1. Kal ki é valor di nos vida pa Jeová?

 IMAJINA ma un amigu da-u un kuadru txeu antigu, má ki ten txeu valor. El sta diskoradu, el tene alguns mantxa i el sta ratxadu. Má sikrê ku kes difeitu li, kel kuadru bale txeu dinheru. Di sertéza, bu ta da valor i bu ta proteje kel kuadru li. Di mésmu manera, Jeová da-nu un prezenti ki ten txeu valor, ki é vida. Na verdadi Jeová mostra modi ki nos vida ten txeu valor pa el, kantu el da se Fidju pa móre pa nos. — João 3:16.

2. Sima sta na 2 Coríntios 7:1, kuzê ki Jeová ta spéra di nos?

² Jeová é Fonti di vida. (Sal. 36:9) Apóstlu Paulu tanbê ta kriditaba na kel-li, i el fla: ‘Através di el nu ten vida, nu ta mexe i nu ta izisti’. (Atos 17:25, 28) Nton, nu pode fla ma nos vida é un prezenti di Deus. El ta da-nu ku amor kes kuza ki nu meste, asi pa nu kontinua ta vive. (Atos 14:15-17) Má Jeová ka ta faze milagri pa proteje nos vida. Envês di kel-li, el ta spéra ma nu ta kuida di nos saúdi i di nos amizadi ku el di midjór manera ki nu pode. (Lé 2 Coríntios 7:1.) Pamodi ki nu debe proteje nos saúdi i nos vida i modi ki nu pode faze kel-li?

3. Kal ki é un di kes motivu pa nu tenta ten un bon saúdi?

³ Un di kes motivu pa nu tenta ten un bon saúdi, é pamodi asi nu ta konsigi da Jeová nos midjór. (Mar. 12:30) Nu krê aprizenta nos ‘korpu sima un sakrifisiu bibu, santu i ki Deus ta seta’. Pur isu, nu ta ivita faze kuzas ki nu sabe ma ta prujudika nos saúdi. (Rom. 12:1) Ten txeu kuza ki nu pode faze pa nu ten un  bon saúdi. Má, nu ta faze kel ki nu pode pamodi nu krê mostra nos Pai ki sta na séu, ma nu ta da valor pa vida, ki é un prezenti.

4. Kuzê ki rei Davidi krê fazeba?

⁴ Rei Davidi splika pamodi ki el ta daba valor pa vida, ki é prezenti di Deus, kantu el skrebe: ‘Kuzê ki ta ganhadu ku nha mórti, si N dixi pa kóba? Puera di téra ta lova-u? El ta fla ma bo é fiel?’ (Sal. 30:9) Davidi talvês skrebe kes palavra li kantu el staba kuazi ta móre. Má el staba disididu na kontinua bibu i pa ténpu ki el ta podeba, asi pa el kontinuaba ta lova Jeová. Di sertéza nos tudu nu krê faze mésmu kuza.

5. Kuzê ki nu pode faze, ka ta nporta nos idadi ô duénsa ki nu ten?

⁵ Duénsa ku bedjisa pode inpidi-nu di faze txeu kuza ki nu ta fazeba antis. I pamodi kel-li nu pode fika dizanimadu i tristi. Má simé, nu debe tenta faze nos midjór pa kuida di nos saúdi. Pamodi ki nu debe faze kel-li? Pamodi ka ta nporta nos idadi ô duénsa ki nu ten, nu pode lova Jeová sima Davidi faze. Nu ta xinti konsoladu di sabe ma Jeová ta da-nu valor, sikrê nos é inperfeitu. (Mat. 10:29-31) Sikrê nu móre, el ta tene gana di resusita-nu. (Jó 14:14, 15) Nton, timenti nu sta bibu, nu krê faze kuzê ki nu ta pode pa proteje nos saúdi i nos vida.

6. Na asuntu di kumida i bebida, kuzê ki Jeová ta spéra di nos?

⁶ Nbóra Bíblia é ka un livru di saúdi ô di diéta, el ta fla-nu kuzê ki Jeová ta pensa sobri kes kuza li. Pur izénplu, el ta fla pa nu fika lonji di kuzas mariadu ki pode prujudika nos korpu. (Ecl. 11:10) Bíblia ta fla ma nu ka debe kume dimás ô toma bebida alkólika dimás. Kes kuza li ta prujudika nos saúdi i pode ti mata-nu. (Pro. 23:20) Jeová ta spéra ma nu ta kontrola nos kabésa óras ki nu ta disidi kuzê ki nu ta kume i kuzê ki nu ta bebe. Tanbê, el ta spéra pa nu faze kel-li óras ki nu ta disidi kantu kumida ki nu ta kume i kantu bebida ki nu ta bebe. — 1 Cor. 6:12; 9:25.

