1. ¿Mbaʼeichaitépa ivalióso Jehovápe g̃uarã ñande rekove?

 EÑEIMAHINAMÍNA peteĩ ne amígo orregalaha ndéve peteĩ óga hepyetereíva. Pe ógape ofaltáramo jepe ojarregla mimi, nde remombaʼeterei pórke reikuaa porã pe óga hepyetereiha, ha upévare eñehaʼãta voi reñangareko hese ha rearregla. Upéicha avei Jehová omeʼẽ ñandéve peteĩ rregálo ivaliosoitereíva, upéva ningo haʼe ñande rekove. Añetehápe ndaipóri voi ótra kósa ko univérsope ivaliosovéva Jehovápe g̃uarã la ñande rekovégui, upévare haʼe ontrega pe Itaʼýra Jesucristo rekove ñandesalva hag̃ua (Juan 3:16).

2. Heʼiháicha 2 Corintios 7:1, ¿mbaʼépa Jehová ohaʼarõ ñandehegui?

² Jehová ningo omeʼẽ la vída enterovépe (Sal. 36:9). Apóstol Pablo ningo heʼi vaʼekue voi: “Haʼe rupive ningo jaikove, jakuʼe ha jaexisti” (Hech. 17:25, 28). Upévare ikatu jaʼe pe ñande rekove haʼeha peteĩ rregálo oúva Ñandejáragui. Haʼe ningo ñanderayhúgui omeʼẽmbaite ñandéve umi mbaʼe ñaikotevẽva jaikove hag̃ua (Hech. 14:15-17). Jehová ningo ndojapói milágro ikatu hag̃uáicha ñande jasegi jaikove. Upéva rangue, haʼe ohaʼarõ ñande ñañehaʼãmbaite ñaneresãi hag̃ua, ha péicha jasegi jaservi chupe (elee 2 Corintios 7:1). ¿Mbaʼérepa iñimportantete jakuida ñande salu ha ñande rekovére, ha mbaʼéichapa ikatu jajapo upéva?

3. ¿Mbaʼérepa ñande ñañehaʼãmbaite ñaneresãi hag̃ua?

³ Ñande ningo ñañehaʼãmbaite ñaneresãi hag̃ua, pórke upéichamante ikatúta jaservi Jehovápe omeʼẽháicha ñande posivilida (Mar. 12:30). Ñande ningo ñameʼẽse ‘ñande rete ha ñande rekove ñameʼẽrõguáicha peteĩ ofrénda sagráda Ñandejárape’, upévare ñande jaevita umi mbaʼe jaikuaáva ikatuha ñanembohasy (Rom. 12:1). Añetehápe ningo ñande ikatu jajapo heta  mbaʼe ikatu hag̃uáicha jasegi ñaneresãi, péro upéva ndoasegurái ñandéve nañanderasymoʼãiha. Péro lomímonte ñañehaʼãmbaite jakuida ñande salúre, jahechauka hag̃ua ñamombaʼetereiha pe rregálo porãite omeʼẽva ñandéve ñande Túa yvagapegua.

4. ¿Mbaʼépa ojapose vaʼekue rréi David?

⁴ Rréi David omombeʼu mbaʼérepa haʼe omombaʼete la hekove oskrivírõ guare: “¿Mbaʼépe piko ideprovécho la che amanóramo ha aha apyta pe yvyguýpe? ¿Pe yvy rei piko nembotuicháta térã omombeʼúta nembaʼeporãha?” (Sal. 30:9). Oiméne David oskrivi raʼe pe jaleéva koʼápe haʼe omano mbotaitépema. Péro haʼe oĩ kuri desidído oñehaʼãmbaitetaha osegi hag̃ua oikove ikatuha peve, ha péicha osegi hag̃ua oservi Jehovápe. Añetehápe ningo enterovéva ñande ñapensase avei upéicha.

