1. Nɛ̌ do gbɛ mǐtɔn ka xɔ akwɛ́ nú Jexóva sɔ?

 MǏ NÍ ɖɔ ɖɔ xɔ́ntɔn ɖé ná we xwé ɖokpó. Sɛn e è sá dó xwé ɔ é ko sún ɖo fí ɖé lɛ́, bɔ fí ɖěvo lɛ́ nɔ kun sin. Nǔ ɖo mɔ̌ có, xwé ɔ kpo ɖo akwɛ́ xɔ wɛ tawun. É ɖo wɛn ɖɔ, xwé énɛ́ ná xɔ akwɛ́ ɖo nukún towe mɛ, bɔ a ná wlǐbo ná. Ðo ali ɖokpó ɔ nu ɔ, Jexóva ná mǐ nǔníná xɔ akwɛ́ ɖé; gbɛ mǐtɔn wɛ. Nǔgbó ɔ, Jexóva sɛ́ Vǐ tɔn dó bɔ é wá kú dó ta mǐtɔn mɛ dó xlɛ́ lě do gbɛ mǐtɔn xɔ akwɛ́ ɖo nukún tɔn mɛ sɔ é.—Jaan 3:16.

2. Sɔgbe xá 2 Kɔlɛ́ntinu lɛ́ 7:1 ɔ, étɛ́ Jexóva ka nɔ ɖó nukún ɖo mǐ sí?

² Jexóva wɛ nyí Jɔtɛn gbɛ tɔn. (Ðɛh. 36:10) Mɛsɛ́dó Pɔ́lu yí gbe nú nǔgbó énɛ́ hwenu e é ɖɔ xó élɔ́ é: “É wɛ zɔ́n bɔ mǐ ɖo gbɛ, nɔ dán wǔ, bo lɛ́ tíin.” (Mɛ. 17:25, 28) Énɛ́ wú ɔ, é jɛxá ɖɔ è ní ɖɔ ɖɔ gbɛ mǐtɔn ɔ, nǔníná ɖé wɛ bo gosín Mawu gɔ́n. Wǎnyíyí wɛ nɔ sísɛ́ ɛ bɔ é nɔ ná mǐ nǔ e sín hudó mǐ ɖó bo ná nɔ gbɛ lɛ́ é. (Mɛ. 14:15-17) Amɔ̌, Jexóva nɔ nya xɛ ɖo mǐ jí ɖo nǔjíwǔ linu ǎ. É nyɔ́ wa ɔ, é nɔ ɖó nukún ɖɔ mǐ ní nɔ kpé nukún dó mǐɖée wú ɖo agbaza kpó gbigbɔ kpó lixo, lěe mǐ kpé wú gbɔn é bǐ. (Xa 2 Kɔlɛ́ntinu lɛ́ 7:1.) Aniwú mǐ ka ɖó ná wa nǔ e wú mǐ kpé é bǐ bo nɔ ganjí ɖo agbaza mɛ, lobo lɛ́ nɔ ayijayǐ mɛ? Nɛ̌ mǐ ka sixú wa énɛ́ gbɔn?

3. Ðɔ hwɛjijɔ e wú mǐ ɖó ná tɛ́n kpɔ́n bo nɔ ganjí ɖo agbaza mɛ é ɖokpó.

³ Hwɛjijɔ e wú mǐ ɖó ná tɛ́n kpɔ́n bo nɔ ganjí ɖo agbaza mɛ é ɖokpó wɛ nyí ɖɔ énɛ́ ná zɔ́n bɔ mǐ ná sɛn Jexóva kpó nǔwúkpíkpé  mǐtɔn lɛ́ bǐ kpó. (Mak. 12:30) Mǐ jló ná sɔ́ mǐɖée bǐ jó “vɔ̌sánú gbɛɖe e è sɔ́ ɖ’ayǐ nú Mawu, bɔ é nyɔ́ nukún tɔn mɛ é ɖɔhun,” énɛ́ wú ɔ, mǐ ba ná nyi alɔ nú nǔ ɖěɖěe mǐ tuun ɖɔ yě sixú d’azɔn mǐ lɛ́ é wiwa. (Hlɔ̌. 12:1) É ɖo wɛn ɖɔ, mǐ ná bo tlɛ wa nǔ ɖěbǔ ɔ, mǐ sixú ɖɔ bo tɛ afɔ jí ɖɔ mǐ kún ná jɛ azɔn gbeɖé ó ǎ. Amɔ̌, mǐ nɔ wa nǔ e wú mǐ kpé é, ɖó mǐ ba ná xlɛ́ Tɔ́ mǐtɔn jǐxwé tɔn ɔ ɖɔ gbɛ e é ná mǐ é xɔ akwɛ́ ɖo nukún mǐtɔn mɛ.

