1. ¿Ndáaña ndáyáʼviníka nu̱ú Jehová?

 NDAKANIXI̱NÍÚN ña̱ iin na̱ migoún sa̱níʼi̱na iin veʼe yóʼó soo ña̱yóʼo xa̱a̱ ku̱a̱ʼa̱n ndíʼi̱-xa̱ʼa̱ colorña ta kíʼvi ti̱kui̱í iniña. Soo ni saáví ku̱a̱ʼá millón ña̱ dólar ya̱ʼviña. ¿Á su̱ví ña̱ ndixa kúú ña̱ chindayáʼviníúnña ta kundaúnña? Ta ki̱ʼva saá ke̱ʼé Jehová xíʼinyó chi íyo iin ña̱ ndáyáʼviní ta̱xira ndaʼa̱yó: ña̱yóʼo kúú ña̱ tákuyó. Nu̱ú Jehová kǒo nda̱a̱ ni iin ña̱ʼa ña̱ ndáyáʼviníka, chi iinlá ña̱ ndáyáʼviníka nu̱úra kúú ña̱ tákuyó (Juan 3:16).

2. Nda̱a̱ táki̱ʼva káchi 2 Corintios 7:1, ¿ndáaña kúni̱ Jehová ná keʼéyó?

² Jehová kúú ta̱ táxi ña̱ tákuyó (Sal. 36:9). Ña̱yóʼo kúútu ña̱ ni̱ka̱ʼa̱n ta̱ apóstol Pablo xa̱ʼa̱ tá ka̱chira: “Xa̱ʼa̱ ta̱kán kúú ña̱ tákuyó, kánda̱yó ta íyoyó” (Hech. 17:25, 28). Xa̱ʼa̱ ña̱yóʼo kúú ña̱ káʼa̱nyó ña̱ Ndióxi̱ kúú ta̱ ta̱xi ña̱ tákuyó. Ta ta̱yóʼo táxira ndiʼi ña̱ xíniñúʼuyó ña̱ va̱ʼa kutakuyó (Hech. 14:15-17). Jehová va̱ása kéʼéra milagro tiempo vitin ña̱ va̱ʼa kutakuyó. Chi ña̱ kúni̱ra kúú ña̱ ná chika̱a̱níyó ndee̱ ña̱ kundaayó miíyó ña̱ ná kǒo kiʼin kue̱ʼe̱ miíyó. Ta saátu ná chika̱a̱yó ndee̱ ña̱ kuyatinyó nu̱úra ta ña̱yóʼo chindeétáʼanña xíʼinyó ña̱ va̱ʼaka kachíñuyó nu̱úra (kaʼvi 2 Corintios 7:1). ¿Nda̱chun xíniñúʼu kundaaníyó miíyó, ta ndáa ki̱ʼva keʼéyóña?

3. ¿Ndáa xa̱ʼa̱ kúú ña̱ kúni̱yó kundaayó miíyó?

³ Miíyó va̱ása kúni̱yó kiʼin kue̱ʼe̱ miíyó saáchi kúni̱yó va̱ʼa kooyó ña̱ va̱ʼaka kachíñuyó nu̱ú Jehová (Mar. 12:30). Xa̱ʼa̱ ña̱ kúni̱yó ku̱a̱ʼáka kachíñuyó nu̱úra, ña̱ tákuyó á ku̱ñuyó “ná kooña  nda̱a̱ táki̱ʼva íyo iin ña̱ yi̱i̱ ña̱ ndakiʼinra”, xa̱ʼa̱ ña̱kán ná kundaaníyó miíyó ta ná kǒo kuniñúʼuyó nda̱a̱ ni iin ña̱ʼa ña̱ kivi tavá kue̱ʼe̱ xíʼinyó (Rom. 12:1). Ni ná kundaaníyó miíyó kixaa̱va iin ki̱vi̱ ña̱ kiʼin kue̱ʼe̱ miíyó. Soo chíka̱a̱níyó ndee̱ ña̱ kundaayó miíyó, saáchi kúni̱yó na̱ʼa̱yó nu̱ú yiváyó Jehová ña̱ chíndayáʼviníyó ña̱ tákuyó.

