CIPANDE CA KUSAMBILILAMO 9
Mwataizya pa Umi
“Pano aliwe walenga kuti tuye nu umi, kuti twapita nu kuti tuyeko.”—MILI. 17:28.
LWIMBO NA. 141 Umi Waya I Cizungusyo
VINO TUMASAMBILILAPO a
1. Uzye umi witu wacindama uli kuli Yeova?
ELENGANYINI ukuti cuza winu wamupeela injinga. Injinga iyo itakweti mbelu na mabuleki. Asi mulandu na vivyo injinga iyo ingakaziwa pa mutengo ukulu. Mungataizya pa njinga iyo nu kulaisunga ningo. Mu nzila ili imwi kwene Yeova watupeela upe ucindame sana kuli kuti umi. Nupya Yeova walangilila vino umi witu wacindama kuli aliwe lino wapeezile umwanakwe ukuya ilambo.—Yoa. 3:16.
2. Ukulingana na 2 Kolinto 7:1, i cani cino Yeova akaenekela kuli sweswe?
2 Yeova ali Ntendekelo ya umi. (Masa. 36:9) Umutumwa Paulo wazumiile icumi cii nupya watiile: “Aliwe walenga kuti tuye nu umi, kuti twapita nu kuti tuyeko.” (Mili. 17:25, 28) Fwandi tungati umi uupe ukufuma kuli Leza. Akatupeela vyonsi vino tukulondekwa pakuti tutwalilile ukuya nu umi. (Mili. 14:15-17) Nomba ndakai Yeova asitucingilila umu cizungusyo. Lelo akaenekela ukuti twaisakamala pakuti twatwalilila ukuya nu umi usuma nu kumuombela apapezile amaka itu. (Belengini 2 Kolinto 7:1.) U mulandu ci uno tulinzile ukucingilila umi witu, nupya tungacita uli vivyo?
MWACINDIKA UMI
3. U mulandu ci onga uno tulinzile ukuicingililila?
3 Umulandu onga uno tulinzile ukwezezya na maka ukuicingilila u wakuti nga twacita vivyo cingalenga tuombele ningo Yeova. (Mako 12:30) Tukalonda ukupeela ‘imili itu wi lambo ilipuma, ilya muzilo nupya lino Leza angapokelela’ fwandi tusisoolola ivintu vino itumanya ukuti vingonona umi witu. (Loma 12:1) Ukuya kwene asi mulandu na vino tungacita tutange tuti tutalatala tulwalepo. Nomba tukaezya na maka ukuya nu umi usuma, pano tukalonda ukulanga Tata witu uwa kwi yulu ukuti tukataizya pa upe usuma uno watupeela uwa kuya nu umi.
4. I vyani vino Umwene Devedi walondanga ukucita?
4 Umwene Devedi walondolwile umulandu uno wataizizyanga pa upe uno Leza watupeela lino walemvile ati: “Uzye uwazi wane ivyani vino ungakuzipila, ndi cakuti natenzi umwi lindi? Uzye ndi nasanguka ulukungu, ningakulumbanya nu kutakola icumi cako?” (Masa. 30:9) Devedi afwile walemvile amazwi yaa ala ali umupiipi nu kufwa. Nomba walondesyanga ukuicingilila nu kuya nu umi usuma pakuti atwalilile ukuombela Yeova. Ukwaula nu kutwisika swensi kwene avino tukalondesya ukucita.
5. Asi mulandu itukota nanti twalwalilila, i vyani vino tungacita?
5 Ukulwalilila nu kukota kungalenga tute ukucita ivintu vimwi vino twacitanga mpiti. Na cico cingalenga tutoovoke nu kusoka. Nomba tulinzile ukutwalilila ukwezya na maka ukuisakamala. U mulandu ci? Asi mulandu itukota nanti tukalwalilila tungatwalilila ukuombela Yeova wakwe vino Umwene Devedi wacisile. Tukateekeziwa sana ukumanya ukuti twacindama sana kuli Leza asi mulandu na vino umi witu uli. (Mate. 10:29-31) Nanti cakuti twafwa, alalondesya ukututuutulula. (Yobo 14:14, 15) Lino tucili nu umi tulinzile ukwezya na maka ukucita vino tungakwanisya ukucingilila umi witu.
