1. Vɛɛ kpɛ yoomu naa cho yɛ o sɔvɛ Chɛhowa o hɔl?

 YIYAŊNDƆ maa chaaŋ num ke num fotuei paandu paandu nda dɔu o sanioo niŋndo. Fotueiyo hoo cho tiŋ o huliɛi, nduyɛ mbo nɔ sɔŋndaŋ. Sani nda dɔu ndu niŋndo bɛɛ cho o tɛɛndiɛi. Kɛ a sɔŋndaŋ ndaŋ kpou, baa fotueiyo hoo wa le kaniŋ mapuuloŋ o miiliɔŋndaŋ niŋ. O kpeekpei niŋ, ma nɔ balika melaa tau le fotuei o ke num koŋ ndo, nduyɛ ma chaa ndu biyɔɔ nyɛkɛndɛi. O nɛi pilɛ koŋ choo, Chɛhowa ke naa ke sɔvɛ sɔviɔɔ. Ndu cho yɛ yoomoo ni. Nduyɛ pɛŋ, mi Chɛhowa chɔm mɛɛ kpɛ o che yoomu naa o sɔvɛ yɛ mɛɛ o yɔŋgu Po ndɔɔ le naa baŋaa.​—Chɔŋ 3:16.

2. A mɛɛ 2 Kɔliŋtiaŋ 7:1 dimi yɛ, yɛɛ Chɛhowa yeema yɛ naa miŋ tosa?

² Chɛhowa ke naa yoomoo ni. (Sam 36:9) Kiilanɔɔ Pɔɔl bɛɛ ndoo sina maa hei cho tonya. Lelaŋ mbo dimi aa: “Ndu ke naa yoomoo ni. Ndu tosa ni miŋ wa balɔɔ, nduyɛ miŋ wa achal.” (Walta. 17:​25, 28) Lelaŋ ŋ nɔla miŋ dimi a yoomu naa okɔɔ maa, ke fula Mɛlɛka o ba wo o cho ni. Le mɛɛ o kaala naa yɛ, mbo ke naa nyɛm naŋ hauba le waa yoomu woŋ. (Walta. 14:​15-17) Kɛ, Chɛhowa tosa kaamaa le yoomula naalaŋ mandaa le. O yeema naa miŋ tosa nyɛ o nyɛ naŋ tiuba le miŋ wa kɛndiaa o dialloŋ niŋ, vɛlɛ a o ndu piɛiyo niŋ. (Nuawɔ 2 Kɔliŋtiaŋ 7:1.) Le yɛɛ naŋ nɔ yɛ miŋ kindiŋ o nɛi o nɛi niŋ le miŋ wa kɛndiaa, vɛlɛ miŋ manda yoomu naa? Nduyɛ vɛɛ naŋ tosa yɛ hei?

3. Ɔɔ saboo opilɛ o naŋ kindiŋ le waa kɛndiaa wo?

³ Saboo opilɛ o naŋ nɔ miŋ kindiŋ le waa kɛndiaa wo cho ni, le waa Chɛhowa piɛiyo a yoomuma naŋ kpou. (Maki 12:30)  Ŋ nɔ yeemɛi le miŋ yɔŋgu “dialuŋ [naŋ] maa sala cho yoomu wo, o dendu nduyɛ mi Mɛlɛka chɛl ndu wo.” Le hei, miŋ fafaŋ sɔɔŋ tosaa, ŋ naŋ sina maa ŋ cho kɛndiaa naa luei o kpundɔɔ niŋndoŋ. (Luomaŋ. 12:1) A koŋ kpou, mɛɛ mɛɛ naŋ tosa, ŋ tiuba miŋ nɔ kɛndiaa walaŋndo le. Kɛ miŋ tosa nyɛ o nyɛ naŋ tiuba le miŋ wa kɛndiaa kanifuule, ŋ yeema miŋ chɔm Finya naa o choo choo niŋ maa ŋ nɔ balika melaa le yoomu o ke naa wo.

