1. ¿Tlen okachi kipatioita Jehová?

 MATIMOKUAYEJYEKOKAN se toyolikni techtliokolia se kali. Maski non kali kipia seki tlamantli tlen amo kuali. Moneki tikilnamiktoskej ijkuak okiko kali patio okitlaxtla ikinon tikpatioitaj uan tikmaluiaj. Jehová noijki otechtliokoli toyolilis uan non sapanoua ipati. Ye sapanoua kipatioita ikinon okitemakak iKone para techmakixtis (Juan 3:16).

2. Ijkon ken kijtoua 2 Corintios 7:1, ¿tlen kineki Jehová matikchiuakan?

² Jehová otechmakak toyolilis (Sal. 36:9). Noijki non okajsikamatki Pablo ikinon okijto: “Porke itech Dios tikateh, timoliniah iwa tiyolitokeh” (Hech. 17:25, 28). Tejuan noijki tikmatokej toTajtsin Dios otechtliokoli toyolilis uan techmaka nochi tlen moneki para matiyoltokan (Hech. 14:15-17). Axkan Jehová amo kichiuas se milagro tlen techpaleuis matiyoltokan, ye kineki matimochijchikauakan timomaluiskej uan iuan matimouikakan (xiktlajtolti 2 Corintios 7:1). ¿Tleka moneki matimomaluikan uan ken uelis tikchiuaskej?

3. ¿Tleka tiknekij timomaluiskej?

³ Tejuan tiknekij okachi tiktekichiuiliskej Jehová ikinon timochijchikauaj timomaluiskej (Mar. 12:30). Tiknekij  timotemakaskej ken se tlamanali yoltok uan chipauak tlen makiyolpakti toTajtsin Dios ikinon amo tikchiuaj seki tlamantli tlen uelis techijtlakos (Rom. 12:1). Maski nochipa timomaluiskej, tikmatokej uelis timokokoskej pero timochijchikauaj ijkon tikchiuaskej porque tiknekij tikititiskej Jehová tikpatioitaj techmaka toyolilis.

4. ¿Tlen okinekiaya kichiuas tekiua David?

⁴ Tekiua David sapanoua okipatioitak toTajtsin Dios okimakak iyolilis. Ikinon ye okijto: “¿Tlen tiktlanis tla niixpoliuis uan nechuikaskej para nechtokaskej? ¿Mitsueyichiuas tlali? ¿Ok uelis nikijtos amo keman techkauas?” (Sal. 30:9). Xamo ijkuak ijkon okijto yiixpoliuiskia, ye ok okinekiaya kiueyichiuas Jehová ikinon omochijchika kimaluis iyolilis. Tejuan noijki tiknekij ijkon tikchiuaskej.

5. ¿Tlen uelis tikchiuaskej maski yitikpiaj miak xiuitl noso timokokouaj?

⁵ Xamo timoyolkokouaj uan timotekipachouaj porque yitikpiaj miak xiuitl noso timokokouaj uan ayakmo ueli tikchiuaj seki tlamantli tlen achto otikchiuayaj. Pero amo matimokuayejyekokan ayakmo moneki timomaluiskej, matikilnamiktokan maski yitikpiaj miak xiuitl noso timokokouaj ok uelis tikueyichiuaskej Jehová ijkon ken okichi David. ¡Sapanoua techyolseuiaj tikmatiskej Jehová techtlasojtla uan techpatioita maski titlajtlakolejkej! (Mat. 10:29-31). Sapanoua techtlasojtla toTajtsin Dios ikinon yokijto tla tiixpoliuij ye techyolitis (Job 14:14, 15). Axkan moneki timomaluiskej para kuali tiyetoskej.

6. Ijkuak titlakuaskej noso ijkuak tikoniskej alcohol, ¿tlen kineki Jehová matikchiuakan?

⁶ Biblia amo kijtoua ken timopajtiskej nion tlen moneki tikkuaskej pero kijtoua ken kita Jehová non tlamantli. Ikinon techiluia amo matikchiuakan seki tlamantli tlen uelis kijtlakos totlalnakayo (Ecl. 11:10). Biblia kijtoua amo matikchiuakan itlaj tlen kichiuas matitlajtlakolchiuakan, ken sapanoua matitlakuakan noso matitlauanakan (Prov. 23:20). Jehová kineki matikmatikan timonauatiskej ijkuak tikpejpenaskej titlakuaskej noso tikoniskej alcohol (1 Cor. 6:12; 9:25).

7. ¿Ken uelis tikchiuaskej ijkon ken kijtoua Proverbios 2:11 ijkuak tikpejpenaj ken timomaluiskej?

