1. Kodi moywi-u ngofuneya avi wa Yehova?

 KAYEREKEZELANI ira fwinyu uuva-ani ithuzithuzi yojambuliwa mwaluso ya wale koma yatengo wavadimu. Ithuzithuziyo iikaana malo amo-i odimba koma teto oonongeya. Masiki vili eeno ithuzithuziyo chiyodura moi inokoza guli-iwa na ndalama damadola mamiliyoni. Pivyovaela oneya ira munokoza yamikela koma teto itetezanga. Mofwanafwana na vyevyi Yehova univa-a mphaso yatego wavadimu ya moyo. Teto-i Yehova, ootonyi-eda ira unoona moywi-u kala watengo wavadimu vopeleka Mwanaye n’nga dipo. — Yoh. 3:16.

2. Mogwilizana na 2 Akorinto 7:1, kodi Yehova unayembekezela ira niire n’ni?

² Yehova ngu Mwin’nya wa moyo. (Sal. 36:9) Namarumiwa Paulo oosomedela likundo laimbarimbari leli vevo awongile liye ira: “Chifukwa ya liye niikaana moyo, ninoenda teto niikalavo.” (Vyo. 17:25, 28) Eeno pivyovweya wonga ira moyo chi mphaso yokumela wa Mulungu. Mwachikondi, liye unoniva-a vyetene vyevyo ninafuneela iyo ira nikaena moyo. (Vyo. 14:15-17) Koma vano kai ira Yehova unoteteza moywi-u modabwi-a. M’malo mwiwa unoyembekezela ira ninoira vyetene vyevyo ninawande iyo ira nikaena thanzi lapama koma teto nipitilize mutumikela. (Welengani 2 Akorinto 7:1.) Chifukwa n’ni ninafuneela teteza thanzi na moywi-u, n’nga ninaire avi vyevyi?

3. Kodi chi chifukwa imo-i iivi eneyo inaniiri-a ira nisamalelenga thanzi li-u?

³ Chifukwa imo-i eneyo inaniiri-a ira nisamalelenga thanzi li-u, choi ninofuna tumikela Yehova mwemo ninawandele iyo. (Malik. 12:30) Ninofunechecha peleka ‘mathuthwi-u n’nga sembe ya moyo, yochena na yosomedeleya wa Mulungu.’ (Arom. 12:1) Eeno ninopewa panga vyongo vyevyo ninaiziwa iyo ira vinokoza wononga thanzi li-u. Pivyoona ira masiki nangayesayesile ninokoza bulelave, koma ninoira vyevyo ninawande iyo ira nikaena thanzi lapama chifukwa ninofuna mutonyi-eda Babi-u waudimu ira ninoyamikela mphaso ya moyo.

4. Kodi Mwene Davide afuna ira n’ni?

⁴ Mwene Davide oosambaula chifukwaiwa ayamikela mphaso ya moyo eneyo Mulungu aniva-ile liye vevo alembile liye ira: “Kodi magazanga kanakaena phindu loi avi akala ndinatitele wu zenje la manda? Kodi tumbulu linoza luutamandeni? Kodi linoza lilengeze ira nyo muli oona?” (Sal. 30:9) Davide podi ira alembile mawu anala umapeto wa moywaye. Komave liye oofunechecha kalave na moyo koma teto thanzi lapama nayolinga yoi apitilize mutamanda Yehova. Pivyookaiki-a ira etene iyene ninofuna teto vyevyi.

5. Kaya nili ouluula kapena ninobulela, kodi ninawande ira n’ni?

⁵ Marenda koma teto uluula vinokoza nilepeli-a panga vinjinji n’nga mwemo nairela iyo vowambeela. Vyera eeno ninokoza fooka koma teto kumudwa. Komave kaninafuneela nyalanyaza khani yosamalela thanzi li-u. Chifukwa n’ni ninawonga eeno? Chifukwa kaya niuluula vinjinji kapena niibulela moi avi, ninokoza wanda mutamandave Yehova n’nga mwemo airele liye Mwene Davide. Pivyolimbikisa vinjinji iziwa ira Mulungwi-u unoniwona ira nili atengo wavadimu kaya ninobulela kapena niuluula. (Mat. 10:29-31) Masiki nangatatiile, liye unofunechecha nivenyi-a. (Yob. 14:14, 15) Vevo nin’na iyo moyo, ninafuneela panga vyetene vyevyo ninawande iyo vousamalela.

