1. Għal Ġeħova kemm hi importanti ħajjitna?

 IMMAĠINA li ħabib tiegħek tak pittura antika ħafna li tiswa ħafna flus. Il-kuluri tagħha ċċaraw u għandha xi tbajjaʼ. Minkejja dan, il-pittura tiswa miljuni t’ewro. Bla dubju, int se tapprezzaha u tieħu ħsiebha. B’mod simili, Ġeħova tana rigal prezzjuż ħafna, il-ħajja. Fil-fatt, Ġeħova wriena kemm hi importanti l-ħajja tagħna għalih billi bagħat lil ibnu biex imut għalina.—Ġw. 3:16.

2. Kif naraw fit-2 Korintin 7:1, Ġeħova x’jistenna minna?

² Ġeħova hu l-Wieħed li jagħti l-ħajja. (Salm 36:9) L-appostlu Pawlu wkoll kien jemmen dan, u qal: “Bih ngħixu u niċċaqalqu u neżistu.” (Atti 17:25, 28) Għalhekk, nistgħu ngħidu li l-ħajja hi rigal mingħand Alla. Bi mħabba hu jipprovdilna dak li għandna bżonn biex nibqgħu ħajjin. (Atti 14:15-17) Imma bħalissa Ġeħova mhux qed jagħmel mirakli biex iżommna ħajjin. Minflok, hu jridna nagħmlu dak kollu li nistgħu biex nibqgħu b’saħħitna u nkomplu naqduh. (Aqra t-2 Korintin 7:1.) Għala għandna nipproteġu saħħitna u ħajjitna, u kif nistgħu nagħmlu dan?

3. X’inhi raġuni waħda għala nipprovaw nibqgħu b’saħħitna?

³ Raġuni waħda għala għandna nipprovaw nibqgħu b’saħħitna hi biex inkunu nistgħu nkomplu naqdu lil Ġeħova bl-aħjar mod. (Mk. 12:30) Aħna nixtiequ li  nippreżentaw ‘ġisimna bħala sagrifiċċju ħaj, qaddis, u aċċettabbli għal Alla,’ u għalhekk ma nagħmlux affarijiet li jistgħu jagħmlu ħsara lil saħħitna. (Rum. 12:1) Bla dubju, nagħmlu x’nagħmlu, ma nistgħux inkunu ċerti li mhux ħa nimirdu. Imma nagħmlu kulma nistgħu biex nibqgħu b’saħħitna għax irridu nuru lil Missierna tas-sema li aħna napprezzaw il-ħajja.

4. Ir-Re David x’ried jagħmel?

⁴ Ir-Re David spjega għala apprezza l-ħajja li tah Alla meta kiteb: “X’vantaġġ hemm jekk immut u ninżel fil-ħofra? Se jfaħħrek it-trab? Se jitkellem dwar il-lealtà tiegħek?” (Salm 30:9) David jaf kiteb dan il-kliem lejn l-aħħar taʼ ħajtu. Imma hu kien determinat li jibqaʼ b’saħħtu u ħaj sakemm ikun possibbli biex ikun jistaʼ jkompli jaqdi lil Ġeħova. Bla dubju, aħna wkoll nixtiequ nagħmlu hekk.

5. X’nistgħu nagħmlu minkejja li aħna kbar fl-età jew morda?

⁵ Jekk inkunu morda jew kbar fl-età, x’aktarx li mhux se nkunu nistgħu nagħmlu l-affarijiet li konna nagħmlu qabel. Minħabba f’hekk, forsi nħossuna frustrati u mdejqin. Imma aħna xorta rridu nagħmlu dak kollu li nistgħu biex nieħdu ħsieb saħħitna. Għala? Għax sew jekk aħna kbar fl-età u sew jekk aħna morda, aħna xorta nistgħu nfaħħru lil Ġeħova, bħalma għamel ir-Re David. Kemm jinkuraġġina li nafu li għal Ġeħova aħna prezzjużi anki meta nkunu morda jew kbar fl-età! (Mt. 10:29-31) Anki jekk immutu, hu jkun jixtieq ħafna li jirxoxtana. (Ġob 14:14, 15) Waqt li għadna ħajjin irridu nagħmlu dak li nistgħu biex nipproteġu saħħitna u ħajjitna.

6. Ġeħova x’jistenna minna meta niġu biex nieklu u nixorbu?

⁶ Għalkemm il-Bibbja mhix xi ktieb dwar kif tieħu ħsieb saħħtek jew x’għandek tiekol, tgħidilna x’jaħseb Ġeħova dwar dawn l-affarijiet. Hu jinkuraġġina biex ‘inbiegħdu l-għali minn ġisimna’ għax jagħmlilna l-ħsara. (Ekk. 11:10) Il-Bibbja tgħidilna biex ma niklux ikel żejjed u ma nixorbux ħafna alkoħol. Dawn l-affarijiet jistgħu jagħmlulna l-ħsara u anki joqtluna. (Prov. 23:20) Ġeħova jistenna li aħna nkunu bbilanċjati meta nieklu u nixorbu.—1 Kor. 6:12; 9:25.