4. Yɛɛ wa yɛ yeemɛi Masaa Deeve ve?

⁴ Mi Masaa Deeve tɛɛsiaa sabu o che yoomu Mɛlɛka ke naa wo o sɔvɛ wo. Mbo dimi aa: “Te I vi pɛ, ɔɔ tɔnɔ ŋ sɔla o ya niŋ ndo? Te dialuŋ nuŋ ŋ kuɛ o sɛiyo niŋ, mi ŋ simnuŋ puulu pɛ, puulu fondo koŋ o nɔla pa mbo saŋgala num? Te waŋndo o vi niŋ pɛ, o nɔla lɛ mbo saŋgala num? O nɔla mbo chɔm waŋnda a mɛɛ ŋ cho o tonyaa choo le lɔɔ lɔɔ yɛ?” (Sam 30:9) Naapum a mɛɛlula yoomu ndɔɔ Deeve poonyiaa diomndaŋ ndaŋ ni. Deeve ndoo yeema mbo nɔ kɛndiaa sɔviɔɔ, nduyɛ mbo wa yoomu le halikpeŋ mbo hiou lachi a Chɛhowa piɛiyo. Naa bɛɛ, yeemɛi pilɛi keŋ kpe naŋ nɔ ni.

5. Mɛɛ mɛɛ naŋ wa a yuuwɛi ɔɔ miŋ wa a naa, yɛɛ naŋ tiu yɛ ba le tosaa?

⁵ Lepum, mi yuuwɛi, a dialii nɛyɛi kuuna naa sɔɔŋ bɔɔbɔɔ naŋ tosa paandu woŋ tosaa. Mi hei tosa lepum miŋ tambu kɔl. Kɛ ŋ nɔ miŋ tosa nyɛ o nyɛ naŋ tiuba le miŋ wa kɛndiaa. Le yɛɛ? Kanifuule maa Masaa Deeve, mɛɛ mɛɛ naŋ yuuwa ɔɔ miŋ wa a naa, ŋ tiu wɔ ba kɛ miŋ piɛi Chɛhowa. Nuawɔ se mɛɛ i cho suɛi kɔl dɛɛniaa le sinaa maa ŋ cho a sɔvɛ Mɛlɛka o hɔl lɛ, o yɔŋ bɛɛ miŋ wa a naa ɔɔ miŋ wa a yuuwɛi! (Maa. 10:​29-31) O yɔŋ bɛɛ miŋ sɔla piɔmndo, o cho hunɔɔ naa miŋgi yoomu. (Choobu 14:​14, 15) Lelaŋ teleŋ naŋ cho hoo yoomu wo, ŋ nɔ miŋ tosa nyɛ o nyɛ naŋ tiuba le kɛndiaa sɔviɔɔ nɔɔ, vɛlɛ a le yoomu naa mandaa.

6. Yɛɛ Chɛhowa yeema yɛ naa miŋ tosa te o hiŋ pɛ a nyɛdiaa dioo okɔɔ, vɛlɛ a muɛiyaŋ kolɔɔ?

⁶ Mi che bɛɛ Baabuiyo suu a kɛndiaa ɔɔ nyɛdiaa suu naŋ nɔ miŋ de wo okɔɔ le, kɛ o chɔm yiyaŋ Chɛhowaa o sɔɔŋ muŋ choo. Le tamaseliiyo, Chɛhowa dimul naa le miŋ ‘fafaŋ nyɛ o nyɛ tɛɛmbuu dialuŋ naŋ.’ (Ikili. 11:10) Baabuiyo pɛɛsa kolɔɔ bɛndoo a pululeŋ. Sɔɔŋ muŋ kpou luei yoomu naa o kpundɔɔ niŋ. (Pulɔ. 23:20) Chɛhowa yeema naa miŋ dɔu naapila o mandaa bɛŋgu, te ŋ wa pɛ kɛɛsiaa tosaa le nyɛdiaa suu naa nɔ miŋ de wo, mɛɛ kpɛ naŋ nɔ miŋ de ndu yɛ, muɛima suu naŋ nɔ miŋ kolaŋ, vɛlɛ a mɛɛ kpɛ naŋ nɔ miŋ kol maŋ yɛ.​—1 Kɔliŋ. 6:12; 9:25.

