1. Kasano kapateg ti biagtayo ken Jehova?

 PANUNOTEM a rinegaluannaka ti gayyemmo iti daanen ngem nakanginngina a painting​—maysa nga obra maestra. Medio agkupkupasen, ken adda mansa ken birrina. Ngem uray no adda dagiti kasta a depektona, minilion a doliar ti presio ti painting. Sigurado nga apresiarem ken protektaram dayta nga obra maestra. Iti umasping a pamay-an, rinegaluannatayo ni Jehova iti nagpateg a sagut, ti sagut a biag. Kinapudnona, impakita ni Jehova nga ipatpategna unay ti biagtayo babaen ti panangtedna iti Anakna kas subbot para kadatayo.​—Juan 3:16.

2. Kas ipakita ti 2 Corinto 7:1, ania ti namnamaen ni Jehova kadatayo?

² Ni Jehova ti Ubbog ti biag. (Sal. 36:9) Binigbig ni apostol Pablo dayta a kinapudno idi imbagana: “Gapu kenkuana, adda biagtayo, makagunay ken addatayo.” (Ara. 17:25, 28) Umiso la ngarud a maibagatayo a ti biagtayo ket regalo ti Dios. Gapu iti ayatna kadatayo, intedna dagiti kasapulantayo tapno agtultuloytayo nga agbiag. (Ara. 14:15-17) Ngem saan a simimilagro a protektaran ni Jehova ti biagtayo. Imbes ketdi, namnamaenna nga aramidentayo ti amin a kabaelantayo tapno maaywanantayo ti pisikal ken naespirituan a salun-attayo. (Basaen ti 2 Corinto 7:1.) Apay a masapul a protektarantayo ti salun-at ken biagtayo, ken kasanotayo a maaramid dayta?

3. Ania ti maysa a rason nga ikagumaantayo ti agtalinaed a nasalun-at?

³ Ti maysa a rason nga ikagumaantayo ti agtalinaed a nasalun-at  ket tapno makapagserbitayo ken Jehova iti amin a kabaelantayo. (Mar. 12:30) Kayattayo nga ipaay ‘ti bagitayo a kas sibibiag a daton, nasantuan ken pakaragsakan ti Dios.’ Ditay ngarud aramiden dagiti ammotayo a mangdangran iti salun-attayo. (Roma 12:1) Siempre, uray no kasano ti panangikagumaantayo, posible latta nga agsakittayo. Ngem ar-aramidentayo ti amin a kabaelantayo tapno maipakitatayo iti nailangitan nga Amatayo nga ap-apresiarentayo ti regalona a biag.

4. Ania idi ti kayat nga aramiden ni Ari David?

⁴ Inlawlawag ni Ari David no apay nga ipatpategna ti biag a regalo ti Dios idi insuratna: “Ania ti pagimbaganna ti ipapatayko, ti iyuulogko iti abut? Maidaydayawnaka kadi ti tapok? Maibagana ngata ti kinamatalekmo?” (Sal. 30:9) Mabalin nga insurat ni David dagita idi dandanin matay. Ngem determinado isuna nga agtalinaed a sibibiag ken nasalun-at agingga a posible tapno maidaydayawna ni Jehova. Sigurado a kasta met ti determinasiontayo amin.

5. Tumataengantayo man wenno agsaksakittayo, ania ti mabalintayo nga aramiden?

⁵ Gapu iti sakit, kinalakay, ken kinabaket, mabalin a ditayon maaramid ti adu kadagiti dati nga ar-aramidentayo, isu a baka maupay ken malidayantayo. Ngem ditay koma pulos sumuksuko ken ditay baybay-an ti salun-attayo. Apay? Gapu ta tumataengantayo man wenno agsaksakittayo, maidaydayawtayo latta ni Jehova kas iti inaramid ni Ari David. Talaga a makaparagsak a maammuan nga ipatpategnatayo ti Diostayo uray no imperpektotayo! (Mat. 10:29-31) Uray mataytayo, magagaran a mangpagungar kadatayo. (Job 14:14, 15) Bayat a sibibiagtayo, kayattayo nga ikagumaan a protektaran ti salun-at ken biagtayo.

6. Ania ti ekspektaren ni Jehova kadatayo no iti pannangan ken panaginum?

⁶ Ti Biblia ket saan a libro maipapan iti panangaywan iti salun-at wenno maipapan iti umiso a kanen ken inumen. Ngem ibagana ti panagpampanunot ni Jehova kadagita a banag. Kas pagarigan, ibalbalakadna nga ‘adaywantayo ti makadangran a bambanag’ a mamagpeggad iti bagitayo. (Ecl. 11:10) Ibaga ti Biblia a liklikantayo ti kinarawet ken panagbarbartek. Makadangran dagita iti salun-at ken pakatayantayo pay ketdi. (Prov. 23:20) Ekspektaren ni Jehova nga agteppeltayo no ania ken no kasano kaadu ti kanen ken inumentayo.​—1 Cor. 6:12; 9:25.

7. Kasano a makatulong ti balakad ti Proverbio 2:11 tapno makaaramidtayo kadagiti nasayaat a desision maipapan iti salun-attayo?

