1. A umoch wi laif wot tu Jeuova?

 JOS TINGK bout sitn we sumadi jraa an pient we de bout fram lang taim an it wot wol iip a moni an yu fren gi yu it. Aalduo it de bout fram lang taim an it mait no luk so nyuu agen, it stil a-go wot nof tu yu, no chuu? An dat miin se yu a-go tek kier a it tu. A siem so di laif we Jeuova gi wi wot nof. An wen wi si se im sen im wan dege-dege bwai pikni fi kom ded fi wi, it mek wi si se wi laif wot nof tu im.​—Jan 3:16.

2. Azkaadn tu 2 Korintiyan 7:1, wa Jeuova waahn wi fi du?

² A Jeuova gi wi laif. (Sa. 36:9) Di apasl Paal did mek wi nuo dat wen im did se: “A im mek wi, gi wi laif, an mek wi kyan muuv bout.” (Aks 17:25, 28) So wi si wa mek wi se di laif we wi av a wan prezent fram Jeuova. So wi si se kaa im lov wi im gi wi evriting we wi niid fi gwaan liv. (Aks 14:15-17) A no laik se Gad git op a wok mirikl evridie so dat wi no ded. Bot im waahn wi fi du evriting we wi kyan du fi kip wi main an wi badi kliin. (Riid 2 Korintiyan 7:1.) Wa mek wi fi du evriting we wi kyan du fi tek kier a laif we Gad gi wi, an ou wi kyan du dat?

3. Wa a wan riizn wa mek wi fi tek kier a wi badi?

³ Wan a di riizn wa mek wi fi tek kier a wi badi a kaa wi waahn fi du evriting we wi kyan du fi sorv Jeuova. (Maak 12:30) Wi waahn fi gi op wi “laif tu Gad laik wan sakrifais​—wan sakrifais we alaiv, we de de fi sorv Gad an we Gad kyan api wid,” so wi naa go du notn we wi nuo  a-go mash op wi badi. (Ruo. 12:1) Aalduo wi kyaahn tap wiself fram get sik, wi waahn fi du evriting we wi kyan du fi mek Jeuova si se wi tangk im fi di laif we im gi wi.

4. A wa Dievid did waahn fi du?

⁴ Di king we did niem Dievid did mek wi si umoch im tangk Jeuova fi di laif we Im gi im wen im se: “Wa gud it a-go du nobadi ef mi ded, ar ef mi go dong iina di griev? Di dot kyaahn big yu op, no chuu? It kyaahn mek piipl nuo se dem kyan chos iina yu, duont it?” (Sa. 30:9) Aalduo a mait-a wen im did nier fi ded im did se dis, Dievid did mek op im main fi du aal a we im kyan du fi tek kier a imself so dat im kuda gwaan big op Jeuova. An wi nuo se a dat aal a wi waahn fi du tu.

5. Aal ef wi sik ar op iina iej, wa wi kyan stil du?

⁵ Wen yu sik ar yu op iina iej, yu mait-a fiil laik yu kyaahn bada no muor kaa yu kyaahn du di sitn dem we yu yuus tu du. Bot wi no fi tap du wa wi kyan du fi tek kier a wi badi. Kaa no mata ou uol ar sik wi mait-a bi wi stil kyan du sitn fi big op Jeuova jos laka Dievid. It nais fi nuo se aalduo wi no porfek wi stil wot nof tu Jeuova! (Mat. 10:29-31) Aal ef wi ded im stil wel waahn fi mek wi kom bak alaiv. (Juob 14:14, 15) So wa wi waahn fi du ya nou a fi du evriting we wi kyan du fi tek kier a wiself.

6. Wen it kom aan tu wa wi nyam an umoch wi iit an jringk, wa Jeuova waahn wi fi du?

⁶ Aalduo di Baibl a no a wan dakta buk we tel wi ou fi tek kier a wi badi, it mek wi nuo ou Jeuova fiil bout sortn tingz we wi mait-a du we kyan mash op wi badi. Kaa it mek wi nuo se wi fi kip we fram eniting we kyan mash op wi badi. (Iik. 11:10) Laik di Baibl tel wi se wi no fi nyam tu moch ar jringk til wi jongk. (Pr. 23:20) Wen it kom aan tu wa wi a-go nyam an umoch wi a-go nyam an jringk, Jeuova waahn wi fi kanchuol wiself.​—1 Kor. 6:12; 9:25.

7. Ou wa Pravorbz 2:11 se kyan elp wi fi tek kier a wi badi?

⁷ Di wie ou wi tingk bout tingz a-go elp wi fi du tingz fi shuo Jeuova se wi tangk im fi di laif we im gi wi. (Sa. 119:99, 100; riid Pravorbz 2:11.) Supuoz yu lov fi iit sitn bot yu nuo se wen yu iit it it a-go mek yu sik, yu naa go iit it, no chuu? Kaa yu av sens! Wan neda wie ou wi shuo se wi a tingk bout tingz iina di rait wie a wen wi go a wi bed a nait taim, an mek shuor se wi eksasaiz, an wi fi mek shuor se wi aalwiez a du tingz fi kip wi badi an wi yaad kliin.

