1. Akin et nibaga tayon mabmabli ed si Jehova so bilay tayo?

 IMADYIN mo pa ya walay kaarom ya inikdan to kay datdaan balet ta mabmablin painting. Kinmupas lay kolor to tan wala met la ray mantsa to. Pero lapud obra-maestra itan, milyon-milyon so presyo to. Kanian seguradon al-alwaran mo itan ya painting. Say bilay tayo et singa satan ya painting. Mabmabli itan ya regalo nen Jehova. Nibaga tayon mabmabli ed si Jehova so bilay tayo ta inter toy mismon Anak to pian nadondon itayo.—Juan 3:16.

2. Base ed 2 Corinto 7:1, antoy iilaloan nen Jehova ya gawaen tayo?

² Si Jehova so “subol” o nanlapuan na bilay. (Sal. 36:9) Oniay imbaga nen apostol Pablo: “Lapud [Dios] et walay bilay tayo tan onggagalaw itayo tan wala itayo.” (Gawa 17:25, 28) Atan so rason no akin ya nibaga tayon say bilay et regalo na Dios. Diad tua, inter toy amin ya nakaukolan tayo pian tuloytuloy tayon manbilay. (Gawa 14:15-17) Pero agmanggagaway milagro si Aman Jehova natan pian naprotektaay bilay tayo. Labay to ya gawaen tayoy betang tayo—ilaloan ton asikasoen tayoy laman tayo, pati say espiritualidad tayo. (Basaen so 2 Corinto 7:1.) Akin et importante ya asikasoen tayoy laman tayo tan lanang tayon manalwar, tan panon tayon nagawaan itan?

3. Antoy sakey ya rason akin et aasikasoen tayoy laman tayo?

³ Say sakey ya rason no akin ya aasikasoen tayoy laman  tayo et lapud labay tayon usaren so biskeg tayo diad panlingkor tayod si Jehova. (Mar. 12:30) Iiwasan tayo ray nayarin panlapuan na sakit ta labay tayon iyapay so “laman [tayo] bilang mabilay a bagat, masanto tan makapaliket ed Dios.” (Roma 12:1) Siempre anggan antoy alwar tayo, agto labay ya ibagan agtayo lan balot mansakit. Anggaman ontan, aasikasoen tayoy laman tayo ta labay tayon ipanengneng ed si Aman Jehova ya papablien tayo so bilay ya inregalo to.

4. Base ed Salmo 30:9, antoy imbaga nen Arin David ya rason akin et ontan lay panamabli tod bilay ya inregalo na Dios ed sikato?

⁴ Pinabpabli nen Arin David so bilay ya inregalo na Dios ed sikato. Oniay imbaga ton rason no akin: “Antoy nagunggona diad ipatey ko, diad ilasur ko ed abot? Nirayew ka ni kasi na dabok? Nipaamta to ni kasi katooran mo?” (Sal. 30:9) Posiblin insulat itan nen David nen masiken la. Pero mapatpatnag ed satan ya imbaga to ya labay to nin nasuldongan so bilay to pian nairayew to ni si Jehova. Seguradon ontan met so labay tayo.

5. Antoy nagawaan tayo nin siansia anggano walay sakit tayo o matatken tayo la?

⁵ No walay sakit tayo o matatken tayo la, ompan agtayo la nagawaan iray datin gagawaen tayo. Makapaermen tan makapadismaya itan. Pero agto labay ya ibagan paulyanan tayo lay laman tayo. Akin ey? On ta anggano walay sakit tayo o matatken tayo la, nairayew tayo nin siansia si Aman Jehova, ya singa ginawa nen Arin David. Tandaan tayo ya mabmabli tayo nin siansia ed pakanengneng nen Jehova! (Mat. 10:29-31) Diad tua, anggano ompatey itayo, bilayen to tayo ta ontan lay panamabli tod sikatayo. (Job 14:14, 15) Pero legan ya mabilay tayo ni, gawaen tayoy anggaay nayarian tayo ya alwaran so laman tayo.

6. Antoy ibabaga na Biblia tungkol ed panangan tan kakainum?

⁶ Say Biblia et aliwan libro tungkol ed nutrisyon o pangasikaso ed laman, pero naamtaan ditan no anto ray bilin nen Jehova tungkol ed saraya. Singa bilang, bibilinen to tayo ya “ipulisay [tayo] ray bengatlan mauges ed laman.” (Ecl. 11:10) Bibilinen to tayo met ya ag-itayo masiba tan mainum na alak, ta panlapuan itan na sakit. (Pro. 23:20) Labay nen Aman Jehova ya kontrolen tayoy sarili tayo pian naalwaran tayoy panangan tan kakainum tayo.—1 Cor. 6:12; 9:25.

