1. Әʹмьре мә бәр чʹәʹве Йаһоԝа чьԛас ԛимәт ә?

 БЬДӘ бәр чʹәʹве хԝә кӧ һәвале тә шькьләки кәвьн пʹешкʹеши тә дькә. Ле әԝ шькьл һьнәки хьраб буйә у һьнә тьштед бьчʹук гәрәке бенә чекьрьне. Ле диса жи, ԛимәта ве шькьле дьгьһижә милйона долара. Һьлбәт тӧ ԛимәта ԝи шькьли зани у дьхԝази ԝи бьпарези. Йаһоԝа Хԝәде жи пʹешкʹешәкә гәләк ԛимәт дайә мә. Әв пʹешкʹеш әʹмьре мә йә. Бәле, гава Йаһоԝа әʹмьре Кӧрʹе хԝә ча ԛӧрбан бәрва да, Әԝи нишан кьр кӧ әԝ жийина мә гәләк ԛимәт дькә (Йуһʹәнна 3:16).

2. Ль гора 2 Корьнтʹи 7:1, Йаһоԝа дьхԝазә кӧ әм чь бькьн?

² Йаһоԝа Хԝәде Канийа жийине йә (Зәбур 36:9). Паԝлосе шанди жи баԝәрийа хԝә ве йәке дьани. Әԝи ӧса гот: «Әм бь ԝи дьжин, дьмәшьн у һәнә» (Кʹаред Шандийа 17:25, 28). Ләма жи әм дькарьн бежьн, кӧ әʹмьре мә дайина Хԝәде йә. Әԝ мә һʹьз дькә у һәр тьште кӧ бона жийине лазьм ә, дьдә мә (Кʹаред Шандийа 14:15-17). Ле Йаһоԝа сәва кӧ әʹмьре мә хԝәй кә, кʹәрәмәта накә. Дәԝсе әԝ дьхԝазә ԝәки әм гӧһ бьдьнә сьһʹәт-ԛәԝата хԝә, кӧ бькарьбьн бәрдәԝам кьн жерʹа хьзмәт кьн (Бьхунә 2 Корьнтʹи 7:1). Чьрʹа әм гәрәке мьԛати сьһʹәт-ԛәԝата хԝә бьн у әм ча дькарьн ве йәке бькьн?

3. Мәʹник кӧ чьрʹа әм гәрәке мьԛати сьһʹәт-ԛәԝата хԝә бьн, чь йә?

³ Мәʹник кӧ чьрʹа әм гәрәке мьԛати сьһʹәт-ԛәԝата хԝә бьн, әԝ ә кӧ әм дьхԝазьн һʹәта кӧ мә те, Йаһоԝарʹа хьзмәт кьн (Марԛос 12:30). Әм дьхԝазьн «ԛальбе  хԝә тʹәсмили Хԝәде кьн чаԝа ԛӧрбанәкә сах, пироз, ль Хԝәде ԛәбул» (Рʹомайи 12:1). Ләма жи әм тьштед ӧса кӧ дькарьн зьраре бьдьн сьһʹәт-ԛәԝата мә, накьн. Һьлбәт, щарна дәсте мәда нинә кӧ әм нәхԝәш нәкʹәвьн. Ле әм хирәт дькьн кӧ мьԛати сьһʹәта хԝә бьн, чьмки әм дьхԝазьн Баве хԝәйи әʹзманарʹа нишан кьн, ԝәки әм ԛимәт дькьн жийина кӧ әԝи дайә мә.

4. Даԝьд Пʹадша дьхԝәст чь бькә?

⁴ Даԝьд Пʹадша гот кӧ чьрʹа әԝи әʹмьр ԛимәт дькьр. Әԝи ӧса гот: «Хуна мьне чь кʹаре бьдә, һәгәр әз бькʹәвьм ах-бәре сар? Гәло халийе пәсьне Тә бьдә? Йан рʹастийа Тә ԝе сальх кә?» (Зәбур 30:9). Дьбәкә Даԝьд әв готьн хьлазийа әʹмьре хԝәда ньвиси. Ле әʹмьре хԝәйә мәзьнда жи, әԝи нәдьхԝәст бьмьрә у һʹәта кӧ дькарьбу дьхԝәст Йаһоԝарʹа хьзмәт бькә. Бешьк, һʹьзрәта дьле мә жи әв ә.

