1. ¿Keniuj kiita Jehová tonemilis?

 XIKONNEMILI ke se motasojikniuj mitsontayokolia se dibujo tein uejkaujya kichijchiujkaj sayoj ke semi kipia ipatiuj. Maski miak taman kichiua maj amo moyekitaok, soltikya uan ixkisakya, komo tikonnamakaskia ueliskia mitsonmakaskej tel miak tomin. ¿Melauj ke tikonpatiuitaskia uan tikonyekpiaskia? Jehová no techmakani se taman tein kitelpia ipatiuj: tonemilis. Jehová semi kipatiuita, hasta kitemakak ikonetsin maj toka momikili (Juan 3:16).

2. Kemej kijtoua 2 Corintios 7:1, ¿toni kineki Jehová maj tikchiuakan?

² Jehová ‘kichiua maj tiyoltokan’ (Sal. 36:9). Tatitanil Pablo ika tajtoj nejon keman kijtoj: “Yejua kichiua maj tiyoltokan, maj timoolinikan uan maj tinemikan” (Hech. 17:25, 28). Yejua ika uelis tikijtoskej ke Dios techtayokolijtok tonemilis. Uan kemej techtasojta, techmaka tein moneki para tiyoltoskej (Hech. 14:15-17). Sayoj ke Jehová amo kichiua milagros para maj amo teyi techpano, ta kineki maj timoyekpiakan para amo tikokolispeuaskej uan tiksentokaskej tiktekitiliskej (xikonixtajtolti 2 Corintios 7:1). ¿Keyej moneki timoyekpiaskej para tipaktoskej uan tiyoltoskej, uan keniuj uelis tikchiuaskej?

3. ¿Keyej tiknekij nochipa tipaktoskej?

³ Se taman tein kichiua maj tiknekikan tipaktoskej yejua  porin tiknekij okachi kuali tiktekitiliskej Jehová (Mar. 12:30). Kemej tikmaktilisnekij Dios tonakayo uan tonemilis “kemej se taman tein chipauak uan tein kiyolpaktis”, amo tikchiuaj nion teyi tein tikmatij ke uelis techkokolispeualtis (Rom. 12:1). Sayoj ke, tikmatij ke se tonal ipa tikokolispeuaskej maski timoyekpiaskej. Maski ijkon, nochipa timoyekpiaj porin tiknekij tipaktoskej para maj toTajtsin kiita ke tikpatiuitaj tonemilis tein techmakani.

4. ¿Toni kinekia tekiuaj David?

⁴ Tekiuaj David semi kipatiuitaya inemilis tein Dios kimakaka. Yejua ika kijkuiloj: “¿Teisa tikselis komo nimomikilia, komo nipantemoua itech taltekoch? ¿Uelis talnex mitsueyichiuas? ¿Uelis kijtos ke amo titekaua?” (Sal. 30:9). Xa kijkuiloj nejin tepitsin achto ke momikiliskia. Maski ijkon, kinekia yoltosok nochi tiempo tein ueliskia para kisentokaskia kiueyichiuas Jehová. Tejuan no tiknekij nejon.

5. ¿Toni uelis tikchiuaskej maski tixiuejkejya oso timokokouaj?

⁵ Komo tixiuejkejya oso timokokouaj, xa amo ueliok tikchiuaj miak taman tein achto tikchiuayaj, uan nejon xa kichiua maj amo kuali timomachilikan uan maj timotayokoltikan. Maski ijkon, moneki tiksentokaskej timoyekpiaskej para amo tikokolispeuaskej. ¿Keyej? Porin maski tixiuejkejya oso timokokouaj uelis tikueyichiuaskejok Jehová, ijkon kemej tekiuaj David. ¡Uan semi techyolseuia maj toDios techtasojta uan techpatiuita maski titajtakolejkej! (Mat. 10:29-31). Tein melauj, kinextia ke semi techpatiuita porin motenkaua ke komo timomikiliaj, oksepa kichiuas maj tinemikan (Job 14:14, 15). Uan semi kuali komo tikchiuaj tein techpaleuis maj tipaktokan uan maj tiyoltokan.

6. ¿Toni kichia Jehová keman tikixpejpenaskej tein tikuaskej uan titayiskej uan ox miak?

⁶ Maski Biblia amo ika tajtoua keniuj timopajtiskej nion kijtoua toni moneki tikuaskej, kemaj techiluia tein Jehová kinemilia ika nejin taman. Ompa techyolmajxitia: “Xikixtopeua nochi tein uelis mitsijtakos” (Ecl. 11:10). Biblia kijtoua ke amo moneki titeltakuaskej oso titeltayiskej tein teuintij. Nejin uelis techkokolispeualtis oso hasta ika timomikiliskej (Prov. 23:20). Yejua ika, keman tikixpejpenaskej tein tikuaskej oso titayiskej uan ox miak oso amo, Jehová kineki maj amo timotelpanoltikan (1 Cor. 6:12; 9:25).

7. ¿Keniuj uelis tikchiuaskej tein tayolmajxitia Proverbios 2:11 keman tikixpejpenaskej keniuj timoyekpiaskej?