⁷ Kuali timokuayejyekouaj tlen tikchiuaskej porque tiknekij tikteititiskej tikpatioitaj toTajtsin Dios otechmakak toyolilis (Sal. 119:99, 100; xiktlajtolti Proverbios 2:11). Ijkuak tikpejpenaskej tlen tikkuaskej moneki kuali tikitaskej tlen techpaleuis. Tla tiknekij itlaj tikkuaskej pero tikmatij techkokoua, okachi kuali amo matikkuakan. Noijki matikilnamiktokan moneki kuali matikochikan, matikchiuakan ejercicio, matimaltikan uan matikchipauakan tokalijtik.

8. ¿Ken kiteititia Biblia Jehová kipatioita matimomaluikan?

⁸ Jehová okinmakak israelitas seki tlanauatilmej para ijkon uelis momaluiskiaj ijkuak okatkaj inkalijtik uan kanin otekipanouayaj (Éx. 21:28, 29; Deut. 22:8). Tla ikaj otemiktiaya maski  amo okinekiaya ijkon kichiuas, satepan otlajyouiaya (Deut. 19:4, 5). Tlanauatil okijtouaya tla akin okikojkouaya se siuatl tlen ayamo onesiaya ikone, omonekiaya kimiktiskej (Éx. 21:22, 23). Tlen kijtoua Biblia kiteititia Jehová kineki nochipa matimomaluikan para amo techpanos tlen amo kuali.

9. ¿Tlen okseki tlamantli uelis tikchiuaskej para timomaluiskej uan amo techpanos tlen amo kuali? (Noijki xikinmita fotos).

⁹ Tla timomaluiaj ijkuak tikatej tokalijtik noso kanin titekipanouaj, tikteititiaj tikpatioitaj toTajtsin Dios otechmakak toyolilis. Tla tikinpiaj tokoneuan, tiktlatiaj seki tlamantli tlen ika titlatekij, pajtli noso okseki tlamantli. Noijki ijkuak ayakmo tikintekitiltiaj tiktlamotlaj kanin moneki para amo kinmijtlakoskej oksekimej. Sapanoua timomaluiaj uan tikinmaluiaj oksekimej ijkuak titlatlatiaj, ijkuak tiktekitiltiaj seki tlamantli tlen kipiaj electricidad uan ijkuak itlaj tikposoniaj. Noijki amo tikuikaj tocarro ijkuak tikonij pajtli tlen kichiua amo kuali matimomachilikan,  ijkuak tikonij alcohol noso ijkuak amo kuali tikochij. Noijki ijkuak tikuikaj tocarro amo san matikitakan toteléfono.

10. ¿Tlen achto uelis tikchiuaskej ijkuak panos itlaj tlen amo kuali?

¹⁰ Ijkuak tlaxixini, ijkuak miakej mokokouaj noso ijkuak sekimej moteuiaj, uelis techpanos itlaj tlen amo kuali. Pero tla tekiuajkej techiluiaj matimokauakan tokalijtik noso tla techiluiaj san niman matikisakan uan tikintlakamatij amo okachi techpanos tlen amo kuali (Rom. 13:1, 5-7). Ijkuak panos seki tlamantli tlen amo kuali uelis tikmatiskej tlen tikchiuaskej tla tikintlakamatij tekiuajkej. Xamo techpaleuis tla tikololouaj tlakuali tlen amo san niman ijtlakaui, atl uan pajtli.

11. ¿Tlen moneki tikchiuaskej tla itech nochi tlaltikpak miakej mokokouaj?

¹¹ Ijkuak itech nochi tlaltikpak miakej mokokouaj, ¿tlen moneki tikchiuaskej? Moneki tikintlakamatiskej tekiuajkej, matimomajtekikan, amo matimotokikan kanin katej miakej, matikmotlalilikan cubrebocas uan matimokauakan tokalijtik. Tla ijkon tikchiuaj, tikteititiskej tikpatioitaj toyolilis.

12. ¿Ken techpaleuia tlen kijtoua Proverbios 14:15 ijkuak panoua tlen amo kuali?

¹² Ijkuak panoua tlen amo kuali, toyolikniuan, akinmej tikinmixmatij, itech noticias noso internet, uelis techiluiskej tlen amo melauak. Amo san niman matikneltokakan tlen techiluiskej, okachi kuali matikinkakilikan tlen techiluiaj tekiuajkej uan tepajtijkej (xiktlajtolti Proverbios 14:15). Noijki moneki tikintlakamatiskej tokniuan tlen pouij itech Cuerpo Gobernante uan tokniuan tlen tlayekanaj Betel ijkuak techiluiskej ken timonechikoskej uan ken titetlapouiskej porque yejuan moyekanaj ika tlen kijtoua Biblia ijkuak itlaj kipejpenaj (Heb. 13:17). Ijkuak tikintlakamatij tokniuan akinmej techyekana, timomaluiaj uan tikinmaluiaj oksekimej, tikueyichiuaj itoka Jehová uan oksekimej amo techteneuaskej (1 Ped. 2:12).

13. ¿Ken tikteititiaj tikpatioitaj toyolilis ijkuak kinekij techtlaliliskej estli?

