1. Bophelo bja rena ke bjo bohlokwa gakaakang go Jehofa?

 NAGANA mogwera wa gago a go neile seswantšho se bohlokwa kudu. Ke sa kgale, se na le ditšhila e bile se palegile. Go sa šetšwe dilo tšeo ka moka seswantšho seo se tura kudu. Ke nnete gore o tlo thabela le go šireletša seswantšho seo. Ka mo go swanago, Jehofa o re neile mpho e bohlokwa e lego bophelo. Ge e le gabotse Jehofa o bontšha gore o tšeela bophelo bja rena godimo ka gobane o ile a neela morwa wa gagwe gore e be sehlabelo.—Joh. 3:16.

2. Go ya ka 2 Bakorinthe 7:1, Jehofa o letetše gore re dire’ng?

² Jehofa ke Mothopo wa bophelo. (Ps. 36:9) Moapostola Paulo o be a dumelelana le se, ka gobane o itše: “Ka yena re na le bophelo, re a sepela e bile re gona.” (Dit. 17:25, 28) Ka gona re ka re bophelo bja rena ke mpho yeo e tšwago go Modimo. E bile o re nea dilo tšeo re di hlokago gore re tšwele pele re phela. (Dit. 14:15-17) Eupša Jehofa ga a re hlokomele ka mohlolo. O letetše gore re dire sohle seo re ka se kgonago gore re itlhokomele mmeleng le moyeng. (Bala 2 Bakorinthe 7:1.) Ke ka baka la’ng re swanetše go itlhokomela gona re ka dira seo bjang?

3. Ke lebaka lefe leo le dirago gore re dule re phetše gabotse mmeleng?

³ Lebaka leo le dirago gore re dule re phetše gabotse mmeleng ke ka gobane re nyaka go hlankela Jehofa ka matla a rena ka moka. (Mar. 12:30) Re nyaka go neela “mebele ya [rena] e le sehlabelo se se phelago, se sekgethwa, se se amogelegago go Modimo,” gore re kgone go  phema go dira dilo tšeo di ka re gobatšago. (Baroma 12:1) Ke nnete gore ka dinako tše dingwe re ka fela re babja le ge re leka ka thata go dula re phetše gabotse mmeleng. Eupša re dira sohle seo re ka se kgonago go dula re phetše gabotse mmeleng le go bontšha Tatago rena wa legodimong gore re leboga mpho yeo a re neilego yona ya bophelo.

4. Kgoši Dafida o be a nyaka go dira’ng?

⁴ Kgoši Dafida o hlalositše gore ke ka baka la’ng a be a tšeela godimo mpho ya Modimo ya bophelo ge a be a ngwala gore: “Ke tla boelwa ke’ng mading a ka ge ke theogela moleteng? Na lerole le tla go reta? Na le tla bolela ka go rereša ga gago?” (Ps. 30:9) Dafida o swanetše go ba a ngwadile mantšu ao ge a be a le kgauswi le go hwa. Eupša o be a ikemišeditše go dula a phetše gabotse ka nako e telele e le gore a kgone go tumiša Jehofa. Ga go pelaelo gore le rena re ikemišeditše go dira se se swanago.

5. Ke eng seo re ka se dirago go sa šetšwe gore re a babja goba re tšofetše?

⁵ Bolwetši le botšofadi di ka re šitiša go se sa kgona go dira dilo tšeo re bego re kgona go di dira peleng. Seo se ka dira gore re se sa kgotsofala e bile re nyame. Eupša ga se ra swanela go fela matla goba go se sa itlhokomela. Ke ka baka la’ng re se ra swanela go dira bjalo? Ka gobane go sa šetšwe gore re tšofetše goba re a babja, re ka kgona go hlankela Jehofa go swana le Dafida. Go kgothatša kudu go tseba gore Jehofa o re tšeela godimo le ge re se ra phethagala! (Mat. 10:29-31) Le ge re ka hwa, o tlo fela pelo ya go re tsoša. (Jobo 14:14, 15) Re na le lebaka le lebotse la gore ge re sa dutše re phela re dire seo se ka se kgonago go itlhokomela.

6. Jehofa o letetše gore re dire eng ge re eja le ge re enwa?

⁶ Le ge Beibele e se puku yeo e re botšago kamoo re swanetšego go itlhokomela ka gona goba dilo tšeo re swanetšego go di ja, eupša e re botša kamoo Jehofa a lebelelago dilo tše ka gona. Ka mohlala o re eletša gore re “efoše nama ya [rena] bošula” bjoo bo tlago go gobatša mebele ya rena. (Mmo. 11:10) Beibele e re eletša gore re se ke ra ja goba ra nwa kudu, ka gobane seo se ka gobatša mebele ya rena. (Die. 23:20) Jehofa o letetše gore re be le boitshwaro ge re eja le ge re enwa. —1 Bakor. 6:12; 9:25.

