1. To vom wa de tuulum la wani bɔ’ɔra Yehowa?

 TO MAKƐ yeti ho zɔ n bo ho yire. Yire la penti la laɣeri mɛ ti zɛ’ɛsi sise’esi yula. La bala za’a la, yire la eŋɛ la laɣehɔ paa. Ho puurɛ wan pee la yire la ti ho bisa de soŋa. Yelemɛŋɛrɛ, Yehowa dekɛ la a Dayɔa la bo to ti la pa’alɛ to vom n de tuulum se’em bɔ’ɔra en.​—Yon 3:16.

2. Wuu 2 Korint 7:1 n pa’alɛ se’em la, bem ti Yehowa bɔta ti to ita?

² Yehowa n Bo’ori vom. (Ym. 36:9) Tuuntuna Paul yuun sakɛ ti bala dela yelemɛŋɛrɛ la eŋa n yuun gulesɛ yeti: ‘Eŋa zuo ti to tara vom ge ɛɛra ge bɔna.’ (Tm. 17:25, 28) Bala zuo la, to wan ta’an yeti, to vom wa dela Naayinɛ bo’olum. A bo’ori to la yelese’a n pakɛ tɔ ti to ta’an vɔna. (Tm. 14:15-17) Ge Yehowa ka doli yelekiresi poan tɛ’ɛla tɔ. A tuɣum bɔta la to tiregɛ bisa tomea soŋa ge kelum pu’usa en. (Kaalɛ 2 Korint 7:1.) Beni n sɔi ti la nara ti to bisa tomea soŋa ta’an tara imma’asum ge to wan ta’an eŋɛ bala la wani?

3. Bem yele deyima zuo ti to bɔta ti to tara imma’asum?

³ Yele deyima zuo ti la nara ti to tara imma’asum dela, bala wan basɛ ti to ta’an pu’usa Yehowa soŋa soŋa. (Mr.  12:30) Ton boti to iisi la dɛna ‘kãabegɔ bunɔ n vɔi, ana zilam ge nara bɔ’ɔra Naayinɛ’ la n sɔi ti to kan bɔta ti to eŋɛ sɛla n wan pɔɣelum tɔ. (Arom 12:1) La ka pakɛ la yelese’a woo ti to ita la, bala ka pa’alɛ ti bã’a kan makɛ paɛ tɔ. Ge la bala za’a la, to iti pa’ala to saazuo Sɔ la ti to puurɛ pee ya la a bo’olum n de vom la.

4. Bem ti Naba David yuun bɔta ti a eŋɛ?

⁴ Naba David yuun tɔɣɛ pa’alɛ sɛla n sɔi ti a puurɛ pee la Naayinɛ bo’olum n de vom la, la eŋa n yuun gulesɛ yeti: ‘Mam san ki, mam san sige yɔɔ poan, bem nyuurɔ n boi bim? Ki’indoma me pɛ̃ɣeri hon Naayinɛ me yoi? Kum wan nyaŋɛ pa’alɛ hon de birikina Naayinɛ se’em me yoi?’ (Ym. 30:9) Daanse’ere David yuun gulesɛ yele ana wa la se’em ma’a ti a yuun pɔ̃ra kum la. Ge a yuun lu a suure ti a bisa amea soŋa ta’an tara imma’asum pu’usa Yehowa. Nɔkpe’ene kai ti, to za’a waabi lu to suure la bala.

5. To san puɣum kuregɛ bii bɛ̃’ɛra la se’em me, bem ti to wan ta’an eŋɛ?

⁵ Bã’a la kuregerɛ ka basɛ ti to ta’an ita yelese’a ti to yuun ita la. Bala ta’an basɛ ti sunsɔa tara tɔ ti la ana to bura. Ge la nari ti to kelum mɔɔra bisera tomea soŋa. Bem zuo? Se’ere n sɔi la, to san puɣum kuregɛ bii bɛ̃’ɛra la se’em me, to wan ta’an kelum pu’usa Yehowa wuu Naba David n yuun eŋɛ se’em la. Hali la ton ka di mi’a la, la dela yelesonɛ la Naayinɛ n geele to ti to dela tuulum nɛreba la! (Mt. 10:29-31) Hali to san puɣum ki, Yehowa wan ana lɛɛ bɔta ti a isige to. (Yob 14:14, 15) Ton vɔi wa, to boti la to bisɛ to wan eŋɛ se’em ta’an tara imma’asum ge tɛ’ɛla to vom wa.

