1. Omuinyo wetu u nonḓengu ndji ṱa pi ku Jehova?

 NGATU tje epanga roye re ku pe otjiperendero otjikuru navi, posi ya otjihuze. Otjivara tja kururuka, kwa tikira ondova nu tji nomiṱa. Nandarire nao, otjiperendero ho tji nonḓengu yovimariva ovingi. Tjiri ove mo kara nondangi nu otjevere otjiperendero ho. Momuano otjingewo, Jehova we tu pa otjiyandjewa otjihuze, otjiyandjewa tjomuinyo. Tjiri Jehova wa raisa kutja omuinyo wetu omunanḓengu indu tja yandja Omuna we ma rire otjisuta tjonguturiro kweṱe.—Joh. 3:16.

2. Otja tji pa raisiwa 2 Ovakorinte 7:1, Jehova u undjira ko tjike ku eṱe?

² Jehova Oruharwi rwomuinyo. (Eps. 36:9) Omuapostele Paulus wa yakura ouatjiri mbwo indu tja tja: “Mu Ye omu tu nomuinyo nomu tu nyinganyinga nomu tu ri.” (Oviung. 17:25, 28) Ku nao, eṱe matu yenene okutja omuinyo wetu otjiyandjewa okuza ku Mukuru. Eye norusuvero u tu pa avihe mbi matu hepa kutja tu hupe. (Oviung. 14:15-17) Posi yokutja Jehova ka yama omuinyo wetu momuano omuhimise. Nungwari, eye u vanga kutja tu tjite avihe mbi matu yenene kutja tu kare ovaveruke nu tu kayende komurungu okumukarera otja pu matu yenene. (Lesa 2 Ovakorinte 7:1.) Omena raye tji matu sokutjevera ouveruke nomuinyo wetu nu matu yenene vi okutjita nao?

3. Epu riṋe rimwe ndi tu vangera okukara nouveruke ouwa?

³ Epu rimwe ndi tu vangera okukara nouveruke ouwa omena rokutja tu vanga okukarera Jehova otja pu matu yenene. (Mar. 12:30) Tu kara nonḓero yokuriyandja “oveni ku Ndjambi kutja [tu] rire ombunguhiro onamuinyo nondjapuke Eye me nonyuṋe,” ku nao katu tjiti oviṋa mbi mavi tjiti kutja tu vere. (Rom. 12:1) Nandarire kehi yozongondjero azehe, ihi katji hee kutja katu nokuvera. Posi yokutja, tu vanga okutjita atjihe pu matu yenene mena rokutja tu vanga okuraisa ondangi ku Tate wetu womeyuru, kotjiyandjewa tjomuinyo.

4. Ombara David aa vanga okutjita tjike?

⁴ Ombara David wa kahurura kutja ongwaye tjaa vara otjiyandjewa tjomuinyo okuza ku Mukuru indu tja tjanga omambo nga: “Mape vatere tjike, tji mba koka ne hiti meyendo? Oruuma maru sora okukutanga are? Maru sora okuzuvarisa ouṱakame woye are?” (Eps. 30:9) David mape ya wa tjanga omambo ngo kuṱa komaandero womuinyo we. Posi yokutja, eye we rimanena okukara nomuinyo nouveruke ouwa otja pu ma yenene kokutja ma kayende komurungu okukarera Jehova. Otjingaperi kutja auhe wetu u nonḓero ndjo wina.

5. Nandarire kutja twa kurupa poo twa vera, matu yenene okutjita vi?

⁵ Ouvere noukurundu mape ya avi tu tjaere okutjita oviṋa ovingi mbyaatu tjiti rukuru. Mena ranao, mape ya atu fula navi. Posi yokutja, matu sokutjita otja pu matu yenene okutjevera ouveruke wetu. Omena raye? Kainatja kutja twa kurupa poo twa vera, eṱe matu yenene okutanga Jehova tjimuna Ombara David. Tjiri otjiṋa otjihuhumiṋe tjinene okutjiwa kutja oweṱe ovihuze ku Mukuru, nandarire kutja twa vera poo twa kurupa. (Mat. 10:29-31) Nandarire kutja twa ṱu, eye u zera okutupendura. (Job 14:14, 15) Ngunda atu nomuinyo, eṱe tu vanga okutjita pu matu yenene okutjevera ouveruke nomuinyo wetu.

