1. Yinki valere luzingu na beto kele na yau na meso ya Yehova?

 KANISA ntete nkundi mosi mekabila nge yinzo mosi yina bakulere na yau mebanda kubeba mpe yamesala mua madusu. Atako yakele na mambu nionso yina ya yimbi, kasi yinzo yango kele na ntalu ya bamilion ya badolare. Kondua ntembe nge kesepela na yau mpe nge ketanina yinzo yango. Mutindu mosi, Yehova mepesaka beto kado mosi ya valere mingi, dikabu ya luzingu. Ya kedika, Yehova monisaka ti yandi kebakaka luzingu na beto na valere na mutindu yandi pesaka muana na yandi lokola nkudulu samu na beto.​—Yoa. 3:16.

2. Mutindu 2 Bakorinto 7:1 memonisa yau, yinki Yehova kelombaka beto?

² Yehova kele Yinto ya luzingu. (Nk. 36:9) Ntumua Paulo zabaka kedika ya diambu yango ntangu yandi tubaka: ‘Na nzila na yandi beto kele na luzingu, beto ketambulaka mpe beto kezingaka.’ (Bis. 17:25, 28) Na yau, beto lenda tuba ti luzingu na beto kele dikabu yina mekatuka na Nzambi. Na nzola nionso, yandi kepesaka beto bima yina beto kele na yau nsatu samu beto bikana na luzingu. (Bis. 14:15-17) Kasi, Yehova kesalaka ve kimangu samu na kutanina luzingu na beto. Kasi, yandi kelombaka beto beto tanina mavimpi na beto ya kinsuni mpe ya kimpeve samu beto tatamana kusadila yandi na makoki na beto. (Tanga 2 Bakorinto 7:1.) Samu na yinki beto fueti tanina mavimpi mpe luzingu na beto, mpe yinki mutindu beto lenda sala yau?

3. Yinki kele mfunu mosi yina beto fueti sala nionso samu na kuvuanda na mavimpi ya mbote?

³ Mfunu mosi yina beto fueti sala nionso samu na kuvuanda na mavimpi ya mbote kele samu na kuvuanda na dikoki ya kusadila Yehova na makoki nionso yina beto kele na yau. (Mar. 12:30)  Beto kevuandaka na nsatu ya kupesa ‘nzutu na beto lokola nkayilu ya moyo ya nlongo yina Nzambi kendimaka,’ na yau, beto kemangaka kupona mambu yina beto mezaba ti yalenda bebisa mavimpi na beto. (Bar. 12:1) Ya kedika, yakele na mambu mingi yina beto lenda sala samu beto bikana na mavimpi ya mbote. Kasi beto kesalaka nionso yina beto lenda samu beto kevuandaka na nsatu ya kumonisa Tata na beto ya dizulu ti beto kesepelaka na dikabu ya luzingu.

4. Yinki diambu ntinu Davidi vuandaka na nsatu ya kusala?

⁴ Ntinu Davidi sasilaka mfunu yina yandi vuandaka sepela na dikabu ya luzingu ntangu yandi sonikaka: ‘Yinki mambote kele na lufua na munu, awa munu kena kukita na dibulu? Fundufundu kekumisa nge? Yakezabisa kukuikama na nge?’ (Nk. 30:9) Mbala yankaka Davidi sonikaka bampova yango ntangu yandi bakusaka ti yandi mekuma pene ya kufua. Kasi yandi vuandaka na nzengolo ya kubikana na luzingu samu yandi tatamana kukumisa Yehova. Kondua ntembe, beto nionso beto kevuandaka na nzengolo yango.

5. Yavuanda beto mepusana na bamvula to maladi ya yinki mutindu beto kele na yau, yinki beto lenda sala?

⁵ Maladi mpe kupusana na bamvula lenda pekisa beto beto sala mambu mingi yina beto vuandaka sala ntete. Yau lenda sala ti beto kukitungisa mpe beto vuanda na kiadi. Kasi beto fueti tatamana kusala yina beto lenda samu na kuvuanda na mavimpi ya mbote. Samu na yinki? Samu, yavuanda beto mepusana na bamvula to maladi ya yinki mutindu beto kele na yau, beto lenda tatamana kukumisa Yehova mutindu ntinu Davidi salaka. Yakele diambu ya kusimba ntima kuzaba ti Nzambi kebakaka beto na valere atako beto kele bantu ya kuzanga kukoka! (Mat. 10:29-31) Ata kana yamelomba beto kufua, yandi kevuanda na nsatu ya ngolo ya kufutumuna beto. (Yobi 14:14, 15) Ntangu beto kele na luzingu, beto kezolaka kusala nionso yina beto lenda samu na kutanina mavimpi mpe luzingu na beto.