4. Étɛ́ axɔ́sú Davídi ka ba ná wa?

⁴ Axɔ́sú Davídi tínmɛ nǔ e wú é nɔ wlíbo nú gbɛ e Mawu ná ɛ é, ɖo xó élɔ́ e é ɖɔ é mɛ: “Ényí a kɔn hun ce kɔn nyi ayǐ ɔ, ényí a sɔ́ mì dó do gɔngɔn mɛ ɔ, ani wɛ a ná mɔ ɖ’é mɛ? Kɔ́gúdu wɛ ná mlá we a? Kɔ́gúdu ná sixú ɖɔ gbejíninɔ towe a?” (Ðɛh. 30:10) É sixú ko nyí hwenu e gbɛzán Davídi tɔn xwe vivɔnu é wɛ é wlán xó énɛ́ lɛ́. Amɔ̌, é jló tawun bo ná kpo ɖo gbɛ, lobo lɛ́ nɔ ganjí ɖo agbaza mɛ, é ka ná nyí nú hwenu kléwún ɖé ǎ, bo ná dó sixú kpa susu nú Jexóva. É ɖo wɛn ɖɔ nǔ e ba wɛ mǐ bǐ xwíí ɖe é nɛ́.

5. Ényí mǐ ná bo tlɛ kpo gbɔn ɖěbǔ, alǒ ɖo azɔn jɛ wɛ gbɔn ɖěbǔ ɔ, étɛ́ mǐ ka sixú wa?

⁵ Azɔn kpó kpikpo kpó sixú sú ali dó mǐ bɔ nǔ e mǐ ko nɔ wa ɖ’ayǐ lɛ́ é gěgé wiwa ná vɛ́ wǔ nú mǐ. Wǎgbɔ tɔn ɔ, xomɛ sixú nɔ sin mǐ, bɔ mǐ lɛ́ flú. Amɔ̌, mǐ ɖó ná jó gbe bo dóvɛ̌ nú agbaza mǐtɔn gbeɖé ǎ. Aniwú? Ðó nú mǐ ná bo kpo gbɔn ɖěbǔ, alǒ ɖo azɔn jɛ wɛ gbɔn ɖěbǔ ɔ, mǐ sixú kpo ɖo susu kpa nú Jexóva wɛ axɔ́sú Davídi ɖɔhun. Tuun e mǐ tuun ɖɔ mǐ nyí hwɛhutɔ́ có, nǔ mǐtɔn ka nɔ nyɔ́ Mawu nukúnmɛ é nɔ su nukún mǐtɔn mɛ tawun. (Mat. 10:29-31) Mǐ ná bo tlɛ kú ɔ, akpakpa ɖo sísɔ́ ɛ wɛ bɔ é ná fɔ́n mǐ sín kú. (Jɔb. 14:14, 15) Din e mǐ ɖo gbɛ é ɔ, mǐ ba ná wa nǔ e wú mǐ kpé é bǐ dó nɔ ganjí ɖo agbaza mɛ, lobo lɛ́ nɔ ayijayǐ mɛ.

6. Étɛ́ Jexóva ka nɔ ɖó nukún ɖɔ mǐ ní wa hwenu e mǐ ɖo nǔ ɖu wɛ, alǒ ɖo ahan nu wɛ é?