7. Modi ki kel konsedju ki sta na Provérbios 2:11 ta djuda-nu toma bons disizon sobri nos saúdi?

⁷ Nu pode uza nos kapasidadi di pensa pa toma disizons ki ta mostra ma nu ta da valor pa prezenti di vida ki Deus da-nu. (Sal. 119:99, 100; lé Provérbios 2:11.) Pur izénplu, nu ta pensa ku kuidadu na kuzê ki nu ta kume. Si nu gosta di un kumida, má nu sabe ma el ta prujudika-nu, nu ta uza sabedoria i nu ka ta kume-l. Tanbê, nu ta mostra sabedoria óras ki nu ta durmi kel ki nos korpu meste, nu ta faze izersísiu sénpri i nu ta mante nos korpu i nos kaza linpu.

8. Modi ki Bíblia ta mostra ma nos suguransa é inportanti pa Jeová?

⁸ Jeová da israelitas leis sobri modi ki es pode ivitaba ten asidentis gravi na kaza ô óras ki es ta trabadjaba. (Êxo. 21:28, 29; Deut. 22:8) Si un algen mataba un otu algen sen el krê, el ta resebeba un kastigu duru. (Deut. 19:4, 5) Lei tanbê ta flaba ma ti si un algen prujudikaba un mininu ki inda  ka naseba, el ta sérba kastigadu. (Êxo. 21:22, 23) Skrituras ta dexa klaru ma Jeová krê pa nu faze nos midjór pa ivita asidentis.

9. Kuzê ki nu pode faze pa nu ivita asidentis? (Odja fotus.)

⁹ Nu ta mostra ma nu ta da valor pa prezenti ki Deus da-nu, óras ki nu ta tenta ten suguransa na kaza i na trabadju. Pur izénplu, nu ta guarda kuzas ki ta korta algen faxi, kes produtu ki ta prujudika algen i ramedi na un lugar suguru ki mininu pikinoti ka ta panha-s. I nu ka ta ba faze otus kuza timenti nu tene lumi sendedu, agu ta ferbe ô nu sta uza feraméntas ki ta liga na lus. Nu ka ta konduzi si nu sta ta toma ramedi ki pode prujudika nos kapasidadi di konduzi. Tanbê, nu ka ta konduzi si nu toma bebida alkólika ki ka ta dexa-nu konduzi di manera suguru, ô si nu sta kansadu dimás pa konduzi. Tanbê, nu ka debe uza telemóvel timenti nu sta ta konduzi.

10. Kuzê ki nu pode faze antis i duránti un disgrasa pa djuda-nu skapa ku vida?

¹⁰ Alvês nu ka ta konsigi ivita kuzas ki ta poi nos vida na prigu. É difísil faze kel-li, prinsipalmenti óras ki kontise un dizastri na naturéza, un duénsa ki ta spadja i un géra. Óras ki kes kuza li ta kontise, si nu obi ku órdi di govérnu di sai di kel lugar i ku otus órdi ki es ta da, nu ta ten más xansi di fika suguru i skapa ku vida. (Rom. 13:1, 5-7) Ta da pa pripara pa alguns imerjénsia. Pur isu, nu debe obi ku kes orientason di govérnu pa djuda-nu sta priparadu. Pur izénplu, tene kumida ki ka ta straga faxi, agu i un bólsa ku kuzas pa un imerjénsia ta djuda txeu.

11. Kuzê ki nu debe faze si un duénsa ki ta pega sta ta spadja na undi ki nu ta mora?

¹¹ Kuzê ki nu debe faze si un duénsa ki ta pega sta ta spadja na undi ki nu ta mora? Nu debe obi ku orientason di govérnu, sima laba mô, ka fika pértu di otus algen, uza maskra i fika di korenténa. Óras ki nu ta faze kes kuza li, nu ta mostra ma nu ta da txeu valor pa prezenti di vida ki Deus da-nu.

12. Modi ki Provérbios 14:15 ta djuda-nu disidi ki informason ki nu ta obi duránti un disgrasa?

¹² Óras ki kontise un disgrasa, alvês nu ta obi amigus ô vizinhus ta fla algun kuza ki é ka verdadi ô ti notísia ki é ka izatu. Envês di kridita na ‘tudu palavra’ ki nu ta obi, nu debe obi kes informason más izatu ki ta ben di govérnu i di kes dotor. (Lé Provérbios 14:15.) Grupu Enkaregadu di Óbra i filial ta faze tudu kel ki es pode pa es ten informason izatu antis di da-nu orientason sobri modi ki nu ta faze runion i pregason. (Heb. 13:17) Óras ki nu ta sigi kes orientason li, nu ta proteje nos kabésa i otus algen di kuzas mariadu ki pode kontise. Tanbê nu pode djuda otus algen ten bon ideia sobri Tistimunhas di Jeová. — 1 Ped. 2:12.