7. Panon ya makatulong so bilin ed Proverbio 2:11 diad pangasikaso tayod laman tayo?

⁷ Nipanengneng tayon papablien tayoy bilay tayo no usaren tayoy “abilidad [tayon] mannonot” no mandedesisyon tayo. (Basaen so Proverbio 2:11; Sal. 119:99, 100) Singa bilang, usaren tayo itan ya abilidad no manpipili tayoy kanen tayo. No paborito tayo so sakey ya naakan pero amta tayon makapuy so epekto tod laman tayo, iwasan tayo la. Regular tayo met ya man-exercise, agtayo puyat lan puyat, tan mapalinis tayo dapat ed laman tan ed abung tayo ta atan so dugan gawaen.

8. Anto ray nabasad Biblia ya pakapatnagan ya importantin maong ed si Jehova so safety?

⁸ Importantin maong ed si Jehova so safety. Singa bilang, diad Mosaikon Ganggan, wala ray espisipikon instruksion tod saray Israelita pian naiwasan da iray aksidente no wala rad abung tan no mankikimey ira. (Exo. 21:28, 29;  Deu. 22:8) No say sakey et akapatey ya agto met ginagala, anien to nin siansia so makapuy ya resulta na agto impanalwar. (Deu. 19:4, 5) Ibabaga met na Ganggan ya no walay mauges ya nagawa ed lukon na sakey ya bii, nadusa so akankasalanan anggano agto itan ginagala. (Exo. 21:22, 23) On, patunay iratan ya labay nen Jehova ya lanang tayon manalwar tan nonoten tayoy safety.

9. Anto ray gawaen tayo pian naiwasan so aksidente? (Nengnengen met so litrato.)

⁹ Ipapanengneng tayon papablien tayoy bilay ya inter na Dios no seguroen tayo ya anggapoy makarisgo diad abung o diad trabaho tayo. Singa bilang, saray kemikal, tambal, tan makdem ya gamit et isinop tayod pasen ya agnaromog na ugugaw. No kailangan tayo lan ibantak iratan, seguroen tayo ya agpanlapuan na aksidente. No nanselsel tayoy apoy, nampool tayo, o manluluto tayo, agtayo iratan bastabasta tataynanan. Manalwar tayo met no manggagamit tayoy power tools tan isinop tayo iratan no agtayo la uusaren. Agtayo mandra-drive no akainum o apuyat tayo tan no walay ininum tayon tambal ya pakapuyen toy inkaalerto tayo. Agtayo met  dapat sankabembenan so cellphone tayo legan tayon mandra-drive.

10. Antoy gawaen tayo antis tan legan na kalamidad?

¹⁰ Wala ray nagagawa ya agtayo kontrolado, singa say isabi na bagyo, yegyeg, epidemya, tan guerra. No nagawa iratan, baleg so posibilidad ya makaligtas tayo tan naiwasan tayoy peligro no unoren tayo ray ganggan na gobierno tungkol ed curfew, pan-evacuate, tan arum nin safety protocol. (Roma 13:1, 5-7) No maminsan, lapud iilaloan la na gobierno so isabi na kalamidad, wala ray iter dan instruksion pian makapanparaan tayo la. Unoren tayoy ibaga ra. Singa bilang, maabig no mantipon tayo lay abasto tan suplay na danum, tan mangiparaan tayo lay first-aid kit.

11. Antoy gawaen tayo no walay onkakalat ya sakit?

¹¹ Panon to no walay onkakalat ya sakit ed lugar tayo? Antoy gawaen tayo? Unoren tayo ray safety protocol ya ibaga na gobierno, singa say social distancing, panuras na lima, pansulong na mask, tan pan-quarantine. No gawaen tayo iratan, ipapanengneng tayo ya papablien tayoy bilay ya inregalo na Dios.

12. No walay kalamidad, panon ya makatulong imay prinsipyo ed Proverbio 14:15 pian ag-itayo bastabasta manisia ed saray fake news?

¹² Legan na kalamidad, ompan wala ray fake news ya ipasa ed sikatayo na kakaaro, kakaabay, tan ompan ibalita ni ingen na media. Imbes ya bastabasta tayo labat manisia, say dengelen tayo et saray napantiwalaan ya impormasyon ya nanlapud saray ahensia na gobierno tan saray eksperto. (Basaen so Proverbio 14:15.) Aaralen ya maong na Mananguley ya Ulop tan saray branch office iray napantiwalaan ya impormasyon antis iran mangiter na instruksion tungkol ed iyatendi ed aral tan panagpulong. (Heb. 13:17) No unoren tayo iratan, naalwaran tayoy bilay tayo tan say bilay na arum, kanian maabig so impresyon na totoo ed sikatayo ran Tasi.—1 Ped. 2:12.

