1. Kansi Yehova ouwona tyani moyo wasu?

 YELEKEZELANI kuti muyanu wakupasani chithunzi cholembewa mwaluso chakale koma cha—ntengo wapatali. Chithunzi chamene icho chili na malo ayakine afipa komasoti owonongeka. Olo kuti vili tetyo, chithunzi chamene icho n’chodula mwakuti chingagulisiwe na ndalama zokwana madola mamiliyoni. N’vowonekelatu kuti mungatembeje komasoti mungochiteteza. Molingana na vamene ivi Yehova watipasa mphaso ya ntengo wapatali ya moyo. Ndipo Yove ewonesha kuti otembeja ngako moyo wasu, pechipeleka mwana wake monga dipo yasu.—Yoh. 3:16.

2. Mokatijana na 2 Akorinto 7:1, kansi Yehova oyembekezela kuti tikochita tyani?

² Yehova ni munecho wa moyo. (Sal. 36:9) Ntumwi Paulo evomekeja mfundo ya choonadi yamene iyi pechinena kuti: “Chifukwa cha yove tili na moyo, tuyenda, komasoti tilipo.” (Mac. 17:25, 28) Tetyo m’pomvwika kunena kuti moyo ni mphaso yofumila kuli Mulungu. (Mac. 14:15-17) Koma palipano Mulungu otetezalini moyo wasu modabwisa. M’malo mwake oyembekezela kuti tikochita vonse vatingakwanishe kuti tinkhale na thanzi iweme komasoti kuti tipitilije kumutumikila. (Ŵelengani 2 Akorinto 7:1.) Ndaŵa yanji tufunika kuteteza moyo wasu komasoti thanzi yasu ndipo tingachite tyani vamene ivi?

3. Kansi n’chifukwa chimozi chotyani chutichitisha kuti tikosamalila thanzi yasu?

³ Chifukwa chimozi chamene chutichitisha kuti tikosamalila thanzi yasu n’chakuti tufuna kuti tikotumikila Yehova mwatingakwanishile. (Mk. 12:30) Tufunishisha kutwala “miŵili yasu monga nsembe ya moyo, ituŵa na yovomelejeka kwa Mulungu” tetyo tupewa kuchita vinthu vatuziŵa kuti vingawononge muŵili wasu. (Aro. 12:1) N’chendi kuti olo tiyeje-yeje tyani kulisamalila tingalwale mphela. Koma tuchita vonse vatingakwanishe kuti tinkhale na thanzi iweme chifukwa tufuna kuwonesha Atata ŵasu a kululu kuti tutembeja mphaso ya moyo.

4. Kansi Mfumu Davide yenzefuna chinji?

⁴ Mfumu Davide efotokoza chifukwa chake enzetembeja mphaso ya moyo yechitipasa Mulungu pechilemba kuti: “Kansi milopa yangu ingankhale na phindu yanji keno ningaselukile ku chisengu cha manda? Kansi lito ingakutamandeni? Kansi izalengeze kuti mwewo nimwe wachendi?” (Sal. 30:9) Davide owoneka kuti elemba mawu amene aŵa chakumapeto kwa moyo wake. Koma olo n’tetyo, enzefuna kupitilija mphela kunkhala na moyo wathanzi iweme na cholinga chakuti apitilije kutamanda Yehova. Mosakaikila tonse tufunasoti vamene ivi.

5. Keno nise okalamba olo keno tulwala, kansi tingakwanishe kuchita tyani?

⁵ Matenda komasoti kukulukaja vingatikangishe kuchita vinyinji monga mwetenzechitila poyamba. Vikankhala tetyo tingafoke komasoti kukhumudwa. Koma olo n’tetyo tufunikalini kuwaya-waya nkhani yosamalila thanzi yasu. Ndaŵa yanji tunena tetyo? Chifukwa olo takalamba tyani payakinesoti talwala tyani tingakwanishe kutamanda Yehova monga mwechichitila Mfumu Davide. N’volimbikisa ngako kuziŵa kuti Mulungu otiwona mphela kuti nise ofunika viliye kanthu keno talwala payakine takalamba! (Mt. 10:29-31) Olo kuti timwalile Yove ofunishisha kutiusha. (Yobu 14:14, 15) Patikali na moyo tufunika kuchita vonse vatingakwanishe kuti titeteze thanzi yasu komasoti moyo wasu.

