1. Йеговӕ нӕ цардӕн цӕйбӕрцӕбӕл аргъ кӕнуй?

 ДӔ ЦӔСТИТӔБӔЛ рауайун кӕнӕ, цума дин де ’мбал хӕдзарӕ балӕвар кодта. Кӕд си барӕвдзӕ кӕнуйнӕгтӕ дӕр берӕ ес, уӕддӕр еци хӕдзари аргъ цалдӕр милиуан доллари кӕнуй. Ӕвӕдзи, еци лӕварӕн хъӕбӕр аргъ кӕндзӕнӕ ӕма имӕ зелдзӕнӕ. Гъе уотӕ нин Йеговӕ дӕр хъӕбӕр хъазар лӕвар искодта – равардта нин цард. Уомӕй уӕлдай ма Йеговӕ ӕ Фурти нивондӕн мах туххӕй ӕрхаста ӕма уомӕй бавдиста, нӕ цардӕн ӕ цӕсти цӕхуӕн устур аргъ ес, уой (Иоан. 3:16).

2. 2 Коринфӕгтӕмӕ 7:1 финст дзурдтӕмӕ гӕсгӕ ни Йеговӕ ци агоруй?

² Йеговӕ ӕй царди Сауӕдонӕ (Пс. 36:9). Апостол Павел уой туххӕй уотӕ загъта: «Мах уой фӕрци цӕрӕн, змӕлӕн ӕма ан» (Гъуд. 17:25, 28). Гъе уомӕ гӕсгӕ нӕ бон ӕй зӕгъун, ӕма цард ӕцӕгӕйдӕр Хуцауи лӕвар ӕй. Е нӕ уарзуй, ӕма нӕ цардӕн цидӕриддӕр гъӕуй, уой нин дӕттуй (Гъуд. 14:15–17). Фал цӕмӕй цӕрӕн, уой туххӕй нӕ Йеговӕ дессаги хузи нӕ радзӕбӕх кӕнуй. Уой фӕндуй, цӕмӕй нӕхецӕй кӕнгӕ ци ӕй, уой кӕнӕн, еба уӕн ӕнӕнез ӕма ин лӕггадӕ кӕнӕн. (Бакӕсӕ 2 Коринфӕгтӕмӕ 7:1.) Цума нӕ нӕ цард ӕма не ’нӕнездзийнадӕ гъӕуай кӕнун цӕмӕн гъӕуй ӕма уой нӕ бон куд ӕй кӕнун?

3. Не ’нӕнездзийнадӕ гъӕуай кӕнун ӕхсидзгӕ цӕмӕн ӕй?

³ Не ’нӕнездзийнадӕ дзӕбӕх цӕмӕн гъӕуама уа? Еу гъуддаг уой медӕг ӕй, ӕма нӕ фӕндуй Йеговӕн не ’гас хъауритӕй лӕггадӕ кӕнун (Мар. 12:30). Нӕ нисан ӕй, Ромӕгтӕмӕ 12:1 финст унаффӕмӕ гӕсгӕ архайун: «Уӕ бауӕртӕ раттетӕ уодӕгас, кӕдзос ӕма, Хуцауӕн ӕхцӕуӕн ка ӕй, уӕхӕн  нивондӕн». Уомӕ гӕсгӕ, не ’нӕнездзийнадӕн зиан цидӕриддӕр ӕрхӕсдзӕй, уомӕй нӕхе гъӕуай кӕнӕн. Дзубанди дӕр ибӕл нӕййес, цийфӕнди ма кӕнӕн, уӕддӕр нӕ бон нӕй, нӕхе еугур незтӕй дӕр багъӕуай кӕнун. Фал нӕхецӕй кӕнгӕ ци фӕууй, уой ба фӕккӕнӕн, цӕмӕй нӕхе незтӕй гъӕуай кӕнӕн. Мах фӕндуй нӕ уӕларвон Фидӕн бавдесун, ци лӕвар нин искодта, уомӕн устур аргъ ке кӕнӕн.

4. Паддзах Давиди ци фӕндадтӕй?