¹³ Miakej kimatij tiiTlaixpantijkauan Jehová tikpatioitaj estli. Tejuan tiktlakamatij itlanauatil Jehová ikinon amo tikmotlaliliaj estli maski techpanos itlaj tlen amo kuali (Hech. 15:28, 29). Pero non amo kijtosneki tiiTlaixpantijkauan Jehová tiknekij tiixpoliuiskej. Tejuan tiknekij tiyoltoskej porque toTajtsin Dios otechtliokoli toyolilis. Ikinon tikintemouaj tepajtijkej tlen kuali tekipanoua, yejuan kinekij techpajtiskej uan amo techtlaliliaj estli.

14. ¿Ken uelis timomaluiskej tla moneki timopajtiskej?

¹⁴ Ijkuak timochijchikauaj tikchiuaskej tlen yotimomachtijkej xamo amo monekis timopajtitiuij. Pero ¿tla techchiuiliskej se operación? San niman tipajtiskej tla nochipa timomaluiaj. Noijki tla timomaluiaj kanin titekipanouaj, tokalijtik, noijki ijkuak tikuikaj tocarro uan tikchiuaj tlen technauatiaj policías, amitlaj techpanos uan amo monekis matechuikakan hospital.

15. (1) ¿Tleka moneki nochipa matikuikakan amatl kanin tikijtouaj amo tikseliaj estli uan tleka ipati matiktemitikan? (Noijki xikinmita fotos). (2) Ijkon ken mota itech video, ¿tlen uelis timomachtiskej para okachi kuali tikpejpenaskej uan amo matechtlalilikan estli?

 ¹⁵ Noijki tikteititiaj tikpatioitaj toyolilis tla tiktemitiaj uan nochipa touan tikuikaj amatl kanin tikijtouaj amo tikseliskej estli. b Non amatl kijtoua otikpejpenki amo matechtlalilikan estli uan tlen pajtli tiknekij matechtlalilikan. ¿Yotiktemitijkej non amatl? Tla ayamo ijkon tikchiuaj, amo matiuejkauakan para tiktemitiskej. Tla tiktemitiaj amatl uan tikijkuilouaj tlen otikpejpenkej, tepajtijkej san niman kimatiskej ken techpajtiskej. Noijki amo techtlaliliskej pajtli tlen techijtlakos. c

16. ¿Tlen uelis tikchiuaskej tla amo tikmatij ken tiktemitiskej amatl kanin tikijtouaj amo tikseliskej estli?

¹⁶ Tinochtin uelis techpanos itlaj tlen amo kuali noso timokokoskej, maski titelpochmej uan kuali timomachiliaj (Ecl. 9:11). Ikinon moneki nochipa  matikpiakan amatl kanin tikijtouaj ken techpajtiskej uan amo tikseliaj estli. Pero, ¿tla amo tikmatij ken tiktemitiskej non amatl? Matikinmiluikan tlayekankej, yejuan okachi kimatij ken kitemitiskej non amatl uan uelis techpaleuiskej. Matikilnamiktokan amo techiluiskej tlen tikpejpenaskej tejuan moneki tikpejpenaskej tlen tikchiuaskej (Gál. 6:4, 5). Yejuan techpaleuiskej matikajsikamatikan ken uelis timopajtiskej uan matikijkuilokan itech amatl.

17. ¿Ken tikteititiaj tikinmajsikamatij tokniuan ijkuak timotlapouiaj ken timopajtiskej?

¹⁷ Tlen kijtoua Biblia techpaleuia matikpejpenakan ken uelis timopajtiskej (Hech. 24:16; 1 Tim. 3:9). Ijkuak tikpejpenaskej uan timotlapouiskej inmiuan tokniuan tlen otikpejpenkej, moneki tikilnamiktoskej Filipenses 4:5 kijtoua: “Nochteh manomechixmatikah non teajsikamatkeh”. Tla tiknekij ijkon tikchiuaskej, amo nochipa san tikitaskej ken timopajtiskej nion tikinmiluiskej oksekimej mamokuayejyekokan ijkon ken tejuan. Tikintlasojtlaj tokniuan maski amo kichiuaj ijkon ken tejuan (Rom. 14:10-12).

18. ¿Ken uelis tiktlasojkamatiliskej Jehová otechmakak toyolilis?

¹⁸ Yotikitakej Jehová otechmakak toyolilis, sapanoua tiktlasojkamatiliaj uan ijkon tikteititiaj ijkuak timomaluiaj porque tiknekij okachi kuali tiktekichiuiliskej (Apoc. 4:11). Axkan tinochtin timokokouaj uan tikitaj panotok okseki tlamantli tlen amo kuali pero Jehová amo okinekiaya ijkon matechpano. Ikinon ayakmo poliui miak uan ye kichiuas ayakmo matitlajyouikan nion matiixpoliuikan (Apoc. 21:4). Matikpatioitakan toyolilis uan matiktekichiuilikan Jehová porque ye sapanoua techtlasojtla.