⁷ Komo tiknekij tikixpejpenaskej teisa tein kinextis ke tiktasojkamatij maj Jehová techmaka tonemilis, moneki kuali tikuiskej totanemilil (Sal. 119:99, 100; xikonixtajtolti Proverbios 2:11). Se taman kemej tikchiuaj yejua keman achto kuali tiknemiliaj toni tikuaskej. Komo tikueliliaj teisa tein tikmatij ke techijtakoua, okachi kuali maj amo tikuakan. No tiknextiaj ke titamattokej keman kuali tikochij, tikchiuaj ejercicio, timochipauaj uan timotachipauiaj kalijtik.

8. ¿Keniuj Biblia kinextia ke Jehová kineki maj timoyekpiakan?

⁸ Jehová kinnauatij israelitas seki taman tein kinpaleuiskia maj amo mokokokan  keman yetoyaj ininkalijtik oso keman tekititoyaj (Éx. 21:28, 29; Deut. 22:8). Komo aksa kimiktiaya okse maski amo kinekia, semi amo kuali tein kipanouaya (Deut. 19:4, 5). Tanauatil no kijtouaya ke monekia kitatsakuiltiskej akin kikokouaya se konetsin akin ayamo yolia, maski amo kinekia kikokos (Éx. 21:22, 23). Biblia kinextia ke Jehová kineki maj semi timoyekpiakan para amo timokokoskej.

9. ¿Toni uelis tikchiuaskej para amo timokokoskej? (No xikonita taixkopimej).

⁹ Tiknextiaj ke tiktasojkamatij maj Dios techmaka tonemilis keman tikchiuaj tein techpaleuis maj amo timokokokan tokalijtik oso kampa titekitij. Xa uelis tiktaliskej teisa tein tenej, pajti uan okseki taman tein tepajuia kampa amo maajsiskej konemej. Uan keman tiktamotaskej nejon, amo tikchiuaskej kemej kinijtakos oksekin. No timoyekpiaj keman tikchiuaj tit, keman tikmolontiaj at uan keman tikuij teposmej de electricidad, uan keman tikuitokej amo ompa titakaujteuaj. Uan komo titayitokej pajti tein uelis kichiuas maj amo tiyekijsatokan,  komo titayikej tein teuintij oso timokochijsolouanij, amo tiknejnemiltiaj totepos. Amo no tikuij teléfono keman titanejnemiltijtokej.

10. ¿Toni uelis tikchiuaskej achto uan keman mochiujtos tein amo tikchiayaj?

¹⁰ Kemansa amo uelis tiktsakuiliskej tein amo kuali, kemej se tetsauit, se ueyi kokolis tein temaua uan keman takuejmolchiuaj. Sayoj ke keman panos nejin, uelis okachi timopaleuiskej uan amo timomikiliskej komo tikintakamatij tekiuanij keman technauatiskej maj timokauakan tokalijtik, maj tikisakan uan okseki taman tein techiluiskej (Rom. 13:1, 5-7). Uelis achto tikchiujtoskej seki taman para timopaleuiskej uan semi kuali komo tikakij tein tekiuanij technauatiaj. Xa uelis techpaleuis komo tikeujtokej at, seki taman tein tikuaskej tein amo niman palani uan tein uelis ika timopajtiskej.

11. ¿Toni moneki tikchiuaskej komo peua se ueyi kokolis tein temaua?

¹¹ ¿Uan komo kampa tinemij peua se ueyi kokolis tein temaua? ¿Toni moneki tikchiuaskej? Moneki tikintakamatiskej tekiuanij keman technauatiskej maj timomapajpakakan, maj amo timosentilikan iniuan oksekin, maj tikuikan cubreboca uan maj timokauakan tokalijtik komo timokokouaj. Komo tikchiuaj nejin, tiknextiaj ke tikpatiuitaj tonemilis tein Jehová techmakani.

12. ¿Keniuj Proverbios 14:15 techpaleuia maj tikmatikan toni tikneltokaskej keman techmatiltiskej ke mochiujtok se ijsiujkayot?

¹² Keman mochiua se ijsiujkayot, xa tikinkakiliaj totasojikniuan, akin tikinixmatij oso itech noticias, seki taman tein amo melauak. Maj amo tikneltokakan nochi tein techiluiaj, ta okachi kuali maj tikakikan tein kitematiltiaj tekiuanij uan tapajtianij, yejuan kimatij tein yekmelauj panotok (xikonixtajtolti Proverbios 14:15). No moneki tikchiuaskej tein technauatiskej tokniuan Oloch Taojtokaltianij uan sucursales keman kiixtaliskej keniuj timonechikoskej uan titanojnotsaskej, porin yejuan nochipa kitemouaj kimatiskej tein yekmelauj panotok keman kiixtaliaj teisa (Heb. 13:17). Keman titatakamatij, timoyekpiaj tejuan uan oksekin uan xa kichiuas maj okachi kuali ininka tajtokan itaixpantijkauan Jehová (1 Ped. 2:12).

13. ¿Keniuj tiknextiaj ke tikpatiuitaj tonemilis keman techiluiaj ke moneki techtaliliskej esti?

