1. Wumi wetu walema ñahi kudi Yehova?

 FWIKIJENU ibwambu denu nayinki itala dadiwahi ilaña dinafukuluki nawa dinakuvwa chanti. Hela chakwila didi naniku kukala, idi itala munateli kudilanda namamiliyoni amadola. Chakadi nikujina, mukusakilila nawa mukudihembaña chiwahi idi itala. Munjila yoyimu, Yehova watwinka chawaana chalema, chawaana chawumi. Kafwampi, Yehova wamwekeshaña chalemeshayi wumi wetu kuhitila mukutwinka Mwanindi kwikala ifutu danyiloña.—Yow. 3:16.

2. Neyi chinamwekeshiwu ha 2 AKorinda 7:1, Yehova wakeñaña nindi twileñadi?

² Yehova diyi Nsulu yawumi. (Mas. 36:9) Kapostolu Pawulu niyena wetejeli chumichi hahosheliyi nindi: “Twekala nawumi, twendaña nawa twahandaña muloña wayena.” (Yilw. 17:25, 28) Dichi twatela kuhosha netu wumi wetu hichawaana chatwinkawu kudi Nzambi. Watwinkaña yuma yejima yitwakeñaña kulonda tutwalekihu kuhanda. (Yilw. 14:15-17) Ilaña Yehova hakiñaña mawumi etu muchihayamishaku. Hela chochu, wakeñaña nindi tuzateña kwesekeja nahanakumini ñovu jetu kudikiña kumujimba nikuspiritu. (Tañenu 2 AKorinda 7:1.) Muloñadi chitwatela kudikiñila kumujimba niwumi wetu, nawa tunateli kwila ñahi mwenimu?

3. Chumanyi chimu chikuletesha tukeñeña kwikala akola kumujimba?

³ Chuma chimu chikutuletesha tukeñeña kushakama akola  kumujimba himuloña wakwila twakeñaña kumukalakela Yehova kwesekeja nahanakumini ñovu jetu. (Maku 12:30) Twafwilaña kuhana “nyijimba [yetu] yiikali mulambu wamumi, wajila nawa wetejawu kudi Nzambi,” dichi twatondolwelaña yuma yituneluki netu yinateli kutukatisha kumujimba. (Rom. 12:1) Kuhosha hohu chalala, hela chakwila tukuzata nañovu chamuchidinyi, kwila tukañesha yikatu nehi. Ilaña twazataña nañovu kwikala akola kumujimba muloña twakeñaña kumwekesha kudi Tata yetu wamwiwulu netu twasakililaña hachawaana chawumi.

4. Chumanyi chakeñeleñayi kwila Mwanta Davidi?

⁴ Mwanta Davidi walumbulwili chaletesheli alemeshi chawaana chawumi chamwinkeliwu kudi Nzambi hasonekeliyi nindi: “Yumanyi yayiwahi yikafuma mukufwa kwami, yikafumamu neyi nikunkumukila mwibuku? Komana lunkuñu lukakushimeka? Komana lukashimuna kushinshika kweyi?” (Mas. 30:9) Hadaha Davidi wasonekeli awa mazu hadiñayi kwakwihi nakufwa. Ilaña wafwilileña kutwalekahu kuhanda neyi chinatwesheki kulonda amushimekeña Yehova. Chakadi nikujina, wejima wetu twafwilaña kuhanda.

5. Hela chakwila tunakuli chamuchidinyi hela twakata, chumanyi chitwatela kwila?

⁵ Kukata nikukula kumujimba kunateli kutukañesha kwila yuma yayivulu yitwadiña nakwila. Chikufumamu, tunateli kutiya kutama nikuneña. Ilaña bayi tuzeya nakuleka kudakamena kumujimbaku. Muloñadi? Muloña hela chakwila tunakuli chamuchidinyi hela twakata, tunateli kumushimeka Yehova neyi chelili Mwanta Davidi. Twatiyaña kuwaha hakwiluka netu Nzambi yetu watulemesha hela chakwila hitwawaninaku! (Mat. 10:29-31) Hela chakwila tukufwa, wakeñeshaña kutusañula. (Yoba 14:14, 15) Hampinji yituchidi amomi, twatela kuzata nañovu kudikiña kumujimba niwumi wetu.

