1. Iehova be iseda mauri be edena bamona ia laloa?

 MANI oi laloa, turana ta be oi dekenai motuka gunana ta ia henia. Ena kala ia dika bona mai ena maka haida. Ena be unai motuka be mai ena dika haida, to ena davana be tausen momo. Momokani, inai motuka do oi laloa bada bona naria namonamo. Unai hegeregerena, Iehova ese ita dekenai dava bada harihari gauna, mauri, ia henia. Oibe, Iehova be iseda mauri ia laloa bada dainai, iena Natuna ia henia ita totona ia mase.​—Ioa. 3:16.

2. Korinto Iharuana 7:1 hegeregerena, Iehova ia ura dahaka do ita karaia?

² Iehova be mauri ena Badina. (Sal. 36:9) Aposetolo Paulo be unai hereva momokani ia abia dae, ia gwau: “Ia dainai ita mauri, ita raka loaloa bona ita noho.” (Kara 17:25, 28) Oibe, ita gwau diba iseda mauri be Dirava amo ia mai harihari gauna. Bona ita mauri noho totona, gau namodia ia henia. (Kara 14:15-17) Hari Iehova be hoa dalanai ita ia hamauria lasi. To, ia ura iseda tauanina bona iseda hetura karana ia ida do ita naria namonamo. (2 Korinto 7:1 duahia.) Dahaka dainai iseda tauanina bona mauri do ita naria namonamo, bona edena dala ai unai ita karaia diba?

3. Iseda tauanina ita naria namonamo ena badina ta be dahaka?

³ Iseda tauanina ita naria namonamo ena badina ta be ita ura mai iseda goada ibounai ida Iehova do ita hesiai henia. (Mar. 12:30) Iseda ura be eda “tauanina do [ita] henia, ia be boubou gauna bamona mai mauri, mai helaga, bona Dirava ese ia moalelaia.” Unai ita karaia totona, gorere idia havaraia karadia do ita dadaraia. (Roma 12:1) Momokani, herevana dahaka ita karaia, gorere do ita davaria. Unai dainai, gau badana be iseda tauanina ita naria namonamo, unai amo ita hahedinaraia iseda guba Tamana ese ia henia maurina ita laloa bada.   

4. King Davida ia ura dahaka ia karaia?

⁴ King Davida be mauri ia laloa bada ena badina ia herevalaia, Salamo 30:9 dekenai ia gwau: “Lau mase bona guri dekenai lau diho neganai, dahaka namo do ia vara? Kahu ese oi do ia hanamoa, a? Kahu ese emu kara namodia do ia herevalaia, a?” Reana Davida be ena mauri dokona ai unai hereva ia torea. To iena ura badana be do ia mauri daudau, unai amo Iehova do ia hesiai henia noho. Ita ibounai danu ita ura unai do ita karaia.

5. Herevana ita gorere o buruka, to dahaka ita karaia diba?

⁵ Ita gorere o buruka dainai, ita hegeregere lasi guna ita karaia gaudia ita karaia totona. Unai dainai, reana do ita badu bona lalohisihisi. To namona be ita hekwarahi iseda tauanina ita naria totona. Dahaka dainai? Badina herevana ita buruka o gorere, King Davida bamona, Iehova ita hanamoa noho diba. Oibe, herevana ita be goevadae lasi, to Iehova be ita ia laloa bada! (Mat. 10:29-31) Danu, ena be ita mase, to ia ura ita do ia hatorea isi lou. (Iobu 14:14, 15) Unai dainai, ita mauri noho lalonai, ita ura iseda tauanina bona mauri ita naria namonamo.

6. Aniani bona inuinu karana dekenai Iehova ena ura be dahaka?

⁶ Ena be Baibel ese helt eiava dahaka aniani ita ania ia herevalaia lasi, to Iehova ena lalohadai unai gaudia dekenai ia hahedinaraia. Hegeregere, ita ia sisiba henia “tauanina idia hadikaia gaudia do [ita] dadaraia.” (Had. 11:10) Baibel ia gwau aniani momo do ita ania lasi bona alkahol momo do ita inua lasi, badina unai gaudia ese iseda tauanina idia hadikaia bona ita idia hamasea diba. (Aon. 23:20) Iehova ia ura aniani bona alkahol dekenai sibona biagua karana do ita hahedinaraia.​—1 Kor. 6:12; 9:25.

