1. Jehovak amchem jivit kitlem moladik asa?

 TUMCHEA eka ixttan tumkam ek ghor dennem koxem dilam mhunn chintat. Tea ghoracho thodde kodden chuno gela, ani thoddea zageancher tem golltta. Punn hea ghorachem mol koroddamnim rupeamnim asa. Tor tumi tea ghoracho valor kortolim ani tem bore bhaxen samballunk khub vavr kortolim nhoi? Teach bhaxen, Jehovan pasun amkam ek ekdom moladik dennem dilam. Tem mhunnttlear, amchem jivit. Khorem mhunnttlear, amkam soddvonn diunk aplea ekleach Putak dhaddun, amchem jivit Jehovak kitlem moladik tem tannem dakhoun dilam.—Ju. 3:16.

2. 2 Korintkarank 7:1-a pormonnem ami kitem kelʼlem Jehovak zai?

² Jehova Dev jivitachi Zhor zaun asa. (St. 36:9) Ani apostl Paulu pasun hem sot mhunn mantalo dekhun tannem oxem mhunnttlem: “Tache sovem ami jietanv, bhonvtanv ani asanv.” (D.I. 17:25, 28) Tor jivit khorench Jehova thaun ek dennem mhunn ami mhunnonk zata. Ami jivim uronk, Jehova mogan amkam goroz tem soglem dita. (D.I. 14:15-17) Punn aiz Jehova vizmitam korun amchea jivachi rakhonn korina. Tachea bodlek, amchi bholaiki ani jivachi rakhonn korunk, toxench Jehovachi seva korit ravonk amchean zata tem soglem ami kelʼlem taka zai. (2 Korintkarank 7:1 vachat.) Tor ami amchi bholaiki ani jivachi rakhonn kiteak korunk zai, ani ami hem koxem korunk zata?

3. Ami amchi bholaiki bori dovrunk sodhtat tachem ek karonn kitem?

³ Ami amchi bholaiki bori dovrunk sodhtat tachem ek karonn mhunnttlear, ami Jehovache sevent amchem boreantlem-borem  diunk sodhtat. (Mk. 12:30) ‘Ami amkanch ek povitr ani Devak manvota tosli ek jivi boli mhunn somorponn korunk sodhtat’ dekhun, amkam duent korunk xoktat mhunn ami zannant, toslea vostum thaun ami pois ravtat. (Rom. 12:1) Punn ami kitlo-i proitn kelear pasun, amchi bholaiki bigoddchi na oxem ami khatren sangonk xokonant. Tori astana, amchea sorginchea Bapan dilʼlea jivitachea dennea pasot upkariponn dakhounk ami amchi bholaiki bori dovrunk zata titlo vavr kortat.

4. Raza David kitem korunk sodhtalo?

⁴ Raza David, Devan dilʼlea jivitachea denneacho khub valor kortalo. Hem amkam tachea utrantlean kollon ieta. Tannem mhunnttlem: “Hanv zor morun gelom, hanv zor fonddant pavlom, Tuka faido koslo? Mati-dhulʼl zala tachean Tuji vakhannʼnni korunk zait kai? vo Tujem visvaxiponn bi porgottunk zait?” (St. 30:9) David ekdom zanntto zalʼlo tednam him utram tannem boroilʼlim astolim. Punn apunn jivo asosor apli bholaiki samballunk Davidan nichov kelʼlo. Karonn to Jehovachi seva korit ravonk sodhtalo. Ami pasun toxench korunk sodhtat nhoi?

5. Ami kitlim-i zannttim vo duent aslear pasun, ami kitem korunk zata?

⁵ Duens ani zanntteponnak lagon, ami adim korunk xoktalim teo zaiteo vostu ami atam ghoddie korunk xokonant astolim. Dekhun ami bejar ani niraxi zaunk xoktat. Punn amchea bholaikechi kallji gheunk amchean zata tem soglem ami korunk zai. Karonn ami kitlim-i duent vo zannttim asum, Raza Davida bhaxen ami Jehovachi vakhannʼnni korit ravonk zata. Ami zannttim vo duent aslear pasun, ami Jehovak ekdom valorachim asat. Hem zannam zalolean amkam kitlem borem dista nhoi! (Mt. 10:29-31) Toxench, ami melear pasun to amkam jivont korunk axeta. (Job 14:14, 15) Tor jivim asom porian amchea bholaikechi ani jivachi kallji gheunk, amchean zata tem soglem ami korunk sodhtat.