⁴ Паддзах Давид балӕдӕрун кодта, Хуцауи лӕварӕн уӕхӕн устур аргъ цӕмӕн кодта, уой. Е загъта: «Арф ингӕнмӕ ку ниххезон, уӕд мӕ тогӕй ци пайда уодзӕй? Цума дӕ сикъит искадгин кӕндзӕй? Дӕ еузӕрдондзийнади туххӕй дзордзӕй?» (Пс. 30:9). Аци дзурдтӕ Давид, ӕвӕдзи, ӕ мӕлӕти размӕ загъта, фал уӕддӕр ӕ къохтӕ не ’руагъта, уомӕн ӕма ’й нӕ фӕндадтӕй сӕйун. Фӕндадтӕй ӕй цӕрун, ӕма цалинмӕ ӕ бон ӕй, уӕдмӕ Йегови кадгин кӕнун. Дзубанди дӕр ибӕл нӕййес, мах не ’гасейдӕр уотӕ архайун ке фӕндуй.

5. Цийфӕнди кари ма уӕн ӕма цийфӕнди незтӕй ма сӕйӕн, уӕддӕр нӕ бон ци ӕй кӕнун?

⁵ Хатгай незтӕ кенӕ карӕмӕ гӕсгӕ, адӕймагӕн ӕ бон нӕбал фӕууй, раздӕр цӕйбӕрцӕ кодта, уойбӕрцӕ кӕнун, ӕма е зин куд нӕ фӕууй. Фал уӕддӕр гъӕуама не ’нӕнездзийнадӕбӕл нӕ къох ма ракъуӕрӕн. Цӕмӕннӕ? Уомӕн ӕма нӕбӕл цӕйбӕрцӕфӕнди ма цӕуа ӕма цийфӕнди незтӕй ма сӕйӕн, уӕддӕр нӕ бон ӕй, Паддзах Давиди хузӕн Йегови кадгин кӕнун. Ӕма нин Йеговӕ не ’нӕнхӕстдзийнадӕмӕ кӕсгӕй дӕр аргъ ке кӕнуй, е нин уодӕнцойнӕ куд нӕ хӕссуй! (Матф. 10:29–31). Сауӕнгӕ ма мӕлгӕ ку ракӕнӕн, уӕддӕр хъӕбӕр ӕнгъӕлмӕ кӕсдзӕй, кӕд нӕ райгас кӕндзӕй, еци рӕстӕгмӕ (Иов 14:14, 15). Уомӕ гӕсгӕ ба, цалинмӕ уодӕгас ан, уӕдмӕ нӕ бон цидӕриддӕр ӕй, уой кӕнӕн, цӕмӕй не ’нӕнездзийнадӕ гъӕуай кӕнӕн.

6. Хуӕрдӕ ӕма нин ниуӕзти фӕдбӕл Йеговӕ ци фӕдзӕхсуй?

⁶ Библи ӕнӕнездзийнадӕ ӕма пайда хуӕруйнӕгти туххӕй киунугӕ нӕй, фал си уӕддӕр базонӕн ес, Йеговӕ уой фӕдбӕл ци гъуди кӕнуй, уой. Зӕгъӕн, разӕнгард нӕ кӕнуй, цӕмӕй нӕхе хезӕн, нӕ бауӕрӕн зиан ци ӕрхӕсдзӕй, уомӕй (Еккл. 11:10). Уомӕй уӕлдай ма нӕ фӕдзӕхсуй, цӕмӕй хуӕрдӕй ӕма ниуӕзтӕй бӕрцӕ зонӕн, ӕндӕр ба е не ’нӕнездзийнадӕбӕл лӕгъузӕрдӕмӕ фӕззиндзӕй, кенӕ ба ма мӕлӕтмӕ дӕр ӕркӕндзӕй (Ӕмб. 23:20). Йегови фӕндуй, цӕмӕй хуӕруйнагӕй ӕма ниуӕзтӕй бӕрцӕ зонӕн, удта ци хуӕрдзиан ӕма ци ниуаздзиан, уой ӕвзаргӕй дӕр хебӕл хуӕцун зонӕн (1 Кор. 6:12; 9:25).

