1. Kunnasi kabalor kani Jehova i inango tam?

 NONOPAN nga niddan naka na kofummu tu dadana ngem mangini-ngina nga painting—tadday nga obra maestra. Nanguli ngana i kulor natun, namanchan ngana, anna egga i bassi na ira. Ngem maski kunnatun, mangini-ngina lapa yatun nga painting anna minillion nga dolyar i balor na. Siguradu nga appresiammu anna immugurammu yatun nga painting. Niddan gapa ittam ni Jehova tu mangini-ngina nga regalu, i regalu nga inango. Kakurugan na, nipasingan ni Jehova nu kunnasi kabalor ta nisa i inango tam gukaban na pangiyawa na ta Ana na tapenu matavvu ittam.​—Juan 3:16.

2. Gitta na netura ta 2 Corinto 7:1, anni i ekspektan ni Jehova ta nittam?

² Si Jehova i Paggafuan na inango. (Sal. 36:9) Kurugan gapa yatun ni apostol Pablo yari tu kinagi na: “Yaya i mangiyawa ta inango, pagguyu-guyu anna kata-katolay tam.” (King. 17:25, 28) Fustu laman gafu nga kagiattam nga regalu na Dios i inango tam. Meddu nga niyawa na i kawagattam ira tapenu matolay. (King. 14:15-17) Ngem ari nga mammilagro si Jehova tapenu mattalupaddian ittam nga matolay. Ekspektan na lallagu nga kuattam i ngamin tapenu tangngallattam i pisikal anna espiritual nga gawa-gawayyattam. (Bibbigan i 2 Corinto 7:1.) Ngatta mawag tu immugurattam i gawa-gawayyan anna i inango tam, anna kunnasi tam nga kuan yatun?

3. Anni i tadday nga rason nu ngatta ikaya tam nga kanayun ittam nga magawa-gawayyan?

³ I tadday nga rason nu ngatta ikaya tam nga kanayun ittam nga magawa-gawayyan ay tapenu meyawa tam i kapianan ta passerbi tam kani Jehova. (Mar. 12:30) Ikaya tam nga iyawa ta Dios i ‘baggi tam tu kunna matolay nga tavvung, ta passerbi nga masanto anna makapagayayya sa,’ yari tu ari tam nga kuan i gannug ira nga ammu tam nga makadaral ta gawa-gawayyattam. (Roma 12:1) Siempre, maski anni i kuattam, ari tam masiguradu nga kattam vuluvuga mattaki. Ngem kuattam lagapa i makaya tam megafu ta ikaya tam ipasingan ta Yama tam ta langi nga tagibalorattam i regalu na nga inango.

4. Anni i ikaya ni Patul David nga kuan?

⁴ Nipakanawag ni Patul David nu ngatta tagibaloran na i regalu na Dios nga inango. Nitura na: “Nu matay ngà, anni i mapia nga mala mu? Anni i pammakapiam-mu ta ketanam ku? Makapaddaya-rayaw kari nikaw i natay ira? I piam nga ari magimmang ay melammuyag da kari paga?” (Sal. 30:9) Awayya na tu nitura yaw ni David turi ta aranni ngana yayya nga matay. Ngem kayà na talaga i mattalupaddian nga matolay anna magawa-gawayyan adde ta posible tapenu metulu-tuloy na i masserbi kani Jehova. Siguradu nga kunnatun gapa i kayà tam ngamin.

5. Maski nu manakam onu mataki ittam, anni lagapa i makua tam?

⁵ Nu mataki onu manakam ittam ngana, awayya na tu kattam ngana nga makua i aru nga gannug nga dati nga makua tam. Megafu tatun, baka madismaya anna maraddam ittam. Ngem mawag tu kuattam lagapa i adde na mawayya tam tapenu tangngallan i gawa-gawayyattam. Ngatta? Maski gare kunnatun ngana i situasiottam, makapasserbi ittam lagapa kani Jehova kagitta ni Patul David. Talaga makatukkal nga mannammuan nga tagibaloran ittam na Dios maski paga manakam onu mataki ittam! (Mat. 10:29-31) Maski paga nu matay ittam, kanappan na ittam nga paginnolayan. (Job 14:14, 15) Ngem habang matolay ittam, kayà tam nga kuan i ngamin nga mawayya tam tapenu immuguran i gawa-gawayyan anna inango tam.

6. Anni i ekspektan ni Jehova ta nittam nu meyannung ta pakkakan anna paginum?

⁶ Maski paga ari tu libru meyannung ta gawa-gawayyan onu mepangngo nga maka-makan i Biblia, mabibbig tatun nu anni i appana-panono ni Jehova. Angngarigan na, tabarangngan ittam ni Jehova nga ‘iyarayyu tam ta baggi tam i anni laman nga makadaral.’ (Ecl. 11:10) Kagian na Biblia nga mamappeligro ta inango tam i pabbalin tu vutu anna pagillellaw. (Prov. 23:20) Ekspektan ni Jehova nga mapeggan ittam tu pangifugag ta baggi meyannung ta kana-kanan anna inumattam anna nu kunnasi i karu danatun.​—1 Cor. 6:12; 9:25.

