1. Ki valò nou lavi gen pou Jéova ?

 IMAJINÉ roun zanmi ka bay to roun bèl gran kaz, i vyé mé i gen bokou valò : a roun bèl kaz toubonnman ! I gen déztrwa problèm annan kaz-a, lapentir ka soti épi i gen problèm plonbri. Mé magré sa, yé ka di ki kaz-a vo plizyèr milyon éro. To té ké byen kontan sa kaz-a é to té ké pran swen di li, asiré pa pitèt. Menm fason-an, Jéova fè nou roun bèl kado ki gen bokou valò : lavi-a. I montré kouman lavi-a gen valò pou li lò i bay so Pitit kou ranson pou nou (Jean 3:16).

2. Kou 2 Corinthiens 7:1 ka di, kisa Jéova lé nou fè ?

² Jéova sa Sours lavi-a (Ps. 36:9). Apot Pòl té ka krè rèd annan sa vérité-a. A pou sa i di : « A gras a li nou ka viv, nou ka boujé é nou la » (Actes 17:25, 28). Donk nou pouvé vréman wè nou lavi kou roun kado Bondjé bay nou. É Jéova ka bay nou sa nou bézwen pou nou kontinyé viv (Actes 14:15-17). Mé, i pa ka fè mirak pou protéjé nou lavi. I pito lé ki nou menm nou fè tousa nou pouvé pou pran swen di nou lasanté é pou nou kontinyé adoré li (li 2 Corinthiens 7:1). Poukisa nou divèt protéjé nou lasanté ké nou lavi, é kouman nou pouvé fè sa ?

3. Bay roun bagaj ki divèt fè nou fè tousa nou pouvé pou nou kontinyé gen roun bon lasanté.

³ Roun bagaj ki divèt fè nou fè éfòr pou pran swen di nou lasanté, a ki lò nou gen roun bon lasanté nou pouvé adoré Jéova ké tout nou fòrs (Marc 12:30). Kou nou lé  prézanté nou « kò kou roun sakrifis ki vivan, ki sen é ki Bondjé pouvé asèpté », nou pa ka fè anyen ki mové pou nou lasanté (Rom. 12:1). Menm si nou ka pran bokou prékosyon, nou pa pouvé di ki nou pa ké janmen tonbé malad. Mé nou ka fè tousa nou pouvé pou nou protéjé nou lasanté paské nou lé montré nou Papa ki annan syèl-a ki kado lavi-a gen bokou valò pou nou.

4. Kisa rwa David té byen désidé fè ?

⁴ Pou rwa David, kado lavi-a té gen bokou valò. Poukisa ? Men sa i èspliké : « Ki bénéfis i gen si mo ka mouri, si mo ka désann annan trou-a ? Ès lapousyè ké louwé to ? Ès i ké fè tout moun savé ki to fidèl ? » (Ps. 30:9). David divèt ékri sa paròl-ya roun tibi tan anvan i mouri. Donk, menm lò i té vyé i té byen désidé rété vivan épi gen roun bon lasanté tout tan i té pouvé, konsa i té pouvé louwé Jéova. Nou chak byen désidé fè menm bagaj-a.

5. Kèlkéswa nou laj ouben lasanté nou gen, kisa nou pouvé fè ?

⁵ Maladi ké lavyéyès ka pitèt anpéché nou fè roun patché bagaj nou té ka fè anvan. Si a sa, pitèt sa ka nèrvé nou é sa ka fè nou lapenn. Mé nou pa divèt janmen dékourajé épi pa gadé pou nou lasanté ankò. Poukisa ? Paské, kèlkéswa nou laj ouben lasanté nou gen, nou toujou pouvé louwé Jéova, kou rwa David fè l’. Sa ka fè nou plézi toubonnman lò nou ka sonjé ki magré nou pa parfè, nou gen valò pou nou Bondjé ! (Mat. 10:29-31). Menm si nou té ka mouri, a rounsèl bagaj i té ké lé fè : fè nou rouvini (Job 14:14, 15). Atò, tout tan nou vivan, nou lé fè tousa nou pouvé pou protéjé nou lasanté ké nou lavi.