4. ¿Ndáaña xi̱kuni̱ ta̱ rey David keʼéra?

⁴ Ta̱ rey David xi̱chindayáʼviníra ña̱ tákura, ña̱ ta̱xi Ndióxi̱ ndaʼa̱ra. Xa̱ʼa̱ ña̱yóʼo ni̱ka̱ʼa̱nra: “¿Ndáaña va̱ʼa ni̱ʼún tá ná kuvii̱ á tá ná ku̱ʼi̱n ti̱xin ya̱vi̱? ¿Á kivi ndasakáʼnu yáká á ya̱a̱ yóʼó? ¿Á kivi ka̱ʼi̱n xa̱ʼa̱ ña̱ nda̱kúní-iniún?” (Sal. 30:9). Sana ta̱yóʼo ka̱ʼyíra tu̱ʼun yóʼo tá xa̱a̱ ku̱nu̱mí kuvira. Ta ni saáví xi̱kuni̱kavara kutakura ña̱ va̱ʼa ndakundeéra ndasakáʼnura Jehová. Ta saátu ndiʼi miíyó kúni̱yó kutakuyó ña̱ va̱ʼa ndasakáʼnuyó Jehová.

5. Ni xa̱a̱ ku̱chéeyó á kúúmiíyó kue̱ʼe̱, ¿ndáaña kivi keʼéyó?

⁵ Sana xa̱ʼa̱ ña̱ ku̱chéeyó á kúúmiíyó kue̱ʼe̱, kǒo kívika keʼéyó ku̱a̱ʼání ña̱ʼa ña̱ xi̱keʼéyó tá ya̱chi̱ ta xa̱ʼa̱ ña̱yóʼo kivi ndakava-iniyó ta kusuchí-iniyó. Soo su̱ví ña̱yóʼo kúni̱ kachiña ña̱ va̱ása chika̱a̱kayó ndee̱ ña̱ kundaayó miíyó. ¿Nda̱chun? Saáchi ni xa̱a̱ chéeyó á kúúmiíyó kue̱ʼe̱ kivikava ndasakáʼnuyó Jehová nda̱a̱ táki̱ʼva ke̱ʼé ta̱ rey David. Sándi̱koníña-iniyó ña̱ kúnda̱a̱-iniyó ña̱ kúni̱ní Jehová xínira miíyó ta ndáyáʼviníyó nu̱úra ni kúúyó na̱ yiví ku̱a̱chi (Mat. 10:29-31). Xa̱ʼa̱ ña̱ ndáyáʼviníyó nu̱úra nda̱a̱ káʼa̱nra sandátakura miíyó tá ná kuviyó (Job 14:14, 15). Nani tákuyó va̱ʼaní keʼéyó tá ná chika̱a̱níyó ndee̱ ña̱ kundaayó miíyó.

6. Tá xa̱a̱ ná ndaka̱xinyó ndáaña kuxuyó á nda̱saa ña̱ʼa kuxuyó á koʼoyó, ¿ndáaña kúni̱ Jehová ná keʼéyó?

⁶ Ña̱ Biblia va̱ása níkuva̱ʼaña ña̱ ka̱ʼa̱nña xíʼinyó ndáa ki̱ʼva kundaayó miíyó á ndáaña xíniñúʼu kuxuyó. Soo káʼa̱nvaña xíʼinyó xa̱ʼa̱ ña̱ ndákanixi̱ní Jehová xa̱ʼa̱ ña̱yóʼo. Tá kúú, táxiña consejo yóʼo ndaʼa̱yó: “Kuxíká nu̱ú ña̱ʼa ña̱ kivi tavá kue̱ʼe̱ xíʼún” (Ecl. 11:10). Biblia káʼa̱nña xíʼinyó ña̱ va̱ása xíniñúʼu kuxu náʼnáyó á ña̱ koʼoyó ku̱a̱ʼání ndixi chi ña̱yóʼo kivi taváña kue̱ʼe̱ xíʼinyó (Prov. 23:20). Ña̱kán kúni̱ Jehová ña̱ ná sakúaʼayó ka̱ʼnu̱-iniyó tá xa̱a̱ ná ndaka̱xinyó nda̱saa kuxuyó á koʼoyó (1 Cor. 6:12; 9:25).