7. Vɛɛ sila cho o Pulɔwaa 2:11 niŋndo mala yɛ naa le miŋ tosa kɛɛsiaala sɔvɛlaŋ a kɛndiaa naa okɔɔ?

⁷ Ŋ tiuba miŋ tosa kɛɛsiaala sɔvɛlaŋ le balika melaa chɔmndo le yoomu Mɛlɛka ke naa wo, te ŋ soliŋ pɛ kɔl kalu naa kpeku nyɛkɛndɛi. (Sam 119:​99, 100; nuawɔ Pulɔwaa 2:11.) Le tamaseliiyo, ŋ nɔ miŋ yiyaŋ nyɛkɛndɛi a nyɛdiaa suu naŋ nɔ miŋ de wo okɔɔ. Te ŋ hɛnaŋ pɛ nyɛdiaa opum, kɛ miŋ sina maa mbo paaliaŋ kɛndiaa naa, taasioo mala naa miŋ fafaŋ ndu dioo. Ŋ chɔm vɛlɛ maa ŋ cho wanaa taasi, te ŋ wa pɛ luaŋ nyɛkɛndɛi, dialloŋ hiiloo teleŋ o teleŋ, pulɔŋndo lɔɔlɔɔ, nyɛla naalaŋ tɔɔ, vɛlɛ a chiɛila naalaŋ dindioo.

8. Vɛɛ Baabuiyo chɔm yɛ yiyaŋ Mɛlɛkaa a naapila mandaa okɔɔ, te ŋ wa pɛ nyɛ o nyɛ tosaa?

⁸ Sawala Mɛlɛka ndoo ke Isɔluɛiya laŋ la mala naa miŋ fafaŋ sɔɔŋ tosa mi sulɛi hɛluŋ  naa ve, o wa o la naalo bɛɛ ɔɔ naa naŋ tosa wallo wa. (Ɛsɔ. 21:​28, 29; Ditɔnɔ. 22:8) Te sulɛi ndii hɛluŋ pɛ waŋndo, okoŋ mbo dii waŋndo, hali mbo ve bɛɛ kpɛsɛkɛɛ le, mi wana sulɛi hɛluŋ koŋ ndo ndoo sɔla fulamakɔɔlila wɔɔŋndaŋ tau. (Ditɔnɔ. 19:​4, 5) Mi sawaa dimi maa, te waŋndo ndoo tosa pɛ mi chɛlɛkpɛ ndoo viluŋ ndɔ le wo sɔla piɔmndo, mbo ve bɛɛ kpɛsɛkɛɛ le, ndaa nɔ ma tusi wana koŋ nyɛpalaa choo. (Ɛsɔ. 21:​22, 23) Baabuiyo chɔm kpendekele maa Chɛhowa yeema naa miŋ mandaŋ, te ŋ wa pɛ nyɛ o nyɛ tosaa.

9. Sɔɔŋ kuɛɛ naŋ nɔ yɛ miŋ tosa le, te ŋ yeema mi sulɛi hɛluŋ naa le? (Tofa vɛlɛ fotueilaŋ.)

⁹ Ŋ chɔm balika melaa le yoomu Mɛlɛka ke naa wo, te ŋ kindiŋ pɛ le naapila mandaa o naalo bɛɛ, vɛlɛ a naa naŋ tosa wallo wa. Le tamaseliiyo, te ŋ wa pɛ nyɛm luɛiyaŋ, vɛlɛ a kooma tɛɛmbuu kɛndiaa wanachioo waŋ kɛsioo, ŋ nɔ miŋ kɛsi kpendekele le. Kɛ ŋ nɔ miŋ veŋ muŋ naa chuaambuaa seeluŋ muŋ te wa. Ŋ nɔ vɛlɛ miŋ wa yekeŋ te ŋ mɛndul pɛ yiŋndeŋ, miŋ wa chuɛiyaŋ yauwo ɔɔ miŋ soli chiliŋii tuu ve o yiŋ. Ŋ nɔ miŋ faŋaŋ ikɛi kposoŋ miŋ kuɛ sɔɔŋ cheleŋ tosaa le. Te ŋ chua  pɛ kooma dii wana dialloŋ ndaŋ ɔɔ miŋ kol muɛiyaŋ mi ma bii naa, ŋ nɔ miŋ nyaanuŋ mɔmbillo kposoŋ te. Ŋ nɔ vɛlɛ miŋ tosa hei le, te luaŋ ma wa naa pɛ o hɔl. Nduyɛ ŋ nɔ kposoŋ miŋ wa foŋndo soliŋndo kpeku a teleŋ naŋ wa mɔmbillo nyaanɔŋndo wo le.

