1. Kuqakatheke kangangani ukuphila kwethu kuJehova?

 CABANGA ngesithombe umnganakho akunikele sona kodwana esiligugu khulu. Imibalaso ayisabonakali kuhle, sinamakole begodu sibharasile. Nanyana kunjalo, isithombesi sibiza imali enengi khulu. Akunakuzaza bona uzokutjengisa ukuthi uyasithokoza isithombesi ngokuthi usivikele. Ngendlela efanako, uJehova usinikele isipho esiqakatheke khulu, ukuphila. Eqinisweni, uJehova utjengisa ukuthi ukuphila kwethu kuqakatheke kangangani ngokuthi anikele ngeNdodanakhe bona ibe sihlengo sethu.—Jwa. 3:16.

2. Njengombana kuvezwe kweyesi-2 kwebeKorinte 7:1, khuyini uJehova ayilindele kithi?

² UJehova Mthombo wokuphila. (Rhu. 36:9) Umpostoli uPowula walivuma iqinisweli lokha nakathi: “Ngaye siyaphila, siyasikinyeka begodu sikhona.” (IzE. 17:25, 28) Yeke singatjho bona ukuphila kwethu kusisipho esivela kuZimu. Ngethando usinikela esikutlhogako bona siragele phambili siphila. (IzE. 14:15-17) Kodwana uJehova akakuvikeli ukuphila kwethu ngokusimangaliso. Nanyana kunjalo, ufuna senze koke esingakghona ukukwenza bona sihlale siphile kuhle begodu simlotjha. (Funda yesi-2 kwebeKorinte 7:1.) Kubayini kufuze sivikele ukuphila kwethu begodu singakwenza njani lokho?

3. Kubayini kufuze senze koke esingakwenza bona sitlhogomele ipilwethu?

³ Okhunye okwenza sitlhogomele ipilwethu kukuthi sifuna ukulotjha uJehova ngamandlethu woke. (Mar. 12:30) Sifisa  ‘ukunikela imizimbethu bona ibe mhlatjelo ophilako, ocwengileko nowamukelekako kuZimu,’ yeke sibalekela ukwenza izinto esaziko bona zingasigulisa. (Rom. 12:1) Kuliqiniso ukuthi nanyana singenzani, lokho akuqinisekisi ukuthi ngekhe sigule. Kodwana senza koke esingakghona ukukwenza ukutjengisa uBabethu wezulwini ukuthi siyasithokoza isipho asiphe sona sokuphila.

4. Khuyini iKosi uDavida ebeyifuna ukuyenza?

⁴ IKosi uDavida yahlathulula ukuthi kubayini beyithokoza isipho sokuphila esivela kuZimu nayithi: “Ngiyiphi inzuzo ekhona ekufeni kwami, nangehlela emgodini kghani ithuli lizokudumisa na? Lizokukhuluma ngokuthembeka kwakho na?” (Rhu. 30:9) Kungenzeka uDavida watlola amezwi la nasele azokuhlongakala. Kodwana bekazimisele bona ahlale aphile kuhle ukuze akghone ukulotjha uJehova. Akunakuzaza ukuthi soke sizimisele ukwenza okufanako.

5. Ngitjho nanyana sigula namkha siluphele, khuyini esingayenza?

⁵ Ukugula nokuluphala kungasikhandela ukwenza izinto ezinengi ebesikghona ukuzenza ngaphambilini. Ngebanga lalokho singazizwa sigandelelekile begodu sidanile. Kodwana kufuze siragele phambili senze koke esingakghona ukukwenza bona sizitlhogomele. Kubayini? Ngombana nanyana singaluphala besigule, singakghona ukuragela phambili sidumisa uJehova njengombana kwenza iKosi uDavida. Kusiduduza khulu ukwazi ukuthi siligugu kuJehova nanyana sigula namkha siluphala! (Mat. 10:29-31) Ngitjho nanyana singahlongakala, uzokululukela ukusivusa. (Job. 14:14, 15) Njengombana sisaphila sifuna ukwenza koke esingakghona ukukwenza ukuvikela ipilwethu.

6. Khuyini uJehova ayilindele kithi nasizakuqunta ukuthi sizokudla besisele kangangani?

⁶ Ngitjho nanyana iBhayibheli lingasiyincwadi esitjela ukuthi kufuze siyitlhogomele njani ipilwethu namkha sidleni, liveza umbono kaJehova endabeni le. Ngokwesibonelo, usikhuthaza bona ‘sivimbele izinto ezilimazako’ ezingonakalisa imizimbethu. (UMtj. 11:10) IBhayibheli liyakulahla ukudla khulu namkha ukusela khulu utjwala ngombana izintwezi zingalimaza ipilwethu bezisibulale. (IzA. 23:20) UJehova ulindele bona sizibambe lokha nasiqunta bona sizokudla kangangani nokuthi sizokusela kangangani.—1 Kor. 6:12; 9:25.