6. Yinki Yehova kena kulomba beto beto sala na diambu metadila kudia mpe kunua?

⁶ Atako Biblia kele ve mukanda ya minganga to mukanda yina ketubilaka mutindu ya kudia mbote, kasi yaketubilaka makanisi ya Yehova samu na mambu yango. Na kifuani, yakena kutubila beto beto “katula mambu ya mpasi” yina lenda bebisa nzutu na beto. (Lon. 11:10) Biblia metuba ti beto fueti kudiaka ve mingi, kunuaka ve malavu mingi, samu yalenda sala beto mpasi ata mpe kunatina beto lufua. (Bin. 23:20) Yehova kena kulomba beto beto monisa kikadulu ya kukiyala ntangu beto kena kubaka nzengolo samu na bima yina beto kekudia to kunua mpe kitezo ya madia yina beto kekudia to ya malavu yina beto kekunua.​—1 Bk. 6:12; 9:25.

7. Yinki mutindu dilongi yina kele na Bingana 2:11 kena kusadisa beto beto baka banzengolo ya mbote samu na mavimpi na beto?

⁷ Beto lenda baka banzengolo yina kena kumonisa ti beto kesepelaka mingi na dikabu ya Nzambi ya luzingu na kusadilaka makoki na beto ya kukanisa. (Nk. 119:99, 100; tanga Bingana 2:11.) Na kifuani, beto kebaka banzengolo ya nduenga samu na bima yina beto kekudiaka. Kana beto kesepelaka na madia mosi kasi beto mezaba ti yakepesaka beto maladi, beto fueti manga kudia yau. Beto kemonisa diaka ti beto kele na makanisi ya mbote kana beto kena kubaka ntangu ya kuleka mingi, kusala mbala na mbala bangalasisi, mpe kutanina nzutu mpe yinzo na beto bunkete.

8. Yinki Biblia memonisa na diambu metadila makanisi ya Nzambi samu na kukitanina na bisumbula?

⁸ Nsiku yina Yehova pesaka dikanda ya  Yisaele vuandaka na bansikudukusu yina lenda sadisa samu na kutina bisumbula yina kebimaka na yinzo mpe na kisalu. (Kub. 21:28, 29; Kul. 22:8) Kana muntu mosi mekufua muntu kondua kukana yau, yandi vuandaka kutana na mambu ya mpasi. (Kul. 19:4, 5) Nsiku vuandaka lomba ti ata bantu yina mekufua muana yina kele ntete na kivumu kondua kukana, bafueti baka kitumbu. (Kub. 21:22, 23) Masonukua memonisa puelele ti Yehova kezolaka beto sala yina beto lenda samu na kutina bisumbula.

9. Yinki beto lenda sala samu na kutina bivonza? (Tala diaka bafoto.)

⁹ Beto kemonisa ti beto kesepelaka na dikabu ya luzingu kana beto kena kubaka bankubukulu yina ketanina beto na yinzo mpe na kisalu. Na kifuani, beto fueti tula bima yina lenda luadisa, bima yina kele na puazon to bilongo na bisika yina mebonga to kukatula yau na kisika yina bana ya fioti kele. Beto kemonisa ti beto kele ya kukenga kana beto kena kubika ve tiya yina beto mepedisa, maza ya tiya, mpe bisadulu ya kuran yau mosi. Beto kenata ve ntomabilu kana beto  mekunua bilongo yina kelembisaka, malavu, to kana beto kele na pongi; katula yau beto kesadila ve telefone to apareyi yankaka kana beto kena kunata ntomabilu.