⁶ Wěma e ɖɔ xó dó lěe è ná nɔ ganjí gbɔn ɖo agbaza mɛ é, alǒ nǔɖuɖu hunsin ɖagbe tɔn e è ná ɖu lɛ́ é wú é ɖé wɛ Biblu nyí ǎ có, é ɖe linlin e Jexóva nɔ ɖó dó nǔ énɛ́ lɛ́ wú é xlɛ́. Ði kpɔ́ndéwú ɔ, é byɔ́ mǐ ɖɔ mǐ ní “hɔn nú nǔ e ná zɔ́n bɔ [mǐ] ná jɛ azɔn lɛ́ é.” (Nǔt. 11:10) Biblu ɖɔ ɖɔ mǐ kún ɖó ná ɖu nǔ díngan, alǒ nu ahan díngan ó, ɖó nǔ énɛ́ lɛ́ bǐ sixú wa nǔ dó mǐ wú, bo tlɛ sixú lɛ́ hu mǐ fɛɛ. (Nǔx. 23:20) Jexóva nɔ ɖó nukún ɖɔ mǐ ní nɔ ɖu ɖo mǐɖée jí, hwenu e mǐ ɖo gbeta nǔ e mǐ ná ɖu é, gɔ́ nú ahan e mǐ ná nu é kpó bǎ e mɛ mǐ ná wa mɔ̌ yi ɖó é kpó tɔn kɔn wá wɛ é.—1 Kɔ. 6:12; 9:25.

7. Nɛ̌ wěɖexámɛ e ɖo Nǔnywɛ́xó 2:11 mɛ é ka nɔ d’alɔ mǐ bɔ mǐ nɔ wá gbeta e nǔnywɛ́ kpé lɛ́ é kɔn dó lanmɛ mǐtɔn wú gbɔn?

⁷ Ényí mǐ nɔ zán nǔwúkpíkpé tamɛ linlin tɔn mǐtɔn ɔ, mǐ sixú wá gbeta e xlɛ́ ɖɔ gbɛ e Mawu ná mǐ é su nukún mǐtɔn mɛ tawun lɛ́ é kɔn. (Ðɛh. 119:99, 100; xa Nǔnywɛ́xó 2:11.) Ði kpɔ́ndéwú ɔ, mǐ nɔ kpɔ́n nǔ bo nɔ ɖu. Ényí mǐ yí wǎn nú nǔɖuɖu ɖé lɛ́, bo ka tuun ɖɔ yě nɔ dó azɔn mǐ ɔ, mǐ nɔ tɛ́n kpɔ́n bo nɔ nyi alɔ nú yě. Ényí mǐ nɔ d’amlɔ ganjí, nɔ ba lanmɛ kpɔ́n hwɛhwɛ, bo nɔ lɛ́ hɛn agbaza mǐtɔn kpó xwé mǐtɔn kpó ɖó mǐmɛ́ jí hǔn, xlɛ́xlɛ́ wɛ mǐ ɖe ɖɔ mǐ lɛ́ nyí nǔnywɛ́tɔ́ nɛ́.

8. Étɛ́ Biblu ka ɖe xlɛ́ dó linlin e Mawu nɔ ɖó dó ayijayǐ mǐtɔn wú é wú?

⁸ Jexóva ná sɛ́n ɖé lɛ́ Izlayɛ́li ví lɛ́ dó lěe yě sixú nyi alɔ nú awǒvinú lɛ́ ɖo xwé yětɔn gbe, alǒ hwenu e yě ɖo azɔ̌ wa wɛ é gbɔn é wú. (Tín. 21:28, 29; Sɛ́n. 22:8) Ényí mɛɖé ɖo  manywɛ́ mɛ bo hu mɛ ɔ, nǔ e jɛ é sixú dɔn tagba syɛ́nsyɛ́n gěgé nyi ayǐ. (Sɛ́n. 19:4, 5) Sɛ́n ɔ byɔ́ ɖɔ nú mɛɖé ná bo tlɛ ɖo manywɛ́ mɛ, bo wa nǔ dó vǐ e ɖo xomɛ é ɖé wú ɔ, è ɖó ná dɔn tó n’i. (Tín. 21:22, 23) Mawuxówéma ɔ ɖe xlɛ́ nyi wɛn ɖɔ Jexóva ba ɖɔ mǐ ní nɔ ayijayǐ mɛ.