5. Әм әʹмьрда чьԛас мәзьн бьн жи йан чьԛас нәхԝәш бьн жи, гәло әм дькарьн чь бькьн?

⁵ Жь бо нәхԝәши у әʹмьре мәзьн дьбәкә әм ида нькарьн ча бәре гәләк тьшта бькьн. Ләма жи дьбәкә әм бона һʹале хԝә хәмгин ьн у бәрхԝә дькʹәвьн. Ле диса жи, әм гәрәке һʹәта кӧ дәсте мә те, рʹьнд мьԛати сьһʹәта хԝә бьн. Гәло чьрʹа? Чьмки әм әʹмьрда чьԛас мәзьн бьн жи, йан әм чьԛас нәхԝәш бьн жи, әм дькарьн мина Даԝьд Пʹадша пәсьне Йаһоԝа Хԝәде бьдьн. Һʹале мә чаԝа бә жи, әʹмьре мә бәр чʹәʹве Йаһоԝа гәләк ԛимәт ә у занәбуна ве йәке дьле мә рʹьһʹәт дькә! (Мәтта 10:29-31) Һәрге әм бьмьрьн жи, һʹьзрәта дьле Йаһоԝа әԝ ә, кӧ мә диса жь мьрьне рʹакә (Ибо 14:14, 15). Бәле, һʹәта кӧ әм сах бьн, әм дьхԝазьн бь дьл у щан сьһʹәт у жийина хԝә бьпарезьн.

6. Хԝарьн у вәхԝарьнеда, Йаһоԝа дьхԝазә кӧ әм чь бькьн?

⁶ Рʹаст ә Кʹьтеба Пироз нә кʹьтебәкә ширәтед бона сьһʹәт-ԛәԝат у хԝарьне йә. Ле диса жи, әԝ мәрʹа дьбежә кӧ Йаһоԝа дәрһәԛа ван тьшта чь дьфькьрә. Мәсәлә, Кʹьтеба Пироз ве ширәте дьдә мә: «Хьрабийе жь бәдәна хԝә дур бьгьрә» (Ԝаиз 11:10 ИМ). Кʹьтеба Пироз дьбежә кӧ әм гәрәке гәләк пәй хԝарьн у вәхԝарьна ичке нәкʹәвьн. Чьмки тьштед ӧса дькарьн зьраре бьдьн сьһʹәта мә у һәла һе әʹмьре мә жи бькьнә бьн хофе (Мәтʹәлок 23:20). Йаһоԝа жь мә дьхԝазә ԝәки әм хԝарьн у вәхԝарьнеда хԝә контрол кьн (1 Корьнтʹи 6:12; 9:25).

7. Ширәта жь Мәтʹәлок 2:11 чаԝа али мә дькә, ԝәки әм һьндава сьһʹәт-ԛәԝата хԝә сафикьрьнед баш бькьн?

⁷ Гава әм һʹьш-аԛьле хԝә дьдьнә хәбате, ԝәки сафикьрьнед баш бькьн, әм жь дьл рʹазибуна хԝә бона әʹмьре кӧ Хԝәде дайә мә, нишан дькьн (Зәбур 119:99, 100; бьхунә Мәтʹәлок 2:11). Мәсәлә, әм гәрәке рʹьнд бьфькьрьн кӧ әм чь дьхԝьн. Һәрге тӧ хԝарьнәке һʹьз дьки, ле зани кӧ әԝ хԝарьн дькарә зьраре бьдә тә, тӧйе ԝе хԝарьне нәхԝи, ӧса нинә? Ӧса жи әм сәрԝахтийе нишан дькьн, гава епʹещә хәԝа хԝә дьстиньн, спортева мьжул дьбьн, у мал у бәдәна хԝә тʹәмьз хԝәй дькьн.

