1. Ni pemesai reti pengidup kitai ke Jehovah?

 GAMBARKA tu. Kaban nuan meri nuan siti lukisan ti amat lama tang berega. Warna lukisan nya bisi pudar mimit. Lukisan nya mega bisi kamah mimit sereta merekah. Taja pia, rega lukisan nya bejuta dolar. Nuan tentu deka beterima kasihka pemeri nya lalu nyaga lukisan nya. Baka nya mega, Jehovah udah meri kitai pemeri ti amat berega, iya nya pemeri pengidup. Kebendar iya, Jehovah udah nunjukka pemesai reti pengidup kitai ke Iya lebuh Iya nganjung anak Iya nyadika tebus ke kitai.—Jhn. 3:16.

2. Baka ke dipadah ba 2 Korint 7:1, nama utai ti dikedekaka Jehovah ari kitai?

² Jehovah nya Pun pengidup. (Mas. 36:9) Rasul Paul mega pechayaka utai tu, lalu iya madah: “Kitai idup, engkebut, sereta bisi ba ditu, ketegal Iya.” (SKR. 17:25, 28) Nya alai, kitai ulih madah pengidup kitai nya pemeri ari Petara. Iya enggau bepengerindu meri kitai utai ti diguna ngambika kitai ulih mengkang idup. (SKR. 14:15-17) Tang Jehovah enda ngereja pengawa ajih diatu kena nentuka kitai terus idup. Iya dekaka kitai enggau naka ulih nyaga pengerai diri sereta terus nyembah Iya. (Bacha 2 Korint 7:1.) Nama kebuah kitai patut bebendar  nyaga pengerai sereta nyawa kitai, lalu baka ni kitai ulih ngereja nya?

3. Nama siti kebuah kitai patut nguji nyaga pengerai kitai?

³ Siti kebuah kitai patut nguji nyaga pengerai diri iya nya, ngambika kitai ulih nyembah Jehovah enggau pengabis pengering kitai. (Mrk. 12:30) Kitai deka ‘nyerahka tubuh kitai nyadi pemeri ti idup, ke kudus, sereta ke diterima Petara.’ Nya alai, kitai enda ngereja utai ke ulih ngasuh kitai sakit. (Rom. 12:1) Endang amat, enda ngira nama utai ke dikereja kitai, kitai enda ulih ngerenti diri deka mengkang gerai. Tang kitai ngereja ni ke ulih kitai ngambika nyaga pengerai diri laban kitai deka nunjuk ngagai Jehovah kitai beterima kasihka pemeri pengidup.

4. Nama utai ti deka dikereja Raja David?

⁴ Raja David nerangka kebuah iya beterima kasihka pemeri pengidup ti diberi Petara, lebuh iya nulis: “Nama penguntung Nuan enti aku mati? Nama penguntung Nuan enti aku dibuai ngagai kubur? Kati orang ke mati ulih muji Nuan? Kati sida ulih nusui pasal penetap ati Nuan?” (Mas. 30:9) David engka nulis ayat tu ba pengujung pengidup iya. Tang iya keran deka terus idup sereta mengkang gerai ngambika iya ulih terus nyembah Jehovah. Semua kitai mega tentu bisi pengeran ti sama.

5. Enda ngira sekalika kitai tuai tauka sakit, nama utai ti ulih dikereja kitai?

⁵ Enti kitai sakit tauka majak tuai, kitai engka enda ulih ngereja mayuh utai baka suba. Ketegal nya, kitai engka berasai asa sereta tusah ati. Taja pia, kitai agi patut nguji enggau naka ulih nyaga pengerai diri. Nama kebuah? Laban enda ngira sekalika kitai tuai tauka sakit, kitai agi ulih muji Jehovah, sama baka Raja David. Kitai berasai amat lantang ati lebuh nemu diri berega ba Petara taja pan kitai udah tuai tauka sakit. (Mat. 10:29-31) Indah enti kitai mati pan, Jehovah keran deka ngangkatka kitai idup baru. (Jop 14:14, 15) Nya alai, seagi-agi kitai idup, kitai deka ngereja ni ke ulih kitai kena nyaga pengerai sereta nyawa kitai.