6. Kansi Yehova oyembekezela kuti tikochita tyani pa nkhani ya vakulya na walwa?

⁶ Olo kuti Baibolo ni bukulini yufokoza za thanzi olo za mitundu ya vakulya vatingalye, yutiyavya kuziŵa mwakuganizila Yehova pa nkhani zamene izi. Mwachisanzo, yove yutilimbikisa kuti “chinjilija muŵili wako” ku vinthu vingauwononge. (Mlal. 11:10) Baibolo yulesha kulya ngako komasoti kumwa ngako walwa ndaŵa vamene ivi vingawononge moyo. (Miy. 23:20) Yehova oyembekezela kuti tikolilesha pa nkhani ya kupaka kwa chakulya chatingalye komasoti walwa watingamwe.—1 Akor. 6:12; 9:25.

7. Kansi malangizo apa Miyambo 2:11, angatiyavye tyani kusankha luweme vochita pa nkhani ya thanzi yasu?

⁷ Tingawoneshe kuti tutembeja ngako mphaso ya moyo yechitipasa Mulungu pokatishila ntchito luweme luso yoganiza. (Sal. 119:99, 100; ŵelengani Miyambo 2:11.) Mwachisanzo tingakatishile ntchito luso yoganiza pa nkhani ya vakumwa na vakulya vatusankha. Keno tukonda chakulya chiyakine koma tuziŵa kuti tikalya chutilwalisha kuganiza luweme kutiyavya kuti tikochipewa. Tingawoneshesoti kuti nise oganiza luweme tikoyona mokwanila, kuchita masoŵela otang’isha muŵili nthawe zonse, kunkhala aukhondo komasoti kusamalila pa ng’anda pasu.

8. Kansi Baibolo yuwonesha kuti Mulungu oiwona tyani nkhani yopewa ngozi?

⁸ Chilamulo chechipeleka Yehova kuli Aisiraeli chenze na malangizo amene sembe eŵayavya kupewa ngozi zoyofya zamene sembe zichitika pa ng’anda olo pa malo okatila ntchito. (Eks. 21:28, 29; Deut. 22:8) Keno munthu wapaya muyake mwangozi enzekumana na mavuto akulu. (Deut. 19:4, 5) Chilamulo chenzenenasoti kuti keno munthu wachita mwana mwangozi enzefunika kulangiwa. (Eks. 21:22, 23) Malemba ofotokoza momvwika luweme kuti Yehova ofuna kuti tikoyeja-yeja kupewa ngozi.

9. Kansi tingachite tyani kuti tipewe ngozi? (Onanisoti chithunzi.)

⁹ Tingawoneshe kuti tutembeja mphaso ya moyo yechitipasa Mulungu pokonkha njila zopewela ngozi ku ng’anda komasoti kuntchito. Mwachisanzo, tuchita vinthu mosamala keno tutaya olo kuika kutali na ŵana ŵasu vinthu vosongola, vapoizoni, kapena mankhwala aipa. Tuchitasoti vinthu mosamala na mulilo, vinthu vakupya, vipangizo vamalaiti, ndipo tuwoneshesha kuti tiliyevisiye  paliye ovilolela. Tuyendeshalini motoka tili osokonezeka maganizo chifukwa chakuti tamwa mankhwala ayakine, walwa payakine kusayona mokwanila. Ndipo tuwoneshesha kuti tukatishilalini ntchito vipangizo vamakono tikoyendesha motoka.