7. ¿Ndáa ki̱ʼva kundiku̱nyó ña̱ káʼa̱n Proverbios 2:11, tá ndáka̱xinyó ki̱ʼva ña̱ kundaayó miíyó?

⁷ Tá kúni̱yó na̱ʼa̱yó nu̱ú Ndióxi̱ ña̱ táxiníyó tíxa̱ʼvi ndaʼa̱ra xa̱ʼa̱ ña̱ ta̱xira ña̱ tákuyó, xíniñúʼu sakúaʼayó ña̱ viíní ndakanixi̱níyó (Sal. 119:99, 100; kaʼvi Proverbios 2:11). b Tá kúú, tá ndáka̱xinyó ndáaña kuxuyó xíniñúʼu viíní ndakanixi̱níyó. Ni kútóonívayó kuxuyó iin ña̱ʼa, soo tá kúnda̱a̱-iniyó ña̱ kivi taváña kue̱ʼe̱ xíʼinyó va̱ʼaka ná kǒo kuxuyóña. Na̱ʼa̱yó ña̱ kúúyó na̱ yiví ndíchi tá ná ku̱su̱nyó hora ña̱ xíniñúʼu ku̱su̱nyó, tá ná keʼé ni̱ʼiyó ejercicio, tá ná kuchuyó ta limpio ná koo veʼeyó.

8. Nda̱a̱ táki̱ʼva káchi Biblia, ¿á ndáyáʼviníña ña̱ kundaayó miíyó nu̱ú Jehová?

⁸ Jehová ta̱xira ley ndaʼa̱ na̱ ñuu Israel nu̱ú ni̱ka̱ʼa̱nra xíʼinna ndáaña keʼéna ña̱ va̱ʼa ná kǒo kundoʼona tu̱ndóʼo ti̱xin veʼena ni nu̱ú káchíñuna (Éx. 21:28, 29; Deut. 22:8). Tá iin na̱ yiví xa̱ʼnína iinna ta su̱ví ña̱ níxi̱kuni̱ miína kúú ña̱yóʼo chi iin ña̱ ku̱u sana kúúña, xi̱kixiva tu̱ndóʼo nu̱úna xa̱ʼa̱ ña̱yóʼo (Deut. 19:4, 5). Ña̱ ley xi̱ka̱ʼa̱nña tá iin na̱ yiví xa̱ʼnína iin ña̱ lée loʼo ta su̱ví ña̱ níxi̱kuni̱ miína kúú ña̱yóʼo, taxivana castigo ndaʼa̱na (Éx. 21:22, 23). Ña̱ Biblia káxiní náʼa̱ña nu̱úyó ña̱ kúni̱ Jehová ná kundaayó miíyó ña̱ va̱ʼa ná kǒo kixi tu̱ndóʼo nu̱úyó.

9. ¿Ndáaña xíniñúʼu keʼéyó ña̱ va̱ʼa ná kǒo kixi tu̱ndóʼo nu̱úyó? (Koto na̱ʼná).

