1. Ngapi omu Jehova a tara eparu lyetu?

 GAZARA tupu asi kaume koge kuna kupe nzugo. Azo za kurupa ntani kupitisa mema komaruha gamwe. Nampili zi kare nomaudigu ogo, mulyo gonzugo ozo kuna kara nodola mamiliyona. Yipo nye, ove ngo likida rupandu konzugo ozo nokuzipopera. Mokulifana, Jehova kwa tu pa uhwi womulyo, uhwi weparu. Jehova kwayi likida asi eparu lyetu kwa kara nomulyo kwendi pokugava Munendi a ya tu zowore kononzo.—Joh. 3:16.

2. Ngwendi moomu tupu va yi likida mo-2 Vakolinte 7:1, yisinke a ndindire ko Jehova kwetu?

² Jehova yige ntundiliro zomwenyo. (Epis. 36:9) Mupositoli Paurusa nage ga yi pulire oyo ntani age kwa uyungire asi: “Mwendi yimo twa karera neparu tu ligumagure.” (Yirug. 17:25, 28) Yipo nye ose kuvhura tu uyunge asi eparu lyetu kuna kara uhwi wokutunda kwaKarunga. Age kutulikida eharo pokutupa eyi twa hepa yipo tu paruke. (Yirug. 14:15-17) Nye Jehova kapi a rugana yitetu ngesi mokutuvatera yipo tu twikire kuparuka. Nye nampili ngoso, age kuna hara tu rugane paapa twa hulira yipo tu kare tuna kanguka ntani noku twikira kumukarera. (Resa 2 Vakolinte 7:1.) Morwasinke natu poperera ukanguki wetu neparu lyetu ntani ngapi omu natu yi rugana?

3. Konda musinke zimwe zeyi natu hetekerera ko kukara tuna kanguka?

³ Konda zimwe zeyi natu hetekerera ko kukara tuna kanguka kuna kara asi ose kuvhura kukarera Jehova paapa twa hulira. (Mar. 12:30) Ose kuna hara tu gave marutu getu “ngonzambo zonzuni ezi za pongoka ntani ezi a tambura Karunga.” Yipo nye ose kunyokera po kurugana yininke eyi twa diva asi kuvhura yi ture  ukanguki wetu mosiponga. (Rom. 12:1) Yinzi sili twa hepa kurugana yipo tu kare noukanguki wouwa. Nye ose kurugana eyi atu vhuru kurugana ko morwa tuna hara kulikida Guhyetu gemeguru asi twa kara norupandu kouhwi weparu.

4. Yisinke ga here kurugana hompa Ndafita?

⁴ Hompa Ndafita kwa fatwilire konda zeyi ga karerere norupandu kouhwi weparu apa ga tjenge asi: “Uwa musinke ngau tunda po ponomfa dange? Vafe nawo kuvhura va ku pandure ndi? Kuvhura nye va udise uwa woge wounene ndi?” (Epis. 30:9) Ndafita nampo kwa tjenge nonkango odo apa ga kere pepi nokufa. Nye age kwa tokomenene kuparuka siruwo sosire yipo a twikire kukarera Jehova. Tuna sihuguvara asi natuvenye kwa kara netokomeno lyokulifana.

5. Yikare asi nomvhura detu dingapi ndi ose kuvera vera unene ndi nakauke, yisinke natu vhura kurugana?

⁵ Mauvera ntani noukurupe kuvhura kutukondera tu dire kurugana yininke yoyinzi eyi ngatu rugana nare. Ano ngoyitundwamo, ose kuvhura tu handuke ntani nokuguva. Nye ose twa hepa kuhetekera ko paapa twa hulira yipo tu lipakere mbili nyamwetu. Morwasinke? Morwa yikare asi nomvhura detu dingapi ndi ose kuvera vera unene ndi nakauke, ose simpe kuvhura kuyererepeka Jehova ngwendi moomu ga yi rugene hompa Ndafita. Ayo kutuhengagwida unene pokudiva asi Karunga kututara asi ose mulyo kwendi nampili ngomu twa dira kusikilira mo! (Mat. 10:29-31) Nampili nsene tu fa, age nga ndindira nononkondo mokukatuvhumbura. (Joba 14:14, 15) Siruwo esi tuna kara simpe vazuni, ose tuna hara kurugana eyi natu vhura kurugana ko yipo tu popere ukanguki wetu ntani neparu lyetu.