6. Kisa Jéova lé nou fè annan zafè manjé ké bwè ?

⁶ Menm si Labib-a, a pa roun liv lamèdsin ouben roun liv ki ka di sa ki bon pou manjé ouben sa ki pa bon pou manjé, i ka di sa Jéova ka pansé asou sa. Parèkzanp, Jéova ka di nou ‘rété lwen di tousa ki pa bon pou nou’, di tout bagaj ki pouvé gaté nou lasanté (Eccl. 11:10). Zafè manjé bokou ké bwè pou sou ka mété nou lavi an danjé é Labib-a ka kondané sa (Prov. 23:20). Donk, kisa Jéova lé nou fè ? Lò nou ka désidé kisa nou ké bwè ouben kisa nou ké manjé é ki kantité nou ké pran, Jéova lé ki nou kontrolé nou kò (1 Cor. 6:12 ; 9:25).

7. Kouman konsèy ki annan Proverbes 2:11 ka idé nou pran bon désizyon pou nou lasanté ?

⁷ Nou ké montré Jéova ki nou gen rékonésans pou lavi-a si nou ka byen réfléchi lò nou gen désizyon pou pran (Ps. 119:99, 100 ; li Proverbes 2:11). Parèkzanp, nou ké pran tan réfléchi anvan nou désidé sa nou ké manjé. Si nou kontan roun manjé, mé nou savé ki sa ka randé nou malad, nou ké désidé pa manjé l’ paské nou sa roun moun ki ka réfléchi. Anplis di sa, nou ka aji ké sajès lò nou ka dronmi asé, lò nou ka panga pou nou toujou pròp é pou nou kaz rété pròp.

8. Kisa Labib-a ka di nou asou sa Jéova ka pansé asou zafè sékirité-a ?

⁸ Annan lalwa Jéova té bay Israyélit-ya, i té ka di yé sa pou yé té fè pou anpéché aksidan grav rivé annan yé kaz ouben koté yé té ka travay (Ex. 21:28, 29 ; Deut. 22:8). Lò roun moun té ka tchwé rounòt moun san i pa té fè parèsprè, i té ka trapé gro problèm apré sa (Deut. 19:4, 5).  Dapré Lalwa, si roun moun té ka mété lavi roun timoun annan vant so manman an danjé, menm si a pa té parèsprè, yé té divèt pini l’ (Ex. 21:22, 23). Ékritir-ya klè : Jéova lé nou fè atansyon.

9. Ki prékosyon nou pouvé pran pou anpéché roun aksidan rivé ? (gadé zimaj-ya osi).

⁹ Nou ka montré Jéova nou gen rékonésans pou lavi-a lò nou ka ranjé tout bagaj pou nou an sékirité annan nou kaz ké koté nou ka travay. Parèkzanp, a pa pou nou lésé pyès bagaj ki ka koupé ni prodwi ki danjéré ni médikaman pou timoun-yan pa manyen yé. É lò nou ka jité sa kalité bagaj-ya, a pou nou fè l’ roun fason pou pyès moun pa an danjé akoz di sa. Lò nou ka limen roun difé, nou ka mété dlo bouyi a difé ouben nou ka sèrvi roun zouti élèktrik, a pou nou panga épi rété la pou véyé sa bagaj-ya. Si nou pa ka santi nou kò byen paské nou pran roun médikaman, paské nou bwè ouben paské nou pa dronmi asé, nou pa ka pran nou loto. É lò nou ka roulé, nou pa ka tchenbé nou téléfonn annan nou lanmen.

