1. Yehova naatwara ata amagara gaitu nk’ag’omuhendo?

 KA TUGIRE ngu munywani waawe yaakuha enju. Kwonka enju egyo neetura, erimu oburofa, kandi eine emyatika. N’obu eraabe eri omu mbeera egyo, ekiri ey’omuhendo. Buzima, noija kukunda enju egyo, kandi ogireeberere gye. Nikyo kimwe, Yehova akatuha ekiconco ky’omuhendo, nigo magara gaitu. Kandi, Yehova akooreka ngu naatwara amagara gaitu nk’ag’omuhendo arikuhayo Omwana we nk’ekitambo ahabwaitu.—Yoh. 3:16.

2. Kurugiirira aha 2 Abakorinso 7:1, Yehova naayenda ngu tukore ki?

² Yehova niwe Bukomooko bw’amagara. (Zab. 36:9) Entumwa Paulo nawe akaba naikirizana n’ekyo obu yaagira ati: “Omuriwe, tuba abahuriire, tugyenda kandi tugumaho.” (Byak. 17:25, 28) N’ahabw’ekyo nitubaasa kugira ngu amagara n’ekiconco kuruga ahari Ruhanga. Ahabw’okugira ngu naatukunda, naatuha byona ebirikwetengyesa kuguma turi abahuriire. (Byak. 14:15-17) Kwonka Yehova tarikurinda amagara gaitu omu muringo gw’eky’okutangaaza. Kureka, naayenda ngu twereeberere omu by’omubiri n’omu by’omwoyo nk’oku turikubaasa. (Shoma 2 Abakorinso 7:1.) Ahabw’enki twine kurinda amagara gaitu, kandi ekyo nitubaasa kukikora tuta?

3. Ni nshonga ki emwe erikutureetera kuteeraho kuguma twine amagara marungi?

³ Enshonga emwe erikutureetera kuguma twine amagara marungi, n’okwenda kuheereza Yehova nk’oku turikubaasa.  (Mak. 12:30) Nitwenda kuhayo ‘emibiri yaitu kuba ebitambo ebihuriire, ebirikwera, kandi ebirikusiimwa Ruhanga,’ n’ahabw’ekyo nitwetantara kukora ebintu ebi turikumanya ngu nibibaasa kuta amagara gaitu omu kabi. (Rom. 12:1) N’obu turikubaasa kukora bingi kurinda amagara gaitu, tikirikumanyisa ngu tituraarware. Nitukora kyona eki turikubaasa kworeka Tataitwe ow’omu iguru ngu nitusiima ekiconco ky’amagara.

4. Omugabe Daudi akaba naayenda kukora ki?

⁴ Omugabe Daudi akashoboorora ahabw’enki twine kusiima ekiconco ky’amagara obu yaahandiika ati: ‘Ku ndishuuma omu kiina, eshagama yangye eryangasira ki? Omucuucu nigwija kukuhimbisa, nari gumanyise amazima gaawe?’ (Zab. 30:9) Daudi naabaasa kuba yaahandiikire ebigambo ebyo ari haihi kufa. Kwonka akaba naayenda kuguma ahuriire kugira ngu agumizemu naahimbisa Yehova. Hatariho kubangaanisa, twena ekyo nikyo turikwenda.

5. N’obu twakuba tukuzire munonga nari twine endwara y’amaani, niki eki turikubaasa kukora?

⁵ Okurwara n’okukaikura nibibaasa kuturemesa kukora bingi nk’obu twabaire twine amagara marungi. N’ekirikurugamu, nitubaasa kwehurira kubi nari kwetamwa. Kwonka titwine kurekyera aho kureeberera amagara gaitu. Ahabw’enki? Ahakuba n’obu twakuba tukuzire munonga nari turwaire endwara y’amaani, nitubaasa kuhimbisa Yehova, nk’oku Omugabe Daudi yaakozire. Ka nikihuumuriza kumanya ngu Ruhanga waitu naatureeba nk’ab’omuhendo oyihireho obutahikiirira bwaitu! (Mat. 10:29-31) N’obu twakufa, aine ekihika ky’okutuzoora. (Yob. 14:14, 15) N’ahabw’ekyo, twaba tukihuriire, nitwenda kuteeraho nk’oku kirikubaasika kurinda amagara gaitu.

