1. Sada ûiba matikōse Jehovaba a ǀō-aisaba?

 MÛNAN-AI re sadu ǀhōsa î ge ǀoro xawe ǀō-aisa ǀkhaeba ra mā du. Xawe î ge nē ǀkhae xū-e ǀhai, ǀurixa tsî ǂhan hâ. ǁNā ǃnubusigu ga hâ xawe î ge ǁnā ǀkhaexu-e mîliundi mari-e ra ǂgan. ǁNās ǀkha du ge ǁnā ǀkhaexū-e kaise nî ǃgôaǃgâ tsî nî kōǃgâ. ǁKhā ǀgaub ǃnâb ge Jehovaba ǀō-aisa ǀkhaeba ge māda, ǁnāb ge ûib di ǀkhaeba. Jehovab ge sida ûibab kaise ra ǃgôaǃgâsa ge ǁgau, ǁîb ǀGôaba sida ǃaroma Xoremarib ǀkhaeb ase mās ǃnâ-ū.—Jhn. 3:16.

2. 2 Korinteǁîn 7:1 ǃoagu Jehovaba tae-e sida xu ǂgaoǀkhā hâ?

² Ûib ge Jehovaba xu hâ. (Psa. 36:9) Apostel Paulub ge nē amaba ge ǃkhō-am mîb ge o: ‘ǁÎb ǃnâ da ûi, gon tsî hâ xui-ao.’ (ǃNǃkh. 17:25, 28) ǁNā-amaga da ge a mî ǁkhā, sada ûib ge Eloba xu hâ ǀkhaeba. ǁÎb ge ǀnamxaǃnâse ûis ǃaroma da ǂhâhâ xūna ra māda. (ǃNǃkh. 14:15-17) Xawe Jehovab ge nēsi buruxa sōǀôana dī tama hâ, î da ûitsâmase hâ ǀgara. ǁÎb ge ra ǂhâba î da sida gagasi tsî sorosi ûiba kōǃgâ ǁkhā da as kōse. (Khomai re 2 Korinteǁîn 7:1 sa.) Tae-i ǃaroma da sida ûib tsî ǂūrusib tsîna nî kōǃgâ? Tsî ǁnāsa da mati a dī ǁkhā?

3. Mâsa a ǀgui ǃaroma ǂuruse hâ ǀgaras diba?

³ ǀGui ǃaromas dītsâ tsî da ǂuruse nî hâbas ge, î da Jehovaba ū da hâ ǁkhāsib hoab ǀkha ǃoaba ǁkhā. (Mrk. 12:30) Dītsâ da ge ra, ‘î da sida sorode ûitsama ǁguibas ase, ǃanu tsî Elob xa ūǃoahe hâse ǁguiba.’ Tsî da ge sida sorosa a tsûtsû ǁkhā xūna xu nî ǂgōsen. (Rom. 12:1) Amase da ge a mîǁoa, ǀaesen da tidesa. Xawe ǁkhā da-e da ge nî dītsâ, î da sida ǀhomsi ǁgûba ǁgau ûib di ǀkhaeba da ra ǃgôaǃgâsa.

4. Gao-aob Daviba tae-e gere dī ǂgao?

⁴ Gao-aob Davib ge ge ǁguiǃā, tae-i ǃaromab ûib di ǀkhaeb Eloba xu hâba ra ǃgôaǃgâsa xoab ge o: “Tarebe harebesa ti ǁōb ǃnâ hâ ǀhobas ǃoa ta ga ǁgôao? ǁŌ hâna kare tsi ǁkhān a? Sa hâhâ ra ǃgâisib xa aoǁnâ ǁkhān a?” (Psa. 30:9) Davib ge ǁnā mîde ǁōb nîs aiǃâ ge xoa. Xaweb ge ge dītsâ îb ǁkhāb as kōse ûitsamase hâ tsî Jehovaba ǃoaba ǁkhā. Sida hoada ge ǁkhā xū-e ra dī ǂgao.

5. Nēsi da ga kaira tamas ka io a ǀaesen xawe da tae-e a dī ǁkhā?

⁵ ǀAeb tsî kairasis ge ǁkhaeda ǁkhā, ǀnai da gere dī xūna dīsa. Nēs xa ǃaromahe hâse da ge ǁaixa tsî ǁgaise a tsâ ǁkhā. Xawe da ge tā ǀûsen tsî sida ǂurusiba nî kōǃgâ ǀû. Tae-i ǃaroma? Matikōse da ga kaira tamas ka io ga ǀaesen xawes tsîna da ge Jehovaba Gao-aob Davib khami a ǃoaba ǁkhā. Matikōse i ra tsâǀkhā da ǂansa, sida Elob ra ǃgôaǃgâsa ǀoasa kurusa da ūhâ tama hâ xawes tsîna. (Mat. 10:29-31) ǁŌ da gas tsînab ge ǁîba ra ǁkhore sida khâisa māsa. (Job. 14:14, 15) Ûitsama da a hîna da ge ra dītsâ ǂgao, sida ǂurusib tsî ûib tsîna ǁkhaubasa.