MUTACITA IVINTU IVINGONONA UMI WINU
6. I vyani vino Yeova akalonda twacita lino tukulya na lino tukumwa?
6 Nanti cakuti Baibo asi buku ilikalanda pali vino tulinzile ukusakamala umi witu nanti vino tulinzile ukulya, ikatunena ivintu ivingi pali vino Yeova akaelenganya pa vintu vii. Akatunena “ukutaluka uku vintu ivingonona” imili itu. (Kasa. 11:10, NWT.) Baibo ikati tutalinzile ukuliisya nanti ukumwesya pano ivintu vii vingonona imili itu. (Mapi. 23:20) Yeova akaenekela ukuti twaikanya lino tukupingula pa wingi wa vyakulya vino tulinzile ukulya nanti uwengwa uno tulinzile ukumwa.—1 Kol. 6:12; 9:25.
7. Uzye amazwi aaya pa Mapinda 2:11 yangatwazwa uli ukusunga ningo umi witu?
7 Tungapingula ningo pa vintu ivikalangilila ukuti tukataizya pa upe uno Leza watupeela nga tukuomvya ningo kampingu witu. (Masa. 119:99, 100; belengini Mapinda 2:11.) Wakwe, tukapingulapo ningo pa vyakulya vino tumalya. Ndi cakuti twatemwa ukulya ivyakulya vimwi nomba vikatulwalika, ukuomvya ningo kampingu kungatwazwa ukuta ukulya ivyakulya vivyo. Tukalanga ukuti tukaomvya ningo kampingu witu ndi cakuti tukulaala ukulingana na vino tulinzile ukulaala, tukutukusya umwili, ukuisunga ausaka nu kusunga ningo ing’anda itu.
MWAEZYA NA MAKA UKUICINGILILA UKU MAZANZO
8. I vyani vino Baibo ikatusambilizya pali vino ukuicingilila kwacindama kuli Yeova?
8 Pa Masunde yano Yeova wapeezile Aina Izlaeli pali na vino yangacita pakuti yaicingilile uku mazanzo lino yali pa ng’anda na lino yakuomba. (Kufu. 21:28, 29; Malan. 22:8) Ndi cakuti umwi wakoma umuntu umu kukanamanya ivintu iviipe vyamucitikilanga. (Malan. 19:4, 5) Masunde yalandanga nu kuti ndi cakuti umwi wacisa umwana atatala wavyalwa ukwaula ukumanya wali nu kufululwa. (Kufu. 21:22, 23) Malembo yakalanga ukwaula nu kupita umu mbali ukuti Yeova akalonda twaezya na maka ukuicingilila uku mazanzo.
Tungalanga uli ukuti twacindika umi umu vintu vii? (Lolini palaglafu 9)
9. I vyani vino tungacita pakuti twaicingilila uku mazanzo? (Loliniko ni vikope.)
9 Tukalanga ukuti tukataizya pa upe uno Leza watupeela ndi cakuti tukwezya na maka ukuicingilila lino tuli pa ng’anda na lino tuli uku ncito. Tukasunga ningo ivintu ivingacisa umuntu ni milembo nu kwika ivintu vivyo kuno ana anono yatange yatole. Tukaya acenjele lino tukuomvya umoto, ukweleka manzi nanti lino tukuomvya ivintu vyuze ivikaomvya malaiti nupya tutalinzile ukufumapo lino tukuomvya ivintu vivyo. Tusipisya motoka ndi cakuti itumwa umulembo, uwengwa, nanti lino itutonta sana icakuti tutange tupisye nupya tusiomvya foni lino tukupisya motoka.
LINO KWACITIKA UZANZO
10. I vyani vino tulinzile ukucita lino kutatala kwacitika uzanzo na lino kuli uzanzo?
10 Insita zimwi, tutange tulesye mazanzo ukucitika. Mazanzo wakwe, mazanzo akuiponela, indwala izikakoma ni vimvulunganya tutange tuyalesye ukucitika. Nomba ndi cakuti vya musango uwo vyacitika, tungaicingilila nu kupusuka ndi cakuti tukulondela masunde aakulanda pa kufuma uku ncende ino tuyelileko nanti masunde yauze ukufuma uku uteeko. (Loma 13:1, 5-7) Tungaipekanyizizya uku mazanzo yamwi, fwandi tulinzile ukukutika ndi cakuti uteeko watunena ukucita vimwi pakuti tuipekanyizizye limwi. Limwi cingatwazwa ndi cakuti twasininkizya ukuti itukwata manzi ni vyakulya ivisiononeka zuwa vino tungaomvya nga kwacitika uzanzo.
