1. Peb txoj sia muaj nqis npaum li cas rau Yehauvas?

 MUAB xav li no tias koj muaj ib tug phooj ywg kwv luag muab tau ib choj nyiaj pub rau koj. Choj nyiaj ntawd muaj ntsis dub thiab tej ntug los mluav qho me ntsis lawm. Txawm choj nyiaj no zoo li ntawd los yeej haj tseem muaj nuj nqis kawg nkaus li. Koj yeej yuav muab qhwv zoo zoo khaws cia. Zoo ib yam li ntawd, Yehauvas kuj tau muab ib yam muaj nuj nqis heev rau peb. Yam ntawd yog peb txoj sia. Qhov uas Yehauvas muab nws tus Tub los tuag theej peb lub txhoj qhia tias peb txoj sia muaj nuj nqis kawg nkaus li rau nws.​—Yauhas 3:16.

2. Raws li 2 Kauleethaus 7:1, Yehauvas xav kom peb ua dab tsi?

² Yehauvas yog lub hauv paus siav. (Phau Ntawv Nkauj 36:9) Tus tub txib Povlauj yeej ntseeg li ntawd thiab hais tias: “Muaj Vajtswv, peb thiaj li ciaj sia mus mus los los thiab muaj sia nyob.” (Tes Haujlwm 17:25, 28) Yog li ntawd, peb thiaj hais tau tias peb txoj sia yog Vajtswv pub. Nws yeej pub tej yam kom tsim nyog peb ciaj taus ua neeg. (Tes Haujlwm 14:15-17) Tiam sis Yehauvas tsis ua txuj ci kom peb muaj sia mus li. Nws xav kom peb ua npaum li peb ua tau kom noj qab haus huv thiab pe hawm nws. (Nyeem 2 Kauleethaus 7:1.) Vim li cas peb yuav tau txuag peb txoj sia thiab noj qab haus huv, thiab peb yuav ua li cas thiaj yuav ua tau?

3. Vim li cas peb yuav tsum ua npaum li peb ua tau kom noj qab haus huv?

³ Yuav kom peb teev tiam tau Yehauvas kawg peb rab peev xwm, peb yuav tsum noj qab haus huv. (Malakaus 12:30) Peb  xav muab peb “lub cev fij rau Vajtswv kom dawbhuv thiab haum Vajtswv siab.” (Loos 12:1) Yog li ntawd, peb yuav tau tsis txhob ua tej yam kom ua rau peb muaj mob muaj nkeeg. Peb yeej paub hais tias txawm peb ua npaum li cas los qee lub caij peb yeej yuav muaj mob muaj nkeeg. Tiam sis cia peb ua npaum li peb ua tau, yeeb vim yog peb xav qhia rau Yehauvas tias peb yeej ris txiaj ntsig rau txoj sia uas nws muab.

4. Vaj Ntxwv Daviv xav ua dab tsi?

⁴ Vaj Ntxwv Daviv ris txiaj ntsig kawg nkaus li rau txoj sia uas Vajtswv pub, nws thiaj sau li no tias: “Yog kuv tuag lawm yuav muaj nqis dabtsi rau koj? Yog kuv mus rau hauv qhov tuag lawm muaj nqi rau koj los? Cov neeg tuag puas qhuas tau koj lawm? Lawv puas mus qhia tau koj txojkev zoo uas tsis txawj puastsuaj li?” (Phau Ntawv Nkauj 30:9) Tej zaum Daviv hais cov lus no rau thaum nws laus laus lawm. Nws yeej txuag nws txoj sia kom nyob ntev ntev xwv nws thiaj tau teev tiam Yehauvas. Tej zaum peb los kuj xav tib yam li nws thiab.

5. Txawm peb laus los sis muaj mob muaj nkeeg los peb haj tseem ua tau dab tsi?

⁵ Kev mob kev laus yuav ua rau peb ua tsis tau qho yam li yav tag los. Tej zaum yuav ua rau peb meem txom thiab ntxhov siab. Txawm li ntawd los nco ntsoov saib xyuas peb txoj kev noj qab haus huv vim hais tias txawm yuav laus los sis muaj mob los, peb haj tseem muaj rab peev xwm teev tiam tau Yehauvas tib yam li Vaj Ntxwv Daviv. Peb zoo siab heev tias txawm muaj mob los sis laus los peb haj tseem muaj nqis rau Vajtswv. (Mathais 10:29-31) Txawm muaj ib hnub twg peb nruam sim lawm los Vajtswv yeej tos tsis hnyu yuav tsa peb sawv rov los. (Yauj 14:14, 15) Tiam sis cheem peb tseem ua neej nyob, cia peb txuag peb txoj sia kom noj qab haus huv.