8. Ль гора Кʹьтеба Пироз, сьһʹәт-ԛәԝата мә бәр чʹәʹве Йаһоԝа чьԛас фәрз ә?

⁸ Ԛануна кӧ Йаһоԝа дабу Исраелийа али ԝан дькьр, ԝәки әԝана чаԝа малда, ӧса жи щийе хәбате хԝә жь ԛәзийед гьран бьпарезьн (Дәркʹәтьн 21:28,  29; Ԛануна Дӧщари 22:8). Мәсәлә, һәрге мәрьвәки кәсәки дьн ньшкева бе һʹәмде хԝә бькӧшта, әве йәке жерʹа ахьрийа хьраб дьани (Ԛануна Дӧщари 19:4, 5). Ль гора Ԛануна Хԝәде, кәсе кӧ зьрар дьда әʹмьре зарʹа нәбуйи, дьһатә щәзакьрьне (Дәркʹәтьн 21:22, 23). Хәбәра Хԝәде зәлал дьбежә кӧ Йаһоԝа дьхԝазә, ԝәки әм мьԛати сьһʹәт-ԛәԝата хԝә бьн.

9. Әм чаԝа дькарьн фәсал бьн у жь ԛәзийа хԝәйкьри бьн? (Бьньһерʹә ӧса жи шькьл.)

⁹ Һәрге әм малда у щийе хәбата хԝә мьԛати сьһʹәт-ԛәԝата хԝә бьн, әме рʹазибуна хԝә бона жийине бьдьнә кʹьфше. Мәсәлә, әԝ тьштед кӧ дькарьн мә бьриндар кьн, йан жи тьштед хими, жәʹр у ӧса жи дәрман, әм давежьнә ван щийа, кӧ зьрар нәгьһижә тʹӧ кәси. Ӧса жи, әм нахԝазьн кӧ әв тьшт бәр дәсте зарʹа бьн, ԝәки әԝана хԝә пе ван бьриндар нәкьн. Гава кӧ әм агьр ведьхьн, аве дькʹәлиньн йан жи һащәтед кӧ дькарьн зийане бьдьн, дьдьнә хәбате, әм гәрәке гәләк фәсал бьн у тьштед ӧса пьшт гӧһе хԝәва нәвежьн. Ӧса жи, һәрге әм бьн һʹӧкӧме дәрманада бьн, йан вәхԝари бьн, йан жи хәԝа  мә бе, әм гәрәке әʹрәбе нәжон. У чахе әм әʹрәбе дажон, әм гәрәке тʹеле дәсте хԝәда нәгьрьн у пе мьжул нәбьн.

10. Әм дькарьн пешийа у ԝәʹде тʹәшԛәла, чь бькьн?

¹⁰ Әм нькарьн хԝә жь һʹәму ԛәзийа хԝәй кьн. Илаһи, гава тʹәшԛәлед тʹәбийәте дьԛәԝьмьн, нәхԝәши бәла дьбьн йан жи шәрʹ у зорбәти дьԛәԝьмьн. Ле гава кӧ тьштед ӧса ньшкева дьԛәԝьмьн, әм дьхԝазьн сах-сьламәтийа хԝә бьпарезьн. У һәрге дәԝләт ԛәдәхә бькә кӧ дәркʹәвьн дәрва, йан бежә кӧ гәрәке әм мала хԝә бьһельн у һәрʹьн щики дьн, йан жи һәрге рʹебәрикә дьн бьдә, әме гӧһ бьдьн ве рʹебәрийе, ԝәки әʹмьре хԝә нәкьнә бьн хофе (Рʹомайи 13:1, 5-7). Әм дькарьн хԝә бона тʹәшԛәла пешда һазьр кьн. Ләма жи ԝе баш бә, кӧ әм ль гора рʹебәрийа сәрԝеред дәԝләте бькьн. Мәсәлә, әм дькарьн ньһада ав, хԝарьна кӧ зу хьраб набә у чәнтʹе аликʹарийа пешьн, хԝәрʹа һазьр кьн.

11. Һәрге нәхԝәшик бәла бьбә, әм гәрәке чь бькьн?