7. Il-parir li nsibu fi Proverbji 2:11 kif jgħinna nieħdu deċiżjonijiet tajbin dwar saħħitna?

⁷ Aħna nuru li napprezzaw ir-rigal li tana Ġeħova billi nużaw l-abbiltà li naħsbu. (Salm 119:99, 100; aqra Proverbji 2:11.) Pereżempju, aħna naħsbu sew dwar dak li nieklu. Jekk ikun jogħġobna xi ikel imma nafu li jagħmlilna l-ħsara, jagħmel sens li ma nikluhx. Aħna nuru wkoll li nużaw l-abbiltà li naħsbu meta norqdu biżżejjed, nagħmlu eżerċizzju b’mod regulari, u nżommu lilna nfusna u d-dar tagħna nodfa.

8. Kemm hu importanti għal Ġeħova li nevitaw l-inċidenti?

⁸ Ġeħova ta liġijiet lill-Iżraelin biex jgħinhom jipproteġu ruħhom mill-inċidenti fid-dar u fuq ix-xogħol. (Eżo. 21:28, 29; Dt. 22:8) Jekk xi ħadd ikun qatel lil xi ħadd ieħor bi żball, hu kellu  jbati konsegwenzi serji. (Dt. 19:4, 5) Il-Liġi kienet tgħid li anki dawk li bi żball iweġġgħu tarbija li għadha ma twilditx għandhom jiġu kkastigati. (Eżo. 21:22, 23) L-Iskrittura turina b’mod ċar li Ġeħova jridna nagħmlu dak kollu li nistgħu biex nevitaw l-inċidenti.

9. X’nistgħu nagħmlu biex nevitaw l-inċidenti? (Ara l-istampi.)

⁹ Aħna nuru li napprezzaw il-ħajja billi noqogħdu attenti li ma nweġġgħux meta nkunu d-dar u x-xogħol. Pereżempju, jekk ikollna bżonn narmu xi affarijiet li jaqtgħu, kimiki, jew mediċina, għandna narmuhom b’mod li ma jagħmlux ħsara lil oħrajn u nkunu ċerti li ma nħallux dawn l-affarijiet fejn isibuhom it-tfal. Aħna noqogħdu attenti meta nqabbdu xi ħaġa bin-nar, nużaw il-misħun u għodda tad-dawl. Meta nkunu qed nużawhom m’għandniex inħalluhom weħidhom. Aħna ma nsuqux wara li nieħdu xi mediċina li traqqadna, jekk inkunu xrobna l-alkoħol, u jekk inkunu għajjenin.  U ma nużawx il-mobile waqt li nkunu qed insuqu.

10. Kif nistgħu nkunu preparati meta jinqalgħu affarijiet li m’għandniex kontroll fuqhom?

¹⁰ Kultant jistgħu jinqalgħu affarijiet li ma jkollniex kontroll fuqhom, bħal pereżempju diżastri naturali, pandemiji, u ġlied. Però meta jiġru, aħna nistgħu nipprovaw noqogħdu attenti u nevitaw il-periklu billi nobdu d-direzzjonijiet tal-gvern, bħal li nitilqu minn fejn inkunu. (Rum. 13:1, 5-7) Xi kultant nistgħu nippreparaw minn qabel għal xi emerġenza. Għalhekk meta l-gvern jagħti xi direzzjonijiet t’għajnuna minn qabel, għandna nobduhom. Pereżempju, ikun tajjeb li jkollok xi ilma u ikel li ma jiskadix malajr u xi affarijiet tal-first-aid.

11. Jekk fejn ngħixu jkun hemm marda li tittieħed, x’għandna nagħmlu?

¹¹ Xi rridu nagħmlu jekk fejn ngħixu jkun hemm marda li tittieħed? Aħna rridu nobdu d-direzzjonijiet tal-gvern, bħal li naħslu jdejna spiss, inżommu d-distanza, nilbsu l-maskla, u nagħmlu kwarantina. Meta nagħmlu dawn l-affarijiet inkunu qed nuru kemm napprezzaw il-ħajja li tana Ġeħova.

12. Proverbji 14:15 kif jistaʼ jgħinna nkunu nafu liema informazzjoni għandna nemmnu?

¹² Waqt emerġenza xi kultant nisimgħu affarijiet mingħand il-ħbieb, in-nies, jew fl-aħbarijiet li ma jkunux vera. Minflok ma nemmnu ‘kull kelma li nisimgħu,’ irridu noqogħdu attenti għal dak li jgħidu t-tobba u l-gvern. (Aqra Proverbji 14:15.) Il-Ġemgħa li Tiggverna u l-uffiċċji tal-fergħa jagħmlu dak kollu li jistgħu biex ikollhom informazzjoni eżatta qabel jagħtuna direzzjoni dwar il-laqgħat u l-ministeru. (Ebr. 13:17) Meta nobdu din id-direzzjoni, aħna nipproteġu lilna nfusna u lil oħrajn. B’hekk nistgħu wkoll nagħtu xhieda tajba.—1 Pt. 2:12.