 ⁹ Kivi na̱ʼa̱yó ña̱ táxiníyó tíxa̱ʼvi ndaʼa̱ Ndióxi̱ xa̱ʼa̱ ña̱ ta̱xira ña̱ tákuyó, tá ná kiʼinníyó kuenta xíʼin chiñu ña̱ kéʼéyó ti̱xin veʼeyó ta saátu nu̱ú káchíñuyó. Tá kúú, táan va̱ʼayó ña̱ʼa ña̱ xi̱ín yuʼú, ña̱ʼa ña̱ kúúmií veneno á inkaka nu̱ú ta̱tán ta kíʼinníyó kuenta ña̱ ná kǒo tiin na̱ va̱lí ña̱yóʼo. Ta tá xátayóña, kíʼinníyó kuenta xíʼinña. Tá kúú, tá ndákaʼmiyó ñuʼú kíʼinníyó kuenta xíʼin ña̱yóʼo, ta saátu tá sása̱a̱yó ti̱kui̱í á tá kéʼéyó inkaka ña̱ʼa, va̱ása sándakoo miíyó ña̱yóʼo, chi kíʼinyó kuenta xíʼinña. Saátu ni va̱ása kávayó carro tá xa̱a̱ xi̱ʼiyó ta̱tán ña̱ kivi tavá kue̱ʼe̱ xíʼinyó, á tá xi̱ʼiyó ndixi, á tá ku̱naáníyó, ta saátu ni va̱ása tíinyó celular tá kávayó carro.

10. ¿Ndáaña kivi keʼéyó ña̱ va̱ʼa kundaayó miíyó tá kúma̱níka kuu iin tu̱ndóʼo á tá xa̱a̱ kúu ña̱yóʼo?

¹⁰ Sava yichi̱ kǒo kívi kasiyó tu̱ndóʼo ña̱ kivi kixi nu̱úyó. Tá kúú, tá kúun kininí sa̱vi̱ á tá táan, tá íyo kue̱ʼe̱ xíkun á tá kánitáʼan na̱ yiví. Tá ná kuu ña̱yóʼo kiviva kundaayó miíyó ta ka̱kuyó nu̱ú tu̱ndóʼo yóʼo. Ña̱kán, iin ña̱ kivi  keʼéyó kúúña, ná kuniso̱ʼoyó ña̱ káʼa̱n na̱ chíñu xíʼinyó. Tá kúú, tá káʼa̱nna xíʼinyó ña̱ ná ku̱ʼu̱nyó inka lugar, á ña̱ keʼéyó inka ña̱ʼa, ná kuniso̱ʼoyó ña̱ káʼa̱n na̱yóʼo (Rom. 13:1, 5-7). Íyotu sava tu̱ndóʼo ña̱ kivi xa̱a̱ ya̱chi̱ka koo tu̱ʼvayó nu̱ú, ña̱kán ná kuniso̱ʼoyó ña̱ káʼa̱n na̱ chíñu xíʼinyó ña̱ va̱ʼa xa̱a̱ ya̱chi̱ka koo tu̱ʼvayó. Kivi taxi va̱ʼayó ti̱kui̱í, á ña̱ʼa ña̱ kuxuyó ña̱ kǒo ndíʼi-xa̱ʼa̱ kama, ta saátu kivi taán va̱ʼayó ta̱tán ña̱ kivi kuniñúʼuyó.

11. ¿Ndáaña keʼéyó tá íyo iin kue̱ʼe̱ xíkun?

¹¹ ¿Ndáaña keʼéyó tá íyo iin kue̱ʼe̱ xíkun nu̱ú ndóoyó? Xíniñúʼu kuniso̱ʼoyó ña̱ káʼa̱n na̱ chíñu xíʼinyó. Tá kúú, xíniñúʼu ndaʼáyó ti̱kui̱í, koo xíkayó nu̱ú táʼanyó, kuniñúʼuyó cubreboca xíʼin kooyó cuarentena (ña̱yóʼo kúni̱ kachiña ña̱ ndakasiyó miíyó ti̱xin veʼeyó). Tá kéʼéyó ndiʼi ña̱yóʼo náʼa̱yó ña̱ chíndayáʼviníyó ña̱ tákuyó chi mií Ndióxi̱ kúú ta̱ ta̱xiña ndaʼa̱yó.