6. Jehovaba tae-e sida xu ra ǃâubasen ās tsî ǂûs di ǁnaedigu tawa i ga hā o?

⁶ Elobmîs ge sida ǂurusib tamas ka io tae-e da nî ǂûs xa mîba da tama hâ. Xawe î ge Jehovab di ǂâi ǀgauba nē xūn ai ra ǁgauda. Aiǁgause, ǁîb ge ra ǀapemāda, “tā i xū-i xare-e tsû kai du” hîna sida sorode a ǁgaiǁgai ǁkhā-e. (Aoǁn. 11:10) Kaise ǂûs tsî ǀhoros hîna ûiba ǁkhōǁkhōsa mâsib ǃnâ a mâi ǁkhā ra ge, Elobmîs ǃnâ ra ǂgāhe. (ǂKhm. 23:20) Jehovab ge ra ǃâubasen î da ǃkhō-oasen matikōse da ra ǂûs tsî ās xa i ga hâ o.—1Kor. 6:12; 9:25.

7. ǂKhoamîdi 2:11 ǃnâ ra hō-e ǀapemāsa mati ra hui î da ǃgâi mîǁguiga dī sida ǂurusib xa?

⁷ Mîǁguiga da ge a dī ǁkhā hîna ra ǁgauga Elob ǀkhaeb ûib diba da ra ǃgôaǃgâsa. Sida di ǂâiǀgauga ǃgâise sîsenūs ǃnâ-ū. (Psa. 119:99, 100; khomai re ǂKhoamîdi 2:11 sa.) Aiǁgause da ge ǃgâi mîǁguiba nî di ǂû da ra xūn xa. ǂAn da ga o, ǀnî ǂûn ge ra ǀaesen kai da. O î ge sida ǂâis di ǁkhāsiba ra hui, î da ǁîna xu ǂgōsen. ǁGaus tsîna da ge ra dī gā-ai da asa ǂâusase ǁom, hoaǁae oefens tsî sida sorodi tsî omdi tsîna ǃanuse ūhâs ǃnâ-ū.

8. Elobmîsa tae-e ra ǁkhāǁkhā sida ǃnorasasib Jehovaba a ǂhâǂhâsabasa?

⁸ Jehovab ge Israelǁaesa a mā ǂhanub ge ǁîna ge hui, în oms tamas ka io sîsenni tawa tā ǁgaise tsûtsûsen ǁkhā.  (Eks. 21:28, 29; Deu. 22:8) Khoe-i ga nau-e ǂanapegase a ǃgam, o î ge ǃgam-ao-i tsîna ǁî-i ǁkharaba ga hōǃâ hâ. (Deu. 19:4, 5) ǂHanub ge ra ǂgaoǀkhā î-i ǁan hîna ǂanapega tamase ǃnae-e tama ǀgôa-e ra ǃgam-e ǁkhara-e. (Eks. 21:22, 23) Xoadi ge a ǃgāsa, Jehovab ra ǂhâbasa î da hoana dītsâ tsî ǃnorasase hâ.

9. Tae-e da a dī ǁkhā, î da tsūkēǃgâna a ǃaroma ǁkhā xūna xu ǂgōsen? (Ai-īsiga mû re.)

⁹ Elob ǀkhaeb ûib diba da ra ǃgôaǃgâsa da ge ra ǁgau, ǃnorasase da ga oms tsî sîsenni tawa ga hâ o. Aiǁgause da ge xūn hîna a ǀā, ǃgāxa xūn tsî sōǀôan tsîna ǃnorasa ǀgaub ǃnâ nî āxu. Nau khoena i tsûtsû tidese. Kōǃgâs tsîna da ge ra dī în ǀgôarona tā ǁîna hōǁkhā. ǀAes, ǀgamsa ǁgammi tsî sîsenū da ra xūn tsîna da ge ǂōrisase nî kōǃgâ. Tsî ǁîna ǁnāxū mâ tide kōǃgâs ǃnāgas ose. Audosa da ge tā nî ǃnari sida ǁnâuǃāb ga sōǀôa-i, xûi-i tsî ǁom ǂâu tama îs xa ga tsâǀkhāhe o. Selfona da ge tā ǃnari da ra hîna ni sîsenū, nēs a ǂhani da ǁkhā amaga.

