អត្ថបទសិក្សា ៩
ចូរឲ្យតម្លៃជីវិតជាអំណោយពីព្រះ
«ដោយសារលោកទើបមានយើង ហើយគឺដោយសារលោក ទើបយើងមានជីវិត ក៏អាចធ្វើចលនាផង»។—សកម្ម. ១៧:២៨
ចម្រៀងលេខ១៤១ ភាពអស្ចារ្យនៃជីវិត
សេចក្ដីសង្ខេប a
១. តើជីវិតរបស់យើងមានតម្លៃខ្លាំងយ៉ាងណាចំពោះព្រះយេហូវ៉ា?
សូមស្រមៃគិតថាមិត្តភក្ដិម្នាក់បានឲ្យផ្ទះមួយដល់អ្នក។ ផ្ទះនោះមានស្លក់ពណ៌និងជ្រាបទឹកខ្លះៗ។ ទោះជាមានបញ្ហាខ្លះទាំងនោះក្ដី ផ្ទះនោះមានតម្លៃរាប់លានដុល្លារ។ អ្នកច្បាស់ជានឹងឲ្យតម្លៃនិងការពារផ្ទះនោះ។ ស្រដៀងគ្នាដែរ ព្រះយេហូវ៉ាបានឲ្យយើងអំណោយដ៏មានតម្លៃ គឺជីវិត។ តាមពិត ព្រះយេហូវ៉ាបង្ហាញថាលោកឲ្យតម្លៃយ៉ាងខ្លាំងចំពោះជីវិតរបស់យើងដោយឲ្យបុត្ររបស់លោកជាថ្លៃលោះសម្រាប់យើង។—យ៉ូន. ៣:១៦
២. ដូចកូរិនថូសទី២ ៧:១ចែង តើព្រះយេហូវ៉ាតម្រូវអ្វីពីយើង?
២ ព្រះយេហូវ៉ាគឺជាប្រភពនៃជីវិត។ (ចសព. ៣៦:៩) សាវ័កប៉ូលក៏បានទទួលស្គាល់អំពីសេចក្ដីពិតនេះពេលគាត់បាននិយាយថា៖ «ដោយសារលោកទើបមានយើង ហើយគឺដោយសារលោក ទើបយើងមានជីវិត ក៏អាចធ្វើចលនាផង»។ (សកម្ម. ១៧:២៥, ២៨) ដូច្នេះ យើងអាចនិយាយបានថាជីវិតរបស់យើងគឺជាអំណោយពីព្រះ។ ដោយក្ដីស្រឡាញ់ លោកផ្ដល់អ្វីដែលយើងត្រូវការដើម្បីទ្រទ្រង់ជីវិតយើង។ (សកម្ម. ១៤:១៥-១៧) ប៉ុន្តែ ព្រះយេហូវ៉ាមិនធ្វើអព្ភូតហេតុនៅឥឡូវនេះដើម្បីរក្សាការពារជីវិតរបស់យើងទេ។ ផ្ទុយទៅវិញ លោកតម្រូវឲ្យយើងខំអស់ពីសមត្ថភាពដើម្បីរក្សាសុខភាពរបស់យើងនិងបន្ដបម្រើលោក។ (សូមអាន កូរិនថូសទី២ ៧:១) ហេតុអ្វីយើងគួរការពារសុខភាពនិងអាយុជីវិតរបស់យើង ហើយតើយើងអាចធ្វើដូច្នេះតាមរបៀបណា?
ចូរឲ្យតម្លៃចំពោះអំណោយជាជីវិត
៣. តើមានមូលហេតុអ្វីដែលយើងគួររក្សាសុខភាព?