12. ¿Ndáa ki̱ʼva chíndeétáʼan Proverbios 14:15 xíʼinyó ña̱ kiʼinníyó kuenta xíʼin ndiʼi ña̱ káʼa̱nna xíʼinyó tá iin kama kúu iin tu̱ndóʼo?

¹² Tá kúu iin tu̱ndóʼo, na̱ migoyó á na̱ vecinoyó sana ku̱a̱ʼání ña̱ʼa ka̱ʼa̱nna xíʼinyó á kivitu kuniso̱ʼoyó noticia ta sava ña̱yóʼo ña̱ vatáva kúúña. Nu̱úka ña̱ kuniso̱ʼoyó ña̱ káʼa̱n na̱yóʼo, va̱ʼaka ná kuniso̱ʼoyó ña̱ káʼa̱n na̱ chíñu á na̱ doctor na̱ xíni̱ xa̱ʼa̱ ña̱yóʼo (kaʼvi Proverbios 14:15). c Iin ña̱ va̱ʼaní keʼéyó kúú ña̱ kuniso̱ʼoyó ña̱ káʼa̱n na̱ Cuerpo Gobernante xíʼinyó ta saátu na̱ Betel, chi na̱yóʼo chíka̱a̱nína ndee̱ ña̱ siʼna nandukúna xa̱ʼa̱ ña̱ kúu ta saáví ka̱ʼa̱nna xíʼinyó ndáa ki̱ʼva ku̱ʼu̱nyó reunión á ku̱ʼu̱nyó natúʼunyó xa̱ʼa̱ Ndióxi̱ (Heb. 13:17). Ña̱ va̱ʼa miívayó kúúña tá ná kuniso̱ʼoyó ña̱ káʼa̱nna xíʼinyó ta saátu chindeétáʼanyó xíʼin inkana ña̱ ná kǒo ña̱ kundoʼona. Ta tá xíto inkana ña̱ kéʼéyó, sana nda̱a̱ ka̱ʼa̱n va̱ʼana xa̱ʼa̱ miíyó na̱ testigo Jehová (1 Ped. 2:12).

13. ¿Ndáa ki̱ʼva náʼa̱yó ña̱ ndáyáʼviní ña̱ tákuyó nu̱úyó tá xíniso̱ʼoyó ña̱ káʼa̱n ley Jehová xa̱ʼa̱ ni̱i̱?

¹³ Ku̱a̱ʼání na̱ yiví xa̱a̱ kúnda̱a̱-inina xa̱ʼa̱ miíyó na̱ testigo Jehová ña̱ kǒo ndákiʼinyó ni̱i̱ chi ña̱ yi̱i̱ kúú ña̱yóʼo nu̱úyó. Ndíku̱nyó ley ña̱ ta̱xi Jehová ndaʼa̱yó ña̱ káʼa̱n xa̱ʼa̱ ni̱i̱, ña̱kán va̱ása táxiyó taánna ni̱i̱ miíyó ni ndo̱ʼoyó iin ña̱ ndeéní ta ndíkaa̱yó ndaʼa̱ na̱ doctor (Hech. 15:28, 29). Ta su̱ví ña̱yóʼo kúni̱ kachiña ña̱ kúni̱yó kuviyó. Ndáyáʼviníva ña̱ tákuyó nu̱úyó chi Ndióxi̱ kúú ta̱ ta̱xiña ndaʼa̱yó. Ña̱kán ndúkúyó na̱ doctor na̱ xíni̱ va̱ʼa ña̱ ná taxina ta̱tán mií ña̱ va̱ʼa ndaʼa̱yó ta kǒo taánna ni̱i̱ miíyó.   

14. ¿Ndáaña kivi keʼéyó ña̱ va̱ʼa ná kǒo kundoʼoyó iin tu̱ndóʼo ña̱ ndeéní á iin kue̱ʼe̱ ña̱ ndeéní?

