1. ¿Kasa kojutuka maʼin nümüin Jehová?

 JÜLÜJATAA PAAʼIN nüsülajüle pümüin wanee paʼaleewain wanee piichi. Mayaainjeʼe mooloin shia otta shipitüin wüin suluʼu, ayateeria kojutuin maʼin shia. ¿Aashin paaʼinmajeerüin shia? Müsia neʼe sukuwaʼipa tü kataa oʼuu naapakat wamüin Jehová. Süka kojutuin maʼin shia nümüin, nuluwataain chi Nüchonkai süpüla outuin nia waaʼu (Juan 3:16, TNM).

2. Sünainjee tü sümakat 2 Corinto 7:1, ¿kasa keeʼireeka naaʼin Jehová waaʼinrüin?

² Nia Jehová «chi shikiishikai tü kataakalü oʼuu» (Sal. 36:9). Tia shia tü nüküjeekalü achiki chi aluwataaushikai Pablo wanaa sümaa nümüin: «Katoʼuchii waya nutuma, warai müshii waya jee wayuushii waya nutuma» (Aluw. 17:25, 28, TNM). Sükajee tia, wayaawata aaʼu nüsülajüin wamüin Maleiwa tü kataakalü oʼuu jee naapüin tü kasa choʼujaakat wamüin süpüla katüin woʼu (Aluw. 14:15-17). Nnojoleechipejeʼe aaʼinrüin Jehová kasa pülasü süpüla ayatüin katüin woʼu. Tü keeʼireekat naaʼin Jehová shia waaʼinmajüinjatüin tü wanoulakat otta waaʼinmajiraainjanain suulia ayuulin waya (paashajeʼera 2 Corinto 7:1, TNM). ¿Jamüshii waaʼinmajiraainjanaka suulia ayuulin waya jee outuin waya? ¿Kasa waaʼinrajatka süpüla wountuin tia?

3. ¿Jarat wanee kasa waaʼinmajiraaka atuma suulia ayuulin waya?

³ Wanee kasa waaʼinmajiraaka atuma suulia ayuulin waya, shia süka waʼyataweein maʼin nümüin Jehová (Mar. 12:30). Süka wuleein weʼiruku, wuleein waaʼin jee aneein wakuwaʼipa noʼuluʼu Maleiwa, nnojoleena sünainpünaain waya wanee kasa eeka süpüla ayuulin atuma waya (Roma 12:1, TNM). Watüjaa aaʼu ayuuijeenain waya soʼu wanee kaʼi. Mayaainjeʼe müin tia, ayatüshiʼiya aaʼinmajiraain waya süpüla sütüjaanüin aaʼu kojutuin wamüin tü  kataa oʼuu naapakat wamüin chi Washi iipünaajachikai.

4. ¿Kasa naaʼinreeka maʼin David?

⁴ Kojutusü maʼin nümüin David, chi aluwataaikai, tü kataa oʼuu naapakat Maleiwa nümüin. Anuujeseʼe nünüiki süchiki tia: «¿Kasa anasü eejeetka sünainjee outuin taya jee teʼitaanapa suluʼu tü woowirakat? ¿Suʼwaajeeiche pia sümamüla mma? ¿Süküjeetche achiki tü kasa anasü paaʼinrakat?» (Sal. 30:9). Eesüjaʼa nüshajüle David tia pütchikat nülüʼütpa süpüla outaa. Mayaainjeʼe müin nukuwaʼipa, ayatüsia kateein noʼu süpüla nuʼwaajüin Jehová. Müshiʼiya wayakana, ayateesü katüin woʼu süpüla waʼwaajüin Jehová.

5. Mayaainjeʼe laülaain waya jee ayuulin waya, ¿kasa ayatüinjatka waaʼinrüin?

⁵ Laülaainnale waya jee ayuuire waya, eesüjaʼa isale wachiki waaʼinrüin tü kasa waaʼinrapuʼukat paala. Sünainjee tia mojusü waaʼin jee shapaasü waaʼin. Nnojotpejeʼe motuinjatüin waaʼin waaʼinmajiraainjanain suulia ayuulin maʼin waya, jama eein süpüla waʼwaajüin Jehová maʼaka naaʼinrüin shia David laülaapa nia. Anasü waaʼin süka watüjaain saaʼu alin waya nüpüla Maleiwa jee kojutuin waya nümüin mayaainjeʼe laülaain jee ayuulin waya (Mat. 10:29-31). Süka kojutuin maʼin waya nümüin Jehová nüküjain wamüin nüsoʼireʼereerüin waaʼin outule waya (Job 14:14, 15). Sümaʼinruʼu katüin woʼu, anashii waaʼinmajiraale suulia ayuulin waya jee outuin waya.

