1. Uzye e Yehova akalola wuli uwumi witu?

 YELENGANYANI ukuti e ciwuza winu wamipa ing’anda iyamutengo nkaninye. Nomba nanti ciwe wo-o, iciwumba calanzya, ne mumwi yapentuluka nukupentuluka. Uzye vwilani mutanga mumusalifye pe vino amicitizile? Kweni asa mulandu na vino ikuloleka, icisinka acakuti mungamusalifya. Amuno awomvile icikulu wanzila pa kumipa ing’anda! Wonye avino cawa nakuwumi wuno Yehova watupa. Acawila camutengo nkaninye cino tutanga tukwanisye ukukala. E Yehova walanjizya vino wacindamika uwumi witu mwe vino wacisile, pano wapile Umwana wakwe ukuwa anzuwi.​—Yoha. 3:16.

2. Ukulingana ne 2 Wakorinte 7:1, avyani vino Yehova akakwenecela ukuti twacita?

² E Yehova awili intaliko ya wumi. (Amalu. 36:9) Umutumwa Paulo wamanyile co-o icisinka pano walanzile amazwi yakuti: “Mwakwe weliwe tukayinganila swinya tuli nuwulanzi.” (Imili. 17:25, 28) Fwandi tungalanda ukuti uwumi acawila ukufuma kwe Yehova. Akatupa vino vikalondekwa pakuti tutwalilile ukuwa nu wumi. (Imili. 14:15-17) Pe yo-o impindi e Yehova asicita ivizungusyo pakuti atucinjilile tutwalilile ukuwa nuwumi. Lelo akakwenecela ukuti twayisakamala pakuti tutwalilile ukuwa nu wumi uwuzima nukutwalilila ukumuwombela. (Wazyani 2 Wakorinte 7:1.) Amulandu ci wuno tuzipizile ukuyicinjilila pakuti tutwalilile ukuwa nu wumi uwuzima na pakuti tutakafwe, swinya tungacita wuli wo-o?

3. Amulandu ci wonga wuno tuzipizile ukwelezezya na maka ukusakamala uwumi?

³ Umulandu wonga wuno tukakwelezezya na maka ukusakamala uwumi, apakuti tuwawombela e Yehova ukufika pano papelezile amaka yitu. (Mar. 12:30) Tusicita icili consinye cino tumanyile ukuti cingonona uwumi witu amuno tukalonda ukupa imiwili yitu ngati ‘anzuwi zya wumi uwutele, imipocelelwe kwa kwe Leza’. (Roma. 12:1) Kweni nanti acakuti tungawombesya ukusakamala uwumi ukufika pano papelezile amaka yitu, tutanga tuti twaleka ukulwala. Lelo tukakwelezya namaka ukuwucinjilila amuno tukalonda ukulanjizya Umukwasi witu uwakwi yulu ukuti tukasalifya pakutupa uwumi.

4. Acani cino Imfumu David yalondesyanga sana?

⁴ Imfumu David yalondolozile umulandu wuno yalolanga ukuti uwumi wacindama, pano yalemvile ukuti: “Ngakuliwa chizima-chi kumfwa yane? Nga uwuzima wakuya kunkungwe awuzima-chi? Wuzye awafwe wakakutumvya? Wuzye wangawizya ivyawuzima wako wuno wusisila?” (Amalu. 30:9) E David afwile walemvile ya-a amazwi pano walinji mupipi nukufwa. Lelo walondesyanga ukuwa nuwumi uwuzima pakuti atwalilile ukuwombela Yehova. Ukwasowa nukuvwilika, swensinye avino tukalonda.