6. Ovikwaye Jehova mbye vanga kutja tu tjite indu tji pe ya pokurya nokunwa?

⁶ Nandarire kutja Ombeibela kambo rouveruke poo embo ndi tu raera kutja ngatu rye ye, oro ri tu raera ovingi ohunga nomuano Jehova me ripura ohunga noviṋa mbi. Otjotjihorera, eye u tu tunduuza ‘okuhumburura omihihamo’ mbi mape ya avi hihamisa otutu twetu. (Omuzuv. 11:10) Ombeibela i tu raera kutja katu sokurya poo okunwa otjikariha tjinene, oviṋa mbi mavi yenene okuṱuna kouveruke wetu nu nandarire avi tu zepa. (Omiano 23:20) Jehova u undjira ko ku eṱe okukara nomeritjaerero indu tji matu tye kutja ovikwaye nu matu ri nokunwa pu pe ṱe i pi.—1 Kor. 6:12; 9:25.

7. Eronga ndi ri mOmiano 2:11 ri tu vatera vi okutjita ozondando ozombwa ohunga nouveruke wetu?

⁷ Eṱe matu yenene okutjita ozondando nḓu maze raisa kutja tu nondangi kotjiyandjewa tjomuinyo Mukuru tje tu pa mokuungurisa ozondunge zetu. (Eps. 119:99, 100; lesa Omiano 2:11.) Otjotjihorera, tu toora omikambo omisemba indu tji matu ripurire koviṋa mbi matu ri. Indu tji twa suvera ovikurya vyorive posi ya tji vi tu verisa, eṱe twa sokukara kokure na vyo. Eṱe wina tu raisa kutja tu nozondunge, indu tji matu kondjo okurara nawa, okurikuturisa orutu aruhe, nokuṱiza otutu nozonganda zetu oukohoke.

8. Ovikwaye Ombeibela mbi tu honga ohunga noumune wa Jehova tji pe ya kondjeverero yetu?

⁸ Jehova wa yandja Omatwako kOvaisrael ohunga nomuano maave sokuritjevera komaumba pozoyawo, poo indu tji mave ungura.  (Eks. 21:28, 29; Deut. 22:8) Indu omundu tja zeperere omukwao, aape kongorere omberero ku ye. (Deut. 19:4, 5) Kehi yOmatwako, nandarire imba mba hihamisirire okanatje ku ke hi ya kwatwa aave sokuverwa. (Eks. 21:22, 23) Omatjangwa ye raisa oukahu kutja Jehova u vanga kutja tu tjite otja pu matu yenene okuyepa omaumba.

9. Ovikwaye mbi matu yenene okutjita okuyepa omaumba? (Wina tara koviperendero.)

⁹ Eṱe tu raisa kutja tu nondangi kotjiyandjewa tjomuinyo Mukuru tje tu pa mokukondja okukara mondjeverero ponganda na poviungura. Otjotjihorera, indu tji matu imbirahi oviṋa ovitwe, oviṋa ovinawanga poo omiti omipange, eṱe matu sokutjita nao momuano mbu hi nokuhihamisa varwe. Eṱe wina matu sokutjita kutja ovanatje ave ha munu oviṋa mbyo. Indu tji matu yakisa omuriro, okusumisa omeva, poo okuungurisa oviungurisiwa mbi ungura norutjeno, eṱe matu sokukengeza nu atu ha kayenda kwarwe. Eṱe katu hingi ohauto indu tji twa nu omiti mbi mape ya avi tjiti kutja atu ha hingi nawa, poo okunwa otjikariha, poo tji tu ha rarere nawa. Nu wina katu handa ongoze momake wetu indu tji matu hingi.