7. Ӕмбесӕндти 2:11 финст дзурдтӕ нин куд ӕнхус кӕнунцӕ, не ’нӕнездзийнади фӕдбӕл раст унаффитӕ хӕссун?

⁷ Хуцау нин цард ке балӕвар кодта, уой туххӕй си боз ке ан, e цӕмӕй нӕ унаффитӕй бӕрӕг уа, уой туххӕй нӕ гъӕуй лӕдӕргӕдзийнадӕ (Пс. 119:99, 100; бакӕсӕ Ӕмбесӕндтӕ 2:11). Зӕгъӕн, ци хуӕрӕн, уомӕ лӕмбунӕг уодзиан. Цӕхуӕндӕр хуӕруйнаг нӕ зӕрдӕмӕ ку цӕуа, фал ӕй ку зонӕн, ӕма нин зиан ӕрхӕсдзӕй, уӕд ӕй нӕ хуӕрдзиан. Лӕдӕргӕ ке ан, е ма бӕрӕг уодзӕй, фагӕ рӕстӕг ку фунӕй кӕнӕн, не ’уӕнгтӕ ку змӕлун кӕнӕн, удта нӕхе дӕр ӕма нӕ хӕдзарӕ дӕр кӕдзос ку дарӕн.

8. Библи куд ӕргом кӕнуй, Йеговӕ ӕдасдзийнадӕмӕ цӕхуӕн цӕстӕй кӕсуй, уой? Ба ’й лӕдӕрун кӕнӕ.

⁸ Йеговӕ израилӕгтӕн ци закъон равардта, е сӕ гъӕуай кодта, цӕмӕй сӕбӕл хӕдзари дӕр ӕма косгӕй дӕр маци фидбилиз ӕрцудайдӕ (Рац. 21:28, 29; Дук. з. 22:8).  Еу адӕймаг инней ӕнӕбари ку рамаридӕ, уӕд ӕхе цардӕн дӕр тӕссаг фӕууидӕ (Дук. з. 19:4, 5). Уомӕй уӕлдай ма закъонмӕ гӕсгӕ, ка нӕма райгурдӕй, еци сувӕллонӕн зиан ка ракӕнидӕ, е дӕр гъӕуама ӕфхуӕрд баййафтайдӕ (Рац. 21:22, 23). Мадта, Библийӕй хуарз зиннуй, Йегови ке нӕ фӕндуй, цӕмӕй ӕдасдзийнадӕмӕ уӕлӕнгай цӕстӕй кӕсӕн.

9. Нӕ бон ци ӕй кӕнун, цӕмӕй фидбилиз ма ӕрцӕуа? (Кӕсӕ ма хузӕмӕ.)

⁹ Царди туххӕй Хуцауӕй боз ке ан, уой бавдесдзиан, нӕхе цард дӕр ӕма иннети цард дӕр тӕссаг уавӕри ку нӕ гӕлдзӕн, уӕд, фӕнди хӕдзари уа, фӕнди ба кусти. Зӕгъӕн, саст кенӕ циргъ дзаумӕуттӕ, химикаттӕ ӕма ка нӕбал бӕззуй, уӕхӕн хуастӕ гӕлдзгӕй гъӕуама батухсӕн, цӕмӕй ӕнӕбари зиан макӕмӕн ӕрхӕссонцӕ ӕма сӕ сувӕллӕнттӕ дӕр ма иссеронцӕ. Уомӕй уӕлдай ма лӕмбунӕг фӕууӕн арти хӕццӕ архайгӕй, тӕвдӕ дон кенӕ уӕхӕн естӕй хӕццӕ ӕма аллихузи электроинструментти хӕццӕ ку фӕккосӕн, уӕд, ӕма сӕ ӕнӕ цӕстӕ фӕддаргӕй нӕ фӕууадзӕн. Удта машинӕбӕл дӕр не ’сбадӕн, хуасти туххӕй лӕмбунӕг ун нӕ бон ку нӕ фӕууй, ку баниуазӕн, фур фӕллад кенӕ ӕнӕхуссӕг ку фӕууӕн, уӕд, ӕма цӕугӕ-цӕугӕй дӕр телефонӕй нӕ фӕппайда кӕнӕн.

