1. Omwenyo ngoka twa pewa kuJehova ogu na ongushu yi thike peni?

 NATU tye andola kuume koye okwe ku pe ethano lya kulupa noonkondo lya thanekwa noonyala, li na ongushu kaayi shi okuyelekwa nasha. Ethano ndyoka olya shunduka poombinga dhimwe, oli na oontongo nomisa. Nonando itali monika nawa, olya kotha iimaliwa oodola omamiliyona gontumba. Osha yela kutya oto ke li pandula noto li kwata nawa. Sha faathana, Jehova okwe tu pa omagano ge na ondilo, ano omagano gomwenyo. Nokuli Jehova oha ulike kutya okwa lenga noonkondo oomwenyo dhetu sho a gandja Omwana e li ekuliloyambo omolwoondjo dhetu. — Joh. 3:16.

2. Ngaashi sha ulikwa mAakorinto aatiyali 7:1, Jehova okwa tegelela tu ninge shike?

² Jehova oye Oluthithiya lwomwenyo. (Eps. 36:9) Omuyapostoli Paulus naye okwa li a itaala oshinima shoka nokwa ti: “Muye tse otu na omwenyo, tatu inyenge notu li po.” (Iil. 17:25, 28) Onkee ano, osha eleka okupopya kutya omwenyo omagano ga za kuKalunga. Ohe tu pe pahole iinima mbyoka twa pumbwa, opo tu kale nomwenyo. (Iil. 14:15-17) Ihe Jehova ihe tu kaleke nomwenyo pashikumithalonga. Pehala lyaashono, okwa tegelela tu ninge ngaashi tatu vulu, tu kale tu na uukolele palutu notu tsikile oku mu longela. (Lesha 2 Aakorinto 7:1.) Omolwashike tu na okuninga ngaashi tatu vulu tu kale tu na uukolele notu na omwenyo?

3. Etompelo limwe lini tu na lyokukambadhala okukala tu na uukolele?

³ Etompelo limwe kutya omolwashike tu na okukambadhala tu kale tu na uukolele, olyo kutya otatu vulu okulongela Jehova ngaashi tatu vulu. (Mark. 12:30) Otwa hala tu igandje ‘tse yene kuKalunga eyambo li na omwenyo, tu kale twe mu iyapulila notu kale twe mu opalela.’ Onkee ohatu yanda okuninga  iinima mbyoka tu shi kutya otayi yono po uukolele wetu. (Rom. 12:1) Odhoshili kutya, nonando otu ninge ngaashi tatu vulu, itatu vulu okutya katu na esiku tu ehame. Ihe ohatu ningi ngaashi tatu vulu tu kale tu na uukolele, molwaashoka otwa hala okuulukila Tate gwetu gwomegulu kutya otwe mu pandula sho e tu pa omagano gomwenyo.

4. Omukwaniilwa David okwa a li hala okuninga shike?

⁴ Omukwaniilwa David okwa li a yelitha kutya omolwashike a li a lenga omagano gomwenyo ngoka a pewa kuKalunga, sho a nyola a ti: “Eso lyandje otali ku likolitha shike? Okuya kwandje mombila otaku ku pe ontanitho? Aasi otaa vulu tuu oku ku simaneka? Otaa vulu tuu okuhokolola uudhiginini woye?” (Eps. 30:9) David oohapu ndhoka otashi vulika e dhi nyola sho e li pokusa. Ihe okwa li a tokola toko okukala nomwenyo nokukala e na uukolele ngaashi tashi vulika, opo a vule okutsikila okulongela Jehova. Osha yela kutya atuheni osho twa hala okuninga ngaaka.

5. Kutya nduno otwa kulupa nenge otatu ehama, oshike tatu vulu okuninga?

⁵ Uuwehame nuukulupe otashi vulika wu tu imbe okuninga iinima mbyoka twa li hatu ningi nale. Onkee ohashi vulika tu kale twa lulilwa notwa yemata. Ihe inatu etha po nando okukambadhala ngaashi tatu vulu, tu sile oshimpwiyu uukolele wetu. Omolwashike mbela? Omolwaashoka kutya nduno otwa kulupa nenge otatu ehama, otatu vulu natango okutanga Jehova, ngaashi omukwaniilwa David a li a ningi. Itashi tu hekeleke tuu okutseya kutya otu na ongushu momeho gaKalunga, nonando otwa kulupa nenge otatu ehama! (Mat. 10:29-31) Nokuli nonando otu se, ote ke tu yumudha. (Job 14:14, 15) Onkee manga tu na omwenyo, otwa hala okuninga ngaashi tatu vulu tu gamene uukolele wetu noomwenyo dhetu.

