1. Eemwenyo detu odi na ongushu i fike peni kuJehova?

 DILADILA nee ngeno wa pewa kukaume koye efano la kulupa neenghono, la longekeka noli na ongushu neenghono. Oli na omakako onhumba nola tenda. Ndele nonande oli na oinima ya tya ngaho, efano olo oli na ongushu yeedola omamiliyona. Osha yela kutya oto ka kala wa pandula nokukaleka po efano olo. Sha faafana, Jehova okwe tu pa oshali ya denga mbada, oshali yomwenyo. Jehova okwa ulika nghee a lenga eemwenyo detu, eshi e tu pa Omona waye e li ekuliloyambo. — Joh. 3:16.

2. Ngaashi sha ulikwa mo 2 Ovakorinto 7:1, Jehova okwa teelela shike kufye?

² Jehova oye Odjo yomwenyo. (Eps. 36:9) Omuyapostoli Paulus okwa dimina oushili oo, eshi a ti: “Otu na omwenyo, hatu linyenge notu li po omolwaye.” (Oil. 17:25, 28) Onghee ohatu dulu okutya eemwenyo detu odi li oshali ya dja kuKalunga. Ohe tu pe pahole osho twa pumbwa, opo tu kale nomwenyo. (Oil. 14:15-17) Ashike Jehova iha longo oikumwifilonga paife, opo e tu kaleke nomwenyo. Ponhele yaasho, okwa teelela tu file oshisho oukolele wetu wopalutu nowopamhepo she likolelela kokudula kwetu. (Lesha 2 Ovakorinto 7:1.) Omolwashike twa pumbwa okwaamena eemwenyo detu nokukaleka po oukolele wetu, nongahelipi hatu dulu okuninga ngaho?

3. Ohatu kendabala okukaleka po oukolele wetu omolwetomheno limwe lilipi?

³ Etomheno limwe molwaashi twa hala okukaleka po oukolele wetu, ololo kutya otwa hala okulongela Jehova ngaashi hatu dulu. (Mark. 12:30) Molwaashi otwa hala okuyandja ‘omalutu etu onga eyambo liyapuki, li na omwenyo nola hokiwa kuKalunga,’ ohatu henuka oinima oyo tu shii kutya otai nyono po oukolele wetu. (Rom. 12:1) Kashi na nee mbudi kutya ohatu ningi shike, osho itashi ti kutya katu na fiku tu yehame. Ndele otwa hala tu ninge ngaashi hatu dulu, molwaashi otwa hala okuulikila  Tate yetu womeulu kutya otwa pandula oshali yomwenyo.

4. Ohamba David oya li ya hala okuninga shike?

⁴ Ohamba David oya yelifa kutya omolwashike ya lenga oshali yaKalunga yomwenyo, eshi ya shanga ya ti: “Mohonde yange oto mono mo ouwa washike, ngeenge nda wile melambo? Ondwi otai ku pandula mbela, i udife oudiinini woye?” (Eps. 30:9) David otashi dulika a shanga eendjovo odo lwopexulilo longhalamwenyo yaye. Ashike okwa li a tokola toko okukala nomwenyo nosho yo noukolele ngaashi ta dulu, opo a tange Jehova. Nopehe na omalimbililo, atusheni otwa tokola toko okuninga sha faafana.

5. Kashi na nee mbudi kutya otu li ovanamido, ile katu na oukolele, oshike hatu dulu okuninga?

⁵ Ouyehame nosho yo oukulupe otau dulu oku tu imba tu ninge oinima ihapu oyo twa li hatu ningi nale. Oshidjemo, otashi dulika tu kale twa kenyanana notwa handuka. Ashike otu na okuninga eenghendabala natango, opo tu file oshisho oukolele wetu. Omolwashike mbela? Omolwaashi kashi na nee mbudi kutya otu li ovanamido, ile otu na oukolele tau nyangwaanyangwa, natango ohatu dulu okutanga Jehova, ngaashi ohamba David ya li ya ninga. Otashi hekeleke neenghono okushiiva kutya otu na ondilo kuKalunga ketu, nonande inatu wanenena. (Mat. 10:29-31) Nokuli nongeenge otwa fi, ota ka kala a djuulukwa oku tu nyumuna. (Job 14:14, 15) Onghee hano, ofimbo tu na omwenyo, otwa hala okuninga ngaashi hatu dulu, opo tu amene eemwenyo detu nokukaleka po oukolele wetu.

