzi. Naaso, ɔboa hɛn ma yehu adwen a Jehovah wɔ wɔ ndzɛmba a ɔtsetse dɛm ho. Dɛ nhwɛdo no, Bible no tu hɛn fo dɛ yɛntwe hɛnho mfi ndzɛmba a obotum ahaw hɛn nyimpadua no ho. (Ɔsɛnk. 11:10) Bible no ka dɛ, ɔnnsɛ dɛ yedzidzi ma ɔbor do anaa yɛnom nsa ma ɔtra do. Osiandɛ dɛm ndzɛmba yi botum ama yaayar anaa yeewu mpo. (Mbɛ. 23:20) Jehovah pɛ dɛ yɛhyɛ hɛnho do wɔ dza yedzi na yɛnom ho. Afei, dodow a yedzi anaa yɛnom so, ɔhwɛ kwan dɛ yɛbɛhyɛ hɛnho do wɔ ho.​—1 Cor. 6:12; 9:25.

7. Ebɛn kwan do na afotu a ɔwɔ Mbɛbusɛm 2:11 no boa hɛn ma yɛyɛ ndzɛmba a ɔbɛma hɛn apɔwmudzen ayɛ papa?

⁷ Sɛ yɛma hɛn adwen mu da hɔ a, yebotum ayɛ ndzɛmba ahorow bi dze akyerɛ dɛ hɛn enyi sɔ nkwa a Nyankopɔn dze akyɛ hɛn no paa. (Ndw. 119:99, 100; kenkan Mbɛbusɛm 2:11.) Dɛ nhwɛdo no, ɔsɛ dɛ yɛhwɛ hɛn edzidzi yie. Sɛ hɛn enyi gye edziban bi ho, naaso yenyim paa dɛ sɛ yedzi a ɔma yɛyar a, ɔnnyɛ obi na ɔsɛ dɛ ɔka kyerɛ hɛn dɛ yengyaa dzi. Afei so, sɛ hɛn adwen mu da hɔ a, yɛbɛgye ber ada, yɛbɛtaa atsentsen hɛn apɔw mu, edzi hɛnho nyi aber nyina na yeesiesie hɛn fie.

8. Ebɛn kwan do na Bible no ma yehu dɛ Jehovah mmpɛ dɛ yɛyɛ ndzɛmba a ɔbɛma yeepira?

⁸ Mbra a Jehovah dze maa Israelfo no, ɔdze akwankyerɛ ahorow a ɔbɔboa hɔn ma wɔaatwe hɔnho efi ndzɛmba a obotum ama woeepira kɛse wɔ fie anaa edwuma mu ho no kaa ho. (Ex. 21:28, 29; Deut. 22:8) Sɛ nna obi  annhyɛ da ara na oku obi mpo a, nna obotum enya asotwe a no mu yɛ dzen. (Deut. 19:4, 5) Mbra no ka dɛ, sɛ obi annhyɛ da ara na ɔyɛ biribi ma ɔdze abofra a ɔhyɛ yafun mu mpo no nkwa to esian mu a, nna ɔsɛ dɛ wɔtwe n’aso. (Ex. 21:22, 23) Kyerɛwnsɛm no ma no mu da hɔ pefee dɛ, Jehovah mmpɛ dɛ yɛyɛ ndzɛmba a ɔbɛma yeepira.