៣ មូលហេតុមួយដែលយើងគួរព្យាយាមរក្សាសុខភាពឲ្យបានល្អ គឺដើម្បី យើងអាចបម្រើព្រះយេហូវ៉ាអស់ពីសមត្ថភាពរបស់យើង។ (ម៉ាក. ១២:៣០) យើងចង់ប្រគល់«រូបកាយរបស់ខ្លួនជាគ្រឿងបូជាដែលមានជីវិត ក៏បរិសុទ្ធ ហើយគាប់ចិត្តព្រះ» ដូច្នេះយើងមិនធ្វើអ្វីដែលយើងដឹងថាអាចបង្ខូចសុខភាពរបស់យើងឡើយ។ (រ៉ូម ១២:១) ពិតមែន មិនថាយើងខំយ៉ាងណាក្ដី យើងមិនអាចធានាថាយើងមិនចេះឈឺទេ។ ប៉ុន្តែ យើងធ្វើអ្វីដែលយើងអាចធ្វើបានដើម្បីរក្សាសុខភាពឲ្យបានល្អ ដោយសារយើងចង់បង្ហាញបិតាយើងនៅស្ថានសួគ៌ថាយើងឲ្យតម្លៃចំពោះជីវិតដែលជាអំណោយពីលោក។
៤. តើស្ដេចដាវីឌចង់ធ្វើអ្វី?
៤ ស្ដេចដាវីឌបានពន្យល់អំពីមូលហេតុដែលគាត់ឲ្យតម្លៃចំពោះជីវិតដែលជាអំណោយពីព្រះ ពេលគាត់បានសរសេរថា៖ «បើខ្ញុំស្លាប់ឬចុះទៅក្នុងផ្នូរ តើមានប្រយោជន៍អ្វី? តើដីនឹងសរសើរលោកឬ? តើដីនឹងប្រកាសអំពីសេចក្ដីស្មោះត្រង់របស់លោកឬ?»។ (ចសព. ៣០:៩) ដាវីឌប្រហែលជាបានសរសេរពាក្យទាំងនេះនៅពេលគាត់ជិតស្លាប់។ ប៉ុន្តែ គាត់បានតាំងចិត្តរក្សាការពារអាយុជីវិតនិងសុខភាពរបស់គាត់ដើម្បីគាត់អាចសរសើរព្រះយេហូវ៉ាឲ្យបានយូរបំផុត។ យើងទាំងអស់គ្នាច្បាស់ជាមានការតាំងចិត្តដូចនេះដែរ។
៥. ទោះជាយើងចាស់ឬឈឺយ៉ាងណាក្ដី តើយើងអាចធ្វើអ្វី?
៥ ជំងឺនិងភាពចាស់ជរាប្រហែលជារារាំងយើងពីការធ្វើអ្វីជាច្រើនដែលយើងធ្លាប់ធ្វើ។ ជាលទ្ធផល យើងប្រហែលជាមួម៉ៅនិងពិបាកចិត្ត។ ប៉ុន្តែយើងមិនគួរឈប់ព្យាយាមថែរក្សាសុខភាពរបស់យើងឡើយ។ ហេតុអ្វី? ពីព្រោះមិនថាយើងឈឺឬចាស់យ៉ាងណាក្ដី យើងនៅតែអាចសរសើរព្រះយេហូវ៉ាដូចដាវីឌបានធ្វើ។ ការដឹងថាយើងមានតម្លៃចំពោះព្រះរបស់យើង សូម្បីតែពេលដែលយើងឈឺឬចាស់ក្ដី សម្រាលទុក្ខយើងណាស់។ (ម៉ាថ. ១០:២៩-៣១) ទោះជាយើងស្លាប់ក៏ដោយ លោកចង់ប្រោសយើងឲ្យរស់ឡើងវិញ។ (យ៉ូប ១៤:១៤, ១៥) កាលដែលយើងនៅរស់ យើងចង់ធ្វើអ្វីដែលយើងអាចធ្វើបានដើម្បីការពារសុខភាពនិងជីវិតយើង។
ចូរជៀសវាងពីទម្លាប់អាក្រក់
៦. តើព្រះយេហូវ៉ាតម្រូវអ្វីពីយើងស្ដីអំពីការបរិភាគនិងការផឹក?