6. Bem ti Yehowa bɔta ti to eŋɛ, dia la daam nyua poan?

⁶ La boi bim ti Baabule la daɣɛ imma’asum bii dia yɛla gɔŋɔ ge ku pa’alɛ to la Yehowa puti’irɛ n de se’em yele ana poan. Makerɛ, Yehowa kpemese to giila ti to ‘yese yeledaaŋɔ woo’ n wan ta’an sa’am to inya la basɛ. (Pa. 11:10) Da dita dia zo’e zo’e bii nyuura daam zo’e zo’e. Yele ana ta’an basɛ ti to kan tara imma’asum. Hali la ta’an ku tɔ. (Mag. 23:20) Yehowa boti la to nyɔkera tomea, dia la daam nyua poan.​—1 Ko. 6:12; 9:25.

7. Ka’aŋɔ la n boi Magaha 2:11 la wan soŋɛ to la wani ti to ta’an bisa to imma’asum soŋa?

⁷ To ta’an kɔ’ɛ to puti’irɛ tum tuunɛ ti la pa’alɛ ti to puurɛ pee la Naayinɛ bo’olum n de vom la. (Ym. 119:99, 100; kaalɛ Magaha 2:11.) Makerɛ, to wan bisa tomea soŋa la ton diti sɛla. To san nɔŋɛ disɛka, ti dia la ni basɛ ti to bɛ̃’ɛra, yɛm boi bim ti to da di ka. To wan eŋɛ pa’alɛ ti to tari yɛm to san gisera zɔ’ɔra, kpɛmesa giila saŋa woo ge basɛ ti to inya la to yɛa ana filam.

8. Sodeni poan ti Baabule la pa’alɛ Naayinɛ puti’irɛ n de se’em dɛŋa poan?

⁸ Yehowa yuun pa’alɛ Israeldoma la ban wan eŋɛ se’em gu bamea dɛŋa poan, ba yɛa poan la ba tuuma zɛ’an. (Yɛh. 21:28, 29; Tɛɛ. 22:8) Nɛra yuun  san ka mina ge ku a tadaana, yele wan paɛ en. (Tɛɛ. 19:4, 5) Lɔɔ la yuun yeti nɛra san puɣum ka mina ge pɔɣelum bia n boi a ma puuren, ba wan dɔlegɛ a tuberɛ. (Yɛh. 21:22, 23) Gulesegɔ la basɛ ti la niɛ peelumi ti Yehowa boti la to tara tomea soŋa ti dɛŋa da paɛ tɔ.

9. Bem yɛla ti la nara ti to ita ti dɛŋa kan paɛ tɔ? (Le bisɛ foote la.)

⁹ To san tiregɛ bisa tomea soŋa dɛŋa poan, to tuuma zɛ’an la to yire poan, la pa’alɛ ti to puurɛ pee mɛ la Naayinɛ bo’olum n de vom la. Makerɛ, to san tara tiim bii lɔɣɔseto n luti, to biŋe ba soŋa ti kɔma da paɛ ba. La dela to ni dekɛ lɔɣɔtuna basɛ soŋa. La dela to bisa tomea soŋa, to san laŋɛ bugum ita sɛla, duɣera sɛla bii tara maɣazim tuna tuuma. La me dela to kɔ’ɔn bɔna bim ge bisera. La ka nari ti to nyu tiim, daam bii gɔ̃yito tara tɔ ti to tukera loore. La me kan ana soŋa ti to tukera ge di’isa fon.