10. Kansi tingachite tyani ngozi ya m’chilengedwe ikaliyechitika komasoti ikachitika?

¹⁰ Nthawe ziyakine tingakwanishelini kupewa vinthu viyakine vamene vingachitishe kuti moyo wasu unkhale pangozi. Koma olo n’tetyo vinthu monga nivamene ivi vikachitika tingankhale otetezeka nopulumuka keno tukonkha malangizo akuti tifume m’dela yamene iyo olosoti malangizo ayakine opelekewa na akulu-akulu aboma. (Aro. 13:1, 5-7) Nthawe ziyakine tingaujiwe kuti kuchitike ngozi, tetyo tingachite luweme kukonkha malangizo a akulu-akulu a boma otiyavya kukonzekela. Mwachisanzo, vinkhangakhale voyavya kusunga manzi na vakulya vamene vingawonongekelini komasoti mankhwala othandizila munthu akachitiwa.

11. Keno kwawela matenda opasilana, kansi tufunika kunkhala ofunishisha kuchita chinji?

¹¹ Kansi tingachite tyani keno matenda opasilana ofalikila mudela yatunkhala? Tufunikila kumvwila malangizo angatiteteze monga kusamba m’manja, kunkhala patali na patali, kuvwala masiki komasoti kunkhala kwaseka. Tikoyeja-yeja kukonkheja malangizo amene aŵa tuwonesha kuti tutembeja mphaso ya moyo yechitipasa Mulungu.

12. Kansi mfundo yapa Miyambo 14:15, yutiyavya tyani kusankha malangizo ŵatufunika kumvwila pa nthawe ya masoka achilengedwe?

¹² Panthawe yangozi zosiyana-siyana tingamvwe nkhani zawenye kufumila kuli ayasu, kuli ŵanthu ŵatili nawo pafupi na pafupi komasoti kuli ofalisa nkhani. M’malo mokhulupilila “mawu aliwonse” ŵatamvwa tingachite luweme kumvwila malangizo odalilika kufumila ku boma olo kuli a zaumoyo. (Ŵelengani Miyambo 14:15.) Bungwe yutonga komasoti maofesi a nthambi oyeja-yeja kufufuza mfundo zachendi akaliye peleka malangizo okhuza misonkhano ya mpingo komasoti ntchito yolalikila. (Ahe. 13:17) Kukonkheja malangizo amene aŵa kuyavya kuti sewo komasoti ŵanthu ayakine tinkhale otetezeka. Tuyavyasoti kuti mpingo unkhale na mbili iweme.—1 Pet. 2:​12.

13. Kansi tuwonesha tyani kuti tulemekeza moyo tikomvwila lamulo ya Yehova pankhani ya milopa?

¹³ Amboni za Yehova oziŵika kuti olemekeza kupatulika kwa milopa. Tumvwila lamulo ya Yehova yokhuza milopa pokana kuikiwa mulopa olo patufunika thandizo ya mankwala mokulumija. (Mac. 15:28, 29) Koma olo n’tetyo, vamene ivi vutanthauzalini kuti tufuna kufwa. M’malo mwake tutembeja mphaso ya moyo yechitipasa Mulungu. Tusenga thandizo yofumila kuli madokota owona za mankwala yamene yupamikijapolini kuikiwa milopa.

14. Kansi tingachefye tyani mavuto amene angafune kuti tilondele thandizo ikulu ya mankhwala?

¹⁴ Tikosamalila thanzi yasu pochita vinthu vatakambilana mu nkhani iyi, tingachefye vinthu vamene vingafune kuti tichitiwe opaleshani olo kulondela thandizo ikulu yamankhwala. Ndipo tikankhala na muŵili wathanzi tukulumija kupola keno tachitiwa opaleshoni. Tingachechefyesoti mavuto amene angafune kuti tichitiwe opaleshoni pochosa vinthu vamene vingachitishe ngozi pang’anda pasu olo ku ntchito komasoti keno tukonkheja mosamala malangizo apa nsewu.