6. Yehova wakeñaña nindi twileñadi kutalisha hakuda nikunwa?

⁶ Hela chakwila Bayibolu himukanda wahosha hansañu jakukola kumujimba hela hayakuda yitwatela kudaku, yamwekeshaña Yehova chatoñojokañayi kutalisha hayumiyi. Chakutalilahu, watukonkomwenaña kudikiña “kuyuma yafwana” yinateli kukisañana mujimba wetu. (Mukwa. 11:10) Yuma yinateli kusha wumi wetu muwubanji, dikwila nawu kufwa hakuda nikusheta, yejima ayikaanisha muBayibolu. (Yish. 23:20) Yehova wakeñaña tudiyuuleña hampinji yitunakufuukula yuma yitwatela kuda nikunwa nawa nikuvula kwayu.—1 Kor. 6:12; 9:25.

7. Kufumba kwekala haYishimu 2:11 kwatukwashaña ñahi kufuukula chiwahi hakwakamena mujimba wetu?

⁷ Tunateli kufuukula yuma yikumwekesha nawu twasakililaña chikupu hachawaana chawumi chatwinkawu kudi Nzambi kuhitila mukuzatisha wuswa wetu wakutoñojoka. (Mas. 119:99, 100; tañenu Yishimu 2:11.) Chakutalilahu, twazatishaña chiwahi wuswa wetu wakutoñojoka hayuma yitwafuukulaña kuda. Neyi kudi yakuda yitwakeña ilaña yatukatishaña kumujimba, twafuukulañahu kubula kuyida. Twamwekeshaña cheñi netu twatoñojokaña mwamaana neyi tukaamaña swayi, kukolesha mujimba mpinji yejima, kudiwahisha kumujimba nikuhemba matala etu nawunyonji.

8. Bayibolu yamwekeshaña ñahi chatoñojokañayi Nzambi kutalisha hansañu yakudikiña etu aweni?

⁸ MuNshimbi jaYehova jenkeliyi muza waIsarela mwabombeleli yuma yadi kuyikwasha kulonda kubuli kwikala maposu hetala nikumudimu. (Kwid. 21:28, 29; Kuhit. 22:8) Neyi muntu najahi mukwawu chakubula kwiluka wekalileña mukukala chikupu. (Kuhit. 19:4, 5) Nshimbi jahosheli nawu ninana anakatishi mwana wudi  mwivumu chakadi kwiluka, atela kuyibabesha. (Kwid. 21:22, 23) Nsona jinamwekeshi hatooka nawu Yehova wakeñaña nindi tudikiñeña kumaposu.

9. Yumanyi yitwatela kwila hakwila tubuli kwikala mumaposu? (Talenu cheñi nyevulu.)

⁹ Twamwekeshaña netu twasakililaña hachawaana chawumi chatwinkayi Nzambi kuhitila mukuzata nañovu kudikiña hetala nikumudimu. Chakutalilahu, twanatilaña yuma yatwa, yuma yafwana, hela yitumbu heluña datelela, nawa twashaña yuma yamuchidiwu heluña hanateli kubula kushikawu anyana anyanya. Twekalaña asoñama neyi tunakubutula kesi, tunakutaatisha menji nikuzatisha yozelu yamalayiti. Nawa twafumañahu wanyi neyi tunakwila iyi yuma. Twendeshaña wanyi motoka neyi tunanwi yitumbu yikweti ñovu, walwa, hela neyi tunazeyi muloña wakubula kukaama nawa hitwazatishaña mafoni neyi tunakwendesha motokaku.