5. ¿Mbaʼépa ikatu jajapo jajúramo ñanderasykatu térã ñandeedáramo jepe?

⁵ Ñanderasykatu térã ñandeeda rupi ningo ikatu ndajajapokuaavéima heta mbaʼe yma guaréicha, ha upéva ikatu voi opoko ñanderehe ha ñanemoñeñandu vai. Péro ndahaʼéi upe haguére ñande nañañehaʼãmoʼãvéimava ñaneresãi hag̃ua. ¿Mbaʼérepa? Pórke ñanderasy térã ñandeedáramo jepe ñande ikatu gueteri jaservi Jehovápe ojapo haguéicha rréi David. Ñanemokyreʼỹeterei ningo jaikuaávo ñandevaliosoitereiha Jehovápe g̃uarã, jepénte ñanderasy térã ñandeedáma jahávo (Mat. 10:29-31). Ha ñamanóramo jepe, Jehová ñanemoingoveseterei jeýta (Job 14:14, 15). Upévare miéntra ke jasegi jaikove, ñande jajapose opa ikatúva ikatu hag̃uáicha jasegi ñaneresãi ha péicha jakuida ñande rekove rehe.

6. ¿Mbaʼépa Jehová ohaʼarõ ñandehegui jakaru térã jaʼu jave vevída?

⁶ La Biblia ndahaʼéi peteĩ lívro oñeʼẽva mbaʼéichapa jakuida vaʼerã ñande salúre térã mbaʼéichapa jakaru vaʼerã, péro si ohechauka ñandéve mbaʼépa Jehová opensa koʼã mbaʼére. Haʼe heʼi voi ñandéve: “Ejehekýi umi mbaʼe ikatúvagui ndeperhudika”, térã umi mbaʼe ikatúvagui ñanembohasy (Ecl. 11:10). La Biblia heʼi porã voi ñandéve ndovaleiha jakaru rasa ni jaʼu rasa vevída, pórke koʼãva ñandeperhudika ha oapeligra voi ñande rekove (Prov. 23:20). Jehová ningo oipota ñande jajejokokuaa koʼýte jakaru térã jaʼu jave vevída (1 Cor. 6:12; 9:25).

7. ¿Mbaʼéichapa Proverbios 2:11 heʼíva ñanepytyvõta jakuida porã hag̃ua ñande salúre?

⁷ Ñande jaipuru porãramo ñane akã ikatúta jadesidi porã ha upéicha umi mbaʼe jadesidíva rupi jahechaukáta ñamombaʼetereiha ñande rekove, pe rregálo oúva Ñandejáragui (Sal. 119:99, 100; elee Proverbios 2:11). Ha upéva ikatúta jahechauka jadesidíta jave mbaʼéichapa ñañalimentáta. Por ehémplo ñandéve ikatu ñandegusta peteĩ tembiʼu, péro jaikuaa upéva ñanembohasytaha. Upéicha rupi ñande ndajaʼúinte pe tembiʼu. Avei ñande jahechauka jaipuru porãha ñane akã jake porãramo, jajapóramo ehersísio, ñanepotĩramo ha avei ñamopotĩramo ñande róga.

8. ¿Mbaʼéichapa la Biblia ohechauka porã Jehovápe g̃uarã iñimportanteha jajekuida ani hag̃ua ñañaksidenta?

⁸ Pe léi Jehová omeʼẽ vaʼekue umi israelítape oĩ vaʼekue umi mbaʼe haʼekuéra ojapo vaʼerã ikatu hag̃uáicha oevita umi aksidénte ivaíva hógape térã itravahohápe (Éx. 21:28, 29; Deut. 22:8). Avei oĩramo ojukáva hapichápe ojukaseʼỹetére, upéva lomímonte ivai. Upéicha rupi, upe ojapo vaʼekue ndahaʼéi la ojeheja reínteva chupe (Deut. 19:4, 5). Pe léi heʼi vaʼekue avei ojekastiga vaʼerãha oĩramo aksidentálmente olastimáva peteĩ mitãme oĩvape isy retepýpe onase mboyve (Éx. 21:22, 23). Péicha  jahecha porã Jehová oipotaha jajapo opa ikatúva ani hag̃ua ñañaksidenta.