9. Ebɛn ndzɛmba na yebotum ayɛ amma yeemmpira? (Hwɛ mfonyin ahorow no so.)

⁹ Sɛ yɛwɔ fie anaa edwuma mu, na yɛyɛ ndzɛmba a ɔremma yemmpira a, ɔbɛkyerɛ dɛ hɛn enyi sɔ nkwa a Nyankopɔn dze akyɛ hɛn no. Dɛ nhwɛdo no, sɛ ɔsɛ dɛ yɛtow ndzɛmba a obotum etwa hɛn, ewudur anaa ndur gu a, ɔsɛ dɛ yɛyɛ no kwan bi do a ɔremmfa obiara no nkwa nnto esian mu. Dɛmara so na sɛ yebehia ndzɛmba a ɔtsetse dɛm wɔ fie a, ɔsɛ dɛ yɛdze si beebi a abofra biara ne nsa rennka. Sɛ yɛsɔ gya, yɛronoa nsu, yɛreyɛ nkwan nye ndzɛmba a ɔtsetse dɛm a, ɔnnsɛ dɛ yɛdan gya hɔ. Dɛmara so na sɛ yɛdze mfir reyɛ edwuma a, ɔnnsɛ dɛ yɛdan gya hɔ. Afei so, sɛ hɛn enyi kom, yɛnom edur bi anaa nsa, na ɔdze hɛn nkwa nye afofor nkwa bɔto esian mu  aber a yɛreka kaar a, ɔnnsɛ dɛ yɛdze ka kaar. Dɛmara so na sɛ yɛreka kaar a, ɔnnsɛ dɛ yɛdze hɛn fon dzi dwuma.

10. Ebɛnadze na yebotum ayɛ dze esiesie hɛnho ansaana esian bi esi, na ebɛnadze na yebotum ayɛ aber a esian esi no?

¹⁰ Ɔtɔ da a, esian ahorow bi a osisi no, yerunntum nnyɛ ho hwee. Dɛ nhwɛdo no, atoyerɛnkyɛm, yarba bi a ɔtsew si beebi nye basabasayɛ a ɔkɔ do no, yerunntum nnsiw ano. Naaso sɛ esian a ɔtse dɛm si a, yebotum ayɛ ndzɛmba ahorow bi dze abɔ hɛnho ban. Ndzɛmba a yebotum ayɛ no bi nye dɛ, sɛ aban no hyɛ mbra dɛ yentu mfi beebi a yɛwɔ no, anaa ɔhyɛ mbra fofor bi a ɔbɔbɔ hɛnho ban a, ɔsɛ dɛ yetsie. (Rom. 13:1, 5-7) Yebotum esiesie hɛnho ama esian ahorow bi. Ntsi sɛ aban mpanyimfo no ka dɛ yɛnyɛ biribi mfa nsiesie hɛnho mma esian bi a obotum esi a, ɔsɛ dɛ yetsie hɔn. Sɛ yenya nsu, edziban ahorow a ɔnnsɛɛ nye ndur bi si hɔ a, ɔbɔboa hɛn paa.

11. Sɛ nsanyarba bi retserɛw wɔ beebi a yɛwɔ no a, ebɛnadze na ɔsɛ dɛ yɛyɛ?

¹¹ Sɛ nsanyarba bi retserɛw wɔ beebi a yɛwɔ no a, ebɛnadze na ɔsɛ dɛ yɛyɛ? Ɔsɛ dɛ yetsie dza etumfo no bɛka akyerɛ hɛn dɛ yɛnyɛ no. Wobotum aka akyerɛ hɛn dɛ yɛntaa nhohor hɛn nsa ho, mma yɛmmbembɛn hɛnho, yɛnhyɛ nose mask. Afei so, wobotum aka akyerɛ hɛn dɛ, sɛ yehu dɛ yɛreyɛ enya yarba no bi anaa yeenya bi a, yɛnhyɛ dan mu. Sɛ yɛbɔ hɛnho mbɔdzen yɛ dɛm ndzɛmba ahorow yi a, ɔbɛkyerɛ dɛ hɛn enyi sɔ nkwa a Nyankopɔn dze akyɛ hɛn no.