¹¹ Һәрге щийе кӧ әм дьжин нәхԝәшик бәла бьбә, әм гәрәке чь бькьн? Әм гәрәке гӧһ бьдьн тʹәмийед дәрһәԛа шуштьна дәста, хԝәйкьрьна дистансийайе, хәбьтандьна маске у карантине. Һәрге әм ван тьшта бькьн, әме нишан бькьн ԝәки әм жийина кӧ Хԝәде дайә мә, гәләк ԛимәт дькьн.

12. Мәтʹәлок 14:15 чаԝа али мә дькә, ԝәки әм ԝәʹде тʹәшԛәла бьзаньбьн кӧ кʹижан әʹламәти бь итʹбар ьн?

¹² Ԝәʹде тʹәшԛәла, щарна әм жь һәвалед хԝә, щинаред хԝә йан жи жь нуча хәбәред нәрʹаст дьбьһен. Дәԝса кӧ әм «һәр готьне» баԝәр бькьн, дьһа баш ә әм гӧһ бьдьн готьнед дәԝләте у дохдьра, йед кӧ бь итʹбар ьн (Бьхунә Мәтʹәлок 14:15). Кʹома Рʹебәрийе у Бәйтʹәл пешийа кӧ дәрһәԛа щьвина у хьзмәткьрьне рʹебәрийе бьдьн, әԝана һәр тьшти дькьн, ԝәки информасийа рʹаст дәст хьн (Ибрани 13:17). Һәрге әм гӧһ бьдьн ве рʹебәрийе, әме сах-сьламәтийа хԝә у йа кәсед дьн жи бьпарезьн. Ӧса жи әме ча Шәʹдед Йаһоԝа бәр чʹәʹве хәлԛе навәки баш ԛазанщ кьн (1 Пәтрус 2:12).

13. Әм ча нишан дькьн, ԝәки әм ԛимәта жийине заньн, чахе дәрһәԛа хуне гӧрʹа ԛануна Йаһоԝа дькьн?

¹³ Гәләк мәрьв заньн ԝәки әм ча Шәʹдед Йаһоԝа бәридайина хуне ԛәбул накьн, чьмки хун бәр чʹәʹве мә пироз ә. Әм гӧһ дьдьн ԛануна Йаһоԝа дәрһәԛа хуне у һәла һе һʹаләки чәтьнда жи, әм хуне бәри хԝә надьн (Кʹаред Шандийа 15:28, 29). Ле әв найе һʹәсабе кӧ әм дьхԝазьн бьмьрьн. Жийин бәр чʹәʹве мә гәләки ԛимәт ә. Ләма жи әм дьчьн бал дохдьред ӧса кӧ һазьр ьн ԛәнщкьрьна һәри баш бьдьнә мә, ле бе бәридайина хуне.

14. Әм чаԝа дькарьн кем бькʹәвьнә ԛәзийа?

¹⁴ Һәрге әм ль гора ширәтед ве готареда жийина хԝә бьпарезьн, ԝи чахи әм дькарьн кем рʹасти нәхԝәшийед гьран бен, у кем һʹәԝще операсийайе бьн. Ле һәрге тьштәки ӧса лазьм бә жи, ве йәке бир нәкә: Мәрьве кӧ рʹьнд мьԛати сьһʹәта хԝә дьбә, паши операсийайе зу ԛәнщ дьбә. Ӧса жи, һәрге әм малда у сәр хәбата хԝә фәсал бьн, у гӧһ бьдьн ԛанунед трафике, әме кем бькʹәвьнә ԛәзийа.

15. (а) Чьма гәләк фәрз ә кӧ әм бланка хуне тʹьме щәм хԝә бьһельн? (Бьньһерʹә ӧса жи шькьл.) (б) Чаԝа кӧ видеойеда һатьбу нишан кьрьне, әм чаԝа дькарьн дәрһәԛа хуне сафикьрьнед баш бькьн?