8. Ou di Baibl mek wi nuo se Jeuova waahn wi fi du tingz iina wan sief wie?

⁸ Di Laa we Jeuova did gi di Izrelait piipl dem did elp dem fi kip sief wen dem did de a dem yaad an wen dem de a wok. (Ek. 21:28, 29; Dyuu. 22:8) Ef wan aksident apm an sumadi en op kil sumadi, it naa go dis go so. Im stil wuda afi pie fi it. (Dyuu. 19:4, 5) So azkaadn tu di Laa dem taim de, ef wan man ort wan pikni we no baan yet, iivn ef im neehn plan fi du it, im wuda afi pie fi it. (Ek. 21:22, 23) So di Baibl mek it klier klier se Jeuova waahn wi fi aalwiez a luk out fi ou wi kyan du tingz iina wan sief wie.

9. Wa a som sitn we wi kyan du fi mek shuor se wi no av no aksident? (Luk pan di picha dem tu.)

 ⁹ Wi kyan shuo Jeuova se wi tangk im fi di laif we im gi wi wen wi du tingz iina wan sief wie wen wi de a wok an wen wi de a wi yaad. Si som sitn ya we yu fi du iina wan sief wie: Wen wi a dash we eniting we shaap we kyan kot sumadi, wi fi dash it we iina wan wie so dat it kyaahn kot nobadi. An tingz we wi yuuz fi kliin an du ada tingz we kyan paizn an ort piipl, wi fi put dem op iina wan sief wie. An wi fi mek shuor se wi put op wi medikieshan dem iina wan sief wie tu. So wi fi mek shuor se no likl pikni kyaahn get fi chobl dem sitn ya. An wen wi a diil wid faiya ar sitn we at laik at waata an dem ting de, ar ef wi a yuuz no tuul laik jril ar dem sitn de we yu afi plog iin, wi no fi lef dem kielis. An ef yu waahn fi sliip, ar ef yu tek medikieshan we mek yu fiil taiyad, ar ef yu jrink lika, yu no fi jraiv. An wi no fi av no fuon nar notn laik dat iina wi an wen wi a jraiv niida.

10. Bifuo som bad sitn apm ar wen dem a gwaan, wa wi kyan du fi chrai kip sief?

¹⁰ Som a di taim wi kyaahn tap som bad sitn fram apm, laik orikien an dem ting de an siknis we a go roun, an wi kyaahn mek piipl no fait gens dem wan aneda. Bot wen dem sitn ya apm, it kyan elp wi fi go chuu wen wi du wa di govament se. Laik wen dem se dem a av korfyuu, wi fi go iin wen dem se wi fi go iin. An ef dem se wi fi muuv fram wich paat wi liv kaa wan orikien ar sitn laka dat a kom, wi fi muuv an du eniting els we dem se wi fi du. (Ruo. 13:1, 5-7) Wen som a dem sitn ya a-go apm, laik orikien an dem ting de, wi kyan nuo fram bifuo so wi fi du wa wi kyan du fi get redi fi dem. Laik wi kyan mek shuor wi ful op som waata an get som fuud we yu no afi kip iina di frij, an get medisn an ban-died an dem ting de.

11. Wen wan bad diziiz a go roun an di govament tel wi wa fi du, wa wi fi du?

¹¹ Ef wan bad diziiz a go roun wich paat wi liv, wi fi du wa di govament se wi fi du. Laik wen dem tel wi se wi fi wash wi an dem aafn, an wen wi de roun piipl wi no fi tan op tuu nier tu dem, an wi fi wier wi maas, an ef wi sik wi fi kip we fram piipl​—wi fi du wa dem se wi fi du. Wen wi chrai aad fi du dem sitn ya, wi a shuo Gad se wi tangk im fi di laif we im gi wi.

12. Ou wa Pravorbz 14:15 se kyan elp wi wen sitn bad apm an piipl staat fi se aal saat a sitn?

¹² Wen sitn bad apm we piipl neehn a ekspek fi apm, a dem taim de piipl staat fi se aal kain-a sitn bout it we no go so, an it pred evriwe. Bot di Baibl mek wi nuo se wi no fi “biliiv evriting we piipl se,” bot wa wi fi du a lisn tu wa di govament dem an wa di dakta dem a se we nuo bout dem sitn de. (Riid Pravorbz 14:15.) An bifuo di Govanin Badi an di breda dem we de a di branch afis dem tel wi wa fi du wen it kom aan tu wi miitn dem an wi priichin wok, dem mek shuor dem go fain out bout it so dat dem nuo wa dem a se. (Iib. 13:17) Wen wi du wa di govament an di breda dem se wi fi du, it wi du wi an ada piipl gud. An it wi mek di piipl dem we liv roun wi si se a gud sitn wi a du, an it wi mek dem staat fi luk pan di breda an sista dem iina di kanggrigieshan difrant.​—1 Pii. 2:12.