5. Avyani vino tungacita asa mulandu na vino twakota nanti ukulwala?

⁵ Mpindi zimwi ukulwala nu wukote vingalenga twapotwa ukucita ivintu vino twacitanga kaali. Na co-o cingalenga twakwivwa uwuwi nukuwa nu wulanda. Lelo tutazipizile ukuleka ukusakamala uwumi witu. Amulandu ci? Amuno asa mulandu na vino twakota nanti ukulwala, tungatwalilila ukuwombela Yehova ndi vino e David wacisile. Cikatusansamusya nkaninye ukumanya ukuti twacindama kwe Yehova asa mulandu na vino twawa. (Mat. 10:29-31) Nanti acakuti tungafwa, alituzyulupula. (Job 14:14, 15) Fwandi pano tucili tuli nu wumi, tukalonda ukuwombesya ukufika pano papelezile amaka yitu ukuwusakamala nukuwucinjilila.

6. Avyani vino e Yehova akalonda twacita pano tukusolapo ivyakulya nu kumwa?

⁶ Nanti acakuti e Baibolo asa libuku lino likalanda pa wumi nanti pa vyakulya vino tuzipizile ukulya, yikalanda pe vino e Yehova akakwelenganya pe vyo-o ivintu. Ku cakulolelako, akatuwomelezya ukuti tuzipizile “ukufumya iviwipe” vyonsinye vino vingonona imiwili yitu. (Ekawi. 11:10) E Baibolo yikatunena ukuti tutazipizile ukuwa swe wafunuke nanti wacakolwa, amuno vyonsinye vyo-o vikakonona uwumi. (Imilu. 23:20) E Yehova akalonda twayilama pano tukusolapo vino twandi tumwe nukulya apano nu wuvule wevyovyo ivintu.​—1 Kor. 6:12; 9:25.

7. Uzye ukusunda kuno kwawa pa Imilumbe 2:11 kukatwavwa wuli ukupingula icete pavyakusakamala uwumi witu?

⁷ Tukalanjizya ukuti tukusalifya pa wumi wuno Yehova watupa ukupitila mukupingula icete pa vintu. (Amalu. 119:99, 100; wazyani Imilumbe 2:11.) Ku cakulolelako, tukalanjizya ukuti tukapingula icete pa vintu ukupitila mwe vino tukasolapo ukulya. Nga cakuti twatemwa ivyakulya vimwi nomba twamanya ukuti vikatulwalika, tukaleka ukuvilya. Cinji acakuti tukalanjizya ukuti tukapingula icete pa vintu nga tukulala amaawala ayakumane, tukutukusya umuwili lyonsinye, tuli swe wawusaka nukusunga ing’anda yitu iya wusaka.

8. Avyani vino e Baibolo yalandapo vino vikalanjizya ukuti e Yehova akalonda twayicinjilila ku masanso?

⁸ E Yehova wapile awina Israeli amasundo yano wazipizile ukukonka pakuti wayicinjilila ku masanso yano yangacitika pa ng’anda nanti kuno wakuwombela. (Ukuf. 21:28, 29; Amasu. 22:8) Nga cakuti wumwi wakoma umuwuye ukwasowa ukumanya, watamulekangapovye. (Amasu. 19:4, 5) Isundo lyalanzile ukuti nawilyanye wino wakoma umwana wino atani akwatwe ukwasowa ukumanya wazipizile ukumusunda. (Ukuf. 21:22, 23) Amawaliko yakalanjizya ukuti e Yehova akalonda twayicinjilila ku masanso.

9. Avyani vino tuzipizile ukukonka pakuti twayicinjilila ku masanso? (Lolani ni vikope.)

⁹ Tukalanjizya ukuti tukasalifya pa wumi wuno Yehova watupa nga cakuti tukuyicinjilila pano tuli pa ng’anda na ku ncito. Ku cakulolelako, nga cakuti tukulonda ukusumba ivintu ivikole, ivya milembo milembo nanti ivye poyizoni, tukaya mukusumba kuno vitanga vilete uwusanso swinya kuno awana watanga wapitileko. Cinji acakuti, tukawikako sana amano nga cakuti twakozya umulilo, twatenda  aminzi nanti tukuwomvya ivyela swinya tusifumapo pano tukuwomvya vyo-o ivintu. Tusipisya e motoka nga tumwile umulembo wuno wungalenga tuwe mu wusanso, tumwile ipala, tukusyupila nanti ukulema e foni pano tukupisya.