៦ ទោះជាគម្ពីរមិនមែនជាសៀវភៅថែរក្សាសុខភាព ឬសៀវភៅអំពីរបបអាហារក្ដី គម្ពីរប្រាប់យើងអំពីទស្សនៈរបស់ព្រះយេហូវ៉ាចំពោះរឿងទាំងនេះ។ ជាឧទាហរណ៍ លោកដាស់តឿនយើងឲ្យ‹ជៀសវាងពីអ្វីដែលអាចនាំឲ្យរូបកាយរបស់យើងមានគ្រោះថ្នាក់›។ (អទ. ១១:១០) គម្ពីរប្រាប់យើងថាយើងមិនគួរបរិភោគនិងផឹកស្រាហួសប្រមាណនោះទេ ព្រោះអ្វីទាំងនេះអាចបង្ខូចសុខភាពរបស់យើង ហើយថែមទាំងនាំឲ្យយើងស្លាប់ទៀតផង។ (សុភ. ២៣:២០) ព្រះយេហូវ៉ាតម្រូវឲ្យយើងចេះទប់ចិត្ត ពេលយើងសម្រេចចិត្តអំពីបរិមាណនិងអ្វីដែលយើងបរិភោគនិងផឹក។—១កូ. ៦:១២; ៩:២៥
៧. តើយោបល់នៅសុភាសិត ២:១១ជួយយើងយ៉ាងណាឲ្យធ្វើការសម្រេចចិត្តល្អអំពីសុខភាព?
៧ យើងអាចធ្វើការសម្រេចចិត្តដែលបង្ហាញថាយើងឲ្យតម្លៃជាខ្លាំងចំពោះជីវិតជាអំណោយពីព្រះ ដោយប្រើសមត្ថភាពរិះគិតរបស់យើង។ (ចសព. ១១៩:៩៩, ១០០; សូមអាន សុភាសិត ២:១១) ជាឧទាហរណ៍ យើងគិតយ៉ាងយកចិត្តទុកដាក់ចំពោះអ្វីដែលយើងបរិភោគ។ បើយើងចូលចិត្តអាហារមួយប្រភេទ ប៉ុន្តែដឹងថាវាធ្វើឲ្យយើងឈឺ យើងច្បាស់ជាខំជៀសវាងបរិភោគវា។ យើងក៏បង្ហាញថាយើងជាមនុស្សឈ្លាសវៃពេលដែលយើងដេកឲ្យបានគ្រប់គ្រាន់ ហាត់ប្រាណជាទៀងទាត់ រក្សាអនាម័យខ្លួនប្រាណ និងថែរក្សាផ្ទះយើងឲ្យនៅស្អាតបាត។
ចូរព្យាយាមជៀសវាងពីគ្រោះថ្នាក់
៨. តើគម្ពីរបង្ហាញយ៉ាងណាអំពីសារៈសំខាន់នៃសុវត្ថិភាពរបស់យើងចំពោះព្រះយេហូវ៉ា?
៨ ព្រះយេហូវ៉ាបានឲ្យច្បាប់ដល់ជនជាតិអ៊ីស្រាអែលអំពីរបៀបការពារខ្លួនពីគ្រោះថ្នាក់ធ្ងន់ធ្ងរផ្សេងៗនៅផ្ទះនិង ពេលដែលពួកគេធ្វើការ។ (ដច. ២១:២៨, ២៩; បច. ២២:៨) បើនរណាម្នាក់បានសម្លាប់បុគ្គលម្នាក់ទៀតដោយអចេតនា នោះនឹងនាំឲ្យមានលទ្ធផលធ្ងន់ធ្ងរ។ (បច. ១៩:៤, ៥) តាមច្បាប់ សូម្បីតែអ្នកណាដែលធ្វើឲ្យកូនដែលមិនទាន់កើតរងគ្រោះ ក៏ត្រូវទទួលទោស។ (ដច. ២១:២២, ២៣) បទគម្ពីរបង្ហាញយ៉ាងច្បាស់ថាព្រះយេហូវ៉ាចង់ឲ្យយើងខំអស់ពីសមត្ថភាពដើម្បីជៀសវាងពីគ្រោះថ្នាក់ផ្សេងៗ។
តើយើងអាចបង្ហាញថាយើងគោរពជីវិតក្នុងស្ថានភាពទាំងនេះយ៉ាងដូចម្ដេច? (សូមមើលវគ្គ៩)