10. Tae-e da tsūkēǃgâb aiǃâ tsî ǁîb ga hâ ǁaeb ai a dī ǁkhā?

¹⁰ ǀNî ǁaegu ai da ge ǁkhōǁkhōsa xūna xu a ǁkhaesen ǁoa. Nēs ge a ama tsūkēǃgâgu, ǀaeb khoraǂuisens tsî ǂkhabadīb xūn xa i ga hâ o. Xawe ǁnāti ī xūn ga io, o da ge ǃnorasase a hâ ǁkhā ǂhanub ra māda daoǁgaude saos ǃnâ-ū. ǀNîsi sida omde xu īs tamas ka io ǀnîhâ ǀgaugu ǃnâ. (Rom. 13:1, 5-7) Īǁkhā î ge a ǀnî xūn ǃaroma da nî aiǂhomisensa. ǁNā-amaga da ge ǂhanub ra māda daoǁgaude ǃgâ tsî nî sao. Aiǁgause, î ge ǀnîsi nî ǃgâi î du ǀnai ǁgammi, ǃkhaese ǁgai tide ǂûn tsî ǂguro huib xūn tsîna ūhâ.

11. ǀAeb khoraǂuisens ga sida ǁan hâ ǃkhaib ǃnâ ga ra hâ, o da tae-e nî dī?

¹¹ Tae-e da a dī ǁkhā ǀaeb khoraǂuisens ga hâ o? ǂHanub ra māda daoǁgauna da ge nî ǁnâuǀnam. Aiǁgause, ǃomde ǁās, ǃnūguse hâs, maskerte anas tsî ǀaesen da ga o khoena xu nî hâ bē. Nē xūna da ga dī, o da ge ra ǁgau Elob ǀkhaeb ûib diba da ra ǃgôaǃgâsa.

12. ǂKhoamîdi 14:15 sa mati a hui ǁkhā tsūkēǃgâb ga hâ, o da nî ǃgâ ǂhôan xa?

¹² ǂŌǂōsib di ǁaeb ǃnâ î ge sada ǀhōsan, ǁanǁare-aon tsî kō da ra ǂhôan tsîna ama tama xūna a ǃhoa ǁkhā. “Mâ xū-i hoa-e” ǂgoms xa da ge ama ǂhôan hîna ǂhanub tsî ǀaeǃkhō-aona xu ra hāna nî ǃgâ. (Khomai re ǂKhoamîdi 14:15 sa.) ǂGaeǂguira soros tsî ǁnâub bērodi tsîn ge ra dītsâ în ǂhanu tsî ǂgomǃgâhe ǁkhā ǂhôana hō. ǀHaohâb ǀhaodi tsî aoǁnâ sîsenni xa gu daoǁgaude nî mās aiǃâ. (Heb. 13:17) Daoǁgauna sao-ais ǃnâ-ū da ge sida tsî nau khoen tsîna ǁkhōǁkhōsa xūna xu ra ǁkhauba. Sida ǂnamipe hâ khoen tsîna da ge a hui ǁkhā în Jehovab di ǃoaba-aon xa ǃgâi mûǂuiba ūhâ.—1Pet. 2:12.

13. Mati da ra ǁgau ǀaob xa i ga hâ o, Elob ǀkhaeb ûib diba da ra ǃgôaǃgâsa?

¹³ Jehovab di ǃoaba-aon ge a ǂansa ǁîn ǀaoba ra ǃgôaǃgâ ǀgaub xa. Jehovab di ǂhanuba da ge ǁnâuǀnam tsî da ge ǀaoba ūǃoa tama hâ, ǀaeb ǂōǂōsib ǁaeb ǃnâs tsîna. (ǃNǃkh. 15:28, 29) Xawes ge ǁnāsa ǂâibasen tama hâ ǁō ǂgao da ra di. Amase da ge Elob ǀkhaeb ûib diba ra ǃgôaǃgâ. ǂAnsa ūhâ ǀaeǃkhō-aon di huiba da ge ra ôa, hîna ǀaoba sîsenū tamase māsenxase ǃgâise a ǀaeǃkhō da ǁkhāna.

14. Taena da nî dī, î da ǀaeǃkhōs ǂōǂōsiba xu ǂgōsen?

¹⁴ Sada ǂurusiba da ga kōǃgâ o, nē ǁkhāǁkhāǃâs ǃnâ goro ǂgaihe xūna dīs ǃnâ-ū. O î ge ǀnîsi ǃgôas tsî ǀaeǃkhō ǀgauga ǂhâbasa tide. Tsî da ga ǂuru, o da ge ǃgôahe toa da ga o ǃkhaese a ǂgau ǁkhā. ǃKhôahesa xu da ge a ǂgōsen ǁkhā sida omdi tsî sîsenni ǃkhaib tsîna da ga ǃnorasase ga ūhâ o. Tsî daob ǃaroma ra māhe ǂhanub tsîna ǁnâuǀnams ǃnâ-ū.