6. Jehova okwa tegelela tu ninge shike, uuna tashi ya pokulya nokunwa?

⁶ Nonando Ombiimbeli kayi shi embo li na ko nasha nuukolele, nenge li na ko nasha naashoka tu na okulya, otayi tu lombwele nkene Jehova a tala ko iinima mbyoka. Pashiholelwa, Jehova ote tu ladhipike tu ‘kaleke kokule’ iinima mbyoka tayi vulu oku tu etela oshiponga. (Omuuv. 11:10) Uufukedhi nuunkolwe oyi indikwa kOmbiimbeli, oshoka otayi vulu okuyona po uukolele wetu nenge nokuli yi tu dhipage. (Omayel. 23:20) Jehova okwa tegelela tu kale tu na eipangelo, uuna tashi ya pokutokola kutya otu na okulya nokunwa shi thike peni. — 1 Kor. 6:12; 9:25.

7. Omayele ngoka taga adhika mOmayeletumbulo 2:11 ohage tu kwathele ngiini tu ninge omatokolo omawanawa kombinga yuukolele wetu?

⁷ Otatu vulu okuninga omatokolo ngoka taga ulike kutya otwa pandula lela omagano gomwenyo ngoka Kalunga e tu pa, mokulongitha oondunge dhetu dhokuyoolola. (Eps. 119:99, 100; lesha Omayeletumbulo 2:11.) Pashiholelwa, ohatu ningi omatokolo gopandunge ge na ko nasha naashoka hatu li. Ngele otu hole iikulya yontumba, ihe otu shi kutya ohayi tu ehama, otatu ka yanda oku yi lya. Oshi li wo pandunge ngele otwa kala hatu kotha sha gwana, hatu ningi omadhewo pandjigilile nokukaleka omalutu nomagumbo getu ga yela.

8. Ombiimbeli otayi tu longo shike kombinga yankene egameno lyetu lya simana kuJehova?

⁸ Jehova okwa pele Aaisraeli oompango dhi na ko nasha nankene taya vulu okwiigamena kiiponga ya kwata miiti, uuna ye li momagumbo nenge taya longo. (Eks. 21:28, 29; Deut. 22:8) Ngele omuntu okwa dhipaga  mukwawo kaashi shi oshiningilawina, okwa li e na okukatukilwa oonkatu dha kwata miiti. (Deut. 19:4, 5) Oompango ndhoka odha li dha kwatela mo nokuli naantu mboka ya ehameka kaashi shi owina okanona hoka inaaka valwa natango ya geelwe. (Eks. 21:22, 23) Omanyolo otage shi popi sha yela kutya Jehova okwa hala tu ninge ngaashi tatu vulu tu yande iiponga.

9. Oshike tatu vulu okuninga tu yande iiponga? (Tala wo omathano.)

⁹ Ohatu ulike kutya otwa pandula Kalunga sho e tu pa omagano gomwenyo mokuninga ngaashi tatu vulu, tu kale megameno megumbo nokiilonga. Pashiholelwa, uuna twa hala okweekelahi iinima mbyoka ya honga nenge yi na omayego, iikwauzigo nenge omiti, natu shi ninge momukalo moka itaayi vulu okweetela yalwe oshiponga. Ohatu shilipaleke wo kutya iinima mbyoka itayi vulu okumonika kaanona. Otu na okukala twa kotoka uuna tatu tema omulilo, tatu fulukitha omeya, nenge tatu longitha iilongitho mbyoka ya nika oshiponga. Inatu za po puyo uuna tatu yi longitha. Inatu hinga twa nwa omiti ndhoka tadhi shi ningitha oshidhigu kutse okuhinga. Inatu hinga wo twa  kolwa, twa vulwa, tatu popi mongodhi yi li peke nenge tatu tumu omatumwalaka.