9. ¿Mbaʼe mbaʼépa ikatu jajapo ani hag̃ua ñañaksidenta? (Ehecha avei umi taʼanga).

⁹ Jahechaukáta avei ñamombaʼetereiha ñande rekove ñañatendévo ani hag̃ua oiko aksidénte ñande rógape térã ñande travahohápe. Por ehémplo, tekotevẽta jave ñamombo peteĩ mbaʼe haimbéva, peteĩ prodúkto kímiko, venéno o pohã, jajapose upéva ani hag̃uáicha operhudika ótrope. Avei jajasegura ani hag̃ua umi mitã otopa umíva. Ñande avei tekotevẽ ñañatende jajatapy jave, ñambopupu jave y térã jaipuru jave umi erramiénta eléktrika. Avei ñande nañamanehái ñande veíkulo jaʼúramo peteĩ pohã ikatúva ñandeafekta, jaʼu jave vevída, térã ñanderopehýi jave, avei nañamañái ñane teléfonore ñamaneha jave.

10. ¿Mbaʼépa ikatu jajapo oiko jave térã oiko mboyve peteĩ mbaʼe oapeligráva ñande rekove?

¹⁰ Heta vése ningo ndaikatúi jaevita umi mbaʼe ikatúva oapeligra ñande rekove. Upéva oiko jepi por ehémplo oiko jave peteĩ desástre naturál, epidémia térã umi mbaʼe ipeligróso ha  ivioléntova. Oiko jave koʼã mbaʼe ñande ñañehaʼã ani hag̃ua jaapeligraiterei ñande rekove. Por ehémplo ñaneñeʼẽrendu umi autoridakuérape oiko jave koʼãichagua situasión (Rom. 13:1, 5-7). Heta vése ikatu voi ñaiméma preparádo oiko mboyve koʼã mbaʼe ijetuʼuetéva. Upévare iñimportánte ñahendu umi instruksión omeʼẽva umi goviérno térã umi autorida ikatu hag̃uáicha ñaime preparádo oiko jave koʼã mbaʼe. Por ehémplo ikatu jaguereko y térã tembiʼu noñembyaíriva ha peteĩ votikín de primeros auxílios ikatútava jaipuru oiko sapyʼárõ koʼã mbaʼe.

11. ¿Mbaʼépa jajapo vaʼerã oĩ jave peteĩ epidémia pe lugár ñande jaikohápe?

¹¹ Oikóramo peteĩ epidémia pe lugár jaikohárupi, ¿mbaʼépa iporã jajapo upéicha jave? Iporãta ñaneñeʼẽrendu umi autoridakuéra heʼívape, por ehémplo jajepohéi meme, ñamantene pe distansiamiénto físiko, jaipuru tapavóka ha jajapo avei kuarenténa. Ñaneñeʼẽrendúramo koʼã mbaʼépe jahechaukáta ñamombaʼetereiha ñande rekove pe rregálo porãite Jehová omeʼẽva ñandéve.

12. ¿Mbaʼéichapa Proverbios 14:15 ñanepytyvõ ñañatende hag̃ua umi informasión ñahendúvare oiko jave peteĩ desástre?