7. Iseluleko esikuzAga 2:11, sisisiza njani ukuthi senze iinqunto ezihle malungana nepilwethu?

⁷ Singenza iinqunto ezitjengisa bona siyasithokoza isipho sakaZimu sokuphila asinikele sona ngokusebenzisa ikghono lethu lokucabanga. (Rhu. 119:99, 100; funda izAga 2:11.) Ngokwesibonelo, sikukhetha kuhle lokho esikudlako. Nangabe sinokudla esikuthandako kodwana kuyasigulisa, senza isiqinisekiso bona asikuthinti. Sitjengisa nokuhlakanipha lokha nasilala ngokwaneleko, sibandule imizimbethu, sikwenze umukghwa ukuhlala sihlwengekile besihlwengise nemizethu.

8. IBhayibheli likuveza njani ukuthi ukuphepha kuqakatheke kangangani kuJehova?

⁸ UmThetho uJehova awunikela ama-Israyeli uhlanganisa iinqophiso ebezizobasiza babalekele iingozi emakhaya nemsebenzini. (Eks. 21:28, 29; Dut. 22:8) Nange umuntu abulala omunye angakahlosi bekuba neemphumela ebuhlungu. (Dut. 19:4, 5) UmThetho lo bewuhlanganisa nokuthi lokha umuntu  nakabulele umntwana ongakabelethwa angakahlosi, kufuze ajeziswe. (Eks. 21:22, 23) ImiTlolo iveza kuhle ukuthi uJehova ufuna siphaphamele zokuphepha.

9. Yini esingayenza bona sibalekele iingozi? (Qala neenthombe.)

⁹ Sitjengisa ukuthi siyasithokoza isipho sokuphila uZimu asiphe sona ngokulandela iinqophiso zokuphepha ekhaya nemsebenzini. Ngokwesibonelo, sibeka kude izinto ezibukhali, amakhemikhali anobungozi namkha iinhlahla ukwenzela bona zingalimazi abanye, siyaqinisekisa nokuthi abantwana abakghoni ukufikelela izinto ezinjengalezo. Sitjhejisisa khulu lokha nasisebenzisa umlilo, amanzi atjhisako nezinto ezisebenza ngegezi begodu asisuki hlanu kwazo nasizisebenzisako. Asitjhayeli nange sisele iinhlahla ezilalisako, utjwala namkha sidinwe khulu begodu asibambi ufunjathwakwethu ngesandla lokha nasitjhayelako.

10. Khuyini esingayenza ngaphambi nangesikhathi sehlekelele?

¹⁰ Ngezinye iinkhathi, asikghoni ukubalekela ubujamo obungafaka ukuphila kwethu  engozini. Lokho kuliqiniso naziza eenhlekeleleni zemvelo, isindabelaphi nemiguruguru. Lokha nakwenzeka izintwezi singalinga ukuhlala siphephile ngendlela esingakghona ngayo begodu sisinde engozini ngokuthi silalele iinqophiso zokuthi sikhambe endaweni leyo nezinye iinqophiso ezivela kurhulumende. (Rom. 13:1, 5-7) Obunye ubujamo oburhabako singakghona ukubulungiselela, kufuze silandele iinqophiso ezivela kurhulumende ezizosisiza sihlale silungele ihlekelele. Ngokwesibonelo kungaba lisizo khulu ukuthi siqiniseke bona sinamanzi, ukudla okungonakaliko nesikhwama sesizo lokuthoma.

11. Lokha nasiqalene nokugula okuthelelanako, khuyini ekufuze sizimisele ukuyenza?

¹¹ Khuyini ekufuze sikwenze nakunokugula okuthelelanako endaweni esihlala kiyo? Kufuze silandele iinqophiso zakarhulumende, njengokuthi sihlambe izandla zethu, sihlale maqalanga simbathe isifonyo besingazihlanganisi nabantu. Nasenza njalo sisuke sitjengisa ukuthi siyasithokoza isipho sokuphila uJehova asiphe sona.

12. Ikambisolawulo efumaneka kuzAga 14:15, isisiza njani sikghone ukuqunta ukuthi ngimiphi imininingwana ekufuze siyilalele lokha nakunehlekelele?

¹² Ngesikhathi sobujamo oburhabako, ngezinye iinkhathi singezwa izinto ezingasiliqiniso ebanganini, kibomakhelwana namkha kwezokuthintana. Kunokuthi sikholwe “woke amezwi” esiwezwako, senza kuhle ngokulalela imininingwana enembileko esiyifumana kurhulumende namkha kibodorhodere. (Funda izAga 14:15.) IsiHlopha esiBusako nama-ofisi wegatja enza umzamo wokufumana ilwazi elinembileko ngaphambi kokunikela isinqophiso malungana nemihlangano yebandla nomsebenzi wokutjhumayela. (Heb. 13:17) Ngokuthi sibambisane sizivikela thina nabanye. Singathuthukisa nendlela ehle ibandla elaziwa ngayo emphakathini.—1 Pit. 2:12.