10. Oshike tatu vulu okuninga manga inaatu adhika koshiponga shontumba nosho wo uuna tu li musho?

¹⁰ Omathimbo gamwe, ihatu vulu okukeelela oonkalo dha nika oshiponga dhi holoke. Shoka osho hashi kala ngaaka unene tuu ngele tashi ya piiponga yopaunshitwe, omikithi dhekomba nosho wo iikolokosha. Ihe uuna iinima mbyoka ya holoka, otatu vulu okukambadhala tu ikaleke twa gamenwa ngaashi tashi vulika, notatu ka hupa muyo, uuna tatu vulika komalombwelo gokuza mo moshitopolwa shetu, nenge komalombwelo galwe ngoka tatu pewa kaakwanepangelo. (Rom. 13:1, 5-7) Iiponga yimwe ohayi vulu okwiilongekidhilwa, onkee otu na okukala hatu pulakene komalombwelo ngoka haga zi kaakwanepangelo taye tu kwathele tu kale twa ilongekidha, uuna ya holoka. Pashiholelwa, oshi li nawa tu shilipaleke kutya otu na omeya niikulya mbyoka ihaayi olo nosho wo iikwamiti yekwatho lyotango.

11. Uuna omukithi gwomukwawu tagu taandele moshitopolwa moka tu li, otu na okukala tu na ehalo lyokuninga shike?

¹¹ Oshike tu na okuninga ngele moshitopolwa moka tu li omu na omukithi gwontumba gwomukwawu tagu taandele? Otu na okuvulika komalombwelo ngoka tatu pewa kepangelo, ngaashi okwiiyoga kiikaha, okukaleka po oshinano pokati ketu nayalwe, okuzala okamaska nosho wo okwiikalekelwa. Ngele otwa kala hatu shi ningi, otatu ulike kutya otwa pandula lelalela omagano gomwenyo ngoka twa pewa kuKalunga.

12. Ekotampango ndyoka li li mOmayeletumbulo 14:15 ohali tu kwathele ngiini tu tokole kutya uuyelele wuni tu na okupulakena kuwo, uuna pwa holoka oshiponga?

¹² Pethimbo lyoshiponga, omathimbo gamwe ohatu uvu iinima kaayi shi yoshili kookuume, kaashiinda nomoonkundana. Pehala lyokwiitaala “shaa ohapu,” otu na okupulakena kuuyelele mboka wu li mondjila tawu zi kaakwanepangelo nokoondohotola. (Lesha Omayeletumbulo 14:15.) Olutuwiliki niitayimbelewa ohayi ningi ngaashi tayi vulu, yi mone uuyelele mboka wu li mondjila, manga inaayi gandja omalombwelo komagongalo ge na ko nasha nokugongala nosho wo niilonga yokuuvitha. (Heb. 13:17) Ngele otwa landula omalombwelo ngoka tatu pewa, nena ohatu igamene tse yene nosho wo yalwe koshiponga. Shika ohashi vulika wo shi ningithe yalwe ya popile muuwanawa Oonzapo dhaJehova. — 1 Pet. 2:12.

13. Ohatu ulike ngiini kutya otwa lenga omagano gomwenyo ngoka twa pewa kuKalunga, uuna tatu vulika kompango yaJehova yi na ko nasha nombinzi?

¹³ Aantu oyendji oye shi kutya Oonzapo dhaJehova odhi itaala kutya ombinzi ondjapuki. Ohatu vulika kelombwelo lyaJehova li na ko nasha nombinzi mokutinda okutulwa ombinzi, nokuli nonando otwa pumbwa epango lyopaunamiti lya endelela. (Iil. 15:28, 29) Ihe shoka inashi hala okutya otwa hala okusa. Pehala lyaashoka, otwa lenga omagano gomwenyo ngoka twa pewa kuKalunga. Ohatu kongo epango lyopaunamiti koondohotola ndhoka dhi na ehalo lyokugandja epango lya dhenga mbanda, itaadhi tu tula ombinzi.

14. Oshike tatu vulu okuninga, opo tu kale inaatu pumbwa etando lyomeendelelo?

¹⁴ Ngele otwa kala tu na ko nasha nuukolele wetu, mokuninga iinima mbyoka ya kundathanwa moshitopolwa shika, otashi vulika tu ka kale inaatu pumbwa etando lyomeendelelo nenge epango lyopaunamiti lya kwata miiti. Ngele otu na uukolele, otatu ka aluka mbala, uuna twa tandwa. Otashi vulika wo tu  kale inaatu pumbwa etando lyomeendelelo, mokukaleka omagumbo getu nomahala giilonga ga gamenwa, nokukala hatu vulika thiluthilu koompango dhomoondjila.