6. Khaunche-pieunche vixim ami kitem kelʼlem Jehovak zai?

⁶ Amchea bholaikechi kallji gheunk ami kitem korunk zai vo ami kitem khaunk zai, tea vixim Bible-ant ek list diunk na tem khorem. Tori astana, hea vixim Jehovak koxem dista tem amkam Bible-antlean kollon ieta. Udharonnak, amchea jivak boreak poddonant tosleo “vaitt vostu pois korunk” Jehova amkam urba dita. (Up. 11:10, NW) Bible-ant, ami chodd jevchem nhoi vo bebdikai korchi nhoi mhunn sanglam. Karonn oxem kelear, amchi bholaiki bigddonk xokta ani ami amcho jiv pasun hogddaunk xoktat. (Mho. 23:20) Tor ami kitem ani kitlem khatolim ani pietolim tea vixim ami svotacher tabo dovorlolo Jehovak zai.—1 Kor. 6:12; 9:25.

7. Mhonnʼnneo 2:11-nt dilʼlo solʼlo amche bholaiki vixim bore nirnnoi gheunk amkam koso modot korta?

⁷ Ami amchi chintpachi tank uzar korun, Jehovan amkam dilʼlea jivitachea dennea pasot upkari asat mhunn dakhounk zata. (St. 119:99, 100; Mhonnʼnneo 2:11 vachat.) Udharonnak, ami kitem khatolim tea vixim ami xanneponnan nirnnoi ghetat. Umkench kitem tori amkam khub avoddtta, punn tem khailear amchi bholaiki bigoddttoli mhunn ami zannant zalear ami tem khavop pois kortat. Toxench ami favo titli nhid ghetat, sodanch exercise kortat, ani amchi kudd ani ghor nitoll dovortat tednam ami amchi chintpachi tank bore bhaxen uzar kortat mhunn dakhoun ditat.

8. Opghat zaina zaunk ami proitn kelʼlo Jehovak zai mhunn Bible-antlean amkam koxem kolltta?

⁸ Israelitkaramnim, ghorant astana toxench kamachea zagear opghat zaina zaunk kitem korunk zai, tea vixim Jehovan tankam Kaide dilʼle. (Sutt. 21:28, 29; D.S. 22:8) Ek munis chukon pasun konnacho-i jiv kaddtta zalear, taka tacho  porinnam bhogunk poddttalo. (D.S. 19:4, 5) Toxench, eke gorbest bailechea kusveant aslolea bhurgeak mar laglo zalear, tika dukhoilea tea munxak, tannem tem mudʼdom korunk na zalear pasun, Kaidea pormonnem khast favo zatali. (Sutt. 21:22, 23) Tor opghat zaina zaunk amchean zata tem soglem ami kelʼlem Jehovak zai mhunn Bible-antlean amkam kollon ieta.

9. Opghat zaina zaunk ami kitem korunk zata? (Chitram pasun polloiat.)

⁹ Ghorant ani kamachea zagear opghat zaina zaunk ami proitn kortat tednam, Devan dilʼlea jivitachea denneacho ami valor kortat mhunn dakhoun ditat. Udharonnak, dhar asloleo vostu, ani amcho jiv dhokeant ghalunk xoktat toslim chemical-am vo vokhdam bhair uddoitana, ami teo vostu oxeoch khoinsorui bhair uddounchimnant. Ani heo vostu ami bhurgeam thaun pois dovortolim. Toxench, uzo pettoitana, udok tapoitana ani electric sadhonam uzar kortana ami chotrai dovortolim. Ani heo vostu kortana, ami teo thoinch sanddun voichimnant. Tea bhair ami soro pieleant, vo umkinch vokhdam ghetleant vo amchi nhid zaunk na dekhun amkam dhean diunk kotthin zata zalear ami gaddi  cholounchimnant. Toxench gaddi choloitana ami mobile uzar korchimnant.

