ATUAQQISSAAGASSAQ 9
Inuuneq Guutip tunissutaa pingaartiguk
‘Taanna pissutigalugu inuullutalu aalallutalu maaniippugut.’ – APS 17:28.
ERINARSUUT 5 Guutip suliai tupinnangaartut
QILANAARTUUT a
1. Inuunerput Jehovap qanoq pingaartitsigaa?
TAKORLOORIARUK ikinngutivit qalipakkamik pisoqqamik nalissaqanngilluinnartumik kusanangaartumillu tunigaatit. Simerneqalaarlunilu qalipanneratigut qupinneqalaarpoq. Ajoquteqaraluartoq koruuninik millionilinnik nalilerneqarpoq. Soorunami eqqumiitsuliaq taanna qujamasuutigalugulu paarilluassavat. Taamatuttaaq Jehovap nalissaqanngilluinnartumik tunisimavaatigut, tassa inuuneq. Jehovap inuunerput pingaartingaaramiuk ernini utertitsissutitut pilliutigisimavaa. – Joh 3:16.
2. Korintimiunut allakkat aappaat 7:1 naapertorlugu Jehovap sumik piumasaqarfigaatigut?
2 Jehova tassaavoq ‘inuunerup puilaffia’. (Tuss 36:10) Apustilip Paulusip tamanna upperaa imalu oqarluni: ‘Taanna pissutigalugu inuullutalu aalallutalu maaniippugut.’ (ApS 17:25, 28) Taamaattumik oqarsinnaavugut inuunerput tunissutaasoq Guutimeersoq. Asannilluni inuuinnarsinnaaqqulluta pisariaqartitatsinnik tunisarpaatigut. (ApS 14:15-17) Imaanngilarli Jehovap tupinnartuliortarnermigut inuuinnartittaraatigut. Tassa piumasaraa timikkut anersaakkullu peqqissuunissarput sapinngisatsinnik isumagissagipput. (Korintimiunut 2. 7:1 atuaruk). Sooq peqqissuujuarniassaagut imminullu paaraluta, qanorlu taamaaliorsinnaavugut?
INUUNEQ PINGAARTIGUK
3. Ilaatigut sooq peqqissuuniartarpugut?
3 Peqqissuuniarnissatsinnut pissutaasut ilagaat Jehova sapinngisatsinnik kiffartorfigerusukkatsigu. (Mak 12:30) Timitta “uumasutut illernartutut Guutimillu akuerisaasutut pilliutissatut” sassaannissaa kissaatigigatsigu peqqissutsitsinnut ajoqutaasunik iliuuseqarusunngilagut. (Rom 12:1) Soorunami imminut paariniarluta qanorluunniit iliuuseqaraluarluta napparsimalersinnaavugut. Inuunerpulli Ataatatsinnit qilammiusumit tunissutaasoq qujamasuutigalugu takutikkusukkatsigu sapinngisarput tamaat peqqissuuniartarpugut.
4. Kunngi Daavi sorusuppa?
4 Kunngi Daavi inuuneq Guutip tunissutaa pingaartillugu ima allappoq: “Sumut iluaqutaassava … ilivermut aqqartariaqaruma? Pujualaannaasup qutsavigisinnaanerpaatit unneqqarissutsillu nalunaajaatigalugu?” (Tuss 30:10) Imaassinnaavoq Daavi utoqqalilluni taama allattoq. Jehovali unnersiutigiuarusukkamiuk sapinngisaminik peqqissoorusukkaluarpoq inuuinnarusukkaluarlunilu. Qularnanngitsumik tamatta taamaakkusuppugut.
5. Qanorluunniit utoqqalitigigaluarlutalu napparsimalertigigaluarluta susinnaavugut?
5 Imaassinnaavoq nappaateqalerneq utoqqalinerlu pissutigalugit siornatigut iliuuserisimasagut maanna iliuuserisinnaanngikkigut. Tamatuma kingunerisaanik immaqa pakatsillutalu aliasussinnaavugut. Taamaakkaluartorli peqqissuunissarput sumiginnarusunngilarput. Sooq? Qanorluunniit utoqqalitigigaluarluta napparsimalertigigaluarlutaluunniit kunngi Daavi ilaarlugu Jehova unnersiutigiuarsinnaagatsigu. Guutip asangaaraatigut nalunagu tuppallernaqaaq! (Mat 10:29-31) Toqussagaluaruttaluunniit toqusunit makitinnissarput qilanaarissavaa. (Job 14:14, 15, NW) Tassa inuutilluta peqqissuujuarnissatsinnut imminullu paarinissatsinnut sapinngisamik iliuuseqarusuppugut.