15. (a) Omolwashike sha simana okukaleka okakalata ketu kokwaatulwa ombinzi ke li pethimbo? (Tala wo ethano.) (b) Ngaashi sha ulikwa mokavidio, ongiini tatu vulu okuninga omatokolo omawanawa ge na ko nasha nepango ndyoka itaali longitha ombinzi?

¹⁵ Molwaashoka otwa lenga omagano gomwenyo, ohatu udhitha okakalata ketu kokwaatulwa ombinzi nokweenda nako ethimbo alihe. b Mondokumende ndjika ohatu ulike shoka inaatu hala shi ningwe shi na ko nasha nokwaatulwa ombinzi nosho wo omapango gamwe. Mbela okakalata koye kokwaatulwa ombinzi oke li ngaa pethimbo? Ngele hasho, udhitha ngashingeyi kamwe nenge wu nyolulule kamwe to tula mo uuyelele wu li pethimbo. Osha yela kutya okunyola shoka twa hala tu ningilwe, otashi ke tu kwathela tu mone epango mbala pehala lyoku ka mana po ethimbo tatu kundathana noondohotola epango ndyoka twa hala. Otatu ka kwathela wo oondohotola naapangi ye tu pe epango ndyoka twa hala notu yande okupewa epango ndyoka inaatu hala. c

16. Oshike tatu vulu okuninga ngele katu shi nawa nkene tu na okuudhitha okakalata kokwaatulwa ombinzi?

 ¹⁶ Kutya nduno tse aagundjuka nenge otu na uukolele, atuhe otatu vulu okumona oshiponga nenge tu ehame. (Omuuv. 9:11) Onkee oshi li pandunge tu udhithe okakalata ketu kokwaatulwa ombinzi. Ngele ku shi nawa nkene haka udhithwa, pula aakuluntugongalo yomegongalo lyeni ye ku kwathele. Ohaya kambadhala okukala ye shi kutya okakalata hoka ohaka udhithwa ngiini, ihe itaye ke ku ningila etokolo lyopaunamiti. Shoka oshinakugwanithwa shoye. (Gal. 6:4, 5) Nonando ongawo, otaya vulu oku ku kwathela wu uve ko omahogololo ngoka to ningi notaye ke ku kwathela sho to ka udhitha.

17. Ongiini tatu vulu okuulika kutya otu na ondjele, uuna tashi ya piinima yi na ko nasha nuukolele?

¹⁷ Omatokolo ogendji ngoka hatu ningi ge na ko nasha nuukolele wetu nosho wo nepango lyopaunamiti, ohatu ga ningi ga ikolelela kwaashoka twa ilonga mOmbiimbeli. (Iil. 24:16; 1 Tim. 3:9) Uuna tatu ningi omatokolo notatu ga kundathana nayalwe, otu na okudhimbulukwa ekotampango ndyoka tali adhika mAafilippi 4:5 tali ti: “Kaleni mu na olukeno [ondjele] naantu ayehe.” Uuna tu na ondjele, itatu ka kala tatu ipula unene nuukolele wetu nenge tu thiminikile yalwe omataloko getu. Otu hole aamwatate naamwameme notwe ya simaneka, nokuli nonando omatokolo ngoka haya ningi inaga faathana nogetu. — Rom. 14:10-12.

18. Ongiini tatu vulu okuulika olupandu lwetu omolwomagano gomwenyo ngoka twa pewa kuJehova?

¹⁸ Ohatu ulike olupandu lwetu kuJehova, ngoka e li Oluthithiya lwomwenyo, mokugamena oomwenyo dhetu nomoku mu longela ngaashi tatu vulu. (Eh. 4:11) Ngashingeyi otu na okukondja nomikithi nonomaudhigu. Ihe Omushiti gwetu ine tu shita nelalakano ndyoka. Masiku ote ke tu pa omwenyo gwaaluhe noitatu ka ehama we nokusa. (Eh. 21:4) Manga twa tegelela ethimbo ndyoka li thike, itashi nyanyudha tuu okukala nomwenyo nokulongela Tate yetu gwomegulu omunahole, Jehova!