¹³ Miakej kimatij ke tiitaixpantijkauan Jehová semi tikpatiuitaj esti. Kemej tiktakamatij tein Jehová technauatia, amo tiknekij maj techtalilikan esti maski moneki ijsiujka techpajtiskej (Hech. 15:28, 29). Sayoj ke, nejin amo kijtosneki ke tiknekij timomikiliskej. ¡Amo tiktemouaj nejon! Ta semi tikpatiuitaj maj Dios techtayokoliani tonemilis. Yejua ika tikintemouaj kuali tapajtianij akin kinekiskej techpajtiskej uan amo kikuiskej esti.

14. ¿Keniuj uelis timoyekpiaskej para amo monekis techpajtiskej de se ueyi kokolis?

¹⁴ Komo timoyekpiaj para amo tikokolispeuaskej ijkon kemej tikitakej itech nejin tamachtilis, xa amo monekis techtekiskej oso techpajtiskej de se ueyi kokolis. Uan komo timoyekpiaj,  okachi niman tipajtiskej komo moneki techtekiskej. Uan no, komo timochikauaj maj tokalijtik uan kampa titekitij amo onka tein ika uelis timokokoskej uan tiktakamatij tein ixyetok keman tiknejnemiltiaj totepos, amo timokokoskej nion monekis maj techtekikan.

15. 1) ¿Keyej moneki nochipa tikuikatinemiskej toDPA uan tikyankuiliskej? (No xikonita taixkopimej). 2) Kemej kinextia video, ¿toni techpaleuis maj kuali tikixpejpenakan kemej mokuis toesyo?

¹⁵ No tiknextiaj ke tikpatiuitaj tonemilis keman tikpexontiaj uan nochipa tikuikatinemij amatsin kampa tikijkuilouaj keniuj tiknekij maj techpajtikan uan maj amo techtalilikan esti. b Nejin amat techpaleuia maj ueli tiktematiltikan ke amo tiknekij esti uan keniuj tiknekij maj techpajtikan. ¿Tikonpia nejin amatsin? Niman xikonijkuilo oso xikonyankuili komo ayamo tikonpia. Komo tikijkuilouaj kemej kuali moajsikamatis keniuj tiknekij maj techpajtikan, amo ompa tikinuejkaujtoskej tapajtianij uan niman uelis techpajtiskej. Nejon no tapaleuis maj amo techtalilikan se pajti tein uelis techijtakos. c

16. ¿Toni uelis tikonchiuas komo amo tikonmati keniuj tikonpexontis moDPA?

 ¹⁶ Tinochin uelis ijsiujka timokokoskej oso tikokolispeuaskej maski titelpochmejok oso ayamo tikpiaj nion se kokolis (Ecl. 9:11). Yejua ika nochipa moneki tikpiaskej toDPA. Sayoj ke, komo amo tikonmati toni tikonijkuilos itech nejon amatsin xikontajtani tayekananij itech monechikol maj mitsonpaleuikan. Sayoj ke yejuan amo mitsoniluiskej toni xikonixpejpena, porin nejon moselti moneki tikonchiuas (Gál. 6:4, 5). Yejuan sayoj mitsonpaleuiskej xikonixmati tapajtilis tein onkak uan xikonijkuilo tein tikonixpejpenas.

17. ¿Keniuj tiknextiaj ke amo tiktemouaj maj mochiua tein tiknekij keman tikijtouaj keniuj timopajtiaj?

¹⁷ Nochipa keman tikixpejpenaj keniuj tiknekij maj techpajtikan, timoixyekanaj ika tein timomachtianij itech Biblia (Hech. 24:16; 1 Tim. 3:9). Yejua ika, keman tikixpejpenaj teisa uan tikiniluiaj oksekin, moneki tikelnamikiskej tein kijtoua Filipenses 4:5: “Maj nochin kimatikan ke namejuan amo nankitemouaj maj nochipa mochiua tein nankinemiliaj”. Tiknextiaj ke amo tiktemouaj maj nochipa mochiua tein tiknekij keman amo sayoj tiktemojtokej tejuan kuali tietoskej uan keman amo tikinchikaujkauiaj oksekin maj no mopajtikan kemej tejuan. Tikintasojtaj uan tikinpoujkaitaj tokniuan maski amo taixpejpenaskej kemej tejuan (Rom. 14:10-12).

18. ¿Keniuj uelis tiknextiskej ke tiktasojkamatij maj Jehová techmakani tonemilis?

¹⁸ Kemej tikitakej, Jehová techmakatok tonemilis. Ueli tiknextiaj ke semi tiktasojkamatiliaj komo timoyekpiaj uan tikmakaj tein okachi kuali (Apoc. 4:11). Maski axkan tinochin tikokolispeuaj uan tikpanouaj ouijkayomej, Jehová amo kinekia maj ijkon tinemikan. Amo uejkaua kichiuas maj kualtsin tinemikan, maj amo titajyouikanok nion maj timomikilikan (Apoc. 21:4). Sayoj ke axkan, maj tikpatiuitakan tonemilis uan maj tiktekitilikan akin kichiua maj tinemikan: toTajtsin Jehová akin techtasojta.