10. Yɛɛ naŋ nɔ yɛ miŋ tosa tuupa mi kpundɔɔ del ɔɔ te o del pɛ?

¹⁰ Teleŋndaŋ lapum, ŋ nɔla miŋ kɛɛlu sɔɔŋ luei yoomula naalaŋ o kpundɔɔ niŋndoŋ yɔŋnɔŋndo le. Sɔɔŋ muŋ ŋtiŋ cho ni, kpundɛla yɔŋnuŋ ndaŋ, naala taŋ waŋnda laŋ a delɔɔla choo laŋ. Te sɔɔŋ waa nuaa yɔŋnuŋ pɛ, ŋ nɔla miŋ manda yoomula naalaŋ, te ŋ chal pɛ o la naalo bɛɛ, nduyɛ miŋ diikuŋ nɛila chɔmaala masaa waa yɔŋgu laŋ. (Luomaŋ. 13:​1, 5-7) Ŋ nɔla miŋ bɛɛndiaŋ le kpundɛlaŋ lapum, te ŋ tol nɛila chɔmaala masaa waa cho wa naa kioo laŋ kɔɔli pɛ. Le tamaseliiyo, ŋ nɔla miŋ wou mɛŋndaŋ, nyɛdiaa tembu le wo, vɛlɛ a kooma mialaŋ o bɔlɔɔ niŋ le wana sinaŋ dɛnɛ loo.

11. Te naa taŋ waŋnda wo del pɛ o fondaŋ naa, yɛɛ naŋ nɔ yɛ miŋ tosa?

¹¹ Yɛɛ naŋ nɔ yɛ miŋ tosa te naa taŋ waŋnda wo del pɛ o fondaŋ naa? Ŋ nɔ miŋ diikuŋ nɛila chɔmaala masaa waa cho naa wa kioo laŋ. Le tamaseliiyo, ŋ nɔ miŋ wa balaŋ pulɔɔ, miŋ pɛŋgi holiaŋndo, miŋ wounuŋ kanda miliŋndo, nduyɛ miŋ chal o la naalo bɛɛ. Te ŋ kindiŋ pɛ kpoke le sɔɔŋ muŋ tosaa, mɛɛ ŋ cho chɔm kɛsɛ maa ŋ nɔ bɛɛleŋ le yoomu Mɛlɛka ke naa hoo wo.

12. Vɛɛ sawa mandaa cho o Pulɔwaa 14:15 niŋndo mala yɛ naa, le sinaa yooŋgula naŋ nɔ miŋ yaŋ nilaŋ ndaŋ, te kpundɔɔ del pɛ?

¹² Te kpundɔɔ del pɛ, lepum mi chaaŋaa naa, wanaa naŋ chiɛɛliaŋnda a wanaa yɔŋgu yooŋgulaŋ o alaadioo choo wa dimul naa sɔɔŋ ve tonya le woŋ. Ŋ nɔ miŋ yaŋ sɔɔŋ waa nuaa lani le. Kɛ ŋ nɔ miŋ yaŋ nyɛ masaa waa a wanaa chiɔuwaa dimul naa wo nilaŋ. (Nuawɔ Pulɔwaa 14:15.) Mi Dialii Kuumbaŋ Choo Ve a lɛuwoŋ kindiŋ tau le yooŋgula tonyalaŋ sɔlaa fɛlɛŋ tuupa ma ke naa nɛila chɔmaalaŋ a bɔŋaŋndaŋ, vɛlɛ a wali dimiaa yooŋgu kɛndɔɔ okɔɔ. (Hibu. 13:17) Te ŋ tol pɛ nɛila chɔmaalaŋ ndaŋ kɔɔli, ŋ cho naapila manda a wanaa cheleŋ. Hei tosaa mala vɛlɛ wanaa cheleŋ, le ma nɔ yiyaŋ kɛndɔɔ a Seiyaa Chɛhowaa okɔɔ.​—1 Pitɛ 2:12.