6. Yisinke ana tu harere Jehova tu rugane kombinga zeyi atu li neyi atu nu?

⁶ Nampili ngomu Bibeli za dira kukara buke ezi za zogera kuhamena omu no popera ukanguki woge ndi kuhamena eyi no lya, azo kututantera yininke yoyinzi kuhamena omu Jehova a gazara kuhamena yininke oyo. Pasihonena, age kututantera tu nyokere po yininke eyi nayi tu ‘retera kukora’ eyi nayi vhura kuzonagura marutu getu. (Muud. 11:10) Bibeli kuuyunga asi kapisi tu lye unene ndi tu nwe unene marovhu. Yininke eyi kuvhura kuzonagura ukanguki wetu ntani kuvhura hena kutudipaga. (Yis. 23:20) Jehova kuna tu harere tu kare nelipangero, nsene kuna kutokora asi nondya musinke natu lya neyi natu nwa ndi nondya dokuhura kupi natu lya ntani yokuhura kupi natu nwa.—1 Kol. 6:12; 9:25.

7. Ngapi omu epukururo eli lya kara moYisewe 2:11 ali tu vatere tu ture po matokoro gomawa kuhamena ukanguki wetu?

⁷ Ose kuvhura kutura po matokoro aga aga likida asi twa kara norupandu rorunene kouhwi weparu ou ga tu pa Karunga, pokuruganesa nondunge detu. (Epis. 119:99, 100; resa Yisewe 2:11.) Pasihonena, ose kutura po matokoro gomawa kuhamena eyi atu li. Nsene asi ose kwa hara nondya dongandi nye ose twa yi diva asi nondya odo kutuninkisa tu vere, nondunge ngadi tu tumangeda tu nyokere po kulya nondya odo. Ose kuyilikida hena asi twa kara nonondunge apa atu gwana nompofu dokugwanena po, kuufena nkenye apa, ntani pokuzeresa nkenye apa marutu getu nomambo getu.

8. Yisinke azi likida Bibeli kuhamena magazaro gaKarunga kombinga zokukara mepopero?

⁸ Jehova kwa pere Vaisraeli noveta kuhamena omu nava lipopera vene koyiponga yoyinene, yikare asi momambo gawo ndi apa ngava rugana. (Ex. 21:28, 29; Deut. 22:8) Apa gumwe nga dipaga mukwawo momponyo, age nga ligwanekere noyitundwamo yoyinene. (Deut. 19:4, 5) Veta kwa kere asi nampili ava ngava dipaga mukeke gemezimo momponyo, va hepere ku va tengeka. (Ex. 21:22, 23) Matjangwa kwa yi zeresa nawa-nawa asi Jehova kuna tu harere tu rugane paapa twa hulira yipo tu nyokere po yiponga.

9. Yininke musinke twa hepa kurugana yipo tu nyokere po yiponga? (Tara hena mafano.)

 ⁹ Ose kuyilikida asi twa kara norupandu kouhwi weparu ou ga tu pa Karunga, pokuhetekera ko kulipopera koyiponga yikare asi membo ntani koyirugana. Pasihonena, nsene tuna hara kuzuguma yininke youtwe ndi youhungu ndi nomutji, ose tuna hara kuyirugana monkedi ezi nayi dira kureta siponga kwava wopeke. Ose hena tuna hara kudivilisa asi yi likare ure novanona. Ose kuvangarara apa atu hwameke mundiro, apa atu genyeke mema, ntani apa atu ruganesa yiruganeso. Ntani ose hena kutakamesa mokudira kutunda po apa atu rugana yininke oyo. Ose kapi tatu vhuru kusinga nsene asi ose kunwa nomutji edi nadi tu ninkisa tu kare mosiponga sokusinga ndi nsene kuna nu marovhu aga naga tu ninkisa tu dire kukara mepopero, ndi nsene tuna roroka unene eyi nayi tu ninkisa tu dire kusinga mepopero. Ose hena kapi tatu vhuru kukwaterera serefoni zetu mokuwoko nsene kuna kusinga.

