1. Nimakalelo baani egumi yehu eliwa yathima wa Yehova?

 KABIHA wubuwela mukwawo aguuvahile kwaduru ya dezenyu, yothabwa okwima. Mbwenye, kwaduruya epaddi emodha ehiddurumuwa ni ehitakala vang’ono. Mbwenye naarive dhigari ndho sothabwa okwima, mwebaribarene were osamalela nvaho ola. Yehova ohunivaha nvaho wathima eli egumi. Teto, Yehova uhoniha wihina onovaha thima egumi, wodhela omuliva mwanaye wihina avahe egumaye ninga mukutho wihina anobole.— João 3:16.

2. Mowiwanana ni 2 Coríntios 7:1, Yehova anajheha ddi wahiyo?

² Yehova ntxela na egumi. (Sal. 36:9) Murumiwi Pawulo orumedha wihina ‘Mwaha wa oliye nihikanna egumi.’ (At. 17:25, 28) Bumwahaya, iyo podi owoga negi egumi nvaho wa Mulugu. Yehova ononidhivela, bumwahaya, oliye ononivaha dhatedhene nnahowelihu wihina nikalewo. (At. 14:15-17) Peeno Yehova kanawerana matikiniho wihina nikanne egumi, ohiya eyo, Yehova anajheha wihina nerena ethu-sithu wihina nisamalele egumi yehu epaddi yomuzimuni ni epaddi yomwilini. (Omwileri 2 Coríntios 7:1.) Mwahaya bwaddi nigahowela osamalela egumi yehu, ki nnande addi werana eyo?

3. Ethu baani enaathukulela iyo obarela egumi yehu?

³ Nihikanna dhithu dhowinjhiva dhinanithukulela okanna egumi yapama. Emodha sowihina niilibihedha osamalela egumi yehu, nnere omuthithimiha Yehova. (Mar. 12:30) Nnafuna ‘nipeleke mwiili weehu ninga mukutho  wegumi, wotxena, onarumedhiwa ni Mulugu.’ Bumwahaya, kannafuna werana ethu-sithu yatatamulele makathamiho egumi yehu. (Rom. 12:1) Ebaribari wihina naarive nilibiheraga wihina nikanne egumi yapama iyo podi okala aredda. Mbwenye, nnafuna nerena ele nnandihu wihina nikanne egumi yapama. Nerana ndo nnere omoniha Yehova wihina nnovaha thima egumi.

4. Ethu baani mwene Davidi afuniye?

⁴ Mwene Davidi ohuwoga ethu yamuthukulela wonaga egumi ninga nvaho wa Yehova. Oliye ohuleba egi: ‘Ethu baani gaapurelimimo gavuheleliwa mmahame? Theya dhere wuthithimihani? Mwere woniha orolomeleya weenyu?’ (Sal. 30:9) Podi wera Davidi aalebile madhu yala ahalaga nenaa nuukwa. Mbwenye, naarive dhigaali ndo, oliye ahithoma okanna egumi yapama wihina amulabelegeve Yehova. Mohanganyedha, iyo nnofuna werana emodhave.

5. Podive nahuluvale obe nihili aredda ethu baani nnahowelihu werana?

⁵ Podi wera mwaha wuluvala, obe oredda, kannawedha werana nde neeresihuna kale. Dhithu ninga dhendha podi onuukula. Mbwenye, naarive dhigari ndo, kannahowela ohiya osamalela egumi yehu. Mwahaya bwaddi? Mwaha kinapwatha yaka ngasi ninnihuna obe makalelo eli egumi yehu, iyo aatene podi omuthithimiha Yehova ninga mwene Davidi. Sohagalasa onona wi Mulugu ononidhivela naarive nihilogomane. (Mat. 10:29-31) Teto, naarive nikwe, Yehova anere okanna munukwela woonivenyiha. (Jó 14:14, 15) Vano nilihu mento, nnafuna nerena dhatedhene nnandihu wihina nisamalele egumi yehu.

6. Wodhela muselu woojha ni oong’wa, Yehova anajheha ddi wa iyo?

⁶ Bibiliya kahi livuru nnawoga wodhela makalelo oosamalela egumi wodhela ojha. Mbwenye, oliye onowoga monelo wa Yehova wodhela dhithu dhendha. Motajhiha, Yehova onowoga wi negi nikanne egumi yapama nnohowela osukuma dhithu dhonyakavala. (Ecl. 11:10) Bibiliya onowoga dhithu nahinahowelihu werana dheeke egumi yehu vangovini. Ninga: Ojha bure, ong’wa dhithu dhinalezeliha ofiyedha okwaranyiha manddileya. (Pro. 23:20) Yehova onajheha wi iyo aatene nikanne manddile nafunaga ojha obe ong’wa. — 1 Cor. 6:12; 9:25.

