1. Kon balioso nos bida ta pa Yehova?

 IMAGINÁ ku un amigu a regalá bo un pintura masha bieu pero hopi balioso. Aunke ku el a kuminsá pèrdè koló i e tin mancha i sker, esei no ta kita ku e ta un obra di arte ku ta bal miónes di dòler. No ta asina ku lo bo apresiá i protehá e pintura ei? Asina tambe, Yehova a regalá nos algu masha balioso, nos bida. De echo, Yehova a mustra kon balioso nos bida ta ora el a duna nos su Yu komo un reskate.—Huan 3:16.

2. Segun 2 Korintionan 7:1, kiko Yehova ta ferwagt di nos?

² Yehova ta e Fuente di bida. (Sal. 36:9) Ta esei Apòstel Pablo a referí na dje ora el a bisa: “Pa medio di dje nos tin bida i ta move i ta eksistí.” (Echo. 17:25, 28) P’esei, nos por bisa ku bida ta un regalo di Dios. Yehova stima nos i ta duna nos tur loke nos mester pa keda na bida. (Echo. 14:15-17) Pero, Yehova no ta hasi milager pa tene nos na bida. Mas bien, e ta ferwagt pa nos hasi nos bèst pa kuida nos mes físikamente i spiritualmente. (Lesa 2 Korintionan 7:1.) Dikon nos tin ku protehá nos salú i nos bida, i kon nos por hasi esei?

3. Dikon nos ke purba di keda saludabel?

³ Un motibu pakiko nos lo ke keda saludabel ta pa nos  por sirbi Yehova lo mihó posibel. (Mar. 12:30) Nos ta deseá di presentá nos “kurpa komo un sakrifisio bibu, santu, agradabel pa Dios.” P’esei, nos lo evitá di hasi kos ku nos sa ta bai daña nos salú. (Rom. 12:1) Klaru, ni maske kiko nos hasi, tardi òf trempan nos por bira malu. Pero apesar di esei, nos ta hasi tur loke nos por pa demostrá nos Tata den shelu ku nos ta apresiá su regalo di bida.

4. Kiko Rei David tabata ke hasi?

⁴ Rei David a balorá e bida ku Dios a dun’é. P’esei el a skirbi: “Ki benefisio tin si mi muri, sí, si mi baha den graf? Akaso stòf por alabá bo? Stòf por konta tokante bo fieldat?” (Sal. 30:9) Muy probablemente David a skirbi e palabranan ei un poko tempu promé ku el a muri. Pero ta bisto ku e tabata determiná pa kuida su salú pa asina e por a sigui sirbi Yehova. Sin duda, nos tur ke tin e mesun determinashon ei.

5. Aunke nos ta malu òf nos edat a subi, kiko nos por hasi?

⁵ Si nos ta malu òf di edat, ta difísil pa nos hasi hopi di e kosnan ku nos tabata hasi ántes. Komo resultado, esei por laga nos sinti nos frustrá i deprimí. Pero, esei no mester nifiká ku nos ta bai stòp di hasi esfuerso pa kuida nos salú. Dikon nò? Pasobra, sin importá kon bieu òf malu nos ta, ketu bai nos por sigui sirbi Yehova meskos ku Rei David. Ta un alivio pa sa ku nos ta presioso pa Yehova asta ora nos ta malu òf di edat. (Mat. 10:29-31) I si akaso nos muri, lo e tin masha gana di resusitá nos. (Yòb 14:14, 15) P’esei, miéntras nos ta na bida, nos ke hasi loke nos por pa protehá nos salú i nos bida.

6. Kiko Yehova ta ferwagt di nos ora nos tin ku disidí kuantu nos ta bai kome i bebe?

⁶ Aunke Beibel no ta un buki di salú ni nutrishon, e ta bisa nos sí kiko Yehova ta pensa tokante e kosnan ei. Por ehèmpel, Yehova ta konsehá nos pa no hasi nada ku por kousa daño na nos kurpa. (Ekl. 11:10) Entre e kosnan ku por daña nos salú i asta kaba ku nos bida ta golosidat i buracheria. Tur e dos kosnan ei Beibel ta kondená. (Pro. 23:20) Yehova ta ferwagt pa nos tin dominio propio na momento ku nos tin ku disidí kuantu nos ta bai kome i bebe.​—1 Kor. 6:12; 9:25.