10. Нӕ бон куд ӕй нӕхе бӕллӕхмӕ бацӕттӕ кӕнун?

¹⁰ Цардӕн тӕссаг ка ӕй, уӕхӕн уавӕртӕй нӕхе аллихатт багъӕуай кӕнун нӕ бон нӕ фӕууй. Уӕлдайдӕр ба уотӕ фӕууй, ӕрдзон бӕллӕх ку ӕрцӕуй, ести нез ку исистуй кенӕ тугъд ку райдайуй, уӕд. Фал уӕхӕн ести бӕллӕх ку ӕрцӕуа, уӕддӕр нӕ бон ӕй архайун, цӕмӕй нӕ цард багъӕуай кӕнӕн. Кутемӕй? Зӕгъӕн, хецауадӕмӕ ку игъосӕн, уотӕ ку зӕгъонцӕ, ӕма изӕрӕй кӕцидӕр сахатти фӕсте ӕндӕмӕ рацӕун не ’нгъезуй, кенӕ ба кӕцидӕр рауӕнӕй ӕдасдӕр рауӕнмӕ рандӕ ун ке гъӕуй (Ром. 13:1, 5–7). Цӕхуӕндӕр бӕллӕх ке ӕрцӕудзӕй, уой хатгай рагацау фӕууй базонӕн ӕма уомӕ гӕсгӕ хуарз уайдӕ, бунӕттон хецауадӕ ци амундтӕ ратта, уонӕмӕ игъосун. Зӕгъӕн, нӕ бон ӕй дон ӕрӕмбурд кӕнун, удта тагъд ка нӕ лӕгъуз кӕнуй, уӕхӕн хуӕруйнӕгтӕ ӕма хуастӕ ӕрцӕттӕ кӕнун.

11. Ести хуӕцгӕ нез ку рапурхӕ уа, уӕд куд гъӕуама архайӕн?

¹¹ Ци гъӕуама кӕнӕн, кӕми цӕрӕн, уоми ести хуӕцгӕ нез ку рапурхӕ уа, уӕд? Гъӕуама хецауади амундтӕмӕ игъосӕн. Зӕгъӕн, фӕззӕгъунцӕ нин, цӕмӕй къохтӕ арӕхдӕр ӕхснӕн, кӕрӕдземӕ ӕгӕр хӕстӕг ма цӕуӕн, маскитӕ дарӕн ӕма нӕ бон цидӕриддӕр ӕй, уой кӕнӕн, цӕмӕй нез хъӕбӕрдӕр ма рапурхӕ уа. Еци амундтӕмӕ гӕсгӕ ку архайӕн, уӕд ӕй ӕвдесдзиан, ке аргъ кӕнӕн Хуцауи лӕварӕн – цардӕн.

12. Ӕмбесӕндти 14:15 финст унаффӕ нин куд банхус кӕндзӕй, бӕллӕхи рӕстӕг, ӕууӕнкӕ кӕбӕл ес, уой исбӕрӕг кӕнун?

¹² Ести бӕллӕх ку ӕрцӕуй, уӕд берӕ аллихузи информаци фегъосӕн. Зӕгъӕн, не ’мбӕлттӕй, нӕ синхонтӕй ӕма фӕстаг хабӕртти. Фал ци фегъосӕн, уомӕй алцӕбӕл ӕууӕндӕн нӕ фӕууй. Алли дзурдбӕл ӕууӕндуни бӕсти хуӕздӕр уайдӕ, хецауадӕй ӕма дохтиртӕй ӕууӕнкӕ кӕбӕл ес, уонӕмӕ игъосун. (Бакӕсӕ Ӕмбесӕндтӕ 14:15.) Не ’мбурдтӕ ӕма игъосун кӕнуни гъуддаги фӕдбӕл амундтӕ раттуни размӕ бал Разамонӕг совет ӕма филиалтӕ гъуддагмӕ лӕмбунӕг ӕркӕсунцӕ (Дзиуит. 13:17). Уони разамундмӕ гӕсгӕ ку архайӕн, уӕд нӕхе дӕр ӕма иннети дӕр багъӕуай кӕндзиан, зиан ци ӕрхӕсса, уомӕй. Удта коммӕгӕс ку уӕн, уӕд уой фӕрци Йегови Ӕвдесӕнтӕн аци дуйней астӕу хуарз ном уодзӕй (1 Пет. 2:12).