10. Yisinke twa hepa kurugana komeho simpagwa si horoke ntani posiruwo sosimpagwa?

¹⁰ Poyiruwo yimwe, ose kapi atu vhuru kukandana po maukaro gosiponga mokudira kuhoroka.  Ano eyi kuyi monenena apa ayi horoka yimpagwa, mauvera gomukagu ntani madiro kulizuvha omu mwa hamena yirwanangana. Nye nampili ngoso, apa ayi horoka yininke yangoso, ose kuvhura kuhetekera ko kukara mepopero yipo tu paruke siponga, pokulimburukwa mavyukiso gokutunda usimbu mevango olyo lina kara mosiponga ntani nomavyukiso gamwe gokutundilira kepangero. (Rom. 13:1, 5-7) Yimpagwa yimwe kuvhura kuyiliwapayikira, yipo nye ayo ya kara nomulyo tu kwame mavyukiso aga aga tundu kepangero aga naga tu vatera tu liwapayikire simpagwa. Pasihonena, ayo ya kara nomulyo tu divilise asi tuna kara nomena nonondya edi nadi dira kuzonauka usimbu ntani noyininke hena yimwe youhaku.

11. Yisinke twa hepa kurugana nsene uvera womukagu kuna kulihanena kevango oku twa tunga?

¹¹ Yisinke natu rugana nsene uvera womukagu kuna kulihanena kevango oku twa tunga? Twa hepa kulimburukwa komavyukiso aga na li tu pa epangero, pasihonena kukuhwa mawoko getu, kulikara ure novakwetu, kudwara sinkumatere ntani kutura muntu a li karere pwagelike. Apa tu rugana yininke eyi, ose kuyilikida asi twa kara norupandu rorunene kouhwi weparu ou ga tu pa Karunga.

12. Ngapi omu etjangwa lyomoYisewe 14:15 na li tu vatera tu tokore asi nombudi musinke natu purakena nsene simpagwa sina horoka?

¹² Posiruwo sosimpagwa, nombudi depuko kuvhura kulihanena mokatji kovakaume, kovamusinda ntani monombudi edi ava gava kupitira koyikwakonentu. Mevango lyokupura “nkenye eyi” atu zuvhu, ose twa hepa kupurakena konombudi dousili dokutunda kepangero ntani no ko vandokotora. (Resa Yisewe 14:15.) Mbungagendesi ntani nonoBeteli kurugana paapa va hulira yipo va gwane mauzera gouhunga komeho va gave mavyukiso konombungakriste kuhamena mapongo ntani noyirugana yokuzuvhisa. (Heb. 13:17) Apa atu kwama mavyukiso aga, ose kulipopera nyamwetu kosimpagwa kukwatera mo novakwetetu. Ayo hena kuvhura kuvatera wopeke yipo va kare nomutaro gomuwa kuhamena Nombangi daJehova.—1 Pet. 2:12.

13. Ngapi omu atu yi likida asi twa kara norupandu kouhwi weparu ou ga tu pa Karunga kuhamena honde?

¹³ Sinzi sovantu va yi diva asi Nombangi daJehova kwa yi pura asi honde kwa pongoka. Ose kulimburukwa veta zaJehova pokunyokera po kutambura honde, nampili posiruwo souhaku wohararasi. (Yirug. 15:28, 29) Nye nampili ngoso, oyo kapi ayi tanta asi ose kwa hara kufa. Mokulisiga, ose kulikida rupandu kouhwi weparu ou ga tu pa Karunga. Ose kupapara vandokotora ava ava hakura va hana kuruganesa honde.

14. Ngapi omu natu sesupika hepero zokuza kouhaku wounene?

¹⁴ Nsene tu pakera mbili ukanguki wetu pokurugana yininke eyi tuna zogere mosirongwa esi, ayo kuvhura ngayi tu vatere tu dire kuza komatauro ndi komauhaku gamwe gomanene. Ntani nsene tu kara tuna kanguka, ose ngatu veruka usimbu apa ngatu hepa etauro lyongandi. Ose hena kuvhura kusesupika siponga esi na si tu ninkisa tu ze ketauro lyohararasi pokuninka embo lyetu ntani noku atu ruganene li kare evango lyepopero ntani pokulimburukwa noveta domositaura.