7. Aonega Herevadia 2:11 ena sisiba herevana ese edena dala ai ita ia durua?

⁷ Laloa namonamo karana ese ia hahedinaraia, Dirava ese ita dekenai ia henia mauri ita laloa bada. (Sal. 119:99, 100; Aonega Herevadia 2:11 duahia.) Hegeregere, ita ura aniani ta ita ania neganai, do ita laloa namonamo. Bema ita diba unai aniani ese iseda tauanina dekenai gorere do ia havaraia, vadaeni namona be ita ania lasi. Danu, aonega karana be ita mahuta namonamo, hanaihanai ita eksasais, iseda tauanina ita naria namonamo, bona iseda ruma ita hagoevaia.   

8. Aksiden ita davaria lasi totona Dirava ena lalohadai be dahaka?

⁸ Iehova ese Israela taudia dekenai Taravatu ia henia, unai amo ia durudia ruma  bona gaukara gabuna ai aksiden idia davaria lasi totona. (Eso. 21:28, 29; Deu. 22:8) Hegeregere, bema tau ta be ia palanilaia lasi, to aksiden ia vara bona tau ta ia hamasea, iena varavara ese ia idia alaia diba. (Deu. 19:4, 5) Danu, Taravatu ia hahedinaraia bema ta ese rogorogo hahine ia haberoa bona ia mara ena be unai be ena nega korikori lasi, unai tauna idia panisia diba. (Eso. 21:22, 23) Baibel ese ia hahedinaraia goevagoeva Iehova ia ura ita naria namonamo, unai amo aksiden do ita davaria lasi.

9. Dahaka ita karaia diba aksiden ita davaria lasi totona? (Laulau itaia danu.)

⁹ Bema ruma bona gaukara gabuna ai sibona ita naria namonamo, aksiden do idia vara lasi, bona unai ese ia hahedinaraia mauri ita laloa bada. Hegeregere, bema resa o tini, kemikol dikadia, eiava muramura ita negea, namona be gabu maorona dekenai ita negea, unai amo ma haida ia hadikaia lasi. Bona unai bamona gaudia be natu maragidia ese do idia davaria lasi gabuna dekenai do ita atoa. Danu, bema lahi ita karaia,  ranu ita hasiahua bona paua tulu idauidau ita gaukaralaia, namona be ita rakatanidia kava lasi. Ma danu, bema muramura o alkahol ita inua, eiava iseda matana ia mahuta, namo lasi motuka ita taria. Danu, motuka ita taria neganai, namo lasi fon ita gaukaralaia.

10. Disasta idia do vara lasi bona idia vara lalonai, dahaka ita karaia diba?

¹⁰ Nega haida dika badadia ita koua diba lasi. Hegeregere, disasta idauidau, gorere badadia, bona dagedage idia vara kava. To, unai bamona dika badadia idia vara neganai, namona be sibona ita gimaia bona unai gabu rakatania ena hadibaia hereva o gavamani amo ita abia hadibaia herevadia ma haida ita kamonai bona badinaia. (Roma 13:1, 5-7) To, dika haida totona ita hegaegae diba, unai dainai gavamani ese idia henia hakaua daladia ita badinaia be namo. Hegeregere, inai bamona gaudia ita abia hegaegae be mai anina bada, ranu, idia dika diba lasi aniani bona muramura.

11. Bema daihanai gorere ta ia vara, dahaka do ita karaia?

¹¹ Bema iseda gabu dekenai daihanai gorere ta ia vara, dahaka ita karaia be namo? Namona be gavamani ese idia atoa taravatu, hegeregere imana ita huria, ma haida amo ita gini daudau, vairana ita koua (mask), bona kwarentin ita badinaia. Unai ita karaia neganai, ita hahedinaraia Dirava ese ia henia harihari gauna, mauri unai, ita laloa bada.

12. Dika idia vara neganai, edena dala ai Aonega Herevadia 14:15 ena hakaua herevana ita badinaia diba?

¹² Dika idia vara neganai, nega haida iseda turadia, neiba taudia, bona nius amo ita kamonai sivaraidia be maoro lasi. Ita ura lasi ita kamonai “hereva ibounai” ita abia dae, to namona be gavamani bona medikol taudia edia hereva maorodia ita kamonai. (Aonega Herevadia 14:15 duahia.) Hakaua Oreana bona brens ofesi be idia hekwarahi bada diba maorona idia tahua totona, unai amo kongrigeisen heboudia bona haroro gaukara karaia dalana dekenai hakaua hereva maorona idia henia. (Heb. 13:17) Edia hakaua herevadia ita badinaia neganai, ita bona mai haida be dika amo ita gimaia. Danu, unai ese iseda noho gabuna ai Iehova ena Witnes taudia edia ladana ia hanamoa.​—1 Pet. 2:12.   