7. Kunnasi nga makoffun i tabarang na Proverbio 2:11 tapenu makangngua ittam tu makasta nga desision meyannung ta gawa-gawayyattam?

⁷ Makangngua ittam tu desision ira nga mangipasingan nga tagibalorattam i regalu na Dios nga inango nu usattam i abilidad tam nga mannono. (Sal. 119:99, 100; bibbigan i Proverbio 2:11.) Angngarigan na, piliattam tu mapia nu anni i kanattam. Nu faborito tam i tadday nga makan ngem ammu tam nga mattaki ittam nu kanattam yatun, magga  lillitattam yatun. Mepasingattam gapa nga usu-usattam i abilidad tam nga mannono nu ikagumattam i mapeggan tu makalanno nga katrug, magexercise ittam tu regular, anna mabbalin ittam tu marenu ta baggi anna ta baletam.

8. Base ta Biblia, kunnasi ka-importante kani Jehova i safety tam?

⁸ Niddan ni Jehova i Israelita ira tu dorob nu kunnasi da malillitan i grabe ira nga aksidente ta balay onu ta pattrabahuadda. (Ex. 21:28, 29; Deut. 22:8) Nu aksidente nga nakapatay i tadday nga tolay, egga i madammo nga parusa na. (Deut. 19:4, 5) Kagian na Dob nga egga i parusa na tolay maski nu ari na sadya nga nadisgrasia i ari paga neyana nga beybi. (Ex. 21:22, 23) Manawag gafu ta Katurakan nga ikaya ni Jehova nga sigga-nono ittam ta safety.

9. Anni ira i kuattam tapenu malillitan i disgrasia? (Innan gapa i letratu ira.)

⁹ Mepasingattam nga tagibalorattam i regalu na Dios nga inango nu magimmugug ittam ta balay anna ta pattrabahuan. Angngarigan  na, itabbo tam ta safe nga lugar i mataram ira nga gannug, maka-poison nga kemikal, onu medisina ira. Siguraduattam gapa nga ipay tam i kunnatun ira nga gannug ta lugar nga ari nga magawa na abbing ira. Magimmugug ittam gapa nu mappa-afi ittam, mappalluag tu danum, anna mangusa tu power tools. Ari tam basta-basta panawan danatun. Ari tam gapa mad-drive nu ammu tam nga mafektan i pad-drive tam megafu ta sinuma tam, nakenum ittam, onu kurang i katrug tam. Ari tam gapa mas-cellphone nu mad-drive ittam.

10. Anni i makua tam nige anna durante na situasion ira nga mamappeligro ta inango tam?

¹⁰ Nu karuan, ari tam nga mafugaddan i situasion ira nga mamappeligro ta inango tam, kasali tatun i kalamidad ira, epidemia, anna parralaban. Ngem nu mesimmu i kunnatun, mas mabbalin ittam tu safe nu tuttulattam i curfew anna restriksion ira anna nu magevacuate ittam. (Roma 13:1, 5-7) Egga ira i situasion nga puede tu dati ittam ngana nga mapprepara. Mawag gafu nga tuttulan onu ginnattam i direksion na gobiernu tapenu preparadu ittam. Angngarigan na, makasta nu egga i suplay tam tu danum, ari nga madaral nga makan, anna first-aid kit.

11. Nu egga i mawwara tu makeyali nga taki, anni nakuan i kuattam?

¹¹ Anni i mawag nga kuattam nu egga i makelasig onu makeyali nga taki nga mawwara ta diattam? Mawag tu tuttulattam i direksion na gobiernu, kagitta na pabbaggaw tu lima, social distancing, pam-mask, anna pak-quarantine. Nu kuattam yaw ira nga gannug, mepasingattam i pattagibalor tam ta regalu na Dios nga inango.

12. Kunnasi nga makoffun ta nittam i Proverbio 14:15 ta situasion ira nga mamappeligro ta inango tam?

¹² Durante ta emergency, aru nga ugal nga informasion onu fake news i awayya na nga kagian na kokkofuttam, kakarruba, anna na media. Imbes tu kurugattam i “kada uvovug” nga maginna tam, mawag tu magginna ittam laman ta mapattalakkan nga informasion maggafu ta gobiernu anna ta doktor ira. (Bibbigan i Proverbio 14:15.) Kukukuan na Manangngal nga Baggi anna branch office ira i ngamin tapenu makala tu fustu nga informasion nige nga mangiyawa tu direksion ta pagistudy anna ta pallayyagayya. (Heb. 13:17) Nu tuttulattam yaw ira nga direksion, maprotektattam i baggi tam anna i tanakuan. Mapakasta tam gapa i reputasiottam bilang Saksi ni Jehova ta lugar tam.​—1 Ped. 2:12.