6. Kodi Yehova unaniyembekezela ira ninoira n’ni va khani ya yodja na walwa?

⁶ Masiki ira Baibulo kai buku losambaula vya thanzi kapena vya vyodja, linonikami-eda iziwa mwemo Yehova munaganizela liye va khani dedi. Mofwanafwani-a, liye unonilimbikisa ira ‘nitetezenga thuthu li-u’ uvyongo vyevyo vinaliwononge. (Nam. 11:10) Baibulo linoruni-a dja vinjinji koma teto ng’wa vinjinji walwa chifukwa vyevyi vinokoza wononga moyo. (Miya. 23:20) Yehova unoyembekezela ira niviruni-enga va khani yoinjiva wa yodja koma teto walwa. — 1 Akor. 6:12; 9:25.

7. Kodi malangizo ava Miyambo 2:11, kananikami-ede avi ira nisakulenga vyoira va khani ya thanzi li-u?

⁷ Ninokoza tonyi-eda ira ninoyamikela mphaso ya moyo eneyo Mulungu aniva-ile liye vo-indi-eda chito luso loganiza. (Sal. 119:99, 100; welengani Miyambo 2:11.) Mofwanafwani-a, ninokoza indi-eda chito luso loganiza vakhani ya vyodja vyevyo ninasakula iyo. Akala ninawomeluwana yodja imo-iwene koma ninoiziwa ira nadja inonibuleli-a, ganiza pama unonikami-eda ira niipewenga. Ninokoza tonyi-eda ira nili oganiza pama nagonanga mokwakwanela, panga masika olimbi-a thuthu, kala awuyesa koma teto samalela vande vi-u.

8. Kodi Baibulo linatonyi-eda ira Mulungu unaiwona avi khani yopewa ngozi?

⁸ Chilamulo eneyo Yehova ava-ile liye Aizarayeli yookaana malangizo anayo kaakami-ede  pewa ngozi doopi-a dedo dakoze ireela vande kapena umalo a chito. (Ekis. 21:28, 29; Doto. 22:8) Akala muthu uphile fwaye mwangozi oogumanana mavuto alukulu. (Doto. 19:4, 5) Chilamulo yawonga ira akala athu anayo mwangozi kaporechile mwana o-obaluwa, koofuneela langiwa. (Ekis. 21:22, 23) Malemba kanosambaula movweya pama ira Yehova unofuna ira niyesayesenga pewa ngozi.

9. Kodi ninaire n’ni ira nipewe ngozi? (Onani teto vithuzithuzi.)

⁹ Ninokoza tonyi-eda ira ninoyamikela mphaso ya moyo eneyo Mulungu aniva-ile liye, vo-arela ndila dopewela ngozi wani-u koma teto uchito. Ninoira vyongo mosamala natatilanga vyongo vyoirwa, vyapoizoni kapena mirombwe koma teto nino-ela undendai na a-ima vyongo n’nga vyevyi. Ninokala teto osamala na mulo, vyongo vyotanuwa, vipangizo vya magesi teto ninowonechecha ira kanivi-iile vookala oing’anela. Kaninaendi-a galimoto vevo maganizwi-u kasokoneziweathu chifukwa yoi niing’wa mirombwe dimo-idiwa, walwa kapena o-ogona mokwakwanela. Teto ninowonechecha ira kanina-indi-eda chito vipangizo vyamakono voendi-a galimoto.