10. To wan ta’an te’ele eŋɛ la bem ge ti yeledi’ire nyaa paɛ tɔ ge to me wan ta’an eŋɛ la bem yeledi’ire la poan?

¹⁰ Saŋa ase’a to kan ta’an gu ti dɛŋa kan paɛ tɔ. Yele yele wuu la san dɛna yeledi’ima, bã’a n wi’iri la zaberɛ. Ge yele aŋa san eŋɛ, to ta’an kelum te’ele tomea to san nana kpɛ’ɛndoma pa’alegɔ. (Arom 13:1, 5-7) To wan ta’an maasum tomea gura yeledi’ima ase’a ge dɔla kpɛ’ɛndoma pa’alegɔ. Makerɛ, yɛm wan bɔna bim ti to maasum tara ko’om, dise’a n ka sa’ani la tiim fii.

11. Bã’a san wi’ira, la nari ti to eŋɛ la bem?

¹¹ La nari ti to eŋɛ la bem, bã’a san wi’ira to gingilega poan? La dela to dɔla gɔmena pa’alegɔ n de wuu, to pɛɛra to nu’usi, to da lɛna nɛreba, to tara nyɔfutesi futa ge me bɔna to ma’a, bã’a la san laŋɛ tɔ. To san mɔ’ɛ nini ita yele ana, la pa’alɛ ti to puurɛ pee mɛ la Naayinɛ bo’olum n de vom la.

12. Naresum yele la n boi Magaha 14:15 la wan soŋɛ to la wani ti to mina yelese’a n nari ti to kɛlesa yeledi’ire saŋa poan?

¹² Yeledi’ire saŋa poan, lasebaarɛdoma, to zɔdoma la to yikpɛ’ɛsi ta’an tɔɣera yɛla n daɣɛ yelemɛŋɛrɛ. Ton wan tuɣum sakɛ sɛla woo la, la dela to kɛlesa gɔmena la imma’asumdoma pa’alegɔ n di mi’a. (Kaalɛ Magaha 14:15.) Tigere Zuo Bisegadoma la, la tigere yila ni viisɛ mɛ baŋɛ yɛla soŋa soŋa ge nyaa pa’alɛ to wan ita tansugere zamesegɔ la na’am mɔɔlegɔ tuuma la se’em. (Heb. 13:17) To san dɔla ba pa’alegɔ la, to te’eli la tomea la basɛba dɛŋa poan. Bala me wan basɛ ti nɛreba n boi to gingilega la poan tara putɛsonɛ la Yehowa Sɛɛradoma.​—1 Pe. 2:12.

13. To wan eŋɛ la wani pa’alɛ ti to puurɛ pee ya la Naayinɛ bo’olum n de vom la, la san ta dɛna ziim yele?

¹³ Nɛreba zo’e zo’e mi ti, Yehowa Sɛɛradoma geele ziim ti la dɛna la tuulum bunɔ. To nani Yehowa n pa’alɛ ziim yele se’em mɛ ge ka tɔ’ɔsa ziim, hali bã’a la san puɣum dɛna dɛŋa. (Tm. 15:28, 29) Ge bala ka pa’alɛ ti to boti la to ki ge to puurɛ pee mɛ la Naayinɛ bo’olum la n de vom la. To ni ɛɛra la dɔgetadoma n di mi’a ge me bɔta ti ba tibɛ tɔ ge kan kɛ̃’ɛsɛ to ziim.

14. To wan eŋɛ la bem ti daanse’ere to san ta bɛ̃’ɛra, la kan dɛna ti ba eŋɛ to ɔperesa?

¹⁴ To san ita yelese’a ti to zamesɛ zaseŋɔ wa poan la, bisa to imma’asum soŋa soŋa, daanse’ere to san ta bɛ̃’ɛra la kan dɛna ti ba eŋɛ to ɔperesa. To san tara imma’asum ti la puɣum dɛna ti ba eŋɛ to ɔperesa, to wan yee kalam. To san basɛ ti to yire, la tuuma zɛ’an ana filam ge me dɔla trafik lɔɔ, to wan gu tomea dɛŋa poan ti la kan ta dɛna ti ba eŋɛ tɔ ɔperesa.