10. Yumanyi yitwatela kwila henohu wubanji kanda wumwekani nihampinji yiwunamwekani?

¹⁰ Mpinji yikwawu, hitunateli kukañesha wubanji  wubuli kumwekanaku. Imu munabombeli wubanji wadimwekenaña, yipupu nimadombu. Hela chochu, neyi yuma yamuchidiwu yimwekana, tunateli kwikala akiñewa hela kupuluka kuniwu wubanji kuhitila mukwovwahila nshimbi jinakuhosha hakufuma munidi iluña ninshimbi jikwawu jinakufuma kudi akawuswa. (Rom. 13:1, 5-7) Kukala kukwawu twakwilukilaña chadimu, dichi tukwila chiwahi neyi tulondela nshimbi jahanañawu kudi akawuswa kulonda jitukwashi kudiloñeshela chadimu henohu kukala kanda kumwekani. Chakutalilahu, chinateli kuwaha neyi tuhembela chadimu menji, yakuda yabulaña kukisika swayi niyitumbu.

11. Chumanyi chitwatela kwila neyi chikatu chasambukilaña chinakutaanda mwiluña mutwashakamaña?

¹¹ Chumanyi chitwatela kwila neyi chikatu chasambukilaña chinakutaanda mwiluña mutwashakamaña? Twatela kwovwahila nshimbi jinafumi kudi akawuswa, chidi neyi jinakuhosha hakwisuka kumakasa, kudishila yintampu, kuvwala kadihina hakanwa nikushakama kwakankawetu neyi tunakati. Neyi twilaña iyi yuma, tukumwekesha chitwasakililaña chikupu hachawaana chawumi chatwinkayi Nzambi.

12. Chishina chekala haYishimu 14:15 chinateli kutukwasha ñahi kutonda nsañu yitwatela kukuhwelela neyi kunamwekani wubanji?

¹² Neyi kudi wubanji wunamwekani, mpinji yikwawu tunateli kutiya nsañu yakutwamba kudi amabwambu, hakachi kawantuñi netu nihanyuzi. Chatela tukuhweleli “izu dejima” ditukutiya, tukwila chiwahi neyi tutiyilila kunsañu yalala yinakufuma kunfulumendi nikudi andotolu. (Tañenu Yishimu 14:15.) Izanvu Dalombolaña niamanakwetu mutusanji twanyitayi azataña nañovu kulonda ekali nawunsahu walala henohu kanda ahani nshimbi kutalisha hakupompa kwachipompelu nihamudimu wakushimwina. (Heb. 13:17) Neyi twovwahila, twadikiñaña etu aweni niakwetu. Tunateli cheñi kuletesha antu amuchituñilu kuyimona aYinsahu jaYehova munjila yayiwahi.—1 Pet. 2:12.

13. Twamwekeshaña ñahi netu twalemesha chawaana chatwinkawu kudi Nzambi neyi kudi nsañu yinabombelimu mashi?

¹³ AYinsahu jaYehova ayiluka chikupu nawu alemesha mashi. Twalondelaña nshimbi yaYehova kutalisha hamashi kuhitila mukukaana kutwisha mashi nihampinji yitunakati chikupu. (Yilw. 15:28, 29) Hela chochu, chumichi hichinatalishi mukwila nawu twakeñaña kufwaku. Ilaña twalemesha chawaana chawumi chatwinkawu kudi Nzambi. Twakeñaña wukwashu kudi andotolu elukisha chikupu mudimu adi namuchima wakuuka antu chachiwahi chakadi kuyisha mashi.

14. Tunateli kukeheshaku ñahi wubanji wukukeñeka atuuki kuzatisha njila jikusha wumi wetu muwubanji?

¹⁴ Neyi tulondelaña yuma yitunahanjeki muchinu chibaaba, hadaha hichikukeñeka kutuladika hela kutuuka kuzatisha njila jikusha wumi wetu muwubanjiku. Neyi twikalaña akola kumujimba, tukukola swayi hanyima yakutuladika. Tunateli cheñi kukeheshaku wubanji wukukeñeka atuladiki kuhitila mukufumisha yuma yinateli kutuletela wubanji hetala nihamudimu nikwovwahila nshimbi jahamukwakwa.