13. Modi ki nu ta mostra ma nu ta da vida valor óras ki nu ta obi ku lei di Jeová sobri sangi?

¹³ Txeu algen sabe ma Tistimunhas di Jeová ta kridita ma sangi é sagradu. Nu ta obi ku lei di Jeová sobri sangi óras ki nu ka ta seta transfuzon di sangi, sikrê kontise un imerjénsia di saúdi. (Atos 15:28, 29) Má kel-li ka krê fla ma nu krê móre. Nu ta da valor pa prezenti di vida ki Deus da-nu. Nu ta djobe ajuda di kes dotor ki ta da-nu bon tratamentu, ki ka ta nvolve transfuzon di sangi.

14. Kuzê ki nu pode faze pa nu ten ménus xansi di meste faze un tratamentu di un prubléma gravi di saúdi?

¹⁴ Si nu faze kes kuza ki dja nu pâpia di el na kel studu li pa kuida di nos saúdi, talvês nu ka meste faze un operason ô otu tratamentu pa un prubléma gravi di saúdi. Si nu kontinua ku bon saúdi, nu ta rekupera más faxi óras ki nu meste faze un operason. Si nu kontinua ku suguransa na nos kaza i na nos lugar di trabadju, i nu ta obi ku kes lei sobri modi ki ta konduzidu, nu pode ten ménus xansi di meste faze un operason.

15. (a) Pamodi ki é inportanti tene nos karton atualizadu i djuntu ku nos? (Odja fotus.) (b) Sima sta na vídiu, modi ki nu pode toma disizons sobri uza sangi na tratamentus di saúdi?

¹⁵ Pamodi nu ta da valor pa prezenti  di vida, nu ta prenxe un karton sobri tratamentus di saúdi i nu ta tene-l sénpri ku nos. b Na kel karton li, nu ta mostra nos dizeju di ka toma sangi i alguns tratamentu ki nu ta seta ô nau. Bu karton sta atualizadu? Si bu meste prenxe ô atualiza bu karton, faze-l gósi. Dexa nos dizeju skrebedu ta djuda-nu faze tratamentu más faxi, pamodi nu ka ta perde ténpu ta pâpia ku kes dotor sobri ki tratamentu ki nu krê. Asi tanbê, nu ta ten sertéza ma nu ka ta resebe algun tratamentu ô un ramedi ki pode prujudika-nu. c

16. Kuzê ki nu pode faze si nu ten dúvida sobri modi ki nu ta prenxe kel karton?

¹⁶ Ka ta nporta si nos é jóven ô si nu ten un bon saúdi, nos tudu nu pode panha un asidenti ô fika duenti. (Ecl. 9:11) Pur isu, ta sérba bon pa nos tudu tene kel karton li prenxedu. Si bu tene dúvida sobri modi ki bu pode prenxe kel karton li, pidi ansions na bu kongregason  pa djuda-u. Es ta sforsa pa djuda-u ntende i prenxe kel karton, má es ka ta toma disizon pa bo sobri tratamentus ki ten aver ku bu saúdi. Kel-li é bu responsabilidadi. (Gál. 6:4, 5) Má es pode djuda-u ntende ki disizons ki bu pode toma i pô-l na kel karton.

17. Modi ki nu pode mostra ma nos é ikilibradu sobri asuntus di saúdi?

¹⁷ Txeu di kes disizon ki nu ta toma sobri nos saúdi i tratamentus di saúdi ten bazi na Bíblia. (Atos 24:16; 1 Tim. 3:9) Óras ki nu ta toma disizons i nu ta pâpia ku otus sobri kuzê ki nu disidi, nu debe lenbra di kuzê ki Filipensis 4:5 ta fla. El ta fla: “Nhos dexa tudu algen odja ma nhos ka ta insisti na nhos própi opinion.” Óras ki nos é ikilibradu, nu ka ta fika preokupadu dimás ku nos saúdi i nen nu ka ta tenta poi otus algen ta pensa sima nos. Nu ta ama i nu ta ruspeta nos irmons ku irmans, sikrê ses disizon é diferenti di kel di nos. — Rom. 14:10-12.

18. Modi ki nu pode mostra nos gratidon pa vida ki é un prezenti ki Deus da-nu?

¹⁸ Nu ta mostra nos gratidon pa Jeová, ki é Fonti di vida, óras ki nu ta proteje nos vida i nu ta da-L nos midjór. (Apo. 4:11) Inda nu ten ki lida ku duénsa i disgrasa. Má é ka kel vida li ki nos Kriador kreba pa nos. Ka ta dura, el ta ben da-nu vida pa tudu ténpu, sen dór i sen mórti. (Apo. 21:4) Timenti kel dia ka txiga, nu sta kontenti di sta bibu i di sirbi nos Pai na séu, Jeová, ki krê-nu txeu!