12. Sɛ esian bi si a, ebɛn kwan do na afotu a ɔwɔ Mbɛbusɛm 14:15 no botum aboa hɛn ma yeehu nsɛm a ɔsɛ dɛ yɛgye dzi?

¹² Sɛ esian ahorow bi si a, hɛn anyɛnkofo, hɔn a yɛnye hɔn tse mpotamu, nye dawurbɔ ndwuma botum akeka nsɛm bi a ɔnnyɛ nokwar. Ɔnnsɛ dɛ yɛgye “asɛm biara” a yɛbɛtse no dzi, mbom nsɛm a ɔyɛ nokwar a aban mpanyimfo nye apɔwmudzen edwumayɛfo bɛka no, ɔno na ɔsɛ dɛ yetsie. (Kenkan Mbɛbusɛm 14:15.) Ansaana Akwankyerɛ Kuw no nye Bethel ahorow no dze akwankyerɛ a ɔfa asafo nhyiamu nye asɛnka edwuma no ho bɛba no, wodzi kan yɛ dza wobotum biara hwɛ hu dɛ nsɛm a wɔrebɛka akyerɛ enuanom no yɛ nokwar. (Heb. 13:17) Sɛ yetsie dza wɔka kyerɛ hɛn no na yɛdze yɛ edwuma a, yɛbɔbɔ hɛnho nye afofor ho ban. Afei so, sɛ yɛyɛ dɛm a, ɔbɛma wɔaka Jehovah Adasefo ho nsɛm pa.​—1 Pet. 2:12.

13. Ɔdze fa bɔgyasɛm ho no, ebɛnadze na yɛyɛ dze kyerɛ dɛ hɛn enyi sɔ nkwa a Jehovah dze akyɛ hɛn no?

¹³ Nkorɔfo pii nyim dɛ Jehovah Adasefo nngye bɔgya. Siantsir nye dɛ, yebu bɔgya dɛ ɔyɛ krɔnkrɔn. Yedzi Jehovah ne mbra a ɔfa bɔgya ho no do, na yɛnngye bɔgya ber mpo a ayarsa ho asɛm asoɛr awerɛfir mu no. (Andw. 15:28, 29) Naaso iyi nnkyerɛ dɛ yɛpɛ dɛ yewu. Mbom hɛn enyi sɔ nkwa a Nyankopɔn dze akyɛ hɛn no paa. Sɛ yɛyar a, yɛkɔ adɔktafo a wonyim edwuma na wɔpen do dɛ wɔremmfa bɔgya nndzi dwuma no hɔ kɔhwehwɛ ayarsa.

14. Ebɛnadze na yɛyɛ a, bi a ɔremma wɔnnyɛ hɛn oprehyɛn bi a ɔyɛ hu?

¹⁴ Sɛ yɛdze apɔwmudzen ho akwankyerɛ a yɛaka ho asɛm wɔ adzesua yi mu no yɛ edwuma a, bi a ɔremma wɔnnyɛ hɛn oprehyɛn bi a ɔyɛ hu. Naaso, sɛ no ho behia dɛ wɔyɛ hɛn oprehyɛn mpo a, osiandɛ yɛhwɛ hɛn apɔwmudzen yie ntsi, hɛnho bɔto hɛn ntsɛm. Afei so, sɛ yɛyɛ ahwɛyie wɔ fie anaa edwuma mu, na yɛdze kaar ka ho mbra so yɛ edwuma a, obotum aboa ma yaatsew akwanhyia bi a ɔbɛma wɔayɛ hɛn oprehyɛn awerɛfirmu no do.

15. (a) Ebɛnadze ntsi na ɔsɛ dɛ yɛhyehyɛ DPA a odzi mu na yɛdze hyɛ hɛnho aber nyina? (Hwɛ mfonyin no so.) (b) Dɛ mbrɛ wɔaka ho asɛm wɔ video no mu no, yebesi dɛn esisi gyinae pa wɔ bɔgya a wɔdze dzi dwuma wɔ ayarsa mu no ho?

 ¹⁵ Hɛn enyi sɔ nkwa a Jehovah dze akyɛ hɛn no, dɛm ntsi yɛhyehyɛ krataa a wɔfrɛ no durable power of attorney (ɔyɛ krataa bi a obi akyerɛw kwan a ɔpɛ dɛ wɔfa do sa no yarba no wɔ mu) no, na yɛdze hyɛ hɛnho aber nyina. b Dɛm krataa yi ma obiara hu dɛ yɛnngye bɔgya, na ɔma wohu ayarsa a yɛgye to mu nye dza yɛnngye nnto mu. Ntsi bisa woho dɛ aso wo DPA no yɛ fofor a wɔaba no bi? Sɛ ɔnnyɛ ɔno bi na ahyehyɛ no anaa ɔsɛ dɛ eyɛ nsesa wɔ dza ahyehyɛ no mu a, bɔ mbɔdzen yɛ no ntsɛmara, mma nntu nnhyɛ da. Sɛ yɛkyerɛ dza yɛpɛ nye dza yɛmmpɛ ma no mu da hɔ wɔ do a, ɔremma yɛnnsɛɛ ber nnkyerɛkyerɛ hɛn ayarsa mu nnkyerɛ ayarsafo. Afei so, ɔbɔboa ayarsafo no amma wɔaannyɛ hɛn edur bi a obotum ahaw hɛn. c