15. (a) Chalemenadi kusenda kaadi yetu yanshimbi yakutuhakwila hakutuuka yitunafwachiki? (Talenu cheñi mwevulu.) (b) Kwesekeja nachinamwekeshiwu muvidiyo, tunateli ñahi kufuukwila chadimu njila yakutuukilamu chakadi kuzatisha mashi?

¹⁵ Chineli twalemesha chawaana chawumi, twafwachikilaña chadimu kaadi yanshimbi yakutuhakwila hakutuuka nawa twendaña nayu kwejima kutunakuya. b Haniyi kaadi, twasonekaña yitoñojoka yetu kutalisha hakusha mashi mumujimba ninjila jikwawu jakuukilamu. Komana kaadi yenu yanshimbi yakuyihakwila  hakuyuuka yakufwachika chachiha? Neyi munakukeña kufwachika hela kuyihimpa, bayi mushintajalaku. Neyi tusoneka nakulumbulula chiwahi njila yakutuukilamu, chikaletesha akatuuki swayi. Chikakwasha cheñi andotolu kubula kutwinka yitumbu yinateli kutukatisha. c

16. Chumanyi chitwatela kwila neyi tuneluki wanyi chakufwachika kaadi yanshimbi yakutuhakwila hakutuuka?

¹⁶ Hela chakwila tudi atwansi indi kwiji twakola kumujimba, wejima wetu tunateli kuholokela mumaposu nawa tunateli kukata. (Mukwa. 9:11) Dichi, chikuwaha nankashi neyi tukufwachikila chadimu kaadi yanshimbi yakutuhakwila hakutuuka. Neyi muneluki wanyi chakufwachika iyi kaadi, ihulenu akulumpi amuchipompelu chenu ayikwashi. Akuyikwasha kwiluka chakufwachika iyi kaadi, ilaña hiyakuyifuukwila njila yakuyuukilamuku. Mwatela kudifuukwila enu aweni. (Ñal. 6:4, 5) Hela chochu, akuyikwasha kutiyishisha njila jimunatondi nikuyikwasha kusoneka yitoñojoka yenu.

17. Tunateli kumwekesha ñahi netu tudi amwovu kutalisha hansañu yakukola kumujimba?

¹⁷ Yuma yayivulu yitwafuukulaña kutalisha hakukola kwetu kwakumujimba nichakutuuka  yashindamena hachinleji chetu chamuchima chadizishewa naBayibolu. (Yilw. 24:16; 1 Tim. 3:9) Neyi tunakufuukula nikuleja akwetu yuma yitunafuukuli, tukwila chiwahi neyi tuzatisha chishina chekala haAFwilipi 4:5, chahosha nawu: “Mwekeshenu kwovwaha kwenu kudi antu ejima.” Neyi tudi amwovu, hitukutoñojokaña nankashi hakukola kwetu kwakumujimba hela kukanjikija akwetu kwiteja yitoñojoka yetuku. Twayikeña amanakwetu niahela nawa twayilemesha hela chakwila yuma yafuukulañawu yaambukañaku nayetu.—Rom. 14:10-12.

18. Tunateli kumwekesha ñahi kusakilila hachawaana chawumi?

¹⁸ Twamwekeshaña netu twamusakililaña Yehova, Nsulu yawumi, kuhitila mukukiña wumi wetu nikumuzatila kwesekeja nahanakumini ñovu jetu. (Chim. 4:11) Chayinu mpinji, tukukataña nikumona yihuñu. Ilaña ichi hidichihandilu chakeñeleñayi Nleñi yetu nindi tushakameñaku. Katatakichi keña atwinki wumi wahaya nyaaka wakubula kutiya kuyeña hela kufwa. (Chim. 21:4) Chayinu mpinji, okuwaha kutwatiyaña hakwikala amomi nihakumukalakela Tata yetu wamwiwulu wukweti kukeña, Yehova!