AJOQUTIGISINNAASANNIK ILIUUSEQAQINAK
6. Nerinissamut imernissamullu tunngatillugu Jehovap suna naatsorsuutigaa?
6 Biibili peqqissutsimut nerisassanillu aalajangersimasunik nerisarnissamut tunngatillugu atuagaanngikkaluartoq Jehovap tamakku pillugit qanoq isiginnittaaseqarneranik tassani paasitinneqarpugut. Assersuutigalugu ima kajumissaarpaatigut: ‘Ajortoq inuunermit nigorsimatiguk.’ (Oqal 11:10) Inuunermik navianartorsiortitsisinnaasut, soorlu nerivallaarneq, aalakoornartutorpallaarnerlu, Biibilimi assuarineqarput. (Uss 23:20) Qanoq annertutigisumik sunillu nerisarnissamut imernissamullu tunngatillugu imminut aquttarnissarput Jehovap naatsorsuutigaa. – Kor 1. 6:12; 9:25.
7. Peqqissutsitsinnut tunngatillugu aalajangiinialeraangatta Ussatit 2:11-mi siunnersuut qanoq iluaqutigisinnaavarput?
7 Isumatusaarluta aalajangiilluarnikkut takutissinnaavarput inuuneq Guutip tunissutaa qujamasuutigingaarlugu. (Tuss 119:99, 100; Ussatit 2:11 atuaruk). Assersuutigalugu sutorniarnerluta eqqarsaatigeqqissaartarparput. Nerisassat aalajangersimasut mamarigaluarlugit saperutsigit nerinaveersaartarpagut. Aamma naammattumik sinittarnikkut, timersortarnikkut, timikkut ipeersaarnikkut angerlarsimaffittalu eqqiluisaartinneratigut uppernarsartarparput isumatusaarluta.
ISUMANNAATSUUNISSAQ EQQUMAFFIGIUARUK
8. Guutip isumannaatsuunissamut isumaa Biibilimit qanoq erserpa?
8 Jehovap Israalikkunnut inatsisaasa ilagaat angerlarsimatillutik sulitillutilluunniit navianartorsiortitsisinnaasut pinngitsoornissaannut ilitsersuutit. (Mos 2. 21:28, 29; Mos 5. 22:8) Inummik toqutsisoortoqaraangat killilersorneqarnissamik kinguneqartarpoq. (Mos 5. 19:4, 5) Aamma piaarinani naartumik ajoqusiisup pillarneqarnissaanik Moorsisip inatsisaani piumasaqaateqarpoq. (Mos 2. 21:22, 23) Biibilimi erserpoq Jehovap kissaatigigaa isumannaatsuunissaq eqqumaffigissagipput.
Ukunani qanoq takutissinnaavarput inuuneq pingaartillugu? (Immikkoortoq 9 takuuk)
9. Ajutoortoqannginniassammat qanoq mianersorsinnaavugut? (Aamma assit takukkit).
9 Angerlarsimatilluta sulitillutalu isumannaallisaanikkut takutittarparput inuuneq qujamasuutigingaarlugu. Assersuutigalugu atortut ipittut, akoorutissat ulorianartortallit nakorsaatillu meeqqat inugaannut inissittarpagut, allallu ajoqusinnginniassammata isumannaatsumik igittarlugit. Innermik ikitsigaangatta imermillu qalaassigaangatta qimannaveersaartarpagut atortullu innaallagiatortut mianersuuttarlugit. Biilernissamut navianartorsiortitsisinnaasunik nakorsaatitorsimagutta, aalakoornartortalinnik imersimagutta qasuallaaruttaluunniit isumannaatsumillu biilersinnaanngikkutta biilernavianngilagut. Biilillu aqutsillugit mobili tigummiarnavianngilarput.