6. ¿Kasa jülüjainjatka waaʼin naashin Jehová süchiki tü eküütkat jee tü asüüshikat?

⁶ Nnojotsü shiain saashajaain maʼin achiki tü Bibliakat tü shipinaseinjatkat wayuu jee tü eküülü anakat süpüla ekünaa. Süküjapejeʼe anain nümüin Jehová jülüjale waaʼin tia. Anuu wanee pütchi anasü süküjaka wamüin tü Bibliakat: «Nnojo paainjain kasa mojeetka atuma pukuwaʼipa» (Ecl. 11:10). Süküjain tü Bibliakat nnojoliinjanain kasain aleʼe waya jee nnojoluinjatüin alanaʼaleein watuma tü asüüshikat süka eein süpüla ayuulin jee outuin waya sutuma (Prov. 23:20). Makalaka nücheküin Jehová wayaawatüin saaʼu tü weküinjatkat jee tü wasüinjatkat (1 Cor. 6:12; 9:25, TNM).

7. ¿Jamüsü anaka waaʼinrüle tü sümakat Proverbios 2:11 suulia ayuulin waya?

⁷ Anasü jülüjale maʼin waaʼin tü kasa waneekakat süpüla sütüjaanüin aaʼu kojutuin wamüin tü kataa oʼuu naapakat wamüin Jehová (Sal. 119:99, 100; paashajeʼera Proverbios 2:11). Anasü wayaawatüle saaʼu tü weküinjatkat. Jamüsüjaʼa eere wanee eküülü wekeeka amüin sümaa watüjaain saaʼu mojeerüin shia wamüin, anakajaʼa nnojorüle weküin shia. Suulia ayuulin waya, anashii weisalaale maalü, waainjawaire ejercicio, wulere watapaʼa jee wepiapaʼa.

8. Saashin tü Pütchi Aapünakat nümüin Moisés, ¿kaseerü alataka nümüin wanee wayuu jamüle wanee wayuu nutuma sümaa nnojoluin alein shia naaʼin?

⁸ Nüküjain Jehová namüin na israelitakana tü naaʼinrajatkat suulia pasiruwaain naya nepialuʼu jee naʼyataaleruʼu (Éx. 21:28, 29; Deut. 22:8). Jamüshijaʼa outule wanee wayuu nutuma wanee israelita sümaa nnojoluin alein shia naaʼin, kasalajaneerü tia nümüin (Deut. 19:4, 5). Saashin tü Pütchi Aapünakat nümüin Moisés, jamüle wanee wayuu ipuotsü nutuma wanee wayuu jee outule chi süchonkai süleʼeruʼu, süsaleechi nia atumawaa, jaʼitasü nnojoluin alein shia naaʼin (Éx. 21:22, 23). Sükajee tü sümakat tü Bibliakat wayaawata aaʼu nücheküin Jehová eejüinjatüin waaʼin suulia pasiruwaain waya jee pasiruwaain wayuu watuma.

9. ¿Kasa waaʼinrajatka suulia pasiruwaain waya? (Piirakaa sümüin tü ayaakuaakalüirua).

⁹ Kojuteerü wamüin tü kataa oʼuu naapakat  wamüin Jehová, waaʼinmajiraale suulia pasiruwaain waya wepialuʼu jee waʼyataaleruʼu. Eere wamaʼana chajaruuta, rüi, cloro, weneena jee medicina, ana sünaajaaya watuma noulia na tepichikana otta wojotuinjatüle shia, ana sukuwaʼipa watuma. Wachuwajaainjanale siki, wopoolojuinjanale wüin, waʼyataainjanale wepialuʼu süka tü korolo eekat wamaʼana, eejüinjatü waaʼin suulia jamajüin waya sutuma. Nnojoliinjana oʼunirüin waya kemion watunkeere aaʼin jee wasajüle medicina mariaweenaka atuma waya. Woʼunirapa kemion nnojotsü wajapuluʼuinjatüin waserulaatse otta nnojotsü wasüinjatüin wanee kasa kaʼakaka yootshi.

10. ¿Kasa waaʼinrajatka süpülapünaa jee soʼunnaa sülatüin wanee kasa?