9. Afɔ tɛ́ lɛ́ mǐ ka sixú ɖe bo ná dó nyi alɔ nú awǒvinú lɛ́? (Lɛ̌ kpɔ́n fɔtóo lɛ́.)

⁹ Mǐ nɔ ɖe afɔ tawun tawun lɛ́ bá dó nɔ ayijayǐ mɛ ɖo xwé mǐtɔn gbe kpó azɔ̌ mǐtɔn jí kpó, dó xlɛ́ ɖɔ gbɛ e Mawu ná mǐ é su nukún mǐtɔn mɛ. Ði kpɔ́ndéwú ɔ, ényí mǐ ɖó alyánnú e sixú gblé wǔ mɛ lɛ́ é, nǔ aɖǐnɔ lɛ́ alǒ atínkɛ́n lɛ́ ɔ, mǐ nɔ sɛ yě xwe ganjí dó fí e yɔkpɔ́vú lɛ́ ma ná mɔ ɖe ǎ é. Ényí mǐ flɔ́ myɔ, sin zozo ɖo ado jí, alǒ mǐ ɖo alyánnú lɛ́ zán wɛ ɔ, mǐ ɖó ná ɖ’ayi te, bo lɛ́ jó nǔ énɛ́ lɛ́ dó, lobo jɛ nǔ ɖěvo wa jí ǎ. Ényí mǐ ɖo amasin ɖé zán wɛ bɔ é zɔ́n bónú mɔ̌to alǒ kɛkɛ́ kunkun ná vɛ́ wǔ, kabǐ mǐ nu ahan syɛ́nsyɛ́n, alǒ nǔ cikɔ nú mǐ zɛ xwé wú ɔ, mǐ nɔ kun mɔ̌to abǐ kɛkɛ́ ǎ; mɔ̌ jɛ́n mǐ ma ka nɔ lɛ́ hɛn alǒkan alɔ mɛ hwenu e mǐ ɖo kɛkɛ́, alǒ mɔ̌to kun wɛ é ǎ é nɛ́.

10. Étɛ́ mǐ ka sixú wa jɛ nukɔn nú adla j’ayǐ e sixú wa nǔ dó gbɛ mǐtɔn wú é ɖé kpó adla j’ayǐ ɔ gúdo kpó?

¹⁰ Hweɖélɛ́nu ɔ, mǐ nɔ kpé wú bo nɔ glɔ́n ali nú nǔ nyanya ɖé bónú é ní gɔn jijɛ ǎ. Xó énɛ́ nyí nǔgbó, tají ɔ hwenu e adla j’ayǐ, jɛmɛjí, alǒ tohwan syɛ́nsyɛ́n lɛ́ gba nǔ é. Amɔ̌, ényí nǔ mɔ̌hun lɛ́ jɛ ɔ, mǐ sixú tɛ́n kpɔ́n lěe mǐ kpé wú gbɔn é bo nɔ ayijayǐ mɛ gbɔn tónúsise nú gbe e è ɖe ɖɔ è ní gosín xá ɔ mɛ é kpó gbe e acɛkpikpa ɔ ɖe lɛ́ é kpó gblamɛ. (Hlɔ̌. 13:1, 5-7) Nǔɖé lɛ́ tíin bɔ è sixú mɔ sɛ́dó nukɔn, énɛ́ wú ɔ, é ná nyɔ́ ɖɔ mǐ ní se tónú nú ali e acɛkpikpa ayǐ ɔ jí tɔn lɛ́ ná xlɛ́ mǐ é. Ði kpɔ́ndéwú ɔ, mǐ sixú tɛ́n kpɔ́n bo sɔ́ nǔ ɖ’ayǐ nú sin, nǔɖuɖu e ma nɔ yá wǔ gblé ǎ lɛ́ é kpó dandan sín nǔ dotóoxwé tɔn lɛ́ kpó.

11. Ényí azɔn e è sixú sɔ́ é ɖé jɛ kan vun jí ɖo xá e mɛ mǐ nɔ nɔ é ɔ, étɛ́ mǐ ka ɖó ná ɖo gbesisɔmɛ bá wa?