10. Bhirankull ghoddnneo ghoddchea poilim ani ghoddttat tednam ami kitem korunk zata?

¹⁰ Thodde pavtti, okosmat ghoddttat teo bhirankull ghoddnneo ami pois korunk xokonant. Zoxem odruxttam, pidda ani zhogddim-zhuzam. Punn hea poristhitimnim amchea jivachi rakhonn korunk ani surokxit ravonk, sorkar dita teo suchounneo ami pallunk zai. Zoxem, te amkam curfew pallunk laitat vo ami ravtat thoim thaun bhair soronk laitat vo her suchounneo ditat zalear ami tanchem aikonk zai. (Rom. 13:1, 5-7) Thoddea odruxttam vixim odhikari amkam poilinch suchounneo diunk xoktat. Tednam te sangtat tem aikon, tea odruxtta pasot ami adim fuddench toiar ravonk zai. Zoxem udok, piddʼddear zaina toslem jevonn ani gorjechim vokhdam poilinch haddun dovorlolean amkam modot zaunk xokta.

11. Ami ravtat tea zagear rokddich posorta tosli pidda suru zali zalear ami kitem korunk zai?

¹¹ Ami ravtat tea zagear rokddich posorta tosli pidda suru zali zalear ami kitem korunk zai? Sorkar amkam dita teo suchounneo ami pallunk zai. Zoxem, ami amche hat dhuvunk zai, lokam thaun favo titlo ontor dovrunk zai, mask ghalunk zai ani ami duent poddlim zalear, heram thaun pois ravonk zai. Ami oxem kortat tednam, Devan amkam dilʼlea jivitachea denneacho ami kitlo valor kortat tem ami dakhoun ditat.

12. Bhirankull ghoddnneo ghoddttat tednam ami aikotat tea khobram vixim chotrai dovrunk, Mhonnʼnneo 14:15-nt aslolem totv amkam koxem modot korta?

¹² Bhirankull ghoddnneo ghoddttat tednam amchea ixttam koddlean, xezaream koddlean vo news-ant, amkam khotteo khobro aikonk mellot. Tea vellar, tim ‘sangtat titlem-i’ sot mhunn manun gheunchea bodlek, sorkar ani dotoram koddlean melltta ti sogleam-von khatrechi mahiti ami aikonk zai. (Mhonnʼnneo 14:15 vachat.) Porgottnni ani mittinge vixim koslem-i margdorxon diunchea poilim, Sonchalon Monddoll ani xakha ofisam, khatrechi mahiti melloun gheunk khub vavr kortat. (Heb. 13:17) Tor te ditat tem margdorxon pallʼllolean, ami amcho toxench dusreancho-i jiv dhokeant ghalchimnant. Tea bhair oxem kelolean, ghoddie lok pasun Jehovachea Sakxeam vixim borem chintunk pavtolo.—1 Ped. 2:12.

13. Rogta vixim ami ghetat tea nirnnoi-antlean Jehovan dilʼlea jivitachea denneacho ami valor kortat mhunn koxem dakhounk zata?

¹³ Jehovachim Sakxi rogot povitr oxem lekhtat mhunn zaito lok zannam. Rogta vixim ami Jehovacho kaido pallttat dekhun, amcho jiv kitlo-i dhokeant aslear pasun ami rogot ghenant. (D.I. 15:28, 29) Punn hacho orth, ami moronk sodhtat oxem nhoi. Khorem mhunnttlear, Devan amkam dilʼlea jivitachea denneacho ami khub valor kortat. Tea pasot, rogot nastana amcho ekdom bore toren ilaz korunk toiar asat tea dotoram koddlean ami modot ghetat.

14. Amchi bholaiki samballunk ami kitem korunk zata?

¹⁴ Hea lekhant, amchi bholaiki ani jivachi rakhonn korunk amkam zaiteo suchounneo mellʼlleo. Toxench, ghorant ani kamachea zagear surokxit toren kam korunk, ani rostea voile kaide pallunk amkam urba mellʼlli. Heo suchounneo ami pallʼlleo zalear, ami ghoddie rokddinch duent zaunchimnant vo opghata thaun amchi rakhonn zatoli. Punn koslea-i karonnak lagon ami duent zalim, vo amkam opghat ghoddlo zalear pasun, ami hachea poilim amchi bholaiki samballʼllea dekhun, amchea ilaza vo operation-a uprant, ami rokddinch borim zaunk xoktat.