7. Diema 2:11 e re thuša bjang go dira diphetho tše dibotse ka maphelo a rena?

⁷ Re ka tšea diphetho tšeo di bontšhago gore re tloga re leboga mpho yeo Modimo a re filego yona ya bophelo ka go ba le pono e lekalekanego. (Ps. 119:99, 100; bala Diema 2: 11.) Ka mohlala re ka bontšha pono e lekalekanego ge re kgetha seo re swanetšego go se ja. Ge e ba re rata mohuta o itšego wa dijo eupša re tseba gore di dira gore re babje, re tlo phema go di ja. Re ka dira botse ge re leka go robala ka mo go lekanego, re itšhidulla ka mehla, e bile re hlwekiša mebele ya rena le magae a rena.

8. Beibele e bontšha bjang gore Jehofa o tšeela polokego ya rena godimo?

⁸ Molao woo Jehofa a o neilego Baisiraele o be o tlo ba thuša gore ba pheme go dira dikotsi ge ba le ka magaeng a  bona goba ge ba le mošomong. (Ek. 21:28, 29; Doit. 22:8) Ge motho a be a ka bolaya motho yo mongwe ka phošo, go be go eba ditlamorago tšeo di sa kgahlišego. (Doit. 19:4, 5) Molao o ile wa bontšha gore bao ba ka bolayago ngwana yo a sa lego ka mpeng ya mmagwe ba swanetše go otlwa. (Ek. 21:22, 23) Beibele e bontšhitše gabotse gore Jehofa o nyaka gore re pheme dikotsi.

9. Re ka dira’ng gore re pheme dikotsi? (Bona le seswantšho)

⁹ Re bontšha gore re leboga mpho yeo Modimo a re neilego yona ya bophelo ka go leka go itšhireletša ge re le ka gae le mošomong. Ka mohlala, ge re lahla dilo tša go hlaba, dikhemikhale le dihlare, re di lahla ka tsela yeo di ka se gobatšego batho ba bangwe e bile re netefatša gore bana ba se ke ba hwetša dilo tšeo re di lahlilego. Ge re gotša mollo, re bediša meetse goba re diriša dithulusi, re kgonthišetša gore ga re di tlogele di sa hlokomelwa. Ga re otlele koloi re nwele bjala, re lapile goba re nwele dihlare tšeo di ka dirago gore go be kotsi gore re otlele, e bile ga re diriše difouno ge re otlela.

10. Ke eng seo re ka se dirago pele go e ba dikotsi le nakong ya dikotsi?

¹⁰ Ka dinako tše dingwe ga re kgone go thibela dikotsi tšeo di ka re gobatšago. Se se ka direga ge go eba le dikotsi tša tlhago, mauba a malwetši, le dintwa. Le ga go le bjalo, ge dikotsi tša mohuta wo di tšwelela, re ka leka go se ipee kotsing ka go theetša melao yeo e lego gona mabapi le kiletšo ya mosepelo, go tšwa ka pela lefelong le itšego le melao e mengwe ya baetapele ba mmušo. (Baroma 13:1, 5-7) Re ka itokišeletša tše dingwe tša dikotsi tšeo ka go kwa baetapele ba mmušo ge ba re nea tlhahlo e sa le ka pela. Ka mohlala re ka kgoboketša meetse ao re tlago go a hloka, dijo tšeo di sa bolego ka pela le mokotlana wo o swerego dilo tša kalafo.

11. Re ka dira’ng ge bolwetši bjo bo fetelago go phatlalala mo re dulago gona?

¹¹ Re ka dira’ng ge bolwetši bjo bo fetelago bo phatlalala mo re dulago gona? Re swanetše go latela melao yeo re e newago ke balaodi ba mmušo ya go swana le go hlapa diatla, go apara di mask le go dula re nnoši. Ge re dira dilo tše re bontšha gore re leboga kudu mpho ya Modimo ya bophelo.

12. Molao wa motheo wo o lego go Diema 14:15 o tlo re thuša bjang go kgetha seo re swanetšego go se tshepa nakong ya kotsi?

¹² Nakong ya tšhoganetšo re ka kwa dipego tša maaka go tšwa go bagwera ba rena, baagišane le ditabeng. Go e na le go “dumela mantšu ka moka” ao re a kwago, re swanetše go theetša seo mmušo le dingaka di se bolelago. (Bala Diema 14:15.) Sehlopha se Bušago le diofisi tša makala di dira seo di ka se kgonago gore di tsebe ditaba ka botlalo pele di ka nea diphuthego tlhahlo ka diboka le modiro wa go bolela ditaba tše dibotse. (Heb. 13:17) Ge re latela tlhahlo ye, re tlo itšhireletša ra ba ra šireletša le batho ba bangwe. Re ka dira le gore Dihlatse tša Jehofa di be le botumo bjo bobotse bathong.—1 Pet. 2:12.