¹¹ Ényí azɔn e è sixú sɔ́ é ɖé ɖo kan vun wɛ ɖo fí e mǐ nɔ nɔ é ɔ, étɛ́ mǐ ka ɖó ná wa? Mǐ ɖó ná nɔ wa nǔ e acɛkpikpa ɔ byɔ́ mǐ lɛ́ é; ɖi kpɔ́ndéwú ɔ, mǐ ɖó ná nɔ klɔ́ alɔ, avla ɖé ɖó ná nɔ gbo mǐ kpó mɛ ɖěvo lɛ́ kpó, mǐ ɖó ná nɔ cyɔ́n nǔ awɔntín nu, lobo lɛ́ nɔ glɔ̌nglɔ́n nú hwenu ɖé, ényí é byɔ́ ɖó mɔ̌ ɔ nɛ́. Ényí mǐ nɔ wa nǔ énɛ́ lɛ́ hǔn, xlɛ́xlɛ́ wɛ mǐ ɖe ɖɔ gbɛ e Mawu ná mǐ é su nukún mǐtɔn mɛ nɛ́.

12. Nɛ̌ nǔgbódodó e ɖo Nǔnywɛ́xó 14:15 mɛ é ka nɔ d’alɔ mǐ bɔ mǐ nɔ wá gbeta nǔ e mǐ ná ɖótó hwenu e adla j’ayǐ é tɔn kɔn gbɔn?

¹² Ényí ajijimɛnú lɛ́ jɛ ɔ, mǐ sixú se adingbanxó gěgé ɖo mɛ élɔ́ lɛ́ nu: xɔ́ntɔn mǐtɔn lɛ́, nɔzo mǐtɔn lɛ́, kpó ɖɔnúesezɔ́wátɔ́ lɛ́ kpó. Mǐ nɔ “ɖi nǔ nú nǔ e è ɖɔ” bɔ mǐ se lɛ́ é bǐ ǎ, é nyɔ́ wa ɔ, mǐ nɔ ɖótó nǔ e acɛkpikpa lɛ́ kpó dotóo lɛ́ kpó ɖɔ bɔ è sixú ɖeji d’é wú lɛ́ é. (Xa Nǔnywɛ́xó 14:15.) Hǎgbɛ́ alixlɛ́mɛtɔ́ ɔ kpó alaxɔ lɛ́ kpó nɔ tɛ́n kpɔ́n bo nɔ se xó e sɔgbe lɛ́ é, cóbó nɔ ɖe wě xá mǐ dó kplé mǐtɔn lɛ́ kpó wɛnɖagbejíjlázɔ́ mǐtɔn kpó wú. (Ebl. 13:17) Ényí mǐ nɔ xwedó ali e xlɛ́ mǐ wɛ è ɖe lɛ́ é ɔ, mǐ nɔ nya xɛ ɖo mǐɖée kpó mɛ ɖěvo lɛ́ kpó jí. Mǐ sixú lɛ́ d’alɔ mɛ ɖěvo lɛ́ bɔ yě ná ɖó linlin ɖagbe dó Kúnnuɖetɔ́ Jexóva tɔn lɛ́ wú.—1 Pi. 2:12.

13. Ényí mǐ nɔ se tónú nú sɛ́n e Jexóva dó dó hun wú lɛ́ é ɔ, nɛ̌ mǐ ka nɔ xlɛ́ ɖɔ gbɛ e é ná mǐ é su nukún mǐtɔn mɛ gbɔn?

¹³ Mɛ gěgé tuun ɖɔ mǐ mɛ Kúnnuɖetɔ́ Jexóva tɔn lɛ́ kún nɔ dó hun ó. Ðó mǐ nɔ mɔ ɖɔ hun ɔ nǔ sísí wɛ. Mǐ nɔ se tónú nú sɛ́n e Jexóva dó dó hun wú é bo nɔ gbɛ́ ɖɔ mǐ kún ná dó hun ó, é ná bo tlɛ nyí hwenu e ajijimɛnú e kúnkplá dotóoxwéxó é ɖé wá xwetɔ́n é ɔ nɛ́. (Mɛ. 15:28, 29) Amɔ̌, énɛ́ ɖo xlɛ́xlɛ́ wɛ ɖɔ mǐ ba ná kú ǎ. É nyɔ́ wa ɔ, mǐ nɔ wlíbo nú gbɛ e Mawu ná mǐ é. Mǐ nɔ ba alɔdó dotóo e alɔ se kpɛ́n ná bɔ yě ɖo gbesisɔmɛ bá w’azɔ̌ nú mǐ ganjí, bo ma ka ná zán hun cóbó w’azɔ̌ nú mǐ ǎ lɛ́ é tɔn.