15. (a) Beni n sɔi ti la dɛna ninmɔ’ɔrɛ ti to basɛ ti ziim gɔŋɔ la bɔna la tɔ saŋa woo? (Le bisɛ foote la.) (b) Wuu vidiyo la n pa’alɛ se’em la, to wan eŋɛ la wani basɛ ti ba baŋɛ to puti’irɛ n de se’em ziim poan?

¹⁵ Vom n de tuulum bunɔ bɔ’ɔra to la zuo n sɔi ti to ni gulesɛ to ziim gɔŋɔ la ge tara ku saŋa woo. b Gɔŋɔ wa poan ti to pa’alɛ ton boti ba tibɛ to se’em ge kan kɛ̃’ɛsɛ to ziim. Hon malum demese  ho ziim gɔŋɔ la? Ho san ka eŋɛ, da gu’um. Kɔ’ɔn gulesɛ ayima nananawa. To san gulesɛ ton boti ba tibɛ to se’em la, bala wan basɛ ti ba eŋɛ kalam tibɛ tɔ. Bala me wan soŋɛ ti ba kan dekɛ tiyooro tibɛ tɔ. c

16. To wan eŋɛ la wani, to san ka mina to wan gulesɛ ziim gɔŋɔ la se’em?

¹⁶ To de bunbilipaalesi bii to tari imma’asum woo, dɛŋa bii bã’a ta’an paɛ to za’a waabi. (Pa. 9:11) Bala la, la wan ana soŋa ti to gulesɛ to ziim gɔŋɔ la. Ho san ka mina hon wan gulesɛ ziim gɔŋɔ la se’em, ho ta’an soke ho tansugere keendoma la ti ba soŋɛ hɔ. Ba mi ban wan gulesɛ gɔŋɔ wa se’em ge la san dɛna la tibegɔ yɛla poan, ba kan kɔ’ɛ ba puti’irɛ bo ho. Bala dela hon zugbere yele. (Ga. 6:4, 5) Ba wan soŋɛ hɔ ti ho bɔkɛ yɛla soŋa ge nyaa gulesɛ a.

17. To wan eŋɛ la wani pa’alɛ ti to tari putɛsonɛ imma’asum yɛla poan?

¹⁷ Ton ni ta bɛ̃’ɛra ge bɔta ti ba tibɛ tɔ ge bisa to se’em la dela Baabule la n  kumesɛ to putɛkeeŋa la se’em la zuo. (Tm. 24:16; 1 Tim. 3:9) To san ni kɔ’ɛ to puti’irɛ ge le ta naɛ la nɛreba basɛba sɔsera, la nari ti to tɛ̃ra Baabule naresum yelese’ere n boi Filipi 4:5: ‘Tara ya putɛsonɛ bɔ’ɔra nɛra woo.’ To san tara putɛsonɛ, to kan basɛ ti to imma’asum yɛla ba’ɛ pakɛ tɔ bii to pɛ̃regɛ basɛba ti ba doose tomam n bɔkɛ de se’em la. To nɔŋɛ to mabiisi mɛ ge me bɔ’ɔra ba gilema, hali ba san kɔ’ɛ ba puti’irɛ tum tuunɛ ti la bɔna de to’ore la tomam.​—Arom 14:10-12.

18. To wan eŋɛ la wani pa’alɛ ti to puurɛ pee ya la vom bo’olum la?

¹⁸ Ton pu’useri Yehowa ge me tɛ’ɛla to vom se’em la pa’alɛ ti to puurɛ pee mɛ la Eŋa n bo to vom la. (Lil. 4:11) Nananawa, la dela to bisɛ to wan eŋɛ se’em ta’an bisera tomea bã’asi la dɛŋa poan. Daɣɛ vom buna taaba ti Naaŋɔdaana la yuun bɔta ti to tara. La kan yue, a wan bo to daarewoo nyɔvore ti induma la kum kan bɔna. (Lil. 21:4) Sankana wa poan, bisɛ lan de pupeelum se’em ti to vɔna ge pu’usa to saazuo nɔŋerɛ Sɔ, Yehowa!