¹⁰ Eeshii süpüla jamajüin waya sülatalaʼa sümüle wanee kasa. Nnojotsü kasakain watuma eejaʼalaa sümüle wawai, sukutkujaain mma, eein ayuulii jee kasachiki. Sülatüle tia, wachajaa maʼin sukuwaʼipa suulia jamajüin waya jee woonoo sümaa tü namakat na sülaülashiikana  mma makatüinjanale waya wepialuʼu jee woʼunuinjanale wepialuʼujee (Roma 13:1, 5-7). Eepejeʼe waneirua kasa eekai süpüla shiyaawatünüin aaʼu sülatajatüin. Anakalaka woonoole sümaa tü namakat na sülaülashiikana mma. Yapeena waya wanaajaale wüin, eküülü matüjainka mojaa otta wanaajaale suluʼu wanee kaajachon tü kasa choʼujaweetkat wamüin jamüle waya.

11. ¿Kasa waaʼinrajatka eejaʼalaa sümüle wanee ayuulii eekai keemain?

¹¹ ¿Kasa waaʼinrajatka eejaʼalaa sümüle wanee ayuulii eekai keemain? Oonoojeena waya namaa na sülaülashiikana mma süchiki woʼlojuinjatüin wajapü, kaʼyatüinjanain waya suulia wayuu, keʼicheʼerajanainjanain waya jee cuarentenainjanain waya. Waaʼinrüle tia, jaʼyeerü waaʼu kojutuin wamüin tü kataa oʼuu naapakat wamüin Maleiwa.

12. ¿Jamüsü eejüinjatka waaʼin saashin Proverbios 14:15 waapapa notiisia soʼunnaa sülatalaʼa sümüin wanee kasa?

¹² Sülatalaʼa sümüle wanee kasa, eesü süpüla süküjünüin wamüin pütchi nnojotka pansaain süchiki tia natuma na waʼaleewainyuukana, na weʼraajüinkana jee suluʼupünaa notiisia. Nnojo kacheʼein waya sümüin pütchi eekai waapüin neʼe, anakajaʼa woonoole sümaa pütchi eekai watüjaain maʼin saaʼu shiimain, maʼaka saaʼin tü namakat na sülaülashiikana mma otta na tottootkana (paashajeʼera Proverbios 14:15). Woonooinjatü amaa tü namakat na Laülaashii Jülüjakana aaʼin na Aküjaliikana pütchi jee tü suluwataakat Weteet süchiki tü waaʼinrajatkat süpüla woutkajaain namaa na wawalayuukana otta süpüla waküjain pütchi. Nachajaain maʼin sukuwaʼipa naya wawalayuukana anainjatüin maʼin natuma tü kasa naneekakat (Heb. 13:17). Waaʼinrüle tü namakat, aaʼinmajiraajeena waya suulia ayuulin waya jee waaʼinmajeena na waneinnua suulia ayuulin naya otta eesü süpüla anain pütchi watuma nachiki na aküjaliikana pütchi nüchiki Jehová (1 Ped. 2:12).

13. ¿Kasa waaʼinrajatka kojutule wamüin tü kataa oʼuu naapakat wamüin Jehová shiʼitaaneere isha wanain?

¹³ Eʼnnaajünüshii na aküjaliikana pütchi nüchiki Jehová sünain nnojoluin neʼiteʼerüin isha nanain süka kojutuin shia namüin. Wayoutuin weʼiteʼerüin isha wanain süka woonooin sümaa tü nümakat wamüin Jehová süchiki tia, jaʼitairü nachuntuin maʼin shia wamüin na tottootkana (Aluw. 15:28, 29, TNM). Nnojotsü waaʼinrüin tia süka outeein waya. Süka kojutuin wamüin tü kataa oʼuu naapakat wamüin Jehová, oʼunushii waya namaʼanamüin na tottoot achekakana nnojoliin neʼitaain isha wanain.

14. ¿Kasa waaʼinrajatka suulia wawateʼennamaatüin pitaaruluʼumüin süpüla wawaʼnnüin?

¹⁴ Waaʼinrüle tü wekirajaaitpakalü anain, eeshiijaʼa nnojoliire wawaʼnnüin jamüle waya. Waaʼinmajiraale suulia ayuulin waya, anamaateena waya müleka wawaʼnnüle. Eejüle maʼin waaʼin suulia tü kasa eekat süpüla pasiruwaain atuma waya wepialuʼu, waʼyataaleruʼu otta jüüjüüle waya sümüin tü achuntunakat namüin na oʼunirakana kemion, eeshiijaʼa nnojoliire jamajüin waya otta eesüjaʼa nnojorüle choʼujaain wawateʼennamaatüin pitaaruluʼumüin süpüla wawaʼnnüin.