៩. តើយើងអាចធ្វើអ្វីដើម្បីជៀសវាងពីគ្រោះថ្នាក់? (សូមមើលរូបភាពផងដែរ)
៩ យើងបង្ហាញថាយើងឲ្យតម្លៃជីវិតជាអំណោយពីព្រះដោយព្យាយាមរក្សាសុវត្ថិភាពនៅផ្ទះនិងនៅកន្លែងធ្វើការ។ ជាឧទាហរណ៍ យើងបោះចោលវត្ថុមុតស្រួច សារធាតុគីមី ឬថ្នាំតាមរបៀបដែលមានសុវត្ថិភាព ហើយយើងរក្សាទុករបស់ទាំងនោះនៅកន្លែងដែលផុតពីដៃក្មេង។ យើងប្រុងប្រយ័ត្នពេលធ្វើអ្វីដែលមានអណ្ដាតភ្លើង ទឹកក្ដៅ ឬឧបករណ៍ជាងដែលប្រើភ្លើង ហើយមិនទុករបស់ទាំងនោះចោលឡើយ។ យើងមិនបើកឡានកាលដែលយើងមិនអាចប្រុងស្មារតីដោយសារយើងប្រើថ្នាំ ផឹកស្រា ឬអត់ងងុយទេ ហើយយើងមិនបំបែរអារម្មណ៍ដោយប្រើគ្រឿងអេឡិចត្រូនិកពេលដែលកំពុងបើកបរឡើយ។
ពេលមានមហន្តរាយ
១០. តើយើងអាចធ្វើអ្វីមុននិងក្នុងអំឡុងពេលជួបស្ថានភាពដែលមានគ្រោះថ្នាក់?
១០ ជួនកាលយើងមិនអាចរារាំងស្ថានភាពគ្រោះថ្នាក់បានទេ។ ជាពិសេសបើជាមហន្តរាយធម្មជាតិ រោគរាតត្បាត និងជម្លោះដ៏សាហាវឃោរឃៅ។ ប៉ុន្តែ ពេលអ្វីទាំងនេះកើតឡើង យើងអាចព្យាយាមកាត់បន្ថយគ្រោះថ្នាក់និងរួចជីវិតដោយធ្វើតាមបម្រាមគោចរ បង្គាប់ឲ្យជម្លៀស និងការរឹតបន្តឹងជាបន្ទាន់។ (រ៉ូម ១៣:១, ៥-៧) យើងអាចត្រៀមខ្លួនសម្រាប់រឿងបន្ទាន់ខ្លះ ដូច្នេះយើងគួរស្ដាប់តាមការណែនាំពីពួកអាជ្ញាធរក្នុងតំបន់ស្ដីអំពីរឿងនេះ។ ជាឧទាហរណ៍ ប្រហែលជាមានប្រយោជន៍បើយើងរៀបចំរក្សាទុកទឹកនិងអាហារដែលមិនងាយខូច ព្រមទាំងឧបករណ៍សង្គ្រោះបឋមជាដើម។
១១. ពេលរោគរាតត្បាតឆ្លងរីករាលដាលនៅកន្លែងដែលយើងរស់នៅ តើយើងគួរធ្វើអ្វី?
១១ តើយើងគួរធ្វើអ្វីបើរោគរាតត្បាតឆ្លងរាលដាលនៅកន្លែងដែលយើងរស់នៅ? យើងគួរធ្វើតាមការណែនាំដែលពួកអាជ្ញាធរផ្ដល់ឲ្យ ដូចជាការលាងដៃ ការរក្សាគម្លាត ការពាក់ម៉ាស់ និងចត្តាឡីស័ក។ ពេលយើងធ្វើអ្វីទាំងនេះ យើងបង្ហាញថាយើងឲ្យតម្លៃខ្លាំងយ៉ាងណាចំពោះជីវិតជាអំណោយពីព្រះ។
១២. តើគោលការណ៍នៅសុភាសិត ១៤:១៥អាចជួយយើងយ៉ាងណាឲ្យប្រយ័ត្នចំពោះព័ត៌មានដែលយើងឮពេលមានមហន្តរាយ?