13. Kunnasi tam mepasingan nga tagibalorattam i regalu na Dios nga inango nu meyannung ta isyu na daga?

¹³ Aru i makannammu nga mangurug i Saksi ira ni Jehova nga sagradu i daga. Matuttul tam i dob ni Jehova meyannung ta daga nu ari ittam nga mappatubbo tu daga (blood transfusion) maski paga ta medical emergency. (King. 15:28, 29) Ngem ari na kayà kagian nga ikaya tam i matay. Tagibalorattam i regalu na Dios nga inango, yayya nga mappaduffun ittam ta doktor ira nga sigga-paran nga mangiyawa tu de-kalidad nga serbisiu ngem ari nga mangitubbo tu daga.

14. Anni ira i makua tam tapenu mapakarianan i posibilidad na medical emergency?

¹⁴ Malillitattam gapa i gavva nga mekaru ta hospital nu tangngallattam tu mapia i gawa-gawayyattam gukaban na pangiyaplika ta nagigiammu tam ira taw nga artikulo.  Nu magawa-gawayyan ittam gapa, mas mabi ittam nga mammapia nu angngarigan tu kawagattam i mappa-opera. Malillitattam gapa i emergency nga operasion nu alsattam i makadisgrasia ira ta balay anna ta pattrabahuattam anna nu tuttulattam tu mapia i dorob ta trapiko.

15. (a) Ngatta mawag tu agga-vulu tam i updated nga durable power of attorney? (Innan gapa i letratu.) (b) Base ta video, kunnasi ittam makapaddesision tu mapia meyannung ta daga?

¹⁵ Megafu ta tagibalorattam i regalu nga inango, maf-fill-up ittam tu durable power of attorney (onu, advance health-care directive) anna agga-vulu tam yatun kanayun. b Tatun nga dokumento, nakepay i desisiottam meyannung ta pappatubbo tu daga anna karuan paga nga klase na papporu. Updated kari i DPA mu? Nu kawagammu i maf-fill-up onu i-update yatun, ari mu nakuan itututu. Nu dokumentadu gare i desisiottam ira, ari nga matalattan i papporu tam. Makasiguradu ittam gapa nga ari ittam makalawa tu panguru onu medisina nga mamappeligro ta nittam. c

16. Anni i kuattam nu ari tam ammu nu kunnasi fill-upan i DPA?

 ¹⁶ Maski nu mabbing ittam paga onu magawa-gawayyan, ngamin ittam ay puede nga maaksidente onu mattaki. (Ecl. 9:11) Yari tu pammakapiammu nu egga i DPA mu. Nu ari mu ammu nu kunnasi i maf-fill-up, mappoffukka ta elder nu. Maruddu nga familiar ira ta paf-fill-up tatun. Ngem ari tu ira i maddesision para ta niko. Responsibilidad mu lagapa yatun. (Gal. 6:4, 5) Ngem moffunaddaka tapenu malippawa mu i pappiliammu ira anna metura mu ta dokumento i ikaya mu.

17. Kunnasi tam mepasingan nga rasonable ittam nu meyannung ta gawa-gawayyan?

¹⁷ Ibase tam ta nasanay-Biblia nga konsensia tam i aru ta desisiottam meyannung ta gawa-gawayyan anna papporu. (King. 24:16; 1 Tim. 3:9) Nu maddesision ittam anna nu ipakanawag tam yatun ta tanakuan, makasta nu iyaplika tam i prinsipio ta Filipos 4:5, NW: “Masingan paray na ngamin nga rasonable kamu.” Nu rasonable onu balanse ittam, ari tam pakavurungan tu sobra i pisikal nga gawa-gawayyattam, ni tu ifersa tam ta tanakuan i pagimamma tam. Iddukan anna irespeto tam i wawwaragi tam maski nu neruma i desisiodda ta pinili tam.​—Roma 14:10-12.

18. Kunnasi tam mepasingan i pappabalo tam ta regalu nga inango?

¹⁸ Mepasingattam i pappabalo kani Jehova, i Paggafuan na inango, gukaban na pattangngal tam tu mapia ta inango tam anna pangiyawa tu kapianattam ta nisa. (Nep. 4:11) Sangawe, mawag tu attammattam i taka-taki anna mariga ira nga situasion. Ngem ari tu yaw i pattolay nga ikaya na Namaratu ta nittam. Aranni ngana nga iddan na ittam tu mannanayun nga inango nu sitaw awan ngana tu taki anna patay. (Nep. 21:4) Habang ari paga nga nesimmu yatun, anni mabba i kasta na nga mattolay anna masserbi ta minaggiddu nga Yama tam ta langi nga si Jehova!