15. (1) ¿Jamüsü anaka maʼin wepirajüle tü karaloʼuta sümaajatkat tü kasa waneekakat suulia shiʼitaanüin isha wanain? (Piirakaa sümüin tü ayaakuaakalüirua). (2) Maʼaka weʼrüin suluʼu tü videokot, ¿kasa waaʼinrajatka süpüla anain watuma tü waneekakat süchiki tü ishakat?

¹⁵ Wanee kasa waaʼinrajatka süpüla kojutuin wamüin tü kataa oʼuu naapakat wamüin Maleiwa shia wepirajüle tü karaloʼuta sümaajatkat tü kasa waneekakat suulia shiʼitaanüin isha wanain jee nnojoluinjatü wapütüin  shia wepialuʼu. b Karaloʼutakat tüü sümaajatü waneirua tratamiento wachekaka. ¿Choʼujaasüche punouteʼerüin wanee kasa püneekaka suluʼu tia karaloʼutakat? Mülejeʼeya tia punoutamaata shia. Pansaale watuma tü washajakat suluʼu tia karaloʼutakat, nnojoleena kamaʼain na tottootkana sünain asakiijaa waya süchiki tü kasa waneekakat jee nnojoleerü eʼitaanüin wanain wanee tratamiento eekai mojuin wamüin. c

16. ¿Kasa paaʼinrajatka nnojorüle pütüjaain saaʼu tü püshajüinjatkat suluʼu tü tarjeta DPA münakat?

¹⁶ Jaʼitainna nnojoliin laülaayuuin waya jee anale waya, eeshii süpüla pasiruwaain jee ayuulin waya (Ecl. 9:11). Müsüjeseʼe anain wamaʼanale waneepia tü tarjeta DPA münakat. ¿Kasa paaʼinrajatka nnojorüle pütüjaain saaʼu tü püshajüinjatkat suluʼu tia karaloʼutakat? Puchunta kaalinwaa namüin na laülaashii outkajaakana pümaa, jama natüjain süpüleerua tia. Nnojoliipejeʼe nayainjanain aneeküin pooʼopünaa tü paaʼinrajatkat, piainjachi piakai aneekaka tia (Gal. 6:4, 5). Nakaalinjeechi pia süpüla piyaawatüin saaʼu tü püneeküinjatkat  otta süpüla püshajüin tü püneekakat suluʼu tia karaloʼutakat.

17. ¿Kasa waaʼinrajatka süpüla nnojoliin ichein waya süchiirua tü wamakat süchiki tü aainjünajatkat suulia ayuulin waya?

¹⁷ Tü waneekakat suulia ayuuijaain waya jee tü tratamiento anakat wapüla, waneeküin shia wanaapünaa sümaa tü watüjakat suluʼujee tü Bibliakat (Aluw. 24:16; 1 Tim. 3:9). Waneekapa tia jee waashajaapa süchiki tia namaa na waneinnua, soteesü waaʼin tü sümakat Filipos 4:5 (TNM), tü makat mayaa: «Anasü sütüjaale saaʼu wayuu süpüshuaʼa nnojoliin ichein jia süchiirua jünüiki». Waaʼinrüin tia pütchikat wanaa sümaa nnojoluin jülüjakuʼu müin waaʼin waneepia ayuuijeenale waya jee wanaa sümaa nnojoluin wapüleeruain naaʼin na waneinnua shiiʼiree naaʼinrajatüin tü wamakat. Aishii wapüla na wawalayuukana jee kojutushii naya wamüin mayaainjeʼe nnojoluin wanaawain tü kasa naneekakat wanaa wamaa (Roma 14:10-12).

18. ¿Kasa waaʼinrajatka süpüla kojutuin wamüin tü kataa oʼuu naapakat wamüin Jehová?

¹⁸ Watüjaaitpa aaʼu niain Jehová shikiishin tü kataakalü oʼuu. Atüjaaneerü aaʼu kojutuin wamüin tü kataa oʼuu naapakat wamüin Jehová, waaʼinmajiraale suulia jamajüin waya otta waʼyataale nümüin süka süpüshuaʼa waaʼin (Alat. Map. 4:11). Ayateenaʼaya waya maaʼulu müliain sutuma ayuulii jee waneirua kasa mayaainjeʼe nnojoluin shiain keeʼireein naaʼin Jehová tia wapüleerua. Watüjaapejeʼe saaʼu aneenain waya nutuma soʼu palit kaʼi süka nnojoleerüin eein müliaa jee outaa (Alat. Map. 21:4). Sümaʼinruʼu waʼatapajüin tia, kojuta wamüin tü kataa oʼuu naapakat wamüin chi Washikai Jehová otta waʼyataa nümüin süka süpüshuaʼa waaʼin.