១២ ក្នុងអំឡុងពេលមានរឿងបន្ទាន់ យើងប្រហែលជាឮព័ត៌មានចចាមអារ៉ាមពីមិត្តភក្ដិ អ្នកជិតខាង និងបណ្ដាញព័ត៌មានផ្សេងៗ។ ជាជាង«ជឿគ្រប់ពាក្យទាំងអស់»ដែលយើងឮ ជាការល្អឲ្យយើងស្ដាប់ព័ត៌មានដែលគួរឲ្យទុកចិត្តបំផុតពីរដ្ឋាភិបាលនិងខាងក្រុមគ្រូពេទ្យ។ (សូមអាន សុភាសិត ១៤:១៥) គណៈអភិបាលនិងការិយាល័យសាខាខំអស់ពីសមត្ថភាពដើម្បីទទួលបានព័ត៌មានត្រឹមត្រូវ មុនដែលពួកគេឲ្យការណែនាំអំពីកិច្ចប្រជុំក្រុមជំនុំ និងការផ្សព្វផ្សាយ។ (ហេ. ១៣:១៧) ដោយធ្វើតាមការណែនាំពីពួកគេ យើងការពារខ្លួនយើងនិងអ្នកឯទៀតពីការរងផលពិបាក។ យើងក៏រក្សាកេរ្តិ៍ឈ្មោះក្រុមជំនុំក្នុងសហគមន៍របស់យើងផងដែរ។—១ពេ. ២:១២
ចូរជៀសវាងពីឈាម
១៣. តើយើងបង្ហាញថាយើងឲ្យតម្លៃជីវិតយ៉ាងដូចម្ដេច ពេលយើងធ្វើតាមច្បាប់របស់ព្រះអំពីឈាម?
១៣ មនុស្សជាច្រើនស្គាល់ថាសាក្សីព្រះយេហូវ៉ាជឿថាឈាមគឺពិសិដ្ឋ។ យើងធ្វើតាមច្បាប់របស់ព្រះយេហូវ៉ាស្ដីអំពីឈាមដោយបដិសេធមិនព្រមទទួលយកការចាក់បញ្ចូលឈាម សូម្បីតែក្នុងអំឡុងការសង្គ្រោះបន្ទាន់ក៏ដោយ។ (សកម្ម. ១៥:២៨, ២៩) ប៉ុន្តែ នេះមិនមានន័យថាយើងចង់ស្លាប់នោះទេ។ ផ្ទុយទៅវិញ យើងឲ្យតម្លៃចំពោះជីវិតជាអំណោយពីព្រះ។ យើងស្វែងរកជំនួយពីអ្នកជំនាញខាងវេជ្ជសាស្ត្រដែលសុខចិត្តផ្ដល់ការថែទាំដែលមានគុណភាពខ្ពស់ដោយមិនរួមបញ្ចូលការចាក់បញ្ចូលឈាម។
១៤. តើតាមរបៀបណាយើងអាចកាត់បន្ថយគ្រោះថ្នាក់ដែលនាំឲ្យទទួលការព្យាបាលធ្ងន់ធ្ងរ?
១៤ បើយើងថែរក្សាសុខភាពរបស់យើងដោយធ្វើតាមអ្វីដែលបានត្រូវរៀបរាប់ក្នុងអត្ថបទនេះ យើងប្រហែលជានឹងមិនចាំបាច់ត្រូវឆ្លងកាត់ការវះកាត់ឬទទួលការព្យាបាលធ្ងន់ធ្ងរទេ។ ម្យ៉ាងទៀត បើយើងមានសុខភាពល្អ យើងនឹងឆាប់ធូរស្បើយជាងក្រោយពីទទួលការវះកាត់។ យើងក៏អាចកាត់បន្ថយគ្រោះថ្នាក់ដែលនាំឲ្យយើងត្រូវវះកាត់ដោយថែរក្សាផ្ទះនិងកន្លែងធ្វើការរបស់យើងឲ្យមានសុវត្ថិភាព ព្រមទាំងដោយគោរពច្បាប់ចរាចរណ៍យ៉ាងដិតដល់។
ដោយសារយើងឲ្យតម្លៃអំណោយជាជីវិត យើងបំពេញលិខិតប្រគល់សិទ្ធិអំណាច ហើយយកវាតាមខ្លួនជានិច្ច (សូមមើលវគ្គ១៥) d
១៥. (ក) ហេតុអ្វីគឺសំខាន់ឲ្យយើងដាក់លិខិតប្រគល់សិទ្ធិអំណាចជាប់តាមខ្លួន? (សូមមើលរូបភាពផងដែរ) (ខ) ដូចបានបង្ហាញក្នុងវីដេអូ តើតាមរបៀបណាយើងអាចធ្វើការសម្រេចចិត្តល្អស្ដីអំពីការព្យាបាលដែលទាក់ទងនឹងឈាម?