6. Nama utai ti dikedekaka Jehovah kereja kitai bekaul enggau tebiat makai enggau ngirup kitai?

⁶ Taja pan Bup Kudus ukai bup ke madah pasal chara nyaga pengerai tauka nama utai ti patut diempa, tang iya bisi madah mayuh utai pasal runding Jehovah bekaul enggau utai tu. Ambika chunto, Bup Kudus meransang kitai enda “nejuka sebarang utai . . . ngemediska” pengerai kitai. (P-jar. 11:10) Bup Kudus madahka kitai enda patut kelalu mayuh makai tauka ngirup kelalu mayuh ai bisa. Utai tu ulih ngachau pengerai kitai, indah munuh kitai. (J-lam. 23:20) Jehovah ngarapka kitai ulih nagang diri lebuh milih nama utai ti deka diempa tauka diirup, sereta penyampau utai nya.—1 Kor. 6:12; 9:25.

7. Baka ni jaku lalau ba Jaku Dalam 2:11 nulung kitai ngaga pemutus ti manah bekaul enggau pengerai kitai?

⁷ Kitai ulih ngena runding kitai ti bepenemu-dalam kena ngaga pemutus ti nunjukka kitai amat beterima kasihka pemeri pengidup ke diberi Petara. (Mas. 119:99, 100; bacha Jaku Dalam 2:11.) Ambika chunto, kitai deka ngaga pemutus ti manah bekaul enggau utai ti deka diempa kitai. Enti kitai rinduka sesiti pemakai, tang pemakai nya ngasuh kitai sakit, kitai patut nentuka diri enda makai pemakai nya. Kitai mega nunjukka diri nemu berunding lebuh kitai tinduk enggau chukup, suah eksesais, sereta nyaga pemeresi ba tubuh sereta rumah kitai.

8. Nama utai ti diajar Bup Kudus pasal pemesai reti pengelikun kitai ke Jehovah?

⁸ Jehovah meri orang Israel Adat pasal chara sida ulih nyaga diri ari utai ti ulih ngasuh bebadi ba rumah tauka lebuh sida gawa. (P-sut. 21:28, 29; U-dat. 22:8) Enti sesiku orang enggau enda sengaja ngereja utai ti ngasuh orang bukai bebadi, orang nya mega deka diukum enggau serius. (U-dat. 19:4, 5) Adat nya mega madahka, orang ke enda sengaja ngemediska anak ti agi dalam kandung, mega patut diukum. (P-sut. 21:22, 23) Ayat tu enggau terang nunjukka Jehovah deka kitai ngemeratka pengelikun.

9. Nama ulih dikereja kitai kena nyeliahka utai ti tau ngemedis? (Peda mega gambar.)

⁹ Kitai nunjukka diri beterima kasihka pemeri pengidup ke diberi Petara lebuh kitai bebendar nguji nyaga pengelikun ba rumah sereta ba endur gawa. Ambika chunto, enti kitai patut muai perengka ti tajam, bahan kimia ti berachun, tauka ubat, kitai deka ngereja nya enggau chara ti likun. Kitai mega nentuka bala anak ti agi biak enda tetemuka utai tu. Kitai bejimat lebuh ngidupka api, manduk ai, tauka  ngena perengka bukai, lalu kitai patut nentuka diri enda ninggalka endur nya lebuh benung ngereja utai tu. Kitai enda deriba kerita enti kitai udah (1) makai ubat ke ulih ngachau fokus kitai, (2) ngirup ai bisa sereta enda ulih mai kerita enggau bejimat, tauka (3) kelalu lelak. Kitai mega enda megai telefon lebuh deriba.