13. No say nalalanor et dala, panon tayon nipanengneng ya papablien tayoy bilay?

¹³ Amta na dakel ya totoo so papanisiaan na Saray Tasi nen Jehova ya sagrado so dala. Anggano emergency, agtayo manpapa-blood transfusion ta uunoren tayoy ganggan nen Jehova ed dala. (Gawa 15:28, 29) Pero siempre, agtayo labay so ompatey. Lapud papablien tayoy bilay, manaanap tayo ray marunong ya doktor ya rerespetoen day desisyon tayon agmanpa-blood transfusion diad pampatambal o pampa-opera tayo.

14. Antoy gawaen tayo pian naiwasan tayoy mansakit na grabe o manpa-opera?

¹⁴ Naiwasan tayoy mansakit na grabe o manpa-opera no unoren tayo ray suggestion ya akauna lan apantongtongan ed sayan artikulo. No bilang ta talagan kaukolan tayoy manpa-opera, naiwasan so komplikasyon tan maka-recover tayon tampol no healthy tayo. Naiwasan tayo met so biglaan ya operasyon no seguroen tayon anggapoy makarisgo diad abung tan diad lugar na trabaho tan no unoren tayoy batas-trapiko.

15. (a) Akin et importante ya awi-awit tayon lanang so updated ya DPA tayo? (Nengnengen met so litrato.) (b) Base ed video ya abitlad paimanod leksab, antoy gawaen tayo antis tayon mandesisyon tungkol ed panagpatambal ya nalalanor so dala?

¹⁵ Lapud papablien tayo so bilay, manfi-fill up tayo na durable power of attorney (advance health-care directive) tan awi-awit tayon lanang itan. b Nabasa ed sayan dokumento  ya agtayo labay so manpa-blood transfusion tan no anto ran panagpatambal so awaten tayo. Kasin updated so awi-awit mon DPA? No kaukolan moy man-fill up o man-update na DPA, gawam lan tampol. Baleg so nitulong na satan ya dokumento ta atan la so mangipaamta ed saray doktor no antoy desisyon mo, kanian naiwasan lay diskusyon lalo la no emergency. Ipaamta met na sayan dokumento ed saray medical staff no anto ran treatment o tambal so agmo awaten ta walay side effect tod laman mo. c

16. Antoy gawaen tayo no agtayo amta no panoy man-fill up na DPA?

¹⁶ Anggano ugaw ka ni o maksil ni laman mo, tandaan mo ya amin tayo et posiblin mansakit, tan agtayo amta no kapigay pakagawa na aksidente. (Ecl. 9:11) Kanian maabig no akaparaan la so apirmaan mon DPA. No agmo amta no panon itan ya i-fill up, patulongan kad saray elder ta kabisado da itan ya dokumento. Pero tandaan mo ya agda ka idesisyonan. Sikay akauley ya mandesisyon. (Gal. 6:4, 5) Pero natulongan da ka pian natalosan mo no anto ray napanpilian mo tan no anto ray isulat mo ed satan ya dokumento.

17. No say pantongtongan et pangasikaso ed laman tan panagpatambal, panon tayon nipanengneng ya makatunongan tayo?

¹⁷ Maslak ed desisyon tayo tungkol ed pangasikaso ed laman tan panagpatambal et ibabase tayod saray naaralan tayod Biblia tan ed konsiensia tayo ya nipasal ed Biblia. (Gawa 24:16; 1 Tim. 3:9) Kanian no mandedesisyon tayo tan paniistoryaan tayoy tungkol ed saratan, iyaplika tayo imay nabasad Filipos 4:5: “Naamtaan komon na amin a totoo a makatunongan kayo.” Nipanengneng tayo ya makatunongan tayo no agtayo sobsobran aburido ed pangasikaso ed laman tayo tan agtayo ipipilit ed arum so opinyon tayo. Inar-aro tayo ray agagi, kanian rerespetoen tayoy desisyon da anggano duma itan ed desisyon tayo.—Roma 14:10-12.

18. Panon tayon nipanengneng ya misatsalamat tayo ed bilay ya inregalo nen Jehova?

¹⁸ On, regalo nen Aman Jehova so bilay tayo. Nipanengneng tayo ya misatsalamat tayod sikato no alwaran tayoy laman tayo tan iter tayoy ‘the best’ tayo ed sikato. (Apo. 4:11) Siempre, itetepel tayo ni natan iray nanduruman sakit, tan aanosan tayo ray nagagawan kalamidad. Pero aliwan onian bilay so labay nen Jehova parad sikatayo. Asingsingger to tayo lan ikdan na bilay ya andi-anggaan ya anggapo lay sakit tan patey. (Apo. 21:4) Legan tayon aalagaren itan, agtayo komon sasayangen so kada agew na bilay tayo. Usaren tayoy biskeg tayo diad panlingkor tayod maar-aron Ama tayo ed tawen, si Jehova!