13. Sitjengisa njani ukuthi siyasithokoza isipho sokuphila uZimu asiphe sona naziza endabeni yokufakelwa iingazi?

¹³ Abantu abanengi bayazi ukuthi aboFakazi bakaJehova bakholelwa ukuthi iingazi zicwengile. Silalela umthetho kaJehova malungana neengazi ngokuthi singavumi ukuzifaka, ngitjho nanyana kunobujamo oburhabako bezepilo. (IzE. 15:28, 29) Nanyana kunjalo, lokho akutjho ukuthi sifuna ukufa. Ngokuhlukileko, siyasithabela isipho esivela kuZimu sokuphila. Sifuna isizo lokulatjhwa kibodorhodere abazimisele ukusilapha ngaphandle kokusebenzisa iingazi.

14. Singawaphungula njani amathuba wokuthi sitlhoge ukuhlinzwa?

¹⁴ Nange sitlhogomela ipilwethu ngokulandela izinto esicoce ngazo esihlokwenesi mhlamunye ngekhe kutlhogeke bona siyokuhlinzwa namkha silatjhwe ngenye indlela engeneleleko. Nasitlhogomela ipilwethu, sizokghona ukuthi siphole msinyana lokha nakutlhogeka bona sihlinzwe. Singaphungula amathuba wokuhlinzwa lokha nasisusa izinto ezingaba yingozi ekhaya nemsebenzini nangokulalela imithetho yendlela.

15. (a) Kubayini kuqakathekile ukuphatha ikarada leengazi elinemininingwana esebenzako? (Qala nesithombe.) (b) Njengombana kutjengiswe evidiyweni, singazenza njani iinqunto malungana nokulatjhwa kusetjenziswa iingazi?

¹⁵ Ngebanga lokuthi siyasithabela isipho sokuphila, sizalisa ikarada leengazi (advance health-care directive) begodu sihlala siliphethe ngaso soke isikhathi. b Ngekaradeli,  sisuke sitjengisa indlela esifuna ukulatjhwa ngayo malungana neengazi namkha okhunye ukulatjhwa. Kghani imininingwana esekaradeni lakho leengazi isasebenza? Nange kufuze ulizalise, ungariyadi. Ukuveza kuhle indlela esifuna ukulatjhwa ngayo kuzosisiza silatjhwe msinyana ngebanga lokuthi ngeze simorose isikhathi sikhuluma nabodorhodere ngokuthi kufuze silatjhwe njani. Lokho kuzokusiza nabantu bezokwelapha bona benze isiqinisekiso sokuthi asifumani ukulatjhwa namkha iinhlahla ezingaba yingozi kithi. c

16. Khuyini esingayenza nasingaqiniseki ngendlela ekufuze sizalise ngayo ikarada leengazi?

¹⁶ Akunandaba ukuthi sibancani kangangani namkha ubujamo bepilwethu buhle kangangani, soke singavelelwa yingozi namkha sigule. (UMtj. 9:11) Yeke, kukuhlakanipha ukuzalisa ikarada leengazi. Nange ungaqiniseki ukuthi ulizalisa njani ikaradeli, ungabawa abadala bebandleni lakho bakusize. Balinga ukuzijayelanisa nendlela ikaradeli elizaliswa ngayo kodwana angekhe bakuthathele isiqunto sokuthi ulatjhwe njani. Loyo mthwalwakho. (Gal. 6:4, 5) Nanyana kunjalo, bangakusiza uzwisise iindlela ongakhetha  kizo, bakusize nokuthi utlole phasi iimfiso zakho.

17. Singatjengisa njani ukuthi siyazwisisa naziza eendabeni zepilo?

¹⁷ Iinqunto ezinengi esizenzako malungana nepilwethu nendlela esifuna ukulatjhwa ngayo, kusekelwe eBhayibhelini. (IzE. 24:16; 1 Thim. 3:9) Lokha nasenza iinqunto besikhulume ngazo nabanye, senza kuhle ngokusebenzisa ikambisolawulo ekwebeFilipi 4:5: “Ukubonelela kwenu akwaziwe ngibo boke abantu.” Nasibabantu abazwisisako, angeze sitshwenyeke khulu ngobujamo bepilwethu begodu ngekhe sikatelele abanye bona babe nombono ofana newethu. Siyabathanda abafowethu nabodadwethu, nanyana benza iinqunto ezingafani nezethu.—Rom. 14:10-12.

18. Singatjengisa njani ukuthi siyasithokoza isipho sakaJehova sokuphila?

¹⁸ Sitjengisa ukuthi siyamthokoza uJehova uMthombo wokuphila, ngokutlhogomela ukuphila kwethu nangokuthi simnikele koke okusemandlenethu. (IsAm. 4:11) Okwanje, kufuze siqalane nokugula neenhlekelele. Kodwana le akusiyindlela uMdalethu ebekafuna siphile ngayo. Kungasikade uzosinikela ukuphila okungapheliko okunganabuhlungu nokufa. (IsAm. 21:4) Okwanje, sithabela ukuphila nokulotjha uBabethu wezulwini onethando, uJehova!