¹⁴ Tá ná keʼéyó ña̱ sa̱kuaʼayó nu̱ú artículo yóʼo ña̱ kundaayó miíyó, sana kǒo xíniñúʼu ku̱ʼu̱nvíyó nu̱ú na̱ doctor ña̱ ndatána miíyó á ña̱ taxina iin ta̱tán ña̱ ndeéní ndaʼa̱yó. Soo tá va̱ʼaní ndáayó miíyó ni ná ndatá na̱ doctor miíyó kamaníva ndaʼa̱yó. Ta tá ná chika̱a̱níyó ndee̱ ña̱ kiʼinyó kuenta xíʼin chiñu ña̱ kéʼéyó ti̱xin veʼeyó xíʼin nu̱ú káchíñuyó ta ndíku̱nyó ña̱ káʼa̱n na̱ chíñu xíʼinyó, sana kǒo kundoʼovíyó iin tu̱ndóʼo ña̱ ndeéní ta nda̱a̱ ku̱ʼu̱n kamana xíʼinyó nu̱ú na̱ doctor á hospital.

15. a) ¿Nda̱chun ndáyáʼviní ndiʼi yichi̱ ná kuniʼiyó tutu nu̱ú káʼa̱nña xíʼin na̱ doctor ndáa ki̱ʼva keʼéna xíʼinyó? (Koto na̱ʼná). b) Nda̱a̱ táki̱ʼva káchi video ña̱ xi̱toyó, ¿ndáaña kivi keʼéyó ña̱ va̱ʼa sakúaʼa va̱ʼayó tasaá vií ndaka̱xinyó ña̱ keʼéyó?

¹⁵ Inka ña̱ kivi keʼéyó ña̱ va̱ʼa na̱ʼa̱yó ña̱ ndáyáʼviní ña̱ tákuyó nu̱úyó kúú ña̱ sandákutúyó tutu ña̱ naní, Declaración previa de voluntad para la atención médica. d Chi nu̱ú ña̱yóʼo káʼa̱nña xíʼin na̱ doctor ndáa ki̱ʼva kúni̱yó keʼéna xíʼinyó, ta ndiʼi tiempo ná kaka tutu yóʼo  xíʼinyó. Tutu yóʼo káʼa̱nña ndáaña ndákanixi̱níyó xa̱ʼa̱ ni̱i̱ á ndáa ta̱tán kúú ña̱ va̱ʼa ndakiʼinyó. ¿Á xa̱a̱ kúúmiíún iin ña̱ xa̱á? Tá xíniñúʼu sákutún iinña á ndasaxa̱únña va̱ása kundatuníún, kama keʼún ña̱yóʼo. Tá xa̱a̱ káxi va̱ʼa ná kaʼyíyó nu̱ú tutu yóʼo ña̱ nda̱kaxinyó keʼéna xíʼinyó, chindeétáʼanña xíʼinyó ña̱ kamaka taxina ta̱tán ndaʼa̱yó, saáchi va̱ása ku̱a̱ʼání tiempo kuniñúʼuyó ña̱ ndakaniyó nu̱úna ndáa ki̱ʼva kúni̱yó keʼéna xíʼinyó. Ta tutu yóʼo kúú ña̱ chindeétáʼan xíʼinyó ña̱ ná kǒo kuniñúʼuna ta̱tán ña̱ kivi tavá kue̱ʼe̱ xíʼinyó. e

16. ¿Ndáaña kivi keʼún tá va̱ása xíni̱ún sándakutún tutu nu̱ú káʼa̱nña ndáaña kivi keʼé na̱ doctor xíʼún?