13. Vɛɛ naŋ chɔm yɛ maa ŋ nɔ bɛɛleŋ le yoomu Mɛlɛka ke naa wo, te o hiŋ pɛ a kooma hiviaŋ okɔɔ?

¹³ Wanaa bɔɔbɔɔ sina maa, Seiyaa Chɛhowaa che bɔɔ koowaŋ nyɛ sɔvɛ. Te ŋ kɛɛ pɛ le ma hivi naa koowaŋ o ŋdial, o yɔŋ bɛɛ miŋ wa a naa kala kalaa, mɛɛ sawa Chɛhowa dɔu a koowaŋ okɔɔ wo naŋ wa koŋ diikɔŋndo ni. (Walta. 15:​28, 29) O yɔŋ bɛɛ miŋ kɛɛ danda waa nuaa, keŋ sim nuaa maa piɔmndo le naŋ yeema sɔlaa le. Kɛ o baa pilɔɔ choo, chɔmndo naŋ wa koŋ ni maa ŋ nɔ bɛɛleŋ le yoomu Mɛlɛka ke naa wo. Nduyɛ pɛŋ, miŋ nyuna wanaa chiɔuwaa chɛl le ma ke naa danda kɛndɛ kɛndɔɔ, a hivi naa makoŋgo o ŋdial te wa le ma chiɔu naa.

14. Yɛɛ naŋ nɔ yɛ miŋ tosa le naa malaa ŋ del a naa kala kala le?

¹⁴ Te ŋ dɔu pɛ sɔɔŋ naŋ pɛɛku o buŋgɛi hei niŋndoŋ o wali niŋ, naapum keŋ cho naa mala ŋ del a naa kala kala le. Te ŋ wa pɛ kpeŋgbeleŋ o dialloŋ niŋ, ŋ nɔla miŋ keleŋa sioŋgɔɔ o yɔŋ bɛɛ ma yambu naa. Ŋ tiuba vɛlɛ miŋ fafaŋ danda choŋ choŋndo, te ŋ faaŋiaa pɛ nyɛm yɔŋul wana woŋ o fondaŋ naa a o fondaŋnda naala waltaŋ. Ŋ tosa vɛlɛ hei te ŋ diikuŋ pɛ sawala cho a mɛɛ wana kua a nyɛm nyaanaŋndoŋ yɛ.

15. (a) Le yɛɛ i cho yɛ suɛi sɔvɛ le yau makoŋgoo nɔɔ o ba a yooŋgula sɛnɛilaŋ lechoo? (Tofa vɛlɛ fotueiyo.) (b) A mɛɛ vidueiyo chɔm yɛ, vɛɛ naŋ tosa yɛ kɛɛsiaa kɛndɔɔ te o hiŋ pɛ a danda hiviaa makoŋgoo okɔɔ?

¹⁵ Le mɛɛ naŋ nɔ balika melaa le yoomu Mɛlɛka ke naa wo yɛ, miŋ peelu yau makoŋgoo, nduyɛ mbo wa naa o ba teleŋ o teleŋ. b Mi yauwo hoo mala naa le wana chiɔuwaa tɛɛsiallo yiyaŋ naŋ nɔ a kooma hiviaŋ okɔɔ wo, vɛlɛ a danda suu naŋ yeema wo. Baa yauwo hoo cho pa o peela num o ba a yooŋgula sɛnɛilaŋ leniŋ? Te a nɔ pɛ le yauwo hoo peeloo ɔɔ le yooŋgula paandula cho leniŋ ndaŋ si­ŋgaa, mɛɛ kɛsu kɛsuu ndi le. Te a poonyiaa pɛ yiyaŋ numndo nyɛkɛndɛi o yauwo hoo choo, keŋ cho num mala ma keleŋa danda ŋ yeema wo sɔla. Mi hei mala vɛlɛ wanaa chiɔuwaa a hiŋnuŋ lahɔl, okoŋ ma tosa nyɛ paaliaŋ kɛndiaa naa wo le. c