6. Yehauvas xav kom peb saib txoj kev noj kev haus li cas?

⁶ Txawm phau Vajlugkub tsis yog ib phau ntawv sau txog kev noj kev haus los yeej haj tseem qhia qho yam tias Yehauvas xav li cas rau li cas. Xws li nws ntuas kom peb “tsis txhob cia tej kev nyuaj siab thiab kev mob kev nkeeg los raug” peb lub cev ntaj ntsug. (Tej Lus Qhia 11:10) Nyob rau hauv phau Vajlugkub hais tias kom tsis txhob noj loj loj los sis quav dej quav cawv. Tej no yuav ua rau kom peb noj qab nyob tsis zoo thiab txo tau peb txoj sia. (Pajlug 23:20) Yehauvas xav kom peb tswj peb tus kheej thaum hais txog noj zaub noj mov los sis haus dej haus cawv.​—1 Kauleethaus 6:12; 9:25.

7. Tej lus ntuas nyob hauv Pajlug 2:11 pab kom peb txawj txiav txim siab li cas txog kev noj qab haus huv?

⁷ Yog peb txawj txiav txim siab ces yuav qhia tias peb ris txiaj ntsig rau txoj sia uas Vajtswv muab pub rau peb. (Phau Ntawv Nkauj 119:99, 100; nyeem Pajlug 2:11.) Xws li thaum peb yuav noj ib yam twg los peb yuav tsum txawj txiav txim siab. Tej zaum peb kheev noj qho yam zaub mov tiam sis cov mov ntawd ua rau peb muaj mob muaj nkeeg ces peb yuav tau tswj tsis txhob noj yam khoom ntawd. Tsis tas li ntawd, peb yuav tau pw kom txaus txaus, mus qoj ib ce, tu peb lub cev ntaj ntsug thiab vaj tse kom du lwb lug.

8. Nyob hauv phau Vajlugkub, Yehauvas saib txoj kev xyuam xim tseem ceeb npaum li cas?

⁸ Yehauvas muab kev cai rau cov Ixayees coj kom tsis txhob raug mob thaum ua hauj lwm hauv vaj hauv tsev los sis ua hauj lwm sab nraud. (Khiav Dim 21:28, 29; 2 Kevcai 22:8) Yog hais tias muaj leej twg lam ua rau lwm tus tuag mas nws lub txim yuav loj heev.  (2 Kevcai 19:4, 5) Mauxes Txoj Kev Cai hais tias yog ib tug twg lam ua raug ib tug poj niam uas suab me nyuam mas tus ntawd yuav raug txim. (Khiav Dim 21:22, 23) Cov nqe Vajlugkub no yeej hais meej tseeb tias Yehauvas xav kom peb ua neeg xyuam xim.

9. Peb yuav tau ceev faj li cas xwv peb thiab lwm tus thiaj tsis raug mob? (Saib cov duab.)

⁹ Qhov uas peb ris txiaj ntsig rau txoj sia uas Vajtswv pub yog peb ua zoo ceev faj thaum ua hauj lwm hauv vaj hauv tsev los sis ua hauj lwm sab nraud. Xws li peb yuav tau muab tej yam khoom ntse ntse, tej tshuaj khes mis los sis tshuaj noj tso rau ib qho chaw kom tej me nyuam yaus thiaj mus muab tsis tau. Peb yuav tau ceev faj thaum rauv taws, rhaub dej kub, thiab siv tej twj uas muaj fais fab. Peb tsis txhob tsav tsheb tom qab noj tshuaj, haus cawv los sis tsis tau dab ntub. Tsis tas li ntawd, tsis txhob kov xov tooj thaum tab tom tsav tsheb.