¹⁵ Әм бона жийине гәләк рʹази нә,  ләма жи әм бланка хуне тʹьжә дькьн у тʹьме щәм хԝә дьһельн. Ве бланкеда, әм хԝәстьна хԝә дәрһәԛа бәридайина хуне у һьнә щурʹед ԛәнщкьрьне дьньвисьн. Гәло әв бланка хуне щәм тә тʹьжәкьри йә у тʹәзә йә? Һәрге на, ве йәке зу бькә. Һәрге әм хԝәстьна хԝә бь зәлали бьньвисьн, әме бона хәбәрдана тʹәви дохдьра ԝәхта хԝә ӧнда нәкьн у ԛәнщкьрьне зу дәстпекьн. Ӧса жи, дохдьр ԝе бьвиньн кӧ әм кʹижан ԛәнщкьрьн йан дәрманед кӧ дькарьн зьраре бьдьнә мә, ԛәбул накьн. b

16. Һәрге әм ньзаньн ча бланка хуне тʹьжә кьн, әм дькарьн чь бькьн?

¹⁶ Әм щаһьл бьн йан сьһʹәт-ԛәԝата мә баш бә, диса жи ԛәзи дькарьн бьԛәԝьмьн у әм дькарьн нәхԝәш кʹәвьн (Ԝаиз 9:11). Ләма жи гәләк фәрз ә кӧ әм бланка бона хуне тʹьжә кьн. Һәрге тӧ ньзани ча ве бланке тʹьжә ки, тӧ дькари жь рʹуспийед щьвата хԝә аликʹарийе бьхԝази. Әԝана заньн кӧ ча ве бланке тʹьжә кьн. Ле әԝана нькарьн дәԝса тә сафикьрьна бькьн. Әв щабдарийа тә йә (Галати 6:4, 5). Әԝана дькарьн тәрʹа бежьн кӧ чь мәщал һәнә у тӧ чаԝа дькари хԝәстьнед хԝә бьньвиси.

17. Әм чаԝа дькарьн алийе сьһʹәт-ԛәԝатеда бәрбьһерийе нишан кьн?

¹⁷ Алийе сьһʹәт-ԛәԝат у щурʹе ԛәнщкьрьнеда, әм гәләк сафикьрьнед хԝә ль гора исафа хԝәйә бь Кʹьтеба Пироз һинкьри дькьн (Кʹаред Шандийа 24:16; 1 Тимотʹейо 3:9). Гава әм сафикьрьнед ӧса дькьн, у тʹәви кәсед дьн дәрһәԛа ве йәке хәбәр дьдьн, ԝе баш бә кӧ әм готьнед жь Филипи 4:5 бир нәкьн: «Бьра бәрбьһерийа ԝә һʹәму мәрьвава әʹйан бә». Һәрге әм бәрбьһер у сәрԝахт бьн, әме дәрһәԛа сьһʹәт-ԛәԝата хԝә гәләк хәм нәкьн. Ӧса жи, әме зоре нәдьн кәсед дьн кӧ әԝана ньһерʹандьна мә ԛәбул кьн. Һәрге хушк-бьред мә сафикьрьнед щӧдә бькьн жи, диса жи әме ԝана һʹьз бькьн у ԛәдьре ԝан бьгьрьн, у ньһерʹандьна хԝә һьндава ԝанда нәгӧһезьн (Рʹомайи 14:10-12).

18. Әм чаԝа дькарьн нишан кьн кӧ әм бона жийине рʹази нә?

¹⁸ Һәрге әм жийина хԝә бьпарезьн у бь дьл у щан Йаһоԝарʹа хьзмәт бькьн, әме рʹазибуна хԝә ԝирʹа нишан кьн. Әԝ Канийа жийине йә (Әʹйанти 4:11). Йазьх, иро әм нәхԝәш дькʹәвьн у рʹасти ԛәзийа тен. Ле Әʹфьрандаре мә жийинәкә ӧса бона мә нәдьхԝәст. Зутьрәке, Хԝәде ԝе жийина һʹәта-һʹәтайе бьдә мә. Ԝи чахи, тʹӧ кәс ԝе еше нәкʹьшинә у нәмьрә (Әʹйанти 21:4). Ле шькьр жь Баве мәйи әʹзманарʹа кӧ әм ньһа дьжин у ԝирʹа хьзмәт дькьн!