7. Kon e konseho na Proverbionan 2:11 por yuda nos tuma bon desishon tokante nos salú?

⁷ Si nos ke tuma desishon ku ta demostrá ku nos ta gradisidu pa Dios su regalo di bida, nos tin ku siña pensa bon promé. (Sal. 119:99, 100; lesa Proverbionan 2:11.) Por ehèmpel, bo ta wak bon kiko bo ta kome. Si tin un sierto kuminda ku bo sa bon bon ta bai hasi bo malu, bo ta evitá di kome esei. Lo ta sabí tambe pa bo drumi sufisiente, hasi ehersisio regularmente i tene bo kurpa i kas limpi.

8. Segun Beibel, kon importante siguridat ta pa Yehova?

⁸ Yehova a duna e israelitanan algun lei ku lo a yuda nan evitá aksidente grave na kas i na trabou. (Éks. 21:28, 29; Deu. 22:8) Si un hende, sin e por a yuda, a mata un otro, esei tabatin konsekuensianan  serio kuné. (Deu. 19:4, 5) Lei a asta eksigí kastigu pa un hende ku, sin ku e por a yuda, a hasi daño na un yu ku no a nase ainda. (Éks. 21:22, 23, NW) Beibel ta mustra bon kla ku Yehova ke pa nos hasi tur loke nos por pa evitá aksidente.

9. Kiko ta algun kos ku nos por hasi pa evitá aksidente? (Wak e plachinan.)

⁹ Ora nos ta tuma medida di siguridat na kas i na trabou, nos ta demostrá ku nos ta gradisidu pa Dios su regalo di bida. Por ehèmpel, si nos tin ku benta algu skèrpi, un kímiko òf un remedi afó, nos ta hasi esei na un manera safe. Tambe nos ta tene e kosnan ei fuera di alkanse di mucha. Nos ta kuidadoso ora nos ta trata ku kandela, líkido kayente i hèrmènt i ta sòru pa tene bon bista riba nan. Nos lo no stür outo ora nos tin soño òf ora nos ta bou di e efekto di remedi òf di alkohòl. Ni tampoko nos lo no stür ku telefòn den man.

10. (a) Kiko nos por hasi promé ku un kalamidat? (b) Kiko nos tin ku hasi durante un kalamidat?

¹⁰ No ta semper nos por evitá situashon  peligroso manera un desaster natural, epidemia òf konflikto violento. Pero ora nan sosodé, nos mester obedesé òrdu di toke de keda, òrdu pa evakuá i otro instrukshon ku outoridatnan por duna nos. Asina ei nos ta hasi nos bèst pa keda safe i trata di evitá peliger. (Rom. 13:1, 5-7) Di otro banda, tin peliger ku sí nos por prepará p’e. P’esei lo ta bon pa nos sigui e sugerensianan ku e outoridatnan lokal ta duna nos tokante kon pa prepará pa un desaster. Por ehèmpel, kisas lo ta bon pa buska un kaha di E.H.B.O. i tambe pa warda awa i kuminda ku no ta daña lihé.

11. Si tin un epidemia den nos área, kiko nos mester ta dispuesto pa hasi?

¹¹ Kiko nos tin ku hasi si tin un epidemia den nos área? Nos tin ku obedesé e instrukshonnan ku nos ta haña di outoridatnan tokante laba man, distansia sosial, tapaboka i tambe karentena. Ora nos hasi esei, nos lo demostrá Yehova ku nos ta gradisidu pa su regalo di bida.

12. Kon Proverbionan 14:15 por yuda nos diserní ki informashon pa skucha durante kalamidat?

¹² Durante un emergensia nos por haña informashon inkorekto for di nos amigunan, bisiñanan i for di notisia. Na lugá di “kere tur kos” ku nos ta tende, lo ta mihó pa nos skucha e fuentenan mas konfiabel di gobièrnu i di salubridat. (Lesa Proverbionan 14:15.) Kuerpo Gobernante i e sukursalnan ta hasi nan bèst pa buska informashon korekto promé ku nan duna guia tokante nos reunionnan di kongregashon i e trabou di prediká. (Heb. 13:17) Ora nos kooperá, nos ta protehá nos mes i otro hende for di peliger i nos ta duna un bon testimonio na e hendenan den nos komunidat.​—1 Ped. 2:12.