6. Yehova naayenda ngu tukore ki aha bikwatiraine n’eby’okurya n’eby’okunywa?

⁶ N’obu Baibuli eraabe etari kitabo ekirimu eby’okureeberera amagara n’ebi twine kurya, neeyoreka emiteekateekyere ya Yehova aha nshonga ezo. Nk’eky’okureeberaho, neetuhiga kwetantara ebirikubaasa kushiisha amagara gaitu. (Mub. 11:10) Baibuli neeyoreka ngu omururu n’okunywa amaarwa maingi, nibita amagara gaitu omu kabi. (Enf. 23:20) Yehova naayenda ngu tworekye ngu nitwerinda twaba nitucwamu ahaby’okurya n’eby’okunywa n’obwingi bwabyo.—1 Kor. 6:12; 9:25.

7. Obuhabuzi oburi omu Enfumu 2:11 nibutuhwera buta kucwamu gye aha bikwatiraine n’amagara gaitu?

⁷ Nitubaasa kucwamu omu muringo ogurikworeka ngu nitusiima ekiconco kya Ruhanga eky’amagara turikukoresa okwetegyereza. (Zab. 119:99, 100; shoma Enfumu 2:11.) Nk’eky’okureeberaho, nitubaasa kucwamu gye aha bi turikurya. Nitubaasa kuba nitukunda eky’okurya, kwonka kirikutureetera kurwara, nikiba kiri eky’obwengye kwetantara kukirya. Nitworeka ngu twine okwetegyereza turikubyama ekirikumara, turikumanyiza omubiri, turikwecuma gye, kandi tukaboneza eka yaitu.

8. Baibuli neetwegyesa ki aha miteekateekyere ya Yehova ey’okuba abeerinzi?

⁸ Ebiragiro ebi Yehova yaahaire eihanga rya Israeli bikaba nibitwariramu obuhabuzi bw’okubahwera kwerinda butandu z’amaani kubaho omuka n’aha murimo. (Kur. 21:28, 29; Bir. 22:8) Omuntu ku yaabaire aita mugyenzi we atakigyendereire, ebyabaire birugamu bikaba biba bibi. (Bir. 19:4, 5) Ebiragiro bikaba nibigira ngu owaabaire  aita omwana otakazairwe atakigyendereire akaba aba aine kufubirwa. (Kur. 21:22, 23) Ebyahandiikirwe nibyoreka butunu ngu Yehova naayenda ngu twetantare butandu.

9. Twine kukora ki kubaasa kwetantara butandu? (Reeba n’ebishushani.)

⁹ Nitworeka ngu nitusiima ekiconco kya Ruhanga eky’amagara turikuteeraho kwerinda butandu omu maka gaitu n’aha murimo. Nk’eky’okureeberaho, nitunaga ebirikubaasa kutuhutaaza, emibazi y’obutwa, nari emibazi endiijo, nari tubibiika ahu bitarikubaasa kuhikwa abaana. Nitwegyendesereza twaba nitukoresa omuriro, amaizi garikwotsya, n’ebirikukoresa amashanyarazi. Nitwetantara kuvuga emotoka twaba tutarikubaasa kucwamu gye ahabw’emibazi, amaarwa nari ahabw’okutabyama ekirikumara, kandi nitwanga kuhugibwa ebintu nk’esimu twaba nituvuga ebiiruka.