6. Jehova okwa hala tu ninge shike, ngeenge tashi uya pokulya nokunwa?

⁶ Nonande Ombiibeli kai fi embo loundjolowele, oye tu hololela omadiladilo aJehova, ngeenge tashi uya poukolele. Pashihopaenenwa, oye tu ladipika tu ‘kandule po omauyehame,’ sha hala kutya okweefa po oinima oyo tai dulu okweehameka omalutu etu. (Omuud. 11:10) Ombiibeli oya popya kutya katu na okulya sha pitilila, ile okunwa oikunwa yoalkoholi sha pitilila. Oinima oyo otai dulu okunyona po oukolele wetu noku tu dipaa. (Omayel. 23:20) Jehova okwa teelela tu kale tu na elipangelo, ngeenge hatu hoolola kutya ohatu li nohatu nu shi fike peni. — 1 Kor. 6:12; 9:25.

7. Ongahelipi omayele oo ta hangwa mOmayeletumbulo 2:11 tae tu kwafele tu ninge omatokolo mawa e na sha noukolele wetu?

⁷ Ohatu dulu okuninga omatokolo oo taa ulike kutya otwa pandula neenghono oshali yaKalunga yomwenyo mokudiladila pandunge. (Eps. 119:99, 100; lesha Omayeletumbulo 2:11.) Pashihopaenenwa, ohatu ka ninga omatokolo opandunge e na sha naasho hatu li. Ngeenge otu hole oikulya yonhumba, ndele otu shii kutya ohai tu ehameke, eendunge detu dokuyoolola otadi ke tu linyengifa tu henuke oku i lya. Ohatu ka ulika yo kutya otu na eendunge, ngeenge otwa kala hatu kofa sha wana, hatu ningi omadeo pandjikilile nokukaleka omalutu nomaumbo etu a koshoka.

8. Ombiibeli oya holola shike kombinga yomadiladilo aJehova e na sha neameno letu pauhandimwe?

⁸ Jehova okwa li a pa Ovaisrael Eemhango di na sha nanghee tava dulu okuliamena koiponga momaumbo avo nosho yo ngeenge va li tava longo. (Ex. 21:28, 29; Deut. 22:8) Ngeenge umwe okwa dipaa mukwao shihe fi oshiningilewina, okwa li ha mono oilanduliko ya kwata moiti. (Deut. 19:4, 5) Omhango oya li ya popya kutya nokuli nomunhu, oo a ehameka shihe fi oshiningilewina okaana oko inaka dalwa, okwa li e na okuhandukilwa. (Ex. 21:22,  23) Omishangwa oda ulika sha yela kutya Jehova okwa hala tu kale twa lenga eameno.

9. Oshike tu na okuninga, opo tu henuke oiponga? (Tala yo omafano.)

⁹ Ohatu ulike kutya otwa pandula oshali yaKalunga yomwenyo mokukendabala okukala tu li meameno, ngeenge tu li meumbo nosho yo koilonga. Pashihopaenenwa, ngeenge hatu kupulashi oinima oyo ya honga, oikwaudiyo, ile omiti otu na oku shi ninga monghedi ya amenwa. Otu na yo okukaleka oinima ya tya ngaho kokule nounona. Ngeenge otwa tema omundilo, hatu fulukifa omeva, ile hatu longifa oilongifo ya nyika oshiponga, katu na oku i fiya po inai filwa oshisho. Katu na okushinga ohauto, ngeenge otwa leelekwa komiti, twa nwa oikunwa yoalkoholi, ile inatu mona eemhofi da wana. Katu na yo okulongifa ongodi, ofimbo hatu shingi.