7. Nimakalelo baani Provérbios 2:11, ananikaviheriye werana dhothoma dhapama wodhela osamalela egumi yehu?

⁷ Iyo podi werana dhothoma dhapama dhinoniha wi nnovaha thima egumi, wodhela opendda ni olabihedha pama mubuwelo wehu. (Sal. 119:99, 100; omwileri Provérbios 2:11.) Motajhiha iyo podi wubuwela pama ethu nnafunihu ojha. Akala nnodhiveliwa ojha ethu enanitotela makathamiho, yere okala yapama ohujhaga ethu yeyo. Iyo nnowoniha wi nnosamalela egumi yehu wodhela withuwa pamadhene, werana exersisiyu, okala muthu oyesa ni wegeredha nyumba yehu.

8. Mowiwanana ni Bibiliya monelo wa Yehova wodhela wibarela buuvi?

⁸ Yehova ahavaha amwaana Izarayeli nlamulo naakavihera wibarela, yakala omabasani obe yakala vaade. (Êxo. 21:28, 29; Deut. 22:8) Naarive muthu di muthu ampa mukwaye ahifunaga, eere okanna makathamiho. (Deut. 19:4, 5) Nlamulo nawoga wi, naarive muthu ahifunaga amunddunya mwihiyana anna wari vano mwaanaya akanna makathamiho, eere otorihiwa. (Êxo. 21:22, 23) Bibiliya onowoniha pamadhene wi Yehova onofuna wi iyo nithuwathuwelege wibarela.

9. Nnere ddi wihina nrabele ngovi? (Osugwe fotu.)

⁹ Nnere woniha wi nnovaha thima egumi anivahile Yehova, odhela wibarela naaparaga mabasa vaade obe omabasani. Motajhiha, iyo nnokoya murombwe ni dhithu dhinagwadda, naalapihedhaga ahima? Nafunaga orahila dhithu dhendha, nnorahila mwamakalelo owabarela ahima? Iyo nnokala pasope nalabihedhaga mootho, manjhe opaha ni makina enalaba ni enerjiya? Teto, nnohowela  okale pasope nahihiyaga dhithu ninga dhendha, vahili muthu osugwera. Kaneeddihege karo nigalezele, nigang’wile ni niganna kove. Teto kaniddabwinyege telefoni wula needdihaga karo.

10. Nnahowela nere ddi yahinathi ni yapadduwaga ngovi morulumusa?

¹⁰ Malabo mamodha, kannanda orabela dhaapadduwaga dhithu dhowopiha. Iyo podi ohanda wibarela yapadduwa ngovi, mutipa obe athu yahiwananaga. Mbwenye, dhithu ninga dhendha dhaapadduwaga, iyo podi werana ethu-sithu wihina niibarele. Ninga wawiwelela anamathonga yawoga wi nivenyewo omuruddani winapadduwe dhithu dhowopiha, obe wodhela wiwelela dhoholela enanivahiwa. (Rom. 13:1, 5-7) Malabo mamodha, enowandeya owoga mudhidhi ni mburo winapadduwe ngovi. Nimakalelo yala, nnohowela wawiwelela anamathonga wihina niwegeredhe. Motajhiha, yere okala yapama okanna garafwa na manjhe, dhoojha dhinagonela ovudda ni mwana kaxa ya murombwe.

11. Wakumelela oredda morulumusa nnere ddi?

¹¹ ki wakumelela oredda worusa murudda nnakalihu? Nnohowela wiwelela dhoholela dha anamathonga. Ninga motajhiha, onawa mada, olapelana ni omuwara maskara. Nerana dhithu dhendha nnere woniha wi nnovaha thima egumi anivahile Mulugu

12. Nimakalelo baani yolaga enafwanyeya va Provérbios 14:15, enanikaviheriwa onona dhoholela baani nnahowelihu orumedha yapadduwa ngovi?

¹² Yapadduwa ethu morulumusa, we podi wiwaga dhowoota naakwawo, amwanddamanawo ni mwinternetini. Ohiya orumedha ethu-sithu oniwiwe, yere okala yapama ohara dholaga dhororomeleya. (Omwileri Provérbios 14:15.) Nikuru nolamulela ni Beteli dhili wapela elabo yatene, dhinowilibihedha waaja dhoholela dhororomeleya, ehinathi othoma ethu-sithu wodhela makalelo otugumana ni olaleya. (Heb. 13:17) Niwelelaga dhoholela ndha, nnowabarela amodha ni iyowa. Ohiya eyo nnovaha onamona wapama wodhela nikuru nehu.— 1 Ped. 2:12.