10. Nitubaasa kukora ki ebirikuta amagara gaitu omu kabi bitakabaireho na bwanyima y’okubaho?

¹⁰ Obumwe, nitubaasa kutazibira ebintu  ebirikuta amagara gaitu omu kabi kubaho. Eki nikitwariramu ebihikiirizi, ebigwererezi, n’obutabanguko. Kwonka embeera nk’ezo zaabaho, nitubaasa kuteeraho kwerinda kuta amagara gaitu omu kabi tutarikugyenda eshaaha zaarengire, nari turikuza omu mwanya ogundi ogw’obuteeka twaragiirwa ab’obushoboorozi kukikora. (Rom. 13:1, 5-7) Obumwe nitubaasa kumanya ebirikubaasa kubaho, n’ahabw’ekyo ni kirungi kworobera obuhabuzi obu ab’obushoboorozi omu kicweka kyaitu barikutuha kwetebeekanisiza ekihikiirizi. Nk’eky’okureeberaho, nikiba kiri eky’oburyo kubiika amaizi nari eby’okurya ebitarikurahuka kujunda n’emibazi erikwetengyesa.

11. Haabaho endwara erikuturira, twine kuba tweteekateekire kukora ki?

¹¹ Nitubaasa kukora ki haabaho endwara erikuturira omu kicweka kyanyu? Twine kworobera obuhabuzi obu ab’obushoboorozi barikutuha, nk’okunaaba engaro, okutahikaana n’abandi, okujwara masiki, n’okweshoroora aha bandi. Twateeraho kukora ebyo, nitworeka ngu nitusiima ekiconco kya Ruhanga eky’amagara.

12. Omusingye oguri omu Enfumu 14:15 nigutuhwera guta kwegyendesereza aha bikwatiraine n’amakuru agarikukwata aha bihikiirizi?

¹² Ku harikugira ekyabaho kitaraariire, nitubaasa kuhurira amakuru gatahikire kuruga ahari banywani baitu, abataahi n’omu makuru. Omu mwanya gw’okwikiriza buri kimwe, twine kuhurira amakuru agahikire kuruga omu gavumenti n’aha bashaho. (Shoma Enfumu 14:15.) Abari aha Kakiiko Akareeberezi na ofiisi z’amataagi nibakora kyona ekirikubaasika kutunga amakuru agahikire batakatuhaire eby’okukuratira aha bikwatiraine n’enteerane z’ekibiina n’omurimo gw’okubuurira. (Heb. 13:17) Twakuratira obuhabuzi obu turikuheebwa, nitwerinda akabi kandi turinda n’abandi. Ekyo nikireetera abantu kugira emiteekateekyere mirungi aha kibiina.—1 Pet. 2:12.

13. Nitworeka tuta ngu nituha ekitiinisa ekiconco kya Ruhanga eky’amagara aha nshonga y’eshagama?

¹³ Abantu baingi nibamanya ngu Abajurizi ba Yehova nibaikiriza ngu eshagama n’erikwera. Nitworobera ekiragiro kya Yehova ekirikukwata aha shagama turikwanga kuteebwamu eshagama, n’obu kyakwetengyesa kutunga obujanjabi ahonaaho. (Byak. 15:28, 29) Kwonka, ekyo tikirikumanyisa ngu nitwenda kufa. Kureka, nituha ekitiinisa ekiconco kya Ruhanga eky’amagara. Nitusherura abashaho abakugu abarikukoresa obujanjabi burungi obutarikutwariramu okuteebwa eshagama kandi abarikwenda kutuhwera.

14. Nitubaasa kwetantara tuta ebirikubaasa kutureetera kusherura obujanjabi bw’amaani?

¹⁴ Twareeberera gye amagara gaitu tukagyendera n’aha buhabuzi oburi omu kicweka eki, nitubaasa kutuubya aha kabi k’okukwatwa endwara z’amaani. Twaguma twine amagara marungi, nitwija kwehangaana kyayetengyesa kushemezibwa na bwanyima y’okushemezibwa. Nitubaasa n’okutuubya aha bintu ebirikubaasa kuturugiramu okushemezibwa, turikunaga ebintu ebirikubaasa kutuhutaaza omu ka n’aha murimo, kandi tukoorobera n’ebiragiro by’aha nguuto.