13. Kon nos ta demostrá ku nos ta balorá bida ora nos obedesé Dios su lei tokante sanger?

¹³ Komo Testigunan di Yehova, nos ta respetá santidat di sanger i nos ta bon konosí pa esei. Asta durante un emergensia médiko, nos ta obedesé Dios su lei i ta apstené di sanger. (Echo. 15:28, 29) Djis pasó nos no ta tuma transfushon di sanger no ke men ku nos ke muri. Al kontrario, nos ta stima bida. P’esei, nos ta buska yudansa di profeshonalnan médiko ku ta dispuesto pa duna nos tratamentu di e mihó kalidat i sin sanger.

14. Di ki manera nos por baha e chèns ku nos lo tin mester di un operashon òf un tratamentu médiko serio?

¹⁴ Si nos sigui e sugerensianan ku nos a trata den e artíkulo akí, nos lo kuida nos salú i asina baha e chèns ku nos lo tin mester di un operashon òf un tratamentu médiko serio. Anto si nos kuida nos salú, asta si nos tin ku operá, nos lo por rekuperá hopi mas lihé. Lo ta bon tambe pa nos kita òf drecha e kosnan ku por kousa aksidente na kas òf na trabou i sigui lei di tráfiko. Di e manera ei nos lo por baha e chèns di haña nos ku un operashon di emergensia.

15. (a) Dikon ta asina importante pa nos tin nos deklarashon médiko i apoderashon tur ora huntu ku nos? (Wak e plachi.) (b) Segun e vidio, kon nos por tuma bon desishon tokante uso di sanger?

¹⁵ Debí ku nos ta gradisidu pa Dios su regalo di bida, nos ta yena e deklarashon médiko i apoderashon (instrukshon médiko delantá) i nos tiné huntu ku nos tur ora. b E dokumento ei ta sirbi  pa laga sa nos deseo tokante transfushon di sanger i otro tratamentu médiko. Bo deklarashon médiko i apoderashon ta yená i al dia? Si bo tin ku yena e dokumento òf tin ku pidi un otro, no tarda. Hasié mesora. Si nos indiká nos deseonan bon kla riba e dokumento ei, nos lo haña tratamentu mas lihé pasó nos lo no tin ku pèrdè tempu pa splika nos dòkternan nos desishon. Ademas, nos lo por evitá di risibí tratamentu òf remedi ku por kousa nos daño. c

16. Kiko nos por hasi si nos no sa kon pa yena e deklarashon médiko i apoderashon?

¹⁶ Sin importá kon yòn nos ta òf kon bon nos salú ta, nos tur por haña aksidente òf nos por bira malu. (Ekl. 9:11) P’esei, lo ta sabí pa nos tur tin nos deklarashon médiko i apoderashon yená. Si bo tin duda tokante kon pa yena e dokumento ei, pidi yudansa serka e ansianonan di bo kongregashon. Nan por yuda bo komprondé e opshonnan ku bo tin i kon pa yena e dokumento. Pero, nan lo no tuma desishon médiko pa bo.​—Gal. 6:4, 5.

17. Kon nos por demostrá ku nos ta rasonabel tokante asuntunan médiko?

¹⁷ Hopi desishon ku nos ta tuma tokante nos salú i tratamentu médiko ta basá riba loke nos a siña for di Beibel. (Echo. 24:16; 1 Tim. 3:9) Ora nos tuma desishon i papia ku otro hende tokante loke nos a disidí, lo ta bon pa nos kòrda ku Filipensenan 4:5 ta bisa: “Laga tur hende mira ki rasonabel boso ta.” Un ruman ku ta rasonabel lo no ta opseshoná ku su salú. Ni tampoko lo e no pone preshon pa otro hende tuma e mesun desishonnan médiko kuné. Lo e stima i respetá su rumannan, asta si nan no tuma e mesun desishonnan kuné.—Rom. 14:10-12.

18. Kon nos por demostrá ku nos ta gradisidu pa e regalo di bida?

¹⁸ Yehova ta e Fuente di bida. Nos ta demostrá nos gratitut na dje ora nos ta kuida nos bida i ta dun’é lo mihó di nos. (Rev. 4:11) Lamentablemente, nos tur tin ku trata ku malesa i kalamidat. Pero, esaki no ta e bida ku nos Kreador tabata ke pa nos tin. Pronto lo e duna nos bida eterno kaminda lo no tin doló ni morto mas. (Rev. 21:4) Mientrastantu, laga nos balorá nos bida i us’é pa sirbi Esun ku a regalá nos bida, esta, nos Tata stimá den shelu, Yehova!