13. Тоги хӕццӕ баст фарстатӕй куд рабӕрӕг уй, цардӕн устур аргъ ке кӕнӕн?

¹³ Беретӕ ’й зонунцӕ, Йегови Ӕвдесӕнтӕ тог табуйагбӕл ке нимайунцӕ. Ӕвваст нӕ дохтирти ӕнхус ку багъӕуй ӕма нин тог ку фӕууадзун кӕнунцӕ, уӕд дӕр не ’сарази уӕн, уомӕн ӕма мах архайӕн, Йеговӕ тоги фӕдбӕл ци закъӕнттӕ равардта, уонӕмӕ гӕсгӕ (Гъуд. 15:28, 29). Фал е уобӕл дзорӕг нӕ фӕууй, ӕма нӕ рамӕлун фӕндуй. Мах устур аргъ кӕнӕн Хуцауи лӕварӕн – цардӕн. Дохтирти ӕнхус нӕ ку фӕгъгъӕуй, уӕд ӕнхус ракорӕн, ӕнӕ тогӕй дзӕбӕх кӕнунмӕ цӕттӕ ка фӕууй, уонӕй.

14. Нӕхе бон ци ӕй кӕнун, цӕмӕй нӕ операци кенӕ дохтирти ӕнхус ма багъӕуа?

¹⁴ Аци статьяй ци унаффитӕ адтӕй, уонӕмӕ гӕсгӕ ку архайӕн ӕма не ’нӕнездзийнадӕмӕ нӕ цӕстӕ ку дарӕн, уӕд нӕ, ка ’й зонуй, операци кенӕ дохтирти ӕнхус ма багъӕуа. Не ’нӕнездзийнадӕ федар ку уа, уӕд операций фӕсте дӕр нӕхемӕ тагъддӕр ӕрцӕудзиан. Уомӕй уӕлдай ма гъӕуама хӕдзари, кусти ӕма машинӕбӕл цӕугӕй ӕдасдзийнадӕмӕ нӕ гъос дарӕн. Уотемӕй нӕхе аллихузи фидбилизтӕй багъӕуай кӕндзиан ӕма нӕ ӕвваст дохтирити ӕнхус нӕ багъӕудзӕй.

15. а) Тоги гӕгъӕди алкӕддӕр нӕ хӕццӕ цӕмӕн гъӕуама уа ӕма си ци финст ес, е ке нӕ базӕронд ӕй, уомӕ нӕ гъос цӕмӕн гъӕуама дарӕн? (Кӕсӕ ма хузӕмӕ.) б) Тоги хӕццӕ баст ка ӕй, уӕхӕн дзӕбӕх кӕнуни мадзӕлтти фӕдбӕл нӕ бон куд ӕй раст унаффӕ рахӕссун? (Кӕсӕ феппайуйнаг.)

 ¹⁵ Цардӕн ке аргъ кӕнӕн, уомӕ гӕсгӕ нӕ хӕццӕ алкӕддӕр фӕддарӕн нӕ тоги гӕгъӕди («Волеизъявление и доверенность относительно медицинского вмешательства»). Уоми бӕлвурдӕй финст фӕууй нӕ фӕндон тог бауадзуни ӕма ӕндӕр процедурити фӕдбӕл. Дӕу ба дӕ тоги гӕгъӕдимӕ нӕуӕгӕй ӕркӕсун нӕ гъӕуй? Кӕд гъо, уӕд ӕй нӕуӕгӕй байдзаг кӕнӕ. Еци гъуддаг исонибонмӕ ма уадзӕ. Нӕ фӕндон гӕгъӕдибӕл бӕлвурдӕй финст ку уа, уӕд багъӕуаги еци гъуддӕгтӕбӕл рӕстӕг харз кӕнун нӕбал гъӕудзӕй, удта ма нин уой фӕрци дохтиртӕ нӕ рафинсдзӕнцӕ, не ’нӕнездзийнадӕн зиан ка ӕрхӕсса, уӕхӕн хуастӕ b.