13. X’inhu mod ieħor kif nuru li napprezzaw il-ħajja li tana Ġeħova?

¹³ Ħafna nies jafu li x-Xhieda taʼ Ġeħova ma jiħdux demm. Dan għax nemmnu li d-demm hu qaddis. Aħna nobdu l-liġi taʼ Ġeħova u ma naċċettawx li nieħdu demm, anki meta tinqalaʼ emerġenza. (Atti 15:28, 29) Imma dan ma jfissirx li aħna rridu mmutu. Anzi, aħna nħobbu l-ħajja li tana Alla. Aħna nfittxu l-għajnuna taʼ professuri li huma lesti li jgħinuna b’modi mingħajr ma jużaw id-demm.

14. Kif nistgħu nevitaw li jkollna bżonn xi kura jew operazzjoni taʼ malajr?

¹⁴ Jekk nieħdu ħsieb saħħitna billi nagħmlu l-affarijiet li semmejna f’dan l-artiklu, forsi mhux se jkollna bżonn nagħmlu operazzjoni jew nieħdu xi kura oħra. Jekk nieħdu ħsieb saħħitna se jgħaddilna iktar malajr meta nagħmlu xi operazzjoni. U meta nżommu d-dar u l-post fejn naħdmu bla periklu u nobdu l-liġijiet tat-traffiku, se nevitaw li jkollna bżonn nagħmlu xi operazzjoni taʼ malajr.

15. (a) Għala hu importanti li fuqna dejjem ikollna d-Direttiva Medika bil-Quddiem? (Ara l-istampa.) (b) Kif naraw fil-vidjow, kif nistgħu nieħdu deċiżjonijiet tajbin dwar id-demm?

¹⁵ Minħabba li aħna napprezzaw il-ħajja, nimlew id-Direttiva Medika bil-Quddiem (il-karta tad-demm) u nżommuha fuqna l-ħin kollu. Fuq dan  id-dokument, aħna nniżżlu x’inhi l-għażla tagħna dwar it-trasfużjonijiet tad-demm u xi tipi taʼ kura. Għandek bżonn terġaʼ timla d-Direttiva Medika bil-Quddiem? Jekk m’għandekx waħda jew trid tirranġa li għandek, agħmilha mill-ewwel. Bla dubju, meta niktbu x’inhuma x-xewqat tagħna, mhux se ndumu biex nirċievu l-għajnuna mingħand it-tobba. U se ngħinu wkoll lit-tobba u n-nurses biex ma jagħtuniex mediċina li ma taqbilx magħna. b

16. X’nistgħu nagħmlu jekk ma nafux nimlew id-Direttiva Medika bil-Quddiem?

¹⁶ L-inċidenti u l-mard jiġu fuq kulħadd, anki fuq dawk li huma żgħar u b’saħħithom. (Ekk. 9:11) Għalhekk, hu importanti li fuqek ikollok id-Direttiva Medika bil-Quddiem. Jekk ma tafx kif timla dan id-dokument, staqsi lill-anzjani biex jgħinuk. Huma jagħmlu ċert li jkunu jafu kif jimlew id-dokument, imma mhux se jieħdu deċiżjonijiet għalik. Din hi responsabbiltà tiegħek. (Gal. 6:4, 5) Imma huma jistgħu jgħinuk tifhem l-għażliet li għandek u timla d-dokument.

17. Kif nistgħu nuru li aħna raġonevoli fejn tidħol is-saħħa?

¹⁷ Ħafna mid-deċiżjonijiet li nieħdu dwar is-saħħa u l-kura medika huma bbażati fuq dak li tgħallimna mill-Bibbja. (Atti 24:16; 1 Tim. 3:9) Meta nieħdu deċiżjonijiet u nitkellmu dwarhom m’oħrajn, irridu niftakru x’jgħid Filippin 4:5: “Ħa jkun jaf kulħadd kemm intom raġunevoli.” Meta nkunu raġonevoli mhux se ninkwetaw iżżejjed dwar saħħitna, u mhux se nġiegħlu lil oħrajn jaħsbuha bħalna. Anki jekk id-deċiżjonijiet li jieħdu ħutna jkunu differenti minn tagħna, aħna nirrispettawhom u nħobbuhom.—Rum. 14:10-12.

18. Kif nistgħu nuru li napprezzaw il-ħajja?

¹⁸ Aħna nuru l-apprezzament tagħna lejn Ġeħova, il-Wieħed li tana l-ħajja, billi nipproteġu ħajjitna u nagħtuh l-aħjar li nistgħu. (Riv. 4:11) Għalissa, irridu nkampaw mal-mard u problemi oħrajn. Imma l-Ħallieq tagħna ma xtaqx li ngħixu din il-ħajja. Dalwaqt hu se jagħtina ħajja taʼ dejjem mingħajr tbatija u mewt. (Riv. 21:4) Sa ma jasal dak iż-żmien, kemm hu sabiħ li ngawdu l-ħajja u naqdu lil Missierna tas-sema, Ġeħova!