10. Kisa nou pouvé fè anvan ouben apré roun katastròf rivé ?

¹⁰ A pa tout tan nou pouvé anpéché roun bagaj mété nou lavi an danjé. É a sa ka rivé èspésyalman lò i gen roun katastròf natirèl, roun épidémi ouben lò roun lagèr ka pété. Mé, annan sa kalité sitiasyon-yan, nou ké gen plis chans rété vivan si nou ka swiv sa yé ka di nou fè. Parèkzanp lò yé ka bay nou roun lèr pou nou rété annan nou kaz, lò yé ka doumandé nou chapé di nou koté ouben ròt bagaj ankò (Rom. 13:1, 5-7). Détan, nou pouvé aji anvan malò rivé, donk annou toujou obéyi sa otorité-ya ka di pou idé nou préparé nou kò. Parèkzanp, a roun bon bagaj si nou ka fè rézèrv dlo ké manjé ki pa ka pouri, épi sa bon pou nou toujou gen sa yé ka aplé roun trousse de premiers secours.

11. Lò roun maladi ki ka kouri toupatou ka riské vini koté nou fika, kisa nou divèt paré pou fè ?

¹¹ Kisa pou nou fè si roun maladi ki ka kouri toupatou ka vini koté nou ka rété ? Annou byen swiv tousa yé ka di nou fè pou protéjé nou lasanté. Parèkzanp yé ké di nou lavé nou lanmen, rété lwen di moun-yan, mété roun mas épi rété an karantenn. Si nou ka obéyi sa règ-ya nou ké montré ki nou ka bay kado lavi-a bokou valò.

12. Lò i gen roun sitiasyon ki danjéré pou tout moun, kouman prensip-a ki annan Proverbes 14:15 ka idé nou savé ki enfòrmasyon nou pouvé krè ?

¹² Lò i gen roun sitiasyon ki danjéré pou tout moun, détan, nou ka tandé nou zanmi ouben nou vwazen ka di bagaj ki pa vré. Nou jis ka tandé sa latélé ouben asou Entèrnèt. Pasé nou krè « tousa yé ka di », miyò nou kouté enfòrmasyon ki ka vin di gouvèrnman-an ouben otorité médikal-ya nou pouvé fè konfyans (li Proverbes 14:15). Anvan Kolèj santral-a ké filyal-ya di nou sa pou nou fè pou réinyon asanblé-a ké prédikasyon-an, yé ka fè tousa yé pouvé pou trapé enfòrmasyon ki vré (Héb. 13:17). Lò nou ka swiv sa yé ka di nou, nou ka protéjé nou kò é nou ka protéjé ròt-ya. Anplis di sa, nou pouvé fè asanblé-a koté nou fika gen roun pi bon répitasyon (1 Pierre 2:12).

13. Annan zafè disan-an, kouman nou ké montré ki lavi-a gen bokou valò pou nou ?

¹³ Bokou moun savé ki pou Témwen Jéova-ya, disan-an sakré. Nou ka obéyi lalwa Jéova bay asou disan-an é nou ka réfizé pran disan, menm si nou annan roun sitiasyon ki grav (Actes 15:28, 29). Sa pa lé di ki nou lé mouri. Non, lavi-a gen bokou valò pou nou. A pou sa nou ka chaché dòktèr ki paré pou swanyé nou ké pi bon kalité trètman i pouvé gen san disan.

14. Kisa nou pouvé fè pou nou gen mwens chans yé opéré nou ouben bay nou roun gro trètman ?

¹⁴ Si nou ka swiv tout konsèy nou wè annan sa artik-a, pitèt yé pa ké bézwen opéré nou ouben bay nou roun gro trètman. Anplis di sa, si nou ka tiré annan nou kaz ouben koté nou ka travay tout bagaj ki pouvé fè nou gen roun aksidan, nou ké gen mwens chans tonbé annan roun sitiasyon koté yé blijé opéré nou. A menm bagaj-a si nou ka byen obéyi kod larout-a. É si magré sa yé pou opéré nou ? Si anvan sa, nou swiv sa konsèy-ya, nou lasanté ké pi bon, donk nou ké sipòrté opérasyon-an pi byen é nou ké géri pi vit.