16. Тоги гӕгъӕдий ци финсгӕ ’й, уой ку нӕ зонӕн, уӕд нин ци кӕнгӕ ’й?

¹⁶ Адӕймаг ӕригон ӕма федар ку уа, уӕддӕр фидбилиз ӕма незтӕй хизт нӕ фӕууй (Еккл. 9:11). Уомӕ гӕсгӕ, хуарз уайдӕ тоги гӕгъӕди рагацау байдзаг кӕнун. Кӕд си ци финсгӕ ’й, уой нӕ зонис, уӕд хестӕр нӕлгоймӕгтӕй ӕнхус ракорӕ. Етӕ дин банхус  кӕндзӕнцӕ, фал дӕ бӕсти ба унаффӕ нӕ хӕсдзӕнцӕ. Унаффӕ дӕхецӕн хӕсгӕ уодзӕй (Гал. 6:4, 5). Фал дин етӕ уӕддӕр балӕдӕрун кӕндзӕнцӕ, дзӕбӕх кӕнунмӕ цӕхуӕн мадзӕлттӕ ес, удта дин банхус кӕндзӕнцӕ дӕ фӕндон гӕгъӕдибӕл ниффинсун.

17. Не ’нӕнездзийнади хӕццӕ баст фарстати лӕдӕргӕй ке архайӕн, е цӕмӕй бӕрӕг уодзӕй?

¹⁷ Библийӕй ци базонӕн ӕма не ’фсарӕ цӕбӕл исахур кӕнӕн, е нин арӕх банхус кӕнуй не ’нӕнездзийнади ӕма дзӕбӕх кӕнуни фӕдбӕл унаффӕ рахӕссун (Гъуд. 24:16; 1 Тим. 3:9). Цӕхуӕндӕр фарста нӕ ниллух кӕнун ку фӕгъгъӕуй ӕма уой фӕдбӕл иннети хӕццӕ ку фӕдздзорӕн, уӕд гъӕуама архайӕн Филиппӕгтӕмӕ 4:5 финст дзурдтӕмӕ гӕсгӕ: «Уӕ лӕдӕргӕдзийнадӕй уӕ зонӕд алкедӕр». Лӕдӕргӕй ку архайӕн, уӕд не ’нӕнездзийнадӕбӕл фур мӕтӕ нӕ кӕндзиан, удта иннети дӕр нӕхе гъудибӕл нӕ араздзиан. Мах хуӕртӕ ӕма ӕнсувӕрти уарздзиан ӕма сӕ нимайдзиан, мах хузӕн ку нӕ гъуди кӕнонцӕ, уӕд дӕр (Ром. 14:10–12).

18. Царди туххӕй боз ке ан, уой нӕ бон куд ӕй бавдесун?

¹⁸ Царди туххӕй боз ке ан, уой нӕ бон куд ӕй бавдесун? Нӕ цард ку гъӕуай кӕнӕн ӕма нӕмӕ хуӕздӕрӕй ци ес, уой Йеговӕн ку дӕттӕн, уӕд (Рарг. 4:11). Абони ни незтӕ ӕма бӕллӕхтӕй хизт неке ӕй, фал нин не Сфӕлдесӕги зӕрдӕ уӕхӕн цард нӕ зӕгъуй. Тагъд рӕстӕги нин балӕвар кӕндзӕй, рист ӕма мӕлӕт кӕми нӕ уодзӕй, уӕхӕн цард (Рарг. 21:4). Цалинмӕ еци рӕстӕг нӕ ралӕудтӕй, уӕдмӕ ба бал аргъ кӕнӕн цардӕн ӕма нӕ уӕларвон Фидӕ Йеговӕн лӕггадӕ кӕнун нӕ бон ке ӕй, уомӕн!