11. I vyani vino tulinzile ukuitemelwa ukucita nga kwaya indwala izikakoma?
11 I vyani vino tulinzile ukucita ndi cakuti kuno tukaikala kwapona ulwale umwi uukakoma? Tukalondela uutunguluzi ukufuma uku uteeko wakwe, ukufulala uku minwe, ukutaalukana, ukuzwala masiki nu kwikala swenga pakuti tutambukizya yauze. Nga tukucita ivintu vii tukalanga ukuti tukataizya pa upe uno Yeova watupeela kuli kuti umi.
12. Uzye ilembo lya Mapinda 14:15 lingatwazwa uli ukupingula pa vyeo vino tulinzile ukuzumila nga kwacitika uzanzo?
12 Ndi cakuti kwacitika uzanzo, tungapokelela ivyeo vingi ivya ufi ukufuma uku vyuza, ku ainamupalamano nu ukuvwa pa nyuzi. Ukucila ‘ukulataila muli vyonsi’ sile vino tuvwa, tulinzile ukukutika uku vyeo ukufuma uku uteeko na ya dokota. (Belengini Mapinda 14:15.) Amwi Umba Ilikatungulula na amu misambo yakaezya na maka ukulondelezya ivyeo vya cumi lino yatatala yapeela amu vilongano utunguluzi pa milonganile na pa misimikilile. (Aeb. 13:17) Nga tukulondela utunguluzi uwo tukaicingilila nu kucingilila antu yauze. Nupya tungazwa na yauze ukulaelenganya ivisuma pali ya Nte Yakwe Yeova.—1 Pet. 2:12.
MWAIPEKANYIZIZYA LIMWI UKUTALUKA UKU WAZI
13. Uzye tukalanga uli ukuti twacindika umi lino tukuvwila isunde lyakwe Yeova ilikalanda pa wazi?
13 Antu aingi yamanya ukuti ya Nte Yakwe Yeova yazumila ukuti uwazi uwa muzilo. Tukalondela isunde lyakwe Yeova ilikalanda pa wazi lino tukukana ukwikilwamo uwazi, nanti sile alino twalwala ukwaula ukwenekela. (Mili. 15:28, 29) Nomba, cico cisipiliula ukuti tukulonda ukufwa. Cikapiliula ukuti tukataizya pa upe uno Leza watupeela kuli kuti umi. Tukalenga uwazwilizyo kuli yano yangatulwazya umukuitemelwa ukwaula ukuomvya uwazi.
14. Uzye tungacita uli pakuti tutalondekwa ukulwaziwa ukuomvya inzila itale?
14 Ndi cakuti tukuisakamala nga tukucita ivintu vino itusambilila umu cipande cii, limwi tutalalondekwa ukulepulwa nanti ukulwaziwa ukuomvya inzila izitale. Nga tuli nu umi usuma tulapola zuwa ndi cakuti yatulepula. Limwi tutange tulondekwe ukulepulwa nanti ukulwaziwa umu nzila izitale ndi cakuti tukusunga ningo pa ng’anda na pa ncende ino tukaombelapo alino nu kulondela masunde ya pa museo.
Pa mulandu wakuti twacindika upe uno Leza watupeela kuli kuti umi, tukalemba icitupa ca kutuvwangilako lino tukulwaziwa nu kucisenda konsi kuno tuli (Lolini palaglafu 15) d
15. (a) U mulandu ci uno cacindamila ukusenda icitupa ca kutuvwangilako lino tukulwaziwa icikweti vyeo ivipya? (Loliniko ni cikope.) (b) Ukulingana na vino mwatamvile muli vidyo, tungacita uli pakuti tupingule ningo pa kulwaziwa ukuomvya uwazi?