10. Avyani vino tungacita pano kutani kucitike uwusanso na pano wacitika?

¹⁰ Mpindi zimwi tutanga tuwe na maka yakulesya iviwipe ukucitika. Vyo-o vikacitika maka maka nga kwacitika amasanso, indwala zino zikakwambucila ni vyongo. Nga cakuti ivya musango-o vyacitika, tungayicinjilila nanti ukupusuka ukupitila mu kwivwila vino awa muwuteko wakutunena ponga ngati akwikala vye mu mang’anda nanti ukusamalila ku cifulo cinji. (Roma. 13:1, 5-7) Mpindi zimwi cikapepuka ukuyipekanizizya lyankani ku masanso, acino tuzipizile ukwivwila vino awa muwuteko wakutunena pakuti tuyipekanye. Ku cakulolelako, tungasungako ivintu ivipepuke ponga ngati aminzi, ivya kulya vino visikononeka zuwa apano nu mulembo.

11. Nga cakuti kwapona indwala yino yikakwambucila, avyani vino tuzipizile ukucita?

¹¹ Avyani vino tuzipizile ukucita nga cakuti indwala yino yikakwambucila yasalangana kuno tukakwikalila? Tuzipizile ukwivwila amasundo yano uwuteko wutuwicizileko ponga ngati akusamba ku makasa, ukutalunkana, ukuzwala e masiki nu kuwaswenga ku cifulo cimwi. Nga tukucita vyonsinye vyo-o, lyo tukulanjizya ukuti tukasalifya pa wumi wuno Leza watupa.

12. Uzye icisinka cisundo cino cawa pa Imilumbe 14:15 cingatwavwa wuli ukusola icete amalyasi yakuteyelezyako nga kwacitika uwusanso?

¹² Nga cakuti kwacitika amasanso ukwasowa ukwenecela, mpindi zimwi tungakwivwa amalyasi ya wufi ku viwuza vitu, ku wina mupalamano na pa intaneti. Nomba ukucila ukusuwila “chisuwile-suwile,” tuzipizile ukwivwila vino awa muwuteko nawa mu vipatala wakulanda. (Wazyani Imilumbe 14:15.) Iwumba Lino Likatungulula na wa mu maofesi ya musambo, wakawombesya na maka ukuvwambilizya ivisinka vyonsi pano watani watunene ivyakukonka pa vya kulongana kwa piwungwe na pa mulimo wakuwizya. (Hebe. 13:17) Nga twakonka wo-o uwutunguluzi, tukayicinjilila nukucinjilila wanji kwe vino vingaleta amasanso. Cinji acakuti, tungalenga nawanji wakwelenganya ivizima pa Nte zya kwe Yehova.​—1 Pet. 2:12.

13. Tungalanjizya wuli ukuti twacindika uwumi wuno Yehova watupa nga ciza ku kuwikwamo uwazi?

¹³ Awantu awavule wamanya ukuti Inte zya kwe Yehova wasiwikwamo uwazi. Tukacita wo-o pamulandu wakulola uwazi ukuti awutele. Tukakwivwila isundo lya kwe Yehova lino likalanda pa wazi ukupitila mukukana wikwamo uwazi nanti acakuti twalwala mukupumincizyanye. (Imili. 15:28, 29) Lelo nanti ciwe wo-o, co-o cisisula mukuti tukalonda ukufwa. Amuno twacindamika nkaninye uwumi wuno Leza watupa. Tukavwamba wa dokota wano wamanya ivyakuwomba icete, wano wangayikundila ukutusakamala ukwasowa ukutuwikamo uwazi.