13. Nimakalelo baani wiwelela nlamulo na Yehova wodhela nikame, enonihiwa wi nnovaha thima egumi?

¹³ Anamoona a Yehova, ehinoniwa mwaha orumedhaga wi nikame ethu yoweela. Iyo nnowiwelela nlamulo na Yehova wodhela ohijha nikame, naarive nifwanyiwaga oredda onahowela nikame. (At. 15:28, 29) Eyo kinatapulela wihina iyo nnofuna okwa, mbwenye nnavaha thima egumi anivahile Yehova. Iyo nnowaveda amediku enna efunelo yoonikavihera ehilabihendhe nikame.

14. Nnande addi okweyiha egumi yehu wihina dhehu dhineddele pama yahoweleyaga woperariwa obe nafunaga ojha murombwe?

¹⁴ Nasamalela pama egumi yehu, podi ohufwanyiwa makathamiho yeke egumi yehu vangovini. Nakanna oredda owopiha, iyo podi ovulumuwa mowaguva, nilibihera okanna egumi yapama ovanene. Teto, iyo podi okweyiha egumi yehu  nahowelaga woperariwa, wodhela wibarela nakala vaade ni omabasani ni wawiwelela malamulo aasupayi.

15. a) Mwahaya bwaddi nigahowela okanna dukumento diretivas anticipadas? (Osugwe fotu.) b) Mowiwanana ni vidiyu nnande addi werana yothoma wodhela muselu woolabihedhiwa nikame?

¹⁵ Iyo nnovaha thima egumi. Bumwahaya, nnoperenxeri dukumento (diretivas anticipadas) ni kannavenyavo vaade nahihisile. b Va dukumentoniva, nnowoniha dhithu nthomilihu wodhela muselu wolabihedha nikame ni makalelo mamodha oolabihedha murombwe. We ohukanna dukumento diretivas anticipadas? Akala onofuna okanna dukumento ela, olobe ni wasinari mowaguva. Werana ndo winere onikavihera ohuthabwa othapanyedha museluya ni mediku wodhela yothoma yehu. Teto, nnere wibarela wodhela ohulabihedhiwa murombwe weeke egumi yehu vangovini. c

16. Onere ddi akala kunonne makalelo operenxeri dukumento, diretivas anticipadas?

¹⁶ Naarive akala nili azombwe obe akala  nihikanna egumi yapama, iyo aatene podi ofwanyiwa ngovi-singovi obe okala aredda, mudhidhi nahinajheherihu. (Ecl. 9:11) Bumwahaya, yere okala yapama iyo aatene okanna dukumento ela (diretivas anticipadas). Akala kunonne makalelo operenxeri dukumento ela, walobe nikavihero anamaholela mulogo. Aliwa podi wukavihera we wonelamo makalelo oojha murombwe ni makalelo operenxeri dukumentoya. Mbwenye, aliwa kinuthomele murombwe baani onahoweliwe olabihedha. — Gál. 6:4, 5.

17. Nnonihe aavi wihina nnookweyiha egumi yehu?

¹⁷ Dhithu dhowinjhiva nnathomihu werana wodhela ojha murombwe, dhinadhela wodhela oxagihiwa mubuwelo wehu, wodhela omuhudhera Bibiliya. (At. 24:16; 1 Tim. 3:9) Nerana yothoma ni nawaddela akwihu wodhela ndhe nthomilihu werana, nnohowela ohidduwala ele enawoga Filipenses 4:5 enihina: ‘Okweya weenyu winoniwe naathu aatene.’ Nakala athu ookweya kannathuwathuwelege egumi yehu, newene kannawaddihedhe athu amodha werana yothoma ninga yehu. Iyo nnowadhivela addibilihu ni arogolihu, naarive yeragana yothoma yohiyana ni yehu. — Rom. 14:10-12.

18. Nnonihe aavi wi nnovaha thima egumi anivahile Mulugu?

¹⁸ Nnowoniha wi nnomutamalela Yehova ali ntxela na egumi, wodhela werana ndhe nnandihu wi nisamalele egumi anivahiliye. (Apo. 4:11) Peeno, iyo nnowanana oredda ni ngovi, mbwenye kahi yeyo Mulugu anifuniyena. Movanene oliye anere onivaha egumi yohikanna widdela newene okwa. (Apo. 21:4) Mbwenye nlabo nno nihinathi ofiya, nnohowela ovahagave thima egumi, nididelaga omulabela babihu odhivela, oodhulu.