15. (a) Tae-i ǃaroma i a ǂhâǂhâsa î da hoaǁae ǀaob di karkirosa ūhâ? (Ai-īsiba mû re.) (b) Vidiob ǃnâ go ǁgauhe khami, mati da ǀaoba ūs xa ǂhanu mîǁguiga a dī ǁkhā?

¹⁵ Ûib di ǀkhaeba da ra ǃgôaǃgâ amaga da ge hoada hoaǁae, durable power of attorney (ǀAob karkisa) di hâ karkisa nî  ūhâ. b Nē karkirosa ūhâs ǃnâ-ū da ge sada ǂgaoǀkhade ra xoaǁnâ. ǀAoba ūs tsî ǀnî hâ ǀaeǃkhō ǀgaub dawa ī ga hā o. DPA karkirosa da ūhâ? ǁÎsa du ga xoaǂgā ǂgao tamas ka io ǀasa karkisa gara xoa ǂgao, o ǁnāsa ǃkhaese dī re. Sada ǂgaoǀkhāde da ga xoaǁnâ o, os ge ǁnāsa nî ǃaroma î-i tā gaxuse ū sida ǀaeǃkhōhes ǃaroma. Tsî da ge ǀaeǃkhō-aon tsîna ra hui în tā sōǀôan hîna da ūǃoa ǂgao tama hâna māda. c

16. Tae-e da nî dī ǀaob di karkisa xoaǂgāsa da ga ǀū o?

¹⁶ Nēsi da ga ǂkham tamas ka io kaira xawe da ge hoa da tsūkēǃgâgu tsî ǀaegu tsîn ǃnâ a hōsen ǁkhā. (Aoǁn. 9:11) ǁNā-amaga î ge sida xu gā-aisiba nî ǁgau, DPA karkisa ūhâsa. Karkisa du nî xoaǂgā ǀgauba du ga ǀū, o ǀhaohâb ǃûi-aoga ǂan re îgu hui du. ǁÎgu ge ra dītsâ ǂansa mati-i khoe-e nî xoaǂgāsa xawe gu ǀaeǃkhōs xa hâ mîǁguiga dība du tide. Sadu ge aitsama nî mîǁgui. (Gal. 6:4, 5) ǁÎgu ge ǁhûibasen du go ǀgaugu  ǀkha a hui ǁkhā tsî mati du ǁnāsa a xoaǁnâ ǁkhā ǀgaub tsîna.

17. Mati da a ǁgau ǁkhā khoexaǃnâsiba da ūhâsa ǂurusib dawa i ga hā o?

¹⁷ Sida ǂurusib tsî ǀaeǃkhōs ǃaroma da ra ū sōǀoana, da ge Elobmîsa xu da ge ǁkhāǁkhāsen ǀapemādi ai ra ǃgaoǃgao. (ǃNǃkh. 24:16; 1Tim. 3:9) Mîǁguiga da ga dī tsî naun ǀkha a ǀgoragu. O da ge Filipeǁîn 4:5 ǃnâ hâ ǀapemāsa ra sao ǂgao, mî rasa: “Hoa khoen ǃoagu khoexaǃnâ re.” Khoexaǃnâ tamas ka io da ga ǀnōsa mûǂuiba ūhâ. O da ge ǁnātikōse sada di sorosi ǂurusib xa ǀgui kaise ǂâi tama hâ. Tsî da ge nauna ǁgari tama hâ în sida mûǂuiba ūhâ. Sida ǃgâsana da ge a ǀnam tsî ra ǃgôa, ǁîn ra dī mîǁguigu ga sida diga xu ga ra ǀkharas tsîna.—Rom. 14:10-12.

18. Mati da ûib di ǀkhaeba ǃgôaǃgâsiba a ǁgau ǁkhā?

¹⁸ Ûib ge Jehovaba xu hâ ǀkhaeba. Tsî da ge sida ǃgôaǃgâsiba ǁîba nî ǁgau. Sida ûiba ǁkhauba tsî da ga ǁkhā da a-i hoa-e ǁîba a dība o. (J.ǂHa. 4:11) Xawe da ge nēsi ǀaegu tsî tsūkēǃgâgu tsîna ra hōǃâ. Nēb ge Jehovab ra ǂhâbaba da ûi tama hâ. ǀGūǁaeb ge ǀamosib kōse ûis ǁkhāsiba nî māda tsûb tsî ǁōb ōse hâba. (J.ǂHa. 21:4) Xawe nēsi matikōse i a ǃgâi ûitsama tsî ǀnamxaǃnâ ǁgûb Jehovaba ǃoabasa.