15. a) Poukisa sa enpòrtan pou nou gen roun kart DPA byen ranpli asou nou ? (gadé zimaj-a osi). b) Kou vidéyo-a ka montré l’, kisa nou pouvé fè pou nou byen réfléchi pou pran bon désizyon annan zafè sèrvi disan-an ?

 ¹⁵ Paské lavi-a gen bokou valò pou nou, nou ka ranpli dokiman Instructions médicales/Désignation d’une personne de confiance (kart DPA) é nou pa jen ka maché san li. Annan sa dokiman-an, nou ka di sa nou lé parapòrta zafè pran disan é parapòrta sèrten trètman. Ès to kart DPA byen ranpli ? Si to gen bagaj pou chanjé asou l’ ouben si to gen pou ranpli roun, pa di to ké fè l’ pita. Si nou ka byen marké sa nou lé ké sa nou pa lé, sa ké pèrmèt pa pédi tan si yé gen pou swanyé nou an irjans. Sa ké pouvé osi anpéché yé bay nou trètman ouben médikaman ki danjéré pou nou lasanté b.

16. Kisa nou pouvé fè si nou pa savé kouman pou nou ranpli roun kart DPA ?

¹⁶ Pyès moun, pa menm roun jennjan ouben roun moun ki byenpòrtan, pa pouvé di ki i pa ké gen roun aksidan ouben roun maladi (Eccl. 9:11). Donk, pou aji ké sajès, nou ké ranpli roun kart DPA. Si to pa savé kouman pou to fè, doumandé ansyen-yan annan to asanblé idé to.  Sa frè-ya ka fè tousa yé pouvé pou yé byen konprann kouman pou yé ranpli sa dokiman-an. Mé, yé pa ké pran pyès désizyon pou to lasanté a to plas ; a to ki divèt fè sa (Gal. 6:4, 5). Parkont, yé pouvé idé to pou to konprann ki chwa to gen é pou to byen marké sa to lé.

17. Kouman nou pouvé montré ki nou rézonab annan zafè lasanté ?

¹⁷ A nou konsyans ki ka apiyé asou Labib-a ki ka idé nou pran roun patché désizyon pou nou lasanté é pou chwazi ki trètman nou ké pran (Actes 24:16 ; 1 Tim. 3:9). Lò nou ka pran désizyon é ki apré sa, nou gen pou palé di sa désizyon-yan, annou pa bliyé swiv prensip-a ki annan Philippiens 4:5 : « A pou tout moun wè ki zòt rézonab. » Roun krétyen ki rézonab pa ka enkyété so kò tròp pou so lasanté. I pa ka éséyé fòrsé ròt moun pansé kou li non plis. Menm si nou frè ké sò-ya pa ka pran menm désizyon ké nou, nou kontan yé é nou ka rèspèkté yé (Rom. 14:10-12).

18. Kouman nou pouvé montré Jéova ki nou gen rékonésans pou lavi i bay nou-a ?

¹⁸ Nou ka montré nou rékonésans pou Jéova, ki sa Sours lavi-a, lò nou ka protéjé nou lavi é lò nou ka sèrvi tousa nou gen pou adoré l’ (Rév. 4:11). Atchèlman, nou gen pou fè ké maladi-ya épi ké malò ké katastròf ki ka tonbé anlè moun. Mé Sa-la ki fè nou-a pa té fè nou pou nou gen sa kalité lavi-a. Titalò, i ké bay nou lavi pou tout-tan, roun lavi san soufrans ni lanmò ! (Rév. 21:4). Anvan sa jou-a rivé, a roun bèl plézi pou nou viv épi adoré nou Papa ki annan syèl-a ki plen ké lanmou, Jéova !