15 Pa mulandu wakuti twacindika upe uno Leza watupeela kuli kuti umi, tukalemba icitupa ca kutuvwangilako lino tukulwaziwa nu kucisenda konsi kuno tuli. b Ukusaina kadi ii kukalangilila vino tukalola ukwikilwamo uwazi alino ni milwazizye yuze. Uzye kadi winu u mupya? Mungacita ningo nga mwalemba nanti ukusenula ivyeo vimwi muli kadi iyo. Ukuilembela vino tukulonda kungatwazwa ukulwaziwa zuwa pano kulalenga tutasumba insita ukulanzyanya na ya dokota pali vii. Nupya tulazwilizya na aomvi ya mu vipatala ukukanatulwazya nanti ukutupeela umulembo uungatuletelela. c
16. I vyani vino tungacita ndi cakuti tutamanyile ningo ivyakulemba umu citupa ca kutuvwangilako lino tukulwaziwa?
16 Asi mulandu sweswe yance nanti twaya nu umi usuma swensi kwene tungaponelwa na mazanzo nanti ukulwala. (Kasa. 9:11) Fwandi tulinzile ukulemba kadi yakuti citupa ca kumvwangilako lino nkulwaziwa. Ndi cakuti mutamanyile ningo ivya kulemba, mungalenga ya eluda amu cilongano cinu ukumwazwa. Yakaezya na maka ukusambilila ivya kulemba kadi wii nomba yatalamunena vino mulinzile ukulemba pa milwaziwilwe inu. Uwo u mulimo winu ukusoolola vino mulinzile ukulwaziwa. (Gala. 6:4, 5) Nomba yangamwazwa ukuvwikisya inzila zimwi izya milwazizye nu kumwazwa ukulemba kadi wii.
MUTAUMILILA SILE PALI VINO MUKWELENGANYA
17. Tungalanga ukuti tusiumilila sile pali vino tukwelenganya lino tukupingula vimwi pa umi witu?
17 Ivingi vino tukapingulapo ivikakuma umi witu nanti milwazizye itu vikasintilila pali kampingu uwasambiliziwa na Baibo. (Mili. 24:16; 1 Tim. 3:9) Lino tukupingulapo pali vimwi nu kulanzyanya na yauze vino itupingulapo ukucita, tulinzile ukulaiusya amazwi aaya pali Filipi 4:5 akuti: “Lekini antu yonsi yailolela ukuti musiumilila sile pali vino mukwelenganya.” Ndi cakuti tusikumilila sile kuli vino tukwelenganya tutalasakamikwa pa umi witu nanti ukupatikizya yauze ukucita vino tukwelenganya. Tukatwalilila ukutemwa aina na nkazi nu kuyacindika nanti cakuti yapingulapo ukucita ivintu vimwi ivipusaneko na vino twapingulapo.—Loma 14:10-12.
18. Tungalanga uli ukuti tukataizya pa umi?
18 Tukalanga ukuti tukataizya kuli Yeova Kapeela wa umi nga tukumuombela ukufika pano tungapezya. (Kuso. 4:11) Ndakai tulinzile ukuzizimizya malwale na mazanzo. Nomba vii asi vino Kaumba witu akalonda twaikala. Likwene sile wasya ace atupeele umi wa pe uwaula ukuwaika nu kufwa. (Kuso. 21:4) Lekini pali ino nsita twaezya na maka ukucita ivintu ivingalenga tuye nu umi usuma nu kuombela Tata witu uwa kwi yulu, Yeova.
LWIMBO NA. 140 Kulaya Umi Usuma Manda Pee!
a Icipande cii cimatwazwa ukulataizya sana pa umi uno Leza watupeela. Tumalanda pali vino tungacita pakuti tutwalilile ukuya nu umi usuma nu kuicingilila lino kwacitika uzanzo alino na vino tungacita pakuti tutaluke uku mazanzo. Tumalanda na pali vino tungaipekanyizizya limwi lino kwacitika indwala.
b Kadi ii ikaamwa nu kuti DPA.
c Tambini vidyo pa jw.org yakuti Vino Mungapingula pa Milwazizye Iikumile Uwazi.
d ULONDOLOZI WA CIKOPE: Umulumendo akulemba icitupa ca kumuvwangilako lino akulwaziwa nupya wasininkizya ukuti akucisenda konsi kuno akuya.