16. Yɛɛ ŋ nɔ yɛ ma tosa te a sina mɛɛ ŋ peelu yau makoŋgoo yɛ le?

¹⁶ Ŋ wa feleŋgɔnɔ ɔɔ ŋ wa kɛndiaa, mi naa kpou yɔŋuluŋ, nduyɛ miŋ del a naa. (Ikili. 9:11) Lelaŋ, i cho suɛi taasi le miŋ peelu yau makoŋgoo. Te a sina mɛɛ ŋ peelu yauwo hoo yɛ le, mɛɛ nyuna bɛnduaa kundaa numnda le ma mala num. Bɛnduaa kundaa sina tau a  yauwo hoo okɔɔ. A cho num mala le ndu peeloo, kɛ a cho num kɛɛsiaalaŋ tosal a danda suu ŋ nɔ ma sɔla wo okɔɔ le. Kanifuule kalaŋ numndo cho koŋ ni. (Kalee. 6:​4, 5) A koŋ kpou, a cho num mala ma bii sɔɔŋ cho o yau koŋ choo woŋ bila, nduyɛ ma poonyiaa yiyaŋ numndo a muŋ okɔɔ.

17. Vɛɛ naŋ chɔm yɛ maa ŋ cho wanaa dimuluŋ isɔɔ te o hiŋ pɛ a kɛndiaa naa okɔɔ?

¹⁷ Kɛɛsiaala bɔɔbɔɔ naŋ tosa a kɛndiaa vɛlɛ a dandaa okɔɔ laŋ la tɔlnuŋ o nyɛ naŋ pɛɛku o Baabuiyo niŋndo choo. (Walta. 24:16; 1 Timo. 3:9) Te ŋ wa pɛ suukaŋndo a acheleŋnda a kɛɛsiaala naŋ tosalaŋ okɔɔ, ŋ nɔ miŋ dɔu sawa mandaa cho o Filipiaŋnda 4:5 niŋndo o wali niŋ. Le dimi aa: “Maa waŋnda kpou chɔ maa la cho wanaa dimuluŋ isɔɔ.” Te ŋ wa pɛ wanaa dimuluŋ isɔɔ, keŋ tosa ŋ hendu kɔllo tau o kɛndiaa naa choo ɔɔ miŋ baŋ acheleŋnda le ma chɛl yiyaŋ naa le. Miŋ chɔm kaalaa le puaapiliaa a ndepiliaa naa, nduyɛ miŋ ke nda bɛɛleŋ o yɔŋ bɛɛ mi kɛɛsiaala nda tosalaŋ la ve nyɛ pilɛ a la naalaŋ te.​—Luomaŋ. 14:​10-12.

18. Vɛɛ naŋ chɔm yɛ balika melaa le yoomu Chɛhowa ke naa wo?

¹⁸ Ŋ chɔm balika melaa naa o Chɛhowa lo, wana ke naa yoomoo wo, te ŋ manda pɛ yoomu naa, nduyɛ miŋ piɛi ndu a kɔllo kpou. (Sɔɔŋ. 4:11) Le suŋ suŋndɔ, ŋ nɔ miŋ biunuŋ naalaŋ, a sɔɔŋ palaŋ komal naa woŋ. Kɛ o cho yoomu waa nuaa le Wana Toosiaa naa wo ndoo yeema le naa le. Lelaŋ o cho suŋ hunɔɔ nyɛpalaa faŋa a piɔmndo, mbo ke naa yoomu fafɛɛŋndo. (Sɔɔŋ. 21:4) Haaa mi teleŋ koŋ fuuluu, i cho bɔɔ suɛi kɛndɛ le miŋ wa yoomu, nduyɛ miŋ piɛi Chɛhowa, Finya naa kaalaa o choo choo niŋ.