⁷ Makaaramidtayo kadagiti desision a mangipakita nga ap-apresiarentayo unay ti biag a regalo ti Dios no usarentayo ti abilidadtayo nga agpanunot. (Sal. 119:99, 100; basaen ti Proverbio 2:11.) Kas pagarigan, panunotentayo ti kanentayo. No adda paboritotayo a makan ngem ammotayo a pagsakitennatayo, usarentayo ti sentido komontayo ket ditay kanen dayta. Mapaneknekantayo met a nasimbeng ti panunottayo no umdas ti turogtayo, regular nga agehersisiotayo, ken pagtalinaedentayo a nadalus ti bagi ken ti balaytayo.

8. Ania ti isuro ti Biblia a mangipakita a napateg ken Jehova ti kinatalgedtayo?

⁸ Nangted ni Jehova iti Linteg iti nasion ti Israel. Karaman iti dayta dagiti pagannurotan a makatulong tapno malapdan dagiti nakaro nga aksidente iti balay ken pagtrabahuan. (Ex. 21:28, 29; Deut. 22:8) Nadagsen ti dusa  dagidiay aksidente a nakapatay. (Deut. 19:4, 5) Sigun iti Linteg, uray dagidiay aksidente a nakadangran iti sikog ket madusa. (Ex. 21:22, 23) Nalawag nga ipakita ti Kasuratan a kayat ni Jehova a kanayon a sipapanunottayo iti kinatalged.

9. Ania dagiti mabalintayo nga aramiden tapno maliklikantayo dagiti aksidente? (Kitaen met dagiti ladawan.)

⁹ Ipakpakitatayo nga ap-apresiarentayo ti biag a regalo ti Dios no ikagumaantayo ti agtalinaed a natalged iti balay ken pagtrabahuantayo. Kas pagarigan, no ibellengtayo dagiti natadem a banag, makasabidong a kemikal, wenno agas, aramidentayo dagita iti natalged a pamay-an, ken siguraduentayo a saan a makita dagita dagiti ubbing. Agan-annadtayo met no adda sindiantayo, ipaburektayo, ken no usarentayo dagiti dekoriente wenno debateria a remienta wenno tools, ken ditay baybay-an dagita. Saantayo met nga agmaneho no nakainumtayo, no napuyat wenno kurang ti turogtayo, wenno no nagtomartayo iti agas a mamagpeggad iti panagmanehotayo, ken ditay ipalubos a masingatayo babaen ti panagusar iti handheld device wenno gadyet bayat nga agmanmanehotayo.

10. Ania dagiti mabalintayo nga aramiden sakbay ken bayat ti maysa a kalamidad a mamagpeggad iti biag?

¹⁰ No dadduma, mabalin a ditay malapdan dagiti pasamak a mamagpeggad iti biag, nangruna no adda dagiti natural a didigra, epidemia, ken naranggas a panaglalaban. Ngem no adda dagiti kasta a kalamidad, maliklikantayo dagiti peggad ken masalbar ti biagtayo no agtulnogtayo kadagiti curfew, bilin nga agbakuit, ken restriksion no adda emerhensia. (Roma 13:1, 5-7) Mabalin a masaganaantayo ti dadduma a peggad, isu a nasayaat no surotentayo ti aniaman nga instruksion dagiti autoridad iti lugartayo a makatulong iti panagsaganatayo. Kas pagarigan, baka makatulong no addaantayo iti suplay a danum, makan a saan a nalaka a madadael, ken first aid kit.

11. Ania ti masapul a situtulok nga aramidentayo no adda agwarwaras a makaakar a sakit iti lugartayo?

¹¹ Ania ti masapul a situtulok nga aramidentayo no adda agwarwaras a makaakar a sakit iti lugartayo? Masapul nga agtulnogtayo kadagiti instruksion dagiti autoridad, kas iti panagbuggo iti ima, social distancing, panag-mask, ken panagkuarentinas. No aramidentayo dagita, ipakpakitatayo nga ap-apresiarentayo unay ti biag a regalo ti Dios.

12. Kasano a makatulong ti prinsipio ti Proverbio 14:15 tapno agbalintayo a napili no maipapan kadagiti impormasion nga agwarwaras bayat ti maysa a kalamidad?

¹² Bayat dagiti emerhensia, mabalin a makangngegtayo kadagiti di umiso nga impormasion manipud kadagiti gagayyem, kaarruba, ken media. Imbes a patientayo ti “tunggal sao” a mangngegtayo, nasayaat no dagiti umiso nga impormasion nga aggapu iti gobierno ken kadagiti doktor ti denggentayo. (Basaen ti Proverbio 14:15.) Ikagkagumaan ti Bagi a Manarawidwid ken dagiti sanga nga opisina ti makaala kadagiti umiso nga impormasion sakbay a mangtedda kadagiti instruksion maipapan kadagiti gimong ti kongregasion ken panangasaba. (Heb. 13:17) No surotentayo dagita, protprotektarantayo ti bagitayo ken ti sabsabali. Mapasayaattayo met ti reputasion ti kongregasion iti lugartayo.​—1 Ped. 2:12.