10. Nama ulih digaga kitai sebedau sereta lebuh penusah ti ulih ngasuh bebadi nyadi?

¹⁰ Kekadang kitai enda ulih nagang situasi ti bahaya ari nyadi. Tu endang amat baka bencana alam, epidemik, tauka penyarut ba menua. Taja pia, lebuh penusah ke baka tu nyadi, kitai ulih bebendar nyaga pengelikun sereta selamat napi penusah nya enti kitai nitihka iring ari piak ti bekuasa, baka lebuh sida ngasuh kitai ninggalka endur nya. (Rom. 13:1, 5-7) Sekeda situasi kecemasan ulih dijangka. Nya alai, kitai patut ningaka iring ari piak bekuasa kena nulung kitai besedia. Ambika chunto, kitai ulih nentuka diri bisi ai tauka pemakai ti enda mudah rusak, sereta sekeda perengka berubat kecemasan ti asas. Tu ulih meri penguntung ke kitai enti kitai udah besedia.

11. Nama utai ti patut digaga kitai enti bisi penyakit berampit ba endur alai kitai diau?

¹¹ Nama utai ti patut digaga kitai enti bisi penyakit berampit ba endur alai kitai diau? Kitai patut nitihka iring ari piak ti bekuasa baka utai ti bekaul enggau nuchi jari, nyaga takah enggau pangan diri, ngena penutup idung enggau mulut, sereta atur pasal kuarantin. Lebuh kitai ngereja tu, kitai nunjukka diri amat beterima kasihka pemeri pengidup ke diberi Petara.

12. Baka ni Jaku Dalam 14:15 nulung kitai ngaga pemutus pasal ni bagi penerang ke deka dipechayaka kitai lebuh bisi penusah nyadi?

¹² Lebuh bisi kecemasan, kekadang kitai ninga ari bala kaban, ba berita, tauka orang ke diau berimbai enggau kitai, pasal utai ti enda amat. Ari ke pechayaka “sebarang utai,” kitai patut ninga ngagai penerang ari sida ke ulih dikearapka, baka piak perintah tauka bala lutur. (Bacha Jaku Dalam 14:15.) Raban ti Ngiring enggau pampang opis ngereja semua utai ke ulih sida kena ngulihka penerang ti betul sebedau meri iring bekaul enggau pengawa begempuru sereta pengawa nginjil. (Heb. 13:17) Lebuh kitai nitihka iring tu, kitai deka nyaga diri empu sereta orang bukai. Kitai mega engka nulung orang bukai ngembuan runding ti manah pasal bala Saksi Jehovah.—1 Pet. 2:12.

13. Baka ni kitai nunjukka diri beterima kasihka pengidup ke diberi Jehovah lebuh kitai ngasika pesan Jehovah bekaul enggau darah?

¹³ Mayuh orang nemu Saksi-Saksi Jehovah pechaya darah nya kudus. Kitai bebasaka pesan Jehovah bekaul enggau darah lebuh kitai enggai nerima transfusi darah, taja pan napi kecemasan berubat. (SKR. 15:28, 29) Taja pia, tu ukai reti iya kitai deka mati. Tang, kitai amat beterima kasihka pemeri pengidup tu ke diberi Petara. Kitai ngiga sida ke landik ba begian berubat ke sanggup nyediaka chara berubat ti pemadu manah ke enda ngena transfusi darah.

14. Baka ni kitai ulih ngurangka risiko kecemasan berubat ti serius?

¹⁴ Enti kitai nyaga pengerai diri enggau nitihka utai ti dipadah dalam artikel tu, kitai engka enda ibuh beputung tauka napi kecemasan berubat ti serius. Lalu enti kitai mengkang gerai, kitai deka jampat agi suman enti sema kitai patut beputung. Kitai mega ulih ngurangka risiko kecemasan berubat ti serius enti kitai nentuka rumah sereta endur gawa  kitai selamat, sereta ngasika undang-undang ba jalai alun.