10. Ovikwaye mbi matu yenene okutjita ngunda ape ha tjitwa oumba na indu tji wa tjitwa?

¹⁰ Povikando tjiva, eṱe katu yenene okutjaera oumba okutjitwa. Imbi tu vi muna tji pa tjitwa omaumba, tjimuna omanyinganyingiro wehi, omitjise mbya handjauka, nomazunganeno wotjiwaṋa. Posi yokutja, omaumba otja ingo tji ya tjitwa, kutja tu hupe nokutja tu kare mondjeverero, eṱe matu sokukara nonḓuviro komaraa wokupita momaturiro ngo, poo omaraa warwe okuza kohoromende. (Rom. 13:1, 5-7) Matu yenene okurirongerisa komaumba tjiva, ku nao matu sokupuratena komuhunga okuza kohoromende okutuvatera okurirongerisa. Otjotjihorera, mape ya a rire nawa okukara nomeva novikurya mbi ha woro tjimanga, nu wina okukara nokakesa komiti.

11. Indu tji pa handjauka omutjise omuhwange momaturiro wetu, eṱe matu sokuriyandjera okutjita vi?

¹¹ Matu sokutjita vi indu tji pa handjauka omutjise omuhwange momaturiro wetu? Eṱe matu sokukara nonḓuviro komuhunga mbu mau zu kohoromende, tjimuna okukoha omake, okukara kokure novandu, okuzara oumaska nokukara kove omuini indu tji wa vere. Indu tji twa tjiti oviṋa mbyo, tu raisa kutja tu nondangi tjinene kotjiyandjewa tjomuinyo Mukuru tje tu pa.

12. Omiano 14:15 ri tu vatera vi okutya kutja ondjivisiro iṋe ndji matu puratene ko indu tji pa tjitwa oumba?

¹² Indu tji pa tjitwa oumba, povikando tjiva tu zuva oviṋa okuza momapanga poo ovararanganda poo mozombuze mbi he ri ouatjiri. Pendje nokukambura “membo ngamwa arihe” ndi twa zuu, eṱe matu sokupuratena kohoromende nozonganga mbe nondjiviro ohunga na imbi mbya tjitwa. (Lesa Omiano 14:15.) Orutu Orunane notutavi twozomberoo tu tjita otja pu matu yenene okumuna ondjiviro youatjiri ngunda ave hi ya yandja omuhunga ohunga nozombongarero zombongo notjiungura tjokuzuvarisa. (Hebr. 13:17) Indu tji twa kongorere omuhunga mbwi, eṱe tu ritjevera oveni na varwe koumba. Eṱe wina mape ya atu vatere varwe okukara noumune ouwa ohunga nOvahongonone va Jehova.—1 Petr. 2:12.

13. Eṱe tu raisa vi kutja tu vara omuinyo indu tji matu kara nonḓuviro ketwako ra Jehova rombinḓu?

¹³ Ovandu ovengi ve tjiwa kutja Ovahongonone va Jehova ve kambura kutja ombinḓu otjiṋa otjiyapuke. Eṱe tu kara nonḓuviro ketwako ra Jehova rokuhinokupakerwa ombinḓu, nandarire tji matu hepa omapangero watjimanga. (Oviung. 15:28, 29) Posi yokutja, iho katji hee kutja tu vanga okukoka. Eṱe tu raisa ondengero komuinyo, otjotjiyandjewa okuza ku Mukuru. Ku nao, eṱe tu paha ombatero yozonganga nḓu maze riyandjere okutuvatera nokuhinokutupakera ombinḓu.

14. Omomuano uṋe mu matu yenene okutjita kutja atu ha hepa omapangero omanene?

¹⁴ Indu tji twa tjevere ouveruke wetu mokutjita oviṋa mbi twa hungirire ko morupa ndwi, ngahino kamaatu hepa okutaurwa poo okumuna omapangero warwe omanene. Nu indu tji tu ri ovaveruke, eṱe matu veruka tjimanga kombunda yokutaurwa. Eṱe wina matu yenene okutjita kutja atu ha hepa omapangero watjimanga mokuisa po oviṋa mbi mape ya avi tu etere oumba ponganda poo poviungura nokukongorera ozoveta zondjira.