10. Kodi ninaire n’ni ngozi yamuchilengedwe ya-anaireye koma teto yaireya?

¹⁰ Thawi dimo-i kaninawande pewa vyoireya vimo-i vyevyo vinairi-e ira moywi-u ukale vangozi. Vyevyi vinokoza ireya simbwasimbwa va thawi ya ngozi damuchilengedwe, mulili koma teto vevo unaireyaathu viwawa. Komave vyongo n’nga vyevyi vyaireya, ninokoza wanda titi-edeya koma teto vulumuwa akala nina-arele malangizo oyi nivenyemo mudelalo kapena teto malangizo amo-i opelekiwa na andimuwa andimuwa aboma. (Arom. 13:1, 5-7) Thawi dimo-i vinokoza iziweya ira unoireya ngozi, eeno ninoira pama arela malangizo a andimuwa andimuwa aboma onikami-eda kozeela. Mofwanafwani-a, vinokala vyokami-a sunga ma-inje na vyodja vyevyo kavinawonongeye koma teto mirombwe na vyongo vimo-i vyokami-edela muthu aporeya.

11. Akala ugwile marenda ova-edelana, kodi ninafuneela kala ofunechecha ira n’ni?

¹¹ Kodi ninaire avi akala marenda ova-edelana kafalile mudela lelo ninakala iyo? Ninafuneela vwela malangizo anayo kananiteteze n’nga amba m’mandani, kala molapelana, wara mascara, koma teto kala vaeki-u. Nayesayesanga arela malangizwala, ninotonyi-eda ira ninoyamikela mphaso ya moyo eneyo Mulungu aniva-ile liye.

12. Kodi likundo lava Miyambo 14:15, linanikami-a avi sakula khani dedo ninafuneela iyo vwela va thawi ya ngozi?

¹² Va thawi ya ngozi do-iyana-iyana ninokoza vwa khani donama dokumela wa afwi-u, wa athu owadamanana manyumba koma teto wa ofalisa khani. M’malo ‘mororomela mawu aliyetene’ anayo nivwile iyo, ninoira pama vwela malangizo ororomeleya okumela uboma koma teto wa avyaumoyo. (Welengani Miyambo 14:15.) Bungwe Lolamulela koma teto maofesi a thambi, kanoyesayesa saela makundo olondola ka-anapeleke malangizo okuza misonkano da pingo koma teto chito yolaleela. (Aheb. 13:17) Arela malangizwala unokami-eda ira iyo koma teto athu amo-i nikale otiti-edeya. Ninokami-eda teto ira pingo ukaena limbili lapama mudela li-u. — 1 Pe. 2:12.

13. Kodi ninatonyi-eda avi ira ninolemekeza moyo navwelanga lamulo la Yehova va khani ya magazi?

¹³ Amboni da Yehova kanoiziweya ira kanolemekeza patuleya wa magazi. Ninovwela lamulo la Yehova lokuza magazi vokoonda eliwa magazi masiki vevo ninafuneela iyo likami-edo lombaraanya lamurombwe. (Vyo. 15:28, 29) Komave vyevyi kavinatapulela ira ninofuna khwa. M’malo mwiwa ninoyamikela mphaso ya moyo eneyo Mulungu aniva-ile liye. Ninofuna likami-edo lapama la murombwe lelo kalinatangani-avo eliwa magazi.

14. Kodi ninayevi-e avi funeya woi niva-iwe likami-edo lilukulu la mirombwe?

¹⁴ Nasamalelanga thanzi li-u voira vyongo vyevyo nitapanyile iyo mukhanila, ninoyevi-a funeya woi niiriwe opereshoni, kapena wachela likami-edo lilukulu la mirombwe. Teto nakaana thuthu lathanzi, ninoila mombaraanya nairiwa opereshoni. Ninoyevi-a teto funeya woi niiriwe opereshoni vochosa vyongo vyevyo vinairi-e ngozi vande vi-u na wu chito koma teto arela mosamala malangizo avaseu.