14. Nɛ̌ mǐ ka sixú nyi alɔ nú ajijimɛnú e sixú byɔ́ nukúnkpédómɛwú dotóoxwé tɔn e dógɛ̌ é ɖé gbɔn?

¹⁴ Ényí mǐ wa nǔ ɖěɖěe xó è ɖɔ ɖo xóta élɔ́ mɛ lɛ́ é bo tɔ́jú mǐɖée ɔ, bóyá é ná byɔ́ ɖɔ è ní zɛ mǐ, alǒ mǐ ná ɖó hudó nukúnkpédómɛwú dotóoxwé tɔn e dógɛ̌ lɛ́ é tɔn ǎ. Ényí mǐ ɖo ganjí ɖo agbaza mɛ bónú è tlɛ w’azɔ̌ nú mǐ ɔ, mǐ ná yá wǔ mɔ mǐɖée mɛ. Ényí mǐ nɔ ɖe nǔ e sixú wa nǔ dó mǐ wú ɖo xwé mǐtɔn gbe, alǒ azɔ̌ mǐtɔn jí lɛ́ é síin, lobo nɔ lɛ́ nyi alitasɛ́n lɛ́ télélé ɔ, mǐ sixú nyi alɔ nú ajijimɛnú e nɔ wá xwetɔ́n lɛ́ é ɖé lɛ́.

15. (a) Aniwú é ka ɖo tají ɖɔ mǐ ní nɔ hɛn káti DPA e mɛ è wlán nǔ e kan mǐɖésúnɔ lɛ́ é yaɖéyaɖé lɛ́ dó é? (Lɛ̌ kpɔ́n fɔtóo ɔ.) (b) Lěe video ɔ xlɛ́ gbɔn é ɔ, nɛ̌ mǐ ka sixú wá lanmɛ ná nɔ ganjí sín gbeta e kúnkplá hun zínzán lɛ́ é kɔn gbɔn?

¹⁵ Ðó gbɛ e Mawu ná mǐ é nɔ xɔ akwɛ́ nú mǐ  wútu ɔ, mǐ nɔ wlán nǔ dó káti DPA mɛ, lobo nɔ hɛn dó mǐɖée jí hwebǐnu. Mǐ nɔ wlán linlin e mǐ nɔ ɖó dó hun dídó kpó nukúnkpédómɛwú dotóoxwé tɔn ɖé lɛ́ kpó wú é dó wěma énɛ́ mɛ. Káti DPA towe ka ɖo gbesisɔmɛ nú we a? Ényí é byɔ́ ɖɔ a ná wlán nǔ d’é mɛ, alǒ vɔ́ nǔɖé lɛ́ blóɖó ɖ’é mɛ hǔn, ma dán lɛjɛlɛjɛ ó. Ényí mǐ wlán lěe mǐ ba ɖɔ è ní kpé nukún dó mǐ wú gbɔn é dó wěma énɛ́ mɛ céɖécéɖé ɔ, énɛ́ ná d’alɔ bɔ è sɔ́ ná ɖo hwenu e ma ɖo dandan ǎ lɛ́ é gú wɛ cóbá w’azɔ̌ nú mǐ ǎ. Mǐ ná lɛ́ d’alɔ bɔ dotóo lɛ́ ná ny’alɔ nú nǔ e sixú wa nǔ dó mǐ wú é ɖé zínzán nú mǐ. b

16. Ényí mǐ ma tuun lěe è nɔ wlán nǔ dó káti DPA ɔ mɛ gbɔn é bǐ hlɛ́nhlɛ́n ǎ ɔ, étɛ́ mǐ ka sixú wa?