13. Wen it kom aan tu blod, ou wi shuo se wi lov di laif we Gad gi wi?

¹³ Uol iip a piipl nuo se di Jeuova Witnis dem siiros bout blod. So ef sitn apm an di dakta dem se dem afi tek blod, dem a-go du wa Jeuova se dem fi du so dem naa go tek di blod. (Aks 15:28, 29) Bot dat no miin se wi waahn fi ded. Wi lov di laif we Gad gi wi so wi chrai fi fain som gud dakta we wi wok pan wi an no gi wi blod.

14. Wa a som a di sitn dem wi fi du we mait-a kyan elp wi fi no du no big aparieshan an dem ting de?

¹⁴ Wen wi du di sitn dem we wi did taak bout iina da lesn ya, it wi mek wi no afi go du som kain-a aparieshan an ada tingz. An ef wi afi go du wan aparieshan, wi badi a-go kyan diil wid it beta. An ef wi mek shuor se wi no lef out tingz kielis a wi yaad ar wich paat wi wok we kyan ort piipl, an ef wi fala di laa dem wen wi de pan di ruod, it a-go elp fi kip wi sief.

15. (a) Wa mek di “durable power of attorney” kyaad we wi av no fi uol? (Luk pan di picha tu.) (b) Azkaadn tu di vidiyo, wen wi a mek op wi main bout blod an ada dakta chriitment, wa wi fi du?

 ¹⁵ Kaa wi lov di laif we Gad gi wi, wi a-go rait op wan kyaad we niem “durable power of attorney” (advance health-care directive) kyaad, an wi a-go mek shuor se wi aalwiez av it wid wi. b Da kyaad ya a-go mek di dakta dem nuo di kain-a dakta chriitment we wi waahn an we wi no waahn, an se wi naa go tek di blod. So ef yu fain se yu na’av non ar di wan we yu av uol, no bada wiet, jos go rait op wan. Wen yu rait wa yu waahn fi apm tu yu iina it, it a-go mek di dakta dem nuo kwik kwik di kain-a chriitment we yu waahn an we yu no waahn. An it wi elp di dakta dem an di ada wan dem we wok wid dem fi no du ar gi yu sitn we mait-a ort yu. c

16. Wa wi kyan du ef wi no nuo ou fi rait op wi “durable power of attorney” kyaad?

¹⁶ No mata ou yong ar aati wi bi, aal a wi kyan get sik an aal a wi kyan en op iina  aksident tu. (Iik. 9:11) So it mek sens fi rait op wi “durable power of attorney” kyaad. An ef yu no nuo ou fi rait it op, yu kyan aks wan a yu elda dem fi elp yu. Dem chrai fi mek shuor se dem nuo ou fi rait op da kyaad ya, bot dem naa go tel yu di kain-a dakta chriitment yu fi tek an wa yu no fi tek. A yu fi du dat fi yuself.​—Gya. 6:4, 5.

17. Wen it kom aan tu di kain-a chriitment dem we wi wi tek, ou wi kyan shuo se wi a tek wi taim wid wiself an ada piipl?

¹⁷ Wi fi mek shuor se di kain-a chriitment we wi tek wen wi sik naa go bada wi kanchens bies pan wa wi nuo se di Baibl se. (Aks 24:16; 1 Tim. 3:9) Wen wi a mek op wi main bout wa wi fi du an wi a taak tu ada piipl bout it, wi fi du wa Filipiyan 4:5 tel wi fi du. It se wi fi “liv iina wan wie so dat evribadi kyan si se [wi] tek taim wid ada piipl.” So dat miin tu se wi naa go du evri an eniting fi mek shuor se wi no get sik ar wi no ded; an wi naa go fuos ada piipl fi fiil laik ou wi fiil bot dem sitn de. An iivn ef wi breda an sista dem du sitn difrant fram wa wi wuda du, wi a-go stil lov an rispek dem.​—Ruo. 14:10-12.

18. Wa wi kyan du fi mek Jeuova si se wi tangk im fi di laif we im gi wi?

¹⁸ Kaa wi nuo se a Jeuova mek wi an wi tangk im fi du dat, wi fi du evriting we wi kyan du fi mek im si se wi tangk im fi di laif we im gi wi. Wi fi du evriting we wi kyan du fi tek kier a it. (Rev. 4:11) Ye, wi nuo se rait ya nou ya wi a-go sik an bad sitn a-go apm tu wi. Bot a no dat Jeuova did waahn fi wi. So suun suun im a-go mek wi na’av no muor pien an wi naa go eva ded agen. (Rev. 21:4) Bot rait ya nou ya, wi api se wi alaiv an kyan gwaan sorv Jeuova!