15. (a) Chifukwa n’ni pi vyofuneya endangana khaadi li-u lelo lin’na makundo ogwilizana na mwemo vyongo vililiathu vathawi ila? (Onani teto ithuzithuzi.) (b) Mogwilizana na vyevyo niwonile iyo mu vidiyo, kodi ninaire avi ira nisakule pama vakhani ya likami-edo lachipatala lokuza magazi?

¹⁵ Voi ninowomeluwana mphaso ya moyo, ninolemba Khadi Lopatsa Munthu Mphamvu Zondiimira pa Thandizo Lakuchipatala (onani zimene ndalemba m’katimu), noliyendangana thawi detene. b Va khaadili ninosambaulavo  vyosakula vi-u vakhani ya magazi koma teto likami-edo limo-i lamirombwe. Kodi vyevyo mwalembile nyo va khaadi linyu vinogwilizana na mwemo vyongo vililiathu vamoywinyu vathawi ila? Akala munafuna lemba kapena sakaeda vyevyo vili va khaadi linyu, kamuzengereze. Lemba vyovweya pama va khaadi li-u unokoza pangi-a ira kanidimbeluwe wachela likami-edo lachipatala. Vi vinokami-eda teto ira nipewe o-ovwechechana na madokotala na yolinga yoi kaniwachele likami-edo lelo lina-ele moywi-u vangozi. c

16. Kodi ninaire avi akala kaninaiziwa mwemo ninalembele iyo khaadi li-u la DPA?

¹⁶ Kaya nili azombwe kapena niikaana thanzi lapama, etene iyene ninokoza panga ngozi koma teto bulela. (Nam. 9:11) Eeno chi yongo ya zelu lemba khaadi li-u la DPA. Akala kamunaiziwa mwemo munalembele nyo khaadili, munokoza vepa andimuwa amupingo mwinyu ira kaukami-edeni. Aluwa kanokoza ukami-edani iziwa mwemo munalembele nyo khaadili, koma katinausakuleleni vyoira vakhani ya likami-edo lauchipatala lofuneela wachela chifukwa onoyo nguudindwinyu. (Agal. 6:4, 5) Komave andimuwayo kanoukami-edani  ira muvwecheche vyevyo musakun’lenyoovyo koma teto ira muvilembe pama.

17. Kodi ninatonyi-ede avi ira nili ololela va khani yosakula likami-edo lauchipatala?

¹⁷ Thawi dinjinji vyevyo ninasakula iyo va khani yokuza thanzi li-u kepena likami-edo lauchipatala, vinakala vyogwilizana na chikumbuntimi-u yofunji-iwa pama Baibulo. (Vyo. 24:16; 1 Tim. 3:9) Nasakulanga kapena tapanya na amo-i khani dedi, ninoira pama arelanga likundo lava Afilipi 4:5, lelo lini: “Athu etene kaiziwe ira muli ololela.” Nakala ololela kaninakumbanyela vinjinji vyokuza thanzi li-u kapena kanyi-eda amo-i ira kaendelenga maganizwi-u va khani yokuza likami-edo lauchipatala. Ninowomeluwana koma teto lemekeza abali na arongoli-u masiki vyosakula viwa vikale vyo-iyana na vyee-u. — Arom. 14:10-12.

18. Kodi ninatonyi-ede avi ira ninoyamikela mphaso ya moyo?

¹⁸ Ninokoza tonyi-eda ira ninoyamikela Yehova onoyo ngu Mwin’nya wa moyo, vouteteza koma teto mutumikelanga na murima wetene. (Chiv. 4:11) Vano ninolimbanave na vyongo n’nga marenda koma teto mavuto amo-i. Koma Mulengi-u kaafuna ira nikaengana moyo woi eeni. Chineneveva unoniva-a moyo wo-omala wookaana khwa koma teto vyovoreya. (Chiv. 21:4) Koma vathawi ila ninowona ira chatengo wavadimu kaana moyo koma teto mutumikelanga Babi-u wachikodi Yehova.