15. (a) Ongwaye tje ri ounahepero okukara nokakarata kombinḓu ku ke nondjivisiro ombe? (Wina tara kotjiperendero.) (b) Otja tji pa raisiwa mokavidio, omomuano uṋe mu matu yenene okuungurisa ondjiviro ndji twa munu okutjita ozondando ohunga nomaungurisiro wombinḓu?

¹⁵ Mena rokutja tu nondangi kotjiyandjewa tjomuinyo, eṱe tu tjanga okakarata kombinḓu (advance health-care directive) nu tu kara na ko povikando avihe. b Mokakarata nga, mu  kara oumune wetu ohunga nomapakerero wombinḓu nomapangero tjiva. Hapo okakarata koye ke nondjivisiro ombe? Indu tji mo hepa okutjanga poo okutwa mo ondjivisiro ombe, hakahana okutjita nao. Okutwa mo oumune wetu momatjangwa maku tu vatere kutja tu mune omapangero watjimanga, mena rokutja katu nokumorosa oruveze oruingi okuhungira oviṋa mbyo ku nozonganga. Eṱe wina matu vatere imba mbu mave tu panga kutja ave he tu pe omapangero poo omiti mbi mavi tu etere oumba. c

16. Matu yenene okutjita vi indu tji tu hi nokutjiwa kutja ngatu tjange ye mokakarata kombinḓu?

¹⁶ Nandarire kutja oweṱe omitanda poo tu nouveruke ouwa, eṱe atuhe matu yenene okukara moumba nokuvera. (Omuzuv. 9:11) Ku nao, onawa okutjanga okakarata kombinḓu. Indu tji u hi nokutjiwa kutja ngo tjange ye mokakarata nga, ningira ombatero okuza kovanene vombongo mombongo yoye. Owo ve kondja okutjiwa kutja ovikwaye mbi mavi sokukara mokakarata nga, posi ya owo kave ku tjitire po ozondando. Ingo omerizirira woye. (Gal. 6:4, 5) Posi ya, owo mave yenene okukuvatera okuzuva nawa oviṋa mbi mo yenene okutoorora  nokukuvatera okutjanga oumune woye mokakarata ngo.

17. Eṱe tu raisa vi oupore ohunga noviṋa mbi tjama nouveruke?

¹⁷ Omikambo mbi tu toora ohunga nomapangero vi zikamena ku imbi mbi twe rihonga mOmbeibela. (Oviung. 24:16; 1 Tim. 3:9) Indu tji twa tjiti ozondando, natu hungire ku na varwe imbi mbi twa tye, eṱe matu sokuzemburuka omurari mbu ri mOvafilipi 4:5 mbu mau tja: “Oupore weṋu ngau tjiukwe i ovandu avehe.” Indu tji tu noupore, eṱe katu rikende tjinene ohunga nouveruke wetu nu katu kondjo okutjita kutja varwe ve kare noumune tjimuna imbwo wetu ohunga noviṋa mbi tjama nouveruke. Eṱe twa suvera nokutenga ovakambure ovakwetu, nandarire kutja ve tjita ozondando nḓa panguka ku inḓo zetu.—Rom. 14:10-12.

18. Matu yenene vi okuraisa ondangi kotjiyandjewa tjomuinyo?

¹⁸ Eṱe tu raisa ondangi ku Jehova, ngu ri Oruharwi rwomuinyo, mokutjevera omuinyo wetu nokumuungurira otja pu matu yenene. (Omavan. 4:11) Ngunda matu sokutjinda omitjise nomauzeu. Posi yokutja Omuute wetu ka vanga kutja tu hupe nao. Moruyaveze rwopopezu, eye me ketupa omuinyo waaruhe mbu hi nomihihamo nonḓiro. (Omavan. 21:4) Ngunda imbyo avi hi ya tjitwa, onawa okukara nomuinyo nokukarera Tate wetu worusuvero Jehova.