16. Sɛ yennyim mbrɛ yebesi ahyehyɛ hɛn DPA no a, ebɛnadze na yebotum ayɛ?

¹⁶ Sɛ yɛyɛ mberantsɛ anaa nkataasia, anaa  sɛ yɛwɔ ahoɔdzen dɛ dɛn ara mpo a, yebotum epira anaa yaayar. (Ɔsɛnk. 9:11) Iyi ntsi nyansa wɔ mu paa dɛ yɛhyehyɛ hɛn DPA no. Sɛ innyim mbrɛ ibesi ahyehyɛ wodze no a, bisa w’asafo mu mpanyimfo ma wɔmboa wo, osiandɛ hɔndze mpɛn pii no, wonyim mbrɛ wosi hyehyɛ. Naaso kaa dɛ nnyɛ hɔn na wobesi w’ayarsa ho gyinae ama wo. Ɔnodze ɔyɛ woara wo gyinaesi. (Gal. 6:4, 5) Mbom wobotum aboa wo ma aatse krataa no ase na eehu dza epɛ nye dza emmpɛ nye mbrɛ ibesi ahyehyɛ no.

17. Ɔdze fa ayarsa ho nsɛm ho no, ebɛnadze na yebotum ayɛ dze akyerɛ dɛ yɛwɔ ntseasee?

¹⁷ Gyinae ahorow a yesisi wɔ hɛn apɔwmudzen nye hɛn ayarsa mu no pii wɔ hɔ a, yɛdze gyina dza yeesua efi Bible mu no do. (Andw. 24:16; 1 Tim. 3:9) Sɛ yerisisi gyinae anaa yɛnye afofor robɔ hɛn gyinaesi ho nkɔmbɔ a, ɔsɛ dɛ yɛdze asɛm a ɔwɔ Philippifo 4:5 no yɛ edwuma. Hɔ ka dɛ: “Hom mma nyimpa nyina nhu hom [ntseasee].” Sɛ yɛwɔ ntseasee a, yɛremma hɛn apɔwmudzen ho nsɛm nnhaw hɛn pii. Dɛmara so na yɛremmfa hɛn nsusui nnhyɛ afofor do. Sɛ gyinae a yesi no nye hɛn nuanom dze nnyɛ pɛr mpo a, yɛda no edzi dɛ yɛdɔ hɔn na yebu hɔn so.​—Rom. 14:10-12.

18. Ebɛnadze na yebotum ayɛ dze akyerɛ dɛ hɛn enyi sɔ nkwa a Jehovah dze akyɛ hɛn no?

¹⁸ Jehovah na ɔmaa hɛn nkwa, ntsi yɛyɛ dza yebotum biara som no na yɛbɔ hɛn nkwa ho ban. Sɛ yɛyɛ dɛm a, ɔkyerɛ dɛ hɛn enyi sɔ nkwa a Jehovah dze ama hɛn no. (Nyi. 4:11) Awerɛhosɛm nye dɛ, ndɛ yɛyar na esian tum to hɛn. Naaso, nnyɛ iyi nye asetsena a nna hɛn Bɔfo no pɛ dɛ yenya. Ntsi ɔrennkyɛr koraa, ɔbɛma hɛn onnyiewiei nkwa na obeyi yaw na owu efi hɔ korakora. (Nyi. 21:4) Naaso seseiara a dɛm aber no mmbae yi, ɔyɛ hɛn dɛw paa dɛ yɛwɔ nkwa na yɛrosom hɛn sor Egya Jehovah a ɔyɛ ɔdɔ no!