10. Yinki beto lenda sala tekila kisumbula mosi salama mpe ntangu yamesalama?

¹⁰ Na bantangu yankaka, beto kevuandaka ve na dikoki ya kupekisa kivonza yina mebima. Diambu yango kemonanaka kedika kana bisumbula yina kebimaka yau mosi mesalama, kana maladi mosi ya yimbi mebima, mpe kana mvita mosi ya ngolo mebima. Kasi, kana mambu ya mpasi ya mutindu yina mebima, beto lenda sala nionso samu na kukitanina mpe kuvuka na kivonza yango kana beto kena kuzitisa malako yina bamfumu ya Leta mepesa na kukatuka na kisika yango mpe malako yankaka. (Bar. 13:1, 5-7) Beto lenda kukibongisa na mambu yankaka ya mpasi tekila yasalama, na yau beto fueti kuwa malako yina bamfumu ya Leta kena kupesa samu yasadisa beto beto vuanda ya kukubama. Na kifuani, beto lenda mona mbote kulunda maza, bima yina kebolaka ve, mpe kuvuanda na saki mosi yina beto metulaka bima ya mfunu.

11. Kana maladi mosi ya yimbi kena kumuangana na kisika yina beto kevuandaka, yinki beto fueti vuanda pene ya kusala?

¹¹ Yinki beto fueti sala kana maladi mosi yina ketambakanaka kena kumuangana kisika yina beto kevuandaka? Beto fueti zitisa malako yina bamfumu ya Leta kena kupesa, na kifuani, kusukula maboko, kuzitisa badistanse, kuvuata maske, mpe kukota karantene. Kana beto kena kusadila mambu yango, beto kemonisa ti beto kesepelaka mingi na dikabu ya Nzambi ya luzingu.

12. Yinki mutindu nsikudukusu yina kele na Bingana 14:15 kesadisa beto beto zaba kupona bansangu yina beto kekuwa ntangu kivonza mebima?

¹² Na ntangu ya maladi ya yimbi, bansangu ya luvunu lenda muangana na nzila ya bankundi, bafinangani, mpe na radio, na televizion to na Internet. Na kisika ya kundima ‘mambu nionso’ yina beto kena kuwa, yakevuanda mbote beto kuwa bansangu ya sikisiki yina mekatuka na bamfumu ya Leta mpe na minganga. (Tanga Bingana 14:15.) Mpe babiro ya filiale kesalaka ngolo samu na kubaka bansangu ya sikisiki tekila kupesa malako yina metadila balukutakanu ya bimvuka mpe kisalu ya kusamuna. (Ebr. 13:17) Kana beto kena kuzitisa malako yango, beto kekukitanina mpe beto ketanina bantu yankaka. Katula yau, beto kesadisa bantu yankaka samu bavuanda na makanisi yankaka samu na Bambangi ya Yehova.​—1 Pi. 2:12.

13. Yinki mutindu beto kemonisaka ti beto kesepelaka na dikabu ya luzingu na diambu metadila menga?

¹³ Bambangi ya Yehova mezabana mbote lokola bantu yina kezitisaka menga yina kele nlongo. Beto kezitisaka nsiku ya Yehova na yina metadila menga na kumangaka kundima bavutula beto menga, ata kana yamelomba lusadusu ya nsualu ya munganga. (Bis. 15:28, 29) Kasi, yazola monisa ve ti beto kevuandaka na nsatu ya kufua. Kutu, beto kesepelaka na dikabu ya Nzambi ya luzingu. Beto kesosaka lusadusu ya minganga yina kevuandaka pene ya kupesa lusadusu ya mbote kondua kuvutula menga.

14. Yinki mutindu beto lenda sala ti yavuanda mpasi basala beto operasion to bapesa beto lusadusu ya ngolo ya munganga?

¹⁴ Kana beto kena kutanina mavimpi na beto na kusadilaka mambu beto metubila na disolo yayi, mbala yankaka yakelomba ve basala beto operasion to bapesa beto lusadusu ya ngolo ya munganga. Kana beto ketaninaka mavimpi na beto mbote, mavimpi na beto kevutuka mbote na nsualu kana yamelomba basala beto operasion. Yalenda vuanda diaka mpasi basala beto operasion ya nsualu kana beto kena  kusala nionso samu yinzo mpe kisika na beto ya kisalu bika vuanda na kivonza mpe kana beto kena kuzitisa mbotembote bansiku yina Leta ketulaka samu na kunata ntomabilu na balabala.