¹² Oiko jave peteĩ mbaʼe ijetuʼúva térã oĩ jave peteĩ pelígro, ñahendu jepi umi informasión japu térã ndasiertopáiva oñemombeʼúva ñane amigokuéra ha ñane vesinokuéra apytépe, térã téle ha rrádiope. Ñande jaguerovia rangue entéro mbaʼe ojeʼéva ñandéve, tekotevẽ ñahendu umi informasión ijexaktovéva omeʼẽva pe goviérno ha umi doktorkuéra (elee Proverbios 14:15). Avei ñande ñaneñeʼẽrenduse pe Kuérpo Governántepe ha avei pe sukursálpe heʼívo ñandéve mbaʼéichapa jajapo vaʼerã umi rreunión ha predikasión, pórke haʼekuéra oñehaʼãmbaite okonsegi umi informasión isegurovéva omeʼẽ mboyve ñandéve peteĩ instruksión (Heb. 13:17). Ñaneñeʼẽrendúramo chupekuéra ikatúta japrotehe ñande rekove ha avei ñande rapichakuéra rekove, ha péicha ikatúta oñeñeʼẽ porã pe kongregasión rehe ñane komunidápe (1 Ped. 2:12).

13. ¿Mbaʼéichapa jahechauka ñamombaʼetereiha ñande rekove?

¹³ Umi hénte ningo oikuaa porãiterei ñande testígo de Jehová ñamombaʼeha pe tuguy, haʼe rupi sagrádo. Ñande ñaneñeʼẽrendu pe léi Jehová heʼíva pe tuguýre, ha upévare ñande nañamoĩkái tuguy umi doktór heʼíramo jepe ñandéve ñamanotaha ndajajapóiramo upéva (Hech. 15:28, 29). Upéva ningo ndeʼiséi ñande ñamanoseha, upéva rangue ñande ñamombaʼeterei pe ñande rekove, pórke jaikuaa péva haʼeha peteĩ rregálo oúva Jehovágui. Upévare jaheka meme umi doktór ikatupyrýva ikatu vaʼerã ñanepytyvõ jasegi hag̃ua umi tratamiénto ndojepuruihápe tuguy.

14. ¿Mbaʼépa ikatu jajapo ani hag̃ua ñaikotevẽ peteĩ tratamiénto ikomplikádova?

¹⁴ Ñande ñañehaʼãmbaitéramo jakuida ñande salu rehe, jahecha haguéicha jajúvo ko artíkulope ikatu hína nañaikotevẽi peteĩ tratamiénto ikomplikádova. Ñande ñaneresãiramo ikatúta pyaʼeve jajerrekupera sapyʼánte jajopera mbaʼéramo. Ha ñañehaʼãmbaitéramo jakuida pe segurida rehe ñande rógape, ñande travahohápe térã ñamaneha jave, péicha hasyvéta oñepresenta hag̃ua peteĩ situasión ñaikotevẽtahápe peteĩ operasión ikomplikádova.

15. a) ¿Mbaʼérepa iñimportantete jaguereko siémpre ñanendive pe ñane dokuménto DPA? (Ehecha avei pe taʼanga). b) Jahechaháicha pe vidéope, ¿mbaʼépa ñanepytyvõta jadesidi porã hag̃ua peteĩ tratamiénto ojepuruʼỹhápe tuguy?

¹⁵ Ótra fórma jahechaukahápe ñamombaʼetereiha la ñande rekove haʼe hína jaguerekóvo  kompletádo pe ñane dokuménto legál oĩháme umi mbaʼe jadesidíva pe tuguy rehegua (pe tarhéta heʼihápe nañamoĩkaseiha tuguy) ha jaguerekóvo ñanendive jaha jahahápe. b Ko dokuménto ningo iñimportanteterei, pórke ñande upépe ñamoĩma umi mbaʼe jadesidíva ani hag̃ua ñamoĩka tuguy ha umi tratamiénto jaipotáva. ¿Ndépa reguereko al día pe nde tarhéta DPA? Ha oiméramo tekotevẽ rekompleta ko dokuménto térã rekambia térã rembopyahu, aníkena reheja ohasa hetaiterei tiémpo rejapo hag̃ua upéva. Péicha jajapóramo jarekótama eskríto umi mbaʼe jadesidi vaʼekue, ha upévare natekotevẽmoʼãi japerde tiémpo ñañepyrũvo jaexplika umi doktorkuérape umi mbaʼe ñapensáva pe tuguy rehe, ha péicha ikatúta oñatende pyaʼeve ñanderehe. Avei jaguerekóramo ñane dokuménto DPA ikatúta jajasegura ani hag̃ua jarresivi peteĩ tratamiénto térã pohã ikatúva ipeligróso ñandéve g̃uarã. c