15. (a) Nama kebuah nya penting seruran mai Kad Arahan Penjagaan Kesihatan? (Peda mega gambar.) (b) Baka ke diayanka ba video, baka ni kitai ulih ngaga pemutus ti manah senentang chara berubat ti bekaul enggau darah?

¹⁵ Kitai beterima kasihka pemeri pengidup tu. Nya kebuah kitai ngisi Kad Arahan Penjagaan Kesihatan, lalu seruran mai kad nya. b Nengah kad tu, kitai ulih madahka pemutus diri empu bekaul enggau transfusi darah sereta sekeda chara berubat. Kati kad nuan nya ke pemadu baru? Anang betangguh enti nuan patut ngisi tauka ngaduka baru kad nuan. Enti kitai udah nulis enggau terang, nya deka nulung kitai bulih rawatan enggau jampat agi laban kitai enda ibuh masau jam berandauka utai enggau bala lutur. Kitai mega nentuka diri enda nerima sebarang ubat tauka chara berubat ti bahaya ke kitai. c

16. Nama ulih digaga kitai enti kitai enda entu pasti pasal chara ngisi Kad Arahan Penjagaan Kesihatan?

¹⁶ Enda ngira sekalika kitai biak tauka bepengerai, semua kitai ulih kena penusah tauka kena penyakit. (P-jar. 9:11) Nya alai, endang  manah enti kitai ngisi Kad Arahan Penjagaan Kesihatan. Enti nuan enda entu pasti pasal chara ngisi kad nya, pinta meh tulung ari bala tuai gempuru nuan. Sida bebendar nguji nemu semua penerang ke bekaul enggau chara ngisi kad nya, tang sida enda ngaga pemutus ke nuan pasal chara berubat. Nya tanggungjawap nuan empu. (Gal. 6:4, 5) Tang, sida ulih nulung nuan meretika pilihan ke bisi sereta nulung nuan lebuh nuan patut ngisi kad nya.

17. Baka ni kitai ulih nunjukka diri seimbang senentang utai ti bekaul enggau pengerai?

¹⁷ Mayuh ari pemutus ke digaga kitai pasal pengerai sereta chara berubat nya bepelasarka utai ti udah dipelajarka kitai ari Bup Kudus. (SKR. 24:16; 1 Tim. 3:9) Lebuh kitai ngaga pemutus tauka berandau enggau orang bukai pasal pemutus kitai, kitai patut ingatka utai ti dipadah ba Pilipi 4:5: “Awakka semua orang nemu, kita ukai orang ke enda masuk akal.” Lebuh kitai seimbang, kitai enda seruran irau pasal pengerai diri, sereta enda nguji ngasuh orang bukai ngembuan runding ti sama enggau kitai bekaul enggau pengerai. Kitai rindu sereta bebasaka bala menyadi kitai, taja pan sida ngaga pemutus ti bebida enggau kitai.—Rom. 14:10-12.

18. Baka ni kitai ulih nunjukka diri beterima kasihka pemeri pengidup?

¹⁸ Kitai ulih nunjukka diri beterima kasih ngagai Jehovah, ke Pun semua pengidup. Baka ni kitai ulih ngereja nya? Enggau nyaga pengerai sereta pengelikun kitai sereta meri Jehovah utai ti pemadu manah. (Pem. 4:11) Ke diatu, kitai patut mutarka penyakit sereta penusah ke bukai. Tang tu ukai chara pengidup ti dikedekaka Jehovah ke kitai. Enda lama da agi, Iya deka meri kitai pengidup ti meruan belama iya ke nadai pemedis sereta pemati. (Pem. 21:4) Tang nyentuk ngagai maya nya, kitai semua tentu gaga ati laban ulih terus idup sereta nyembah Apai kitai ti di serega, Jehovah!