14. Tungayicinjilila wuli ku kutalika ukuvwamba ukutupozya mu kupumincizya?

¹⁴ Nga cakuti tukukonka vino twasambilila mwe co-o icipande pakusakamala uwumi witu, ncepamwi patanga palondekwa nukutulepula nanti ukuwomvya inzila zinji pakutupozya. Swinya nga cakuti tukusakamala  uwumi witu, tuliwapola zuwanye nga cakuti watulepula. Cinji acakuti tungayicinjilila na kukulepulwa mukupumincizya ukupitila mukusunga icete vino vingaleta uwusanso pano tuli pang’anda na kuno tukuwombela, apano nukukonka amasundo ya pa musewo.

15. (a) Amulandu ci wuno tuzipizile ukusenda e kadi yino twasainile nombanye? (Lolani ni cikope.) (b) Ukulingana ne vidyo, tungacita wuli pakupingulapo pa mipozezye yakuwomvya uwazi?

¹⁵ Pamulandu wakuti twacindika uwumi tukasaina e kadi ya wazi (ivyakukonka pa kutupozya) nu kuyisenda konsinye kuno tuli. b Peyo-o e kadi apano tukalondolola vino tukalola ukuwikwamo uwazi, ni mipozezye yimwi. Uzye mwasainile nombanye e kadi ya wazi? Nga cakuti mukulonda ukusaina naswinya nanti apano mukulonda ukusaina, mutazipizile ukulema na kwisote. Nga cakuti twasainila kucili yo-o kadi walitupozya zuwanye, amuno tutaliwasumba ni mpindi yakulanzyanya na dokota. Swinya tuliyavwa na wa kucipatalanye ukukana womvya imipozezye nanti ukutupa umulembo wuno wungatuletela uwusanso. c

16. Avyani vino mungacita nga cakuti mutamanyile ivya kusaina e kadi ya wazi?

 ¹⁶ Asa mulandu na vino uwumi witu wawa nanti swe watici, swensinye tukalwala nukuponelwa na masanso ukwasowa ukwenecela. (Ekawi. 9:11) Fwandi cicindime nkaninye ukusaina e kadi ya wazi. Nga cakuti mutamanyile icete ivya kusaina, mungakolowozya wa eluda pakuti wamyavwe. Amuno weni wamanya ivyakusaina yo-o kadi lelo nanti ciwe wo-o, watalitela wamipingulile vino muzipizile ukusaina. Mwe weneco amwe wano muzipizile ukuyipingulilapo. (Gal. 6:4, 5) Lelo wangamyavwa ukwivwicisya vino mwasolapo nukumyavwa pano mukusaina.

17. Tungalanjizya wuli ukuti twawa nu mutembo pano ciza mukupingula pa wumi?

¹⁷ E kampingu yino twasambilizya icete Baibolo, ayino yikatwavwa ukupingula pa wumi na pavya mipozezye. (Imili. 24:16; 1 Tim. 3:9) Pano tukupingula pa vintu na pano tukunenako wanji pe vino tupinguzilepo, tukacita icete ukukonka ukusunda kuno kwawa pa Wafilipi 4:5, pano pakati: “Muwe numutembo kuwantu wonsi.” Nga cakuti twawa nu mutembo, tutaliwasakamikwa nkani pa wumi witu swinya tutaliwapaticizya wanji ukuti wakonke vino sweswe tukulola ukuti avino vili icete. Twakunda awanawitu na wankazi swinya twawacindika, asa mulandu nukuti vino wapingulapo vipusineko na vino tupinguzilepo.​—Roma. 14:10-12.

18. Tungalanjizya wuli ukuti tukasalifya pa wumi?

¹⁸ Tukalanjizya ukuti tukasalifya Yehova ukupitila mukucinjilila uwumi nu kumuwombela ukufika pano papelezile amaka yitu. (Ukuwu. 4:11) Peyo-o impindi tukalwala nu kuponelwa na masanso. Lelo wo-o asavino e Kelewula witu walondanga twakwikala. Nombanye wandi atupe uwumi wa muyayaya pano kutaliwa uwulumila ni mfwa. (Ukuwu. 21:4) Fwandi pe yo-o impindi alongo ukuwa nu wumi nu kuwawombela e Yehova Umukwasi witu uwa kwi yulu.