15. (a) Ndaŵa yanji n’kofunika kuti mukoyenda na khadi yamene ili na mfundo zukatijana na mwavilili vinthu pamoyo wanu palipano? (Onanisoti chithunzi.) (b) Mokatijana na vatawona muvidiyo, kansi tingachite tyani kuti tisankhe luweme pa nkhani ya thandizo yachipatala yokhuza milopa?

 ¹⁵ Chifukwa chakuti tukonda mphaso ya moyo tulemba Khadi Lopatsa Munthu Mphamvu Zondiimila pa Thandizo Lakuchipatala (onani zimene ndalemba m’katimu) noyenda nayo nthawe zonse. b Pa khadi yamene iyi tulembapo vosankha vasu pankhani ya milopa na thandizo ya mankhwala ayakine. Kansi vemwilemba pa khadi yanu vukatijana na mwaulili moyo wanu palipano? Keno mufunikila kulemba olo kukonzasoti vili pakhadi yanu osawaya-waya. Kufotokoza momvwika luweme pakhadi yasu kungatiyavye kuti osati tichelwe kulondela thandizo ya kuchipatala. Vamene ivi vingayavye soti kuti tipewe kusamvwishishana na ŵanthu ayakine na cholinga chakuti osati tilondele thandizo yamene ingaike moyo wasu pa ngozi. c

16. Kansi tingachite tyani keno tuziŵalini mwatingalembele khadi ya DPA?

¹⁶ Keno nise achilumbwana olo nise ŵanthu  a thanzi iweme, tonse tingachite ngozi payakine kulwala. (Mlal. 9:11) Tetyo, ni chinthu chanzelu kulemba khadi ya DPA. Keno muziŵalini mwamungalembele khadi yamene iyi, mungasenge akulu ampingo wanu kuti akuyavyeni. Ove angakuyavyeni kuziŵa mwamungalembele khadi yamene iyi, koma angakusankhilenilini pankhani ya thandizo ya chipatala chifukwa wamene uyu ni udindo wanu. (Aga. 6:​4, 5) Koma olo n’tetyo, akulu amene awo angakuyavyeni kumvwisha vosankha vanu komasoti kuti muvilembe luweme.

17. Kansi tingawoneshe tyani kuti nise ololela pa nkhani yosankha thandizo ya chichipatala?

¹⁷ Nthawe zinyinji vatusankha pa nkhani yokhuza thanzi yasu olo thandizo yachipatala vunkhala vokatijana na chikumbuntima chasu chophunzisiwa bwino Baibolo. (Mac. 24:16; 1 Tim. 3:9) Pa nthawe yatusankha olo patulaŵila na ŵanthu ayakine vokhuza nkhani zamene izi, tingachite luweme kukonkheja mfundo yapa Afilipi 4:5 yamene yunena kuti, “Ŵanthu onse aziŵe kuti nimwe ololela.” Tikankhala ololela tudelalini ngako nkhaŵa vokhuza thanzi yasu; ndipo tukakamijalini ayakine kuti akoyendela maganizo ŵasu pa nkhani yokhuza thandizo ya chipatala. Tuŵakonda komasoti tuŵalemekeza ngako abale na alongo ŵasu olo kuti vosankha vawo n’vosiyana na vasu.—Aro. 14:10-12.

18. Kansi tingawoneshe tyani kuti tutembeja mphaso yachikondi ya moyo?

¹⁸ Tingawoneshe kuti tutembeja Yehova wamene ni munecho wa moyo pouteteza komasoti pomutumikila na ntima wonse. (Chiv. 4:11) Palipano tikalilimbana mphela na vinthu monga matenda komasoti mavuto ayakine. Koma Nyamalenga wasu enzefunalini kuti tikonkhala na moyo woteti. Kwalombapano atipase moyo wosasila uliye imfwa komasoti vuŵaŵa. (Chiv. 21:4) Koma palipano tuwona kuti ni mwayi wantengo wapatali kunkhala na moyo komasoti kutumikila Atata ŵasu wachikondi Yehova!