AJUNAARNERSUAQARTILLUGU
10. Ajunaarnersuaqannginnerani ajunaarnersuaqartillugulu qanoq iliortoqarsinnaava?
10 Inuunermik navianartorsiortitsisinnaasut ilaannikkut pinngitsoortissinnaanngilagut. Ingammik pinngortitami ajunaarnersuaqartillugu, nappaalanersuaqartillugu perulluliortoqartillugulu taamaappoq. Tamakkuninngali nalaataqarutta aneqqusaannginneq qimarngutitsinerlu pillugit oqartussaasut ilitsersuutaasa maleruarnerisigut navianartorsiornaveersaarsinnaavugut. (Rom 13:1, 5-7) Ajunaarnersuaqarnerit ilaannut sillimasoqarsinnaammat oqartussaasut ilitsersuutaasa suulluunniit maleruarnissaat pingaaruteqarpoq. Assersuutigalugu imissaqarluarnissaq, nerisassat asiusinnaanngitsut ikiueqqaarnermullu atortut piginissaat silatusaarnerussaaq.
11. Tunillaassortumik nappaalanersuaqalerpat qanoq iliussaagut?
11 Sumiiffitsinni tunillaassortumik nappaalanersuaqalerpat qanoq iliussaagut? Pisortat maleruaqqusaat, soorlu errortukulanissaq, allanut qanillinaveersaarnissaq, qanermut assiaqummik atuinissaq angerlarsimagallarnissarlu pillugit maleruaqqusaat, maleruassavagut. Taakkua maleruarnerisigut takutissavarput inuuneq Guutip tunissutaa qujamasuutigingaarlugu.
12. Paasissutissat suut upperissanerlugit Ussatit 14:15 qanoq iluaqutigisinnaavarput?
12 Ajunaartoqartillugu imaassinnaavoq ikinngutitsinnit, inoqatitsinnit aamma tusagassiuutit aqqutigalugit paasissutissanik eqqunngitsunik tusagaqartugut. “Oqaaserineqartut suut tamaasa” upperinagit pisortat nakorsallu paasissutissiissutaat tusarnaartassavagut. (Ussatit 14:15 atuaruk). Siulersuisoqatigiit immikkoortortaqarfiillu ilagiit ataatsimiinnerinut oqaluussinissamullu tunngatillugu ilitsersuinnginnerminni eqqortunik paasissutissanik sapinngisartik tamaat paasiniaaqqissaartarput. (Hebr 13:17) Tamakkuninnga maleruaanerput imminut allanullu illersuutaasarpoq. Aamma inuiaqatigiinni nalunaajaataalluarsinnaavoq. – Pet 1. 2:12.
AAMMIK ITIGARTITSINISSAT PIAREERSARUK
13. Aak pillugu Jehovap inatsisaanik maleruaanitsigut qanoq ersersipparput inuuneq pingaartillugu?
13 Inuppassuit nalunngilaat Jehovap Nalunaajaasui aalersortinneq ajortut. Taamaaliorusunngilagut aak illernartuummat. Allaat pinartoqartillugu aalersortikkumannginnitsigut aak pillugu Jehovap inatsisaa maleruarparput. (ApS 15:28, 29) Kisianni imaanngilaq toqunissarput kissaatigigipput. Guutimmi tunissutaa inuuneq pingaartingaarparput. Aalersornertaqanngitsumik pitsaanerpaamik suliaritinnissarput kissaatigalugu nakorsanit pikkorissunit ikiorneqarusuttarpugut.
14. Pinartumik nakorsartinnissaraluaq qanoq pitsaaliorsinnaavarput?
14 Siunnersuutit allaaserisami matumani eqqaaneqareersut maleruarnerisigut peqqissuserput paarilluarutsigu imaassinnaavoq ajutoortoqarnissaa pinaveersaartissinnaagipput pilatsinnissaraluarlu pinngitsoortillugu. Pilatsinnissarpulli pisariaqalerpat peqqissuugutta aaqqipallannissarput ilimanarnerussaaq. Aamma angerlarsimaffitta suliffittalu isumannaatsuutinnerisigut angallannermullu inatsisit maleruaqqissaarnerisigut ajutoornissaraluit annikillisissinnaavagut.
Inuuneq pingaartingaaratsigu nakorsartinneq pillugu aalajangersagaq immersortarparput nassartuaannarlugulu (Immikkoortoq 15 takuuk) d
15. (a) Sooq nakorsartinneq pillugu aalajangersakkap nassartuaannarnissaa pingaaruteqarpa? (Aamma assit takukkit). (b) Videumi takutinneqartutut nakorsaariaatsinut aammik atuiffiusunut tunngatillugu qanoq aalajangiilluarsinnaavugut?