១៥ ដោយសារយើងឲ្យតម្លៃជីវិតជាអំណោយ យើងបំពេញលិខិតប្រគល់សិទ្ធិអំណាចឲ្យមើលការខុសត្រូវក្នុងការថែទាំសុខភាព ហើយដាក់វាជាប់តាមខ្លួនជានិច្ច។ b ក្នុងឯកសារនេះ យើងប្រាប់អំពីបំណងចិត្តរបស់យើងស្ដីអំពីការចាក់បញ្ចូលឈាម និងការព្យាបាលខ្លះ។ តើលិខិតប្រគល់សិទ្ធិអំណាចរបស់អ្នកថ្មីបំផុតឬទេ? បើអ្នកត្រូវបំពេញឬត្រូវធ្វើថ្មី សូមធ្វើវាភ្លាមៗ។ ការប្រាប់យ៉ាងច្បាស់អំពីបំណងចិត្តរបស់យើងតាមរយៈលិខិតនេះនឹងជួយយើងឲ្យជៀសវាងពីការពន្យារពេលដែលមិនចាំបាច់ក្នុងការព្យាបាល។ យើងក៏នឹងជួយខាងក្រុមគ្រូពេទ្យឲ្យជៀសវាងពីការយល់ខុសដែលអាចបង្កគ្រោះថ្នាក់ដល់យើង។ c
១៦. តើយើងអាចធ្វើអ្វីបើយើងមិនប្រាកដអំពីរបៀបបំពេញលិខិតប្រគល់សិទ្ធិអំណាច?
១៦ មិនថាយើងក្មេងឬមានសុខភាពល្អក្ដី យើងទាំងអស់គ្នាមិនអាចគេចផុតពីគ្រោះថ្នាក់ឬជំងឺបានទេ។ (អទ. ៩:១១) ហេតុនេះគឺជាការឈ្លាសវៃឲ្យយើងបំពេញលិខិតប្រគល់សិទ្ធិអំណាច។ បើអ្នកមិនប្រាកដអំពីរបៀបបំពេញលិខិតនោះទេ អ្នកអាចសួរអ្នកចាស់ទុំក្នុងក្រុមជំនុំរបស់អ្នកឲ្យជួយអ្នក។ ពួកគេព្យាយាមយល់ច្បាស់អំពីរបៀបបំពេញលិខិតនោះ ប៉ុន្តែពួកគេនឹងមិនធ្វើការសម្រេចចិត្តឲ្យអ្នកអំពីការព្យាបាលនោះទេ។ នោះគឺជាការទទួលខុសត្រូវរបស់អ្នក។ (កាឡ. ៦:៤, ៥) ប៉ុន្តែ ពួកគេអាចជួយអ្នកឲ្យយល់ អំពីជម្រើសដែលអ្នកមាន និងរបៀបបង្ហាញអំពីបំណងចិត្តរបស់អ្នកពេលអ្នកបំពេញលិខិតនោះ។
ចូរមានគំនិតសមហេតុសមផល
១៧. តើយើងអាចបង្ហាញយ៉ាងណាថាយើងមានគំនិតសមហេតុសមផលចំពោះរឿងសុខភាព?