¹⁶ Ni kúúyó na̱ va̱lí á ni kǒo kue̱ʼe̱ kúúmiíyó ndiʼivayó kivi kundoʼoyó iin tu̱ndóʼo á kiʼin kue̱ʼe̱ miíyó (Ecl. 9:11). Ña̱kán iin ña̱ va̱ʼa kúúña tá ndiʼi yichi̱ ná kuniʼiyó iin tutu nu̱ú káʼa̱nña xa̱ʼa̱yó ndáa ki̱ʼva kúni̱yó ná keʼé na̱ doctor xíʼinyó. Soo tá va̱ása xíni̱ún sándakutúnña kǒo kundi̱ʼi̱-iniún, na̱ anciano na̱ congregación xíni̱nívana keʼéna ña̱yóʼo ta kivi chindeétáʼanna xíʼún. Soo na̱yóʼo va̱ása ka̱ʼa̱nna xíʼún ndáa ña̱ʼa kúú ña̱ xíniñúʼu ndaka̱xiún, chi iin tá iinvayó ndakuiinyó xa̱ʼa̱ ña̱ ndáka̱xinyó keʼéyó (Gál. 6:4, 5). Ta íyo ku̱a̱ʼání nu̱ú ña̱ kivi ndaka̱xiún,  na̱ anciano kivi chindeétáʼanna xíʼún ña̱ va̱ʼa kunda̱a̱-iniún xa̱ʼa̱ ña̱ káʼa̱n tutu yóʼo tasaá va̱ʼa sándakutúnña.

17. ¿Ndáa ki̱ʼva náʼa̱yó ña̱ viíní ndákanixi̱níyó tá ndáka̱xinyó ta̱tán ña̱ kuniñúʼuyó á tá ndáka̱xin inkana ta̱tán ña̱ kuniñúʼuna?

¹⁷ Ña̱ Biblia chíndeétáʼanña xíʼinyó ña̱ va̱ʼa ndaka̱xinyó ndáa ta̱tán kúú ña̱ kivi kuniñúʼuna xíʼinyó (Hech. 24:16; 1 Tim. 3:9). Ña̱kán nda̱a̱ ndáaka ña̱ ná ndaka̱xinyó keʼéyó á tá nátúʼunyó xa̱ʼa̱ ña̱yóʼo xíʼin inkana ná ndakaʼányó ña̱ káʼa̱n Filipenses 4:5: “Ndiʼina ná kunda̱a̱-ini ña̱ va̱ʼaní ndákanixi̱níndó”. Náʼa̱yó ña̱ va̱ʼaní ndákanixi̱níyó tá su̱ví nina kue̱ʼe̱ ndákanixi̱níyó xa̱ʼa̱, ta ni va̱ása íxandúxayó xíʼin inkana ña̱ ná ndakanixi̱nína nda̱a̱ táki̱ʼva ndákanixi̱níyó. Ni síínva ña̱ ná ndaka̱xin na̱ hermanoyó keʼéna, ná na̱ʼa̱yó ña̱ kúʼvi̱-iniyó xíniyóna ta íxato̱ʼóyóna (Rom. 14:10-12).

18. ¿Ndáa ki̱ʼva náʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira ña̱ tákuyó?

¹⁸ Nda̱a̱ táki̱ʼva sa̱kuaʼayó, Jehová kúú ta̱ ta̱xi ña̱ tákuyó. Ta náʼa̱yó ña̱ táxiyó tíxa̱ʼvi ndaʼa̱ra tá ndáayó ña̱ tákuyó, ta viíní xíniñúʼuyóña ña̱ ndasakáʼnuyóra (Apoc. 4:11). Soo tiempo vitin kíʼin kue̱ʼe̱ miíyó á yáʼayó nu̱ú tu̱ndóʼo, soo su̱ví saá níxi̱kuni̱ Jehová kutakuyó. Táxiníyó tíxa̱ʼvi ndaʼa̱ Jehová chi si̱lóʼo kúma̱ní ña̱ kooyó nu̱ú ñuyǐví xa̱á nu̱ú kǒoka kue̱ʼe̱ koo, nu̱ú va̱ásaka kuviyó (Apoc. 21:4). Nani ndátuyó ña̱ kixaa̱ ki̱vi̱ kán ná chindayáʼviyó ña̱ tákuyó ta ná kuniñúʼuyóña ña̱ ndasakáʼnuyó yiváyó Jehová.