¹⁶ Mǐ ná bo tlɛ nyí mɛ wínnyáwínnyá, alǒ tlɛ ɖo ganjí gbɔn ɖěbǔ ɔ, mǐ mɛ bǐ jí wɛ awǒvinú lɛ́ sixú jɛ dó; mǐ mɛ bǐ wɛ sixú lɛ́ jɛ azɔn. (Nǔt. 9:11) Hǔn, nǔnywɛ́nú wɛ é ná nyí ɖɔ mǐ ní wlán nǔ dó káti DPA mǐtɔn mɛ. Ényí a ma tuun lěe a ná wlán nǔ dó wěma énɛ́ mɛ gbɔn é ǎ hǔn, byɔ̌ mɛxó agun tɔn towe lɛ́ ɖɔ yě ní d’alɔ we. Yě nɔ tɛ́n kpɔ́n bo nɔ tuun lěe è nɔ wlán nǔ dó wěma énɛ́ mɛ gbɔn é, amɔ̌, yě ná wá gbeta e kúnkplá dotóoxwéxó lɛ́ é kɔn nú we ǎ. Hwiɖésúnɔ wɛ ná wá gbeta énɛ́ kɔn. (Ga. 6:4, 5) É ɖo mɔ̌ có, yě sixú d’alɔ we bɔ a ná mɔ nǔ jɛ gbeta e kɔn a  wá lɛ́ é wú, bo lɛ́ d’alɔ we bɔ a ná wlán nǔ dó wěma énɛ́ mɛ.

17. Nɛ̌ mǐ ka sixú xlɛ́ ɖɔ mǐ nɔ nɔ jlɛ̌ jí ɖo lanmɛ ná nɔ ganjí linu gbɔn?

¹⁷ Ayixa mǐtɔn e mǐ sɔ́ Biblu dó kplɔ́n é wɛ nɔ sísɛ́ mǐ, bɔ mǐ nɔ wá gbeta e kúnkplá ganjíninɔ mǐtɔn kpó nukún e è ná kpé dó mǐ wú ɖo dotóoxwé é kpó gěgé kɔn. (Mɛ. 24:16; 1 Tim. 3:9) Ényí mǐ wá gbeta lɛ́ kɔn, lobo ɖo xó ɖɔ ɖó kpɔ́ xá mɛ ɖěvo lɛ́ dó gbeta e kɔn mǐ wá lɛ́ é wú wɛ ɔ, é ná nyɔ́ ɖɔ mǐ ní zán nǔgbódodó e ɖo Filípunu lɛ́ 4:5 mɛ é, é ɖɔ: “Mi nú mɛ lɛ́ bǐ ní tuun ɖɔ mi nɔ nɔ jlɛ̌ jí.” Ényí mǐ nɔ nɔ jlɛ̌ jí ɔ, mǐ nɔ ɖo adohu adohu jí ɖó ganjíninɔ mǐtɔn ɖo agbaza lixo wú magbokɔ ǎ; mɔ̌ jɛ́n mǐ ma ka nɔ lɛ́ dó cɔcɔ nú mɛ ɖěvo lɛ́ bónú yě ná ɖó linlin ɖokpó ɔ mǐɖɔhun ǎ é nɛ́. Mǐ nɔ yí wǎn nú nɔví mǐtɔn lɛ́, bo nɔ lɛ́ ɖó sísí nú yě, ényí gbeta e kɔn yě nɔ wá lɛ́ é ná bo tlɛ nɔ gbɔn vo nú mǐtɔn lɛ́ ɔ nɛ́.—Hlɔ̌. 14:10-12.

18. Nɛ̌ mǐ ka sixú xlɛ́ ɖɔ gbɛ e Mawu ná mǐ é su nukún mǐtɔn mɛ gbɔn?

¹⁸ Mǐ nɔ ɖe nǔsumɛnukúnmɛ mǐtɔn xlɛ́ Jexóva e nyí Jɔtɛn gbɛ tɔn é gbɔn xɛ nyinya ɖo gbɛ mǐtɔn jí kpó nǔ ɖagbe hú gǎn e mǐ ɖó é níná Jexóva kpó gblamɛ. (Nǔɖe. 4:11) Din hwɛ̌ ɔ, mǐ ɖó ná kpo ɖo xwi ɖí xá azɔn kpó adla j’ayǐ lɛ́ kpó wɛ. Amɔ̌, gbɛ alɔkpa e Gbɛɖótɔ́ mǐtɔn ba nú mǐ é nɛ́ ǎ. Zaanɖé din ɔ, é ná ná mǐ gbɛ mavɔmavɔ e mɛ wǔvɛ́ kpó kú kpó ma sɔ́ ná tíin ɖe ǎ é. (Nǔɖe. 21:4) Din hwɛ̌ ɔ, é nyɔ́ tawun ɖɔ mǐ ɖo gbɛ, bo ɖo Tɔ́ mǐtɔn jǐxwé tɔn wǎnyíyínɔ ɔ, Jexóva sɛn wɛ.