13. Re bontšha bjang gore re hlompha bophelo ge re ekwa molao wa Modimo wa mabapi le madi?

¹³ Dihlatse tša Jehofa di tsebja ka go lebelela madi e le a makgethwa. Re kwa molao wa Jehofa ka go gana go tšhela madi le ge go e na le maemo a tšhoganetšo a tša kalafo. (Dit. 15:28, 29) Eupša seo ga se bolele gore re nyaka go hwa. Go e na le moo re hlompha mpho ya Modimo ya bophelo. Re tsoma thušo go dingaka tšeo di ikemišeditšego go re alafago ntle le go re tšhela madi.

14. Re ka dira’ng go phema go dira diophareišene goba go ya ngakeng go sa hlokagale?

¹⁴ Ge re ka itlhokomela ka go diriša dilo tšeo re boletšego ka tšona mathomong a sehlogo se, re tlo phema go dira diophareišene goba go ya ngakeng go sa hlokagale. Ge e ba re itlhokomela, re tlo fola ka pela ge go ka nyakega gore re dire ophareišene. Re ka phema kotsi yeo e ka dirago gore re feleletše re hloka ophareišene ka go tloša dilo tšeo di ka re gobatšago magaeng a rena, mafelong ao re šomelago go ona le go latela melao ya tsela.

15. (a) Ke ka baka la’ng go le bohlokwa gore re dule re swere karata ya DPA? (Bona le seswantšho) (b) Ka ge re bone bidiong, ke bjang re ka tšeago phetho ya maleba mabapi le mohuta wa tša kalafo wo o sepedišanago le madi?

¹⁵ Ka ge re hlompha mpho ya bophelo,  re tlatša karata ya DPA (durable power of attorney) le go dula re e swere ka dinako ka moka. b Karata ye e re thuša go hlalosa gore ga re tšhele madi e bile ga re dumele dikalafo tše dingwe tšeo di sepedišanago le madi. Na o šetše o tladitše karata ya gago ya DPA? Ge e ba o nyaka go e tlatša goba go e beakanya gabotse, o se ke wa dikadika. Ge re ka tlatša karata yeo e sa le ka pela, seo se tlo thuša dingaka gore di se ke tša gakanega ge di re alafa. Le gona seo se tlo netefatša gore ga re hwetše mohuta wa kalafo goba dihlare tšeo di ka re gobatšago.

16. Re ka dira’ng ge re sa kgone go tlatša karata ya DPA?

¹⁶ Go sa šetšwe gore re ba banyenyane goba re phetše gabotse mmeleng, re ka welwa ke kotsi goba ra babja ka nako e nngwe le e nngwe. (Mmo. 9:11) Ka gona e tla ba ga bohlale gore re tlatše karata ya rena ya DPA. Ge e ba o sa tsebe gore karata yeo e tlatšwa bjang, o ka kgopela bagolo ba phuthego ya geno gore ba go thuše. Ba tseba kamoo karata yeo e tlatšwago  ka gona eupša ba ka se go direle diphetho. Bjoo ke boikarabelo bja gago. (Bagal. 6:4, 5) Ba ka go thuša gore o kwešiše karata yeo le gore o kgone go e tlatša.

17. Re ka bontšha bjang gore re na le tekatekano mabapi le tša kalafo?

¹⁷ Diphetho tše dintši tšeo re di tšeago mabapi le mehuta yeo re e amogelago ya tša kalafo, di theilwe Beibeleng. (Dit. 24:16; 1 Tim. 3:9) Ge re tšea diphetho gomme re boledišana le ba bangwe ka tšona, re swanetše go gopola molao wa motheo wo o lego go Bafilipi 4:5 wo o rego: “Anke go lekalekana ga lena go tsebje bathong bohle.” Ge re bontšha tekatekano, ga re dule re tshwenyegile ka go phela gabotse mmeleng goba go nyaka gore batho ba bangwe ba bone dilo ka tsela yeo rena re di bonago ka yona. Re rata bana babo rena le dikgaetšedi e bile re a ba hlompha, le ge diphetho tšeo ba di tšeago di fapana le tša rena.—Baroma 14:10-12.

18. Re ka bontšha bjang gore re leboga mpho ya bophelo?

¹⁸ Re bontšha gore re leboga Jehofa e lego Mothopo wa bophelo ka go mo hlankela le go hlokomela bophelo bjo a re neilego bjona. (Kut 4:11) Ga bjale re swanetše go kgotlelela go babja le go welwa ke dikotsi. Eupša ye ga se tsela yeo Mmopi wa rena a bego a nyaka re phela ka yona. E se kgale o tlo re nea bophelo bjo bo sa felego bjo bo se nago bohloko le lehu. (Kut. 21:4) Eka ga bjale re ka no tšwela pele re thabela go phela le go hlankela Tatago rena yo lerato wa legodimong e lego Jehofa!