16. ¿Mbaʼépa ikatu rejapo ndereikuaaporãiramo mbaʼéichapa ikatu rekompleta pe ne dokuménto DPA?

¹⁶ Ñanemitã térã ñaneresãiramo jepe, ikatu hína en kualkiér moménto jaju ñañaksidenta térã ñanderasy (Ecl. 9:11). Upévare iñimportanteterei  hína jaguereko siémpre kompletádo pe ñande tarhéta DPA. Ha ndereikuaáiramo mbaʼéichapa ekompletáta, ani ejepyʼapy. Ejerurekuaa ajúda umi ansiáno oĩvape ne kongregasiónpe, ha haʼekuéra nepytyvõta rekompleta hag̃ua. Péro nemanduʼa vaʼerã haʼekuéra ndeʼimoʼãiha ndéve mbaʼépa redesidi vaʼerã. Upéva rangue ndete redesidi vaʼerã mbaʼe tratamiéntopa reipota (Gál. 6:4, 5). Upéva rangue la haʼekuéra ojapótava haʼe nepytyvõta rentende porã hag̃ua umi mbaʼe heʼíva pe dokuméntope remoĩ hag̃ua por eskríto umi mbaʼe redesidi vaʼekue.

17. ¿Mbaʼéichapa ikatu jahechauka nañañemohatãiha ñande jaʼévapente jakuida jave ñande salúre?

¹⁷ Ñande ningo jajegia ñane konsiénsiare jadesidíta jave mbaʼéichapa jakuidáta ñande salúre ha mbaʼe tratamiéntopa jasegíta (Hech. 24:16; 1 Tim. 3:9). Upévare jadesidi jave peteĩ mbaʼe ha ñañeʼẽ upévare ótra persónandi, iporãta jaguereko enkuénta la heʼíva Filipenses 4:5: “Enterove toikuaa napeñemohatãiha peẽ pejévapente”. Ñande jahechauka nañañemohatãiha ñande jaʼévapente ndajaikóivo tódo el tiémpo jajepyʼapy ñande salúre, avei ndajajopýi ótrope opensa hag̃ua ñande ñapensaháicha ko témare. Ñande ningo jahayhu ha jarrespetaiterei ñane ermáno ha ñane ermanakuérape, jepe algúna vése la haʼekuéra odesidíva idiferénte ñande jadesidívagui (Rom. 14:10-12).

18. ¿Mbaʼéichapa ikatu jahechauka jaagradesetereiha ñande rekove rehe?

¹⁸ Ñande jahechauka jaagradeseha Jehovápe la ñande rekovére ñañehaʼãvo jakuida porã ñandejehe ha ñameʼẽvo pe iporãvéva chupe (Apoc. 4:11). Koʼág̃arupi ningo jasegíta ñanderasy ha jaguerekóta avei umi provlemakuéra, péro ñande jaikuaa porã ndahaʼeiha upéva la Jehová oipotáva ñandéve g̃uarã. Koʼẽrõitéma ningo haʼe omeʼẽta ñandéve vída etérna ha ndaiporimoʼãvéima ni sufrimiénto ni pe ñemano (Apoc. 21:4). Ñahaʼarõ aja og̃uahẽ upe tiémpo, jahechaukákena ñamombaʼetereiha pe ñande rekove ha jaipurúkena upéva jaservi hag̃ua ñande Túa yvagapegua Jehovápe.