10. Oshike hatu dulu okuninga po pefimbo longhalo ya nyika oshiponga nosho yo fimbo inai holoka po?

¹⁰ Omafimbo amwe, itatu dulu okukelela onghalo ya nyika oshiponga iha holoke po.  Osho osho shi li ngaho, unene tuu shi na sha noiponga yopaushitwe, omikifi dekomba nosho yo omalipumomumwe e na sha nelongifo leenghono. Ndele ngeenge oinima oyo oya holoka po, ohatu dulu okukala twa amenwa nokuhenuka oiponga mokudulika tuha dje mo moshitukulwa nosho yo komangabeko, oo a tulwa po kepangelo. (Rom. 13:1, 5-7) Oiponga imwe ohatu dulu oku i lilongekidila. Onghee otwa pumbwa okukala hatu pwilikine kewiliko olo hatu pewa kovakwanepangelo, olo tali tu kwafele, opo tu i lilongekidile. Pashihopaenenwa, otashi ka kala shiwa okutula mokandjato ketu kopaulumomhumbwe omeva, oikulya, oyo ihai ningi nai diva, nosho yo oinima ikwao yekwafo lotete.

11. Otu na okukala tu na ehalo lokuninga shike, ngeenge moshitukulwa shetu omwa holoka omukifi wolutapo?

¹¹ Oshike tu na okuninga, ngeenge moshitukulwa shetu omwa holoka omukifi wolutapo? Otu na okudulika komalombwelo oo hatu pewa e na sha nokulikosha keenyala, okulikala kokule, okudjala oumaska nosho yo okulitulilwa. Ngeenge otwa ningi oinima oyo, ohatu ka ulika kutya otwa pandula neenghono oshali yaKalunga yomwenyo.

12. Ongahelipi efinamhango olo li li mOmayeletumbulo 14:15 tali tu kwafele tu tokole kutya ouyelele ulipi hatu ka tula moilonga, pefimbo loshiponga shopaushitwe?

¹² Pefimbo loiponga, omafimbo amwe, ohatu udu omauyelele a puka kookaume ketu, kovashiinda nomoikundaneki. Ponhele yokwiitavela “ondjovo keshe” hatu udu, oshiwa okupwilikina kouyelele u li mondjila, oo hatu pewa kepangelo, ile keendokotola. (Lesha Omayeletumbulo 14:15.) Olutuwiliki noitaimbelewa ohai ningi eenghendabala, opo i mone ouyelele u li mondjila, ofimbo inava yandja ewiliko li na sha nokwoongala nosho yo oilonga yokuudifa. (Heb. 13:17) Ngeenge otwa shikula ewiliko olo, itatu ke lilya ominwe, ndele ohatu ke liamena fye vene nosho yo vakwetu. Ohatu ka kwafela yo ovanhu momudingonoko va kale ve na etaleko liwa li na sha nEendombwedi daJehova. — 1 Pet. 2:12.

13. Ohatu ulike ngahelipi kutya otwa lenga oshali yaKalunga yomwenyo, ngeenge tashi uya pohonde?

¹³ Ovanhu vahapu ove shii kutya Eendombwedi daJehova oda itavela kutya ohonde oiyapuki. Ohatu dulika komhango yaJehova i na sha nohonde mokwaanya okutulwa ohonde, nokuli nomonghalo yopaunamiti yopaulumomhumbwe. (Oil. 15:28, 29) Ashike osho inashi hala okutya otwa hala okufya. Mepingafano naasho, otwa lenga oshali yaKalunga yomwenyo. Ohatu kongo ekwafo keendokotola di na owino, odo hadi yandje ouhaku wa denga mbada nehalo liwa, oo inau kwatela mo okutulwa ohonde.

14. Ongahelipi hatu dulu okuninipika omhumbwe yokukala twa pumbwa ouhaku wa kwata moiti?

¹⁴ Ohatu dulu okuninipika omhumbwe yokukala twa pumbwa ouhaku wa kwata moiti, ngeenge otwa shikula omaetepo e na sha noukolele, oo a popiwa pehovelo loshitukulwa eshi. Ngeenge otwa kala tu na oukolele, ohatu ka veluka diva, ngeenge otwa tandwa. Itatu ka pumbwa etando lopaulumomhumbwe, ngeenge otwa kaleke omaumbo etu nosho yo eenhele detu da amenwa nokudulika filufilu keemhango domondjila.