10. Ua ntej thiab thaum tab tom muaj xwm txheej, peb yuav tau ua dab tsi?

¹⁰ Tej lub sij hawm peb yeej txwv tsis tau  kom txhob muaj xwm txheej los raug peb lub neej xws li cua daj cua dub, kab mob kis, thiab kev sib tawm tsam. Txawm li cas los xij peem, thaum muaj tej yam xwm txheej los raug, peb yuav tau mloog tej nom tswv lus yog lawv kom peb tawm ntawm thaj chaw ntawd mus ces peb yuav tau tawm thiab yog lawv hais li cas peb yuav tau mloog li ntawd. (Loos 13:1, 5-7) Peb yuav tau npaj qho yam tseg nyob tsam muaj xwm txheej thiab mloog tej nom tswv qhia seb yuav npaj li cas rau li cas thiaj zoo. Xws li dej haus, zaub mov uas kav ntev ntev, thiab tej ntaub qhwv qhov txhab.

11. Thaum muaj kab mob kis qhov txhia qhov chaw, peb yuav tsum txaus siab hlo ua dab tsi?

¹¹ Peb yuav tsum ua dab tsi yog ib cheeb tsam ntawm peb muaj kab mob kis? Peb yuav tau mloog tej nom tswv lus, xws li ntxuav tes, nyob kom nrug deb ntawm lwm tus, looj ntaub npog qhov ncauj qhov ntswg, thiab caiv. Yog peb coj yam li no qhia tau hais tias peb ris txiaj ntsig rau txoj sia uas Vajtswv pub.

12. Nyob hauv Pajlug 14:15, pab kom peb txawj txiav txim siab li cas thaum hnov lwm tus tshaj xo txog tej xwm txheej?

¹² Thaum muaj xwm txheej, tej zaum peb yuav hnov peb cov phooj ywg kwv luag, neeg zej zog los sis xov xwm tshaj tawm txog qho yam uas tsis muaj tseeb. Ua ntej peb yuav “ntseeg txhua yam,” peb yuav tsum tau mloog seb tej nom tswv thiab tej kws tshuaj tau hais li cas rau li cas. (Nyeem Pajlug 14:15.) Ua ntej Pab Uas Ntaus Thawj thiab tej ceg Npe-ee yuav tshaj tawm ib yam dab tsi txog tej kev sib txoos thiab yuav mus tshaj tawm li cas, lawv yeej ua zoo soj ntsuas seb qhov twg zoo ua mam li ua. (Henplais 13:17) Yog peb ua raws li hais tas los no ces peb yuav tiv thaiv tau peb thiab lwm tus kom tsis txhob raug ib yam twg. Tsis tas li ntawd, kuj pab tau kom lwm tus saib taus Yehauvas Cov Tim Khawv.​—1 Petus 2:12.

13. Thaum mloog Yehauvas txoj cai hais txog ntshav, peb qhia li cas tias peb ris txiaj ntsig rau peb txoj sia?

¹³ Muaj coob leej ntau tus yeej paub tias Yehauvas Cov Tim Khawv yeej saib ntshav tseem ceeb heev. Peb mloog Yehauvas txoj cai uas hais txog ntshav, yog li ntawd peb thiaj tsis kam txhab ntshav tab txawm muaj mob muaj nkeeg hnyav npaum li cas. (Tes Haujlwm 15:28, 29) Qhov no tsis txhais hais tias peb xav xav tuag tiam sis peb saib taus txoj sia uas Vajtswv pub. Peb nrhiav tej kws tshuaj uas yeem kho peb tiam sis tsis muab ntshav txhab rau peb lub cev.

14. Peb yuav ua li cas xwv peb thiaj tsis tau mus kho mob hnyav hnyav?

¹⁴ Yog hais tias peb saib xyuas peb txoj kev noj qab haus huv thiab ua raws li tau hais tas los lawm hauv zaj kawm no ces peb yuav zam tau txoj kev mus phais mob los sis mus kho mob hnyav hnyav. Yog peb saib ntshis peb txoj kev noj qab haus huv ces tom qab peb phais mob tag mas peb yuav zoo sai dua. Ntxiv ntawd, cia peb muab tej khoom uas yuav ua rau peb raug mob raug nkeeg hauv vaj hauv tsev los sis thaum mus ua hauj lwm sab nraud khaws kom zoo chaw thiaj yuav tsis ua rau peb raug mob. Tsis tas li ntawd, peb yuav tsum mloog txoj cai uas tsav tsheb, thiaj tsis ua rau peb raug mob hnyav.