១៧ ការសម្រេចចិត្តជាច្រើនរបស់យើងស្ដីអំពីសុខភាពនិងការព្យាបាលគឺមានមូលដ្ឋានលើសមត្ថភាពវិនិច្ឆ័យដែលបានត្រូវបង្វឹកបង្ហាត់ពីគម្ពីរ។ (សកម្ម. ២៤:១៦; ១ធី. ៣:៩) ពេលធ្វើការសម្រេចចិត្តនិងពិគ្រោះរឿងនេះជាមួយអ្នកឯទៀត យើងត្រូវចាំអ្វីដែលភីលីព ៤:៥ចែងដែលថា៖ «ចូរឲ្យមនុស្សទាំងអស់ឃើញថាអ្នករាល់គ្នាជាមនុស្សសមហេតុសមផល»។ ពេលយើងជាមនុស្សសមហេតុសមផល យើងមិនបារម្ភហួសហេតុពេកអំពីសុខភាពរបស់យើង ហើយយើងមិនព្យាយាមបង្ខំអ្នកឯទៀតឲ្យមានទស្សនៈដូចយើងស្ដីអំពីសុខភាពឡើយ។ យើងស្រឡាញ់និងគោរពបងប្អូនរបស់យើង ទោះជាការសម្រេចចិត្តរបស់ពួកគេខុសពីយើងក្ដី។—រ៉ូម ១៤:១០-១២
១៨. តើយើងអាចបង្ហាញចិត្តកតញ្ញូរបស់យើងចំពោះអំណោយជាជីវិតយ៉ាងដូចម្ដេច?
១៨ យើងបង្ហាញចិត្តកតញ្ញូរបស់យើងចំពោះព្រះយេហូវ៉ាដែលជាប្រភពនៃជីវិត ដោយការពារអាយុជីវិតរបស់យើងនិងបម្រើលោកឲ្យអស់ពីសមត្ថភាព។ (បប. ៤:១១) ឥឡូវយើងនៅតែអាចធ្លាក់ខ្លួនឈឺនិងជួបការពិបាកផ្សេងៗ។ ប៉ុន្តែ នេះមិនមែនជាជីវិតដែលព្រះយេហូវ៉ាចង់ឲ្យយើងនោះទេ។ មិនយូរទៀត លោកនឹងឲ្យយើងមានជីវិតដែលគ្មានទីបញ្ចប់ដោយគ្មានការឈឺចាប់និងសេចក្ដីស្លាប់ឡើយ។ (បប. ២១:៤) ទម្រាំដល់ពេលនោះ យើងសប្បាយដែលយើងមានជីវិត ហើយបម្រើព្រះយេហូវ៉ាជាបិតារបស់យើងដែលប្រកបដោយសេចក្ដីស្រឡាញ់នៅស្ថានសួគ៌។
ចម្រៀងលេខ១៤០ យើងរស់រហូតហើយ!
a អត្ថបទនេះនឹងជួយយើងឲ្យបង្កើនចិត្តកតញ្ញូរបស់យើងចំពោះជីវិតដែលជាអំណោយពីព្រះ។ យើងនឹងពិចារណាអំពីអ្វីដែលយើងអាចធ្វើដើម្បីរក្សាសុខភាពល្អនិងមានសុវត្ថិភាពពេលមានមហន្តរាយ ហើយរបៀបដែលយើងអាចជៀសវាងពីគ្រោះថ្នាក់ផ្សេងៗ។ យើងក៏នឹងពិចារណាផងដែរអំពីអ្វីដែលយើងត្រូវធ្វើដើម្បីត្រៀមខ្លួនពេលមានរឿងបន្ទាន់ខាងសុខភាព។
b ឯកសារនេះក៏បានត្រូវហៅថាលិខិតប្រគល់សិទ្ធិអំណាច។
c សូមមើលវីដេអូដែលមានចំណងជើងថា តើគួរសម្រេចចិត្តយ៉ាងណាអំពីវិធីព្យាបាលដែលទាក់ទងនឹងឈាម?នៅគេហទំព័រjw.org/km។
d ការពណ៌នាអំពីរូបភាព: ប្អូនប្រុសវ័យក្មេងម្នាក់បំពេញលិខិតប្រគល់សិទ្ធិអំណាច ហើយធ្វើឲ្យប្រាកដថាគាត់យកវាជាប់តាមខ្លួន។