15. (a) Amche lagim ‘No Blood’ kardd sodanch asop kiteak gorjechem? (Chitr pasun polloiat.) (b) Video-nt dakhoilam toxem, rogta sombondit sarke nirnnoi gheunk amkam koxi modot zatoli?

¹⁵ Jehovan amkam dilʼlea jivitachea denneacho ami valor kortat dekhun ami ‘No Blood’ kardd (advance health-care directive)  bhortolim, ani tem sodanch amchea sangata dovortolim. b Hea dokumentant, ami rogot gheunchimnant ani rogta sombondit khoincho ilaz ghetolim vo gheunchimnant, tem spoxtt toren boroilʼlem asta. Tor tumi ‘No Blood’ kardd bhorunk na zalear, vo tantunt bodlav korunk zai zalear, toxem rokddench korat. Oxem kelolean, akantachea vellar tumchea nirnnoi-am vixim dotora lagim ulounk, tumcho vell ibadd zaunchona ani tumcho ilaz rokddoch zaunk pavtolo. Toxench, tumcho jiv dhokeant ghalunk xoktat toslim vokhdam vo ilaz tumi gheunk pavchimnant. c

16. ‘No Blood’ kardd koxem bhorchem tem amkam kollona zalear ami kitem korunk zata?

¹⁶ Ami tornnattim vo zannttim asum, amchi bholaiki bori asum vo na, amche modlo konnui duent poddonk xokta vo konnakui opghat ghoddonk xokta. (Up. 9:11) Dekhun ami ‘No Blood’ kardd poilench bhorun dovrunk zai. Punn tem koxem bhorchem tem amkam kollona zalear kitem? Ami amchea sobhentlea vhoddilanchi modot gheunk zata. Tem kardd koxem bhorchem, tem choddxe pavtti tankam bore toren khobor asta dekhun, tantuntle vixoi te amkam somzaunk xoktat ani kosle ilaz vinchun kaddunk zata tea vixim somzonni diunk xoktat. Punn ami khoincho ilaz ghetolim, to nirnnoi ami korunk zai. (Gal. 6:4, 5) Karonn ti amchi zobabdari,  ani vhoddil to nirnnoi amchea pasot gheunchenant.

17. Bholaike vixim nirnnoi ghetana ami somjikai koxi dakhounk zata?

¹⁷ Amche bholaiki vixim, ani ami koslo ilaz ghetolim vo na tea vixim ami ghetat te zaite nirnnoi, Bible-antlean ami kitem xikleant tacher adarit astat. (D.I. 24:16; 1 Tim. 3:9) Tor ami nirnnoi ghetat, ani amchea nirnnoi-am vixim dusrea lagim uloitat tednam ami Bible-antlem hem totv ugddas dovrunk zata, zoim sanglam: “Tumchi somjikai sogleank dixtti poddum-di.” (Filp. 4:5, NW) Ami somjikai dakhoitat zalear ami amche bholaike vixim chodduch husko korchimnant. Toxench, herancho nirnnoi ami ghetlolea nirnnoi-a pormonnench asonk zai mhunn tancher dobhav ghalchimnant. Tor bhav-bhoinnancho nirnnoi amche poros vegllo aslear pasun, ami tancho mog kortolim ani tankam man ditolim.—Rom. 14:10-12.

18. Ami jivitachea dennea pasot upkariponn koxem dakhounk zata?

¹⁸ Amchea jivachi kallji gheun ani Jehovak amchea boreantlem-borem diun, jivitachi Zhor zaun aslolea Jehovak ami upkari asat mhunn ami dakhoun ditat. (Prok. 4:11) Sodʼdheak amkam duensancho ani odruxttancho fuddo korunk poddtta. Punn ami hea toren jielolim amchea Rochnnarak naka. Tea pasot, to rokddoch moronn ani dukh kaddun uddoitolo ani amkam sasnachem jivit ditolo. (Prok. 21:4) Te meren, amchea bholaikechi kallji gheun amcho mogall sorgincho Bap Jehovachi seva ami korit ravum-ia.