15. (a) Ahabw’enki kiri kikuru ngu tugume nitugyenda na kaada y’eshagama eriho ebisya? (Reeba n’ekishushani.) (b) Nk’oku kirikworekwa omu vidiyo, nitubaasa tuta kucwamu gye aha ku eshagama eine kukoresibwa omu kuragurirwa?

¹⁵ Ahabw’okusiima ekiconco ky’amagara, nitwijuza kaada erikuturinda kutateebwamu  eshagama, kandi tuguma nitugyenda nayo. b Kaada, neeba erimu okucwamu kwaitu aha bikwatiraine n’okuteebwamu eshagama n’endiijo miringo y’okuragurirwa. Oine kaada ensya erikukurinda kutateebwamu eshagama? Waaba nooyenda kwijuza kaada egyo nari kutunga ensya, kikore ahonaaho. Twahandiika gye okucwamu kwaitu nikiija kutuhwera kuragurirwa ahonaaho. Kandi nikiija kutuhwera kwetantara okuragurirwa nari emibazi erikubaasa kuba ey’akabi aha magara gaitu. c

16. Nitubaasa kukora ki twaba tutarikumanya kwijuza kaada erikuturinda kutateebwamu eshagama?

¹⁶ Yaaba turi bato nari twine amagara marungi, twena nitubaasa kutunga butandu nari kurwara. (Mub. 9:11) N’ahabw’ekyo, nikiba kiri eky’obwengye kwijuza kaada erikuturinda kutateebwamu eshagama. Waaba otarikumanya oku orikubaasa kwijuza kaada egyo, gambira abareeberezi b’ekibiina kyawe kukuhwera. Nibaija kukuhwera kugiijuza, kwonka tibaraakucweremu. Obwo n’obujunaanizibwa bwawe. (Gal. 6:4, 5) Kwonka, nibabaasa kukuhwera kumanya oku oraacwemu, reero okucwamu kwawe okuhandiikye aha kaada.

17. Nitubaasa kworeka tuta emiteekateekyere eringaniire aha bikwatiraine n’amagara?

¹⁷ Bingi ebi turikucwamu aha bikwatiraine n’amagara n’okuragurirwa nibyegamira aha muntu waitu ow’omunda otendekirwe Baibuli. (Byak. 24:16; 1 Tim. 3:9) Ebi turikwenda kucwamu twabigaaniiraho n’abandi, ni kikuru kugyendera aha musingye oguri omu Abafilipi 4:5: “Okworoberana kwanyu [emiteekateekyere yaanyu eringaniire emanywe] abantu boona.” Twaba twine emiteekateekyere eringaniire, titurikwemereza munonga omutima aha bikwatiraine n’amagara gaitu nari kugyemesereza abandi kwikiriza emiteekateekyere yaitu. Nitukunda ab’eishe-emwe na banyaanyazi-itwe kandi nitubaha ekitiinisa, n’obu baakucwamu ebirikutaana n’ebyaitu.—Rom. 14:10-12.

18. Nitubaasa kworeka tuta ngu nitusiima ekiconco ky’amagara?

¹⁸ Nitusiima Yehova, Obukomooko bw’amagara, turikugarinda kandi tukamuha ekirikukirayo oburungi. (Kush. 4:11) Hati, twine kugumisiriza endwara n’ebihikiirizi. Kwonka, ekyo tikyo Omuhangi waitu arikutwendeza. Ari haihi kutuha amagara agatahwaho agatarimu busaasi n’okufa. (Kush. 21:4) Kwonka hati, ni kirungi ahabw’okugira ngu twine amagara, kandi nitubaasa kuheereza Tataitwe ow’omu iguru, Yehova.