15. (1) Vim li cas ho tseem ceeb rau peb nqa daim ntawv tso cai txhua lub sij hawm? (Saib daim duab.) (2) Raws li zaj yeeb yaj kiab, peb yuav txiav txim siab li cas txog tej kev kho mob uas siv ntshav?

¹⁵ Peb ris txiaj ntsig rau txoj sia uas Vajtswv pub, peb thiaj li nqa rawv daim ntawv tso cai seb yuav kho mob li cas rau li cas txhua lub sij hawm. b Daim ntawv no qhia raws li peb pom zoo txog kev ntxiv ntshav thiab kev kho mob. Koj daim ntawv tso cai puas tseem siv nyog?  Yog qub dhau lawm los sis koj tsis muaj ces mus nqa dua ib daim tshiab sai li sai tau xwv koj thiaj muaj. Thaum peb muab txhua yam sau tseg lawm ces thiaj yuav tsis tos ntev tos ntau, kws tshuaj mam kho tau peb. Tsis tas li ntawd, thiaj tsis ua rau cov neeg ua hauj lwm hauv tsev kho mob muab tshuaj phiv rau peb. c

16. Yog peb tsis paub tias yuav sau li cas rau hauv daim ntawv tso cai, peb yuav nug leej twg?

¹⁶ Txawm peb yuav zoo neej thiab hluas los, peb tsis paub tias thaum twg peb yuav raug mob los sis muaj mob muaj nkeeg. (Tej Lus Qhia 9:12) Yog li ntawd, peb yuav tsum muaj daim ntawv tso cai seb yuav kho mob li cas rau li cas. Yog koj tsis paub tias yuav sau li cas rau li cas, tsis txhob ua siab deb, kav tsij nug kom cov txwj laus hauv koj lub koom txoos pab koj. Lawv paub tias daim ntawv hais li cas rau li cas tiam sis lawv yuav tsis txhob kom koj kho mob li cas. Txoj kev txiav txim siab no yuav tsum yog koj ua tus xaiv. (Kalatias 6:4, 5) Lawv tsuas pab kom koj nkag siab txog daim ntawv xwb thiab kho koj tej lus seb yuav hais li cas thiaj meej rau daim ntawv.

17. Thaum hais txog txoj kev noj qab haus huv, yuav ua li cas thiaj qhia tias peb tsis yog neeg cam thawj?

¹⁷ Tej yam uas peb txiav txim siab txog kev noj qab haus huv thiab kev kho mob yog los ntawm tej uas peb kawm hauv phau Vajlugkub los. (Tes Haujlwm 24:16; 1 Timautes 3:9) Thaum peb yuav txiav txim siab thiab qhia rau lwm tus paub txog tej peb txiav txim ntawd, peb yuav tau nco ntsoov cov lus nyob hauv Filipis 4:5 uas hais tias: “Cia li ua siab mos siab muag rau txhua tus, tsis txhob cam thawj.” Yog peb tsis ua neeg cam thawj ces peb yuav tsis txhawj xeeb ntau tshaj li tsim nyog txog peb txoj kev noj qab haus huv thiab peb tsis mus yuam lwm tus kom xav ib yam li peb xav txog kev noj qab haus huv. Txawm peb cov kwv tij nkauj muam xav txawv ntawm peb lawm los cia peb hlub tshua thiab saib taus lawv.​—Loos 14:10-12.

18. Peb ris txiaj ntsig rau txoj sia li cas?

¹⁸ Yog peb txuag peb txoj sia thiab ua npaum li peb ua tau rau Yehauvas ces qhov ntawd qhia tias peb ris Yehauvas txiaj ntsig rau txoj sia uas nws pub. (Tshwmsim 4:11) Tam sim no peb yeej yuav muaj mob muaj nkeeg thiab raug xwm txheej tiam sis lub neej no tsis yog lub neej uas Yehauvas xav kom peb tau. Tsis ntev tom ntej no, nws yuav muab txoj sia ntev dhawv mus ib txhis rau peb ces peb yuav tsis muaj mob muaj nkeeg thiab txawj laus txawj tuag. (Tshwmsim 21:4) Cheem lub sij hawm ntawd tseem tsis tau los txog, peb zoo siab kawg nkaus li uas peb tseem muaj txoj sia ua neej nyob thiab tau teev tiam Yehauvas.