13. Iehova ena taravatu rara dekenai ita badinaia neganai, edena dala ai ita hahedinaraia mauri ita laloa bada?

¹³ Taunimanima idia diba Iehova ena Witnes taudia dekenai rara be helaga. Unai dainai medikol heduru ita abia neganai, ita ura Iehova ena taravatu rara dekenai ita badinaia bona rara ita abia lasi. (Kara 15:28, 29) Unai ena anina be ita ura lasi ita mase, to ita be Dirava ese ia henia harihari gauna, mauri unai, ita laloa bada. To, doketa taudia haida ita noia diba rara idia gaukaralaia lasi medikol daladia ma haida amo ita idia durua diba.

14. Dahaka ita karaia diba opereisen badana ta ita abia lasi totona?

¹⁴ Bema inai atikol ai ita herevalaia bamona iseda tauanina ita naria namonamo, reana opereisen eiava medikol heduru badana totona hospital dekenai do ita lao lasi. Bema iseda tauanina ia goada, bona opereisen ta ita abia, do ita namo haraga diba. Danu, bema iseda ruma bona gaukara gabuna ai sibona ita naria namonamo bona motuka taria ena taravatu ita badinaia, aksiden  do ita davaria lasi bona opereisen badana ta do ita abia lasi.

15. (a) Dahaka dainai Advance Health-Care Directive kadi ita abia loaloa be gau badana? (Laulau itaia danu.) (b) Vidio hegeregerena, edena dala ai rara dekenai disisen maorodia ita karaia diba?

¹⁵ Mauri ita laloa bada dainai, namona be Advance Health-Care Directive kadi do ita hahonua bona hanaihanai do ita abia loaloa. b Unai kadi dekenai rara abia lasi karana bona medikol heduru daladia haida totona, iseda ura gaudia ita torea diba. Emui kadi be gunana, a? Bema lasi, kadi matamata ta oi hahonua be namo. Kadi ai iseda ura gaudia ita torea namonamo neganai, heduru do ita abia haraga bona nega do ita halusia lasi doketa ida unai ita herevalaia totona. Danu, unai ese doketa taudia do ia durua unai amo ita dekenai heduru namona do idia henia. c   

16. Dahaka ita karaia diba bema Advance Health-Care Directive kadi hahonua dalana ita diba lasi?

¹⁶ Herevana, ita be matamata eiava buruka, to ita ibounai be aksiden bona gorere ita  davaria diba. (Had. 9:11) Unai dainai, Advance Health-Care Directive kadi ita hahonua be aonega karana. Bema unai kadi hahonua dalana ita diba lasi, emu kongrigeisen elda taudia oi noia diba oi idia durua totona. Unai kadi hahonua dalana be idia diba, to oi totona abia hidi do idia karaia lasi. Unai be emu maduna. (Gal. 6:4, 5) Idia ese oi do idia durua unai kadi ena hereva oi lalopararalaia bona emu ura do oi torea namonamo diba.

17. Edena dala ai medikol gaudia dekenai laloa maoromaoro karana ita hahedinaraia diba?

¹⁷ Iseda helt bona medikol heduru dekenai ita karaia abia hidi momo be Baibel ena hereva hegeregerena ita badinaia. (Kara 24:16; 1 Tim. 3:9) Abia hidi ita karaia bona ma haida ida ita herevalaia neganai, namona be Filipi 4:5 ena hakaua herevana ita badinaia, ia gwau: “Namona be taunimanima ibounai ese emui laloa maoromaoro karana idia itaia.” Bema ita laloa maoromaoro, iseda gorere dainai do ita laloa momo lasi, bona danu ma haida do ita doria lasi iseda lalohadai idia abia dae totona. Ena be iseda tadikaka bona taihu idia karaia abia hidi be iseda amo ia idau, to idia ita lalokau henia bona matauraia be namo.​—Roma 14:10-12.

18. Edena dala ai harihari gauna, mauri ita laloa bada?

¹⁸ Iehova, Mauri ena Badina, ita tanikiu henia totona, namona be iseda mauri ita gimaia bona ita gaukaralaia namonamo ia ita hesiai henia totona. (Apok. 4:11) Hari, gorere bona dika idauidau do ita davaria. To, iseda Havaraia Tauna ia ura lasi inai bamona mauri do ita noholaia. Kahirakahira hisihisi bona mase do ia haorea bona mauri hanaihanai do ia henia. (Apok. 21:4) To, hari ita mauri noho lalonai, iseda lalokau guba Tamana, Iehova ita hesiai henia noho be moale gauna!