15. (a) Omolwashike sha fimana okukala tu na okakalata kepopilo lokuhatulwa ohonde ke li pefimbo? (Tala yo efano.) (b) Ngaashi sha ulikwa mokavidio, ongahelipi hatu dulu okuninga omatokolo e li pandunge e na sha nouhaku, oo wa kwatela mo elongifo lohonde?

¹⁵ Molwaashi otwa lenga oshali yomwenyo, otwa yadeka okakalata ketu ke na sha nepopilo lokuhatulwa ohonde, nohatu kala tu ka na  efimbo keshe. b Mokakalata omo omo twa shanga omahoololo etu e na sha nokuhatulwa ohonde nosho yo omauhaku vali amwe. Ou na ngoo okakalata kepopilo lokuhatulwa ohonde ke li pefimbo? Ngeenge owa pumbwa okuyadeka kamwe, ile oku ka pepaleka, ino ongaonga. Ngeenge otwa shange omahoololo etu, otashi ke tu kwafela opo tu hakulwe diva, molwaashi itatu ka hepifa efimbo hatu kundafana neendokotola. Ohatu ka kwafela yo eendokotola di tu pe ouhaku, oo inau nyika oshiponga kufye. c

16. Oshike to dulu okuninga po, ngeenge ku shii nghee u na okuyadeka okakalata kepopilo lokuhatulwa ohonde?

¹⁶ Kashi na nee mbudi kutya ou li omunyasha, ile ou na oukolele, atusheni ohatu dulu okumona oshiponga, ile okweehama. (Omuud. 9:11) Onghee hano, oshi li pandunge okuyadeka okakalata kepopilo lokuhatulwa ohonde. Ngeenge ku shii nghee u na okuyadeka okakalata oko, pula ovakulunhuongalo vomeongalo leni ve ku kwafele. Ova kendabala okuuda ko nghee ke na okuyadekwa, ashike havo tave ke ku ningila ko omatokolo opaunamiti. Osho oshinakuwanifwa shoye. (Gal. 6:4, 5) Ndele otava dulu oku ku kwafela u ude ko  omahoololo oo u na okuninga, nanghee to dulu oku a shanga.

17. Ongahelipi hatu dulu okuulika kutya otu na ondjele, ngeenge tashi uya poinima i na sha noukolele?

¹⁷ Ohatu kanghamekele omatokolo etu mahapu e na sha noukolele wetu nosho yo ouhaku kwaasho twe lihonga mOmbiibeli. (Oil. 24:16; 1 Tim. 3:9) Ngeenge hatu ningi omatokolo noku a kundafana navamwe, oshiwa okutula moilonga efinamhango olo li li mOvafilippi 4:5, olo tali ti: “Ovanhu aveshe nava shiive kutya omu na ondjele.” Ngeenge otu na ondjele, itatu ka kala hatu lipula unene shi na sha noukolele wetu noitatu ka fininikila vamwe omataleko etu. Otu hole notwa fimaneka ovamwatate novamwameme, nokuli nonande ova ninga omatokolo a yooloka ko kwaao etu. — Rom. 14:10-12.

18. Ongahelipi hatu dulu okuulika kutya otwa pandula oshali yomwenyo?

¹⁸ Ohatu ulike kutya otwa pandula Jehova, Odjo yomwenyo, mokwaamena eemwenyo detu nosho yo moku mu pa osho sha denga mbada. (Eh. 4:11) Mopaife otu na okuungaunga nomauyahame nosho yo omaupyakadi. Ashike onghalamwenyo oyo hayo Omushiti wetu a li e tu nunina. Mafiku ote ke tu pa omwenyo waalushe noitapa ka kala vali ouyehame nosho yo efyo. (Eh. 21:4) Ofimbo twa teelela, oshiwa okukala nomwenyo nokulongela Tate yetu womeulu omunahole, Jehova.