13. Kasanotayo nga ipakita nga ipatpategtayo ti biag a regalo ti Dios no adda isyu maipapan iti dara?

¹³ Agdindinamag dagiti Saksi ni Jehova gapu ta raraemenda ti kinasagrado ti dara. Agtultulnogtayo iti linteg ni Jehova maipapan iti dara no saantayo nga agpayalison iti dara uray adda medikal nga emerhensia. (Ara. 15:28, 29) Ngem dina kayat a sawen dayta a kayattayo ti matay. Imbes ketdi, ipatpategtayo ti biag a regalo ti Dios. Agpatulongtayo kadagiti propesional iti medisina a situtulok a mangipaay iti dekalidad a panangagas a saan a mangyalison iti dara.

14. Kasanotayo a maliklikan ti dumalan iti komplikado nga operasion wenno panangagas?

¹⁴ Maliklikantayo ti dumalan iti komplikado nga operasion wenno panangagas no surotentayo dagiti suhestion maipapan iti salun-at a nadakamaten iti daytoy nga artikulo. No nasalsalun-attayo, nalaklakatayo nga umimbag no masapul a maoperatayo. Maliklikantayo met ti bigla a maoperaan no ikkatentayo dagiti makaaksidente iti balay ken pagtrabahuantayo ken no agtulnogtayo kadagiti linteg-trapiko.

15. (a) Apay a masapul a kanayon nga itugottayo ti kabaruan a durable power of attorney? (Kitaen met ti ladawan.) (b) Kas naipakita iti video, kasanotayo a makaaramid iti desision a naibatay iti pannakaammotayo maipapan iti medikal a pannakausar ti dara?

¹⁵ Gapu ta ipatpategtayo ti regalo a biag, masapul nga i-fill out-tayo ti durable power  of attorney (advance health-care directive) ken kanayon nga itugottayo dayta. b Makita iti daytoy a dokumento dagiti desisiontayo maipapan iti panangyalison iti dara ken iti dadduma a medikal a panangagas. Ti kadi kabaruan a durable power of attorney ti itugtugotmo? No kasapulam nga i-fill out wenno i-update, dimo itantantan. Gapu ta nalawag nga ipakpakaammotayo dagiti desisiontayo iti daytoy a dokumento, maliklikan dagiti mabalin a mangibayag iti pannakaagastayo. Matulongantayo met dagiti mangas-asikaso iti salun-attayo a mangliklik iti aniaman a di panagkikinnaawatan a posible a makadangran kadatayo. c

16. Ania ti aramidentayo no saantayo a sigurado no kasano nga i-fill out ti durable power of attorney?

¹⁶ Uray no kasano kaubing wenno kasalun-attayo, posible nga amintayo ket maaksidente ken agsakit. (Ecl. 9:11) Talaga a nainsiriban ngarud ti ag-fill out iti durable power of attorney. No saanmo a sigurado no kasano nga i-fill out dayta a dokumento, agpatulongka kadagiti panglakayen iti kongregasionyo. Ikagkagumaanda ti agbalin a pamiliar no kasano nga  i-fill out dayta a dokumento. Ngem saandaka nga idesisionan maipapan iti panagpaagasmo. Responsabilidadmo dayta. (Gal. 6:4, 5) Nupay kasta, matulongandaka tapno maawatam dagiti opsion ken tapno maisuratmo dagiti desisionmo.

17. Kasanotayo a maipakita a nainkalintegantayo no maipapan iti salun-attayo?

¹⁷ Ti konsiensiatayo a sinanay ti Biblia ti pangibatbatayantayo iti adu a desisiontayo maipapan iti salun-at ken pannakaagastayo. (Ara. 24:16; 1 Tim. 3:9) No agaramidtayo kadagiti desision ken ibagatayo dagita iti dadduma, nasayaat no iyaplikartayo ti prinsipio iti Filipos 4:5: “Maammuan koma ti amin a tattao a nainkalintegankayo.” No nainkalintegantayo, saan a sobra ti pannakaseknantayo iti salun-attayo; wenno saantayo met nga ipilit iti dadduma ti opiniontayo. Ay-ayaten ken raraementayo dagiti kakabsat, uray no naiduma kadatayo dagiti desisionda.​—Roma 14:10-12.

18. Kasanotayo a maipakita nga agyamyamantayo gapu iti regalo a biag?

¹⁸ Maipakitatayo nga agyamyamantayo ken Jehova, ti Ubbog ti biag, no saluadantayo ti biagtayo ken ipaaytayo kenkuana ti kasayaatantayo. (Apoc. 4:11) Ita, masapul pay laeng nga ibturantayo dagiti sakit ken kalamidad. Ngem saan a dayta a klase ti biag ti kayat ti Namarsua para kadatayo. Asidegen nga ipaayannatayo iti agnanayon a biag nga awanan iti ut-ot ken ipapatay. (Apoc. 21:4) Kabayatanna, makaparagsak ta sibibiag ken agserserbitayo iti nadungngo a nailangitan nga Amatayo a ni Jehova!