15. (a) Morwasinke ya karera nomulyo tu simbe nkenye apa sikarata setu sohonde esi sina kara nomauzera gantaantani? (Tara hena efano.) (b) Ngwendi moomu tupu va yi likida movidiyo, ngapi omu natu tura po etokoro lyouhunga kuhamena uhaku weruganeso honde?

¹⁵ Mokumona asi ose twa kara norupandu kouhwi weparu, ose kuzwida sikarata setu sohonde ntani noku si simba nkenye apa. b Mosikarata oso, ose kutjanga mo etokoro lyetu kuhamena kututura honde ntani nomauhaku gamwe. Sikarata soge sohonde kuna kara po mauzera  gantaantani ndi? Nsene ono hara kuzwida sikarata soge sohonde ndi nsene asi ono hara kuwapukurura mauzera aga wa tjanga mo, yi rugana ngesi. Pokutjanga etokoro lyetu mosikarata sohonde, ngayi tu vatera tu gwane uhaku usimbu, morwa kapi ngatu mana siruwo setu mokuzogera novandokotora kuhamena uhaku wetu. Ose ngatu vatera hena vandokotora va dire ku tupa nomutji edi na di tu tura mosiponga. c

16. Yisinke natu rugana nsene kapi tuna diva asi ngapi omu natu zwida sikarata sohonde?

¹⁶ Yikare asi nomvhura doge dingapi ndi nsene asi wa kara noukanguki wouwa ndi hawe, nkenye ogu kuvhura kuligwanekera nosiponga ndi kuvhura kuvera. (Muud. 9:11) Yipo nye, ayo ya kara nomulyo tu zwide sikarata setu sohonde. Nsene kapi ono diva asi ngapi omu no zwida sikarata oso, pura vakuronambunga womombungakriste zeni yipo va ku vatere. Awo ngava hetekera ko kukuvatera omu no zwida sikarata oso, nye kapi ngava kutulira po matokoro gokuhamena kouhaku. Oso kuna kara situmbukira soge. (Gar. 6:4, 5) Nye nampili ngoso, awo ngava kuvatera o kwate egano matokoro aga ono kutura po ntani noku kuvatera ngomu ono kuzwida sikarata oso.

17. Ngapi omu natu yi likida asi ose vagomoki kuhamena ukanguki?

¹⁷ Sinzi somatokoro aga atu tura po kuhamena ukanguki wetu ntani nouhaku wetu, kudemenena kezwi lyetu lyokomutjima eli twa deura kuliza nonompango domoBibeli. (Yirug. 24:16; 1 Tim. 3:9) Apa atu tura po matokoro ntani noku zogera kumwe nava wopeke kuhamena eyi tuna tokora, twa hepa kudiworoka etjangwa lyoVafilipi 4:5 eli ali uyunga asi: “Vantu navenye ngano va mone asi one vagomoki.” Nsene tu kara vagomoki, ose kapi ngatu kara nkenye apa nosinka kuhamena ukanguki wetu ntani kapi ngatu hetekera ko kuninkisa wopeke va kare nomagano ngwendi getu, kuhamena ukanguki. Ose kwa hara ntani kwa fumadeka vanavazinyetu, nampili va ture po matokoro gokulisiga naga getu.—Rom. 14:10-12.

18. Ngapi omu natu likida rupandu kouhwi weparu?

¹⁸ Ose kulikida rupandu kwaJehova ntundiliro zeparu, apa atu popere eparu lyetu ntani pokurugana paapa twa hulira mokumukarera. (Ehor. 4:11) Pwangesi, ose twa hepa tupu kulididimikira mauvera nomaudigu. Nye eli kapisi yilyo eparu ga tu harera Jehova. Ntaantani tupu nga ka tu pe eparu lyanarunye lyokudira kukora nonomfa. (Ehor. 21:4) Posiruwo esi, ayo kutuhafesa kweyi simpe tuna kara vazuni ntani nokukarera Guhyetu geharo gemeguru!