15. (a) Samu na yinki yakele mfunu beto vuandaka na karte yina kena kumonisa lusadusu ya munganga yina mebonga na beto? (Tala diaka foto.) (b) Mutindu video memonisa yau, yinki mutindu beto lenda baka banzengolo na diambu metadila kusadila menga?

¹⁵ Lokola beto kesepelaka na dikabu ya luzingu, beto kefulusaka karte yina kemonisaka lusadusu yina beto kendimaka ya munganga mpe kunata yau kisika nionso yina beto kekuenda. b Na nzila ya karte yango beto kemonisaka nzengolo na beto na diambu metadila kuvutula menga mpe balusadusu ya munganga yina mebonga samu na beto. Karte na nge kele ya kufuluka mbote? Kana nge kele na nsatu ya kufulusa to kubongisa diaka karte yango, sala yau kondua kuvingila. Kana beto mesonika banzengolo na beto puelele, yakesala ti beto baka lusadusu ya munganga na nsualu. Beto kesadisa diaka bantu yina kena kupesa beto lusadusu ya munganga samu babika sala nzimbala ya bilongo to ya lusadusu ya munganga yina lenda sala beto mpasi. c

16. Yinki beto lenda sala kana beto zaba ve mutindu ya kufulusa karte yina kemonisaka lusadusu ya munganga yina mebonga na nge?

 ¹⁶ Yavuanda yinki bamvula beto kele na yau to mavimpi na beto kele yinki mutindu, beto nionso beto lenda kutana na kisumbula to kubela. (Lon. 9:11) Na yau, yakevuanda diambu ya nduenga beto fulusa karte yina kemonisaka lusadusu ya munganga yina mebonga na beto. Kana nge zaba ve mutindu ya kufulusa karte yango, lomba bankulutu na beno sadisa nge. Bakesalaka ngolo samu na kuzaba mutindu ya kufulusa karte yango, kasi bakebaka ve nzengolo samu na lusadusu ya munganga yina mebonga na nge. Yakele kiyekua na nge mosi. (Bag. 6:4, 5) Kasi, balenda sadisa nge samu nge zaba lusadusu ya munganga yina nge kepona mpe balenda sadisa nge nge fulusa karte yango.

17. Yinki mutindu beto kemonisa ti beto kele ve na mambu ya ngolo na diambu metadila mavimpi?

¹⁷ Banzengolo na beto na diambu metadila mavimpi mpe lusadusu ya munganga kesimbamaka na mambu yina beto kelongukaka na Biblia. (Bis. 24:16; 1 Tm. 3:9) Ntangu beto kena kubaka banzengolo to beto kena kusolola yau na bantu yankaka, beto sadilaka mbote nsikudukusu yina kele na Bafilipi 4:5: ‘Bantu nionso zaba kikadulu na beno ya kuvuanda ve na mambu ya ngolo.’ Kana beto kele ve na mambu ya ngolo, beto kekukitungisa ve ntangu nionso samu na mavimpi na beto; mpe beto ketinda ve bantu yankaka bandima kaka makanisi na beto. Beto kezolaka mpe beto kezitisaka bampangi na beto ata kana banzengolo yina bakena kubaka mesuasana na yina ya beto.​—Bar. 14:10-12.

18. Yinki mutindu beto lenda monisa ti beto kele na butondi samu na dikabu ya luzingu?

¹⁸ Beto kemonisa ti beto kele na butondi na Yehova, Yinto ya luzingu, na kutaninaka luzingu na beto mpe na kupesaka yandi yina beto lenda. (Kus. 4:11) Kasi bubu yayi beto fueti bela mpe kukutana na bivonza. Kasi luzingu ya mutindu yina ve Mvangi na beto zolaka beto vuanda na yau. Ntama mingi ve, yandi kepesa beto luzingu ya mvula na mvula yina mekondua mpasi mpe lufua. (Kus. 21:4) Kasi tekila ntangu yango koka, yakele mbote beto vuanda na luzingu mpe beto sadila Tata na beto ya dizulu, Yehova!