15 Inuuneq pingaartingaaratsigu nakorsartinneq pillugu aalajangersagaq immersortarparput allagartarlu taanna nassartuaannarlugu. b Aammik atuinissamut nakorsariaatsinullu aalajangersimasunut tunngatillugu aalajangiinigut tassani allattorsinnaavagut. Nakorsartinneq pillugu aalajangersagaq immersukkat suli atuuppa? Taamaanngippat nutarterneqarnissaaluunniit pisariaqarpat piaartumik immersuigit. Kissaatigut paatsuugassaanngitsumik allattoreerutsigit tamakku pillugit nakorsat oqaloqatiginissaannut piffissarujussuaq atortariaqassanngilarput piaarnerpaamillu suliaritissinnaalluta. Aamma ajoqutigisinnaasatsinnik nakorsartinnissarput paatsuuinerillu pinngitsoortissinnaavagut. c
16. Nakorsartinneq pillugu aalajangersagaq qanoq immersussanerlugu nalornissutigigutsigu qanoq iliorsinnaavugut?
16 Inuusuttuugaluarutta peqqissuugaluaruttaluunniit ajutoornermik nalaataqarsinnaavugut napparsimalersinnaallutalu. (Jaak 4:13, 14) Taamaattumik nakorsartinneq pillugu aalajangersakkap immersornissaa silatusaarnerussaaq. Qanoq taamaaliussanerlutit nalornissutigigukku utoqqaanertanut ikioqqugit. Taakkuami aalajangersakkap qanoq immersornissaa ilisimalluartarpaat. Taakkuli nakorsaariaatsinut tunngatillugu illit sinnerlutit aalajangiussinavianngillat, illimmi nammineq tamanna akisussaaffigigakku. (Gal 6:4, 5) Utoqqaanertalli suut periarfissarineritit paasinissaannut kissaatigisavillu allannissaannut ikiorsinnaavaatsit.
INGASATTUMIK ISUMAKULUUTEQAQINAK
17. Peqqissutsitsinnut tunngatillugu Filippimiut 4:5 qanoq maleruarsinnaavarput?
17 Peqqissutsitsinnut nakorsaariaatsinullu tunngatillugu aalajangigassaqaraangatta nalunngeqatiginnissuterput Biibilimit ilinniartinneqarsimasoq malittarparput. (ApS 24:16; Tim 1. 3:9) Aalajangikkagut pillugit allat oqaloqatigigaangatsigit pitsaassaaq najoqqutassiaq Filippimiut 4:5-imiittoq una maleruarutsigu: “Uteriitsuunnginnersi tamanit ilisimaneqalerli.” Tassa timikkut peqqissuserput ingasattumik isumakuluutiginavianngilarput, allallu uagutsitut isumaqalernissaannik tatinavianngilagut. Qatanngutigut uagutsinniit allaanerusumik aalajangiigaluarpata asallugillu ataqqivagut. – Rom 14:10-12.
18. Qanoq ersersissinnaavarput inuuneq qujamasuutigalugu?
18 Inuunerup paarilluarneratigut sapinngisatsinnillu Jehovamut kiffartornitsigut taassumunnga, Inuunerup Puilaffianut, qujamasunnerput ersersittarparput. (Saqq 4:11) Nappaatit ajunaarnersuillu atuukkallarput. Pinngortitsisittali tamanna siunertarinngikkaluarpaa. Ungasinngitsukkut anniarneq toqulu atuukkunnaassapput naassaanngitsumillu inuuneqalersissavaatigut. (Saqq 21:4) Tamatuma nalliutinnginnerani Ataatarput qilammiusoq asanningaartoq Jehova kiffartorfigalugu inuunerput nuannaarutigeqaarput!
ERINARSUUT 140 Naassaanngitsumik inuusinnaavutit!
a Allaaserisaq una iluaqutigalugu inuuneq Guutip tunissutaa qujamasuutiginerulissavarput. Ajunaarnersuaqaraangat qanoq imminut paarilluarsinnaanersugut aamma ajutoortoqarnissaa qanoq pinaveersaartissinnaaneripput sammissavarput. Aamma ajutoortoqariataarsinnaaneranut qanoq piareersarsinnaanersugut sammissavarput.
b Allagartaq taanna ima taaguuteqarpoq: Forhåndsdirektiv og fuldmagt angående lægebehandling.
c Video Nakorsaariaatsinut aammik atuiffiusunut tunngatillugu aalajangiilluarit jw.org-imiittoq isiginnaaruk.
d ASSINI MALUGISASSAT: Qatanngutip inuusuttup nakorsartinneq pillugu aalajangersagaq immersoraa nassarlugulu.